Leksiyon 57: Doktrina ug mga Pakigsaad 41–44

Doktrina ug mga Pakigsaad 42:29–39

Gipahinungod ngadto sa Ginoo

Usa ka grupo sa mga miyembro sa Simbahan nga nagpuyo sa uma ni Isaac ug Lucy Morley adunay dakong tinguha sa pagpuyo sa ebanghelyo ni Jesukristo ug sa pag-atiman sa usag usa. Pinaagi ni Propeta Joseph Smith, ang Ginoo mipadayag sa balaod sa pagpahinungod aron sa pagtabang sa mga Santos sa pag-atiman sa mga kabos. Kini nga leksiyon makatabang sa mga estudyante nga madugangan ang ilang tinguha sa pagsunod sa balaod sa pagpahinungod.

Mga Posibleng Kalihokan sa Pagkat-on

“Kamo ang akong mga kamot”

Si Presidente Dieter F. Uchtdorf, kanhi sa Unang Kapangulohan, mipakigbahin sa mosunod:

“You Are My Hands”

As disciples of Jesus Christ, our Master, we are called to support and heal rather than condemn.

Usa ka istorya gisugilon nga atol sa pagpamomba sa usa ka siyudad niadtong Ikaduhang Gubat sa Kalibotan, usa ka dakong estatuwa ni Jesukristo grabe ang pagkaguba. Sa dihang nakit-an sa mga tawo ang estatuwa taliwala sa nangaguba, sila nagbangotan tungod kay nahimo na kini nga usa ka minahal nga simbolo sa ilang pagtuo ug sa presensiya sa Dios sa ilang kinabuhi.

Ang mga eksperto nakahimo sa pag-ayo sa hapit tanan sa estatuwa, apan ang mga kamot niini grabe gayod ang pagkaguba nga dili na kini mabalik. Ang uban misugyot nga manuhol sila og usa ka iskultor aron himoan og bag-ong mga kamot, apan ang uban gusto nga pasagdan lang kini nga ingon niini—usa ka permanente nga pahinumdom sa trahedya sa gubat. Sa kataposan, ang estatuwa nagpabilin nga walay mga kamot. Hinoon, ang mga tawo sa siyudad midugang diha sa ubos sa estatuwa ni Jesukristo og usa ka karatula uban niining yano nga mga pulong: “Kamo ang akong mga kamot.” (Dieter F. Uchtdorf, “Kamo ang Akong mga Kamot,” Liahona, Mayo 2010, 68)

• Unsa ang mipatigbabaw kanimo gikan niini nga istorya?

• Sa unsang mga paagi nga kita mahimong mga kamot ni Jesukristo?

Dapita ang mga estudyante sa pagsulat og “Iyang mga kamot” o sa pagsubay sa usa sa ilang mga kamot diha sa ilang journal. Dapita sila sa pagpamalandong sa ilang kaugalingong tinguha nga mahimong mga kamot sa Ginoo. Sa kataposan sa leksiyon, aduna silay kahigayonan sa pagrekord sa ilang mga hunahuna ug mga pagbati.

Ang balaod sa pagpahinungod

Sa sayong bahin sa 1831, ang mga miyembro sa Simbahan nga nagpuyo sa New York mibalhin sa Ohio. Daghan niini nga mga Santos ang kabos ug napugos sa pagbiya sa daghan sa ilang mga kabtangan. Sa Ohio, usa ka dakong grupo sa mga bag-ong miyembro ang nagpuyo sa uma ni Isaac ug Lucy Morley. Nagporma sila og alayon nga grupo nga gitawag nila og “ang Pamilya.” Usa ka pagtuo nga ilang gisaw-an mao nga ang tanang personal nga katigayonan iya sa matag usa diha sa grupo. Ang Ginoo namulong sa ilang mga binuhatan sa dihang Iyang gipadayag ang Iyang balaod ngadto kang Joseph Smith. Lakip sa ubang mga balaod, ang Ginoo mipadayag og mga baroganan sa balaod sa pagpahinungod. Ang pagkat-on ug pagsunod niini nga mga baroganan usa ka paagi nga ang mga Santos mahimong mga kamot sa Ginoo.

