“Tokāteline mo e Ngaahi Fuakava 38:15–27, 34–42: Ke Mou Taha Pē,” Tokāteline mo e Ngaahi Fuakava – Tohi Lēsoni ʻa e Faiako Seminelí, (2025)
“Tokāteline mo e Ngaahi Fuakava 38:15–27, 34–42,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 52: Tokāteline mo e Ngaahi Fuakava 37–40
Tokāteline mo e Ngaahi Fuakava 38:15–27, 34–42
Ke Mou Taha Pē
Naʻe ʻoange ʻe he ʻEikí ki Hono Kāingalotú ha ngaahi fakahinohino ʻi heʻenau teuteu ke fakahoko ha ngaahi feilaulau lahi ke tānaki fakataha ki ʻOhaioó. ʻI he fakahā naʻe foaki ʻe he Fakamoʻuí ki he Kāingalotú, naʻá Ne fakahā ai Hono ʻulungāngá pea fakaafeʻi Hono kakaí ke nau moʻui ʻo hangē ko Iá. ʻE lava ke tokoni ʻa e lēsoni ko ʻení ki he kau akó ke nau hoko ʻo hangē ange ko e Fakamoʻuí ʻaki ʻenau fakamahuʻingaʻi ʻa e niʻihi kehé mo fekumi ki he uouangatahá.
Ngaahi ʻEkitivitī Ako ʻOku Ala Fakahokó
‘Oku finangalo ʻa e ʻEikí ke tau hoko ʻo hangē ko Iá
Te ke lava ʻo kamata ʻa e lēsoní ʻaki hono fakaafeʻi ʻa e tokotaha ako takitaha ke hiki ha meʻa ʻe nima ʻoku nau manako aí. Vahevahe leva ʻa e kalasí ki ha fanga kiʻi kulupu iiki. Fakaafeʻi kinautolu ke vahevahe e ngaahi meʻa ʻoku nau manako aí pea lisi ha meʻa pē ʻoku nau faitatau ai. Hili iá, kole ange ke nau aleaʻi ʻa e ʻuhinga ʻoku faʻa faingataʻa ai ʻi he taimi ʻe niʻihi ki he kakai ʻoku kehekehe ʻa e meʻa ʻoku nau manako aí ke nau uouongatahá pea mo e ʻuhinga ʻoku mahuʻinga ai ʻa e uouangatahá ki he kau ākonga ʻa Kalaisí.
Fakaafeʻi ʻa e kau akó ke fakakaukau ki ha taha te nau lava ʻo tokangaʻi lelei ange pe ko ha taha te nau lava ʻo maʻu ha vā fetuʻutaki lelei ange mo ia. Poupouʻi ʻa e kau akó ke fekumi ki ha ueʻi fakalaumālie ʻo fakafou ʻi he Laumālie Māʻoniʻoní ke tokoni kiate kinautolu ke lelei ange ʻenau tokangaʻi ʻa e tokotaha ko ʻení pe fakatupulaki honau vā fetuʻutak mo iá. Fakaafeʻi kinautolu ke fakakaukau ki he founga ʻe lava ke tokoni ai hono tokangaʻi ʻo e ngaahi vā fetuʻutakí ʻi he founga ko ʻení ke langaki ʻa e uouangatahá.
ʻI Tīsema ʻo e 1830, naʻe ngāue ai ʻa Siosefa Sāmita ʻi hono toe vakaiʻi fakalaumālie ʻo e Tohi Tapú peá ne maʻu ai ʻa ia ʻoku hoko ʻi he taimí ni ko e Mōsese 6–7 ʻi he Mataʻitofe Mahuʻingá. ʻOku fakamatala ʻa e ngaahi vahe ko ʻení ki ha palōfita ko ʻĪnoke mo hono kakaí. Koeʻuhí ko ʻenau māʻoniʻoní mo e uouangatahá, naʻe ui ʻe he ʻEikí ʻa e kakai ko ʻení ko Saione.
Naʻe fakahinohinoʻi ʻe he Fakamoʻuí ʻa e Kāingalotú ʻi he Tokāteline mo e Ngaahi Fuakava 38, kau ki he tānaki fakataha ki ʻOhaioó. Naʻá Ne akoʻi kinautolu fekauʻaki mo Hono ʻulungāngá pea fakamamafaʻi ha ngaahi tefitoʻi moʻoni ʻo hono langa hake ʻo Saioné. ʻE tokoni ʻa e talangofua ki he ngaahi tefitoʻi moʻoni ko ʻení ke teuteuʻi ʻe he Kāingalotú kinautolu ke maʻu ʻa e fono ʻa e Fakamoʻuí pea ke fakakoloaʻi ʻaki Hono mālohí (vakai, Tokāteline mo e Ngaahi Fuakava 38:32).
Lau ʻa e Tokāteline mo e Ngaahi Fuakava 38:24–27, ʻo kumi ha ngaahi ʻulungaanga ʻoku finangalo ʻa Sīsū Kalaisi ke tau fakatupulaki.
ʻI hono lau ʻe he kau akó ʻa e Tokāteline mo e Ngaahi Fuakava 38:24–27, te ke lava ʻo fakamahinoʻi ange ʻa e kupuʻi lea ʻoku toutou ʻasi ʻi he veesi 24–25. Te ke lava foki ʻo fakaafeʻi ha niʻihi ʻo e kau akó ke fakatātaaʻi ʻa e talanoa fakatātā ʻi he veesi 26–27.
-
ʻOkú ke pehē ʻoku ʻuhinga ki he hā ʻa e fakaʻapaʻapa ki ho tokouá ʻo hangē pē ko koé? (Vakai, Mātiu 22:36–39; Sione 13:34–35; Sēkope 2:17–19.)
-
Ko e hā te tau lava ʻo ako fekauʻaki mo e Fakamoʻuí mei he talanoa fakatātā ʻi he veesi 26–27?
-
Ko e hā ʻoku akoʻi mai ʻe he veesi 24–27 fekauʻaki mo e founga te tau lava ai ʻo hangē ko Sīsū Kalaisí?
Tokoni ke ʻiloʻi ʻe he kau akó ha tefitoʻi moʻoni hangē ko ʻení: Te tau lava ʻo hangē ko Sīsū Kalaisí ʻi heʻetau fakamahuʻingaʻi ʻa e niʻihi kehé mo fekumi ki he uouangatahá ko ʻEne kau ākonga.
Fakaʻaongaʻi ha niʻihi ʻo e ngaahi fehuʻi ko ʻení pe ngaahi fehuʻi kehe ʻokú ke fakakaukau ki ai ke tokoni ke mahino ki he kau akó ʻa e tefitoʻi moʻoni ko ʻení. Te ke lava ʻo fakaafeʻi ʻa e kau akó ke fakakaukau lolotonga ʻa e fealēleaʻakí ki he kakai ʻoku nau fiemaʻu ha vā fetuʻutaki lelei ange mo kinautolú.
-
ʻOku hoko fēfē nai ʻa Sīsū Kalaisi ko ha sīpinga ʻo hono fakamahuʻingaʻi ʻa e niʻihi kehé? ʻO e poupouʻi ʻa e uouangatahá?
-
Ko e hā ʻoku faʻa faingataʻa ai ʻi he taimi ʻe niʻihi ke uouangataha mo e kāingalotu kehe ʻo e Siasí?
-
Ko e hā ha faikehekehe ʻe hoko ʻi hoʻo moʻuí ʻi haʻo fakahaaʻi ha ʻofa lahi ange ki he niʻihi kehé pea uouangataha ange mo e Siasí?
Fakakaukau ke hulu ʻa e foʻi vitiō “One in Christ” (4:48), ʻoku maʻu ʻi he ChurchofJesusChrist.org, ke tokoni ke mahino ki he kau akó ʻa e founga ʻoku tokoniʻi ai kitautolu ʻe he Fakamoʻuí ke tau uouangatahá.
Lau ʻa e Tokāteline mo e Ngaahi Fuakava 38:34–36, 39–42, ʻo kumi ʻa e founga naʻe fakaafeʻi ai ʻa e Kāingalotu naʻe teuteu ke tānaki fakataha ki ʻOhaioó ke nau uouangatahá.
-
Ko e hā naʻá ke maʻu ʻe tokoni kiate kinautolu naʻe hiki ki ʻOhaioó ke nau fetauhiʻaki mo uouangatahá?
Ko ʻetau feinga ke fakamahuʻingaʻi ʻa e niʻihi kehé mo feinga ke uouangatahá
Fakaʻaongaʻi ʻa e ngaahi lea ʻa e kau palōfitá ke fakamamafaʻi ʻa e tokāteliné mo e ngaahi tefitoʻi moʻoní: Ke akoako fakahoko ʻení, vakai ki he ako, “Faiako mei he folofolá mo e lea ʻa e kau palōfita ʻo e ngaahi ʻaho kimui ní” ʻi he Fakatupulaki Ngaahi Taukei ʻa e Faiakó. Fakakaukau ke akoako ʻa e taukei, “teuteuʻi ha ngaahi fakaafe ʻe tokoni ki he kau akó ke fakafehokotaki ʻa e ngaahi moʻoni ʻoku maʻu ʻi he folofolá ki he meʻa ʻoku lea ʻaki ʻe he kau palōfita moʻuí” ʻo hangē ko ia ʻoku hā ʻi he fakamatala ko ʻeni meia ʻEletā Lenilaní.
Na‘e akoʻi ‘e ʻEletā Teili G. Lenilani ‘o e Kōlomu ʻo e Kau ‘Aposetolo ʻe Toko Hongofulu Mā Uá ha ngaahi founga te tau lava ai ʻo uouangataha ko ha kau ākonga ʻa Kalaisi. Lau ʻa e fakamatalá pe mamata ʻi he foʻi vitiō “ʻOku Fakangata ʻe he Melino ʻa Kalaisí ʻa e Tāufehiʻá” (12:39; mamata mei he taimi 4:49 ki he 6:32) ʻi he ChurchofJesusChrist.org.
