“Tokāteline mo e Ngaahi Fuakava 39–40: ‘[Ko ha] Tāpuaki ʻOku Fuʻu Lahi Fau ʻOku Teʻeki ai Te Ke ʻIloʻi,’” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 37–40,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
Lēsoni 53: Tokāteline mo e Ngaahi Fuakava 37–40
Tokāteline mo e Ngaahi Fuakava 39–40
“[Ko ha] Tāpuaki ʻOku Fuʻu Lahi Fau ʻOku Teʻeki ai Te Ke ʻIloʻi”
Naʻe ngāue ʻa Sēmisi Kovili ko ha faifekau Metotisi ʻi he ʻēlia Niu ʻIoké ʻi ha taʻu ʻe 40. ʻI he taimi naʻá ne fanongo ai ki he pōpoaki ʻo hono Fakafoki Mai ʻo e Ongoongoleleí, naʻá ne palōmesi ke talangofua ki ha faʻahinga fekau pē naʻe ʻomi kiate ia ʻo fakafou ʻi he Palōfita ko Siosefa Sāmitá. Naʻe fekauʻi ʻe he Fakamoʻuí ʻa Sēmisi ke papitaiso pea ke kau fakataha mo e Kāingalotu ʻi ʻOhaioó pea talaʻofa kiate ia ha mālohi lahi kapau te ne fakahoko mo tauhi ha ngaahi fuakava toputapu. ʻE lava ke tokoni ʻa e lēsoni ko ʻení ke ongoʻi ʻe he kau akó ha loto-holi ke fakahoko mo tauhi ʻenau ngaahi fuakava mo Sīsū Kalaisí ke nau maʻu ha faingamālie lahi ange ki Hono mālohí.
Ngaahi ʻEkitivitī Ako ʻOku Ala Fakahokó
Ko hono fakahoko mo tauhi ʻo e ngaahi fuakava mo e ʻOtuá
Fakakaukau ke fakaʻaliʻali ki he kau akó ha meʻa hangē ko ha maama, ʻa ia ʻe lava ke ne maʻu hono mālohi taupotu tahá kapau ʻe palaki ia ki ha ʻuhila. Fehuʻi ki he kau akó pe ko e hā ʻe lava ke fai ʻe ha maama ʻiate ia pē ʻo fakafehoanaki ki he taimi ʻoku palaki ai ki he ʻuhilá. Fakaafeʻi ʻa e kau akó ke aleaʻi ʻa e founga ʻe lava ke fakafofongaʻi ai ʻe he meʻá ni ʻetau ngaahi fuakava mo e ʻOtuá.
Lau ʻa e “Fuakavá” ʻi he Fakahinohino ki he Ngaahi Folofolá pea mo e fakamatala ko ʻeni meia Palesiteni Lāsolo M. Nalesoní, ʻo kumi ha ʻuhinga ʻo e ngaahi fuakavá.
Ko e fuakavá ko ha … fepalōmesiʻaki toputapu ia mo e ʻOtuá. ʻOkú Ne talamai ʻa e meʻa ʻoku fiemaʻú. ʻE lava ke fili ʻa e tokotaha takitaha ke tali ʻa e ngaahi fiemaʻu ko iá. Kapau ʻe tali ʻe ha taha ʻa e ngaahi fiemaʻu ki he fuakavá pea talangofua ki he fono ʻa e ʻOtuá, te ne maʻu leva ʻa e ngaahi tāpuaki ʻoku fekauʻaki mo e fuakavá. (Russell M. Nelson, “Ngaahi Fuakavá,” Liahona, Nōvema 2011, 86)
-
Te ke fakamatalaʻi pe fakaʻuhingaʻi fēfē nai ha fuakava?
-
Ko e hā ha ngaahi fuakava kuó ke fakahoko mo e ʻEikí?
-
Kuo tākiekina fēfē nai hoʻo moʻuí ʻe he ngaahi fuakava ko ʻení?
