Lēsoni 54: Tokāteline mo e Ngaahi Fuakava 37–40

Siviʻi Hono 3 Hoʻo Akó

Tokāteline mo e Ngaahi Fuakava 20–40

ʻE lava ke tokoni ʻetau fakakaukaú mo siviʻi ʻetau ako fakalaumālié ke tau ʻunu ʻo ofi ange ai ki he Fakamoʻuí. ʻE lava ke tokoni ʻa e lēsoni ko ʻení ke manatuʻi mo vakaiʻi ʻe he kau akó ʻa e founga kuo tokoniʻi ai kinautolu ʻe heʻenau ngaahi aʻusia ʻi hono ako mai ʻeni ʻo e Tokāteline mo e Ngaahi Fuakavá ke nau tupulaki fakalaumālié.

Ngaahi ʻEkitivitī Ako ʻOku Ala Fakahokó

Tupulaki fakatuʻasino mo fakalaumālié

Fakakaukau ke fakaʻaliʻali fakataha ha ngaahi ʻīmisi ʻokú ne fakatātaaʻi ʻa e tupulakí.

Ke fua ʻa e tupulakí, liliú, mo e fakalakalaká, ʻoku faʻa fakaʻaongaʻi ʻe he kakaí ha ngaahi fakatātā ke fakahoko ʻaki ha fakafehoanaki.

• ʻE lava fēfē nai ke tokoniʻi kitautolu ʻe hotau ngaahi taá ke tau ʻiloʻi kuo tau liliu pe tupulakí?

• Ko e hā mo ha ngaahi founga kehe ke fakatokangaʻi ai ʻetau tupulakí?

Ke tokoni ke fakalaulauloto mo aleaʻi ʻe he kau akó ʻa e tupulaki fakalaumālié, te ke lava ʻo fakaʻaliʻali ha fakatātā ʻo Sīsū mo ha kiʻi tamasiʻi, ʻo hangē ko ia ʻi he kamataʻanga ʻo e lēsoni ko ʻení.

Fakakaukau ki ha meʻa te ke lava ʻo talaange ki ha kiʻi tamasiʻi pe taʻahine fekauʻaki mo ʻene malava ke tupulaki pea hoko ʻo hangē ko Sīsū Kalaisí.

• Ko e hā ha ngaahi founga ʻe lava ke fakatokangaʻi ai ʻe ha taha ʻa e founga ʻoku nau hoko ai ʻo hangē ko e Fakamoʻuí? (Vakai, Luke 2:52; vakai foki, ʻAlamā 5:14.)

Fakaafeʻi ʻa e kau akó ke fekumi ki ha tokoni mei he Laumālie Māʻoniʻoní ʻi heʻenau fakakaukau ki heʻenau tupulakí. Kole ange ke nau hiki ʻi heʻenau tohinoá ha niʻihi ʻo e ngaahi founga ʻoku nau ongoʻi ʻoku nau hoko ai ʻo hangē ko Sīsū Kalaisí. Te ke lava ʻo poupouʻi ʻa e kau akó ke nau fakakaukau ki ha ngaahi ʻulungaanga ʻo e Fakamoʻuí kuo nau ako ki ai ʻi heʻenau ako ʻa e Tokāteline mo e Ngaahi Fuakavá. Poupouʻi ʻa e kau akó ke kumi ʻi heʻenau tohinoá pe folofolá ha fanga kiʻi fakamatala naʻa nau fakaʻilongaʻi fekauʻaki mo e Fakamoʻuí ʻi he ngaahi uike siʻi kuo hilí. Kole ange ke nau fakalaulauloto pe ko e fē ʻi he ngaahi ʻulungaanga ʻo Sīsū Kalaisí ʻoku lahi ʻenau fakatokangaʻi ʻiate kinautolú (neongo kapau ʻoku nau fakatokangaʻi ia ʻi ha fanga kiʻi founga iiki).

