“Lēsoni 65—Tokāteline mo e Ngaahi Fuakava 50, Konga 1: Ko e Fakaʻehiʻehi mei he Kākaá,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 50, Konga 1,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 65: Tokāteline mo e Ngaahi Fuakava 49–50
Tokāteline mo e Ngaahi Fuakava 50, Konga 1
Ko e Fakaʻehiʻehi mei he Kākaá
ʻI he vēkeveke ʻa ha kau papi ului ʻe niʻihi ʻi Ketilani, ʻOhaiō ke aʻusia ha ngaahi meʻafoaki fakalaumālié, naʻe kākaaʻi ai kinautolu, ke fakakaukau naʻe mei he Laumālie Māʻoniʻoní ha ngaahi fakahā ngalikehe neongo naʻe ʻikai. Naʻe ʻoange ʻe he ʻEikí ha fakahinohino ke tokoni ke nau ʻiloʻi ʻa e meʻa naʻe meiate Iá mo ia naʻe ʻikaí. ʻOku fakataumuʻa ʻa e lēsoni ko ʻení ke tokoni ke mahino ki he kau akó ʻa e founga ʻe lava ke tokoniʻi ai kinautolu ʻe he ʻEikí ke nau ʻiloʻi ʻa e moʻoní pea fakaʻehiʻehi mei he kākaá.
Ngaahi ʻEkitivitī Ako ʻOku Ala Fakahokó
Ko e pusi matohitohí
Fakakaukau ke vahevahe ʻa e talanoa ko ʻení. Te ke lava ʻo fakaʻaliʻali ha fakatātā ʻo ha fanga kiʻi monumanu kinohaʻa (skunk) ʻi hoʻo fakahoko ʻa e talanoá.
Naʻe vahevahe ʻe ʻEletā Keuli E. Sitīvenisoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e talanoá ni:
[Naʻe nofo ʻeku Faʻētangata] ko Kolová … ʻi ha fale ʻi he feituʻu tukuʻutá, ʻo mamaʻo mei kolo. Naʻe fakaʻau ke motuʻa ʻa e Faʻētangata ko Kolová. Naʻá ma fakakaukau ʻoku totonu ke feʻiloaki homa ngaahi fohá mo ia kimuʻa peá ne pekiá. Ko ia ai, ʻi ha hoʻatā efiafi ʻe taha, naʻa mau fakaʻuli lōloa ai ki hono kiʻi [ʻapí]. Naʻa mau tangutu ʻo pōtalanoa fakataha pea fakafeʻiloaki ia ki homa ongo fohá. Naʻe ʻikai fuoloa ʻemau talanoá, kuo fie ʻalu hoku ongo foha taʻu nima mo onó nai, ʻo vaʻinga ʻi tuʻa.
ʻI he fanongo ʻa e Faʻētangata ko Kolová ki heʻena kolé, naʻá ne punou fakahangatonu hifo ki hona fofongá. … Naʻá ne lea kiate kinaua ʻi hono leʻo matolú, “Mo tokanga—ʻoku lahi ha fanga kiʻi monumanu kinohaʻa (skunk) ʻi tuʻa.” ʻI heʻema fanongo mo Lesa ki hení, naʻá ma fuʻu ʻohovale ʻaupito; naʻá ma hohaʻa naʻa pauʻu ʻa e fanga kiʻi monumanú ʻiate kinaua! Naʻe ʻikai fuoloa kuo hū atu ʻa e ongo tamaikí ki tuʻa ʻo vaʻinga, kae hoko atu ʻemau pōtalanoá.
ʻI heʻemau heka ki he kaá kimui ange ke foki ki ʻapí, naʻá ku fehuʻi ange ki he ongo tamaikí, “Naʻá mo sio ki ha monumanu kinohaʻa?” Naʻe tali mai ʻe ha toko taha, “ʻIkai, naʻe ʻikai ke ma sio ki ai, ka naʻá ma sio ki ha kiʻi pusi ʻuliʻuli ʻoku matohi hinehina hono tuʻá!” (Gary E. Stevenson, “ʻOua Naʻá ke Kākaaʻi Au,” Liahona, Nōvema 2019, 93)
-
ʻOkú ke pehē ko e hā naʻe ʻikai fakatokangaʻi ai ʻe he ongo tamaikí ʻa e monumanu kinohaʻá?
