Lesona 56: Mataupu Faavae ma Feagaiga 41–44

Mataupu Faavae ma Feagaiga 42

O Tulafono a le Alii

I le Mataupu Faavae ma Feagaiga 42, na faataunuu ai e le Alii Lana folafolaga i le Au Paia o le a Ia tuuina mai ia i latou Lana tulafono pe a uma ona latou siitia atu i Ohaio. Sa Ia tuuina mai tulafono lautele o le amio mo tagata o le Ekalesia. O lenei lesona o le a fesoasoani i tamaiti aoga e faaalia ai lo latou alolofa mo le Alii e ala i le usiusitai i Ana poloaiga.

Gaoioiga E Ono Mafai Ona Aoao Ai

Manatu eseese e lua

Amata le vasega i le valaaulia o tamaiti aoga e mafaufau loloto ma faasoa o latou manatu i le fesili lenei:

• Mai mea ua e vaaia i le lalolagi i aso nei, aisea e te manatu ai tatou te manaomia poloaiga mai le Atua?

Tusi le usitai ma le lē usitai i le pito i luga o koluma e lua i luga o le laupapa. Ona mafai lea e tamaiti aoga ona lisi i lalo o koluma e o faatasi ai mafuaaga e mafai ai e tagata ona usitai pe lē usitai i poloaiga.

Valaaulia tamaiti aoga e faaalu se minute e mafaufau loloto ai i a latou lava mafuaaga mo le tausia po o le le tausia o poloaiga a le Atua.

A o e suesue i le aso, saili le taitaiga a le Agaga Paia e fesoasoani ia te oe e malamalama atili ai pe aisea e tuuina mai ai e le Alii poloaiga ma pe mafai faapefea ona e faaauau pea, pe faaleleia atili foi, lou usiusitai.

O le tulafono a le Alii

Sa folafola atu e le Alii i le Au Paia o le a Ia tuuina atu ia i latou Lana tulafono a o latou faapotopoto i Ohaio (tagai Mataupu Faavae ma Feagaiga 38:32). E lei leva ona taunuu i Ohaio, ae tuufaatasia e le Perofeta o Iosefa Samita ma toeaina e toa 12 lo latou faatuatua i le tatalo faatauanau (Mataupu Faavae ma Feagaiga 41:3) ma ole atu i le Alii e faaali mai Lana tulafono.

Faitau le Mataupu Faavae ma Feagaiga 42:1–3 e tagai ai i le tali a le Alii.

• O le a se mea e taua ia te oe i nei fuaiupu?

Ona aoao mai lea e le Alii e uiga i le tele o poloaiga na Ia finagalo e ola ai Ona tagata.

Mo le gaoioiga lenei, e mafai e tamaiti aoga ona filifili po o fea fuaiupu o le a latou faitauina pe mafai foi ona e atofa atu ia i latou. Mafaufau e valaaulia tamaiti aoga e tusi i luga o le laupapa ia poloaiga na latou maua ma po o fea (le) fuaiupu na latou maua mai ai.

Faitau ia le itiiti ifo ma le lua seti o fuaiupu nei, ma vaavaai mo poloaiga a le Alii:

• Mataupu Faavae ma Feagaiga 42:4–7

• Mataupu Faavae ma Feagaiga 42:18–21

• Mataupu Faavae ma Feagaiga 42:22–26

• Mataupu Faavae ma Feagaiga 42:27–30

• Mataupu Faavae ma Feagaiga 42:40–42

E tusa ai ma le fuaiupu 29, aisea e tatau ai ona tatou tausia poloaiga a le Alii?

Ua aoao mai e lenei fuaiupu e faapea, a o tatou tausia poloaiga a le Alii, ua tatou faaalia lo tatou alolofa mo Ia. Atonu e maka e tamaiti aoga lenei upu moni i le fuaiupu 29 ma faasino atu pe faafesootai i le Ioane 14:15. E mafai foi e tamaiti aoga ona faitau le Mataupu Faavae ma Feagaiga 41:5, ma vaavaai po o le a se isi uiga o lo tatou usiusitai i le Alii.

