Leksiyon 56: Doktrina ug mga Pakigsaad 41–44

Doktrina ug mga Pakigsaad 42

Ang mga Balaod sa Ginoo

Sa Doktrina ug mga Pakigsaad 42, ang Ginoo mituman sa Iyang saad ngadto sa mga Santos nga Siya mohatag kanila sa Iyang balaod human sila mobalhin ngadto sa Ohio. Mihatag Siya og kinatibuk-ang pamalaod sa pamatasan alang sa mga miyembro sa Simbahan. Kini nga leksiyon makatabang sa mga estudyante sa pagpakita sa ilang gugma alang sa Ginoo pinaagi sa pagsunod sa Iyang mga sugo.

Mga Posibleng Kalihokan sa Pagkat-on

Duha ka managlahing mga panglantaw

Sugdi ang klase pinaagi sa pagdapit sa mga estudyante sa pagpamalandong ug dayon sa pagpakigbahin sa ilang mga hunahuna sa mosunod nga pangutana:

• Gikan sa imong makita sa kalibotan karon, ngano sa imong hunahuna nagkinahanglan kita og mga sugo gikan sa Dios?

Isulat ang pagsunod ug pagsupak sa ibabaw sa duha ka lain-laing mga kolum sa pisara. Mahimo dayong ilista sa mga estudyante ubos sa nahauyon nga mga kolum ang mga rason kon ngano nga ang mga tawo mahimong mosunod o mosupak sa mga sugo.

Dapita ang mga estudyante sa paggahin og usa ka minuto sa pagpamalandong sa ilang kaugalingong mga rason sa pagtuman o sa dili pagtuman sa mga sugo sa Dios.

Sa imong pagtuon karon, tinguhaa ang giya sa Espiritu Santo aron matabangan ka nga mas makasabot kon nganong ang Ginoo mohatag og mga sugo ug kon unsaon nimo sa pagpadayon, o gani pagpalambo, sa imong pagkamasulundon.

Ang balaod sa Ginoo

Ang Ginoo misaad sa mga Santos nga Siya mohatag kanila sa Iyang balaod sa higayon nga sila magpundok ngadto sa Ohio (tan-awa sa Doktrina ug mga Pakigsaad 38:32). Wala madugay human sa pag-abot sa Ohio, si Propeta Joseph Smith ug ang 12 ka mga anciano nagkahiusa sa ilang hugot nga pagtuo diha sa kinasingkasing nga pag-ampo (Doktrina ug mga Pakigsaad 41:3) ug nangayo sa Ginoo sa pagpadayag sa Iyang balaod.

Basaha ang Doktrina ug mga Pakigsaad 42:1–3 aron makita ang tubag sa Ginoo.

• Unsa ang labing importante alang kanimo niining mga bersikulo?

Ang Ginoo dayon mitudlo mahitungod sa pipila ka mga sugo nga gusto Niya nga puy-an sa Iyang katawhan.

Alang sa mosunod nga kalihokan, mahimong mopili ang mga estudyante kon hain nga mga bersikulo ang ilang basahon o mahimo nimo silang i-assign. Ikonsiderar ang pagdapit sa mga estudyante sa pagsulat diha sa pisara sa mga sugo nga ilang nakaplagan ug kon hain nga (mga) bersikulo nila napalgan kini.

Basaha ang labing minos duha sa mosunod nga mga hugpong sa mga bersikulo, mangita sa mga sugo sa Ginoo:

• Doktrina ug mga Pakigsaad 42:4–7

• Doktrina ug mga Pakigsaad 42:18–21

• Doktrina ug mga Pakigsaad 42:22–26

• Doktrina ug mga Pakigsaad 42:27–30

• Doktrina ug mga Pakigsaad 42:40–42

Sumala sa bersikulo 29, nganong kinahanglan natong tumanon ang mga sugo sa Ginoo?

Kini nga bersikulo nagtudlo nga samtang atong tumanon ang mga sugo sa Ginoo, atong gipakita ang atong gugma alang Kaniya. Mahimong markahan sa mga estudyante kini nga kamatuoran diha sa bersikulo 29 ug i-cross-reference o i-link kini ngadto sa Juan 14:15. Mahimong basahon usab sa mga estudyante ang Doktrina ug mga Pakigsaad 41:5, mangita kon unsa pa ang gipasabot sa atong pagkamasulundon ngadto sa Ginoo.