Dapita ang mga estudyante sa pagpakigbahin sa ilang nadungog mahitungod sa balaod sa pagpahinungod o sa pagpangutana kon unsang mga pangutana ang lagmit nga aduna sila. Mahimong mangita ang mga estudyante og kahulogan sa pagpahinungod, o mahimo nimo kining ihatag gikan ni Elder D. Todd Christofferson sa Korum sa Napulog Duha ka Apostoles.

Ang pagpahinungod mao ang paggahin o paghalad og usa ka butang nga ingon ka sagrado, gihalad alang sa balaanong mga katuyoan. (D. Todd Christofferson, “Mga Hulagway sa Gipahinungod nga Kinabuhi,” Liahona, Nob. 2010, 16)

Ang Ginoo mihangyo sa mga Santos sa Ohio sa pagpahinungod sa ilang mga kabtangan ngadto Kaniya pinaagi sa paghatag niini ngadto sa Iyang Simbahan.

Basaha ang Doktrina ug mga Pakigsaad 42:29–38, mangita kon nganong ang Ginoo misugo kanila sa pagbuhat niini.

Mahimong mailhan sa mga estudyante ang mosunod nga mga rason: aron sa pagpakita ngadto sa Ginoo sa atong gugma alang Kaniya (bersikulo 29), sa pag-atiman sa mga kabos (bersikulo 30–31, 34), sa pagpalit og yuta diin ang mga Santos makapundok sa higayon nga ang Manluluwas mobalik (bersikulo 35–36), ug sa pagtukod og mga balay tigumanan ug mga templo (bersikulo 35). Mahimong makatabang ang pagpasabot nga ang Bag-ong Jerusalem nga gihisgotan sa bersikulo 35 nagpasabot sa “dapit diin ang mga Santos magpundok ug si Kristo personal nga mohari uban kanila sa panahon sa Milenyum.” (Giya ngadto sa mga Kasulatan, “Bag-ong Jerusalem,” scriptures.ChurchofJesusChrist.org).

• Sa imong hunahuna ngano kaha nga gidapit sa Ginoo ang mga Santos sa paghinumdom ug pag-atiman sa mga kabos?

• Unsa nga mga kamatuoran ang atong makat-onan gikan niini nga mga bersikulo?

  Agi og dugang sa mga kamatuoran nga nahibaloan sa mga estudyante, tabangi sila nga makasabot nga kita nagserbisyo sa Manluluwas pinaagi sa pagserbisyo sa mga kabos ug nga ang Ginoo mihangyo kanato sa pagpahinungod kon unsa ang anaa kanato ngadto Kaniya aron sa pag-atiman sa mga kabos ug aron sa pagtukod sa Iyang gingharian.

  Aron matabangan ang mga estudyante nga masabtan ang ilang gibasa, mahimo nimo silang hangyoon sa pagdrama kon unsay gisugo nga buhaton ngadto sa unang mga miyembro sa gipahiuli nga Simbahan sa Ginoo. Iorganisar ang mga estudyante ngadto sa mga grupo nga lainlaig gidak-on, sama sa mga pamilya. Pag-apod-apod og gagmay nga mga butang, sama sa kendi o mga sensilyo, ngadto sa mga grupo, apan ayaw ipatas ang pag-apod-apod sa mga butang. Paghatag sa pipila ka mga grupo og labaw pa kay sa ubang mga grupo. Mahimo pa gani nimo iapod-apod ang mga butang nga ang pipila ka mga grupo walay makuha. Dapita ang mga estudyante sa pagpakita kon unsa ang angay nga mahitabo base sa mga panudlo sa Ginoo diha sa Doktrina ug mga Pakigsaad 42:29–35. Tabangi ang mga estudyante sa paghanduraw sa mga panginahanglan sa “mga pamilya” ug kon unsaon pagsangkap niadto nga mga panginahanglan. Ikonsiderar ang paghatag og pipila ka posibleng mga kahimtang nga nasinati sa ilang pamilya ug kon sa unsang paagi kana mahimong magtino sa ilang mga panginahanglanon. Kon makatabang, ang usa ka panaksan mahimong gamiton isip balay tipiganan sa Ginoo. Usab, usa o duha ka estudyante mahimong magdula sa bahin sa konseho nga gihulagway sa mga bersikulo 31 ug 34, kinsa gitawag sa Ginoo aron sa pagseguro nga ang tanan nakadawat sa unsay ilang gikinahanglan.

