44-р хичээл: Сургаал ба Гэрээ 29

Сургаал ба Гэрээ 29:1–8

Гэтэлгэгчээ сонсогтун

Аврагчийн биднийг хайрлах хайр

Тэнгэрлэг Эцэг бүх хүүхдээ агуу хайраар хайрладаг. Тэнгэрлэг Эцэг, Түүний Хүү хоёр биднээс энэ амьдралд аз жаргалтай байж, бүх хүнийг Тэдний оршихуйд буцаан цуглуулахад тэдэнтэй нэгдэхийг хүсдэг. Энэ хичээл нь суралцагчдад Тэнгэрлэг Эцэг, Есүс Христ хоёрын тэдний төлөө гэх хүслийг илүү сайн ойлгоход тусална.

Боломжит суралцах үйл ажиллагаа

Та хэнд итгэж найддаг вэ?

Хэн нэгэнд итгэх нь тухайн хүний хүсэл, зорилгыг ойлгохоос ихээхэн шалтгаалдгийг ойлгоход суралцагчдад туслах арга замыг бодож үз. Дараах үйл ажиллагаа нь үүнийг гүйцэтгэх нэг арга зам юм.

Дараах зүйлсийг та хэнд итгэж хуваалцахыг хүсэх байснаа мөн яагаад гэдгээ бодоорой.

1. Гэрийн тань түлхүүр

2. Хувийн төхөөрөмж, аккаунтын нууц үг

3. Таны хамгийн нандин хувийн мөрөөдөл, зорилго

• Та тухайн хүн эсвэл хүмүүст итгэх хүсэлд тань нөлөөлдөг зүйлийн тухай юу мэдэх вэ?

Та Тэнгэрлэг Эцэг, Есүс Христ хоёрын хүсэл, зорилгын талаар юу мэддэгээ дүрслэн, нэг юм уу хоёр өгүүлбэрийг судлах тэмдэглэлдээ бич. Хэрэв та Тэдний хүсэл, зорилгын талаар ямар нэг зүйл мэддэг бол энэ нь тэдэнд итгэх хүсэлд тань хэрхэн нөлөөлж байгааг эргэцүүлэн бод. Хэрэв та Тэдний хүсэл, зорилгын талаар сайн мэддэггүй бол үүнийг мэдэх нь яагаад тэдэнд итгэх хүсэлд тань чухал алхам болохыг бодож үз.

Тэнгэрлэг Эцэг, Есүс Христ хоёрын зорилго

1830 оны 9-р сард Сүмийн чуулган болохын өмнө Аврагч Өөрийн болон Тэнгэрлэг Эцэгийн бүх хүнийг хайрлах хайр, хүслийн талаар ярьсан нь Сургаал ба Гэрээ 29 дээр гардаг.

Дараах үйл ажиллагаа нь Сургаал ба Гэрээ 29:1–8-ыг судлахад суралцагчдад туслах нэг арга зам юм. Үүнийг та ангийнхаа хэрэгцээ, хэмжээнд тааруулан өөрчлөх хэрэгтэй байж болно.

Самбар дээр нэгээс найм хүртэл тоог дугаарлан бич. Тэгээд суралцагчдад дараах зааварчилгааг өг. Дараагийн зааварчилгааг өгөхийн өмнө заавар бүрийг тэд дагасан байх ёстой.

1. Сургаал ба Гэрээ 29:1–8-ыг уншаад, шүлэг тус бүрээс Тэнгэрлэг Эцэг, Есүс Христ хоёрын хүслийн талаар юу олж мэдсэнээ тэмдэглээрэй.

2. Танд онцгой утга учиртай санагдсан шүлгийн дугаарын хажууд нэрээ бич.

   Дараагийн алхам руу шилжихээс өмнө бүх суралцагчийг самбар дээр шүлгийн дугаарын хажууд өөрсдийн нэрийг бичтэл хүлээнэ үү.

