“Lēsoni 60—Tokāteline mo e Ngaahi Fuakava 45:9–75, Konga 2: Ko e Teuteu ki he Hāʻele ʻAnga Ua Maí,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 45:9–75, Konga 2,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 60: Tokāteline mo e Ngaahi Fuakava 45
Tokāteline mo e Ngaahi Fuakava 45:9–75, Konga 2
Ko e Teuteu ki he Hāʻele ʻAnga Ua Maí
ʻE toe hāʻele mai ʻa Sīsū Kalaisi ki he māmaní “kuo kofu ʻaki ʻa e mālohi mo e nāunau lahi” ke fakahoko ʻa e ngaahi talaʻofa kuó Ne folofola ʻakí (Tokāteline mo e Ngaahi Fuakava 45:44; vakai foki, veesi 16). ʻI he Tokāteline mo e Ngaahi Fuakava 45, ʻoku akoʻi ʻe he Fakamoʻuí ʻi he ʻofa ʻa e founga te tau lava ai ʻo teuteu ki Heʻene Hāʻele ʻAnga Ua Maí. Ko e taumuʻa ʻo e lēsoni ko ʻení ke tokoni ki he kau akó ke teuteu ki he Hāʻele ʻAnga Ua Mai ʻa Sīsū Kalaisí.
Ngaahi ʻEkitivitī Ako ʻOku Ala Fakahokó
Ko e teuteu ki he ngaahi meʻa mahuʻinga ʻe hokó
Fakakaukau ke hiki ʻi he palakipoé (pe fakaʻaliʻali ha fakatātā ʻo e) ngaahi meʻa ʻoku fiemaʻu ke fai ki ai ha teuteu ʻa ia ʻoku kau pe ʻe kau ki ai hoʻo kau akó. ʻE lava ke kau ʻi he ngaahi sīpingá ʻa e ngaahi sivi fakaakó, fakaʻosi akó, ngāue fakafaifekau taimi kakató, pe ha polokalama sipoti. ʻEke ange ki he kau akó pe ko e hā ʻoku faitatau ai ʻa e ngaahi meʻa ko ʻení.
Fakakaukau ki ha ngaahi meʻa, ngaahi ngāue, pe ngaahi fatongia ʻi hoʻo moʻuí ʻoku fiemaʻu ki ai ha teuteu. ʻI hoʻo fai iá, fakakaukau ki ha aʻusia naʻe ʻikai ke ke mateuteu ai pea mo ha aʻusia naʻá ke mateuteu ai.
-
Naʻe liliu fēfē ʻe he tuʻunga hoʻo teuteú ʻa e ongo naʻá ke maʻu ʻi he fakaofi atu ki he ʻekitivitií? Naʻá ne liliu fēfē nai ʻa e olá?
ʻE hoko ʻa e Hāʻele ʻAnga Ua Mai ʻa Sīsū Kalaisí ko ha meʻa he ʻikai tatau mo ha toe meʻa kuo tau aʻusia. ʻE lava ke fakapapauʻi ʻe heʻetau teuteu ki he meʻa ko iá ʻa e ongo ʻoku tau maʻu ʻi heʻetau fakakaukau atu ki Heʻene liuaki maí, pea ʻe makatuʻunga mei ai ʻa e aʻusia te tau maʻu ʻi Heʻene liuaki maí.
Fakakaukau ke fakaafeʻi ʻa e kau akó ke aleaʻi tautau toko ua pe ʻi ha fanga kiʻi kulupu iiki ʻa e ongo fehuʻi ko ʻení. (Te ke lava ʻo fakamanatu ange kiate kinautolu ʻa e ngaahi fakaʻilonga naʻa nau ako ʻi he “Tokāteline mo e Ngaahi Fuakava 45:9–75, Konga 1.”)
-
Ko e hā ʻokú ke ʻilo fekauʻaki mo e ngaahi meʻa ʻe hoko kimuʻa ʻi he Hāʻele ʻAnga Ua Mai ʻa e Fakamoʻuí?
-
Mei he meʻa ʻokú ke ʻilo fekauʻaki mo ʻEne Hāʻele ʻAnga Ua Maí, ko e hā ka ke ka fie mateuteu ai ki aí?
Lolotonga hoʻo lau pe ko ha taha ʻe loto-fiemālie ke ne lau ʻa e veesi mo e fakamatala ko ʻení, tuku ke kuikui ʻa e kau akó mo sioloto pe ʻe fēfē ʻa e liuaki mai ʻa e Fakamoʻuí.
Lau ʻa e Tokāteline mo e Ngaahi Fuakava 45:44 pea mo e lea ko ʻeni ʻa ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻo kumi pe ʻe fēfē nai ʻa e Hāʻele ʻAnga Ua Mai ʻa e Fakamoʻuí.