  Samtang ang mga estudyante mopakigbahin sa ilang mga tubag sa mosunod nga mga pangutana, pangita og mga paagi aron matabangan sila nga makasabot nga ang mga baroganan sa pagpahinungod managsama alang sa tanang anak sa pakigsaad sa Dios sa tanang dispensasyon. Bisan pa niana, ang piho nga mga paagi nga ang Dios nagsugo sa Iyang mga katawhan sa pagsunod sa balaod sa pagpahinungod mahimong magkalahi.

• Sa unsa nga mga paagi nga ang Ginoo naghangyo kanato sa pagpahinungod kon unsa ang anaa kanato karon?

• Unsa ang pipila ka mga ehemplo sa paggamit sa imong panahon, imong mga talento, ug mga panalangin gikan sa Dios sa pagtabang sa uban?

• Unsa ang pipila ka mga paagi nga mahimo natong maatiman ang mga panginahanglan sa mga kabos?

  Alang sa modernong adlaw nga mga ehemplo sa mga miyembro sa Simbahan nga nagpahinungod sa ilang panahon, mga talento, ug salapi, mahimo nimong ipakita ang usa o daghan pa sa mosunod nga mga bidyo: “Fast Offerings: A Simple Commandment with a Marvelous Promise” (3:01); “Syrian Refugee—‘The Moment I Was Shot I Knew I Would Never Walk Again’” (2:39); “A Thousand Days” (4:32).

  Fast Offerings: A Simple Commandment with a Marvelous Promise

  Excerpt from President Henry B. Erying’s talk “Is Not This the Fast That I Have Chosen?” He discusses the blessings of the fast and the story of a humble woman who pays a generous fast offering.

  Syrian Refugee - “The moment I was shot I knew I would never walk again”

  With millions impacted by the Syrian civil war that broke out in 2011 many have fled for safety and refuge. Watch and listen to Nadia’s story; A 12 year old Syrian refugee child, who while fleeing Syria, was shot in the back and paralyzed.

  A Thousand Days

  By digging wells and boreholes in drought-stricken countries of Africa, The Church of Jesus Christ of Latter-day Saints helps provide health and happiness to entire villages.

• Unsa ang imong nahibaloan mahitungod kang Jesukristo nga makadasig kanimo sa pagpahinungod sa imong panahon, mga talento, ug mga salapi ngadto Kaniya?

• Ngano sa imong hunahuna nga ang Manluluwas gusto nga kita moserbisyo Kaniya pinaagi sa pagserbisyo sa mga tawo nga nanginahanglan? (Alang sa dugang nga mga panabot, mahimo nimong pangitaon ang usa o daghan pa niining mga tudling sa kasulatan: Jacob 2:17–19; Mosiah 4:21–25; Doktrina ug mga Pakigsaad 38:24–27; 104:14–17.)

• Sa unsang paagi kaha nga ang pagtabang sa uban nga nanginahanglan makatabang kanato nga mahimong mas Kristohanon?

Mahimong makatabang ang pagpahibalo sa mga estudyante nga diha sa pagtuga sa templo, ang mga miyembro misaad sa pagtuman sa balaod sa pagpahinungod pinaagi sa pagpahinungod sa “ilang panahon, mga talento, ug sa tanang butang diin ang Ginoo mipanalangin kanila sa pagtukod sa Simbahan ni Jesukristo dinhi sa yuta” (Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 27.2, ChurchofJesusChrist.org).

Kon ang mga estudyante midrowing og usa ka lakra sa ilang kamot diha sa ilang journal sa pagtuon, mahimo nimo silang hangyoon nga sulatan kini atol sa mosunod nga kalihokan.

