Seminelí
Lēsoni 67—Siviʻi Hono 4 Hoʻo Akó: Tokāteline mo e Ngaahi Fuakava 41–50

“Lēsoni 67—Siviʻi Hono 4 Hoʻo Akó: Tokāteline mo e Ngaahi Fuakava 41–50,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)

“Siviʻi Hono 4 Hoʻo Akó,” Tokāteline mo e Ngaahi Fuakava – Tohi Lēsoni ʻa e Faiako Seminelí

Lēsoni 67: Tokāteline mo e Ngaahi Fuakava 49–50

Siviʻi Hono 4 Hoʻo Akó

Tokāteline mo e Ngaahi Fuakava 41–50

kakai lalahi kei talavou ʻoku sio ki ha mape

ʻI hono ʻoange ha taimi ke siviʻi ai ʻe he kau akó ʻenau tupulaki fakalaumālié, ʻe lava ke tokoni ia ke nau ofi ange ai ki he Fakamoʻuí pea feinga ke hoko ʻo hangē ange ko Iá. Te nau lava foki ʻo vakai ki he fakalakalaka kuo nau fakahokó mo e meʻa te nau lava ʻo fakalakalaka aí. ʻE lava ke tokoni ʻa e lēsoni ko ʻení ke manatuʻi mo vakaiʻi ʻe he kau akó ʻa e founga kuo tokoniʻi ai kinautolu ʻe heʻenau ngaahi aʻusia ʻi hono ako mai ʻeni ʻo e Tokāteline mo e Ngaahi Fuakava ke nau tupulaki fakalaumālié.

Ngaahi ʻEkitivitī Ako ʻOku Ala Fakahokó

Vakaiʻi hoʻo ngaahi fakaʻilonga fakalaumālié

ʻE lava ʻe he meʻá ni ʻo teuteuʻi ʻa e kau akó ke nau fakafehoanaki ʻa e ngaahi fakaʻilonga fakatuʻasinó ki ha fakamoʻoni te nau ala maʻu fekauʻaki mo ʻenau tupulaki fakalaumālié. ʻE lava ke nau fakakakato fakafoʻituitui pe fakakalasi ʻa e ʻekitivitī ko ʻení ʻaki haʻanau tā ha mape ʻi he palakipoé.

Fili ha feituʻu fakalotofonua pea tā ha mape mei he feituʻu ʻokú ke lolotonga ʻi aí ki he feituʻu ko iá. Fakakau ai ha ngaahi fakaʻilonga ʻe tokoni ki ha taha ke ne ʻiloʻi ʻokú ne ʻi he hala totonú.

  • Ko e fē ʻa e ngaahi fakaʻilonga naʻá ke fakakau aí? Ko e hā hono ʻuhingá?

  • Ko e hā ʻa e fatongia ʻo e ngaahi fakaʻilongá ʻi hono tokoniʻi koe ke ke ʻilo ha feituʻu ʻokú ke fakataumuʻa ki aí?

    Kapau naʻá ke tā ha mape ʻi he palakipoé, te ke lava ʻo fetongi ʻa e feituʻu naʻá ke fakataumuʻa ki aí ʻaki ʻa e kupuʻi lea “Hoko ʻo hangē ko Sīsū Kalaisí.” ʻI hono tali ʻe he kau akó ʻa e fehuʻi hokó, te ke lava ʻo fetongi ha niʻihi ʻo e ngaahi fakaʻilongá ʻaki ʻa e ngaahi tali ʻa e kau akó.

    Fakakaukau ki ha founga ke tokoni ki he kau akó ke liliu ʻenau fakakaukaú fekauʻaki moʻenau moʻuí. ʻE lava ke ke lea ʻaki ha meʻa hangē ko ʻení ʻi he ngaahi lea pē ʻaʻau.

