Lesson 56: Doktrina at mga Tipan 41–44

Doktrina at mga Tipan 42

Ang mga Batas ng Panginoon

Sa Doktrina at mga Tipan 42, tinupad ng Panginoon ang Kanyang pangako sa mga Banal na ibibigay Niya sa kanila ang Kanyang batas matapos silang lumipat sa Ohio. Nagbigay Siya ng mga pangkalahatang batas ng pag-uugali para sa mga miyembro ng Simbahan. Ang lesson na ito ay tutulong sa mga estudyante na maipakita ang kanilang pagmamahal sa Panginoon sa pamamagitan ng pagsunod sa Kanyang mga kautusan.

Mga Posibleng Aktibidad sa Pag-aaral

Dalawang magkaibang pananaw

Simulan ang klase sa pamamagitan ng pag-anyaya sa mga estudyante na isipin at pagkatapos ay ibahagi ang kanilang mga naisip tungkol sa sumusunod na tanong:

• Sa nakikita mo sa mundo ngayon, bakit kaya kailangan natin ng mga kautusan mula sa Diyos?

Isulat ang sumunod at sumuway sa itaas ng dalawang magkaibang column sa pisara. Pagkatapos ay maaaring ilista ng mga estudyante sa ilalim ng mga katugmang column ang mga dahilan kung bakit maaaring sundin o suwayin ng mga tao ang mga kautusan.

Sabihin sa mga estudyante na pag-isipan sandali ang sarili nilang mga dahilan sa pagsunod o pagsuway sa mga kautusan ng Diyos.

Sa pag-aaral mo ngayon, hingin ang patnubay ng Espiritu Santo para matulungan kang mas maunawaan kung bakit nagbibigay ang Panginoon ng mga kautusan at kung paano mo maipagpapatuloy, o mapapahusay, ang iyong pagsunod.

Ang batas ng Panginoon

Ipinangako ng Panginoon sa mga Banal na ibibigay Niya sa kanila ang Kanyang batas kapag nagtipon sila sa Ohio (tingnan sa Doktrina at mga Tipan 38:32). Hindi nagtagal matapos dumating sa Ohio, pinagkaisa ni Propetang Joseph Smith at ng 12 elder ang kanilang pananampalataya sa taimtim na panalangin (Doktrina at mga Tipan 41:3) at hiniling nila sa Panginoon na ihayag ang Kanyang batas.

Basahin ang Doktrina at mga Tipan 42:1–3 upang makita ang tugon ng Panginoon.

• Ano ang mahalaga para sa iyo sa mga talatang ito?

Pagkatapos ay itinuro ng Panginoon ang tungkol sa ilang kautusan na nais Niyang ipamuhay ng Kanyang mga tao.

Para sa sumusunod na aktibidad, maaaring piliin ng mga estudyante ang mga talatang babasahin nila o maaari mong italaga ang mga ito sa kanila. Maaari mong sabihin sa mga estudyante na isulat sa pisara ang mga kautusang nahanap nila at kung sa aling (mga) talata nila nahanap ang mga ito.

Basahin ang kahit dalawa sa mga sumusunod na grupo ng mga talata, at alamin ang mga kautusan ng Panginoon:

• Doktrina at mga Tipan 42:4–7

• Doktrina at mga Tipan 42:18–21

• Doktrina at mga Tipan 42:22–26

• Doktrina at mga Tipan 42:27–30

• Doktrina at mga Tipan 42:40–42

Ayon sa talata 29, bakit dapat nating sundin ang mga kautusan ng Panginoon?

Itinuturo ng talatang ito na kapag sinusunod natin ang mga kautusan ng Panginoon, ipinapakita natin ang ating pagmamahal sa Kanya. Maaaring markahan ng mga estudyante ang katotohanang ito sa talata 29 at i-cross-reference o i-link ito sa Juan 14:15. Maaari ding basahin ng mga estudyante ang Doktrina at mga Tipan 41:5, at alamin kung ano pa ang kahulugan ng ating pagsunod sa Panginoon.

