« គោលលទ្ធិ និងសេចក្តីសញ្ញា ២៨ ៖ វិវរណៈនៅក្នុងសាសនាចក្រ » ព្រះគម្ពីរគោលលទ្ធិ និងសេចក្ដីសញ្ញា សៀវភៅសិក្សាសម្រាប់គ្រូបង្រៀនថ្នាក់សិក្ខាសាលា ( ឆ្នាំ ២០២៥ )
« គោលលទ្ធិ និងសេចក្តីសញ្ញា ២៨ » ព្រះគម្ពីរគោលលទ្ធិ និងសេចក្ដីសញ្ញា សៀវភៅសិក្សាសម្រាប់គ្រូបង្រៀនថ្នាក់សិក្ខាសាលា
មេរៀនទី ៤៣ ៖ គោលលទ្ធិ និងសេចក្តីសញ្ញា ២៧–២៨
គោលលទ្ធិ និងសេចក្ដីសញ្ញា ២៨
វិវរណៈនៅក្នុងសាសនាចក្រ
នៅឆ្នាំ ១៨៣០ ហៃរាំ ភេច បានអះអាងថាបានទទួលវិវរណៈសម្រាប់សាសនាចក្រតាមរយៈត្បូងពិសេសមួយ ។ សមាជិកសាសនាចក្រមួយចំនួនរួមទាំង អូលីវើរ ខៅឌើរី ផងដែរបានជឿលើគាត់ ។ ដើម្បីឆ្លើយតបទៅនឹងស្ថានភាពនេះ ព្រះអម្ចាស់បានបើកសម្ដែងសេចក្ដីពិតអំពីរបៀបរៀបរយនៃវិវរណៈនៅក្នុងសាសនាចក្រ ។ មេរៀននេះអាចជួយសិស្សឲ្យយល់ពីរបៀបរៀបរយ និងអង្គការដែលព្រះអង្គសង្គ្រោះប្រើដើម្បីបើកសម្ដែងពីព្រះឆន្ទៈរបស់ទ្រង់នៅក្នុងសាសនាចក្ររបស់ទ្រង់ ។
សកម្មភាពរៀនសូត្រដែលអាចមាន
ការធ្វើត្រាប់តាមរបស់សាតាំង
សូមពិចារណាសរសេរពាក្យ ក្លែងក្លាយ និងពាក្យ ពិត ដាក់នៅលើក្ដារខៀន ។ សូមបង្ហាញរបស់របរមួយចំនួនដល់សិស្ស ហើយអញ្ជើញពួកគេឲ្យប្រាប់ថា តើរបស់ទាំងនេះពិត ឬក្លែងក្លាយ ។ ឧទាហរណ៍មួយចំនួនអាចជា ទូរសព្ទពិត ឬទូរសព្ទក្មេងលេង ប្រាក់ពិត ឬប្រាក់ក្លែងក្លាយ ផ្លែឈើពិត ឬផ្លែឈើប្លាស្ទិច និងអ៊ីម៉ែលពិតមកពីធនាគារ ឬអ៊ីម៉ែលក្លែងក្លាយមកពីនរណាម្នាក់ដែលក្លែងធ្វើជាធនាគារ ។
-
តើអ្នកអាចប្រាប់បានយ៉ាងដូចម្ដេច រវាងរបស់ក្លែងក្លាយ និងរបស់ពិតនោះ ?
-
ហេតុអ្វីវាអាចមានគ្រោះថ្នាក់បាន ពេលច្រឡំរបស់ក្លែងក្លាយថាជារបស់ពិតនោះ ?
-
តើការណ៍នេះអាចអនុវត្តចំពោះនរណាម្នាក់ ដែលកំពុងព្យាយាមធ្វើតាមព្រះអង្គសង្គ្រោះក្នុងជីវិតរបស់ពួកគេដោយរបៀបណា ?