ʻOku ʻikai ha meʻa te ne fakaʻaiʻai ʻeku loto-holi ke lea ʻo kau kia Kalaisí ka ko ʻeku fakakaukauloto ki Heʻene liuaki maí. Neongo ʻoku ʻikai ke tau ʻiloʻi ʻa e taimi te Ne hāʻele mai aí, ka ʻe fakaholomamata ʻa e ngaahi meʻa ʻe hoko ʻi Heʻene liuaki maí! Te Ne hāʻele mai ʻi he ngaahi ʻao ʻo e langí ʻi he fakaʻeiʻeiki mo e nāunauʻia fakataha mo ʻEne kau ʻāngelo māʻoniʻoní. ʻO ʻikai ko ha kau ʻāngelo pē ʻe niʻihi ka ko e kotoa ʻEne kau ʻāngelo māʻoniʻoní. (Neil L. Andersen, “ʻOku Mau Lea ʻia Kalaisi,” Liahona, Nōvema 2020, 91)
-
ʻE tokoni fēfē nai ʻa e mahino ʻa e fōtunga ʻo e Hāʻele ʻAnga Ua Mai ʻa e Fakamoʻuí ke fakaʻaiʻai koe ke ke teuteu ki aí?
Fakakaukau ke fakaafeʻi ʻa e kau akó ke fakafehokotaki ʻa e Tokāteline mo e Ngaahi Fuakava 45:44 ki he potufolofola fakataukei fakatokāteline ʻi he Tokāteline mo e Ngaahi Fuakava 29:10–11.
Mahalo te ke fie tā ʻa e meʻafua ko ʻení ʻi he palakipoé pea fakaafeʻi ʻa e kau akó ke hiki ʻi heʻenau tohinoa akó ha faʻahinga fakakaukau pe ongo ʻoku nau maʻu ʻi heʻenau fakalaulauloto fakalongolongo ki he founga te nau fakafuofuaʻi ai kinautolú.
Ki ha ngaahi founga kehekehe, fakakaukau ke fetongi ʻa e ngaahi mataʻifika ʻi he meʻafuá ʻaki ha emojis pe ngaahi fakatātā kehe ʻoku nau fakahaaʻi ha ngaahi ongo fakaeloto.
ʻI hono fakaʻaongaʻi ʻo e meʻafua ko ʻení, ko e hā hoʻo fakafuofua ki ho tuʻunga loto-falalá ʻi he ngaahi fakamatala ko ʻení?
-
ʻOku ou ʻilo ʻa e founga ke teuteu ai ki he Hāʻele ʻAnga Ua Mai ʻa e Fakamoʻuí.
-
ʻOku ou ongoʻi mateuteu ʻaupito ki he Hāʻele ʻAnga Ua Mai ʻa e Fakamoʻuí.
Ko e Teuteu ki he Hāʻele ʻAnga Ua Mai ʻa Sīsū Kalaisí
ʻE ala tokoni ke vahevahe mo e kau akó ʻoku akoʻi ʻi he Tokāteline mo e Ngaahi Fuakava 38:30 “kapau te mou mateuteu, ʻe ʻikai te mou manavahē.” ʻE lava ke tokoniʻi kitautolu ʻe he lēsoni ʻo e ʻaho ní ke tau ikunaʻi ʻetau manavaheé ʻaki ʻetau tokanga taha ki ha founga ʻe ua te tau lava ai ʻo teuteu ki he Hāʻele ʻAnga Ua Maí. Fakakaukau ke hiki ʻi he palakipoé ʻa e “Te u lava ʻo teuteu ki he Hāʻele ʻAnga Ua Mai ʻa Sīsū Kalaisí ʻaki ʻeku .” ʻI hono ako ʻe he kau akó ʻa e ngaahi veesi ko ʻení, fakaafeʻi kinautolu ke hiki ha ngaahi kupuʻi lea ke fakaʻosi ʻaki ʻa e sētesi ʻi he palakipoé.
Lau ʻa e Tokāteline mo e Ngaahi Fuakava 45:9, 32, 39, 57, 71, ʻo kumi ha founga ʻoku fakaafeʻi ai kitautolu ʻe he Fakamoʻuí ke teuteu ki Heʻene Hā‘ele ‘Anga Ua Maí.
Mahalo ʻe tokoni ke fakamahinoʻi ange ʻa e mahuʻinga ʻo hono tauhi ʻetau ngaahi fuakava mo e Fakamoʻuí ʻi he teuteu ki Heʻene liuaki maí (vakai, veesi 9).