Ikonsiderar ang pagbutang sa mga estudyante sa mga grupo aron basahon ug tubagon ang mosunod.

Ang Alang sa Kalig-on sa mga Kabatan-onan: Usa ka Giya sa Paghimo og mga Pagpili nagtudlo:

Aron matabangan kamo sa paghimo og maayong mga pagpili, ang Dios naghatag og mga sugo. Siya mihimo niini tungod kay Siya nahigugma kaninyo. Ug ang labing maayong rason sa pagsunod sa mga sugo sa Dios mao nga kamo nahigugma Kaniya. Ang gugma mao ang labing importante sa mga sugo sa Dios. (Alang sa Kalig-on sa mga Kabatan-onan: Usa ka Giya sa Paghimo og mga Pagpili [2022], 11)

• Sa unsang paagi nga ang mga sugo sa Dios usa ka pagpakita sa Iyang gugma?

• Sa unsang paagi nga ang atong pagkamasulundon sa mga sugo sa Dios nagpakita Kaniya nga gihigugma nato Siya?

Ang Iyang mga sugo

Mahimong aduna kay pipila ka mga estudyante kinsa gusto nga kompletohon ang mosunod nga kalihokan gamit ang usa ka sugo nga wala nalista diha sa Doktrina ug mga Pakigsaad 42. Ikonsiderar ang pagpalapad sa gidaghanon sa nagkalain-laing mga sugo aron mohaom sa mga panginahanglan ug mga tinguha sa imong mga estudyante.

Pagpili og usa ka sugo gikan sa seksiyon 42 nga gusto nimong mas kat-onan pa o pamalandongan.

Samtang magtuon ka, pangandam sa pagpakigbahin sa mosunod mahitungod sa sugo nga imong gipili. Mahimo nimong isulat ang imong mga hunahuna diha sa imong journal sa pagtuon.

1. Ubang mga bersikulo sa kasulatan, mga pamahayag sa kinatibuk-ang komperensiya, o Alang sa Kalig-on sa mga Kabatan-onan (booklet) nga mga tudling nga nagpalawom sa imong pagsabot niini nga sugo

2. Mga rason nga sa imong hunahuna ang usa ka mahigugmaon ug nahibalo sa tanan nga Langitnong Amahan mohatag kanato niini nga sugo

3. Paminaw nimo sa unsang paagi ang pagsunod niini nga sugo makatabang kanato sa pagsunod sa Manluluwas, pagpakita sa atong gugma ngadto Kaniya, ug mahimong mas mahisama Kaniya

4. Mga kasinatian nga imong nasinati sa pagtuman niini nga sugo (opsiyonal; ipakigbahin lamang kon kini dili kaayo sagrado o personal)

Hatagi ang mga estudyante og kahigayonan nga mopakigbahin kon unsa ang ilang nakat-onan. Mahimo nimo silang hangyoon sa pagpakigbahin sa ilang mga hunahuna diha sa gagmay nga mga grupo.

Kon ang mga estudyante misulat sa mga sugo diha sa pisara kaganena, mahimo nimo silang dapiton nga linginan ang mga sugo nga bag-o lang nilang gitun-an. Dayon dapita ang mga estudyante sa pagpili og usa o duha ka mga sugo nga sa ilang hunahuna labing mapuslanon nga hisgotan isip usa ka klase. Hangyoa sila sa paghanduraw nga adunay usa ka tawo nga naglisod sa pagsabot ug sa pagtuman niini nga sugo. Dapita ang klase nga magtinabangay aron matabangan kini nga indibidwal. Mahimo nimong sugdan pinaagi sa pagdapit sa mga estudyante kinsa nagtuon niini nga mga sugo sa pagpakigbahin og pipila ka mga panabot gikan sa ilang pagtuon. Dapita usab ang ubang mga estudyante sa pagpakigbahin og mga hunahuna nga mahimong makatabang. Mahimo kang mangutana og follow-up nga mga pangutana sama sa mosunod: “Unsa nga mga babag ang mahimong atubangon niini nga indibidwal?” “Unsaon nato pagtabang kaniya sa pagbuntog niini nga mga babag?” “Unsaon nato pagtabang kaniya nga makasabot ug makabati sa gugma sa Ginoo pinaagi niini nga sugo?”