ʻOku fakaafeʻi kitautolu ʻe Sīsū Kalaisi ke tau fakahoko ha ngaahi fuakava mo Ia
Ko Sēmisi Kovilí ko ha faifekau Metotisi ia. ʻI he taimi naʻe ʻilo ai ʻe Kovili fekauʻaki mo e Palōfita ko Siosefa Sāmitá, naʻá ne palōmesi ki he ʻEikí “te ne talangofua ki ha fekau pē ʻe fai mai ʻe he ʻEikí kiate ia ʻo fou mai ʻia Siosefa ko e Palōfitá” (Tokāteline mo e Ngaahi Fuakava 39, ʻuluʻi vahé).
Lau ʻa e Tokāteline mo e Ngaahi Fuakava 39:1–9 pea kumi ʻa e meʻa ʻokú ke ako fekauʻaki mo Sīsū Kalaisi te ne lava ʻo fakaʻaiʻai ha taha ke ne fokotuʻu ha vā fetuʻutaki mo Ia ʻi he fuakavá.
-
Ko e hā naʻá ke maʻu fekauʻaki mo e Fakamoʻuí?
-
Ko e hā ʻoku fakaafeʻi mai ʻe he Fakamoʻuí ke tau fakahoko ke maʻu Hono mālohí?
Ke tokoni ke ʻiloʻi ʻe he kau akó ha tefitoʻi moʻoni, te nau lava ʻo fakakakato ʻi he palakipoé pe ʻi heʻenau tohinoa akó ʻa e fakamatala ko ʻení: “Kapau te tau __________, te tau maʻu __________.”
ʻE lava ke ʻiloʻi ʻe he kau akó ha tefitoʻi moʻoni hangē ko ʻení: Kapau te tau fakahoko mo tauhi ha ngaahi fuakava toputapu mo e ʻOtuá, ʻoku tau maʻu Hono mālohí.
Kapau ʻoku fakaʻaongaʻi ʻa e lēsoni fakataumuʻá, palaki ʻa e māmá ke fakahaaʻi ʻoku tokoni hono fakahoko ha ngaahi fuakavá ke tau maʻu ʻa e mālohi ʻo e Fakamoʻuí. Fakakaukau ke fehuʻi ki he kau akó pe ʻe fakatātaaʻi fēfē nai ʻe he meʻá ni ʻa e tefitoʻi moʻoni naʻa nau ʻiló.
Lau ʻa e Tokāteline mo e Ngaahi Fuakava 39:10–15 pea kumi ʻa e meʻa naʻe fakaafeʻi ʻe he ʻEikí ʻa Sēmisi Kovili ke ne fai ke fakahoko ai ha fuakava mo Iá.
-
Ko e hā naʻe talaʻofa ʻe Sīsū Kalaisi kia Sēmisi Kovili kapau naʻá ne fakahoko ʻa e fuakava ko ʻení?
-
ʻOku kaunga fēfē nai ʻa e faleʻi ʻa e ʻEikí kia Sēmisi Kovilí kiate kitautolu ʻi he ʻaho ní?
-
Kuó ke fakatokangaʻi fēfē nai ʻa e mālohi ʻo e Fakamoʻuí ʻi hoʻo moʻuí pe ʻi he moʻui ʻa ha taha ʻokú ke ʻiloʻi?
Manavasiʻí, fakatangá, mo e tokanga ki he māmaní
Naʻe maʻu ʻe Sēmisi Kovili ha fāmili tokolahi, ngaahi kaungāmeʻa, mo feohi vāofi mo e koló ʻi Niu ʻIoke. Naʻe fekauʻi ia ʻe he Fakamoʻuí ke papitaiso pea hiki mo e Kāingalotú ki ʻOhaiō. Naʻe pau pē ko e kau ʻa Sēmisi Kovili ki he Siasí, ko ha feilaulau ia kiate ia.
Lau ʻa e ʻuluʻi vahe ʻo e Tokāteline mo e Ngaahi Fuakava 40 pea pehē ki he veesi 1–3, pea kumi ʻa e fili naʻe fai ʻe Sēmisi Kovilí.
ʻE lava ke hoko ʻeni ko ha faingamālie lelei ke akoako fakaʻaongaʻi ai ʻa e ngaahi tefitoʻi moʻoni ki hono maʻu ʻo e ʻilo fakalaumālié. Te mou lava ʻo aleaʻi ʻa e founga naʻe mei ngāue ai ʻa Sēmisi Kovili ʻi he tuí. Fakakaukau foki ke aleaʻi ʻa e founga naʻá ne mei vakai ai ki heʻene ngaahi filí mo e faleʻi ʻa e ʻEikí ʻaki ha fakakaukau ʻoku taʻengatá.
