55-р хичээл: Сургаал ба Гэрээ 41–44

Сургаал ба Гэрээ 41

Их Эзэн биднийг адислахдаа баяртай байдаг

Есүс Христ хараагүй хүнтэй мэндлэв

Бошиглогчийг Огайогийн зовж шаналж буй гэгээнтнүүдтэй нэгдэх үед Их Эзэн Өөрийг нь сонсдог хүмүүсийг адислахдаа баяртай байдаг гэдгээ гэрчилжээ. Энэ хичээл нь суралцагчдад Их Эзэнийг сонсож, Түүнийг дуулгавартай дагах үед Тэрээр тэднийг адислах болно гэдэгт итгэлтэй болоход туслах зорилготой.

Боломжит суралцах үйл ажиллагаа

Та … гэдэгт хэр итгэлтэй байна вэ?

Дараахтай адил бүдүүвч зургийг самбар дээр зур.

Зургийн баруун талын хэсгийг заана уу. Суралцагчдыг итгэлтэй байдаг зүйлээ мөн яагаад гэдгээ хуваалцахад урь.

Дараах мэдэгдлийг самбар дээр бич. Бид Их Эзэнийг сонсож, дуулгавартай дагах үед Тэр биднийг адислах болно. Суралцагчдыг энэ мэдэгдэлд хэр зэрэг итгэж байгаагаа 1-ээс 5 хүртэлх (1 = итгэхгүй байна, 5 = маш их итгэж байна) оноогоор үнэлэхийг хүс. Суралцагчдыг итгэлтэй байдлаа яагаад ийм байдлаар эрэмбэлсэн талаар бодоход урь.

• Их Эзэн таныг адислах болно гэдэгт итгэлтэй байх нь ямар өөрчлөлтийг авчирч чадах вэ?

Их Эзэний үгийг сонсож, дуулгавартай дагахыг хичээх үед Түүнийг адисална гэдэгт итгэх итгэлийг нь нэмэгдүүлэхийн тулд Түүнээс тусламж эрэлхийлэхэд суралцагчдыг урь.

Биднийг адислах Их Эзэний хандлага

1830 оны 12-р сард Их Эзэн гэгээнтнүүдийг Огайо руу нүүхийг зарлиглав (Сургаал ба Гэрээ 37:3-ыг үзнэ үү). Хэсэг хугацааны дараа 1831 оны 1, 2-р сард бошиглогч Иосеф Смит эхнэр Эммагийн хамт Огайогийн Көртланд руу хэдэн зуун километр аялжээ. Бусад бүсийн гэгээнтнүүдийг Көртландад суурьшиж эхлэх үед удалгүй бошиглогч заавар бүхий илчлэлт хүлээн авав.

Сургаал ба Гэрээ 41:1-ийг уншаад, Их Эзэний Өөрийг нь сонсдог хүмүүсийг адисалдаг хандлагыг олж мэд.

Суралцагчдыг олж мэдсэнээ хуваалцах үед дараах үнэнийг самбар дээр бич. Их Эзэн Өөрийг нь сонсдог хүмүүсийг адислахдаа баяртай байдаг. Та мөн суралцагчдыг энэ үнэнийг судар дээрээ тэмдэглэхэд урамшуулж болно.

• Ямар нэг зүйлд баярлах гэдгийг та ямар утгатай гэж бодож байна вэ?

• Таны бодлоор “Бурханы бүх бэлгүүдийн хамгийн агуу” нь юу вэ? (Сургаал ба Гэрээ 14:7).

• Бид ямар ямар арга замаар Түүнийг сонсдог вэ?

Суралцагчдын хариултыг сонс. Хэрэв тустай бол суралцагчдыг дараах мэдэгдлийг уншиж, Их Эзэнийг сонсох арга замуудыг хайж олоход урь.

Ерөнхийлөгч Рассэлл М.Нэлсон ийн заасан.