Paggahin sa makadiyot sa pagtimbang-timbang sa imong tinguha nga mahimong mga kamot sa Ginoo. Ang pagpamalandong ug ang pagsulat diha sa usa ka journal maoy usa ka paagi nga mahimo nimong sulayan ang pagpamati sa tingog sa Manluluwas ug kon unsay Iyang gidapit nga imong buhaton. Mahimo nimong pamalandongan ug isulat ang mahitungod sa usa o labaw pa sa mosunod:

Ikonsiderar ang pagpakita sa mosunod nga mga pag-aghat aron pamalandongan ug isulat sa mga estudyante.

• Mga pulong nga naghulagway sa imong mga gibati mahitungod sa pagsunod sa balaod sa pagpahinungod

• Mga paagi nga gusto nimong ipakigbahin kon unsa ang gihatag sa Ginoo kanimo sa pagtabang sa uban

• Bisan unsang mga kabalaka nga anaa kanimo mahitungod sa pagsunod sa balaod sa pagpahinungod ug kon unsaon nimo pagdangop sa Ginoo aron mabuntog kini

Mahimo nimong hangyoon ang mga estudyante sa pagpakigbahin sa ilang mga hunahuna diha sa klase ug diha sa balay uban sa ilang mga pamilya. Mahimo ka usab nga mopakigbahin sa imong kaugalingong mga hunahuna ug pagpamatuod.

Dugang nga mga Kapanguhaan

Unsa ang pamaagi sa Ginoo sa pag-amuma sa mga kabos ug sa uban nga nanginahanglan?

Si Elder Dean M. Davies (1951–2021) sa Seventy mitudlo:

Ang Balaod sa Puasa: Personal nga Responsibilidad sa Pag-atiman sa mga Kabus ug Timawa

Bishop Dean M. Davies namulong sa Oktubre 2014 nga Kinatibuk-ang Komperensya.

Ang pag-atiman sa mga kabos ug timawa kabahin gayod sa pangalagad sa Manluluwas. Kini anaa sa tanan Niyang gibuhat. Siya mopaduol ngadto sa tanan ug mobayaw kanato. … Akong dapiton ang matag usa kanato nga mahimong mas sama sa Manluluwas pinaagi sa pag-atiman sa mga kabos ug timawa. (Dean M. Davies, “Ang Balaod sa Puasa: Personal nga Responsibilidad sa Pag-atiman sa mga Kabos ug Timawa,” Liahona, Nob. 2014, 55)

Si Presidente Henry B. Eyring sa Unang Kapangulohan mipasabot:

Mga Oportunidad sa Paghimo og Maayo

The Lord’s way to help those in temporal need requires people who out of love have consecrated themselves and what they have to God and to His work.

Tungod kay ang Ginoo naminaw sa ilang mga pangaliyupo ug nabati ang inyong dakong kaluoy alang [kanila nga nanginahanglan], gikan pa sa sinugdanan sa panahon Siya mihatag og mga pamaagi aron ang Iyang mga disipulo makatabang. Gidapit Niya ang Iyang mga anak sa pagpahinungod sa ilang panahon, ilang kapanguhaan, ug ilang kaugalingon aron moapil Kaniya sa pagserbisyo sa uban. (Henry B. Eyring, “Mga Oportunidad sa Paghimo og Maayo,” Liahona, Mayo 2011, 22)

Si Sister Sharon Eubank, kinsa nagserbisyo sa Kinatibuk-ang Kapangulohan sa Relief Society, naglista og pipila ka mga ehemplo kon giunsa sa Simbahan pagtinguha sa pagserbisyo sa mga kabos ug sa uban nga nanginahanglan karon.

Ako Nag-ampo nga Siya Mogamit Kanato

Si Sister Eubank mi-report kabahin sa kasamtangan nga makatawhanong panabang nga mga paningkamot sa Simbahan.