-
ʻE fakatupu fēfē nai ʻe he “manavahē ki he fakatangá” (veesi 2) ha taha ke ne fakafisingaʻi pe maumauʻi ʻene ngaahi fuakava mo e ʻOtuá?
-
Ko e hā ha niʻihi ʻo e ngaahi “tokanga ki he māmaní” (veesi 2) ʻokú ne tataki ʻa e kakaí ke siʻaki ʻenau ngaahi fuakava mo e ʻOtuá ʻi he kuongá ni?
Lau ʻa e lea ko ʻeni meia Palesiteni Lāsolo M. Nalesoni pe mamata ʻi he foʻi vitiō “Ikuʻi ʻa Māmani mo Maʻu ha Fiemālie” (18:31), ʻoku maʻu ʻi he ChurchofJesusChrist.org, mei he taimi 4:21 ki he 5:39. ʻI hoʻo lau pe mamata aí, kumi ʻa e mālohi naʻe talaʻofa kiate kinautolu ʻoku nau fakahoko mo tauhi ʻenau ngaahi fuakava mo e ʻOtuá:
ʻOku hanga ʻe hono fakahoko mo tauhi ʻa e ngaahi fuakavá ʻo ʻai ke faingofua ange ʻa e moʻuí! Ko e tokotaha kotoa pē ʻokú ne fakahoko ha ngaahi fuakava ʻi he vai papitaisó pea ʻi he temipalé—mo tauhi kinautolú—kuo fakalahi ʻene maʻu ʻa e mālohi ʻo Sīsū Kalaisí. Kātaki ʻo fakakaukau ki he foʻi moʻoni fakaʻofoʻofa ko iá!
Ko e pale ki he tauhi ʻo e ngaahi fuakava mo e ʻOtuá, ko e mālohi fakalangi—ko e mālohi ʻokú ne fakamālohia kitautolu ke tau matuʻuaki lelei ange hotau ngaahi faingataʻá, ʻahiʻahí, mo e loto-mamahí. ʻOku fakafaingofuaʻi ʻe he mālohí ni ʻetau fonongá. ʻOku maʻu ʻe kinautolu ʻoku moʻui ʻaki ʻa e ngaahi fono māʻolunga ange ʻa Sīsū Kalaisí ʻa Hono mālohi māʻolunga angé. Ko ia, ʻoku ʻi ai ʻa e totonu ʻa e kau tauhi fuakavá ki ha faʻahinga fiemālie makehe ʻoku nau maʻu ʻi heʻenau fefuakavaʻaki mo e ʻOtuá. (Russell M. Nelson, “Ikuʻi ʻa Māmani mo Maʻu ha Fiemālie,” Liahona, Nōvema 2022, 96)
-
Ko e hā ʻoku mahuʻinga kiate koe fekauʻaki mo e fakamatala ʻa Palesiteni Nalesoní?
ʻOange ha faingamālie ki he kau akó ke nau fakakaukau ai ki he loto-holi ʻoku nau maʻu ke fakahoko mo tauhi ha ngaahi fuakava mo e Fakamoʻuí ke maʻu Hono mālohí. ʻE lava ke tohi ʻa e kau akó ʻi heʻenau tohinoá pe ʻi ha ʻū laʻipepa. Te nau lava foki ʻo aleaʻi ʻa e meʻa naʻa nau ako pe ongoʻí ʻi ha fanga kiʻi kulupu iiki pe fakakalasí.
Ke fakaʻosi ʻa e lēsoní, te ke lava ʻo vahevahe ʻa e founga kuó ke mamata ai ki he mālohi ʻo e Fakamoʻuí ʻi hoʻo moʻuí ʻi hoʻo fakahoko ha ngaahi fuakava mo e ʻOtuá. Poupouʻi ʻa e kau akó ke hokohoko atu ʻenau feinga ke fakahoko mo tauhi ʻenau ngaahi fuakavá pea falala ki he talaʻofa ʻa e ʻEikí ke tāpuakiʻi kinautolu ʻi heʻenau ngaahi ngāué.