Maaari mong igrupu-grupo ang mga estudyante para basahin at sagutin ang mga sumusunod.

Itinuturo ng Para sa Lakas ng mga Kabataan: Isang Gabay sa Paggawa ng mga Pagpili:

Para matulungan kayong gumawa ng mabubuting pagpili, nagbibigay ng mga utos ang Diyos. Ginagawa Niya ito dahil mahal Niya kayo. At ang pinakamainam na dahilan para sundin ang mga utos ng Diyos ay na mahal ninyo Siya. Pagmamahal ang nasa sentro ng mga utos ng Diyos. (Para sa Lakas ng mga Kabataan: Isang Gabay sa Paggawa ng mga Pagpili [2022], 11)

• Paano ipinapakita ng mga kautusan ng Diyos ang Kanyang pagmamahal?

• Paano ipinapakita ng ating pagsunod sa mga kautusan ng Diyos na mahal natin Siya?

Ang Kanyang mga kautusan

Maaaring may mga estudyante ka na gustong kumpletuhin ang sumusunod na aktibidad gamit ang isang kautusan na hindi nakalista sa Doktrina at mga Tipan 42. Maaari mong palawakin ang saklaw ng mga kautusan para matugunan ang mga pangangailangan at hangarin ng iyong mga estudyante.

Pumili ng isang kautusan mula sa bahagi 42 na gusto mo pang matutuhan o pag-isipan.

Habang nag-aaral ka, maghandang ibahagi ang sumusunod tungkol sa kautusang pinili mo. Maaari mong isulat ang mga naisip mo sa iyong study journal.

1. Iba pang mga talata sa banal na kasulatan, mga pahayag sa pangkalahatang kumperensya, o Para sa Lakas ng mga Kabataan (buklet) na nagpapalalim sa iyong pag-unawa sa kautusang ito

2. Mga dahilan kung bakit sa palagay mo ay ibibigay sa atin ang kautusang ito ng mapagmahal na Ama sa Langit na pinakamarunong sa lahat

3. Sa iyong palagay, paano nakatutulong sa atin ang pagsunod sa kautusang ito na sundin ang Tagapagligtas, ipakita ang ating pagmamahal sa Kanya, at maging higit na katulad Niya

4. Mga karanasan mo sa pagsunod sa kautusang ito (opsiyonal; ibahagi lamang kung hindi masyadong sagrado o personal)

Bigyan ang mga estudyante ng pagkakataong ibahagi ang natutuhan nila. Maaari mong ipabahagi sa kanila ang kanilang mga naisip sa maliliit na grupo.

Kung sumulat ang mga estudyante ng mga kautusan sa pisara kanina, maaari mo silang anyayahang bilugan ang mga kautusang katatapos lang nilang pag-aralan. Pagkatapos ay sabihin sa mga estudyante na pumili ng isa o dalawang kautusan na sa palagay nila ay magiging lubos na kapaki-pakinabang na talakayin bilang klase. Sabihin sa kanila na ipagpalagay na nahihirapan ang isang tao na maunawaan at masunod ang kautusang ito. Sabihin sa klase na magtulungan para matulungan ang taong ito. Maaari kang magsimula sa pamamagitan ng pag-anyaya sa mga estudyanteng nag-aral ng mga kautusang ito na magbahagi ng ilang natutuhan nila sa kanilang pag-aaral. Anyayahan din ang iba pang mga estudyante na magbahagi ng mga ideya na maaaring makatulong. Maaari kang magtanong ng mga follow-up na tanong tulad ng sumusunod: “Anong mga balakid ang maaaring harapin ng taong ito?” “Paano natin siya matutulungang madaig ang mga balakid na ito?” “Paano natin siya matutulungang maunawaan at madama ang pagmamahal ng Panginoon sa pamamagitan ng kautusang ito?”

Ang pagsunod ko sa mga kautusan ng Diyos

Habang inaalala ang natutuhan at nadama mo sa lesson na ito, pumili ng isang kautusan na sa palagay mo ay nais ng Panginoon na pagtuunan mo ng pansin. Sagutin ang mga sumusunod na tanong sa iyong study journal:

• Paano mapagpapala ng pagsunod sa kautusang ito ang aking buhay?