-
Ko e hā hono fakatuʻutāmaki ʻo e ʻikai ke fakatokangaʻi ʻa e natula totonu ʻo ha meʻá?
-
ʻOku fekauʻaki fēfē nai ʻa e talanoa ko ʻení mo e meʻa ʻoku fiemaʻu ʻe Sētane ke tau tui ki ai fekauʻaki mo iá?
Fakakaukau ke fakaafeʻi ʻa e kau akó ke ngāue mo ha hoa ke hiki ha fakaʻuhinga ki he foʻi lea kākaá. Hili ʻenau maʻu ha taimi feʻungá, te ke lava ʻo kole ki hanau niʻihi ke vahevahe ʻenau ngaahi fakaʻuhingá mo e kalasí. Kapau ʻe tokoni, fakakaukau ke vahevahe ʻa e fakaʻuhinga ʻoku maʻu ʻi he Fakahinohino ki he Ngaahi Folofolá: “ʻI he folofolá, ko e kākaá pe kākāʻí ʻa hono ngaohi ha taha ke ne tui ki ha faʻahinga meʻa ʻoku ʻikai moʻoni” (Fakahinohino ki he Ngaahi Folofolá, “Kākaá,” scriptures.ChurchofJesusChrist.org).
Fakakaukau ke hiki ʻa e ngaahi tali ʻa e kau akó ki he fehuʻi ko ʻení ʻi he palakipoé.
-
Ko e hā ha ngaahi founga ʻoku feinga ai ʻa Sētane ke kākaaʻi ʻa e toʻu tupu ʻo e ʻaho ní?
-
ʻOkú ke pehē ko e hā ʻoku faʻa ngāue lelei pehē ai ʻa e ngaahi kākā ʻa Sētané?
Fakaafeʻi ʻa e kau akó ke fekumi ki ha ueʻi fakalaumālie mei he Laumālie Māʻoniʻoní ke tokoniʻi kinautolu ke nau ʻiloʻi pea fakaʻehiʻehi mei he kākaá.
Kākā ʻi he lotolotonga ʻo e fuofua Kāingalotú
ʻI he tūʻuta ʻa Siosefa Sāmita ki Ketilani, ʻOhaiō ʻi he konga kimuʻa ʻo Fēpueli 1831, naʻá ne ʻilo ai “kuo ʻi ai ha ngaahi fakakaukau ngali kehe mo ha ngaahi laumālie hala ʻi he lotolotonga” ʻo e Kāingalotú (ʻi he History, 1838–1856 [Manuscript History of the Church], vol. A-1, 93, josephsmithpapers.org).
Naʻe lekooti ʻe Sione Uitemā ʻa e ngaahi meʻá ni fekauʻaki mo e vahaʻataimi ko ʻení.
Naʻe maʻu ʻe ha niʻhi ha ngaahi vīsone pea ʻikai lava ʻo tala ʻa e meʻa naʻa nau mamata ki aí, naʻe pehē ʻe ha niʻihi ʻoku nau maʻu ʻa e heletā ʻa Lēpaní, pea te nau toʻo ia [hangē ha sōtia ʻoku heka hōsí], naʻe hangē ha niʻihi ha ʻInitia ʻokú ne lolotonga tuʻusi ʻa e tumuʻaki ʻo ha ʻulu (scalping), naʻe fakaheheke ha niʻihi pe heke … takai holo [ʻi he] falikí, ʻo hangē ha ngatá. … Naʻe pehē hono fakakuihi ʻe he tēvoló ʻa e mata ʻo ha kau ākonga lelei mo faitotonu ʻe niʻihi. (John Whitmer, History, 1831–circa 1847, 26, josephsmithpapers.org)
Naʻe tupu mei he hohaʻa ki he ngaahi ngāue ko ʻení ʻa e fehuʻi ʻa Siosefa Sāmita ki he ʻEikí peá ne maʻu ʻa e Tokāteline mo e Ngaahi Fuakava 50. ʻI he veesi 1–9, naʻe fakatokanga ai ʻa e ʻEikí ki he kaumātuʻa ʻo e Siasí fekauʻaki mo e ngaahi laumālie loí pea naʻa mo e kāingalotu naʻa nau kākaaʻi ʻa e niʻihi kehé.
Lau ʻa e Tokāteline mo e Ngaahi Fuakava 50:1–3, ʻo kumi ha taha ʻo e ngaahi fakatokanga ʻa e ʻEikí.