Ang akong pagkamasulundon sa mga sugo sa Dios

Hinumdoman ang imong nakat-onan ug gibati niini nga leksiyon, pagpili og usa ka sugo nga imong gibati nga gusto sa Ginoo nga imong pagatutokan. Tubaga ang mosunod nga mga pangutana diha sa imong journal sa pagtuon:

• Sa unsang paagi nga ang pagsunod niini nga sugo makapanalangin sa akong kinabuhi?

• Sa unsang paagi kini nga sugo makatabang kanako nga makapakita sa akong gugma ngadto sa Langitnong Amahan ug kang Jesukristo ug mosunod Kanila?

• Unsa ang usa ka piho nga butang nga gusto nakong buhaton aron mapakita ang akong gugma sa Ginoo ug motuman niini nga sugo?

Dasiga ang mga estudyante sa paghimo og plano aron mas makatuman sa sugo nga ilang gipili.

Dugang nga mga Kapanguhaan

Ngano nga ang Dios mihatag kanato og mga sugo?

Si Elder Dale G. Renlund sa Korum sa Napulog Duha ka Apostoles mitudlo:

Ang plano sa Dios naglakip og mga direksiyon alang kanato, nga gitawag diha sa mga kasulatan isip mga sugo. Kini nga mga sugo dili panglingaw-lingaw nga pundok ni pinasulagma nga koleksyon sa ipatuman nga mga lagda aron sa pagbansay kanato nga magmasulundon. Konektado kini sa atong pagpalambo og mga kinaiya sa pagkadiosnon, pagbalik ngadto sa atong Langitnong Amahan, ug pagdawat og malungtarong kalipay. (Dale G. Renlund, “Magpili Kamo Niining Adlawa,” Liahona, Nob. 2018, 105)

Mahimo usab nimong ipakita ang bidyo nga “Why Does God Give Us Commandments?” (0:39) aron matabangan ang mga estudyante nga mahanduraw kon nganong ang Dios mihatag kanato og mga sugo.

Doktrina ug mga Pakigsaad 42:22–23. Nganong ang kahigal ingon og usa man ka seryoso nga sala?

Si Elder Jeffrey R. Holland sa Korum sa Napulog Duha ka Apostoles mitudlo:

Agig dugang sa hingpit nga makadaot nga epekto niana diha sa atong mga kalag, nagtuo ako nga sala kini tungod kay mohugaw kini sa labing taas ug balaan nga pakigrelasyon nga gihatag sa Dios dinhi kanato sa mortalidad—ang gugma nga gibatonan sa lalaki ug sa babaye alang sa usag usa ug ang tinguha nga ang magtiayon kinahanglan magbaton ug mga anak ngadto sa usa ka pamilya gituyo nga magmahangtoron. Adunay miingon makausa nga ang tinuod nga gugma kinahanglan nga maglakip sa ideya sa pagkapermanente. Ang tinuod nga gugma molahutay. Apan ang kahigal dali nga mausab sama sa pagpakli og pahina nga malaw-ay o mopasiplat og lain pang butang alang sa tinguhang sekswal, lalaki o babaye. … Ang gugma mohimo kanato og kinaiya sa pagduol ngadto sa Dios ug sa ubang mga tawo. Ang kahigal, sa laing bahin, dili gayod diosnon ug magmaya sa kaugalingong pagpatuyang. Ang gugma mohimo kanato nga manggihatagon ug bukas ang kasingkasing; ang kahigal mohimo kanato nga gutom. (Jeffrey R. Holland, “Walay Luna alang sa Kaaway sa Akong Kalag,” Liahona, Mayo 2010, 45)

Doktrina ug mga Pakigsaad 42:24–26. Unsa ang pagpanapaw, ug nganong gikinahanglan nga likayan nato kini?

Ang pagpanapaw mao ang “supak sa balaod nga pakig-uban sa pagpanghilawas sa mga lalaki ug sa mga babaye” (Giya ngadto sa mga Kasulatan, “Panapaw,” scriptures.ChurchofJesusChrist.org).

