“Lēsoni 64—Tokāteline mo e Ngaahi Fuakava 49: Ko e Mali ʻi he vā ʻo ha Tangata mo ha Fefine ko e Tuʻutuʻuni ia ʻe he ʻOtuá,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 49,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 64: Tokāteline mo e Ngaahi Fuakava 49–50
Tokāteline mo e Ngaahi Fuakava 49
Ko e Mali ʻi he vā ʻo ha Tangata mo ha Fefine ko e Tuʻutuʻuni ia ʻe he ʻOtuá
Naʻe lahi ha ngaahi fakakaukau mo ha ngaahi tukufakaholo hala ʻi he kamata ʻa hono Fakafoki Mai ʻo e Ongoongoleleí. Naʻe fakatonutonu ʻe he Fakamoʻuí ʻi he ʻofa ʻa e ngaahi fakakaukau halá mo fakamahinoʻi ʻa e ngaahi tefitoʻi tokāteline ʻoku mahuʻinga ki hotau fakamoʻuí, hangē ko e nofo-malí mo e fāmilí. ʻOku fakataumuʻa ʻa e lēsoni ko ʻení ke tokoni ke mahino ki he kau akó ʻa e mahuʻinga ʻo e nofo-malí mo e fāmilí ʻi he palani ʻa e Tamai Hēvaní.
Ngaahi ʻEkitivitī Ako ʻOku Ala Fakahokó
Ko e taumuʻa ʻo e māmaní
Ke kamata ʻa e kalasí, fakakaukau ke fakaʻaliʻali ha ngaahi ʻata ʻokú ne fakahaaʻi ʻa e meʻa ʻokú ke saiʻia ai fekauʻaki mo e māmaní. ʻEke ki he kau akó ha ngaahi fehuʻi hangē ko ʻení:
-
Ko e hā ʻokú ke saiʻia ai fekauʻaki mo e māmaní?
-
Ko hai naʻá ne fakatupu ʻa e māmaní? (vakai, Mōsese 1:33; ʻĒpalahame 3:22–24).
-
Ko e hā ha ngaahi ʻuhinga naʻe fakatupu ai ʻe Sīsū Kalaisi ʻa e māmaní?
ʻOku ngalingali ʻe ʻi ai ha ngaahi tali kehekehe ʻa e kau akó ki he fehuʻi fakaʻosí. Fakamālōʻia kinautolu ʻi heʻenau ngaahi talí. Kapau he ʻikai talanoa ʻa e kau akó fekauʻaki mo e nofo-malí pe fāmilí, talaange naʻe ʻomi ʻe Palesiteni Lāsolo M. Nalesoni ha toe ʻuhinga kehe ki hono fakatupu ʻo e māmaní. Vahevahe ʻa e fakamatala ko ʻení. Hili hono lau ʻa e fakamatalá, fakakaukau ke kole ki he kau akó ke vahevahe ʻenau ngaahi fakakaukau ki aí. Poupouʻi kinautolu ke kumi ha fakamoʻoni ʻokú ne poupouʻi ʻa e fakamatala ko ʻení ʻi he kotoa ʻo e lēsoní.
ʻI hono fakamatalaʻi fakanounou mahino ngofuá, naʻe fakatupu ʻa e māmaní koeʻuhí ke ʻi ai ʻa e ngaahi fāmilí. (Russell M. Nelson, “The Creation,” Ensign, May 2000, 85)
“Kuo tuʻutuʻuni ʻe he ʻOtuá ʻa e nofo-malí”
ʻE nofotaha ʻa e lēsoni ko ʻení ʻi he Tokāteline mo e Ngaahi Fuakava 49:15–17 pea mo e tokāteline ʻo e nofo-malí mo e fāmilí. Kapau ʻe ʻaonga ki he kau akó hano aleaʻi ha ngaahi tefito kehe ʻoku ʻi he vahe ko ʻení, fakakaukau ke fakaʻaongaʻi ʻa e konga “Ngaahi ʻEkitivitī Fakalahi ki he Akó” ʻi he lēsoni ko ʻení.