Ang Simbahan mitubag niini nga sugo [sa pag serbisyo] sa daghang lain-laing paagi, lakip na:

• Ang pagpangalagad nga atong gibuhat pinaagi sa Relief Society, mga korum sa pagkapari, ug mga klase

• Pagpuasa ug ang paggamit sa mga halad sa puasa

• Mga uma alang sa kaayohan ug mga tipiganan sa pagkaon

• Tigdawat nga mga sentro alang sa mga langyaw

• Outreach alang sa mga naa sa prisohan

• Makatawhanong mga paningkamot sa Simbahan

• Ug ang JustServe nga app, diin kini anaa, nga mopahiangay sa mga nagboluntaryo ngadto sa mga oportunidad sa pagserbisyo

Kining tanan mga paagi, giorganisar pinaagi sa pagkapari, diin ang ginagmayng mga paningkamot nakahimo og dako nga epekto, mipadako sa daghang tagsa-tagsa nga mga butang nga atong gibuhat isip mga disipulo ni Jesukristo. (Sharon Eubank, “Ako Nag-ampo nga Siya Mogamit Kanato,” , Nob. 2021, 54)

Unsa ka dako ang tabang nga ikahatag sa Simbahan ngadto niadtong nanginahanglan?

Si Presidente Dallin H. Oaks sa Unang Kapangulohan mipasabot:

Ang atong 2021 nga mga gasto alang sa mga nanginahanglan sa 188 ka nasod sa tibuok kalibotan misumada og $906 ka milyon—hapit usa ka bilyon ka dolyar. Agig dugang, ang atong mga miyembro miboluntaryo og kapin sa 6 ka milyon ka oras sa paghago sa mao gihapon nga katuyoan.

Kadto nga mga numero siyempre, dili kompletong report sa atong pagpanghatag ug pagtabang. Kini wala maglakip sa personal nga mga serbisyo nga gihatag sa atong mga miyembro sa indibidwal nga paagi samtang sila nangalagad sa usag usa diha sa tinawag nga mga katungdanan ug boluntaryong mga pagserbisyo sa isig ka miyembro. Ug ang atong 2021 nga report wala maghisgot kon unsay gihimo sa atong mga miyembro sa indibidwal nga paagi pinaagi sa dili maihap nga manggihatagon nga mga organisasyon nga dili pormal nga konektado sa atong Simbahan. (Dallin H. Oaks, “Pagtabang sa mga Kabos ug sa mga Nagkalisod,” Liahona, Nob. 2022, 6)

Si Presidente Russell M. Nelson mihulagway kon unsay gibuhat sa Simbahan sa pagtabang sa mga tawo nga nanginahanglan sa tibuok kalibotan diha sa iyang pakigpulong nga “Ang Dako ug Ikaduhang Sugo” ( Liahona, Nob. 2019, 96–100).

Ang mosunod nga bidyo mao ang laing mapuslanon nga kapanguhaan:

World Food Program Donation Newsroom

World Food Program Donation Newsroom

Unsa ang balay tipiganan sa Ginoo?

Aron makat-on mahitungod sa balay tipiganan sa Ginoo, tan-awa sa “Balay Tipiganan” diha sa Giya ngadto sa mga Kasulatan (scriptures.ChurchofJesusChrist.org). Mahimo usab nimong tan-awon ang mga bidyo diha sa Media Library nga nagpakita og mga ehemplo kon giunsa paggamit ang balay tipiganan sa Ginoo.

Unsaon nako sa pagkat-on mahitungod sa puasa ug mga halad sa puasa?

Alang sa impormasyon, tan-awa ang Topics and Questions article nga “Fasting and Fast Offerings” (topics.ChurchofJesusChrist.org).

Dugang nga mga Kalihokan sa Pagkat-on

Leksiyon sa balaod sa pagpahinungod nga naggamit og butang

Sa dili pa magsugod ang klase, paggamit og tape o usa ka marker aron makahimo og linya sa unom ka bildo nga mga baso. Imarka ang linya sa lain-laing gitas-on sa matag baso. Dad-a ang mga baso ngadto sa klase. Dad-a usab ang usa ka pitsel nga dunay sulod nga tubig nga sobra nga ikasulod sa tanang mga baso ngadto sa mga linya nga gimarka diha niini. (Mahimo nimong butangan og koloring ang tubig aron ang mga estudyante sayon ra nga makakita niini.) Ipakita ang pitsel. Sultihi ang mga estudyante nga ang tubig nagrepresentar sa tanang katigayonan ug mga kapanguhaan sa komunidad.