-
ʻOkú ke pehē ko e hā ʻoku fakaʻaongaʻi ai ʻe Sētane ʻa e kākaá ke taki kitautolu ke mamaʻo meia Sīsū Kalaisí?
Tokoni ke mahino ki he kau akó neongo ʻoku fuʻu poto ʻaupito ʻa Sētane ʻi he kākaá, ka naʻe fakahoko ʻe Sīsū Kalaisi ha faleʻi ʻi he ʻofa ʻi he veesi 10–35 ke tokoni ki Hono kau muimuí ke ʻiloʻi ʻa e moʻoní pea fakaʻehiʻehi mei he kākaá.
Fakakaukau ke fakaʻaliʻali pe hiki ʻi he palakipoé ʻa e fakamatala tohi mataʻāʻā taʻe-kakato ko ʻení. Te ke lava ʻo vahevahe ʻa e kau akó ki ha fanga kiʻi kulupu iiki pea vahe ki he kulupu takitaha ha taha ʻo e ngaahi potufolofola ko ʻení. Hili iá, ʻe lava ke teuteu ʻa e kau akó ke vahevahe ʻa e meʻa ʻoku nau ako mei he ʻekitivitī ko ʻení.
Lau ʻa e ngaahi veesi ko ʻení, ʻo kumi ʻa e founga te ke fakakakato ai ʻa e foʻi moʻoni ko ʻení: ʻE tokoniʻi kitautolu ʻe he ʻEikí ke tau fakaʻehiʻehi mei he kākaá ʻi heʻetau …
Hili ha taimi feʻunga, kole ki he kau akó ke hiki ʻa e ngaahi meʻa naʻa nau maʻú ʻi lalo ʻi he kupuʻi lea taʻe-kakato ʻi he palakipoé. ʻE lava ke kau ʻi he ngaahi talí ʻa e ngaahi meʻá ni: … fekumi ke akoʻi mo ako ʻi he Laumālie ʻo e Moʻoní, … fekumi ke maʻu ʻEne māmá, … lotu ke ke ʻiloʻi ʻa e taimi ʻoku mei he ʻOtuá ai pe ʻikai mei he ʻOtuá ha laumālie. Kimuʻa pea aleaʻi fakakalasi ʻa e ngaahi fehuʻi ko ʻení, mahalo ʻe tokoni ke tali kinautolu ʻe he kau akó ʻi heʻenau tohinoa akó. ʻE lava ke tokoni hono tomuʻa hiki ʻenau ngaahi fakakaukaú ke ongoʻi ʻe he kau akó ha loto-falala mo ha loto fiemālie ange ke vahevahe. ʻE lava ke ʻi ai mo ha ngaahi fehuʻi kehe ʻa e kau akó fekauʻaki mo e ngaahi moʻoni ko ʻení. Tuku ha taimi ke vakaiʻi ai ʻenau ngaahi fehuʻí. ʻE lava ke tānaki atu ʻe honau kaungāakó ha ngaahi fakakaukau mahuʻinga ki he meʻa te ke lava ʻo vahevahé.
Ke tokoni ki he kau akó ke fatongia ʻaki ʻenau akó, vakai ki he ako ʻoku ui ko e “Resist the tendency to respond to every comment and question and invite the class to respond.” ʻOku maʻu ʻeni ʻi he Fakatupulaki Ngaahi Taukei ʻa e Faiakó: Fakaafeʻi ʻa e Ako Fakamātoató.
-
ʻOku ʻuhinga nai ki he hā ʻa e akonaki ko ʻení?
-
ʻE tokoniʻi fēfē nai koe ʻe he akonaki ko ʻení ke ke maʻu e tokoni ʻa e ʻEikí ke fakaʻehiʻehi mei he ngaahi kākā ʻa Sētané?
ʻI hoʻomou aleaʻi ʻa e fehuʻi kimuʻá, ʻe ala tokoni ke vakai ʻa e kau akó ki he lisi ʻi he palakipoé ʻo e ngaahi founga ʻoku feinga ai ʻa Sētane ke kākaaʻi ʻa e toʻu tupú. ʻE lava ke fakatokangaʻi ʻe he kau akó ʻa e founga ʻe lava ke tokoniʻi ai kinautolu ʻe he akonaki ʻa e Fakamoʻuí naʻa nau filí ke fehangahangai ai mo ha kākā ʻe taha pe lahi ange mei he lisi ʻoku ʻasi atú.