  • Kapau ko e feituʻu ʻoku tau fakataumuʻa ki aí ke hoko ʻo hangē ange ko Sīsū Kalaisí, ko e hā nai ha niʻihi ʻo e ngaahi fakaʻilonga fakalaumālie ʻe lava ʻo tokoni ke tau ʻiloʻi ʻoku tau ʻi he hala totonú?

ʻOku fiemaʻu ʻa e fakalaulaulotó mo e tataki ʻa e Laumālie Māʻoniʻoní kae lava ke tau fakatokangaʻi lelei ʻetau fakalakalaká. Tuku ha taimi ke ke feinga ai ke ʻiloʻi ha niʻihi ʻo e fakalakalaka kuó ke aʻusiá ʻaki haʻo fekumi ki ha niʻihi ʻo e ngaahi fakaʻilonga fakalaumālie ʻi hoʻo moʻuí. ʻI hono fakalea ʻe tahá, kumi ha fakamoʻoni ʻokú ke hoko ʻo hangē ange ai ko Sīsū Kalaisí ʻi hoʻo ako ʻa e Tokāteline mo e Ngaahi Fuakava ʻi he ngaahi uike kimui ní.

Mahalo te ke fie ʻoange ha taimi ki he kau akó ke nau fakalaulauloto mo fakakaukau ai ʻiate kinautolu pē. Hili ha taimi feʻunga, fakaafeʻi kinautolu ke vahevahe ʻa e meʻa naʻa nau maʻú.

Pe ko hoʻo fakaʻaongaʻi ʻa e ngaahi ʻekitivitī ko ʻení ke tokoni ki he kau akó ke nau fakakaukau ki heʻenau fakalakalaka fakalaumālie ʻi he ngaahi uike kimui ní. ʻOku hanga ʻe he ngaahi ʻekitivitī ʻi he lēsoni ko ʻení ki he siví ʻo muimuiʻi ʻa e ngaahi lēsoni semineli kimuʻá. Kapau naʻe liliu ʻa e ngaahi lēsoni ko ʻení pe ʻikai akoʻi, ʻe fiemaʻu foki ke liliu ʻa e ngaahi ʻekitivitī ki he siví ke fakahoʻata ʻa e ngaahi aʻusia naʻe maʻu ʻe hoʻo kau akó.

ʻI he ʻekitivitī takitaha, mahalo te ke fie fakamamafaʻi ki he kau akó ʻe lava ke tatau hono siviʻi ʻenau akó ʻi he ngaahi founga ko ʻení mo hano ʻai ha ngaahi fakaʻilonga ʻi ha hala-fononga ʻoku fakapapauʻi ai ʻoku nau ʻalu ʻi he hala totonú. Tokanga ki he kau ako ʻoku ʻikai ke nau ongoʻi ʻoku nau fakalakalaká pe teʻeki ai ke nau mamata ki ha liliu lelei ʻi heʻenau moʻuí, pea fakakaukauʻi ha ngaahi founga ke poupouʻi ai kinautolu ʻi heʻenau ngaahi feingá.

Ongoʻi ha loto-holi lahi ange ke maʻu ha moʻui ʻoku fakatapuí

ʻE lava ke tokoni ʻa e ʻekitivitī ko ʻení ke fakakaukau ʻa e kau akó ki heʻenau holi ke moʻui fakatapui ʻo hangē ko e Fakamoʻuí. ʻOku fakatefito ʻa e ʻekitivitī ko ʻení ʻi he meʻa naʻe ako ʻe he kau akó fekauʻaki mo e moʻui fakatapuí ʻi he Tokāteline mo e Ngaahi Fuakava 42:29–42. ʻE lava ke tokoni ha niʻihi ʻo e ngaahi fehuʻi ko ʻení ki he kau akó ke toe vakaiʻi ʻa e mahino ʻoku nau maʻu ki he fono ʻo e fakatapuí.

  • Ko e hā ʻa e meʻa ʻokú ke manatuʻi fekauʻaki mo e fono ʻo e fakatapuí?

  • Ko e ngaahi veesi fē mei he Tokāteline mo e Ngaahi Fuakava 42 ʻe lava ʻo tokoni ke mahino lelei ange kiate kitautolu ʻa e fono ko ʻení?

  • Ko e hā ha ngaahi sīpinga ʻo e meʻa ʻe lava ke fai ʻe he toʻu tupú ke moʻui ʻaki ʻa e fono ʻo e fakatapuí ʻi he ʻaho ní?

    ʻE ala kau ʻi he ngaahi veesi ʻe talamai ʻe he kau akó ʻa e veesi 29–38. Kapau he ʻikai talaatu ʻe he kau akó ha taha ʻo e ngaahi vēsí ni, ʻe lelei ke nau lau ʻa e ngaahi vēsí pea vahevahe ʻa e meʻa ʻoku nau ʻiló. Lolotonga ʻa e lēsoni fekauʻaki mo e fono ʻo e fakatapuí, mahalo naʻe tohi ʻe he kau akó ʻa e “Hono toʻukupú” pe tā fakatātaaʻi ha taha ʻo honau ongo laʻinimá ʻi heʻenau tohinoá. Mahalo kuo nau vakaiʻi ʻenau loto-holi ke hoko ʻo hangē ko e toʻukupu ʻo e ʻEikí ʻi heʻenau feohi mo e niʻihi kehé. Kapau naʻe fai ʻeni ʻe he kau akó, te ke lava ʻo fakaafeʻi kinautolu ke kumi ʻa e fakamatala ko ʻení ʻi heʻenau tohinoa akó pea vakai pe naʻe fēfē nai ʻenau talí. ʻE lava ke tokoni ʻa e ngaahi fehuʻi ko ʻení ke vakaiʻi ʻe he kau akó ʻa e founga naʻe liliu ai ʻenau ngaahi ongo fekauʻaki mo e fono ʻo e fakatapuí. ʻE lava ke fakahoko ʻe he kau akó ʻenau talí ʻi heʻenau tohinoá.

  • Ko e hā hoʻo ongo fekauʻaki mo hono fakatapui ho taimí, ngaahi talēnití, mo e ngaahi meʻa kehe kuo tāpuekina ʻaki koe ʻe he ʻEikí ke langa hake ʻaki Hono puleʻangá, kau ai hono tokoniʻi ʻa kinautolu ʻoku faingataʻaʻiá?

  • ʻOku kehe fēfē nai hoʻo ngaahi ongó ʻi he taimi naʻá ke ako ai ki he fono ʻo e fakatapuí ʻi he ngaahi uike siʻi kuo hilí? ʻOkú ke pehē nai ko e hā ha meʻa kuó ne liliu hoʻo ngaahi ongó?

Hili hono maʻu ʻe he kau akó ha taimi feʻunga ke fakakaukau ki aí, te ke lava ʻo fakamālōʻia kinautolu ʻi hono vakaiʻi moʻoni ʻenau ngaahi ongó. ʻE lava ke ke fakaafeʻi ʻa e kau akó ke vahevahe ʻa e meʻa naʻa nau ako pe ʻilo mei he ʻekitivitī ko ʻení. Fakakaukau ke tokoni ki he kau akó ke fakakaukau ki he founga ʻe lava ke liliu ai kinautolu ʻe he moʻui fakatapuí ʻi ha taʻu ʻe 1, 5, pe 10 mei he taimí ni. Te ke lava foki ʻo vahevahe ha ngaahi founga kuo tāpuekina ai koe ʻi hoʻo feinga ke moʻui fakatapuí mo e founga kuó ne tokoniʻi koe ke ke hoko ʻo hangē ange ko Kalaisí.

Poupouʻi ʻa e kau akó ke fekumi ki ha fakahā ʻi he founga ʻe lava ke nau loto-fiemālie ange ai ke fai ʻa e meʻa kotoa te nau lavá ke tokoniʻi ʻa kinautolu ʻoku faingataʻaʻiá mo langa ʻa e puleʻanga ʻo e ʻOtuá ʻi he māmaní ʻi he ʻaho ní.

