Leksiyon 55: Doktrina ug mga Pakigsaad 41–44

Doktrina ug mga Pakigsaad 41

Ang Ginoo Nahimuot sa Pagpanalangin Kanato

Samtang ang Propeta nakighiusa sa nanlimbasog nga mga Santos sa Ohio, ang Ginoo mipamatuod nga Siya nahimuot sa pagpanalangin niadtong kinsa naminaw Kaniya. Kini nga leksiyon gituyo aron matabangan ang mga estudyante nga mobati og pagsalig nga ang Ginoo mopanalangin kanila samtang sila maminaw ug mosunod Kaniya.

Mga Posibleng Kalihokan sa Pagkat-on

Unsa ka kamasaligon nga … ?

Pagdrowing og grapika sama sa mosunod diha sa pisara:

Itudlo ang tuo nga bahin sa sukdanan. Dapita ang mga estudyante sa pagpakigbahin og usa ka butang nga ilang gibati nga masaligon ug ngano.

Isulat ang mosunod nga pamahayag diha sa pisara: Ang Ginoo mopanalangin kanato kon kita maminaw ug mosunod Kaniya. Hangyoa ang mga estudyante sa paggamit sa sukdanan sa paggrado sa ilang pagsalig niini nga pamahayag sa sukdanan nga 1 ngadto sa 5 (1 = dili masaligon, ug 5 = masaligon kaayo). Dapita ang mga estudyante sa paghunahuna kon nganong ilang gigradohan ang ilang pagsalig sa ingon niana nga paagi.

• Unsa nga kalainan ang mahimo niini nga mobati og dakong pagsalig nga ang Ginoo mopanalangin kanimo?

Dapita ang mga estudyante sa pagtinguha og tabang gikan sa Ginoo aron madugangan ang ilang pagsalig nga Siya mopanalangin kanila samtang sila maningkamot sa pagpaminaw ug pagsunod Kaniya.

Ang kinaiya sa Ginoo sa pagpanalangin kanato

Niadtong Disyembre 1830, gisugo sa Ginoo ang mga Santos nga mobalhin ngadto sa Ohio (tan-awa sa Doktrina ug mga Pakigsaad 37:3). Wala madugay, niadtong Enero ug Pebrero 1831, si Propeta Joseph Smith ug ang iyang asawa, si Emma, mibiyahe og gatosan ka milya paingon ngadto sa Kirtland, Ohio. Ang Propeta dayon nakadawat og pagpadayag nga naghatag og pipila ka mga instruksiyon samtang ang mga Santos gikan sa ubang mga dapit misugod sa pagpuyo sa Kirtland.

Basaha ang Doktrina ug mga Pakigsaad 41:1, mangita sa kinaiya sa Ginoo mahitungod sa pagpanalangin niadtong kinsa naminaw Kaniya.

Tabangi ang mga tigkat-on sa pag-ila sa impluwensiya sa Ginoo: Alang sa dugang nga pagbansay aron matabangan ang mga tigkat-on nga makaila sa impluwensiya sa Ginoo diha sa mga kasulatan ug sa ilang kaugalingong kinabuhi, tan-awa ang kahanas nga “Ipangutana ang butang nga naghatag og gibug-aton sa pagkonektar sa gugma, gahom, ug kaluoy sa Ginoo ngadto sa mga kamatuoran nga gitudlo,” diha sa pagbansay nga giulohan og, “Tabangi ang mga tigkat-on nga makaila sa gugma, gahom, ug kaluoy sa Ginoo diha sa ilang kinabuhi” nga makita diha sa Pagpalambo sa mga Kahanas sa Magtutudlo: Magpunting kang Jesukristo. Samtang ipakigbahin sa mga estudyante ang ilang nakaplagan, isulat diha sa pisara ang mosunod nga kamatuoran: Ang Ginoo nahimuot sa pagpanalangin niadtong kinsa naminaw Kaniya. Mahimo nimong dasigon ang mga estudyante sa pagmarka niini nga kamatuoran diha sa ilang mga kasulatan.

• Unsa sa imong hunahuna ang gipasabot nga mahimuot sa usa ka butang?

• Unsa sa imong hunahuna ang pipila sa “labing mahinungdanon sa tanan nga mga gasa sa Dios”? (Doktrina ug mga Pakigsaad 14:7).

• Unsa ang pipila ka mga paagi nga kita makapaminaw Kaniya?

Paminawa ang mga tubag sa mga estudyante. Kon kini mapuslanon, dapita ang mga estudyante sa pagbasa sa mosunod nga pamahayag, mangita sa mga paagi nga kita makapaminaw sa Ginoo.