Mafaufau e tuu tamaiti aoga i vaega e faitau ma tali mai i mea nei.

Ua aoao mai leMo Le Malosi o le Autalavou: O Se Taiala mo le Faia o Filifiliga :

Ina ia fesoasoani ia te oe e faia filifiliga lelei, e tuuina mai e le Atua poloaiga. Ua Ia faia lenei mea ona e alofa o Ia ia te oe. Ma o le mafuaaga sili e usitaia ai poloaiga a le Atua ona o lou alofa lea ia te Ia. O le alofa o loo i le totonugalemu o poloaiga a le Atua. (Mo Le Malosi o le Autalavou: O Se Taiala mo le Faia o Filifiliga [2022], 11)

• E faapefea ona avea poloaiga a le Atua ma faaaliga o Lona alofa?

• E faapefea e lo tatou usiusitai i poloaiga a le Atua ona faaalia ai ia te Ia tatou te alolofa ia te Ia?

I Ana poloaiga

Atonu e i ai ni tamaiti aoga e mananao e faauma le gaoioiga lenei e faaaoga ai se poloaiga e le o lisiina i le Mataupu Faavae ma Feagaiga 42. Mafaufau e faalautele le vaega o poloaiga ina ia fetaui ma manaoga ma mea e mananao ai au tamaiti aoga.

Filifili se poloaiga se tasi mai le vaega 42 e te manao e aoao atili i ai pe mafaufau loloto i ai.

A o e suesue, sauni e faasoa atu mea nei e uiga i le poloaiga ua e filifilia. Atonu e te manao e tusi au tali i totonu o lau api faamaumau mo suesuega.

1. O isi fuaiupu o mau, saunoaga o le konafesi aoao, po o fuaitau o le Mo le Malosi o le Autalavou (tamaitusi) e faalolotoina ai lou malamalama i lenei poloaiga

2. O mafuaaga e te manatu o le a tuuina mai ai e se Tama Faalelagi alofa ma silafia mea uma ia i tatou lenei poloaiga

3. O le ala e te manatu ai o le tausia o lenei poloaiga e fesoasoani tatou te mulimuli ai i le Faaola, faaali atu lo tatou alolofa ia te Ia, ma avea atili e faapei o Ia

4. O aafiaga na e maua i le tausia o lenei poloaiga (tuu i le faitalia; e na o le faasoa atu pe afai e lē paia tele pe patino tele)

Tuu atu i tamaiti aoga se avanoa e faasoa mai ai mea na latou aoaoina. E mafai ona e fai atu ia i latou e faasoa mai o latou manatu i ni vaega toalaiti.

Afai na tusia muamua e tamaiti aoga ia poloaiga i luga o le laupapa, e mafai ona e valaaulia i latou e li’o ia poloaiga na faatoa latou suesueina. Ona valaaulia lea o tamaiti aoga e filifili se poloaiga se tasi pe lua latou te manatu o le a sili ona aoga e talanoaina o se vasega. Fai atu ia i latou e mafaufau faapea o loo faigata i se tasi ona malamalama ma tausia lenei poloaiga. Valaaulia le vasega e galulue faatasi e fesoasoani i lenei tagata. E mafai ona e amata i le valaaulia o tamaiti aoga sa suesueina nei poloaiga e faasoa mai ni nai malamalamaaga mai a latou suesuega. Ia valaaulia foi isi tamaiti aoga e faasoa mai ni manatu e ono fesoasoani. E mafai ona e fai atu ni fesili tulitatao e pei o nei: “O a ni faafitauli e ono feagai ma lenei tagata?” “E mafai faapefea ona tatou fesoasoani ia i latou ia manumalo mai nei faafitauli?” “E mafai faapefea ona tatou fesoasoani ia latou malamalama ma lagona le alofa o le Alii e ala i lenei poloaiga?”

O lo’u usitai i poloaiga a le Atua

O le manatuaina o mea ua e aoaoina ma lagonaina i lenei lesona, filifili se poloaiga e te lagona e finagalo le Alii e te taulai atu i ai. Tali i fesili nei i totonu o lau api faamaumau mo suesuega:

• E mafai faapefea e le usiusitai i lenei poloaiga ona faamanuiaina ai lo’u olaga?