Hili pē ha taimi nounou mei he kamata ke nofo ʻa e Kāingalotú ʻi Ketilani, ʻOhaioó, naʻe fiemaʻu ʻe ha papi ului foʻou ko Līmani Kopelī ha kau faifekau ke malanga ʻaki ʻa e ongoongoleleí ki he kau mēmipa ʻo ʻene kulupu lotu kimuʻá, ʻa e kau Sieká. Naʻe tui ʻa e kau Sieká kuo ʻosi hoko ʻa e Hāʻele ʻAnga Ua Maí pea naʻe hā mai ʻa Kalaisi ko ha fefine ko ʻAna Lī. Naʻa nau fakafisingaʻi ʻa e nofo-malí pea tapui ʻe ha kau Sieka ʻe niʻihi ʻa e kai kakanoʻi manú. Naʻe kole ʻa e Palōfita ko Siosefa Sāmitá ki he ʻEikí ha fakamatala fakamahino pea maʻu ai ʻa e Tokāteline mo e Ngaahi Fuakava 49. Naʻe fakahinohinoʻi ʻe he ʻEikí ʻa Sitenei Likitoni, Paʻale P. Pālati, mo Līmani Kopelī ke ʻave ʻa e fakahaá ki he kau Sieká pea malanga ʻaki ʻa e moʻoní kiate kinautolu.
Ko e Tokāteline mo e Ngaahi Fuakava 49:15–17 ko ha potufolofola fakataukei fakatokāteline ia. Fakakaukau ke fakaafeʻi ʻa e kau akó ke nau fakaʻilongaʻi ʻa e ngaahi potufolofola fakataukei fakatokāteliné ʻi ha founga makehe koeʻuhí ke nau lava ʻo maʻu ngofua kinautolu.
Lau ʻa e Tokāteline mo e Ngaahi Fuakava 49:15–17, ʻo kumi ʻa e ngaahi akonaki ʻa Sīsū Kalaisi fekauʻaki mo e nofo-malí mo e fāmilí.
-
Ko e hā ha ngaahi fehuʻi ʻokú ke maʻu fekauʻaki mo e ngaahi vēsí?
-
Te tau fakamatalaʻi fakanounou fēfē nai ʻa e ngaahi akonaki ʻa e Fakamoʻuí mei he ngaahi veesi ko ʻení?
Fakakaukau ke ʻoange ha ngaahi miniti siʻi ki he kau akó ke nau fakakaukau ai ki ha fakamatala fakanounou. Fakaafeʻi leva ha niʻihi ke hiki ʻenau ngaahi fakamatalá ʻi he palakipoé. Ke lavameʻa ʻa e kau akó, mahalo naʻa fiemaʻu ke ke tokoni ke fakamahinoʻi ha niʻihi ʻo e ngaahi kupuʻi lea mei he ngaahi vēsí. Tokoniʻi kinautolu ke nau ʻilo ha ngaahi moʻoni hangē, ko e mali ʻi ha vā ʻo ha tangata mo ha fefine naʻe tuʻutuʻuni ia ʻe he ʻOtuá, pea ʻoku fekauʻi ʻa e ngaahi uaifí mo e husepānití ke na hoko ʻo taha pē pea fanafanau.
-
Ko e hā naʻe mahuʻinga ai ke mahino ʻa e ngaahi moʻoni ko ʻení ki he kau Sieká mo e niʻihi kehe ʻi he kuonga ʻo Siosefa Sāmitá?
Mahalo te ke fie fakamahinoʻi ange naʻe tui ʻa e kau Sieká ki he nofo taʻe-malí, pe fakaʻehiʻehi mei he malí mo e fetuʻutaki fakasekisualé. Hili iá, ʻe lava ke mou aleaʻi ʻa e ngaahi tui angamaheni ʻi hotau kuongá ʻoku fakatupu ke fakafisingaʻi ʻe he kakaí ʻa e malí. ʻE lava ke ke fakaʻaongaʻi ha fehuʻi ʻe taha pe fakatouʻosi ʻo e ongo fehuʻi ko ʻení.
