“68-р хичээл—Сургаал ба Гэрээ 51: ‘Итгэлтэй, үнэнч шударга, ухаалаг даамал,’” Сургаал ба Гэрээний семинарын багшийн гарын авлага (2025)
“Сургаал ба Гэрээ 51,” Сургаал ба Гэрээний семинарын багшийн гарын авлага
68-р хичээл: Сургаал ба Гэрээ 51–57
Сургаал ба Гэрээ 51
“Итгэлтэй, үнэнч шударга, ухаалаг даамал”
1831 оны хавар Иосеф Смит нэгэн илчлэл хүлээн авчээ. Их Эзэн Нью-Йоркийн Колесвилл салбарын гишүүдийг Огайо мужийн Томпсон дүүрэгт суурьшиж, бүхнээ зориулах хуулийн дагуу амьдрах үүргээ биелүүлэх заавар өгөв. Энэ хичээл нь суралцагчдад Их Эзэний итгэлтэй, үнэнч шударга, ухаалаг даамал байх зөвлөгөөг хэрхэн дагаж чадахаа ойлгоход тусалж чадна.
Боломжит суралцах үйл ажиллагаа
Ажил үүрэг даалгах
Суралцагчдыг ажил үүргийн тухай мэдэж авахаар бэлтгэхэд нь туслахын тулд дараахтай төстэй үйл ажиллагаа явуулахыг бод.
Эцэг эх нь гадуур гарахдаа хүүгээсээ эсвэл охиноосоо дүүгээ хэдэн цаг харж өгөхийг хүссэн гэж төсөөл.
-
Хайртай эцэг эх нь том хүүхдээсээ яагаад ийм үүрэг хүлээхийг хүсэж болох вэ?
-
Эцэг эх ийм нөхцөлд ямар хүлээлттэй байна гэж та бодож байна вэ?
Тэнгэрлэг Эцэг, Есүс Христ хоёр бас бидний амьдралд олон үүрэг хариуцлага өгсөн гэдгийг тайлбарла. Эдгээр үүрэг хариуцлагыг ажил үүрэг гэж болно.
Тэргүүлэх бишопын зөвлөлийн бишоп Жэралд Коссэй ажил үүрэг гэдэг үгийн дараах тодорхойлолтыг хуваалцжээ.
Сайн мэдээний нэр томьёонд ажил үүрэг гэдэг үг бидний хариуцлага хүлээдэг, Бурханд харьяалагддаг аливаа зүйлийг халамжлах сүнслэг эсвэл түр зуурын ариун үүрэг хариуцлагыг илэрхийлдэг. (Жэралд Коссэй, “Дэлхий дээрх бидний ажил үүрэг,” Лиахона, 2022 оны 11-р сар, 57)
-
Бурхан бидний амьдралд ажил үүргүүдийг оноосон ямар жишээнүүд байдаг вэ?
Суралцагчдын өмнөх асуултад өгсөн хариултуудыг самбарт бич эсвэл та тэднийг самбарт гараад, хариултуудаа бичихэд урьж болно.
Шаардлагатай бол дараах зүйлсийг жишээ болгон ашиглаж болно. Үүнд: Бидний амьдарч буй гаргийн нэг хэсэг, гэр бүл, дуудлага эсвэл Сүмийн үүрэг даалгавар, эд хөрөнгө, эзэмшил, бие махбод, цаг хугацаа гэх мэт.
Суралцагчдыг эдгээр жишээг тодорхойлсны дараа дараах зүйлсийг хуваалцан, амьдралынхаа ажил үүргийг эргэцүүлэн бодоход урь.
Судлах тэмдэглэлдээ өөрийн зарим ажил үүргийг эсвэл Их Эзэний танд даалгасан зүйлсийг бич. Өнөөдөр судалж байхдаа та жагсаалт дээрээ бичсэн зүйлсээ илүү сайн хариуцахад туслах үнэнүүдийг хайж ол.
Эхэн үеийн гэгээнтнүүдийн ажил үүрэг
Сургаал ба Гэрээ 51-р бүлгийн нөхцөл байдлыг ойлгоход нь суралцагчдад туслахын тулд дараах догол мөрийг унших юм уу тоймлохыг бод. Та нэг суралцагчийг үүнийг ангийнхандаа уншиж өгөхөд урьж болно.
1831 оны хавар олон гэгээнтэн Нэгдсэн Улсын зүүн хэсгээс цагаачилсныхаа дараа Огайод ирж эхэлсэн юм. Хэсэг бүлэг хүн асар их золиослол гарган, Нью-Йоркийн Колесвиллээс ирэв. Энэ бүлэг хүнд Огайогийн Томпсонд суурьшиж, бүхнээ зориулах хуулийн дагуу амьдрахыг зааварчилжээ. Сургаал ба Гэрээ 51 дээр цэдэглэгдсэн илчлэлд Их Эзэний гэгээнтнүүдэд өгсөн зааврууд орсон байдаг.
Суралцагчдыг Сургаал ба Гэрээ 51-ийг судалж байхдаа дараах хүснэгтийг судлах тэмдэглэл дээрээ хуулаад, бөглөхөд урь.
|
Бишоп Партрижийн үүрэг хариуцлага |
Гэгээнтнүүдийн үүрэг хариуцлага |
|---|---|
Сургаал ба Гэрээ 51:1–4-ийг уншаад, Их Эзэн бишоп Эдвард Партрижид үүргүүдийнх нь талаар юу заасныг олж мэд.
-
Их Эзэн бишоп Партрижид ямар үүрэг өгсөн бэ?
Суралцагчдыг хариулахад, “энэ хүмүүст адил тэгшээр хувийг нь олго” (Сургаал ба Гэрээ 51:3) гэдэг нь гэгээнтнүүдийн бүхнээ зориулах хуулиар хүлээн авах бараа, эд зүйлийг хэлж байгааг онцлох нь тустай байж болох юм. Үргэлжлүүлэхээс өмнө суралцагчдыг бүхнээ зориулах хуулийн тухай мэддэг эсвэл санаж байгаа зүйлсээ хуваалцахад урих нь хэрэгтэй байж магадгүй.
Хэрэгтэй бол гэгээнтнүүд Их Эзэнд өөрсдийн өмч хөрөнгө, эд зүйлийг зориулах нь бүхнээ зориулах хуулийн нэг хэсэг юм гэдгийг тайлбарла. Дараа нь тэд бишопоор дамжуулан; эд зүйл, өмч хөрөнгийг арчлан хамгаалах, ашиглах ажил үүрэг болгон хүлээн авдаг. Гэгээнтнүүд тарьж ургуулсан, үржүүлсэн эсвэл хүлээн авсан зүйлсийнхээ илүүдлийг бишоптоо ядууст өгүүлэхээр хандивлаж болно.
Сургаал ба Гэрээ 51:9, 12–15, 19-ийг уншаад, олж мэдсэн зүйлээрээ хүснэгтийг бөглө.
13-р шүлэгт дурдсан агуулах нь бишопын ядуус болон хэрэгцээтэй хүмүүсийг халамжлахын тулд хоол хүнс, эд бараагаа хадгалдаг газар байсныг суралцагчид мэдэж авах нь хэрэгтэй байж болно.
-
Эдгээр шүлэг дэх ямар зөвлөгөө нь гэгээнтнүүдэд бүхнээ зориулах хуулиар амьдрахад тулгамдаж буй асуудлуудаа даван туулахад тусалж болох байсан бэ?
-
Их Эзэн 19-р шүлэг дээр итгэлтэй, үнэнч шударга, ухаалаг даамлуудад ямар адислалуудыг амласан бэ?
Суралцагчдыг 19-р шүлэг дээрх Их Эзэний сургаалын дагуу тэдгээр даамлын ажил үүрэгт хамаарах үнэнийг тодорхойлоход урь. Бид итгэлтэй, үнэнч шударга, ухаалаг даамал болсноор Их Эзэний баяр хөөрийг амсаж, мөнх амьдралын бэлгийг хүлээн авч чадна гэсэнтэй төстэй ямар нэг зүйлийг тэд тодорхойлж болно
Хэрэгтэй гэж үзвэл, суралцагчдыг дараах үгсийн нэгийг тодорхойлох цаг гаргахад урихыг бод. Үүнд: Итгэлтэй, үнэнч шударга эсвэл ухаалаг. Суралцагчид ойлгосон зүйлсээ хуваалцаж, Судруудын удирдамж эсвэл толь бичиг ашиглаж болно.
-
Бид ажил үүрэгтээ үнэнч байснаар ямар баяр хөөрийг мэдэрч, ямар адислалууд хүлээн авч болох талаар ямар жишээнүүд байж болох вэ?
Итгэлтэй, үнэнч шударга, ухаалаг даамал байх жишээ
Дараах үйл ажиллагаанууд нь суралцагчдад итгэлтэй, үнэнч шударга, ухаалаг даамал байх гэдэг нь юу гэсэн утгатайг илүү сайн ойлгоход тусалж чадна. Үйл ажиллагаануудыг харуулаад, суралцагчдад хамтдаа хийж гүйцэтгэх боломж олгохын тулд тэднийг жижиг бүлгүүд болгон хуваахыг бод. Энэ үйл ажиллагааг бүлгээр хийж гүйцэтгэхээр болбол бүлэг болгонд ярилцлага удирдах хүн томилно уу.
А үйл ажиллагаа: Аврагчийн үлгэр жишээ
Аврагч бол итгэлтэй, үнэнч шударга, ухаалаг даамлын төгс жишээ юм.
Есүс Христийн биднийг харж хандах, туслах үүргүүдийнхээ нэгийг биелүүлж буй судрын жишээг ол. Езекиел 34:11–16; Иохан 6:38–39; 17:1–4; 3 Нифай 17:6–9; Сургаал ба Гэрээ 19:16–19 зэрэг нь таны судалж болох судрын жишээнүүд юм.
Аврагч хэрхэн таны итгэлтэй, үнэнч шударга, ухаалаг даамал байсныг тунгаан бод.
-
Аврагчийн хүчин чармайлтууд танд хэрхэн баяр хөөр, адислалуудыг авчирсан бэ?
-
Аврагчийн үлгэр жишээ таныг итгэлтэй, үнэнч шударга, ухаалаг даамал байхад тань хэрхэн урамшуулж болох вэ?
Б үйл ажиллагаа: Өнөөдрийн ажил үүрэг
Биднийг бас итгэлтэй, үнэнч шударга, ухаалаг даамал байснаар Есүс Христийг дагахад урьдаг.
Самбар дээрээс Их Эзэний бидэнд оноосон (эсвэл өөрийн бодож олсон өөр нэг жишээг) ажил үүргийн цөөн жишээг сонгон ав.
Хүн эдгээр зүйлд итгэлтэй, үнэнч шударга, ухаалаг даамал болохын тулд юу хийж болохыг дүрсэл. Та сайн даамал болгохыг харж байсан жишээнүүдээ эсвэл оролдож үзсэн арга замуудаа оруулж болно.
-
Их Эзэн өнөөдөр хүмүүсийг яагаад ийм арга замаар итгэлтэй, үнэнч шударга, ухаалаг даамал байхыг хичээгээсэй гэж хүсдэг вэ?
-
Хүчин чармайлт нь хэрхэн баяр баясгалан, адислалуудыг авчирч болох вэ?
Олон суралцагчийг ярилцлагаас ойлгосон зүйлсээ хуваалцахад урь. Цөөн суралцагчийг А үйл ажиллагаанаас чухал, үнэ цэнтэй гэж тодорхойлсон судруудаа хуваалцахад урь. Та бас суралцагчдыг хамтарч ажилласан ангийнхаа хүүхдээс сурсан зүйлээ хуваалцахад урьж болно.
Та юу сурч мэдсэн бэ
Хичээл дээр сурсан зүйлсээ хэрэгжүүлэхэд нь суралцагчдад туслахын тулд тэднийг судлах тэмдэглэлдээ дараах асуултуудад хариулахад урихыг бод.
-
Та ажил үүргийн талаар мартахын аргагүй юуг өнөөдөр сурсан бэ?
-
Та амьдралынхаа аль нэг хэсэг дээр илүү итгэлтэй, үнэнч шударга, ухаалаг даамал болохын тулд юу хийж чадах вэ?
Өмнөх хоёр асуултуудад хариулахад бэлэн болсон хэдэн суралцагчийг бичсэн зүйлсээ хуваалцахад урь. Их Эзэний даалгасан ажил үүргийг гүйцэлдүүлэх гэж хичээснээр мэдэрсэн баяр хөөрийнхөө тухай гэрчил.