Seminare
Lesona 57: Mataupu Faavae ma Feagaiga 42:29–39: Faapaiaina i le Alii

“Lesona 57—Mataupu Faavae ma Feagaiga 42:29–39: Faapaiaina i le Alii,” Tusi Lesona a le Faiaoga Seminare o le Mataupu Faavae ma Feagaiga (2025)

“Mataupu Faavae ma Feagaiga 42:29–39,” Tusi Lesona a le Faiaoga Seminare o le Mataupu Faavae ma Feagaiga

Lesona 57: Mataupu Faavae ma Feagaiga 41–44

Mataupu Faavae ma Feagaiga 42:29–39

Faapaiaina i le Alii

o aao o le Faaola

O se vaega o tagata o le Ekalesia sa nonofo i le faatoaga a Isaako ma Lusi Morley sa i ai se naunautaiga tele e ola i le talalelei a Iesu Keriso ma tausia e le tasi le isi. E ala mai i le Perofeta o Iosefa Samita, na faaali mai ai e le Alii le tulafono o le faapaiaga e fesoasoani ai i le Au Paia e tausia e matitiva. O lenei lesona e mafai ona fesoasoani i tamaiti aoga e faateleina ai lo latou manao e ola i le tulafono o le faapaiaga.

Gaoioiga E Ono Mafai Ona Aoao Ai

“O Outou o O’u Lima”

O Peresitene Dieter F. Uchtdorf, a o i ai i le Au Peresitene Sili, na faasoa atu le mea lenei:

2:3
Elder Dieter F. Uchtdorf

O se tala na faamatalaina, i se aai na faatafunaina i le taimi o le Taua Lona II a le Lalolagi, lea na matua faaleagaina ai se faatusa telē o Iesu Keriso. Ina ua maua e tagata o le aai le faatagata i faatafunaga, sa latou faanoanoa ona sa avea lea o se faailoga pele o lo latou faatuatuaga ma le faatasi ai o le Atua i o latou olaga.

Na mafai e tagata popoto faapitoa ona faaleleia le tele o vaega o le faatusa, ae ona sa matua faaleagaina ona lima o lea na le mafai ai ona toe faaleleia. Na fautua mai nisi latou te aumaia se tagata vane faatagata e toe faia ni lima fou, ae sa mananao isi e tuu ai pea faapela—o se faamanatu mautu lea o le tulaga matautia o le taua. Na iu lava ina tuu ai lava le faatagata e aunoa ma ni lima. Ae peitai, na faaopoopo e tagata o le aai i le pito i lalo o le faatusa o Iesu Keriso se faailoga e i ai upu nei: “O outou o o’u lima” (Dieter F. Uchtdorf, “O Outou o O’u Lima,” Liahona, Me 2010, 68)

  • O le a se mea na tulagaese ia te oe mai lenei tala?

  • O a ni auala e mafai ai ona avea i tatou ma lima o Iesu Keriso?

Valaaulia tamaiti aoga e tusi “Ona lima” pe tusi se ata o se tasi o o latou lima i totonu o a latou api talaaga. Valaaulia i latou e mafaufau loloto i o latou lava manaoga e avea ma lima o le Alii. I le faaiuga o le lesona, o le a latou maua le avanoa e faamaumau ai o latou mafaufauga ma lagona.

O le tulafono o le faapaiaga

I le amataga o le 1831, sa malaga atu ai tagata o le Ekalesia sa nonofo i Niu Ioka i Ohaio. O le toatele o nei Au Paia sa matitiva ma tuua le tele o a latou meatotino. I Ohaio, sa nonofo ai se vaega toatele o tagata fou i le faatoaga a Isaako ma Lusi Morley. Sa latou faatuina se vaega faalenuu na latou ta’ua “o le Aiga.” O se tasi o talitonuga na latou faasoa ai e faapea o meatotino patino uma o mea lava ia a tagata uma i le vaega. Sa ta’ua e le Alii a latou faatinoga ina ua Ia faaali mai Lana tulafono ia Iosefa Samita. Faatasi ai ma isi tulafono, na faaalia mai ai e le Alii ia mataupu faavae o le tulafono o le faapaiaga. O le aoaoina ma le ola ai i nei mataupu faavae o se tasi lea o auala e mafai ona avea ai le Au Paia ma aao o le Alii.