Si Presidente Russell M. Nelson mitudlo:

Kinahanglan og tininuod ug makanunayon nga paningkamot sa pagpuno sa atong inadlaw nga kinabuhi sa Iyang mga pulong, sa Iyang mga pagtulun-an, sa Iyang mga kamatuoran. …

Kita makaadto sa mga kasulatan. Kini nagtudlo nato bahin ni Jesukristo ug sa Iyang ebanghelyo, sa gidak-on sa Iyang Pag-ula, ug [sa] mahinungdanong plano sa [atong] Amahan sa kalipay ug katubsanan. … Samtang kita magbusog sa mga pulong ni Kristo matag adlaw, ang mga pulong ni Kristo mosulti nato unsaon sa pagtubag sa mga kalisod nga wala nato mahunahunai nga atong atubangon.

Kita usab [maka] paminaw kaniya diha sa templo. Ang balay sa Ginoo mao ang balay sa pagkat-on. Didto ang Ginoo nagtudlo sa Iyang kaugalingong paagi. …

… Kita [maka] paminaw Kaniya samtang kita mamati sa mga pulong sa mga propeta, mga manalagna, ug mga tigpadayag. Ang naordinahan nga Apostoles ni Jesukristo kanunay nga nagpamatuod Kaniya. Sila nagtudlo sa dalan samtang kita nagsubay sa malisod nga dalan sa atong mortal nga mga kasinatian. (Russell M. Nelson, “Paminaw Kaniya,” Liahona, Mayo 2020, 89–90)

Ikonsiderar ang paghangyo sa mga estudyante sa pagrebyo sa bersikulo 1 aron makita kon unsay mahitabo niadtong nagdumili sa pagpaminaw sa Ginoo. Mahimong makatabang ang paghisgot nga ang pulong nga “mga pagtunglo” nga gigamit niini nga bersikulo nagpasabot sa mga paghukom o mga sangpotanan.

• Ngano nga importante nga mahibaloan nga ang pagdumili sa pagpaminaw sa Ginoo mahimong mosangpot sa negatibo nga mga sangpotanan?

Mga ehemplo nga ang Ginoo nagpanalangin niadtong naminaw Kaniya

Dasiga ang pipila ka mga estudyante sa pagpakigbahin sa ilang mga tubag sa mosunod nga mga pangutana. Ang pagpakigbahin sa ilang kahinam ug gugma mahimong makatabang kanila nga makasabot sa kahimuot sa Ginoo. Mahimo usab kini nga usa ka maayong kahigayonan nga mas mailhan ang imong mga estudyante.

• Unsa ang imong ganahan o gikahimut-an?

Ipasabot nga adunay daghang mga ehemplo sa Ginoo nga tinud-anay nga nahimuot sa pagpanalangin niadtong naminaw Kaniya.

Basaha ang mosunod nga mga bersikulo nga mangita kon sa unsang paagi gipanalanginan sa Ginoo ang Iyang mga Santos samtang naminaw sila Kaniya.

Ikonsiderar ang pagbahin sa klase ngadto sa mga grupo aron sa pagbasa sa mga bersikulo ug sa pagtubag sa kaubang mga pangutana. Mahimo dayon nga ipakigbahin sa mga estudyante ngadto sa usag-usa kon unsa ang ilang nakat-onan.

Doktrina ug mga Pakigsaad 41:2–5

• Sa unsang paagi kaha nga ang pagdawat sa balaod o direksiyon sa Ginoo mahimong usa ka panalangin? (Tan-awa sa bersikulo 3.)

• Sa unsang paagi nga ang pagsunod sa balaod sa Ginoo ug pagkahimong mas maayong mga disipulo ni Kristo makatabang kanato? (Tan-awa sa bersikulo 5.)

Alang sa usa ka modernong ehemplo, tan-awa si Presidente Gordon B. Hinckley (1910–2008) nga mipakigbahin kon sa unsang paagi gipanalanginan sa Ginoo ang usa ka tawo kinsa naminaw ug misunod Kaniya, diha sa bidyo nga “We Walk by Faith,” makita sa ChurchofJesusChrist.org, gikan sa time code 7:30 hangtod sa 12:39.

We Walk by Faith

We reach toward the unknown, but faith lights the way. If we will cultivate that faith, we shall never walk in darkness.

Dugang nga mga ehemplo

Dapita ang mga estudyante sa pagpangita o sa paghunahuna og labing minos duha ka dugang nga mga ehemplo nga makapalig-on sa ilang pagsalig nga ang Ginoo mopanalangin niadtong naminaw Kaniya. Dasiga sila sa pagtinguha sa giya sa Ginoo sa pagpangita og mga ehemplo nga makapanalangin kanila ug sa klase.