3. Хэрэв боломжтой бол яг ижил дугаартай шүлгийн хажууд нэрээ бичсэн хоёр юм уу гурван суралцагчийг цуглуул.

   Хэрэв зөвхөн нэг суралцагч тухайн шүлгийн дугаарын хажууд нэрээ бичсэн байвал бие даан ажиллах эсвэл өөр нэг бүлэгт орох боломжтой.

4. Шүлэг дээрх өөрсдийн тэмдэглэсэн үг, хэллэгүүдийг хуваалц. Эдгээр нь Тэнгэрлэг Эцэг, Есүс Христ хоёрын хүслийн талаар танд юу зааж байна вэ?

5. Тэнгэрлэг Эцэг, Есүс Христ хоёрын хүслийг илүү сайн ойлгоход тань туслах нэг асуултыг бүлгээрээ ярилц.

Бүлэг бүрд ярилцах асуултаа сонгох асуултуудын жагсаалтыг харуулах юм уу өг. Суралцагчид таны санал болгосон асуултуудын жагсаалтаас сонгож эсвэл өөрсдийн асуултуудыг гаргаж ирж болно. Доор зарим жишээг өгөв. Үүнд:

• Энэ үнэнийг ойлгох нь өөрийгөө болон бусдыг харах өнцөгт тань хэрхэн нөлөөлөх вэ?

• Тэнгэрлэг Эцэг, Есүс Христ хоёр эдгээр хүслийг таны болон бусдын амьдралд нотлохыг та хэзээ харсан бэ?

• Ижил төстэй үнэний тухай заадаг ямар өөр нэмэлт судрууд байдаг вэ? (Зарим судрыг олохын тулд төгс эзэмших сургаалын судрын хэсэг, зүүлт тайлбар эсвэл бусад эх сурвалжийг харна уу.)

• Бошиглогч, төлөөлөгч эсвэл бусад Сүмийн удирдагчид энэ үнэнийг батлах юу заасан бэ? (Gospel Library аппликэйшн дээрх мэдэгдлүүдийг хай.)

• Энэ шүлэг амьдралыг мөнхийн талаас нь харах чадвараа өсгөхөд бидэнд хэрхэн туслах вэ?

• Энэ шүлгийн талаар танд ямар асуулт байна вэ? Энэ шүлгийг илүү сайн ойлгохын тулд ямар асуулт тавьж болох вэ? (Боломжит хариултыг олохын тулд хамтдаа ажилла.)

• Энэ шүлэгт заасан зарчимд итгэж, үүний дагуу амьдрах нь Тэнгэрлэг Эцэг, Есүс Христ хоёртой харилцах харилцаанд тань хэрхэн нөлөөлөх вэ?

• Зарим хүнд яагаад энэ шүлэг дэх сургаалд итгэж, үүний дагуу амьдрах нь хэцүү байж болох вэ? Тухайн бэрхшээлийг даван туулахад юу тус болж болох вэ?

Тэдэнд гүн гүнзгий ойлгох боломж олгохын тулд нэг суралцагчаар өөр асуулт сонгуулан, бүлгээрээ ярилцаж болно. Суралцагчид хуваалцахаа болих юм уу анхаарал нь сарниж эхэлбэл энэ нь та суралцах үйл ажиллагаагаа өөрчлөх цаг болсныг илтгэж байж магад. Хэрэв хүсвэл суралцагчид шинэ шүлэг сонгох, шинэ бүлэг үүсгэх, сонгосон шүлгээ ярилцах мөн дээр жагсаасан алхмуудыг дагах маягаар үйл ажиллагааг дахин гүйцэтгэж болох юм.

Суралцагчдыг бүлгээрээ ажиллаж дуусах үед Тэнгэрлэг Эцэг, Есүс Христ хоёрын хүслийн талаар сурч мэдсэн зүйлээ ангийнхантайгаа хуваалцахад цөөн суралцагчийг урь.

Бурханы эрхэм таалал

Суралцагчдын тодорхойлсон олон үнэний дунд эдгээр шүлгээс бид Тэнгэрлэг Эцэг, Есүс Христ хоёр бидэнд хаант улсаа өгөхийг хүсдэг гэсэн үнэнийг сурч болно. Та суралцагчдыг 5-р шүлэг дэх энэ үнэнийг тэмдэглэхэд урьж болно. Дараах мэдэгдлийг хуваалцаж, суралцагчдыг холбогдох асуултад хариулахад урь.

Арван хоёр төлөөлөгчийн чуулгын ахлагч Дэйл Г.Рэнланд ийн хуваалцсан.

Ахлагч Дэйл Г.Рэнланд

Тэнгэрлэг Эцэг маань та нарыг Өөрийнх нь өв залгамжлагчид болж, Өөрт нь байгаа бүхнийг хүлээн аваасай хэмээн хүсдэг. Тэрээр та нарт дахиад илүүг санал болгож чадахгүй. Тэрээр та нарт дахиад илүүг амлаж чадахгүй. Тэрээр та нарыг мэддэгээс тань илүү хайрладаг бөгөөд та нарыг энэ амьдралд болон ирэх амьдралд аз жаргалтай байгаасай хэмээн хүсдэг. (Дэйл Г.Рэнланд, “Таны бурханлаг шинж чанар ба мөнхийн хувь тавилан,” Лиахона, 2022 оны 5-р сар, 77)

• Тэнгэрлэг Эцэг, Есүс Христ хоёрын хүслийг ойлгох нь Тэдний талаарх таны мэдрэмжид хэрхэн нөлөөлдөг вэ?

• Тэдний хүслийг ойлгох нь бидэнд өгсөн Тэдний зөвлөгөөний талаарх таны мэдрэмжид хэрхэн нөлөөлөх вэ?

Хичээл эхлэхэд тэмдэглэлдээ бичсэн зүйлээ эргэн харахад урьснаар хичээлийг дуусгаж болно. Тэнгэрлэг Эцэг, Есүс Христ хоёрын хүслийн талаар сурч мэдсэн үнэнүүдийг тунгаан бодож, тэдгээрийг тэмдэглэлдээ нэмэхэд урь.

Нэмэлт эх сурвалж

Сургаал ба Гэрээ 29:6. Бид яагаад залбирлаараа бусадтай нэгдэх ёстой вэ?

Та энэ хэсгийг ангидаа хуваалцахыг сонгосон бол дараах мэдэгдлийг хураангуйлан хуваалцах юм уу видеог үзүүлж болно.

Ерөнхийлөгч Спэнсэр В.Кимбалл, түүний эхнэр Камилла нар Шинэ Зеландад айлчлах үедээ олон өсвөр үеийнхний бэлдсэн соёлын баярт оролцохоор төлөвлөсөн байлаа. Тэр орой Кимбаллынхан өвдөж, оролцож чадахааргүй болов. Уг баяр эхлэх цаг болоход Кимбаллынхны бие гайхамшигтайгаар дээрдэж, арга хэмжээ рүү яаран явжээ. Уулзалт эхлэхэд нэгэн өсвөр үеийн хүүхэд нээлтийн залбирал хэлэхээр дуудагдав.

Ерөнхийлөгч Рассэлл М.Нэлсон дараа нь юу болсон талаар дараах зүйлийг дэлгэрэнгүй хуваалцсан юм.

Ерөнхийлөгч Рассэлл М.Нэлсон

Тэр хүүхэд ингэж залбирсан байна. “Бид Шинэ Зеландын 3000 өсвөр үеийнхэн. Бид Таны бошиглогчид зориулан дуулж, бүжиглэхээр зургаан сарын турш бэлтгэж, энд одоо цуглараад байна. Та түүнийг эдгээж, энд авчраач!” “Амен” гэж хэлсний дараа ерөнхийлөгч Кимбалл, Кимбалл эгч хоёрын суусан машин цэнгэлдэх хүрээлэнд орж иржээ. Тэднийг тэр даруй бүгд таньж, баяр хөөртэйгөөр хашхирсан билээ! (Russell M. Nelson, “Jesus Christ—the Master Healer,” Liahona, Nov. 2005, 86)

Сургаал ба Гэрээ 29:8. Их Эзэний биднийг цуглуулахыг хүсэж байгаа “нэг газар” хаана вэ?