Valaaulia tamaiti aoga e faasoa mai mea na latou faalogo i ai e uiga i le tulafono o le faapaiaga pe fesili po o a ni a latou fesili e ono i ai. E mafai e tamaiti aoga ona su’e se faauigaga o le faapaiaga, pe e mafai foi ona e saunia le faamatalaga lenei mai ia Elder D. Todd Christofferson o le Korama a Aposetolo e Toasefululua.

Elder D. Todd Christofferson

Ina ia faapaiaina o lona uiga o le vaetofia lea po o le tuuina atu o se mea e paia, ma tuuto atu i faamoemoega paia. (D. Todd Christofferson, “Toe Manatunatuga i se Olaga Faapaiaina,” Liahona,, Nov. 2010, 16)

Sa talosagaina e le Alii le Au Paia i Ohaio e faapaia a latou meatotino ia te Ia e ala i le tuuina atu o i latou i Lana Ekalesia.

Faitau le Mataupu Faavae ma Feagaiga 42:29–38, ma vaavaai mo le mafuaaga na talosagaina ai e le Alii i latou e fai lenei mea.

Atonu e faailoa mai e tamaiti aoga ia mafuaaga nei: e faaali atu ai i le Alii lo tatou alolofa mo Ia (fuaiupu 29), e tausia e matitiva (fuaiupu 30–31, 34), e faatau mai ai fanua e mafai ona faapotopoto i ai le Au Paia pe a toe foi mai le Faaola (fuaiupu 35–36), ma fausia falelotu ma malumalu (fuaiupu 35). Atonu e fesoasoani le faamalamalama atu o le Ierusalema Fou o loo ta’ua i le fuaiupu 35 e faasino i “le nofoaga o le a faapotopoto i ai le Au Paia ma o le a nofotupu patino ai Keriso ma i latou i le taimi o le Mileniuma” (Taiala i Tusitusiga Paia, “Ierusalema Fou,” scriptures.ChurchofJesusChrist.org).

  • Aisea e te manatu na valaaulia ai e le Alii le Au Paia ia manatua ma tausia e matitiva?

  • O a ni upu moni e mafai ona tatou aoao mai i nei fuaiupu?

    E faaopoopo atu i upu moni ua faailoa mai e tamaiti aoga, fesoasoani ia latou iloa tatou te auauna atu i le Faaola e ala i le auauna atu i e matitiva ma ua fetalai mai le Alii ia i tatou ia faapaiaina mea ua tatou maua ia te Ia e tausia ai e matitiva ma fausia Lona malo.

    Ina ia fesoasoani i tamaiti aoga ia malamalama i mea na latou faitauina, e mafai ona e fai atu ia i latou e faatino ni faatinoga o mea na talosagaina uluai tagata o le Ekalesia toefuataiina a le Alii e fai. Faatulaga tamaiti aoga i ni vaega o ituaiga toatele eseese, e pei o aiga. Tufa atu ni meafaitino laiti, e pei o lole po o tupe siliva, i vaega, ae aua nei tutusa le tufatufaina atu o meafaitino. Tuu atu i nisi o vaega ni meafaitino ia tele atu nai lo isi vaega. E mafai foi ona e tufaina atu meafaitino ina ia leai se mea e maua e nisi o vaega. Valaaulia tamaiti aoga e faataitai mai le mea e tatau ona tupu e faavae i faatonuga a le Alii i le Mataupu Faavae ma Feagaiga 42:29–35. Fesoasoani i tamaiti aoga e vaai faalemafaufau i manaoga o “aiga” ma le auala e taulima ai na manaoga. Mafaufau e tuuina atu ni nai tulaga e ono oo i ai lo latou aiga ma pe faapefea ona filimaoti o latou manaoga. Afai e aoga, e mafai ona faaaoga se pesini e fai ma faleteuoloa a le Alii. Ma le isi, e mafai e se tamaitiiti aoga se toatasi pe toalua ona faatino le vaega o le aufono o loo faamatalaina i fuaiupu 31 ma le34, o le na valaauina e le Alii ia mautinoa ua maua e tagata uma mea sa latou manaomia.

    A o faasoa mai e tamaiti aoga a latou tali i fesili nei, vaavaai mo ni auala e fesoasoani ai ia i latou ia malamalama o mataupu faavae o le faapaiaga e tutusa mo fanau uma o le feagaiga a le Atua i tisipenisione uma. Peitai, e ono eseese auala patino ua faatonuina ai e le Atua Lona nuu e faatino ai le tulafono o le faapaiaga.