Si Elder David A. Bednar sa Korum sa Napulog Duha ka Apostoles nagtudlo nganong kitang tanan kinahanglan nga mosunod sa balaod sa Ginoo sa kaputli bisan kon kita minyo o dili:

Ang gahom sa pagpasanay mahinungdanon sa espiritwal nga paagi. Ang sayop nga paggamit niining gahom makapugong sa mga katuyoan sa plano sa Amahan ug sa atong pagkamortal. Ang atong Langitnong Amahan ug ang Iyang Pinalanggang Anak mga tiglalang ug gisaligan kita og bahin sa Ilang gahom sa paglalang. Ang pihong mga sumbanan sa saktong paggamit sa abilidad sa paglalang og kinabuhi mahinungdanong mga elemento sa plano sa Amahan. Ang atong pagbati ug paggamit niining langitnong gahom motino pag-ayo sa atong kalipay dinhi sa mortalidad ug sa atong kapalaran sa kahangtoran. …

Ang Simbahan ni Jesukristo sa mga Santos sa Ulahing mga Adlaw may usa lang, dili mausab nga sumbanan sa sekswal nga moralidad: ang sobra ka suod [intimate] nga relasyon tali sa lalaki ug babaye angay lang kon sila minyo sumala sa plano sa Dios. Kini nga relasyon dili pagahimoon tungod lang sa kakuryuso nga buot diskobrehon, gana nga buot tagbawon, o matang sa paglingaw-lingaw nga hinakog nga buhaton. Kini dili usa ka pagpangbuntog nga kinahanglan himoon o lihok nga yano lang buhaton. Hinoon, sa pagkamortal kini ang usa sa dakong pagpahayag sa atong balaanong kinaiya ug potensiyal ug paagi sa paglig-on sa emosyonal ug espiritwal nga kasuod sa bana ug asawa. (David A. Bednar, “Kita Nagtuo sa Pagkaputli,” Liahona, Mayo 2013, 42).

Dugang nga mga Kalihokan sa Pagkat-on

Misyonaryo nga tambag

Dapita ang mga estudyante sa pagkonsiderar kon unsa nga tambag ang ilang ihatag ngadto sa usa ka bag-ong misyonaryo kinsa nabalaka kon unsaon sa pag-alagad sa epektibong paagi. Mahimong basahon sa mga estudyante ang Doktrina ug mga Pakigsaad 42:6–7, 12–17; 50:13–14, 17–20, mangita sa tambag sa Ginoo ngadto sa mga elder nga Iyang ipadala gikan sa Ohio aron sa pagtudlo sa ebanghelyo. Mahimong kuhaon sa mga estudyante ang unsay ilang nakat-onan diha sa mga bersikulo ug dayon i-drama unsa nga tambag ang ilang ihatag ngadto sa misyonaryo. Ikonsiderar ang pagdapit sa mga estudyante sa pagpamalandong kon unsa nga tambag sa misyonaryo ang magamit nila karon.

Doktrina ug mga Pakigsaad 42:43–52. Ang Ginoo naghatag og mga panudlo kalabot sa kamatayon ug pagpang-ayo

Hangyoa ang mga estudyante sa pagpamalandong sa ilang tubag sa mosunod nga pangutana:

• Unsa nga tambag ang imong ihatag ngadto sa usa ka tawo kinsa nag-ampo alang sa kahupayan gikan sa usa ka sakit apan wala mamaayo?

Ipasabot nga diha sa Doktrina ug mga Pakigsaad 42:43–52, ang Ginoo mihatag og mga panudlo kalabot sa kamatayon ug pagpang-ayo. Dapita ang mga estudyante sa pagbahin ngadto sa grupo nga tinagurha o tinagutlo. Hangyoa sila sa pagbasa sa Doktrina ug mga Pakigsaad 42:43–52 diha sa ilang mga grupo, mangita sa unsay gitudlo sa Ginoo mahitungod sa pagpang-ayo. Dapita sila sa pagsulat og pamahayag nga baroganan nga nagrepresentar sa balaod sa Ginoo alang sa pagpang-ayo sa masakiton. Mahimo silang mosulat og sama sa “Kon kita dunay hugot nga pagtuo diha ni Jesukristo, mamaayo kita sumala sa Iyang kabubut-on.”

Hisgoti ang mga tubag sa mga estudyante sa mosunod nga mga pangutana:

• Nganong importante kini nga hinumduman nga ang pagpang-ayo nag-agad diha sa hugot nga pagtuo ug sa kabubut-on sa Ginoo?

Mahimo usab nimong itudlo ang mga estudyante ngadto sa asoy ni John ug Heather sa “Pagdawat sa Kabubut-on ug Panahon sa Ginoo” (David A. Bednar, Liahona, Ago. 2016, 17–23).