Их Эзэн гэгээнтнүүдээ Сионд цуглуулахыг хүсдэг. Сүмийн эхэн үед гэгээнтнүүд бүх гишүүн цугларч болох төв байрлалд Сионыг байгуулахыг эрэлхийлсэн. Гишүүдийн тоо дэлхий даяар тэлэн өргөжихийн хэрээр одоо Сүмийн гишүүдээс орон нутгийнхаа цуглаануудад цугларахыг хүсдэг.

Ерөнхийлөгч Рассэлл М.Нэлсон ийн заасан.

Ерөнхийлөгч Рассэлл М.Нэлсон

Христэд ирэх сонголт нь хаана амьдардгаас хамаардаггүй бөгөөд энэ нь хувь хүний амлалтын асуудал юм. Хүмүүс өөрсдийн амьдарч буй орон нутгийг орхилгүй “Их Эзэн Бурханыхаа мэдлэгт тэд авчрагдах болно” [3 Нифай 20:13]. Эртний Сүмийн гишүүдийн хувьд хөрвүүлэгдсэнээр ихэнхдээ цагаачлах шаардлага гардаг байсан нь үнэн. Гэвч одоо үндэстэн бүрийн нутагт цугларалт явагдаж байна. Их Эзэн гэгээнтнүүддээ өөр өөрийн төрсөн газар, үндэс угсаанд Сионыг төлөвшүүлэхийг зарлигласан [Сургаал ба Гэрээ 6:6-г үзнэ үү]. Судруудад хүмүүс “өөрсдийн өвлөж авсан нутгууд болох гэртээ цуглуулагдах болно, мөн бүх амлалтын нутгууддаа төвхнүүлэгдэх” [2 Нифай 9:2] болно хэмээн бошиглосон байдаг. “Үндэстэн бүр ард түмнийхээ цугларах газар нь юм” [Bruce R. McConkie, in Conference Report, Mexico City Mexico Area Conference 1972, 45]. Бразилын гэгээнтнүүдийн цугларах газар нь Бразил, Нигерийн гэгээнтнүүдийн цугларах газар Нигер, Солонгосын гэгээнтнүүдийн цугларах газар Солонгос гэх мэтчилэн байх болно. Сион бол “зүрх сэтгэлдээ цэвэр ариун тэд юм” [Сургаал ба Гэрээ 97:21]. Сион бол зөв шударга гэгээнтнүүдийн байгаа газар. Хэвлэл нийтлэл, харилцаа холбоо, цугларалтууд одоо бараг бүх гишүүний байгаа газар явагдаж байгаа учир тэд хаана байгаагаасаа үл хамааран сургаал, түлхүүр, ёслолууд болон сайн мэдээний адислалуудаас хүртэх боломжтой юм.

Сүнслэг байдлын хувьд аюулгүй байх нь хувь хүний хаана амьдарч байгаагаас бус, хэрхэн амьдарч байгаагаас шалтгаалдаг. Газар бүрийн гэгээнтнүүд Их Эзэний адислалуудыг адил тэгш хүртэх эрхтэй. (Russell M. Nelson, “The Gathering of Scattered Israel,” Liahona, Nov. 2006, 81)

Нэмэлт суралцах үйл ажиллагаа

Өсвөр үеийнхний уриа

Суралцагчдыг өөр өөрсдийн Аароны санваарын болон Залуу эмэгтэйчүүдийн уриаг цээжээр хэлэх юм уу уншихад урь. Тэнгэрлэг Эцэг, Есүс Христ болон өөрсдийнхөө талаар сурсан үнэнийг олж мэдэхийг тэднээс хүс. Сургаал ба Гэрээ 29:1–8-ыг судлаад, Аврагчийн үгс, өсвөр үеийнхний уриа хоёрын ижил төстэй байдлыг олж мэдэхэд тэднийг урь. Эдгээр шүлэг нь өөрсдийн уриан дээрх үнэнүүдэд илүү бүрэн дүүрэн итгэж, тэдгээрийн дагуу амьдрахад нь өсвөр үеийнхэнд хэрхэн туслах талаар ярилц.

“Миний сайн мэдээг тунхагла”

Суралцагчид Сургаал ба Гэрээ 29:4-ийг унших үед сайн мэдээ гэдэг үг нь “сайн сайхан мэдээ” гэсэн утгатай болохыг тайлбарла. “Сайн сайхан мэдээ” гэж мэдэрдэг сайн мэдээний үнэнийг сонгоход суралцагчдыг урь. Үүнийг ангийнхантайгаа “баяслын дуугаар” (4-р шүлэг) хуваалцахад тэднийг урь.

Гэрийн зүг тэмүүлэх нь

Хичээлийн эхэнд ChurchofJesusChrist.org дээрх “Гэрийн зүг тэмүүлэх нь” видеог үзүүлэх талаар бодож үз. Видеог үзсэний дараа Сургаал ба Гэрээ 29:5 дээрх “та нарт хаант улсыг өгөх нь түүний эрхэм таалал бөлгөө” гэсэн хэллэгийг тэмдэглэхэд суралцагчдыг урь.

Уг видеон дээр ахлагч Дийтр Ф.Угдорф: “Би эрэгтэй, эмэгтэй хүн болон хүүхэд бүр амьдралынхаа нэгэн мөчид тэнгэрийн дуудлагыг мэдэрсэн гэдэгт итгэдэг. Бидний хайртай Тэнгэр дэх Эцэг бидэнд Христийн гэрлийг өгсөн бөгөөд бидний хүн нэг бүрийн сэтгэлийн гүнд тэнгэрлэг өдөөлт мэлмий хийгээд зүрх сэтгэлээ Их Эзэн рүү хандуулахыг бидэнд сануулж байдаг” хэмээн хэлсэн.

• Тэнгэрлэг Эцэг бидний амьдралын яг нэг мөчид биднийг ямар арга замаар дууддаг вэ?

• Тэр яагаад эрэгтэй, эмэгтэй мөн хүүхэд бүр лүү ханддаг вэ?

Дараа нь суралцагчдыг Сургаал ба Гэрээ 29:1–8-ыг уншаад, дараахтай адил асуултуудын хариултыг хайж олоход урь. Үүнд:

• Бурхан бидэнд Түүний хаант улс руу буцах аялалд маань ямар тусламж өгсөн бэ?

• Бид бусдын аялалд туслах ямар үүрэг хариуцлага хүлээдэг вэ?

“Миний сонгосон хүмүүсийн цугларалт”

Суралцагчдыг Бурханы бүх хүүхдийнхээ төлөө гэх хүслийн талаар хуваалцах үед та “Тэнгэрлэг Эцэгийн тухай үүнийг мэдэх нь Тэр биднийг яагаад Израилыг цуглуулахаар дууддагийг ойлгоход танд хэрхэн туслах вэ?” гэж асууж болох юм. Суралцагчдыг Сургаал ба Гэрээ 29:7-г уншихад урь. Хэрэв суралцагчид Аврагч бидний хүн нэг бүрээс цугларалтад туслахыг хүсдэг талаар тэмдэглээгүй бол үүнийг тэмдэглэхэд урьж болно. Та Израилын цугларалт, номлолын ажил эсвэл гэр бүлийн түүхийн ажлын талаар хамгийн сүүлийн чуулганы захиасыг судалснаар энэ үүрэг хариуцлагыг биелүүлэх арга замуудыг хайж болно.