“Сургаал ба Гэрээ 29:9–29: Есүс Христийн Хоёр дахь ирэлт,” Сургаал ба Гэрээний семинарын багшийн гарын авлага (2025)
“Сургаал ба Гэрээ 29:9–29,” Сургаал ба Гэрээний семинарын багшийн гарын авлага
45-р хичээл: Сургаал ба Гэрээ 29
Сургаал ба Гэрээ 29:9–29
Есүс Христийн Хоёр дахь ирэлт
Есүс Христийн Хоёр дахь ирэлт агуу хийгээд аймшигт өдөр байх болно. Есүс Христийн элч нараас болон сургаалуудаас татгалзсан хүмүүс сонголтынхоо үр дагаврыг амсах болно. Түүнийг дагахаар хичээж буй хүмүүс Гэтэлгэгчээ дэлхийд эргэн ирэхийг хараад баясацгаана. Тэрээр ёс бус байдал, харуусал гунигаас тэднийг аварч, тэдэнтэй хамт мянган жил оршин суух болно. Энэ хичээл нь суралцагчдад Есүс Христийг дэлхий дээр эргэн ирэхийг хүлээх зуураа баяр баясгаланг мэдрэхэд тусална.
Боломжит суралцах үйл ажиллагаа
Айдастай эсвэл баяр баясгалантай байна уу?
Энэ хичээлийн эхэнд байгаатай адил Хоёр дахь ирэлтийн зургийг үзүүл. Зургийн ойролцоо 1-ийн тоо нь “айдсыг,” 10-ын тоо нь “баяр баясгаланг” илэрхийлэх 1-10 хүртэлх онооны хэмжүүр үүсгэ. Аврагчийн Хоёр дахь ирэлтийн талаар олон өсвөр насныхан хэрхэн мэдэрдгийг илэрхийлэх тэмдэглэгээг хэмжүүр дээр тавихыг хэд хэдэн суралцагчаас хүс. Тэднээс тэмдэглэгээгээ тайлбарлахыг хүс.
Дараа нь судлах тэмдэглэлдээ дараах асуултуудад чимээгүйхэн хариулж бичихэд суралцагчдыг урьж болно.
-
Есүс Христийн Хоёр дахь ирэлтийн талаар бодоход танд ямар мэдрэмж төрдөг вэ? Яагаад?
-
Хоёр дахь ирэлтийн талаар бодох үедээ та Аврагч дээр илүү төвлөрдөг үү эсвэл Түүний эргэн ирэхийн өмнөх зовлон бэрхшээл дээр төвлөрдөг үү? Ийнхүү төвлөрөх нь таны мэдрэмжид хэрхэн нөлөөлдөг вэ?
Суралцагчдад дараах догол мөрийн агуулгыг ойлгоход туслах цаг гаргаж өг.
Эцсийн өдрүүдэд олон зовлон зүдгүүр, туйлын ёс бус байдал орших ба “гай зовлон болон эзгүйрэл” ёс бус хүмүүс дээр ирнэ гэдэг нь үнэн юм (Сургаал ба Гэрээ 29:8-ыг үзнэ үү). Аврагчийн эргэн ирэх нь уг зовлон зүдгүүр, ёс бус байдлын шалтгаан биш гэдгийг ухаарах нь мөн чухал. Тэр эргэн ирснээр шавь нараа эдгээрээс чөлөөлөх болно. Хоёр дахь ирэлт Түүний дагалдагчдын хувьд бидний төсөөлж чадахаас илүү гайхамшигтай байх болно! Өнөөдөр судалж байхдаа та итгэлтэй хүмүүс Есүс Христийн эргэн ирэх талаар бодохдоо баяр баясгалан, найдварыг мэдэрч болох шалтгаануудыг олж мэд.
Христийн ирэлтэд баяс!
Сургаал ба Гэрээ 29:10–13-ыг уншаад, танд баясах шалтгаан өгч буй үг, хэллэгийг ол.
Сургаал ба Гэрээ 29:10–11 нь төгс эзэмших сургаалын судрын хэсэг юм. Суралцагчдыг төгс эзэмших сургаалын судрын хэсгийг амархан олохын тулд онцгойлон тэмдэглэж авахад урь.
Олсон үг, хэллэгүүдийг самбарт жагсаан бичихийг суралцагчдаас хүс. Хэдэн суралцагчаас олсон үг, хэллэгүүд нь яагаад тэднийг баясахад тусалж байгаа талаар асуу.
Тэднийг хуваалцах үед дараах шалгах асуултуудыг тавьснаар олсноо өөрийн болгоход тэдэнд тусалж болно.
-
“Сүр хүч хийгээд агуу алдар суугаар” (11-р шүлэг) Есүс үзэгдэх болно гэдгийг мэдэх нь таныг хэрхэн тайтгаруулж байна вэ?
-
Христийг “зөв шударга ёсонд хүмүүнтэй хамт” (11-р шүлэг) оршин суух үед таны өдөр тутмын амьдрал хэрхэн өөр болно гэж та төсөөлж байна вэ?
-
Аврагч ирж, зөв шударга хүмүүсийг амилуулах үед таны хайртай нас барсан хүмүүсээс хэнтэй нь уулзахдаа та хамгийн их баярлах вэ? (13-р шүлгийг үзнэ үү.)
-
Таны хувьд “бид [Христтэй] нэг байх” (13-р шүлэг) гэдэг нь юу гэсэн утгатай вэ? Аврагч яагаад тантай нэг байхыг хүсдэг гэж та бодож байна вэ?