  • O a ni auala ua fetalai mai ai le Alii ia i tatou ia faapaiaina mea ua tatou maua i aso nei?

  • O a nisi o faataitaiga o le faaaogaina o lou taimi, au taleni, ma faamanuiaga mai le Atua e fesoasoani ai i isi?

  • O a nisi o auala e mafai ona tatou taulima ai manaoga o e matitiva?

    Mo faataitaiga o aso nei o tagata o le Ekalesia o loo faapaiaina o latou taimi, taleni, ma tupe, e mafai ona e faaalia se tasi pe sili atu o vitio nei: “Fast Offerings: A Simple Commandment with a Marvelous Promise” (3:01); “Syrian Refugee—‘The Moment I Was Shot I Knew I Would Never Walk Again’” (2:39); “A Thousand Days” (4:32).

    3:1

    Fast Offerings: A Simple Commandment with a Marvelous Promise

    Excerpt from President Henry B. Erying’s talk “Is Not This the Fast That I Have Chosen?” He discusses the blessings of the fast and the story of a humble woman who pays a generous fast offering.

    2:3

    Syrian Refugee - “The moment I was shot I knew I would never walk again”

    With millions impacted by the Syrian civil war that broke out in 2011 many have fled for safety and refuge. Watch and listen to Nadia’s story; A 12 year old Syrian refugee child, who while fleeing Syria, was shot in the back and paralyzed.

    2:3

    O Aso e Afe

    E ala i le eliina o vaieli ma puna i atunuu o Aferika ua pagatia i lamala, o loo fesoasoani ai Le Ekalesia a Iesu Keriso o le Au Paia o Aso e Gata Ai e tuuina atu le ola maloloina ma le fiafia i alalafaga atoa.

  • O le a se mea ua e iloa e uiga ia Iesu Keriso e mafai ona faaosofia ai oe e faapaia atu lou taimi, taleni, ma mea ia te Ia?

  • Aisea e te manatu ai e finagalo le Faaola ia tatou auauna atu ia te Ia e ala i le auauna atu i tagata e manaomia le fesoasoani? (Mo ni malamalamaaga faaopoopo, e mafai ona e su’eina se tasi pe sili atu o nei fuaitau o mau: Iakopo 2:17–19; Mosaea 4:21–25; Mataupu Faavae ma Feagaiga 38:24–27; 104:14–17.)

  • O le a sou manatu e faapefea e le fesoasoani i isi e manaomia le fesoasoani ona fesoasoani ia i tatou ia avea atili e faapei o Keriso?

E ono fesoasoani le ta’u atu i tamaiti aoga e faapea, i faaeega paia o le malumalu, e osifeagaiga ai tagata o le ekalesia e tausia le tulafono o le faapaiaga e ala i le faapaiaina “o o latou taimi, taleni, ma mea uma ua faamanuiaina ai i latou e le Alii i le fausiaina o le Ekalesia a Iesu Keriso i le lalolagi” (Tusitaulima Aoao: Auauna Atu i O Le Ekalesia a Iesu Keriso o le Au Paia o Aso e Gata Ai, 27.2, ChurchofJesusChrist.org).

Afai e tusia e tamaiti aoga se auivi o o latou lima i totonu o a latou api faamaumau mo suesuega, e mafai ona e fai atu ia i latou e faatumu i le taimi o le gaoioiga lenei.

Faaalu sina taimi e iloilo ai lou manao e avea ma lima o le Alii. O le mafaufau loloto ma le tusitusi i se api talaaga o se tasi lea o auala e mafai ona e taumafai ai e faalogo i le siufofoga o le Faaola ma mea o loo Ia valaaulia oe e fai. E mafai ona e tomanatu ma tusi e uiga i se tasi pe sili atu o mea nei:

Mafaufau e faaali atu uunaiga nei mo tamaiti aoga e toe manatunatu ai ma tusi e uiga i ai.

  • O upu e faamatala ai ou lagona e uiga i le ola ai i le tulafono o le faapaiaga

  • O auala e te manao e faasoa atu ai mea ua tuuina mai e le Alii ia te oe e fesoasoani ai i isi

  • Soo se atugaluga o ia te oe e uiga i le ola ai i le tulafono o le faapaiaga ma pe mafai faapefea ona e liliu atu i le Alii ina ia faatoilaloina i latou

E mafai ona e fai i tamaiti aoga e faasoa mai o latou manatu i le vasega ma i le fale ma o latou aiga. E mafai foi ona e faasoa atu ou lava manatu ma molimau.