Ko ha founga mahino ke fakaʻehiʻehi ai mei he kākaá
Naʻe fakaʻosi ʻaki ʻe he ʻEikí ha fakapapau ʻi he ʻofa, koeʻuhí ko Ia, ʻoku ʻikai fiemaʻu ke tau manavahē. Lau ʻa e Tokāteline mo e Ngaahi Fuakava 50:40–44, ʻo kumi ʻa e meʻa ʻokú ke ako fekauʻaki mo e Fakamoʻuí.
-
Ko e hā ʻoku makehe kiate koe mei he ngaahi veesi ko ʻení fekauʻaki mo e Fakamoʻuí?
-
ʻE tokoniʻi fēfē nai kitautolu ʻe heʻetau ʻilo ʻeni fekauʻaki mo Iá ʻi ha māmani ʻoku fonu ʻi he kākaá?
-
Ko e hā ha founga kuó ke ʻiloʻi pe tui ai ki he ngaahi moʻoni ko ʻeni fekauʻaki mo Sīsū Kalaisí?
Naʻe akoʻi ʻe Palesiteni Lāsolo M. Nalesoni ʻa e ngaahi meʻá ni fekauʻaki mo e founga te tau lava ai ʻo fakaafeʻi e tokoni ʻa e ʻEikí ke fakaʻehiʻehi mei he kākaá:
ʻOku vivili mo taʻe-faʻalaua ʻa e ngaahi leʻo mo e mālohi ʻo e māmaní. Ka ʻoku lahi fau ha ngaahi leʻo ʻoku kākā, olopoto, mo lava ke fusi kitautolu mei he hala ʻo e fuakavá. Ke hao mei he loto-mamahi mahino ʻoku muiaki maí, ʻoku ou kōlenga atu ʻi he ʻahó ni ke mou fakafepakiʻi ʻa e fakatauele ʻa e māmaní ʻaki hano fokotuʻu ha taimi moʻó e ʻEikí ʻi hoʻomou moʻuí—ʻi he ʻaho kotoa pē.
Kapau ko e lahi taha ʻo e fakamatala ʻokú ke maʻú mei he mītia fakasōsialé pe ha toe mītia kehe, ʻe hōloa hoʻo malava ke ongoʻi ʻa e fanafana ʻa e Laumālié. Kapau ʻoku ʻikai ke ke fekumi fakaʻaho ki he ʻEikí ʻi he lotu mo e ako ʻo e ongoongoleleí, ʻokú ke tuʻu ai ʻi ha tuʻunga ʻe uesiangofua ʻe he ngaahi fakakaukau fakapoto ʻo e tangatá, ʻa ia ʻe ngali lelei ka ʻoku ʻikai moʻoní. Naʻa mo e Kau Māʻoniʻoni ʻoku faivelengá ʻe lava pē ke fakaheeʻi ʻaki ʻa e ngaahi ongo ʻo e hiva ʻo Pāpiloné.
Siʻoku kāinga ʻofeina, ʻoku ou kole atu kiate kimoutolu ke mou fokotuʻu ha taimi moʻó e ʻEikí! ʻAi ho tuʻunga fakalaumālié ke mālohi mo ne lava ke matuʻuaki ʻa e sivi ʻo e moʻuí ʻaki hano fai ʻa e ngaahi meʻa ʻe lava ai ke ʻiate kimoutolu maʻu ai pē ʻa e Laumālie Māʻoniʻoní. (Russell M. Nelson, “Fokotuʻu ha Taimi moʻó e ʻEikí,” Liahona, Nōvema 2021, 120)
-
Ko e hā ha ngaahi fakakaukau kehe naʻá ke maʻu ʻe lava ʻo tokoni atu ke ke fakaʻehiʻehi ai mei he kākaá?
Fakakaukau ke ʻoange ha taimi ki he kau akó ke vahevahe ha meʻa naʻa nau ako pe ongoʻi ʻoku ueʻi kinautolu ke nau fai ke fakaʻehiʻehi ai mei he kākaá. Fakaafeʻi kinautolu ke hokohoko atu ʻenau kumi ha ngaahi founga ke ʻiloʻi ai ʻa e moʻoni fakalangí pea fakaʻehiʻehi mei he kākaá. ʻE lava ke ke fie vahevahe hoʻo falala ki he finangalo mo e ivi malava ʻo e ʻEikí ke tokoniʻi ʻa e kau akó ke nau fai ʻení.