Neongo ʻoku ʻi he vahe 45 ha ngaahi founga lahi ʻoku fakaafeʻi ai kitautolu ʻe he Fakamoʻuí ke tau teuteu ki Heʻene hāʻele maí, ka ʻe nofotaha ʻa e toenga ʻo e lēsoni ko ʻení ʻi he moʻoni ko ia te tau lava ʻo teuteu ki he Hāʻele ʻAnga Ua Mai ʻa Sīsū Kalaisí ʻaki ʻetau tuʻu ʻi he ngaahi potu toputapú mo maʻu ʻa e Laumālie Māʻoniʻoní ke tataki kitautolu.. Ongoʻi tauʻatāina ke fakatefito ʻi ha ngaahi founga kehe ke teuteu aí ʻo fakatatau ki he ngaahi meʻa ʻoku mahuʻingaʻia ai mo fiemaʻu ʻe he kau akó.
Tuʻu ʻi he ngaahi potu toputapú pea maʻu ʻa e Laumālie Māʻoniʻoní ke hoko ko hotau fakahinohino
Fakakaukau ke vahevahe ʻa e kau akó ki ha ngaahi kulupu pea ʻoange ki he kulupu takitaha ha tatau ʻo e laʻipepa tufa ko ʻení. ʻE lava ke ako ʻe he ngaahi kulupú ha konga ʻe taha pe fakatouʻosi ʻo e laʻipepa tufá. ʻI he ngāue ʻa e ngaahi kulupú, fakakaukau ke kole ki hanau niʻihi ke teuteu ke vahevahe ʻa e meʻa naʻa nau maʻú mo e kalasí ʻi he ʻosi e ngāue ʻa e tokotaha kotoa pē.
Ko e Teuteu ki he Hāʻele ʻAnga Ua Maí
Tuʻu ʻi he ngaahi potu toputapú
Lau ʻa e ngaahi potufolofola mo e fakamatala ko ʻení, ʻo kumi ʻa e ngaahi founga te tau lava ai ʻo fili ke tuʻu ʻi he ngaahi potu toputapú.
Saame 24:3–4; ʻĪsaia 58:13; Hilamani 5:12; 3 Nīfai 18:24; Tokāteline mo e Ngaahi Fuakava 27:15; 115:5–6
Naʻe fakamatalaʻi ʻe Sisitā ʻAni M. Tipi ʻo e Kau Palesitenisī Lahi ʻo e Kau Finemuí:
Naʻe naʻinaʻi mai ʻa Palesiteni ʻEselā Tafu Penisoni ʻo pehē, “ʻOku kau ʻa e ngaahi potu toputapú hotau temipalé, falelotú, ngaahi ʻapí pea mo e ngaahi siteiki ʻo Saioné, ʻa ia ‘ko ha maluʻanga, mo ha ungaʻanga.’ [Tokāteline mo e Ngaahi Fuakava 115:6]” [“Prepare Yourself for the Great Day of the Lord,” New Era, May 1982, 50]. Makehe mei he ngaahi meʻá ni, ʻoku ou tui ʻe lava ke tau takitaha maʻu mo ha ngaahi potu toputapu lahi ange. Mahalo te tau tomuʻa fakakaukau ki he foʻi lea feituʻú ko ha ʻātakai fakatuʻasino pe feituʻu fakasiokālafi. Ka ʻe lava ke lau ko ha feituʻu “ha tūkunga mahino, tuʻunga, pe ko ha fakakaukau” [Merriam-Webster Online, “place,” merriam-webster.com/dictionary/place]. ʻOku ʻuhinga ʻeni ʻe lava ke fakakau ʻi he ngaahi feituʻu toputapú ha taimi makehe—ʻa e taimi ʻoku fakamoʻoni mai ai ʻa e Laumālie Māʻoniʻoní kiate kitautolú, taimi ʻoku tau ongoʻi ai ʻa e ʻofa ʻa e Tamai Hēvaní, pe taimi ʻoku tau maʻu ai ha tali ki heʻetau lotú. Pea mahulu atu aí, ʻoku ou tui ko e taimi pē ʻokú ke loto toʻa ai ke taukaveʻi ʻa e totonú, tautautefito ʻi he ngaahi tūkunga ʻoku ʻikai loto-fiemālie ai ha taha ke fai iá, ʻokú ke fokotuʻu ha feituʻu toputapu. (Ann M. Dibb, “Ko Homou Feituʻu Toputapú,” Liahona, Mē 2013, 115)
Maʻu ʻa e Laumālie Māʻoniʻoní ko hotau faifakahinohino
Lau ʻa e ngaahi potufolofola mo e fakamatala ko ʻení, ʻo kumi ʻa e ngaahi founga te tau lava ai ʻo maʻu ʻa e Laumālie Māʻoniʻoní ke hoko ko hotau faifakahinohinó.