Talangofua ki he ngaahi fekau ʻa e ʻOtuá

Ke tokoni ke siviʻi ʻe he kau akó ʻenau ngaahi feinga kimuí ni ke talangofua ki he ngaahi fekau ʻa e ʻOtuá, fakaafeʻi kinautolu ke toe vakaiʻi ʻa e Tokāteline mo e Ngaahi Fuakava, ʻo kumi ʻa e ngaahi fekau naʻa nau toki ako ki aí. Te ke lava ʻo poupouʻi kinautolu ke hiki ha niʻihi ʻo e ngaahi fekau naʻe fakahā ʻi he Tokāteline mo e Ngaahi Fuakava 42:18–52 ʻi he palakipoé.

  • ʻE lava fēfē nai ke fakafehoanaki ʻetau talangofua ki he ngaahi fekaú ki he ngaahi fakaʻilonga fakalaumālie ʻi heʻetau fāifeinga ke hoko ʻo hangē ange ko Sīsū Kalaisí?

Kapau naʻe fokotuʻu ʻe he kau akó ha taumuʻa ʻi ha lēsoni kimuʻa ke lelei ange hono tauhi ʻa e ngaahi fekaú, ʻe lava ke tokoni ʻa e fakamatala tohinoa ko ʻení ke nau fakakaukau ki heʻenau taumuʻá.

Fakakaukau ki ha fekau naʻá ke ongoʻi kimuí ni naʻe ueʻi koe ʻe he Laumālie Māʻoniʻoní ke ke tokanga taha ki ai.

  • Te ke fakamatalaʻi fēfē nai hoʻo feinga ke tauhi ʻa e fekau ko ʻení?

  • Kuo tāpuekina fēfē nai koe ʻe he Fakamoʻuí ʻi hoʻo ngaahi feingá?

  • ʻOku ʻi ai nai ha founga ʻokú ke ongoʻi te ke lava ʻo lelei ange ai? Ko e hā te ke faí?

  • ʻOku ʻi ai nai ha fekau ʻe taha ʻokú ke ongoʻi ʻoku ueʻi koe ʻe he Laumālie Māʻoniʻoní ke ke tokanga taha ki ai? Ko e hā te ke faí?

Fakamatalaʻi ʻa e ngaahi fatongia ʻo e Laumālie Māʻoniʻoní

ʻE lava ke tokoni ʻa e ngāue ko ʻení ke fakamatalaʻi ʻe he kau akó ʻa e meʻa kuo nau ako fekauʻaki mo e Laumālie Māʻoniʻoní ʻi heʻenau ako ʻa e Tokāteline mo e Ngaahi Fuakava. Te ke lava ʻo hiki ʻi he palakipoé ʻa e “Ngaahi Fatongia ʻo e Laumālie Māʻoniʻoní”. Kole ki he kau akó ke hiki ha ngaahi fatongia kehekehe ʻo e Laumālie Māʻoniʻoní, mo ha potufolofola poupou kapau ʻe lava. Aleaʻi ʻa e ʻuhinga ʻoku hoko ai ʻeni ko ha ngaahi fatongia mahuʻinga ke fakahoko ʻe he Laumālie Māʻoniʻoní.

Ko ha niʻihi ʻeni ʻo e ngaahi fatongia ʻo e Laumālie Māʻoniʻoní. ʻE lava ke lau ʻe he kau akó ʻa e ngaahi veesi ʻoku fekauʻaki mo iá pea faʻu ha tūkunga ʻe lava ke tokoniʻi ai ha taha ʻe he mahino ha fatongia pau ʻo e Laumālie Māʻoniʻoní. Fakaafeʻi leva ʻa e kau akó ke fakaʻaongaʻi ʻa e ngaahi potufolofolá ke fakamatalaʻi ʻa e fatongia ʻo e Laumālie Māʻoniʻoní ke tokoniʻi ʻa e tokotaha ʻi he tūkungá.