Ko e uouangatahá ʻoku fiemaʻu ai ʻa e ngāué. ʻOku tupulaki ʻi he taimi ʻoku tau tanumaki ai ʻa e ʻofa ʻa e ʻOtuá ʻi hotau lotó mo tukutaha ʻetau tokangá ki hotau ikuʻanga taʻengatá. ʻOku fakatahaʻi kitautolu ʻe hotau tuʻunga ko e fānau ʻa e ʻOtuá pea mo ʻetau loto ʻaki ʻa e ngaahi moʻoni ʻo e ongoongolelei kuo fakafoki maí. ʻOku fakatupu ʻe heʻetau ʻofa ki he ʻOtuá mo hotau tuʻunga fakaākonga ʻia Sīsū Kalaisí ha tokanga moʻoni ki he niʻihi kehé. ʻOku tau fakamahuʻingaʻi ʻa e tuifio ʻo e ngaahi ʻulungāngá, fakakaukaú, mo e talēniti ʻo e kakai kehé. Kapau ʻoku ʻikai ke tau tuku hotau tuʻunga fakaākonga ʻia Sīsū Kalaisí ke muʻomuʻa ʻi he ngaahi meʻa fakataautaha ʻoku tau tokanga ki aí mo ʻetau fakakaukaú, pea tā ʻoku totonu ke tau toe vakavakaiʻi ʻa e ngaahi meʻa ʻoku tau fakamuʻomuʻá pea liliu.
Mahalo te ta fakahehema ke pehē, “ʻIo, te ta lava ʻo uouangataha—kapau te ke loto tatau mo au!” Ko ha founga ʻoku lelei angé ke te fehuʻi, “Ko e hā te u lava ʻo fai ke tanumaki ʻa e uouangatahá? Ko e hā te u lava ʻo fai ke tokoniʻi ʻa e tokotahá ni ke ne ofi ange kia Kalaisí? Ko e hā te u lava ʻo fai ke fakasiʻisiʻi ai ʻa e fakakikihí mo langaki ha komiunitī loto-ʻofa mo loto-tokanga ʻo e Siasí?”
Ko e taimi ʻoku ʻōʻōfaki ai ʻetau moʻuí ʻe he ʻofa ʻa Kalaisí, te tau fakaleleiʻi ʻa e taʻe-felotoí ʻaki ʻa e angamaluú, faʻa kātakí, mo e angaʻofá. ʻE siʻi ange haʻatau hohaʻa ki he meʻa ʻoku pelepelengesi kiate kitautolú kae lahi ange ki hotau kaungāʻapí. ʻOku tau “feinga ke fakaleleiʻi mo uouangataha” [Dallin H. Oaks, “Ko Hono Maluʻi ʻEtau Konisitūtone Ueʻi Fakalangí,” Liahona, Mē 2021, 107]. ʻOku ʻikai ke tau kau ʻi ha ngaahi “fakakikihi taʻeʻaonga,” fakamāuʻi ʻa kinautolu ʻoku ʻikai felotoi mo kitautolú, pe feinga ke nau tūkia [vakai, Loma 14:1–3, 13, 21]. Ka, ʻoku tau pehē pē ko kinautolu ʻoku ʻikai felotoi mo kitautolú ʻoku nau fai pē ʻa e lelei taha ʻoku nau lavá ʻi he ngaahi aʻusia ʻo e moʻuí ʻoku nau maʻú. (Dale G. Renlund, “ʻOku Fakangata ʻe he Melino ʻa Kalaisí ʻa e Tāufehiʻá,” Liahona, Nōvema 2021, 84)
Kole ki he kau akó ke vahevahe ʻa e founga kuo tāpuekina ai kinautolu ʻi heʻenau feinga ke fakamahuʻingaʻi ʻa e niʻihi kehé pea nau uouangataha ko e kau ākonga ʻa Kalaisi.
Fakaafeʻi ʻa e kau akó ke vakaiʻi ʻi he faʻa lotu ʻa e ongo ʻoku nau maʻu ki he tuʻunga ʻoku ʻi ai ʻenau fakamahuʻingaʻi ʻa e niʻihi kehé mo fakamālohia honau ngaahi vā fetuʻutakí.
Mahalo ʻe fie tali ʻe he kau akó ʻa e ngaahi fehuʻi ko ʻení ʻi heʻenau tohinoa akó.
Fili ʻi he faʻa lotu ha vā fetuʻutaki ʻokú ke fie fakamālohia mo ha fakafoʻituitui pe ʻi ha kulupu. Tali ha fehuʻi ʻe taha pe lahi ange ʻi he ngaahi fehuʻi ko ʻení:
-
Ko e hā te ke lava ʻo fai ke fakamahuʻingaʻi ʻa e tokotahá ni pe kakaí pea fakahaaʻi ʻa e ʻofá kiate kinautolu?
-
Te ke tafoki fēfē nai ki he Fakamoʻuí ke ikunaʻi ʻa e ngaahi faingataʻa ʻokú ke fehangahangai mo iá?
-
ʻE tokoni fēfē nai hoʻo fai ʻení ke ke hangē ange ai ko e Fakamoʻuí?