Mahalo he ʻikai fakatokangaʻi ʻe ha kau ako ʻe niʻihi ʻenau tupulakí. Fakamanatu ki he kau akó ʻoku faʻa faingataʻa ke ʻiloʻi ʻa e tupulakí, tautautefito ʻiate kinautolu pē, ka ʻoku ʻikai ʻuhinga ia ʻoku ʻikai ke nau tupulaki. ʻE maʻu ʻe he kau akó ʻi he lēsoni ko ʻení ha ngaahi faingamālie ke fakamatalaʻi ʻa e taumuʻa ʻo e sākalamēnití, fakakaukau ki heʻenau loto-holi ke muimui ki he palōfitá, pea toe vakaiʻi ʻenau ngaahi palani ke vahevahe ʻa e ongoongoleleí. Mahalo kuo fakamamafaʻi ʻi he ako ʻe hoʻo kalasí ʻa e Tokāteline mo e Ngaahi Fuakava 20–40 ha ngaahi moʻoni kehe mei he ngaahi moʻoni ʻi he ngaahi ʻekitivitī ko ʻení. Kapau ko ia, te ke lava ʻo liliu ʻa e ngaahi ʻekitivitií ke fakakau ai ʻa e ngaahi moʻoni ko iá.

Fakamatalaʻi ʻa e taumuʻa ʻo e sākalamēnití

ʻOange ha faingamālie ki he kau akó ke nau fakamatalaʻi ʻa e taumuʻa ʻo e sākalamēnití. Ke teuteuʻi kinautolú, te ke lava ʻo fakaafeʻi kinautolu ke toe vakaiʻi ʻa e meʻa naʻa nau ako fekauʻaki mo e sākalamēnití ʻi he Tokāteline mo e Ngaahi Fuakavá (vakai, Tokāteline mo e Ngaahi Fuakava 20:75–79; 27:1–2). Te nau lava foki ʻo toe vakaiʻi ʻa e ngaahi fakamatala naʻa nau hiki ʻi heʻenau tohinoa akó.

Te ke lava ʻo fakafeʻiloaki ha tūkunga hangē ko ʻení pea kole ki he kau akó ke fakamatalaʻi ʻa e taumuʻa ʻo e sākalamēnití ʻo fakaʻaongaʻi ha taha ʻo e ngaahi founga ko ʻení ke fakahoko ʻakí: fakatātaaʻi, faʻu ha fakamatala pe fakaʻaliʻali fakavitiō, pe tohi ʻi ha tohinoa.

Naʻe fakaafeʻi ʻe ʻAisake ha kaungāmeʻa ke na maʻulotu ʻi he Sāpaté. Koeʻuhí kuo teʻeki ai ʻalu hono kaungāmeʻá ki ha houalotu sākalamēniti kimuʻa, ʻoku loto ʻa ʻAisake ke ne fakamatalaʻi ange ha ngaahi fakaikiiki mahuʻinga kimuʻa ʻi he ʻaho ko iá.

• ʻOkú ke pehē ko e hā ha ngaahi fakaikiiki ʻoku totonu ke vahevahe ʻe ʻAisake fekauʻaki mo e ouau ʻo e sākalamēnití?

Te ke lava ʻo fakaʻaliʻali ʻa e ngaahi ueʻi ko ʻení ke tokoni ki he kau akó ke teuteu ʻenau ngaahi fakakaukaú pea nau lava ʻo fakahoko ʻenau fakamoʻoní.

Fili ha fakaikiiki ʻe ua pe tolu fekauʻaki mo e ouau ʻo e sākalamēnití te ke lava ʻo fakatefito aí. Fakaʻaongaʻi ha potufolofola ʻe taha pe lahi ange ke tokoni ki hoʻo fakamatalá mo e fakamoʻoní.