-
Ko e hā ha ngaahi tui fakamāmani ʻoku nau fakatupu ke fakasītuʻaʻi ʻe he kakaí ʻa e malí ʻi hotau kuongá ni?
-
Ko e hā ha fakamoʻoni kuó ke mamata ai ki he feinga ʻa Sētane ke liliu pe fakaʻauha ʻa e toputapu ʻo e nofo-malí mo e fāmilí ʻi he palani ʻa e Tamai Hēvaní?
ʻE lava ke tokoni ʻa e laʻipepa tufa ko ʻení ke mahino lelei ange ki he kau akó ʻa e ngaahi akonaki ʻa e Fakamoʻuí ki he nofo-malí mo e fāmilí. Mahalo te ke fie fakaafeʻi ʻa e kau akó ke fekumi ʻi heʻenau akó ki ha fakamoʻoni fakalaumālie ki hono mahuʻinga ʻo e nofo-malí mo e fāmilí. Te ke lava ʻo vaeua ʻa e kalasí pea vahe ki he vaeua takitaha ke nau ako ha vahe ʻe taha ʻo e laʻipepa tufá ʻiate kinautolu pē. Hili ha taimi feʻunga, ʻai ke tauhoa ʻa e tokotaha ako takitaha mo ha taha mei he vaeua ʻe taha ʻo e kalasí. Fakaafeʻi kinautolu ke fevahevaheʻaki ʻa e meʻa naʻa nau akó pea ke nau talanoa fekauʻaki mo e ngaahi fehuʻi ke aleaʻí.
ʻOku Tuʻutuʻuni ʻe he ʻOtuá ʻa e Malí mo e Fāmilí
Ko e mali ʻi he vā ʻo ha tangata mo ha fefiné
Ako:
Lau ʻa e Maʻake 10:6–9; 1 Kolinitō 11:11; pea mo e lea ko ʻeni ʻa Sisitā Poni L. ʻOsikasoni, ko e Palesiteni Lahi mālōlō ʻo e Kau Finemuí. Kumi ha ngaahi akonaki fekauʻaki mo e mali ʻi he vahaʻa ʻo ha tangata mo ha fefiné.
ʻOku akoʻi kitautolu ʻi he folofolá, “Ka ko ʻeni ʻoku ʻikai ai ʻa e tangatá kae ʻi he fefiné, pea ʻoku ʻikai ai ʻa e fefiné kae ʻi he tangatá, ʻi he ʻEikí” [1 Kolinitō 11:11]. Ke maʻu kakato ʻe ha taha ʻa e ngaahi tāpuaki ʻo e lakanga fakataulaʻeikí, kuo pau ke ʻi ai ha husepāniti mo ha uaifi kuo silaʻi ʻi he fale ʻo e ʻEikí, ngāue fakataha ʻi he angatonu mo tauhi faivelenga ʻena ngaahi fuakavá. Ko e palani ʻeni ʻa e ʻEikí ki Heʻene fānaú, pea he ʻikai hanga ʻe ha lahi ʻo ha malanga ki he kakaí pe fakaanga, ʻo liliu ʻa e meʻa kuo folofola ʻaki ʻe he ʻEikí. … Tuku ke tau taukapoʻi ʻa e nofo-malí ʻo hangē ko ia kuo fakanofo ʻe he ʻEikí kae kei fakahaaʻi ʻa e ʻofa mo e manavaʻofa kiate kinautolu ʻoku kehe ʻenau vakaí. (Bonnie L. Oscarson, “Kau Taukapo ʻo e Fanongonongo ki he Fāmilí,” Liahona, Mē 2015, 15–16)
Aleaʻi:
-
ʻOku tokoni fēfē nai ʻa e mali ʻi he vā ʻo ha fefine mo ha tangata ke fakahoko ʻa e “palani ʻa e Fakamoʻuí ki he ikuʻanga taʻengata ʻo ʻEne fānaú”? (“Ko e Fāmilí: Ko ha Fanongonongo ki Māmani,” ChurchofJesusChrist.org).