1. Pangita og usa ka ehemplo gikan sa mga kasulatan. Kini mahimong:

   1. Usa ka asoy sa dihang gipanalanginan sa Ginoo kadtong naminaw ug misunod Kaniya. (Ang pipila ka ehemplo mao ang mosunod: Si Noe mitukod sa arka ug naluwas gikan sa Lunop [tan-awa sa Genesis 6–8]; Si Deborah misunod sa sugo sa Ginoo sa pagluwas sa Israel gikan sa pagkabihag [Mga Maghuhukom 4:1–8, 13–15]; Si Maria midawat sa tahas nga mahimong inahan sa Manluluwas ug mibati sa mga panalangin sa Ginoo [Lucas 1:38, 46–49]; Si Nephi nakaangkon sa mga palid nga tumbaga [tan-awa sa 1 Nephi 3–5]; Si Joseph Smith nakahimo sa pagpanalipod sa mga palid [tan-awa sa Joseph Smith—Kasaysayan 1:46, 60]; Si Joseph Smith ug Oliver Cowdery nagbunyag sa usag-usa human makadawat sa Aaronic nga Pagkapari ug dayon nakadawat og pagpakita sa Espiritu Santo [tan-awa sa Joseph Smith—Kasaysayan 1:68–74].)

   2. Usa ka bersikulo o mga bersikulo nga nagpamatuod nga ang Ginoo mopanalangin kanato samtang kita maminaw ug mosunod Kaniya. (Pipila ka mga ehemplo mao ang Malaquias 3:10; 1 Juan 3:22; Jarom 1:9; Mosiah 2:41; Doktrina ug mga Pakigsaad 19:38; 82:10; 89:1, 18–21; 130:21.)

2. Paghunahuna og dugang nga ehemplo. Kini mahimong:

   1. Usa ka personal nga kasinatian sa dihang ang Ginoo mipanalangin kanimo.

   2. Usa ka kasinatian gikan sa usa ka higala o minahal sa kinabuhi.

   3. Usa ka pakigpulong gikan sa kinatibuk-ang komperensiya.

   4. Usa ka bidyo sa ChurchofJesusChrist.org.

Dapita ang mga estudyante sa pagsulat sa ilang mga ehemplo sa nagkalain nga mga piraso sa papel. Sultihi ang mga estudyante nga ang ilang gisulat mahimong ipakigbahin sa uban sa klase. Tipona ang mga papel, saksaka kini, ug dayon pagpili og pipila o pagdapit og usa ka estudyante sa pagbuhat sa ingon. Mahimo kang magbasa og usa ka ehemplo matag higayon ug pangutana kon ang estudyante nga nagsulat niini andam ba nga mopakigbahin kon nganong gipili niya kana nga ehemplo. Ipangutana kon sa unsang paagi nga ang ehemplo makadugang sa pagsalig sa estudyante nga ang Ginoo mopanalangin kanila samtang maminaw sila Kaniya. Human mopakigbahin ang mga estudyante, pasalamati sila sa ilang paningkamot ug suwayi sa pagtabang kanila nga mobati sa kamahinungdanon sa pagpakigbahin sa ilang mga hunahuna ug mga kasinatian diha sa klase.

Sa pagtapos niini nga leksiyon, irekord ang imong mga hunahuna ug mga pagbati mahitungod sa pagpanalangin sa Ginoo kanato samtang kita maminaw Kaniya. Mibati ka ba nga masaligon nga Siya mopanalangin kanimo? Unsa ang imong mahimo aron madugangan ang imong pagsalig?

Ikonsiderar ang pagdapit sa mga estudyante sa pagpakigbahin unsay ilang nakat-onan ug gibati sa klase karon. Ipakigbahin ang imong kaugalingong pagpamatuod ug pagsalig nga ang Ginoo mopanalangin kanato samtang kita maminaw Kaniya.

Dugang nga mga Kapanguhaan

Unsaon nako nga mas makapaminaw sa Ginoo?

Si Elder Richard G. Scott (1928–2015) sa Korum sa Napulog Duha ka Apostoles mitudlo:

To Acquire Spiritual Guidance

By careful practice, through the application of correct principles, and by being sensitive to the feelings that come, you will gain spiritual guidance.