• Paano ako natutulungan ng kautusang ito na ipakita ang aking pagmamahal sa Ama sa Langit at kay Jesucristo at sundin Sila?

• Ano ang isang partikular na bagay na gusto kong gawin para maipakita ang aking pagmamahal sa Panginoon at sundin ang kautusang ito?

Hikayatin ang mga estudyante na gumawa ng plano para mas masunod ang kautusang pinili nila.

Karagdagang Resources

Bakit tayo binibigyan ng Diyos ng mga kautusan?

Itinuro ni Elder Dale G. Renlund ng Korum ng Labindalawang Apostol:

Kabilang sa plano ng Diyos ang mga tagubilin para sa atin, tinukoy sa mga banal na kasulatan bilang mga kautusan. Ang mga kautusang ito ay hindi kakatwa ni makatwirang koleksyon ng mga ipinataw na patakaran na nangangahulugan lamang na sanayin tayo na maging masunurin. Nauugnay ang mga ito sa pagkakaroon natin ng mga katangian ng kabanalan, pagbalik sa Ama sa Langit, at pagtanggap ng walang hanggang kagalakan. (Dale G. Renlund, “Piliin Ninyo sa Araw na Ito,” Liahona, Nob. 2018, 105)

Maaari mo ring ipapanood ang video na “Why Does God Give Us Commandments?” (0:39) para matulungan ang mga estudyante na mailarawan sa isipan kung bakit tayo binibigyan ng Diyos ng mga kautusan.

Doktrina at mga Tipan 42:22–23. Bakit napakabigat na kasalanan ang pagnanasa?

Itinuro ni Elder Jeffrey R. Holland ng Korum ng Labindalawang Apostol:

Maliban sa pinarurumi nito ang ating kaluluwa dahil lubusan nitong itinataboy ang Espiritu, sa palagay ko kasalanan ito dahil dinudungisan nito ang pinakadakila at pinakabanal na ugnayan na ibinigay ng Diyos sa atin sa mortalidad—ang pag-iibigan ng lalaki at babae at ang pagnanais ng magkabiyak na magkaanak sa pamilyang ang layon ay maging walang hanggan. Minsan ay may nagsabi na ang tunay na pag-ibig ay dapat manatili. Nagtatagal ang tunay na pag-ibig. Ngunit mabilis na nagbabago ang pagnanasa tulad ng pagbuklat sa pahina ng pornograpiya o pagsulyap sa isang mapagtutuunan ng panandaliang-kasiyahan, lalaki man o babae. … Ang pag-ibig ay nagbubunsod sa atin na makipag-ugnayan sa Diyos at sa ibang tao. Ang pagnanasa, sa kabilang banda, ay kahit anong hindi makadiyos at natutuwa sa pagpapasasa ng sarili. Ang pag-ibig ay mapagparaya at mapagkandili; ang pagnanasa ay sariling kasiyahan lang ang nasa isip. (Jeffrey R. Holland, “Huwag nang Magbigay-Puwang Kailanman sa Kaaway ng Aking Kaluluwa,” Liahona, Mayo 2010, 44–45)

Doktrina at mga Tipan 42:24–26. Ano ang pakikiapid, at bakit dapat nating iwasan ito?

Ang pakikiapid ay “ang labag sa batas na pakikipag-ugnayang seksuwal ng mga kalalakihan at kababaihan” (Gabay sa mga Banal na Kasulatan, “Pakikiapid,” scriptures.ChurchofJesusChrist.org).