-
ʻE founga fēfē nai ʻetau fakahaaʻi ʻa e manavaʻofá kiate kinautolu ʻoku kehe ʻenau vakaí kae kei taukapoʻi pē ʻa e tokāteline ʻa e Fakamoʻuí fekauʻaki mo e malí ʻi he vahaʻa ʻo ha tangata mo ha fefiné?
“Fakatokolahi mo fakakakai ʻa māmani”
Ako:
Lau ʻa e Sēnesi 1:27–28; Saame 127:3; Maʻake 10:13–14; pea mo e lea ko ʻeni ʻa ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá. Fekumi ki he ngaahi akonaki ʻa e ʻEikí fekauʻaki mo e fānaú.
ʻI he taimi ʻoku tau vakai ai ki he fofonga ʻo e fānaú, ʻoku tau sio ai ki ha foha pe ʻofefine ʻo e ʻOtuá naʻe tuʻu fakataha mo kitautolu ʻi he maama fakalaumālié.
Ko ha faingamālie fisifisimuʻa ia ʻo ha husepāniti mo ha uaifi ʻokú na lava ke fāʻeleʻi ha fānau pea foaki ha sino fakamatelie maʻá e fānau fakalaumālie ko ʻeni ʻo e ʻOtuá. ʻOku tau tui ki he ngaahi fāmilí pea ʻoku tau tui ki he ʻi ai ʻa e fānaú.
ʻI he taimi ʻoku fāʻeleʻi mai ai ha fānau ki ha husepāniti mo ha uaifi, ʻokú na fakahoko ʻa e konga ʻo e palani ʻa ʻetau Tamai Hēvaní ke ʻomi ha fānau ki he māmaní. Naʻe folofola ʻa e ʻEikí, “Ko ʻeku ngāué ʻeni mo hoku nāunaú—ke fakahoko ʻa e moʻui taʻe-faʻa-maté mo e moʻui taʻengata ʻa e tangatá” [Mōsese 1:39]. Kimuʻa ʻi he moʻui taʻe-faʻa-maté, kuo pau ke ʻi ai ʻa e moʻui fakamatelié. (Neil L. Andersen, “Fānaú,” Liahona, Nōvema 2011, 28)
Aleaʻi:
-
ʻE tokoni fēfē nai ʻa e vakai ki he fānaú mo e fāmilí ʻaki ha fakakaukau ʻoku taʻengatá ki ha ongomeʻa mali ke na fakamahuʻingaʻi ha niʻihi ʻo ʻena ngaahi filí?
-
Ko e hā te tau lava ʻo ako mei he sīpinga ʻa e Fakamoʻuí fekauʻaki mo e founga ʻoku tau feohi mo fengāueʻaki ai mo e fānaú?
Fakakaukau ke ʻoange ha taimi ki he kau akó ke nau fakamatalaʻi ai ʻa e fatongia ʻo e nofo-malí mo e fāmilí ʻi he palani ʻa e Tamai Hēvaní. Te nau lava ʻo fili ha taha ʻo e ngaahi tui fakamāmani fekauʻaki mo e malí naʻe aleaʻi kimuʻá pea fakaʻaongaʻi ʻa e tokāteline ʻa e Fakamoʻuí ʻoku akoʻi ʻi he Tokāteline mo e Ngaahi Fuakava 49:15–17 ke fakatonutonu ʻaki ʻa e tui ko iá.
Mahalo te ke fie vahevahe hoʻo fakamoʻoní fekauʻaki mo e founga kuo faitāpuekina ai hoʻo moʻuí ʻe he tokāteline ʻa e Fakamoʻuí ki he nofo-malí mo e fāmilí. ʻE lava foki ke vahevahe ʻe he kau akó ʻenau ngaahi aʻusiá mo e fakamoʻoní.
Fakakaukau ke fakaafeʻi ʻa e kau akó ke lekooti ha ngaahi ongo kuo nau maʻu fekauʻaki mo e mahuʻinga ʻo e nofo-malí mo e fāmilí ʻi he palani ʻa e Tamai Hēvaní.