Ang atong Amahan naglaom nga kamo makakat-on kon unsaon sa pagbaton nianang balaanong tabang pinaagi sa pagpakita og hugot nga pagtuo diha Kaniya ug sa Iyang Balaang Anak, nga si Jesukristo. Kon kamo nakadawat og dinasig nga giya pinaagi lamang sa pagpangayo, mahimo kamong huyang ug mas magdepende pa diha Kanila. Nasayod Sila nga ang mahinungdanong personal nga pagtubo moabot samtang nakigbisog kamo sa pagkat-on kon unsaon nga magiyahan sa Espiritu.

Unsay nakita nga makahasol nga buluhaton sa sinugdanan mahimong mas sayon sa pagdumala sa paglabay sa panahon samtang kamo kanunay nga maningkamot sa pag-ila ug pagsunod sa mga pagbati nga giaghat sa Espiritu. Ang inyong pagsalig sa direksiyon nga inyong nadawat gikan sa Espiritu Santo mahimo usab nga mas molig-on. (Richard G. Scott, “Aron Makabaton og Espirituhanong Giya,” Liahona, Nob. 2009, 7)

Unsa kaha kon ang mga panalangin sa Ginoo daw dili moabot?

Si Elder Dale G. Renlund sa Korum sa Napulog Duha ka Apostoles miingon:

Kon makadawat kamo og bisan unsang panalangin gikan sa Dios, inyong masulti nga inyong nahimo gamit ang mahangtorong balaod nga gikinahanglan aron madawat kana nga panalangin. Apan hinumdomi nga ang “dili mausab” nga balaod dili magbase sa panahon sa kalibotan, buot ipasabot nga ang mga panalangin moabot sa panahon nga gitakda sa Dios. Bisan ang karaang mga propeta diha sa pagpangita sa ilang panimalay nga langitnon “nangamatay uban sa hugot nga pagtuo, nga wala makadawat sa mga gisaad kanila, hinonoa nanaglantaw lamang sila niini… [ug] nanaghangop niini” [Hebreohanon 11:13]. Kon ang gitinguhang panalangin gikan sa Dios wala madawat—bisan pa—dili kamo angayang mabalaka, nga magalibog unsa pay inyong buhaton. Apan hinoon, mopatalinghog sa tambag ni Joseph Smith nga “magmalipayon sa pagbuhat sa tanang mga butang nga ubos sa [inyong] gahom; ug unya … magmalinawon, uban ang labing dako nga kaseguroan, nga makasaksi sa … [gahom sa Dios] … nga ipadayag” [Doktrina ug mga Pakigsaad 123:17]. Ang ubang panalangin gitagana alang sa umaabot, bisan sa [labing banggiitan nga] mga anak sa Dios. (Dale G. Renlund, “Magamadagayaon [Buhong] sa mga Panalangin,” Liahona, Mayo 2019, 72)

Mabatonan ba nato ang panalangin gikan sa Dios pinaagi sa pagpaningkamot?

Si Elder Dale G. Renlund sa Korum sa Napulog Duha ka Apostoles miingon:

Mga kaigsoonan, ang atong Langitnong Amahan ug si Jesukristo nagtinguha sa pagpanalangin sa matag usa kanato. … Ang mga panalangin gikan sa langit dili maangkon pinaagi sa matinguhaong pagtigom og “mga medalya sa pagkamaayo,” dili usab sa walay kahimoang paghulat sa panalangin kon kita nakadaog ba kaha sa gipustahan nga numero [sugal]. Dili, ang kamatuoran lahi kaayo og kahulogan apan mas tukma alang sa relasyon tali sa mahigugmaong Langitnong Amahan ug sa Iyang malagmit nga mga manununod—kita. Ang gipahiuling kamatuoran nagpadayag nga ang mga panalangin dili basta lang maangkon, apan ang dinasig nga mga buhat inubanan sa hugot nga pagtuo sa atong bahin, sa pagsugod man ug sa pagpadayon maoy mga mahinungdanon. (Dale G. Renlund, “Magamadagayaon [Buhong] sa mga Panalangin,” Liahona, Mayo 2019, 70)

Dugang nga mga Kalihokan sa Pagkat-on

Dugang nga mga ehemplo sa Dios nga nagpanalangin niadtong naminaw Kaniya

Usa ka ehemplo sa Ginoo nga nahimuot sa pagpanalangin niadtong kinsa naminaw Kaniya mao ang asoy ni Ann ug ni Newel K. Whitney. Basaha ang Mga Santos: Ang Istorya sa Simbahan ni Jesukristo sa Ulahing mga Adlaw, vol. 1, Ang Sumbanan sa Kamatuoran, 1815–1846 (2018), 127–29, o paminaw gikan sa time code 13:01 hangtod sa 15:52.

• Sa unsang paagi nga ang mga Whitney nagtinguha sa pagpaminaw sa tingog sa Ginoo?