Itinuro ni Elder David A. Bednar ng Korum ng Labindalawang Apostol kung bakit dapat nating lahat ipamuhay ang batas ng Panginoon sa kalinisang-puri may asawa man tayo o wala:

Ang kapangyarihang lumikha ng buhay ay may espirituwal na kahalagahan. Ang maling paggamit sa kapangyarihang ito ay sumisira sa mga layunin ng plano ng Ama at sa ating buhay sa lupa. Ang ating Ama sa Langit at ang Kanyang Pinakamamahal na Anak ay mga tagalikha at ipinagkatiwala Nila sa atin ang bahagi ng Kanilang kapangyarihang lumikha. Ang mga tuntunin sa wastong paggamit ng kakayahang lumikha ng buhay ay mahalagang bahagi sa plano ng Ama. Ang damdamin natin at paggamit sa banal na kapangyarihang ito ang magiging batayan ng ating kaligayahan sa mortalidad at sa ating tadhana sa kawalang-hanggan. …

Ang Simbahan ni Jesucristo ng mga Banal sa mga Huling Araw ay may iisa, at di-nagbabagong pamantayan sa kalinisang seksuwal: ang intimasiya ay nararapat lamang mangyari sa isang lalaki at isang babae na ikinasal ayon sa itinakda ng plano ng Diyos. Ang ganitong relasyon ay hindi pag-uusisa lamang na dapat hanapan ng kasagutan, hangaring dapat bigyang-kasiyahan, o uri ng libangan na gagawin lang para sa sarili. Hindi ito bagay na dapat mapagtagumpayan o kilos na dapat isagawa. Sa halip, isa ito sa mga pangunahing pagpapahayag sa mortalidad ng ating banal na katangian at potensiyal at paraan ng pagpapatibay ng emosyonal at espirituwal na ugnayan ng mag-asawa. (David A. Bednar, “Naniniwala Kami sa Pagiging Malinis,” Liahona, Mayo 2013, 42).

Mga Karagdagang Aktibidad sa Pag-aaral

Payo sa missionary

Sabihin sa mga estudyante na isipin kung anong payo ang ibibigay nila sa isang bagong missionary na nag-aalala kung paano maglilingkod nang epektibo. Maaaring basahin ng mga estudyante ang Doktrina at mga Tipan 42:6–7, 12–17; 50:13–14, 17–20, at alamin ang ipinayo ng Panginoon sa mga elder na isusugo Niya mula sa Ohio upang ituro ang ebanghelyo. Maaaring gamitin ng mga estudyante ang natutuhan nila sa mga talata at pagkatapos ay isadula kung anong payo ang ibibigay nila sa missionary. Maaari mong anyayahan ang mga estudyante na pag-isipan kung aling payo sa missionary ang naaangkop sa kanila ngayon.

Doktrina at mga Tipan 42:43–52. Nagbigay ang Panginoon ng mga tagubilin hinggil sa kamatayan at pagpapagaling

Sabihin sa mga estudyante na pag-isipan ang sagot nila sa sumusunod na tanong:

• Anong payo ang ibibigay mo sa isang taong nagdasal na mapagaling mula sa sakit ngunit hindi napagaling?

Ipaliwanag na sa Doktrina at mga Tipan 42:43–52, nagbigay ang Panginoon ng mga tagubilin hinggil sa kamatayan at pagpapagaling. Sabihin sa klase na maggrupu-grupo na may tigdadalawa o tigtatatlong miyembro. Sabihin sa kanila na basahin ang Doktrina at mga Tipan 42:43–52 sa kanilang grupo, at alamin ang itinuro ng Panginoon tungkol sa pagpapagaling. Sabihin sa kanila na magsulat ng isang pahayag ng alituntunin na kumakatawan sa batas ng Panginoon para sa pagpapagaling ng maysakit. Maaari silang magsulat ng tulad ng “Kung tayo ay may pananampalataya kay Jesucristo, mapagagaling tayo ayon sa Kanyang kalooban.”

Talakayin ang mga sagot ng mga estudyante sa sumusunod na tanong:

• Bakit mahalagang alalahanin na ang paggaling ay nakasalalay sa pananampalataya at sa kalooban ng Panginoon?

Maaari mo ring ipabasa sa mga estudyante ang salaysay tungkol kina John at Heather sa “Pagtanggap sa Kalooban at Takdang Panahon ng Panginoon” (David A. Bednar, Liahona, Ago. 2016, 31–35).