Ерөнхийлөгч Рассэлл М.Нэлсон

Өдөр бүр амьдралаа Түүний үгс, сургаал, үнэнээр дүүргэхийн тулд чин сэтгэлээсээ, байнга хичээл зүтгэл гаргах шаардлагатай. …

Бид судруудаас Түүнийг сонсож чадна. Судрууд бидэнд Есүс Христийн тухай мөн Түүний сайн мэдээ, Цагаатгалын цар хүрээ, Эцэгийн маань аз жаргалын болон гэтэлгэлийн агуу төлөвлөгөөний талаар заадаг. … Өдөр бүр Христийн үгэн дээр найрладаг байвал Христийн үг бидэнд төсөөлж ч байгаагүй саад бэрхшээлтэй тулгарах үед юу хийхийг хэлж өгөх болно.

Бид бас ариун сүмд Түүнийг сонсож чадна. Их Эзэний өргөө бол суралцахын өргөө билээ. Их Эзэн тэнд Өөрийн арга замаар заадаг. …

… Бид бошиглогч, үзмэрч, илчлэгчдийн үгсийг чих тавин сонсох үедээ Түүнийг сонсдог. Есүс Христийн томилогдсон төлөөлөгчид үргэлж Түүнийг гэрчилдэг. Биднийг мөнх бус амьдралын зүрх эмтлэм асуудлууд дунд явах үед тэр төлөөлөгчид замыг маань зааж өгдөг. (Рассэлл М.Нэлсон, “Түүнийг сонс,” 2020 оны 4-р сарын Ерөнхий чуулган, 109–110)

Их Эзэнийг сонсохоос татгалздаг хүмүүст юу тохиолддогийг олж мэдэхийн тулд 1-р шүлгийг уншихыг суралцагчдаас хүс. Энэ шүлэг дэх “зүхлүүд” гэдэг үг нь шүүлтүүд болон үр дагавруудыг илэрхийлж байгааг мэдэх нь тустай байж болох юм.

• Их Эзэнийг сонсохоос татгалзах нь сөрөг үр дагаварт хүргэдэг гэдгийг мэдэх нь яагаад чухал вэ?

Их Эзэний Өөрийг нь сонсдог хүмүүсийг адисалдаг жишээ

Хэд хэдэн суралцагчийг дараах асуултуудад хариулсан хариултаа хуваалцахад урь. Сэтгэл хөдлөл, хайраа хуваалцах нь Их Эзэний баяр хөөрийг мэдрэхэд тэдэнд туслах болно. Мөн энэ нь суралцагчдаа илүү сайн таньж мэдэх сайхан боломж ч байж мэднэ.

• Та юунд хайртай эсвэл юунд баярладаг вэ?

Их Эзэн Өөрийг нь сонсдог хүмүүсийг адислахдаа чин сэтгэлээсээ баярладаг тухай олон жишээ байдгийг тайлбарла.

Дараах шүлгийг уншаад, Их Эзэн Өөрийг нь сонсох гэгээнтнүүдийг хэрхэн адисалдгийг олж мэд.

Тухайн шүлгүүдийг уншаад, дагалдах асуултуудад хариулахын тулд ангийг бүлгүүдэд хуваах талаар бодож үз. Дараа нь суралцагчид сурч мэдсэнээ бие биетэйгээ хуваалцаж болно.

Сургаал ба Гэрээ 41:2–5

• Их Эзэний хууль эсвэл зааврыг хүлээн авах нь хэрхэн адислал байж болох вэ? (3-р шүлгийг үзнэ үү.)

• Их Эзэний хуулийг дуулгавартай дагаж, Христийн илүү сайн шавь болох нь бидэнд хэрхэн тус болж болох вэ? (5-р шүлгийг үзнэ үү.)

Нэмэлт жишээ

Их Эзэн Өөрийг нь сонсдог хүмүүсийг адисална гэдэгт итгэлтэй болгох дор хаяж хоёр нэмэлт жишээг хайж олоход эсвэл бодоход суралцагчдыг урь. Тэднийг болон ангийнхныг адислах жишээнүүдийг олохын тулд Их Эзэний удирдамжийг эрэлхийлэхэд урамшуул.