សូមអានសេចក្តីណែនាំកណ្ឌសម្រាប់ គោលលទ្ធិ និងសេចក្តីសញ្ញា ២៨ ហើយស្វែងរកស្ថានភាពមួយ ដែលសមាជិកនៃសាសនាចក្រដែលទើបបានរៀបចំថ្មីនេះ ពិបាកនឹងដឹងថាអ្វីដែលពិត និងអ្វីដែលក្លែងក្លាយ ។
វាអាចមានប្រយោជន៍ដើម្បីដឹងថា ហៃរាំ ភេច គឺជាបុរសម្នាក់ដែលបានឱបក្រសោបដំណឹងល្អ ហើយបានជ្រមុជទឹកនៅខែដូចគ្នានឹងខែដែលសាសនាចក្របានរៀបចំឡើង ។ គាត់ក៏ត្រូវបានជ្រើសរើសឲ្យធ្វើជាសាក្សីម្នាក់ក្នុងចំណោមសាក្សីប្រាំបីនាក់អំពីព្រះគម្ពីរមរមនផងដែរ ហើយតែងតែស្មោះត្រង់ចំពោះទីបន្ទាល់របស់គាត់អំពីរឿងនេះ ។
-
ហេតុអ្វីអ្នកគិតថា សូម្បីតែមនុស្សល្អដូចជា ហៃរាំ ភេច និង អូលីវើរ ខៅឌើរី ក៏អាចវង្វេងដោយសារការធ្វើត្រាប់តាមរបស់សាតាំងបានដែរ ?
សូមចំណាយពេលបន្តិចដើម្បីជញ្ជឹងគិតអំពីសំណួរខាងក្រោម ៖
-
តើសាតាំងអាចនឹងព្យាយាមបោកបញ្ឆោតអ្នក និងអ្នកដទៃដែលអ្នកស្គាល់យ៉ាងដូចម្ដេច ?
-
តើព្រះអម្ចាស់បានប្រទានការណែនាំ និងជំនួយអ្វីខ្លះដល់យើង ដើម្បីកុំឲ្យសាតាំងបោកបញ្ឆោតបាន ?
នៅពេលអ្នកបន្ដការសិក្សា សូមរកមើលចម្លើយចំពោះសំណួរទាំងនេះ ។
ចម្លើយរបស់ព្រះអម្ចាស់
ដោយបារម្ភពីអ្វីដែលត្រូវធ្វើនៅក្នុងស្ថានភាពនេះ យ៉ូសែប ស្ម៊ីធ បានចំណាយពេលមួយយប់អធិស្ឋាន ហើយទទួលបានចម្លើយមកពីព្រះអម្ចាស់ ។ វិវរណៈដែលលោកបានទទួល ត្រូវបានកត់ត្រាជា គោលលទ្ធិ និងសេចក្តីសញ្ញា ២៨ ហើយវាសំដៅទៅ អូលីវើរ ខៅឌើរេរី ។
សូមអាន គោលលទ្ធិ និងសេចក្ដីសញ្ញា ២៨:១–៨, ១១–១៣ ហើយរកមើលសេចក្ដីពិតនានា ដែលព្រះអម្ចាស់បានបង្រៀន អូលីវើរ អំពីវិវរណៈ ។ ( សូមចំណាំថា វិវរណៈនៅក្នុង ខទី ៨ អនុវត្តចំពោះការហៅរបស់ អូលីវើរ ឲ្យផ្សព្វផ្សាយទៅកាន់ពួកសាសន៍លេមិន ។ សម្រាប់ព័ត៌មានបន្ថែម សូមមើល « A Mission to the Lamanites » នៅក្នុង Revelations in Context នៅផ្នែក « Church History » នៃបណ្ណាល័យដំណឹងល្អ ) ។
សូមលើកទឹកចិត្តសិស្សឲ្យចែកចាយសេចក្ដីពិតផ្សេងៗអំពីវិវរណៈ ។ សូមពិចារណាសរសេរអ្វីដែលពួកគេបានចែកចាយដាក់នៅលើក្ដារខៀន ។
ប្រសិនបើអ្នកគិតថា វានឹងមានប្រយោជន៍ ឬទាក់ទាញសិស្សកាន់តែខ្លាំង សូមពិចារណាសរសេរសេចក្ដីពិតដូចខាងក្រោមដាក់នៅលើក្ដារខៀន ហើយអញ្ជើញសិស្សឲ្យអាន និងផ្គូផ្គងសេចក្ដីពិតនេះ ទៅនឹងខគម្ពីរដែលបង្រៀនពីសេចក្ដីពិតទាំងនេះ ។