• Ongo lotu ʻoku fakahoko ke tāpuakiʻi ʻaki ʻa e maá mo e vaí

• Ko e meʻa ʻoku tau palōmesi ki he Tamai Hēvaní

• Ko e meʻa ʻoku talaʻofa mai ʻe he Tamai Hēvaní kiate kitautolú

• Ko e ngaahi tōʻonga fakakaukau ʻoku tau fakahaaʻi ʻi heʻetau maʻu ʻa e sākalamēnití

• Ko e fakatefito ʻa e tokangá ʻia Sīsū Kalaisí

• Ko hoʻo aʻusia fakatāutahá

Hili ʻa e tali ʻa e kau akó ki he tūkungá, te ke lava ʻo fakaafeʻi kinautolu ke fakakaukau mo vahevahe ʻa e founga ʻe lava ke tokoniʻi ai kinautolu ʻe he ouau ʻo e sākalamēnití ke nau ʻilo ʻa e founga ʻoku nau hoko ai ʻo hangē ko Sīsū Kalaisí.

Ongoʻi ha holi lahi ange ke muimui ki he palōfita moʻuí

ʻI he ngaahi lēsoni kimuí ni maí, mahalo kuo maʻu ʻe he kau akó ha ngaahi faingamālie ke ako ki he mahuʻinga ʻo e muimui ki he palōfitá ʻi hotau kuongá ni. ʻE maʻu ʻe he kau akó ʻi he ʻekitivitī ako ko ʻení ha faingamālie ke nau fakakaukau ki he founga kuo tokoniʻi ai ʻenau loto-holi ke muimui ki he palōfita moʻuí lolotonga ʻenau ako ʻa e Tokāteline mo e Ngaahi Fuakavá.

Mahalo te ke fie fakamanatu ki he kau akó ʻa e sivi fakataautaha ko ʻení ʻi ha lēsoni kimuʻa (vakai ki he lēsoni ʻi he Tokāteline mo e Ngaahi Fuakava 21).

Naʻe fakaafeʻi koe ʻi ha lēsoni kimuʻa ke ke fakakaukau ki ha faleʻi mei he kau palōfitá mo e kau ʻaposetoló ʻa ia ʻe ala faingataʻa ke ke muimui ki ai. Feinga ke ke manatuʻi pe ko e hā ia. ʻE lava ke ke kumi ʻi hoʻo tohinoa akó ke ʻiloʻi ʻa e meʻa naʻá ke hikí.

ʻOange ki he kau akó ha ngaahi miniti siʻi ke nau vakai ki heʻenau tohinoa akó kapau naʻa nau hiki ha fakamatala ʻi ai.

• Ko e hā ha ngaahi potufolofola kuo tau toki ako kimuí ni ʻoku nau fakamamafaʻi ʻa e mahuʻinga ʻo e muimui ki he palōfitá?

  ʻE lava ke kau ʻi he ngaahi potufolofola ʻe lava ke ʻohake ʻe he kau akó ʻa e Siosefa Sāmita—Hisitōlia 1:21–35; Tokāteline mo e Ngaahi Fuakava 1:38–39; 21:4–6. ʻOange ha faingamālie ki he kau akó ke vahevahe ʻa e meʻa naʻa nau maʻú. ʻI hono fakaʻatā ʻa e kau akó ke fakahoko ʻeni ʻi ha fanga kiʻi kulupu īkí, ʻe lava ai ke vahevahe ʻe ha kau ako tokolahi ange ʻa e meʻa naʻe mahuʻinga kiate kinautolú.

