Դաս 60․ Վարդապետություն և Ուխտեր 45

Վարդապետություն և Ուխտեր 45․9–75, Մաս 2

Նախապատրաստվենք Երկրորդ Գալուստին

Հիսուս Քրիստոսը նորից կգա երկիր «զորությամբ և մեծ փառքով»՝ կատարելու այն խոստումները, որոնք Նա տվել է (Վարդապետություն և Ուխտեր 45․44, տես նաև հատված 16-ը)։ Վարդապետություն և Ուխտեր 45 բաժնում Փրկիչը սիրով ուսուցանում է, թե մենք ինչպես կարող ենք նախապատրաստվել Նրա Երկրորդ Գալուստին: Այս դասի նպատակն է օգնել ուսանողներին նախապատրաստվել Հիսուս Քրիստոսի Երկրորդ Գալուստին։

Հնարավոր ուսումնական վարժություններ

Պատրաստվենք կարևոր իրադարձությունների

Կարող եք գրատախտակին գրել նախապատրաստություն պահանջող մի քանի իրադարձություն (կամ ցուցադրել դրանց նկարները), որոնց ձեր ուսանողները մասնակցում են կամ պետք է մասնակցեն: Օրինակ՝ դա կարող է լինել դպրոցական քննությունները, ուսումնական հաստատություն ավարտելը, լիաժամկետ միսիան կամ սպորտային որևէ իրադարձություն: Հարցրեք ուսանողներին, թե ինչ ընդհանուր բան ունեն այս իրադարձությունները:

Հիշեք իրադարձություններ, անելիքներ կամ պարտականություններ ձեր կյանքում, որոնք նախապատրաստություն են պահանջում: Այդ ընթացքում հիշեք մի փորձառություն, երբ դուք պատրաստ չէիք այդ իրադարձությանը, և մեկ այլ փորձառություն, երբ դուք պատրաստ էիք դրան։

• Ձեր պատրաստվածության աստիճանն ինչպե՞ս ազդեց այն բանի վրա, թե ինչ զգացողություններ ունեցաք, երբ իրադարձությունը մոտեցավ: Ինչպե՞ս դա ազդեց արդյունքի վրա:

Հիսուս Քրիստոսի Երկրորդ Գալուստը լինելու է մի իրադարձություն, որը նման չէ որևէ այլ իրադարձության, որ երբևէ եղել է մեր կյանքում: Մեր պատրաստվածությունն այդ իրադարձությանը կարող է որոշիչ լինել այն զգացողությունների համար, որ մենք կունենանք Նրա վերադարձին սպասելիս։ Մեր պատրաստվածությունը նաև կարող է որոշիչ լինել այն փորձառության համար, որը մենք կունենանք, երբ Նա վերադառնա:

Ուսանողներին առաջարկեք զույգերով կամ փոքր խմբերով քննարկել ստորև ներկայացվող երկու հարցը: (Կարող եք հիշեցնել նրանց այն նշանների մասին, որոնք նրանք ուսումնասիրել են «Վարդապետություն և Ուխտեր 45.9–75, Մաս 1» դասում):

• Ի՞նչ գիտեք այն իրադարձությունների մասին, որոնք նախորդելու են Փրկչի Երկրորդ Գալուստին:

• Ելնելով Նրա Երկրորդ Գալուստի մասին ձեր իմացածից՝ ինչո՞ւ եք ցանկանում պատրաստ լինել դրան:

Երբ դուք կամ կամավոր որևէ ուսանող կարդաք ստորև բերված հատվածը և խոսքերը, խնդրեք ուսանողներին փակել իրենց աչքերը և պատկերացնել, թե ինչպիսին կլինի Փրկչի վերադարձը:

Կարդացեք Վարդապետություն և Ուխտեր 45․44 հատվածը և Տասներկու Առաքյալների Քվորումից Երեց Նիլ Լ. Անդերսենի հետևյալ խոսքերը և տեսեք, թե ինչպիսին կլինի Փրկչի Երկրորդ Գալուստը:

Ոչինչ այնքան չի մեծացնում Քրիստոսի մասին խոսելու իմ ցանկությունը, որքան Նրա վերադարձը պատկերացնելը: Չնայած մենք չգիտենք, թե Նա երբ է գալու, Նրա վերադարձի իրադարձությունները ցնցող կլինեն: Նա կգա երկնքի ամպերի մեջ՝ վեհությամբ ու փառքով, Իր բոլոր սուրբ հրեշտակներով: Ոչ թե մի քանի հրեշտակներով, այլ Իր բոլոր սուրբ հրեշտակներով: (Նիլ Լ. Անդերսեն, «Մենք խոսում ենք Քրիստոսի մասին», Լիահոնա, նոյեմբեր 2020, 91)

• Հասկացողությունը, թե ինչպիսին է լինելու Փրկչի Երկրորդ Գալուստը, ինչպե՞ս կարող է մոտիվացնել ձեզ՝ պատրաստվելու այդ իրադարձությանը։

Կարող եք առաջարկել ուսանողներին կապել Վարդապետություն և Ուխտեր 45․44 հատվածը Վարդապետություն և Ուխտեր 29.10–11 հատվածների վարդապետության սերտման հղման հետ:

Կարող եք գրատախտակին գծել հետևյալ սանդղակը և առաջարկել ուսանողներին իրենց ուսումնական օրագրերում գրել ցանկացած միտք կամ զգացում, որը գալիս է իրենց մտքին, երբ իրենք լուռ խորհում են, թե ինչպես կգնահատեն իրենց:

Բազմազանության համար կարող եք սանդղակի վրա թվերը փոխարինել էմոջիներով կամ զգացմունքներ պատկերող այլ նկարներով:

Օգտագործելով այս սանդղակը, ինչպե՞ս կգնահատեք ձեր վստահության մակարդակը հետևյալ պնդումների վերաբերյալ:

• Ես գիտեմ՝ ինչպես նախապատրաստվել Փրկիչի Երկրորդ Գալուստին։

• Ես կարծում եմ, որ լավ պատրաստված եմ Փրկչի Երկրորդ Գալուստին։

Նախապատրաստվենք Հիսուս Քրիստոսի Երկրորդ Գալուստին

Օգտակար կլինի ուսանողների հետ կիսվել, որ Վարդապետություն և Ուխտեր 38.30 հատվածն ուսուցանում է․ «եթե պատրաստ լինեք, դուք չեք վախենա»: Այսօրվա դասը կարող է օգնել մեզ հաղթահարել մեր վախերը՝ կենտրոնանալով երկու եղանակների վրա, որոնցով կարող ենք նախապատրաստվել Երկրորդ Գալուստին: Կարող եք գրատախտակին գրել «Մենք կարող ենք նախապատրաստվել Հիսուս Քրիստոսի Երկրորդ Գալուստին »։ Երբ ուսանողներն ուսումնասիրեն հետևյալ հատվածները, կարող եք առաջարկել նրանց գրատախտակին գրել արտահայտություններ, որոնք ավարտում են այս նախադասությունը։

Կարդացեք Վարդապետություն և Ուխտեր 45․9, 32, 39, 57, 71 հատվածները՝ փնտրելով եղանակներ, որոնցով Փրկիչը հրավիրում է մեզ նախապատրաստվել Իր Երկրորդ Գալուստին:

Օգտակար կլինի մատնանշել Փրկչի հետ մեր ուխտերը պահելու կարևորությունը՝ Նրա վերադարձին նախապատրաստվելիս (տես հատված 9)։

Թեև բաժին 45-ը ներառում է բազմաթիվ եղանակներ, որոնցով Փրկիչը մեզ հրավիրում է նախապատրաստվել Իր գալուստին, այս դասի մնացած մասը կկենտրոնանա այն ճշմարտության վրա, որ մենք կարող ենք նախապատրաստվել Հիսուս Քրիստոսի Երկրորդ Գալուստին՝ կանգնելով սուրբ տեղերում և Սուրբ Հոգին որպես մեզ ուղեցույց վերցնելով։ Ազատորեն կենտրոնացեք նախապատրաստվելու այլ եղանակների վրա՝ ուսանողների հետաքրքրություններին և կարիքներին համապատասխան։

Կանգնենք սուրբ տեղերում և վերցնենք Սուրբ Հոգուն՝ որպես մեզ ուղեցույց

Ուսանողներին բաժանեք փոքր խմբերի և յուրաքանչյուր խմբի տվեք ուղեկցող աշխատաթերթ։ Խմբերը կարող են ուսումնասիրել աշխատաթերթի մեկ կամ երկու բաժինները: Խմբերով աշխատելու ժամանակ կարող եք դրանցից մի քանիսին խնդրել, որ պատրաստվեն և կիսվեն իրենց գտածով դասարանի հետ, երբ բոլոր ուսանողներն ավարտեն աշխատանքը:

Նախապատրաստվենք Երկրորդ Գալուստին

Կանգնել սուրբ տեղերում

Կարդացեք սուրբ գրությունների հետևյալ հղումները և արտահայտությունները՝ փնտրելով եղանակներ, որոնք մենք կարող ենք ընտրել՝ սուրբ տեղերում կանգնելու համար:

Սաղմոս 24․3–4, Եսայիա 58․13, Հելաման 5․12, 3 Նեփի 18․24, Վարդապետություն և Ուխտեր 27․15, 115․5–6

Երիտասարդ կանանց գերագույն նախագահությունից քույր Էնն Մ. Դիբը բացատրել է.

Նախագահ Էզրա Թաֆտ Բենսոնը խորհուրդ է տվել. «Սուրբ տեղերը ներառում են մեր տաճարները, մեր ժողովատները, մեր տները և Սիոնի ցցերը, որոնք … «պաշտպանության և ապաստանի համար են» [Վարդապետություն և Ուխտեր 115.6]» [«Պատրաստվեք Տիրոջ Մեծ օրվա համար», New Era, մայիս 1982, 50]։ Ի հավելումն նշվածների, կարծում եմ, որ մեզնից յուրաքանչյուրը կարող է բազմաթիվ այլ տեղեր գտնել: Տեղ բառը գուցե առաջին հերթին մենք հասկանանք որպես ֆիզիկական միջավայր կամ աշխարհագրական վայր: Սակայն, տեղը կարող է լինել «որոշակի վիճակ, դրություն կամ հոգեվիճակ» [Merriam-Webster Online, «տեղ», merriam-webster.com/dictionary/place]։ Սա նշանակում է սուրբ տեղերը կարող են նաև ներառել պահեր ժամանակի ընթացքում՝պահեր, երբ Սուրբ Հոգին վկայում է մեզ, պահեր, երբ մենք զգում ենք Երկնային Հոր սերը կամ պահեր, երբ մենք պատասխան ենք ստանում մեր աղոթքներին: Նույնիսկ ավելին, ես կարծում եմ, որ ամեն անգամ, երբ քաջություն եք ունենում կանգնելու այն բանի համար, ինչը ճիշտ է, հատկապես այն իրավիճակներում, երբ ուրիշ ոչ ոք չի կամենում դա անել, դուք ստեղծում եք սուրբ տեղ։ (Էնն Մ. Դիբ, «Ձեր սուրբ տեղերը», Լիահոնա, մայիս 2013 թ․, 115)

Վերցնենք Սուրբ Հոգին՝ որպես մեզ ուղեցույց

Կարդացեք սուրբ գրությունների հետևյալ հղումները և արտահայտությունները՝ փնտրելով եղանակներ, որոնցով մենք կարող ենք վերցնել Սուրբ Հոգին՝ որպես մեզ ուղեցույց։

Առակաց 3․5–6; Սաղմոս 118․8–9; 1 Նեփի 4․6; 2 Նեփի 32․5; Մորոնի 10․5; Վարդապետություն և Ուխտեր 11․12–14

Առաջին նախագահությունից նախագահ Դալլին Հ. Օուքսն ուսուցանել է.

Ինչպե՞ս ենք վերցնում Սուրբ Հոգին՝ որպես մեզ ուղեկից: Մենք պետք է ապաշխարենք մեր մեղքերի համար ամեն շաբաթ, և թարմացնենք մեր ուխտերը՝ հաղորդությունն ընդունելով մաքուր ձեռքերով և անարատ սրտով, ինչպես որ մեզ պատվիրվել է [տես Վարդապետություն և Ուխտեր 59.8–9, 12]: Միայն այդպես կարող ենք ունենալ «Հոգին միշտ [մեզ] հետ ունենալու» աստվածային խոստումը (Վարդապետություն և Ուխտեր 20.77): …