ព្រះអម្ចាស់នឹងប្រទានវិវរណៈដល់សាសនាចក្រទាំងមូល តែតាមរយៈប្រធានសាសនាចក្រប៉ុណ្ណោះ ( សូមមើល ខទី ២ ) ។
ព្រះអម្ចាស់មិនប្រទានវិវរណៈដល់បុគ្គលណា ដើម្បីដឹកនាំនរណាម្នាក់ដែលធ្វើជាអធិបតីលើពួកគេឡើយ ( សូមមើល ខទី ៦–៧ ) ។
ព្រះអម្ចាស់អាចប្រទានវិវរណៈឲ្យយើង ដើម្បីជាប្រយោជន៍ផ្ទាល់ខ្លួនរបស់យើង ហើយដើម្បីជួយដល់យើងក្នុងការហៅ និងការចាត់តាំងរបស់យើង ( សូមមើល ខទី ៨ ) ។
សាតាំងអាចព្យាយាមបោកបញ្ឆោតយើង តាមរយៈវិវរណៈក្លែងក្លាយ ( សូមមើល ខទី ១១ ) ។
ព្រះអម្ចាស់អញ្ជើញថ្នាក់ដឹកនាំរបស់ទ្រង់ឲ្យជួយកែតម្រូវយើង នៅពេលយើងត្រូវបានបោកបញ្ឆោត ( សូមមើល ខទី ១១ ) ។
សូមពិចារណាសុំសិស្សឲ្យចែកចាយនូវអ្វីដែលពួកគេបានរៀនអំពីព្រះអម្ចាស់មកពីកណ្ឌនេះ ។ ពួកគេអាចចែកចាយគោលការណ៍បន្ថែមមួយ ដូចជា ៖ ព្រះអម្ចាស់ដឹកនាំសាសនាចក្ររបស់ទ្រង់ និងប្រជាជនរបស់ទ្រង់តាមរបៀបដ៏មានរបៀបរៀបរយមួយ ។
-
ហេតុអ្វីអ្នកគិតថា ព្រះអម្ចាស់តែងតែប្រទានវិវរណៈស្របតាមគោលការណ៍ទាំងនេះ ?
-
តើការដឹងពីសេចក្ដីពិតទាំងនេះអាចជួយយើងឲ្យចៀសវាងពីការបោកបញ្ឆោតដោយរបៀបណា ?
នៅក្នុងសុន្ទរកថារបស់លោក « លក្ខខណ្ឌសម្រាប់វិវរណៈផ្ទាល់ខ្លួន » អែលឌែល ឌែល ជី រិនឡាន់ ក្នុងកូរ៉ុមនៃពួកសាវកដប់ពីរនាក់ បានចែកចាយការយល់ដឹងមួយចំនួនអំពីដំណើរការនៃការទទួលបានវិវរណៈ ៖
-
« យើងទទួលវិវរណៈផ្ទាល់ខ្លួនក្នុងដែន [ ឬដែនឥទ្ធិពល ] របស់យើងតែប៉ុណ្ណោះ ពុំមែនក្នុងរង្វង់ឯកសិទ្ធិ [ សិទ្ធិ ឬអភ័យឯកសិទ្ធិ ] របស់អ្នកដទៃឡើយ ។ … »
-
« គោលលទ្ធិ បទបញ្ញត្តិ និងវិវរណៈសម្រាប់សាសនាចក្រគឺជាឯកសិទ្ធិរបស់ព្យាការីដែលនៅរស់ ដែលទទួលគោលលទ្ធិ បទបញ្ញត្តិ និងវិវរណៈពីព្រះអម្ចាស់ ព្រះយេស៊ូវគ្រីស្ទ [ សូមមើល គោលលទ្ធិ និងសេចក្ដីសញ្ញា ២១:៤–៥ ] ។ … »
-
« វិវរណៈផ្ទាល់ខ្លួននឹងស្របជាមួយបទបញ្ញត្តិនៃព្រះ និងសេចក្ដីសញ្ញា ដែលយើងបានធ្វើជាមួយនឹងទ្រង់ ។ … »
-
« នៅពេលយើងទូលសូមវិវរណៈណាមួយដែលព្រះបានប្រទានការណែនាំច្បាស់លាស់រួចហើយ នោះយើងនាំឲ្យមានការបកស្រាយអារម្មណ៍ និងការស្ដាប់ឮអ្វីដែលយើងចង់ឮដោយខុសឆ្គង » ( លីអាហូណា ខែ វិច្ឆិកា ឆ្នាំ ២០២២ ទំព័រ ១៦–១៧ ) ។
ឧទាហរណ៍