Pagdapit og unom ka estudyante sa pagduol sa atubangan sa lawak klasehanan. Hatagi ang matag usa kanila og walay sulod nga baso. Pagbu-bu og tubig gikan sa pitsel ngadto sa mga baso. Sudli ang usa ka baso tupong sa linya nga imong gihimo diha niini, butangi ang tulo ka baso og tubig nga lapaw sa mga linya nga imong gihimo, ug butangi ang duha ubos sa mga linya nga imong gihimo. Ipasabot nga ang matag baso nagrepresentar sa usa ka pamilya ug nga ang linya sa matag baso nagrepresentar sa mga panginahanglan ug sa matarong nga mga tinguha niana nga pamilya. Ang mga baso nga adunay tubig nga ubos sa linya nagrepresentar sa mga pamilya nga walay igong kwarta o mga butang nga mosuporta sa ilang mga panginahanglan.

Tabangi ang mga estudyante nga makasabot sa panudlo sa Ginoo diha sa Doktrina ug mga Pakigsaad 42:32 pinaagi sa paghangyo sa unom ka estudyante sa pagbu-bu sa tubig gikan sa ilang mga baso ngadto sa pitsel. Mirepresentar kini sa mga miyembro sa Simbahan nga nagpahinungod sa ilang mga kabtangan ngadto sa Simbahan.

Tabangi ang mga estudyante nga makasabot sa tahas sa bishop pinaagi sa pagbasa sa Doktrina ug mga Pakigsaad 51:3. Unya ibu-bu ang tubig gikan sa pitsel, nga mopuno sa matag baso tupong sa linya niini.

Ipakita sa mga estudyante ang tubig nga nahabilin diha sa pitsel. Tabangi ang mga estudyante nga makasabot sa mga instruksiyon sa Ginoo kon unsay buhaton sa nahabilin sa gipahinungod nga kabtangan. Mahimong basahon sa mga estudyante ang Doktrina ug mga Pakigsaad 42:33–36 ug hisgotan ang mga pulong o mga hugpong sa mga pulong nga nagtabang kanila nga makasabot unsay gibuhat sa Ginoo sa subra nga mga kapanguhaan.

Mga paagi sa pagserbisyo sa Dios ug sa uban

Mahimong makatabang alang sa mga estudyante nga makakita og mga ehemplo sa mga paagi nga sila makaserbisyo sa Dios ug sa uban. Ang mga estudyante mahimong makapili kon hain sa mosunod nga mga bidyo ang gusto nilang tan-awon. Mahimo silang magbuhat og lista sa mga paagi sa pagserbisyo ug mangita og inspirasyon kon unsaon sa pagsugod sa pagserbisyo diha sa ilang kaugalingong mga kinabuhi.

When Ye Are in the Service-YM

A young man in California experiences joy as he takes on the challenge to see how much service he can provide to those around him in 3 days.

For Such a Time As This

Generous donors are blessing and changing lives worldwide through LDS Philanthropies, a department of the Presiding Bishopric of The Church of Jesus Christ of Latter-day Saints.

Nagtudlo si Hari Benjamin sa iyang katawhan sa pagserbisyo

Ikonsiderar ang pagpasalida sa bidyo nga “Si Hari Benjamin Nagtudlo mahitungod sa Pagserbisyo sa Dios” gikan sa time code 1:30 hangtod sa 3:09. Niini nga bidyo, si Hari Benjamin naghatag og dagkong mga rason sa pagtrabaho ug pagserbisyo ngadto sa uban sa tibuok natong kinabuhi.

Si Hari Benjamin Nagtudlo mahitungod sa Pagserbisyo sa Dios | Mosiah 2

Si Hari Benjamin nagtudlo sa katawhan sa Zarahemla nga ang maayo nga hari moserbisyo sa uban ug motrabaho uban kanila. Siya nagtudlo nga kon kamo moserbisyo sa uban, kamo nagserbisyo sa Dios.