… Մենք միշտ պետք է անենք այն բաները, որոնք անհրաժեշտ են այդ Հոգին պահպանելու համար: Մենք պետք է պահենք պատվիրանները, աղոթենք առաջնորդության համար, հաճախենք եկեղեցի և ընդունենք հաղորդություն յուրաքանչյուր կիրակի: Եվ մենք երբեք չպետք է անենք որևէ բան, որը հեռացնում է Հոգուն: Հատկապես մենք պետք է խուսափենք պոռնոգրաֆիայից, ոգելից խմիչքներից, ծխախոտից, թմրադեղերից և միշտ խուսափենք մաքրաբարոյության օրենքը խախտելուց: (Dallin H. Oaks, “Be Not Deceived,” Liahona, Nov. 2004, 46)

• Ուսումնասիրելիս ո՞ր մտքերը կամ տպավորություններն առանձնացան ձեզ համար։

• Այդ բաներն անելն ինչպես է մեզ նախապատրաստում Հիսուս Քրիստոսի Երկրորդ Գալուստին։

Աշխատաթերթից ընտրեք երկու բաժիններից մեկը: Աշխատաթերթի հետևի մասում գրեք երկու կամ երեք որոշակի եղանակ, որոնցով երիտասարդները կարող են կիրառել այդ բաժնի ուսմունքներն իրենց կյանքում:

Կարող եք խմբերին խնդրել, որ իրենց աշխատաթերթերը տեղադրեն դասարանով մեկ՝ թերթիկների դարձերեսը դեպի դուրս: Հրավիրեք ուսանողներին շրջել դասարանում՝ կարդալով կիրառման տարբեր գաղափարներ: Որպես այլընտրանք, խմբերը կարող են փոխանակել թղթերը միմյանց հետ:

Ընտրեք մեկ գործողություն, որը ձեր կարծիքով օգտակար կլինի կիրառել ձեր կյանքում:

• Ի՞նչ կարող եք անել՝ այս գործողությունը ձեր կյանքում կիրառելու համար։

• Դա ինչո՞ւ կօգնի ձեզ նախապատրաստվել Փրկչի Երկրորդ Գալուստին:

Ուսանողներին առաջարկեք կիսվել ուսումնասիրության ընթացքում իրենց սովորածով և զգացածով: Առաջարկեք նրանց գործել ըստ իրենց մտքերի և զգացմունքների: Եզրափակելով՝ կարող եք նորից ցուցադրել դասի սկզբում ներկայացված գնահատման սանդղակը: Առաջարկեք ուսանողներին նորից գնահատել իրենց վստահությունը Փրկչի Երկրորդ Գալուստին նախապատրաստվելու հարցում:

Օժանդակ նյութեր

Ինչպե՞ս կարող եմ ավելի լավ հետևել Սուրբ Հոգուն իմ կյանքում

Փնտրեք այն, ինչը քաջալերում է, ոգեշնչում և հրավիրում է Հոգուն: Երբ դուք ընտրություն եք կատարում այն մասին, թե ինչ դիտել, կարդալ, լսել կամ ինչին մասնակցել, մտածեք, թե ինչ եք զգում դրանից հետո: Արդյոք դա լա՞վ մտքեր է հրավիրում: Հեռու մնացեք այն ամենից, ինչը ծաղրում է սուրբ բաները կամ անբարոյական է: Մի մասնակցեք որևէ բանի, որը թուլացնում է ձեր դատողությունը կամ զգայունությունը Հոգու նկատմամբ, օրինակ՝ բռնությունը, ալկոհոլը և վնասակար դեղորայքն ու թմրանյութերը: Քաջություն ունեցեք անջատելու տեսահոլովակը կամ խաղը, հեռանալ ֆիլմից կամ պարից, փոխել երաժշտությունը կամ հեռանալ այն ամենից, ինչը ներդաշնակ չէ Հոգուն: (Երիտասարդներին զորացնելու համար. Ընտրություններ կատարելու ուղեցույց [2022 թ․], 18)

Ինչպե՞ս կարող եմ հույսով նայել ապագային։

Նախագահ Ռասսել Մ. Նելսոնն ուսուցանել է․

Հավատքով ընդունել ապագան

Նախագահ Նելսոնն ուսուցանում է, որ մենք պետք է նյութապես, հոգևորապես և հուզականորեն պատրաստվենք ապագային:

Ես չեմ ասում, որ առաջիկա օրերը հեշտ կլինեն, բայց ես խոստանում եմ ձեզ, որ ապագան փառավոր կլինի նրանց համար, ովքեր պատրաստ են և շարունակում են պատրաստվել, որպեսզի գործիքներ դառնան Տիրոջ ձեռքում: (Ռասսել Մ․ Նելսոն, «Հավատքով ընդունել ապագան», Լիահոնա, նոյ․ 2020, 76)

