“Lesona 55—Mataupu Faavae ma Feagaiga 41:1— 12 E Fiafia le Alii e Faamanuia i Tatou,” Tusi Lesona a le Faiaoga Seminare o le Mataupu Faavae ma Feagaiga (2025)
“Mataupu Faavae ma Feagaiga 41:1—12,” Tusi Lesona a le Faiaoga Seminare o le Mataupu Faavae ma Feagaiga
Lesona 55: Mataupu Faavae ma Feagaiga 41–44
Mataupu Faavae ma Feagaiga 41
E Fiafia le Alii e Faamanuia i Tatou
A o tuufaatasia le Perofeta ma le Au Paia o loo tauivi i Ohaio, sa molimau atu le Alii e fiafia o Ia i le faamanuiaina o i latou o e faalogo ia te Ia. O lenei lesona ua faamoemoe e fesoasoani i tamaiti aoga ia lagona le mautinoa o le a faamanuiaina i latou e le Alii a o latou faalogo ma usitai ia te Ia.
Gaoioiga E Ono Mafai Ona Aoao Ai
O le a sou talitonuga mautinoa i lena mea …?
Tusi se ata faapei o lenei i luga o le laupapa:
Faasino i le itu taumatau o le fua. Valaaulia tagatatamaiti aoga e faasoa mai se mea latou te lagona ai le mautinoa ma pe aisea foi.
Tusi le faamatalaga lenei i luga o le laupapa: O le a faamanuiaina i tatou e le Alii pe afai tatou te faalogo ma usitai ia te Ia. Fai atu i tamaiti aoga e faaaoga le fua e faatulaga ai lo latou mautinoa i enei faamatalaga i se fua o le 1 i le 5 (1 = le mautinoa, ma le 5 = matuai mautinoa lava). Valaaulia tamaiti aoga e mafaufau pe aisea na latou faatulagaina ai lo latou talitonuga i le ala na latou faia ai.
-
O le a se eseesega e mafai ona iai ia lagona ai le matuai mautinoa o le a faamanuiaina oe e le Alii?
Valaaulia tamaiti aoga e saili le fesoasoani mai le Alii e faateleina ai lo latou mautinoa o le a Ia faamanuiaina i latou a o latou taumafai e faalogo ma usitai ia te Ia.
O le uiga faaalia o le Alii i le faamanuiaina o i tatou
Ia Tesema 1830, na poloaiina ai e le Alii le Au Paia e siitia atu i Ohaio (tagai i le Mataupu Faavae ma Feagaiga 37:3). I se taimi puupuu mulimuli ane, ia Ianuari ma Fepuari 1831, sa malaga ai le Perofeta o Iosefa Samita ma lona faletua, o Ema, i le faitau selau o maila i Katelani, Ohaio. Ona maua ai lea e le Perofeta o le faaaliga o loo tuuina mai ai nisi o faatonuga a o amata ona faamautu le Au Paia mai isi eria i Katelani.
Faitau le Mataupu Faavae ma Feagaiga 41:1, ma vaavaai mo uiga auaumama o le Alii e uiga i le faamanuiaina o i latou e faalogo ia te Ia.
Fesoasoani i tagata aoao i le iloaina o le tosinaga a le Alii: Mo nisi aoaoga faamasani e fesoasoani ai i tagata aoao ia iloa le tosinaga a le Alii i tusitusiga paia ma i o latou lava olaga, tagai i le tomai “Fai fesili e taulai atu i le fesootaiga o le mana, alofa mutimutivale, ma le tosinaga a le Alii i upumoni o loo aoaoina,” i aoaoga faamasani ua faaulutalaina, “Fesoasoani i tagata aoao ia iloa le alofa, mana, ma le alofa mutimutivale o le Alii i o latou olaga” o loo maua i le Tomai o le Atinaega o Faiaoga: Taulai atu ia Iesu Keriso. A o faasoa mai e tamaiti aoga mea na latou maua, tusi le upu moni lenei i luga o le laupapa: E fiafia le Alii e faamanuia i latou o e faalogo ia te Ia. Atonu e te manao e uunaia tamaiti aoga e faailoga lenei upu moni i totonu o a latou tusitusiga paia.
-
O le a sou manatu i le uiga o le fiafia i se mea?
-
O le a sou manatu po o a nisi “meaalofa aupito silisili o meaalofa uma a le Atua”? (Mataupu Faavae ma Feagaiga 14:7).
-
O a nisi o auala e mafai ai ona tatou faalogo ia te Ia?
Faalogologo i tali a tagata aoga. Afai e aoga, valaaulia tamaiti aoga e faitau le faamatalaga lenei, ma vaavaai mo auala e mafai ona tatou faalogo ai i le Alii.
Na aoao mai Peresitene Russell M. Nelson:
E manaomia ai le lotofuatiaifo ma taumafaiga tumau e faatumu o tatou olaga i aso taitasi i Ana afioga, Ana aoaoga, Ana upumoni. …
E mafai ona tatou ō i tusitusiga paia. Latou te a’oa’o mai i tatou e uiga ia Iesu Keriso ma Lana talalelei, le silisili ese o Lana Togiola, ma le fuafuaga sili a lo tatou Tama o le fiafia ma le togiolaina. … Pe a tatou taumamafa i afioga a Keriso i aso taitasi, o le a ta’u mai e afioga a Keriso ia i tatou le auala e tali atu ai i faigata tatou te le’i mafaufauina o le a tatou fetaia’i.
E mafai foi ona tatou faalogo ia te Ia i totonu o le malumalu. O le maota o le Alii o se maota o le aoaoga. O iina e a’oa’o mai ai le Alii i Lana lava ala. …
… Tatou te faalogo ia te Ia a o tatou usitai i upu a perofeta, tagatavaai, ma talifaaaliga. E molimau mai Aposetolo faauuina a Iesu Keriso i taimi uma e uiga ia te Ia. Latou te faasino mai le ala a o tatou savalia lo tatou ala e ui atu i le lavelave ma fita faapopoleina o lo tatou olaga faaletino. (Russell M. Nelson, “Faalogo ia te Ia,” Liahona, Me 2020, 89–90)
Mafaufau e fai atu i tamaiti aoga e toe iloilo le fuaiupu 1 e vaai po o le a le mea e tupu ia i latou o e mumusu e faalogo i le Alii. Atonu e fesoasoani le ta’u atu o le upu “fetuu” e pei ona faaaogaina i lenei fuaiupu e faasino i faamasinoga po o taunuuga.
-
Aisea e taua ai le iloa o le musu e faalogo i le Alii e mafai ona taitai atu ai i taunuuga le lelei?
O faataitaiga a le Alii o loo faamanuiaina ai i latou o e faalogo ia te Ia
Uunaia ni nai tamaiti aoga e faasoa mai a latou tali i fesili nei. O le faasoaina atu o lo latou fiafia ma le alofa e mafai ona fesoasoani ia i latou e fesootai ai i le fiafia o le Alii. E mafai foi ona avea lenei mea o se avanoa lelei e faamasani atili ai i au tamaiti aoga.
-
O le a le mea e te fiafia iai?
Faamalamalama atu e tele faataitaiga a le Alii o fiafia moni lava i le faamanuiaina o i latou o e faalogo ia te Ia.
Faitau fuaiupu nei ma vaavaai pe faapefea ona faamanuiaina e le Alii Lana Au Paia a o latou faalogo ia te Ia.
Mafaufau e vaevae le vasega i ni vaega e faitau ia fuaiupu ma tali ia fesili o loo avatu faatasi ai. E mafai e tamaiti aoga ona fefaasoaai i latou lava i mea ua latou aoaoina.
Mataupu Faavae ma Feagaiga 41:2–5
-
E mafai faapefea ona avea le mauaina o le tulafono po o le taitaiga a le Alii o se faamanuiaga? (Tagai i le fuaiupu 3.)
-
E mafai faapefea e le usitaia o le tulafono a le Alii ma le avea ma soo sili atu o Keriso ona fesoasoani ia i tatou? (Tagai i le fuaiupu e 5.)
Mo se faataitaiga i ona po nei, tagai i le faasoa mai a Peresitene Gordon B. Hinckley (1910–2008) i le ala na faamanuiaina ai e le Alii se tasi na faalogo ma usitai ia te Ia, i le vitio “We Walk by Faith,” o loo maua i le ChurchofJesusChrist.org, mai le faailotaimi 7:30 i le 12:39.
We Walk by Faith
We reach toward the unknown, but faith lights the way. If we will cultivate that faith, we shall never walk in darkness.
Faataitaiga faaopoopo
Valaaulia tamaiti aoga e saili pe mafaufau i ni faataitaiga faaopoopo se lua e fausia ai lo latou mautinoa o le a faamanuia e le Alii i latou o e faalogo ia te Ia. Uunaia i latou e saili le taitaiga a le Alii e saili ai faataitaiga o le a faamanuiaina ai i latou ma le vasega.
-
Saili se faataitaiga se tasi mai tusitusiga paia. E mafai ona:
-
O se vaaiga o le taimi na faamanuiaina ai e le Alii i latou o e faalogo ma usiusitai ia te Ia. (O nisi nei o faataitaiga: O Noa o loo fauina le vaa ma faasaoina mai le Lolo [tagai Kenese 6–8]; O Tepora o loo usitai i le poloaiga a le Alii e faasaoloto Isaraelu mai le faatagataotauaina [Faamasino 4:1–8, 13–15]; Sa talia e Maria le matafaioi e avea ma tina o le Faaola ma lagonaina faamanuiaga a le Alii [Luka 1:38, 46–49]; Ua maua e Nifae papatusi apamemea [tagai 1 Nifae 3–5]; O Iosefa Samita na mafai ona puipuia papatusi [tagai Iosefa Samita—Talafaasolopito 1:46, 60]; O Iosefa ma Oliva Kaotui ua papatisoina e le tasi le isi ina ua uma ona maua le Perisitua Arona ona maua ai lea o se faaalia mai o le Agaga Paia [tagai Iosefa Samita—Talafaasolopito 1:68–74].)
-
O se fuaiupu po o ni fuaiupu o loo molimau mai o le a faamanuiaina i tatou e le Alii pe a tatou faalogo ma usitai ia te Ia. (O nisi o faataitaiga o le Malaki 3:10; 1 Ioane 3:22; Iaroma 1:9; Mosaea 2:41; Mataupu Faavae ma Feagaiga 19:38; 82:10; 89:1, 18–21; 130:21.)
-
-
Mafaufau i se faataitaiga faaopoopo. E mafai:
-
O se aafiaga patino ina ua faamanuiaina oe e le Alii.
-
O se aafiaga mai se uo po o se e pele.
-
O se lauga mai le konafesi aoao.
-
O se vitio i le ChurchofJesusChrist.org.
-
Valaaulia tamaiti aoga e tusi a latou faataitaiga i ni fasipepa eseese. Ta’u atu i tamaiti aoga o mea latou te tusia e mafai ona faasoa atu ma isi tagata o le vasega. Ao mai pepa, faaputuputu, ona filifili lea o nisi pe valaaulia se tamaiti aoga e faia. Atonu e te manao e faitau se faataitaiga se tasi i le taimi ma fesili pe o le tamaiti aoga na tusia o le a naunau e faasoa mai pe aisea na latou filifilia ai lena faataitaiga. Fesili atu pe mafai faapefea e le faataitaiga ona faateleina le mautinoa o le tamaiti aoga faapea o le a faamanuiaina i latou e le Alii a o latou faalogo ia te Ia. A o faasoa mai tamaiti aoga, faafetai atu ia i latou mo a latou taumafaiga ma taumafai e fesoasoani ia latou lagonaina le taua o le faasoa atu o o latou manatu ma aafiaga i le vasega.
Ina ia faaiuina lenei lesona, tusifaamaumau ou manatu ma lagona e uiga i le faamanuiaina o i tatou e le Alii a o tatou faalogo ia te Ia. Pe e te lagonaina le mautinoa o le a Ia faamanuiaina oe? O le a se mea e mafai ona e faia e faateleina ai lou mautinoa?
Mafaufau e valaaulia tamaiti aoga e faasoa mai mea na latou aoaoina ma lagona i le vasega i le aso. Faasoa lau oe lava molimau ma le mautinoa o le a faamanuia i tatou e le Alii a o tatou faalogo ia te Ia.