ដើម្បីជួយសិស្សឲ្យវិភាគពីអ្វីដែលពួកគេបានរៀន សូមបង្ហាញស្ថានភាពដូចខាងក្រោមនេះ ហើយអញ្ជើញសិស្សឲ្យធ្វើដូចខាងក្រោមនេះថ្នាក់រួមគ្នា ឬជាក្រុមតូចៗ ។ សូមកុំស្ទាក់ស្ទើរក្នុងការលុបចោល ឬសម្របសម្រួលស្ថានភាពណាមួយ ដើម្បីធ្វើឲ្យសកម្មភាពនេះកាន់តែទាក់ទងនឹងសិស្សរបស់អ្នក ។
សូមអានស្ថានភាពខាងក្រោមនេះ ហើយស្វែងរកខគម្ពីរ ឬឃ្លាមួយមកពីព្រះបន្ទូលរបស់ព្រះអម្ចាស់ ដែលអ្នកបានសិក្សានៅក្នុង គោលលទ្ធិ និងសេចក្ដីសញ្ញា ២៨ ដែលបង្រៀនថា តើវាអាចជាវិវរណៈពិតឬអត់ ។
-
ព្យាការីលើកទឹកចិត្តសាសនាចក្រទាំងមូលឲ្យចូលរួមក្នុងព្រះវិហារបរិសុទ្ធ ។
-
សមាជិកដែលមានការព្រួយបារម្ភមួយក្រុមបង្រៀនយ៉ាងមុតមាំថា ព្រះសព្វព្រះទ័យចង់ឲ្យសាសនាចក្រធ្វើការផ្លាស់ប្ដូរគោលលទ្ធិ ឬផ្លាស់ប្ដូរគោលនយោបាយមួយទាក់ទងនឹងបញ្ហាលំបាកមួយ ។
-
សមាជិកម្នាក់ជឿថា ព្រះអម្ចាស់បានបើកសម្ដែងដល់គាត់នូវអ្វីដែលប៊ីស្សពគួរតែធ្វើនៅក្នុងវួដរបស់ពួកគេ ។
-
ម្តាយរបស់យុវនារីម្នាក់ប្រាប់នាងថា គាត់មិនសប្បាយចិត្តនឹងជម្រើសជាក់លាក់មួយ ដែលយុវនារីនោះកំពុងធ្វើ ។
-
ខណៈកំពុងដើរលេងជាគូនៅមហាវិទ្យាល័យ យុវមជ្ឈិមវ័យម្នាក់និយាយថា គាត់បានទទួលវិវរណៈថា យុវនារីជាក់លាក់ម្នាក់គួរតែរៀបការជាមួយគាត់ ។
វាអាចមានតម្លៃដើម្បីពន្យល់ថា វាសមរម្យក្នុងការចែកចាយកង្វល់ ឬគំនិតយោបល់ប្រកបដោយសេចក្ដីស្រឡាញ់ជាមួយអ្នកដែលធ្វើជាអធិបតីលើយើង ឬនរណាម្នាក់នៅក្រៅតំបន់បម្រើរបស់យើង ប៉ុន្តែយើងត្រូវតែទទួលស្គាល់ប្រកបដោយការគោរពនូវសិទ្ធិរបស់ពួកគេក្នុងការទទួលបានវិវរណៈស្ដីពីបញ្ហានេះ ។ ឧទាហរណ៍ យុវជនម្នាក់អាចមានអារម្មណ៍បំផុសគំនិតថា ព្រះអម្ចាស់បានអនុម័តឲ្យគាត់សុំយុវនារីម្នាក់រៀបការជាមួយគាត់ ប៉ុន្តែនាងមានសិទ្ធិទទួលបានវិវរណៈផ្ទាល់ខ្លួនរបស់នាង អំពីអ្វីដែលល្អបំផុតសម្រាប់នាង ។
សម្រាប់ឧទាហរណ៍អំពីជីវិតពិតរបស់នរណាម្នាក់ ដែលគិតថា ពួកគេបានទទួលវិវរណៈនៅក្រៅគោលការណ៍ទាំងនេះ សូមមើលវីដេអូនេះ « A Framework for Personal Revelation » ពីនាទីទី ៤:១៤ ដល់នាទីទី ៥:០៧ នៅលើគេហទំព័រ ChurchofJesusChrist.org ។
-
តើការជឿលើការធ្វើត្រាប់តាមរបស់សាតាំងក្នុងស្ថានភាពមិនត្រឹមត្រូវណាមួយខាងលើនេះ អាចទាញយើងឲ្យចេញឆ្ងាយពីព្រះអង្គសង្គ្រោះដោយរបៀបណា ?
ដើម្បីជួយសិស្សឲ្យដឹងពីសារៈសំខាន់នៃវិវរណៈដែលបានប្រទានដោយព្រះអម្ចាស់ តាមរបៀបរបស់ទ្រង់ និងតាមរបៀបរៀបរយរបស់ទ្រង់ សូមអញ្ជើញពួកគេឲ្យឆ្លើយសំណួរយ៉ាងហោចណាស់ពីរក្នុងចំណោមសំណួរដូចខាងក្រោម នៅក្នុងសៀវភៅកំណត់ហេតុការសិក្សារបស់ពួកគេ ៖
-
តើការយល់ដឹងពីរបៀបរៀបរយដែលព្រះអម្ចាស់ប្រើសម្រាប់វិវរណៈរបស់ទ្រង់ អាចជាពរជ័យមួយសម្រាប់អ្នកដោយរបៀបណា ?
-
តើព្រះអម្ចាស់បានប្រទានពរដល់អ្នក ឬនរណាម្នាក់ដែលអ្នកស្គាល់ តាមរយៈវិវរណៈទៅកាន់ព្យាការី អ្នកដឹកនាំស្តេក ឬអ្នកដឹកនាំវួដ ឬឪពុក ឬម្ដាយនៅពេលណាដែរ ?
-
តើអ្នក ឬនរណាម្នាក់ដែលអ្នកស្គាល់ បានទទួលវិវរណៈមកពីព្រះអម្ចាស់ ដើម្បីផ្ដល់ពរជ័យដល់មនុស្សដែលអ្នកត្រូវបានហៅឲ្យផ្ដល់ការងារបម្រើ ឬធ្វើការបម្រើនៅពេលណាដែរ ?
-
តើអ្នកទទួលបានពរជ័យ ដោយសារវិវរណៈមកពីព្រះអម្ចាស់ដែលមានសម្រាប់តែអ្នកនៅពេលណា ?
សូមពិចារណាសុំឲ្យសិស្សជ្រើសរើសចម្លើយមួយ ដែលពួកគេមានអារម្មណ៍ល្អក្នុងការចែកចាយ ។ សិស្សអាចចែកចាយជាថ្នាក់រួមគ្នា ឬសម្រាប់ភាពចម្រុះគ្នា សិស្សអាចស្វែងរកនរណាម្នាក់ដែលពួកគេមិនបានចែកចាយជាមួយនាពេលថ្មីៗនេះ ហើយចែកចាយឧទាហរណ៍របស់ពួកគេ ។ អ្នកណាក៏ដោយដែលពួកគេជ្រើសរើស ក៏អាចចែកចាយបានផងដែរ ។ តាមដែលពេលវេលាអនុញ្ញាត សូមពិចារណាអនុញ្ញាតឲ្យសិស្សមានឱកាសចែកចាយជាមួយសិស្សដទៃទៀត ។ បន្ទាប់មក សូមអញ្ជើញសិស្សបីបួននាក់ឲ្យចែកចាយអ្វីដែលពួកគេបានស្ដាប់ឮពីអ្នកដទៃ ដែលមានអត្ថន័យចំពោះពួកគេ ។ កាលពួកគេធ្វើដូច្នោះ សូមរកមើលវិធីដើម្បីគូសបញ្ជាក់ពីសេចក្ដីល្អ និងសេចក្ដីមេត្តាករុណារបស់ព្រះអម្ចាស់ក្នុងការបើកសម្ដែងសេចក្ដីពិតដល់យើង ។ អ្នកក៏អាចគូសបញ្ជាក់ពីព្រះឆន្ទៈរបស់ទ្រង់ ដើម្បីជួយយើងឲ្យយល់ពីរបៀបរៀបរយ និងការរៀបចំដែលទ្រង់ប្រើផងដែរ ។
អូលីវើរ ខៅឌើរី បានទទួលយកវិវរណៈនេះ ហើយបន្ទាប់ពីការបញ្ចុះបញ្ចូលជាច្រើនមក ហៃរាំ ភេច និងអ្នកផ្សេងទៀតបានបោះបង់វិវរណៈមិនត្រឹមត្រូវទាំងនោះចោល ។
ដើម្បីបញ្ចប់ សូមពិចារណាចែកចាយទីបន្ទាល់របស់អ្នក ។