• Giunsa pagpanalangin sa Ginoo ang mga Whitney?

Agi og dugang sa pagpadala ni Propeta Joseph Smith sa pagpuyo sa Kirtland, ang Ginoo mipanalangin sa mga Santos sa ubang mga paagi.

Laing ehemplo mao si Edward Partridge. Mahimong basahon sa mga estudyante ang Doktrina ug mga Pakigsaad 41:9–11, mangita sa unsay gitawag sa Ginoo nga buhaton ni Edward.

• Giunsa paghulagway si Edward niini nga mga bersikulo?

• Sa imong hunahuna sa unsang paagi ang pagtuman sa iyang tahas isip bishop makapanalangin sa mga Santos sa Kirtland?

Ipasabot nga si Bishop Partridge matinud-anong mialagad sa iyang calling sa Ohio, dayon sa Missouri, ug ngadto sa panahon sa Illinois sa dihang siya namatay niadtong 1840. Ang iyang pagserbisyo usa ka dakong panalangin sa mga Santos.

• Sa unsang paagi nga ang pagbaton og bishop usa ka panalangin sa atong mga kinabuhi karon?

Ang Ginoo mipasabot sa pipila ka mga panalangin nga nadawat ni Edward Partridge human sa iyang kamatayon. Basaha ang Doktrina ug mga Pakigsaad 124:19 mangita niini nga mga panalangin.

Perlas sa atubangan sa mga baboy

Human mabasa sa mga estudyante ang Doktrina ug mga Pakigsaad 41:5–6, ipakita kini nga hulagway ug pangutana kon sa ilang hunahuna unsa kaha kini.

Dapita ang mga estudyante sa pagpasabot ngadto sa usa ka kapares kon unsa sa ilang hunahuna ang gipasabot sa hugpong sa mga pulong nga “ayaw iitsa ang mga perlas ngadto sa mga baboy” (Mateo 7:6). Dayon dapita ang mga estudyante sa pagbasa sa mosunod nga pamahayag gikan ni Elder D. Todd Christofferson sa Korum sa Napulog Duha ka Apostoles:

Ang Ginoo miingon, “Kana nga moabot gikan sa kahitas-an sagrado, ug kinahanglan gayod ipamulong uban sa pag-amping, ug pinaagi sa pagtugot sa Espiritu” (D&P 63:64). Mimando usab siya nga kinahanglan nga kita dili molabay sa mga perlas ngadto sa mga baboy o mohatag niana nga sagrado ngadto sa mga iro (tan-awa sa 3 Nephi 14:6; D&C 41:6), ang buot ipasabot nga ang sagradong mga butang kinahanglang dili hisgotan uban niadtong dili andam nga motamod sa bili niini.

Magmaalamon sa unsay gihatag sa Ginoo kanimo. Kini usa ka pagsalig. Pananglit, dili kamo basta-basta lang nga mopakigbahin sa unsay anaa sa inyong patriyarkal nga panalangin ni bisan kinsa. (D. Todd Christofferson, “Ang Pagtahod sa Sagrado,” Liahona, Hunyo 2006, 31)

• Unsa ang pipila ka sagrado nga mga butang nga kinahanglan natong tagdon nga adunay balaang pagtahod ug pagrespeto?

Pagkat-on og dugang pa kon unsaon sa pagpaminaw Kaniya

Mahimo nimong ikonsiderar ang pagpakita sa usa o daghan pa niini nga mga bidyo atol sa klase. Dapita ang mga estudyante sa pagpakigbahin sa unsay ilang nakat-onan mahitungod sa pagpaminaw sa tingog sa Ginoo sa ilang mga kinabuhi.

#HearHim: Listen to the Voice of Jesus Christ

What happens when we mute the noise around us, and listen with our hearts? That’s when we can feel the influence of Jesus Christ. #HearHim

#Paminaw Kaniya: Si Presidente Nelson Midapit Kanato sa Pagpaminaw sa Tingog sa Ginoo

Nganong ang Langitnong Amahan nagsulti kanato sa pagpaminaw sa iyang anak, si Jesukristo? Si Presidente Russell M. Nelson mipaila sa #PaminawKaniya, nga nagdapit kanato sa pagsusi kon sa unsang paagi nga kita maminaw ug mosunod sa atong Manluluwas.

Sa Unsang Paagi nga Ako maka-#PaminawKaniya: Elder Gary E. Stevenson

Sa unsang paagi nga ikaw maka-#PaminawKaniya? Si Elder Gary E. Stevenson nakakat-on sa pag-ila sa mga pulong ni Jesukristo pinaagi sa Espiritu Santo.