1. Судруудаас нэг жишээ хайж ол. Үүнд:

   1. Их Эзэний Өөрийг нь сонсож, дуулгавартай дагасан хүмүүсийг адисалсан үеийн түүх. (Зарим жишээг дурдвал: Ноа бүхээг хийж, үерээс аврагдсан [Эхлэл 6–8-ыг үзнэ үү]; Дебора Израилыг боолчлолоос чөлөөлөхийн тулд Их Эзэний тушаалыг дуулгавартай дагасан [Шүүгчид 4:1–8, 13–15]; Мариа Аврагчийн эх болох үүргийг хүлээн авч, Их Эзэний адислалуудыг мэдэрсэн [Лук 1:38, 46–49]; Нифай гуулин ялтаснуудыг олж авсан [1 Нифай 3–5-ыг үзнэ үү]; Иосеф Смит ялтаснуудыг хамгаалах боломжтой байсан [Иосеф Смит—Түүх 1:46, 60-ыг үзнэ үү]; Иосеф Смит, Оливер Каудери хоёр Аароны санваар хүлээн авсныхаа дараа бие биедээ баптисм хүртээж, дараа нь Ариун Сүнсний илэрхийллийг хүлээн авсан [Иосеф Смит—Түүх 1:68–74-ийг үзнэ үү].)

   2. Их Эзэнийг сонсож, дуулгавартай дагах үед Тэр биднийг адислахдаа баяртай байна гэдгийг гэрчлэх нэг шүлэг эсвэл илүү олон шүлэг. (Зарим жишээнд Малахи 3:10; 1 Иохан 3:22; Жэром 1:9; Мозая 2:41; Сургаал ба Гэрээ 19:38; 82:10; 89:1, 18–21; 130:21 зэрэг нь багтана.)

2. Нэмж нэг жишээ бодож олно уу. Үүнд:

   1. Их Эзэн таныг адисалсан хувийн туршлага

   2. Найз эсвэл хайртай хүний тань жишээ

   3. Ерөнхий чуулганы үгс

   4. ChurchofJesusChrist.org дээрх видео

Суралцагчдыг жишээнүүдээ тус тусад нь цаасан дээр бичихэд урь. Бичсэн зүйлийг нь ангийнхантай хуваалцаж магадгүй гэдгийг суралцагчдад хэл. Цааснуудыг цуглуулж, холиод, дараа нь хэдэн цаас сонго эсвэл нэг суралцагчаар сонгуул. Та жишээг нэг нэгээр нь уншиж, үүнийг бичсэн суралцагчаас яагаад энэ жишээг сонгосон талаар хуваалцах хүсэлтэй эсэхийг асууж болно. Уг жишээ нь Их Эзэнийг сонсох үед Тэр тэднийг адислах болно гэсэн суралцагчийн итгэлийг хэрхэн нэмэгдүүлж болохыг асуу. Суралцагчдыг хуваалцах үед хичээл зүтгэл гаргасанд нь талархаж, ангидаа санаа бодол, туршлагаа хуваалцахын ач холбогдлыг мэдрэхэд нь тэдэнд туслахыг хичээ.

Энэ хичээлийг дуусгахын тулд, Их Эзэнийг сонсох үед биднийг адисална гэсэн санаа бодол, мэдрэмжээ тэмдэглэ. Тэр таныг адисална гэдэгт та итгэлтэй байна уу? Та итгэлээ нэмэгдүүлэхийн тулд юу хийж чадах вэ?

Суралцагчдыг өнөөдөр ангид сурч мэдсэн, мэдэрсэн зүйлээ хуваалцахад урь. Их Эзэнийг сонсох үед Тэр биднийг адислах болно гэсэн итгэл, гэрчлэлээ хуваалц.

Нэмэлт эх сурвалж

Би Их Эзэнийг хэрхэн илүү сайн сонсож чадах вэ?

Арван хоёр төлөөлөгчийн чуулгын ахлагч Ричард Г.Скотт (1928–2015) ийн заажээ.

Ахлагч Ричард Г.Скотт

Бидний Эцэг Өөрт нь болон Түүний Ариун Хүү Есүс Христэд итгэх итгэлээ хөгжүүлэн, уг бурханлаг тусламжийг хэрхэн хүлээн авахад суралцахыг та биднээс хүсэн хүлээдэг. Хэрэв та нар сүнслэг удирдамжийг зүгээр л асуух төдийд л хүлээж аваад байвал сул дорой болж, Тэднээс улам бүр хамааралтай болно. Сүнсээр хэрхэн удирдуулахыг мэдэх гэж тэмцсэнээр хувь хүнд зайлшгүй шаардлагатай өсөлт хөгжил ирдгийг Тэд мэддэг билээ.

Эхлээд харахад сүрдмээр юм шиг санагдах ажил үүргийг хичээл зүтгэл гаргаж мөн Сүнсний мэдрэмжийг таньж дагахыг байнга хичээвэл амархан биелдэг нь цаг хугацаа өнгөрөх тусам тодорхой болдог. Ариун Сүнсээр дамжуулан хүлээн авсан удирдамж чиглүүлэгт итгэх итгэл тань улам бат бөх болно. (Ричард Г.Скотт, “Сүнсний удирдамж хүлээн авахын тулд,” 2009 оны 10-р сарын Ерөнхий чуулган, 5)

Хэрэв Бурханы адислал ирэхгүй юм шиг санагдвал яах вэ?

Арван хоёр төлөөлөгчийн чуулгын ахлагч Дэйл Г.Рэнланд ийн заасан.

Ахлагч Дэйл Г.Рэнланд

Та Бурханаас ямар нэгэн адислал хүлээн авахдаа, өөрийгөө тэрхүү адислалыг авах зохицуулалтыг хийдэг мөнхийн хуулийн дагуу үйлдсэн хэмээн дүгнэж болно. Хэдий тийм боловч “буцалтгүйгээр тогтоогдсон” хууль нь дэлхийн цагаас хамааралгүй төдийгүй адислалууд нь Бурханы цагийн хуваарийн дагуу ирдэг гэдгийг санаарай. Эрт цагийн бошиглогчид хүртэл өөрсдийн тэнгэрлэг гэр орныг хайхдаа “амлалтуудыг авалгүйгээр, харин холоос тэдгээрийг харж, [мөн] батлан хэлж, … зөвшөөрөн, итгэл дотор нас барсан билээ” [Еврей 11:13]. Хүссэн адислалаа Бурханаас хараахан аваагүй байгаа бол та өөр юу хийх хэрэгтэйгээ бод, үүнд санаа зовох хэрэггүй. Харин “[өөрийн] хүчинд байгаа бүх зүйлийг хөгжил хөөртэйгөөр хийцгээе; мөн тэгээд … бат итгэлтэйгээр бат зогсож … [Бурханы] гар … илчлэгдэхийг [харна]” [Сургаал ба Гэрээ 123:17] гэсэн Иосеф Смитийн зөвлөгөөг анхаар. Зарим адислал хожим өгөгдөхөөр хадгалагддаг ба Бурханы хамгийн итгэлтэй хүүхдүүдийн хувьд ч тийм байдаг. (Дэйл Г.Рэнланд, “Ерөөл олшрох нь,” 2019 оны 4-р сарын Ерөнхий чуулган, 85)

Бид Бурханы адислалуудыг хүртдэг үү?

Арван хоёр төлөөлөгчийн чуулгын ахлагч Дэйл Г.Рэнланд ийн заасан.

Ахлагч Дэйл Г.Рэнланд

Хүндэт ах, эгч нар аа, бидний Тэнгэрлэг Эцэг, Есүс Христ хоёр бидний хүн нэг бүрийг адислахыг хүсдэг. … Тэнгэрийн адислалуудыг “сайн үйлийн талон”-ыг ухаан жолоогүй цуглуулснаар эсвэл адислалын хонжворт сугалаанд хожихоо хий дэмий хүлээн сууснаар хүртдэг юм биш. Тийм биш. Үнэн нь гэвэл хавьгүй илүү нарийн ялгаатай ч хайрт Тэнгэрлэг Эцэг, Түүний ирээдүйн өв залгамжлагч болох бидний хоорондын харилцааны хувьд илүү тохиромжтой юм. Адислалыг хүчин чармайлт гаргаснаар хүртдэггүй, харин бид өөрсдөө итгэлээр өдөөгдсөн үйлдлүүдийг хийж эхлээд, цааш үргэлжлүүлэн үйлдэх нь чухал гэдгийг сэргээгдсэн үнэн илчилдэг. (Дэйл Г.Рэнланд, “Ерөөл олшрох нь,” 2019 оны 4-р сарын Ерөнхий чуулган, 81)

Нэмэлт суралцах үйл ажиллагаа

Их Эзэн Өөрийг нь сонсдог хүмүүсийг адисалдаг талаарх нэмэлт жишээ

Их Эзэн Өөрийг нь сонсдог хүмүүсийг адислахдаа баяртай байдаг жишээнүүдийн нэг бол Анн ба Ньюел К.Витней нарын түүх юм. Гэгээнтнүүд: Хожмын үеийн Есүс Христийн Сүмийн түүх, 1-р боть, Үнэний жишиг, 1815–1846 (2018) номыг уншина уу.