Та суралцагчдад 11-р шүлэг дэх “Би тэнгэрээс … сүр хүч хийгээд агуу алдар суугаар өөрийгөө үзүүлэх болно, мөн дэлхий дээр зөв шударга ёсонд хүмүүнтэй хамт мянган жил оршин сууна” гэх судрын түлхүүр үг хэллэгийг тэмдэглэхийг санал болгож болно.
Энэ хичээлийн үлдсэн хэсэг нь Аврагчийн эргэн ирэх үеийн болон дараах зөв шударга хүмүүсийг адислах гайхамшигт нөхцөлүүд дээр төвлөрнө.
Үүнээс өмнө та 11-р шүлэг дэх “ёс бусыг үйлдэгчид тэсвэрлэх нь үгүй” гэх сүүлийн үг хэллэгийг ойлгоход нь суралцагчдад тусалж болно. Суралцагчид 9, 15 болон 17-р шүлгийг уншаад, Христийг үгүйсгэдэг хүмүүсийн амсах үр дагаврыг олж мэдэж болно. Хэрэв та эдгээр шүлгийг ангид судалбал хайртай хүмүүсийнхээ төлөө санаа зовниж буй суралцагчдад Аврагч руу ирж, наманчилдаг бүх хүнийг уучилж, эдгээх нь Түүний хүсэл хийгээд хүч гэдгийг сануул.
(Тайлбар: Сургаал ба Гэрээ 45 дахь хичээлүүд нь Христийн Хоёр дахь ирэлтийн цаг үеийн тэмдгүүдэд болон хувийн бэлтгэлд илүү онцгойлон анхаарах болно.)
Есүс Христ хүмүүстэй хамт мянган жил оршин суух болно
Есүс Христийн мянган жилийн засаглалын үед болон дараах дэлхийн нөхцөл байдлын талаар мэддэг зүйлээ хуваалцахад суралцагчдыг урь. Та мөн энэ талаар өөрсдөдөө байгаа асуултуудыг хуваалцахад тэднийг урьж болно.
Мянган жилийн тухай болон Христийн мянган жилийн засаглалын үеэр мөн дараа нь тохиох баяр баясгалантай нөхцөл байдлын талаарх асуултуудын хариултыг тэнгэрээс томилогдсон эх сурвалжуудаас хайхад хэдэн минут зарцуул. Судалж буй зүйлд тань дараах үйл ажиллагаа тус болно. Үүнд:
Суралцагчдыг жижиг бүлэг болгоод, бүлэг бүрээр дараах эх сурвалжуудын нэгийг судлуул. Дараа нь бүлэг бүрийг олж мэдсэнээ ангид танилцуулахад урь эсвэл суралцагчдыг өөр эх сурвалжийг судалсан суралцагчтай шинэ бүлэг болгож, сурсан зүйлээ ээлжлэн хуваалцахад урь.
Судруудын удирдамж, “Мянган жил,” scriptures.ChurchofJesusChrist.org
Аврагчийн эргэн ирсний дараах нөхцөл байдалд баярлах шалтгааныг тодорхой олж харахад нь суралцагчдад туслахын тулд та “Нэмэлт эх сурвалж” хэсэг дэх ахлагч Д.Тодд Кристоффэрсоны мэдэгдлийг хуваалцсанаар тухайн хичээлийн энэ хэсгийг дуусгаж болно.
Аврагч дээр анхаарлаа төвлөрүүлэх
Jesus Christ Appears in the Ancient Americas | 3 Nephi 8–11
Ominous destruction comes upon the people of Ancient America. Hope returns as survivors gather and witness the Resurrected Christ descend from Heaven.
Нүдээ аниад, Есүс Христ дагалдагчдаа аварч, хамгаалж, эдгээхээр тэнгэрээс бууж ирж байна гэж төсөөлөхийг хичээ. Тэнгэрлэг Эцэг Хүүгийнхээ эргэн ирэх үйл явдлын талаар танд юуг мэдрүүлж байгааг олж мэдэхийн тулд Ариун Сүнснээс ирэх мэдрэмжид анхаарал хандуул.
-
Түүнийг дагахыг хичээж байсан хүмүүсийг хараад, Түүний царай хэрхэх бол гэж та төсөөлж байна вэ?
-
Бууж ирснийхээ дараа Тэрээр итгэлтэй хүмүүст хандаж юу гэж хэлнэ гэж та төсөөлж байна вэ?
-
Аврагчийн дэлхий дээр эргэн ирэхийг шавь нар нь хэрхэн мэдрээсэй хэмээн Тэр хүсдэг гэж та бодож байна вэ?
Есүс Христийн дэлхий дээр эргэн ирэхийг тэсэн ядан хүлээхдээ та юу мэдэрдгээ хуваалцаж болох юм. Та “Бурханы Сүнс” (Дуулал, х. 2) эсвэл “Бүгд хөгжилдөн баясъя” (Дуулал, х. 3) гэх мэт Христийн ирэх үеийн баяр баясгалан, Түүний мянган жилийн засаглалын тухай өгүүлсэн дууллаар хичээлээ дуусгаж болно.
Цээжил
Та энэ хичээлийн туршид төгс эзэмших сургаалын эшлэл, судрын түлхүүр үг хэллэгийг цээжлэхэд нь суралцагчдад тусалж, дараа дараагийн хичээлүүд дээрээ давтаж болно. Судрын түлхүүр үг хэллэг: “Би тэнгэрээс … сүр хүч хийгээд агуу алдар суугаар өөрийгөө үзүүлэх болно, мөн дэлхий дээр зөв шударга ёсонд хүмүүнтэй хамт мянган жил оршин сууна.” Цээжлэх үйл ажиллагаанд зориулсан санаанууд “Төгс эзэмших сургаалыг давтах үйл ажиллагаа” хэсгийн доорх хавсралтад бий.