Lea Fakatātā 3:5–6; Saame 118:8–9; 1 Nīfai 4:6; 2 Nīfai 32:5; Molonai 10:5; Tokāteline mo e Ngaahi Fuakava 11:12–14
Naʻe akonaki ʻa Palesiteni Tāleni H. ʻOakesi ʻo e Kau Palesitenisī ʻUluakí ʻo pehē:
ʻOku founga fēfē nai ʻetau maʻu ʻa e Laumālie Māʻoniʻoní ko hotau faifakahinohinó? Kuo pau ke tau fakatomala mei heʻetau ngaahi angahalá ʻi he uike takitaha pea fakafoʻou ʻetau ngaahi fuakavá ʻi hono maʻu ʻa e sākalamēnití ʻaki ha nima mo ha loto maʻa, ʻo hangē ko ia ʻoku fekauʻi kitautolu ke faí [vakai, Tokāteline mo e Ngaahi Fuakava 59:8–9, 12]. Ko e founga pē ʻeni ʻe lava ke tau maʻu ai ʻa e palōmesi fakalangi ko ia ʻe “ʻiate [kitautolu] maʻu ai pē ʻa hono Laumālié” [Tokāteline mo e Ngaahi Fuakava 20:77]. …
… Kuo pau ke tau fai maʻu pē ʻa e ngaahi meʻa ʻoku fiemaʻu ke pukepuke ʻaki ʻa e Laumālie ko iá. Kuo pau ke tau tauhi ʻa e ngaahi fekaú, lotua ha fakahinohino, pea maʻulotu mo maʻu ʻa e sākalamēnití ʻi he Sāpate kotoa pē. Pea kuo pau ke ʻoua naʻa tau teitei fai ha meʻa ke tuli ai ʻa e Laumālie ko iá. ʻOku totonu ke tau fakaʻehiʻehi mei he ponokalafí, kava mālohí, tapaká mo e faitoʻo konatapú, pea fakaʻehiʻehi maʻu pē mei hono maumauʻi ʻa e fono ʻo e angamaʻá. (Dallin H. Oaks, “Be Not Deceived,” Liahona, Nov. 2004, 46)
-
Ko e hā ha ngaahi fakakaukau pe ongo naʻe makehe kiate koe ʻi hoʻo akó?
-
ʻE teuteuʻi fēfē nai kitautolu ki he Hāʻele ʻAnga Ua Mai ʻa Sīsū Kalaisí ʻi hono fakahoko ʻo e ngaahi meʻa ko ʻení?
Fili ha taha ʻo e ongo kongá mei he laʻipepa tufá. Hiki ʻi he tuʻa ʻo e laʻipepa tufá ha founga pau ʻe ua pe tolu ʻe lava ke fakaʻaongaʻi ai ʻe he toʻu tupú ʻa e ngaahi akonaki ʻi he konga ko ʻení ʻi heʻenau moʻuí.
Fakakaukau ke kole ki he ngaahi kulupú ke fakapipiki takai ʻenau ʻū laʻipepa tufá ʻi he loki akó kae fakahanga ki tuʻa ʻa e konga ki mui ʻo e ʻū laʻipepa tufá. Fakaafeʻi ʻa e kau akó ke lue takai ʻi he loki akó ʻo lau ʻa e ngaahi fakakaukau kehekehe ki hono fakaʻaongaʻí. Ko e founga ʻe tahá ko e fakafetongi pepa ʻa e ngaahi kulupú.
Fili ha ngāue ʻe taha ʻokú ke ongoʻi ʻe ʻaonga kiate koe ke ke fakaʻaongaʻi ʻi hoʻo moʻuí.
-
Ko e hā te ke lava ʻo fai ke fakahoko ai ʻa e ngāue ko ʻení ʻi hoʻo moʻuí?
-
ʻE tokoni fēfē nai hoʻo fai ʻení ke ke teuteu ai ki he Hāʻele ʻAnga Ua Mai ʻa e Fakamoʻuí?
Fakaafeʻi ʻa e kau akó ke vahevahe ʻa e meʻa naʻa nau ako mo ongoʻi lolotonga ʻa e lēsoní. Fakaafeʻi kinautolu ke ngāueʻi ʻenau ngaahi fakakaukaú mo e ongó. Ke fakaʻosí, fakakaukau ke toe fakaʻaliʻali ʻa e meʻafua ʻo e siví mei he konga kimuʻa ʻo e lēsoní. Fakaafeʻi ʻa e kau akó ke toe vakaiʻi ʻenau tuʻunga loto-falala ʻi he teuteu ki he Hāʻele ʻAnga Ua Mai ʻa e Fakamoʻuí.