• E faapefea ona fesoasoani lenei poloaiga ia te au e faaali atu ai lo’u alofa i le Tama Faalelagi ma Iesu Keriso ma mulimuli ia i Laua?

• O le a se mea patino se tasi ou te manao e fai e faaali atu ai lo’u alofa i le Alii ma tausia lenei poloaiga?

Uunaia tamaiti aoga e fai se fuafuaga e tausia lelei atili ai le poloaiga na latou filifilia.

Punaoa Faaopoopo

Aisea e tuuina mai ai e le Atua ia i tatou poloaiga?

Na aoao mai Elder Dale G. Renlund o le Korama a Aposetolo e Toasefululua:

Ina Filifili ia o Outou i le Aso Nei

O le fuafuaga a le Atua e aofia ai faatonuga mo i tatou, o loo faatatau i ai tusitusiga paia o ni poloaiga. O nei poloaiga e le o ni tulafono e faafiafia ai pe o se faaputuga o faasalaga o tulafono ua faamalosia mai e faamoemoe e na o le aoaoina ai o i tatou ia usiusitai. Latou te fesootai ma lo tatou atinaeina o uiga paia faaleatua, e toe foi atu ai i le Tama Faalelagi, ma le mauaina o le olioli tumau. (Dale G. Renlund “Ina Filifili Ia Outou i le Aso Nei,” Liahona, Nov. 2018, 105)

E mafai foi ona e faaali atu le vitio “Aisea e tuuina mai ai e le Atua ia i tatou poloaiga?” (0:39) e fesoasoani ai i tamaiti aoga e vaai faalemafaufau pe aisea ua tuuina mai ai e le Atua ia i tatou poloaiga.

Why Does God Give us Commandments?

Mataupu Faavae ma Feagaiga 42:22–23. Aisea ua avea ai le tuinanau ma se agasala matuiā?

Na aoao mai Elder Jeffrey R. Holland o le Korama a Aposetolo e Toasefululua:

E faaopoopo atu i le faatamaiaina o o tatou agaga e ala i le tulieseina o le Agaga, ae ou te manatu o se agasala aua na te faaleagaina le sootaga aupito maualuga ma sili ona paia ua tuuina mai e le Atua ia i tatou i le olaga nei—o le alofa o se alii ma se tamaitai o le tasi i le isi, ma le naunau o le ulugalii e aumai ni fanau i se aiga ua faamoemoe ina ia faavavau. Na fai mai se tagata o le alofa moni e tatau ona aofia ai le manatu o le tumau mausali. O le alofa moni e tumau. Ae o le tuinanau e fesuisuiai vave pei o le susueina o se itulau o ponokalafi pe tilotilo atu i le savali ane o se isi mea faitino ua faamoemoe mo le faamalieina o lagona tuinanau, o se alii po o se tamaitai. … O le alofa e otometi ai lava ona tatou aapa atu i le Atua ma isi tagata. O le tuinanau, i le isi itu, e matuai aunoa ma se amioatua ma e fiafia i le faamalieina o le tagata lava ia. O le alofa e oo mai ma lima mafola ma se loto matala; o le tuinanau e oo mai ma le na o le matelaina. (Jeffrey R. Holland, “Ia Lē Toe Ulu Mai I Lo’u Agaga Lē Ita Mai ia te Au,” Liahona, Me 2010, 44–45)

Mataupu Faavae ma Feagaiga 42:24–26. O le a le mulilua, ma aisea e tatau ai ona tatou ’alo ese mai ai?

O le mulilua o “le mafutaga faafeusuaiga faasolitulafono a alii ma tamaitai” (Taiala i Tusitusiga Paia, “Mulilua,” scriptures.ChurchofJesusChrist.org).