  Fakakaukau ke fakaafeʻi ʻa e kau akó ke lekooti ʻenau ngaahi tali ki ha fehuʻi ʻe taha pe lahi ange mei he ngaahi fehuʻi ko ʻení. Tuku ke fili ʻe he kau akó ʻenau ngaahi founga ke lekooti ai ʻa e ngaahi ongo ko ʻení. Hili ha taimi feʻunga, fakaafeʻi ha kau ako ʻe loto-fiemālie ke vahevahe ʻenau ngaahi fakakaukaú. Neongo mahalo he ʻikai lelei ʻa e ngaahi ongo ʻoku maʻu ʻe he kau akó fekauʻaki mo e muimui ki he palōfitá, ka te ke lava ʻo poupouʻi kinautolu ke nau ngāueʻi ʻa e fanga kiʻi holi faingofua tahá pea fekumi ki he tāpuaki ʻa e ʻEikí ʻi heʻenau muimui ki Heʻene kau palōfitá.

• Ko e hā ʻa e ngaahi ongo ʻokú ke lolotonga maʻu fekauʻaki mo e muimui ki he palōfita ʻa e ʻEikí kuo filí? ʻOkú ke pehē ko e hā kuó ne liliu lahi taha hoʻo ngaahi ongo fekauʻaki mo e muimui ki he kau palōfita ʻa e ʻEikí?

• ʻOkú ke pehē ʻe tokoniʻi fēfē nai koe ʻe he muimui ki he palōfitá ke ke hoko ʻo hangē ange ko Sīsū Kalaisí?

Ko hono vahevahe ʻa e ongoongolelei ʻo Sīsū Kalaisí mo e niʻihi kehé

Tokoni ki he kau akó ke fakakaukau ki he meʻa kuo nau ʻilo mei heʻenau ako ʻa e Tokāteline mo e Ngaahi Fuakavá fekauʻaki mo hono vahevahe ʻo e ongoongolelei ʻo Sīsū Kalaisí. Te ke lava ʻo fakaafeʻi ʻa e kau akó ke kumi ha ngaahi vahe pe veesi pau naʻa nau fakatefito ai ʻi heʻenau akó. ʻE lava ke kau heni ʻa e Tokāteline mo e Ngaahi Fuakava 18 mo e vahe 30–36.

Naʻe maʻu ʻe he kau akó ha faingamālie ke faʻu ha palani ke vahevahe ʻa e ongoongoleleí mo ha taha ʻi heʻenau ako ʻa e “Tokāteline mo e Ngaahi Fuakava 30–36, Konga 2.” Fakakaukau ke muimuiʻi ʻa e palani ko ʻení ʻaki hano fai ha ngaahi fehuʻi hangē ko ʻení (ʻe lava foki ke aleaʻi ʻe he kau akó ʻa e ngaahi fehuʻi ko ʻení ʻi ha fanga kiʻi kulupu iiki):

• Ko e hā kuó ke fai kimuí ni ke vahevahe ʻa e ongoongoleleí mo ha tokotaha? ʻOkú ke pehē naʻe fēfē nai?

• Ko e hā ha ngaahi faingataʻa kuó ke fehangahangai mo ia ʻi hoʻo feinga ke vahevahe ʻa e ongoongolelei ʻo Sīsū Kalaisí ʻi ha ngaahi founga fakanatula mo angamaheni?

• Ko e hā ʻokú ke ako fekauʻaki mo hono vahevahe ʻo e ongoongolelei ʻo Sīsū Kalaisí?

Aleaʻi fakakalasi hoʻomou ngaahi feinga ke vahevahe ʻa e ongoongolelei ʻa e Fakamoʻuí. ʻE lava ke aleaʻi ʻe he kau akó ha ngaahi meʻa naʻe lelei pe ngaahi faingataʻa naʻa nau aʻusia. ʻE lava ke ʻomi ʻe he fealēleaʻaki ko ʻení ha faingamālie ki he kau akó ke nau fetokoniʻaki ai ke vahevahe ʻa e ongoongolelei ʻo Sīsū Kalaisí. Te ke lava foki ʻo tokoni ki he kau akó ke fakakaukau ki he founga kuo nau tupulaki ai ʻi heʻenau feinga ke talanoa mo e niʻihi kehé fekauʻaki mo e Fakamoʻuí mo ʻEne ongoongoleleí.