• Витнейгийнхэн Их Эзэний дуу хоолойг сонсохыг хэрхэн эрэлхийлсэн бэ?

• Их Эзэн Витнейгийнхнийг хэрхэн адисалсан бэ?

Их Эзэн бошиглогч Иосеф Смитийг Көртландад амьдруулахаар илгээснээс гадна гэгээнтнүүдийг бусад арга замаар адисалсан.

Өөр нэг жишээ нь Эдвард Партриж юм. Суралцагчид Сургаал ба Гэрээ 41:9–11-ийг уншаад, Их Эзэн Эдвардаар юу хийлгэхээр дуудсаныг олж мэд.

• Эдгээр шүлэгт Эдвардыг хэрхэн дүрсэлсэн байна вэ?

• Тэрээр бишопын үүргээ биелүүлснээр Көртландын гэгээнтнүүдийг хэрхэн адисалсан гэж та бодож байна вэ?

Бишоп Партриж Огайод, дараа нь Миссурид, түүнчлэн 1840 онд өөд болох хүртлээ Иллинойд итгэлтэйгээр үйлчилж байсныг тайлбарла. Түүний үйлчлэл гэгээнтнүүдэд агуу адислал байв.

• Бишоптой байх нь өнөөдөр бидний амьдралд хэрхэн адислал болдог вэ?

Их Эзэн Эдвард Партрижийн нас барсныхаа дараа хүлээн авсан зарим адислалыг тайлбарласан. Сургаал ба Гэрээ 124:19-ийг уншаад, эдгээр адислалыг олж мэд.

Гахайн урд тавьсан сувд

Суралцагчдыг Сургаал ба Гэрээ 41:5–6-г уншсаных нь дараа энэ зургийг үзүүлээд, юу болохыг тэднээс асуу.

Хясаан доторх сувд

“Өөрсдийн сувдыг гахайн өмнө бүү хая” гэсэн хэллэгийг ямар утгатай гэж бодож байгаагаа хамтрагчдаа тайлбарлахад суралцагчдыг урь (Матай 7:6). Дараа нь суралцагчдыг Арван хоёр төлөөлөгчийн чуулгын ахлагч Д.Тодд Кристоффэрсоны хэлсэн дараах үгийг уншихад урь.

Ахлагч Д.Тодд Кристоффэрсон

Их Эзэн: “Дээрээс ирдэг тэр нь ариун нандин бөлгөө, мөн болгоомжтойгоор мөн Сүнсний өдөөлтөөр яригддаг байх ёстой” (C ба Г 63:64) гэж хэлсэн. Тэр мөн нохдод ариун тэр сувдыг гахайн өмнө бүү хая хэмээн зарлиглажээ. Энэ нь ариун нандин зүйлсийн талаар үнэ цэнийг нь мэдэхгүй хүмүүстэй ярилцах ёсгүй гэсэн утгатай болой (3 Нифай 14:6; С ба Г 41:6-г үзнэ үү).

Их Эзэний танд өгсөн зүйлд ухаалаг ханд. Энэ бол итгэл найдвар. Жишээлбэл: Та Патриархын адислалынхаа нарийн ширийн мэдээллийг хэн нэгэнтэй хуваалцдаггүй. (D. Todd Christofferson, “A Sense of the Sacred,” New Era, June 2006, 31)

• Бидний бишрэл хүндэтгэлтэйгээр хандвал зохих ямар ямар ариун нандин зүйлс байна вэ?

Түүнийг хэрхэн сонсох талаар илүү ихийг сурах

Та хичээлийн үеэр эдгээр видеоны аль нэгийг эсвэл хэд хэдийг үзүүлж болно. Амьдралдаа Их Эзэний дуу хоолойг сонсох тухай олж мэдсэн зүйлээ хуваалцахад суралцагчдыг урь.