Na aoao mai e Elder David A. Bednar o le Korama a Aposetolo e Toasefululua le mafuaaga e tatau ai ona tatou ola uma i le tulafono a le Alii o le legavia pe ua tatou faaipoipo pe leai:

O le mana o le foafoaina o fanau e matuai taua faaleagaga. O le faaaoga sese o lenei mana e faatoilalo ai faamoemoega o le fuafuaga a le Tama ma lo tatou i ai i le olaga nei. O lo tatou Tama Faalelagi ma Lona Alo o e foafoa ma ua faamatuu mai ia i tatou taitoatasi se vaega o lo La’ua mana foafoa. O ni taiala patino mo le faaaogaina tatau o lenei tomai e foafoa ai le ola, o ni elemene taua ia i le fuafuaga a le Tama. O o tatou lagona e uiga i ai ma le faaaogaina o lena mana faalelagi, o le a fuafua ai se fuataga tele o lo tatou fiafia i le olaga nei ma lo tatou taunuuga i le faavavau. …

O Le Ekalesia a Iesu Keriso o le Au Paia o Aso e Gata Ai e i ai se tulaga faatonuina e tasi, e mausali o le ola mama faalefeusuaiga: o sootaga mafana felata’i e na o le va lava o se alii ma se tamaitai i le sootaga o le faaipoipoga ua faatonu mai i le fuafuaga a le Atua, e tatau ai. O na sootaga ua le na o se naunau e fiailoa, se manaoga ia faamalieina, po o se ituaiga o taaloga po o faafiafiaga e tulimatai ma le manatu faapito. E le o se osigātoilalo pe ua na o se taga e faatino. Ae, ua latou i ai i le olaga faitino o se tasi o faailoaga taua o lo tatou natura paia ma gafatia, ma o se auala o le faamalolosia o noataga faalelagona ma faaleagaga i le va o le tane ma le ava. (David A. Bednar, “Matou Te Talitonu i le Nofomama,” Liahona, Me 2013, 42).

Gaoioiga Faaopoopo e Aoao Ai

Fautuaga a faifeautala’i

Valaaulia tamaiti aoga e mafaufau po o le a le fautuaga o le a latou tuuina atu i se faifeautala’i fou o loo popole pe faapefea ona auauna atu ma le mataalia. E mafai e tamaiti aoga ona faitau le Mataupu Faavae ma Feagaiga 42:6–7, 12–17; 50:13–14, 17–20, ma vaavaai mo le fautuaga a le Alii i toeaina o le a Ia auina mai Ohaio e aoao atu le talalelei. E mafai e tamaiti aoga ona ave mea latou te aoaoina i fuaiupu ona faatino lea o le fautuaga o le a latou tuuina atu i le faifeautala’i. Mafaufau e valaaulia tamaiti aoga e mafaufau loloto po o le fea o fautuaga faafaifeautala’i e faatatau ia i latou i le taimi nei.

Mataupu Faavae ma Feagaiga 42:43–52. Ua tuuina mai e le Alii ia faatonuga e faatatau i le oti ma le faamalologa

Fai i tamaiti aoga e mafaufau i a latou tali i le fesili lenei:

• O le a se fautuaga e te tuuina atu i se tasi sa tatalo mo se faamalologa mai se ma’i ae e lei faamaloloina?

Faamalamalama atu i le Mataupu Faavae ma Feagaiga 42:43–52, na tuu mai ai e le Alii faatonuga e uiga i le oti ma le faamalologa. Valaaulia tamaiti aoga e vaevae i ni vaega e taitoalua pe taitoatolu. Fai i ai e faitau le Mataupu Faavae ma Feagaiga 42:43–52 ia latou vaega, ma vaavaai mo mea na aoao mai e le Alii e uiga i le faamalologa. Valaaulia i latou e tusi se faamatalaga po o se mataupu faavae e ta’u mai ai le tulafono a le Alii mo le faamaloloina o e mama’i. Atonu latou te tusia se mea faapea “Afai tatou te faatuatua ia Iesu Keriso, e mafai ona faamaloloina i tatou e tusa ai ma Lona finagalo.”

Talanoaina tali a tamaiti aoga i le fesili lea:

• Aisea e taua ai le manatua o le faamalologa e faalagolago i le faatuatua ma le finagalo o le Alii?

E mafai foi ona e faasino atu tamaiti aoga i le tala ia Ioane ma Heta i le “Accepting the Lord’s Will and Timing” (David A. Bednar, Ensign, Aug. 2016, 31–35).