Օժանդակ ուսումնական վարժություններ

Ինչպե՞ս առաջնորդվեմ Հոգու կողմից։

Ավելի մանրամասն պատկերացնելու համար, թե ինչպես կարելի է վերցնել Հոգուն որպես ուղեցույց, կարող եք դիտել հետևյալ տեսանյութը, որը նկարագրում է կորեական պատերազմի ժամանակ Սուրբ Հոգուն որպես իր ուղեցույց վերցնելու՝ կրտսեր լեյտենանտ Բլերի փորձառությունը:

Վերցրեք Սուրբ Հոգին որպես ձեզ առաջնորդ

Երեց Ուիլսոնն ուսուցանում է սկզբունքներ, որոնք առաջնորդում են Սուրբ Հոգու միջոցով Տիրոջից անձնական հայտնություն ստանալուն:

Մինչև տեսանյութը դիտելը կարող եք ցուցադրել երեք կարևոր ուղեցույց, որ տվել է նախկինում Յոթանասունից Երեց Լարի Յ. Ուիլսոնն այն մասին, թե ինչպես ավելի հաճախ ստանալ Հոգու ուղղորդումը։ Առաջարկեք ուսանողներին փնտրել այդ ուղեցույցների ապացույցները կրտսեր լեյտենանտ Բլերի պատմության մեջ:

«Առաջինը, երբ խոսքը վերաբերում է հայտնությանը, մենք պետք է պատշաճորեն հարմարեցնենք մեր ընդունիչը երկնքի հաճախականության հետ: … Երկրորդը, կրտսեր լեյտենանտ Բլերը չխնդրեց Տիրոջը պարզապես լուծել իր խնդիրը: Նա հարցրեց, թե լուծման մասը լինելու համար ի՞նչ կարող է ինքը անել։ … [Երրորդ,] կարո՞ղ էր նա աղոթել այդպիսի հանգիստ համոզվածությամբ, եթե նախորդ առիթներով ստացած չլիներ առաջնորդություն: Երբ փոթորիկը վրա է հասնում, ժամանակ չէ Սուրբ Հոգու պարգևը հիշելու համար և պարզելու՝ թե ինչպես օգտագործել այն»։ (Լարի Յ. Վիլսոն, «Վերցրեք Սուրբ Հոգին՝ որպես ձեզ ուղեցույց», Լիահոնա, մայիս 2018 թ․, 76)

Երիտասարդներին զորացնելու համար

Նշեք, որ Վարդապետություն և Ուխտեր 45.57 հատվածը տեղադրված է Երիտասարդներին զորացնելու համար գրքույկի «Կատարեք ոգեշնչված ընտրություններ» բաժնում (տես էջ 4–5)։ Կարող եք բաժանել Երիտասարդներին զորացնելու համար գրքույկի բաժինները և հանձնարարել դրանք ուսանողներին կամ ուսանողների խմբերին: Առաջարկեք նրանց կարդալ իրենց բաժինը և գտնել տրված հրավերները։ Խնդրեք նրանց քննարկել, թե այս հրավերներին հնազանդվելը ինչո՞ւ հնարավորություն կտա նրանց վերցնել Սուրբ Հոգուն որպես իրենց ուղեցույց և կանգնել սուրբ տեղերում:

Դասը սկսելու այլընտրանքային եղանակ․ Տասը կույսերի առակը

They that are Wise

(D&C 45:56-57) This video depicts the parable of the ten virgins, through which the Savior helps the disciples understand why and how to prepare for His Second Coming.

Կարդացեք Վարդապետություն և Ուխտեր 45․56–57 հատվածները և նշեք այն բաները, որոնք կարող է խորհրդանշել լամպի յուղը: Առաջարկեք ուսանողներին կիսվել, թե ինչ կզգային նրանք, եթե լինեին հինգ իմաստուն կույսերի մեջ, և ինչպես կարող էին այդ զգացմունքները հակադիր լինել հինգ հիմար կույսերի զգացմունքներին: Քննարկեք, թե յուրաքանչյուր կույսի պատրաստվածությունը կամ պատրաստվածության բացակայությունն ինչպես ազդեց փեսացուի գալու ժամանակ նրանց ունեցած փորձառության վրա: