Lēsoni 71: Tokāteline mo e Ngaahi Fuakava 58–59

Tokāteline mo e Ngaahi Fuakava 58:26–29

“Femoʻuekina … ʻi he Holi Lahi ʻi ha Ngāue Lelei”

Naʻe tokolahi ha Kāingalotu, kau ai ha kulupu mei Kolesivili, Niu ʻIoke, naʻe toki tūʻuta atu ki he Vahefonua Siakisoni, Mīsulí. Naʻa nau fie tokoni ki he Fakamoʻuí ke langa ʻa Saione, ka naʻe ʻikai ke nau fakapapauʻi ʻa e meʻa ke faí. Naʻe folofola ʻa e ʻEikí naʻe fiemaʻu ke nau fakaʻaongaʻi ʻenau tauʻatāina ke filí ke kumi ha ngaahi founga ke tokoni mo ngāue ai. ʻE lava ke tokoni ʻa e lēsoni ko ʻení ke mahino ki he kau akó ʻa e founga ke muimui ai ki he sīpinga ʻa e Fakamoʻuí ʻo e femoʻuekina ʻi he ngāue leleí.

Ngaahi ʻEkitivitī Ako ʻOku Ala Fakahokó

Ko ha ʻaho ʻi he moʻui ʻa Kalaisí

Kimuʻa pea kamata ʻa e kalasí, fakakaukau ke tohiʻi ʻa e ʻOku nau feʻaluʻaki ʻo fai lelei ʻi he palakipoé. Fakaafeʻi ʻa e tokotaha ako takitaha ke vahevahe ʻa e hingoa ʻo ha taha ʻoku nau ʻilo ʻoku feʻunga ʻene moʻuí mo e fakamatala ko iá. ʻE lava ke vahevahe ʻe ha niʻihi ʻe loto-fiemālié ʻa e ʻuhinga ʻoku fakamanatu ange ai ʻe he kupuʻi lea ko iá ʻa e tokotaha naʻa nau filí.

Talaange ki he kau akó ko e Ngāue 10 ko ha lekooti ia ʻo e ngaahi akonaki ʻa Pita ʻi Sesaliá. Fakaafeʻi kinautolu ke vakai ki he Ngāue 10:38 ke sio pe ko e hingoa ʻo hai naʻe mei hiki ʻe Pita ʻi he palakipoé.

Fakakaukauloto pe naʻe mei fēfē nai kapau naʻe ʻaloʻi ʻa Sīsū ʻi hotau kuongá, nofo ʻi homou kaungāʻapí, pe ako ʻi homou ʻapiakó.

• Ko e hā ʻokú ke fakakaukauloto te Ne faí ʻa ia ʻe lava ke fakamatalaʻi ko ha “feʻaluʻaki ʻo fai lelei”?

Ke tokoni ki he kau akó ke nau loto-holi ke muimui ʻi he sīpinga ʻa e Fakamoʻuí, fakakaukau ke ʻoange ha taimi ke nau hiki ai ʻenau ngaahi fakakaukau fekauʻaki mo e ngaahi fakamatala ko ʻení ʻi heʻenau tohinoa akó.

Feinga ke fakakaukauloto ki he ongo te ke maʻu kapau te ke feohi ʻi ha ʻaho Tokonaki mo Sīsū ʻo “feʻaluʻaki ʻo fai lelei” ʻi he ʻahó kakato. ʻE tākiekina fēfē nai ʻe he aʻusia ko ʻení ʻa e founga te ke fili ai ke fakaʻaongaʻi ho taimí ʻo aʻu ki he ngaahi ʻaho naʻe ʻikai ke ke feohi ai mo Iá?

Ko e fili ke fai leleí

ʻI he taimi naʻe maʻu ai ʻa e Tokāteline mo e Ngaahi Fuakava 58, naʻe toki tūʻuta atu pē ʻa Siosefa Sāmita mo ha niʻihi ʻo e kaumātuʻa ʻo e Siasí ki Mīsuli. Naʻa nau fiemaʻu ha ngaahi fakahinohino ki he founga hono fokotuʻu ʻo e Siasí mo langa hake ʻa Saione ʻi he feituʻú. Naʻe akoʻi kinautolu ʻe he Fakamoʻuí ʻi he founga te nau lava ai ʻo fakaʻaongaʻi ʻenau tauʻatāina ke filí ke fai ʻEne ngāué.

Lau ʻa e Tokāteline mo e Ngaahi Fuakava 58:26–29 ke ako ʻa e meʻa naʻe akoʻi ʻe he Fakamoʻuí ki he Kāingalotú fekauʻaki mo hono fakaʻaongaʻi ʻenau tauʻatāina ke filí. Hiki ʻa e ngaahi foʻi lea mo e ngaahi kupuʻi lea ʻokú ke maʻú ʻi honau ngaahi konga totonu ʻi he saati ko ʻení. (Fakatokangaʻi ange: ʻOku ʻuhinga ʻa e “ʻOku ʻikai tāú” ki he ʻikai mahuʻinga pe fiemaʻu.)

Fakakaukau ke fakaʻaliʻali ʻa e saati ko ʻení ʻi he palakipoé pe ʻoange ki he kau akó haʻanau tatau ʻanautolu pē. ʻE ala tokoni ke fakatupulaki ʻa e kau ʻa ha niʻihi ʻo e kau akó ki he ʻekitivitī ko ʻení kapau ʻe fakaafeʻi kinautolu ke fakakakato ia mo hanau hoa.

Ko hono fakaʻaongaʻi ʻetau tauʻatāina ke filí ke …

Hoko ʻo hangē ange ko Sīsuú	ʻIkai loko hangē ko Sīsuú

ʻI he ʻosi ʻa e ngāue ʻa e kau akó, fakakaukau ke fai ha ngaahi fehuʻi ʻe tokoni ke nau fakakaukau pea mahino kiate kinautolu ʻa e ʻuhinga ʻo e ngaahi kupuʻi lea naʻa nau maʻú. Hangē ko ʻení:

• ʻOkú ke pehē ʻoku ʻuhinga nai ki he hā ʻa e “femoʻuekina ʻi he holi lahi” pe feinga fakamātoato, ke fai leleí?

• ʻOkú ke pehē ko e hā ʻoku totonu ai ke tau fakaʻehiʻehi mei hano “fakamālohiʻi” pe fakakounaʻi kitautolu ke fai leleí?

• ʻOkú ke pehē ko e hā ʻoku mahuʻinga ai ʻetau ngaahi taumuʻa ke fai leleí?

Hiki ʻi hoʻo tohinoa akó pe ʻi hoʻo folofolá, ʻi he lea pē ʻaʻau, ha foʻi moʻoni ʻe taha pe ua te ke lava ʻo tala ʻoku mahuʻinga ki he Fakamoʻuí mei he ngaahi veesi ko ʻení.

Fakaafeʻi ʻa e kau akó ke vahevahe ʻa e ngaahi moʻoni naʻa nau hikí pe hiki kinautolu ʻi he palakipoé. Ko e foʻi moʻoni ʻe taha te nau ala fakahāʻí ʻoku fakapaleʻi ʻe he ʻOtuá ʻa kinautolu ʻoku feinga mālohi ke fakahoko ʻa e māʻoniʻoní.

Mahalo te ke fie fakaafeʻi ʻa e kau akó ke fakalaulauloto pe lekooti ʻa e tuʻo lahi ʻo ʻenau fekumi ki ha ngaahi founga ke tauhi ai ki he ʻOtuá mo e niʻihi kehé ʻo ʻikai tatali ke talaange ʻa e meʻa ke faí. Fakaafeʻi kinautolu ke tokanga ki he ngaahi founga te nau lava ai ʻo feinga ke femoʻuekina lahi ange ʻi ha ngāue lelei ʻi he hokohoko atu ʻenau akó.

• Ko e hā ha ngaahi sīpinga mei he folofolá te ke lava ʻo fakakaukau ki ai naʻe moʻui ʻaki ai ʻe ha taha ʻa e ngaahi akonaki ʻa e Fakamoʻuí ʻi he ngaahi veesi ko ʻení?

• Ko e hā ha ngaahi sīpinga ʻo hono ʻafioʻi ʻe he Fakamoʻuí ha ngaahi faingamālie ke fai leleí peá Ne fakaʻaongaʻi ʻEne tauʻatāina ke filí ke ngāué?

Mahalo te ke fakakaukau ke huluʻi ʻa e foʻi vitiō “ʻOku Manavaʻofa ʻa Sīsū Kalaisi pea Fakamoʻui e Kakaí” (6:32), ʻoku maʻu ʻi he ChurchofJesusChrist.org. ʻOkú ne huluʻi mai e fili ʻa e Fakamoʻui kuo toetuʻú ke nofo ʻi ha taimi lahi ange ʻi he kau Nīfaí ke tokoni mo fakamoʻui kinautolú.

Pe ko hoʻo huluʻi ʻa e foʻi vitiō “Widow of Nein” (2:22), ʻoku maʻu ʻi he ChurchofJesusChrist.org. ʻOkú ne huluʻi mai hono fakatokangaʻi ʻe he Fakamoʻuí ha faʻē loto-mamahi pea fili ke kiʻi taimi hifo, fakafiemālieʻi ia, mo fakamoʻui hono fohá.

Ko e ngaahi akonaki ʻa e Fakamoʻuí ʻi heʻetau moʻuí

Fakakaukau ke tokoni ke ʻiloʻi ʻe he kau akó ʻa e founga ʻe lava ke fakahaaʻi ai ʻa e ngaahi akonaki ʻa e Fakamoʻuí ʻi he veesi 26–29 ʻi ha ngaahi tūkunga moʻoni ʻo e moʻuí. Te ke lava ʻo fakaʻaongaʻi ha niʻihi ʻo e ngaahi tūkunga ko ʻení pe ngaahi tūkunga kehe ʻoku fekauʻaki lelei ange mo hoʻo kau akó.

Vahevahe ʻa e kau akó ki ha fanga kiʻi kulupu iiki ke aleaʻi pe ko e fē ʻa e ngaahi veesi pe ngaahi kupuʻi lea ʻoku kaunga lelei taha ki he tūkunga takitaha. Poupouʻi ʻa e ngaahi kulupú ke fakakaukau ki ha ngaahi founga kehekehe ʻe lava ke fakaʻaongaʻi ai ʻe he tokotaha takitaha ʻenau tauʻatāina ke filí ke fakahoko ha ngāue ʻoku leleí.

Hili iá pea fakakaukau ke fakaafeʻi ʻa e kulupu takitaha ke toe fai ʻa e ʻekitivitií ʻaki hano faʻu haʻanau tūkunga pē ʻanautolu ʻa ia ʻe lava ke fakaʻaongaʻi ai ʻe ha toʻu tupu ʻa e ngaahi akonaki ʻa e Fakamoʻuí ʻi he vahe 58.

1. Naʻe toki vahe ʻa Sulieti kimuí ni ke ngāue fakaetauhi ki ha fāmili kuo teʻeki ai ke nau fetaulaki. ʻOku ʻikai ke ne fakapapauʻi pe ʻe kamata fēfē.

2. Ko ha tokotaha lelei ʻa e faiako Lautohi Faka-Sāpate ʻa Ané ka ʻoku ʻikai ko ha faiako taukei. ʻOku ʻi ai ha tokolahi ʻi hono kaungā akó ʻoku hangē kuo ʻikai ke nau toe fie tokanga ki he ngaahi lēsoní.

3. ʻOku fakatokangaʻi ʻe Sesimani hangē ʻoku lahi ange ʻa e helaʻia ʻene faʻeé kimuí ni ʻi he angamahení.

4. Naʻe maʻu ʻe Sēvia ha ngaahi fakamatala fakamamahi fekauʻaki mo ha tokotaha ako ʻe taha ʻi he mītia fakasōsialé.

5. ʻOku ʻatā ʻa Sēleti ʻi ha hoʻatā ʻe taha, ʻo ʻikai ha meʻa ʻe fiemaʻu ke ne fai pea naʻe ʻikai ha feituʻu ʻe fiemaʻu ke ne ʻi ai.

Ke fakaʻosí, fakakaukau ke fakaafeʻi ʻa e kau akó ke hivaʻi pe fanongo ki ha foʻi himi ʻokú ne fakamālohia ʻa e ngaahi tefitoʻi moʻoni naʻe ako ʻi he lēsoni ko ʻení. Ko e himi ʻe taha ʻa e “Kuó u Fai ha Lelei?” (Ngaahi Himí, fika 129). Kole ange ke nau fakalaulauloto ki he founga ʻoku kaunga ai ʻa e fakaleá ki ha ngaahi tefitoʻi moʻoni naʻe akoʻi ʻe he Fakamoʻuí ʻi he vahe 58. Fakaafeʻi ha toko taha pe toko ua ʻo e kau akó ke vahevahe mo e kalasí ʻa e meʻa ʻoku nau ongoʻi ʻe finangalo ʻa e Fakamoʻuí ke nau manatuʻi mei heʻenau ako ʻi he ʻaho ní. Mahalo ʻe tokoni ke fakaʻatā ʻa e kau akó ke hiki ʻenau ngaahi fakakaukaú kimuʻa pea fakaafeʻi ha niʻihi ke vahevahe leʻolahi.

Te ke lava ʻo fakaafeʻi ʻa e kau akó ke kumi ha faingamālie ke ngāueʻi ai ʻa e meʻa naʻa nau akó kimuʻa ʻi he lēsoni semineli hokó. ʻE lava ke ke muimuiʻi ia ʻaki haʻo fakaafeʻi ha kau ako ʻe loto-fiemālie ke vahevahe ʻenau aʻusiá mo e kalasí.

Ngaahi Maʻuʻanga Tokoni Lahi Ange

Ko e hā ha ngaahi sīpinga ʻo ha ngaahi founga te tau lava ai ʻo fakaʻaongaʻi ʻa e Tokāteline mo e Ngaahi Fuakava 58:26–29 ʻi heʻetau moʻuí?

Naʻe lea ʻaki ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e meʻá ni hili pē ha taimi nounou mei hono fakafeʻiloaki ʻe he kau taki ʻo e Siasí ʻa e polokalama ngāue fakaetauhí. Naʻe maʻu ʻe ha kāingalotu tokolahi ha ngaahi fehuʻi fekauʻaki mo e founga ke ngāue fakaetauhi lelei ai ki he niʻihi kehé.

ʻOku mau … fokotuʻu atu ke ʻoua te mou tatali ki ha toe fakahinohino lahi ange. Hopo pē ki loto ʻo ngāue leva. Hanga atu kiate kinautolu ʻoku faingataʻaʻiá. ʻOua ʻe moʻutuʻua ʻo fakakaukau pe ʻoku totonu ke ke ʻai peheʻi pe ʻe sai ange ē. Kapau te tau muimui ʻi he ngaahi tefitoʻi moʻoni kuo ʻosi akoʻí, ngāue fakatatau mo e ngaahi kī ʻo e lakanga fakataulaʻeikí, mo kolea ʻa e Laumālie Māʻoniʻoní ke ne tataki kitautolu, he ʻikai ke tau hinga. (Jeffrey R. Holland, “Ko e Ngāue ʻo e Fakaleleí,” Liahona, Nōvema 2018, 77)

Naʻe fakamatalaʻi ʻe Palesiteni Tāleni H. ʻOakesi ʻo e Kau Palesitenisī ʻUluakí ʻa e founga ʻe lava ke fakaʻaongaʻi ai ʻa e ngaahi tefitoʻi moʻoni ko ʻení ʻi heʻetau fekumi ki ha fakahā mo ha fakahinohino mei he ʻOtuá:

Ko e tefitoʻi meʻa ki hano maʻu ha fakahaá ko ha tukupā ke fai ʻa e meʻa kotoa te tau lavá ʻaki hotau iví mo e fakakaukau leleí. ʻOku ʻuhinga ʻeni ki hono fiemaʻu ke tau tokoni mo ngāué.

Ko ha founga mahuʻinga ʻo e feʻunga ke maʻu ha fakahaá ko e hokohoko atu ʻetau tokoní mo e ngāué. ʻOku ou fakatokangaʻi ʻi heʻeku ako ʻa e folofolá ko e lahi taha hono maʻu ʻe he fānau ʻa e ʻOtuá e fakahaá ʻa e taimi ʻoku nau fai ai ha ngāué, ʻo ʻikai ʻi he taimi ʻoku nau nofo noaʻia ai ʻi honau nofoʻangá ʻo tatali ki he ʻEikí ke Ne toki talaatu ʻa e fuofua meʻa ke faí. (Dallin H. Oaks, “In His Own Time, in His Own Way,” Ensign, Aug. 2013, 22)

Naʻe vahevahe ʻe Sisitā Lepeka L. Kuleiveni ʻo e Kau Palesitenisī Lahi ʻo e Kau Finemuí ha founga ʻe lava ke fakaʻaongaʻi ai ʻa e ngaahi tefitoʻi moʻoni ko ʻení ki hono maʻu ʻo ha fakamoʻoní:

Naʻá ku aʻusia ha meʻa fakafiefia mo ha finemui ʻofeina naʻá ne fai ha fehuʻi fakamātoato: “Sisitā Kuleiveni, ʻokú ke ʻiloʻi fēfē nai ʻoku moʻoni ha faʻahinga meʻa fekauʻaki mo e Siasí? Koeʻuhí ʻoku ʻikai ke u ongoʻi ʻe au ha meʻa.”

Kimuʻa peá u ʻoange ha talí, naʻá ku tomuʻa ʻeke ange ha ngaahi fehuʻi. “Fakamatala mai angé fekauʻaki mo hoʻo ako folofola fakatāutahá.”

Naʻá ne tali mai, “ʻOku ʻikai ke u lau ʻe au ʻa e folofolá.”

Naʻá ku fehuʻi ange, “Fēfē ho fāmilí? ʻOku mou ako fakataha nai ʻa e Haʻu ʻo Muimui ʻIate Aú?”

Naʻá ne pehē mai, “ʻIkai.”

Naʻá ku fehuʻi ange fekauʻaki mo ʻene lotú: “Ko e hā ʻokú ke ongoʻi ʻi he taimi ʻokú ke lotu aí?”

Naʻá ne tali mai: “ʻOku ʻikai ke u lotu au.”

Naʻe faingofua pē ʻeku tali ki aí: “Kapau ʻokú ke fie ʻilo ha meʻa, kuo pau ke ke fai ha meʻa.”

ʻIkai nai ʻoku moʻoni ia ʻi ha meʻa pē ʻoku tau fie ako pe fie ʻilo ki ai? Naʻá ku fakaafeʻi hoku kaungāmeʻa foʻoú ke ma kamata hono ako ʻa e ongoongolelei ʻo Sīsū Kalaisí: ke ma lotu, ako, tokoniʻi ʻa e niʻihi kehé, mo falala ki he ʻEikí. He ʻikai hokonoa pē ʻa e uluí. ʻOku fakafou mai ia ʻi he mālohi ʻo e Laumālie Māʻoniʻoní ʻi heʻetau feinga fakamātoato ke ʻilo ia ʻaki ʻetau kole, fekumi, mo tukitukí. ʻOku maʻu ia ʻi he ngāué. (Rebecca L. Craven, “Fakahoko ʻa ia ʻOku Mahuʻinga Tahá,” Liahona, Mē 2022, 62)

Ngaahi ʻEkitivitī Fakalahi ki he Akó

Founga ʻe taha ke kamata ʻakí

Te ke lava ʻo kamata ʻa e lēsoní ʻaki ha tūkunga hangē ko ʻení, ʻa ia ʻe lava ke fakaʻaongaʻi ai ʻe ha taha ʻene tauʻatāina ke filí ke fai ha ngāue lelei pe fili ke ʻoua ʻe ngāue kae ʻoua kuo fakamālohiʻi ke ne fai ia.

Fakakaukauloto ʻokú ke sio ki ha tokotaha toulekeleka ʻoku tō ki lalo ʻi hoʻo lue atu ʻi he halá. Ko e fē ʻi he ngaahi meʻá ni ʻoku totonu ke ke faí?

1. Kiʻi tuʻu ʻo vakai pe ʻe ueʻi koe ʻe he Tamai Hēvaní ke ke tokoni.

2. Tatali ke sio pe ʻe kole tokoni atu ʻa e tokotaha toulekeleká.

3. ʻAmanaki ʻe talaatu ʻe ha taha ʻa e meʻa ke faí.

4. Vakai leva ki he founga te ke lava ai ʻo tokoni ki he tokotaha naʻe toó.

Hili e tali ʻa e kau akó, kole ange ke nau vahevahe ha ngaahi ʻuhinga ʻe ala maʻu ʻe ha taha ʻi heʻene fili ʻa e ngaahi filí takitaha. Fakaafeʻi leva kinautolu ke lau ʻa e Tokāteline mo e Ngaahi Fuakava 58:26–29 pea fakalaulauloto ki he founga ʻe tākiekina ai ʻe heʻetau ngaahi filí ʻa e tuʻunga taupotu taha te tau aʻusiá.

“Faivelenga ʻi he faingataʻá”

Fakaafeʻi ʻa e kau akó ke fakalaulauloto ki ha feʻauhi ʻoku fakakaukauʻi ai ʻe he kau fakamāú ʻa e tuʻunga ʻo e faingataʻá ʻi heʻenau fakapapauʻi ʻa e maaka ʻoku totonu ke maʻu ʻe ha tokotaha. ʻE lava ke kau ʻi he ngaahi sīpingá ʻa e palālelí, sikeiti ʻi he ʻaisí, pe sikeiti hifo ʻi he papasikeiti ʻi he sinoú. Tokoni ke fakafekauʻaki ʻeni ʻe he kau akó ki hotau Fakamaau haohaoa ko Sīsū Kalaisí, ʻa ia ʻoku mahino kakato kiate Ia ʻa e ngaahi faingataʻa ʻoku fekuki mo e tokotaha kotoa pē ʻi he māmaní. Fakaafeʻi leva ʻa e kau akó ke lau ʻa e Tokāteline mo e Ngaahi Fuakava 58:1–4, ʻo kumi ʻa e meʻa ʻoku nau ako fekauʻaki mo e fakamaau ʻa hotau Fakamoʻuí.

Ko hono fakaʻaongaʻi ʻo e veesi 26–29 ʻi onopōní

Ko e founga ʻe taha ke tokoni ai ki he kau akó ke vakai ki he mahuʻinga ʻo e ngaahi akonaki ʻa e Fakamoʻuí ʻi onopōní ko hono ʻoange ki he ngaahi kulupú ha tatau ʻo e ngaahi fakamatala ʻi he konga “Ngaahi Maʻuʻanga Tokoni Lahi Angé.” ʻE lava ke lau ʻe he kulupu takitaha ʻa e ngaahi fakamatalá pea fakapapauʻi pe ko e ngaahi kupuʻi lea fē mei he Tokāteline mo e Ngaahi Fuakava 58:26–29 ʻoku ʻaonga lelei tahá. Fakaafeʻi leva ʻa e kau akó ke vahevahe ha ngaahi tūkunga kehekehe ʻe lava ke fakaʻaongaʻi ai ʻe ha toʻu tupu ʻa e meʻa ʻoku akoʻi ʻe he ngaahi kupuʻi lea mo e ngaahi fakamatala ko iá.

ʻEkitivitī fakafekauʻakí

ʻE lava ke hiki ʻe he tokotaha ako takitaha ʻi ha kiʻi laʻipepa, ha feituʻu ʻe taha te nau ʻi ai ʻi he uike ka hokó (ʻapi, ʻapiako, lotu, ngāue, malaʻe soka, mo e alā meʻa peheé) pea faʻo ia ʻi ha kane. Toho ʻa e ʻū laʻipepá mei he kané ʻo ʻikai ʻi ha hokohoko pau, pea fakaafeʻi ʻa e kalasí ke vahevahe ha ngaahi founga makehe ʻe lava ke fili ai ha taha ke fai lelei ʻi he tūkunga pe feituʻu ko iá.

Kau longomoʻui ki he akó

Ke tokoni ke aleaʻi ʻe he kau akó ʻa e founga ʻe lava ke fakaʻaongaʻi ai ʻa e ngaahi moʻoni ʻi he vahe 58 ki heʻenau aʻusia ʻi he seminelí, fakakaukau ke fakaʻaliʻali ʻa e lea ko ʻeni meia ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá.

“Ko e tokotaha ako ʻokú ne fakaʻaongaʻi ʻa e tauʻatāina ke filí ke ngāue ai ʻo fakatatau mo e ngaahi tefitoʻi moʻoní, ʻokú ne fakaava hono lotó ki he Laumālie Māʻoniʻoní mo fakaafeʻi ʻEne ngaahi akonakí, ʻa hono mālohi fakamoʻoní, pea mo ʻene fakapapauʻi ʻo e fakamoʻoní. ʻOku fiemaʻu ki he ako ʻi he tuí ha ivi fakalaumālie, fakaʻatamai, pea mo fakaesino ka ʻoku ʻikai ke tali fakafiemālie pē. …

“… Kuo pau ke fakaʻaongaʻi ʻe he taha akó ʻa e tui mo e ngāué ka ne lava ʻo maʻu ʻa e ʻilo maʻana” (David A. Bednar, “Seek Learning by Faith,” Ensign, Sept. 2007, 64).

Fakaafeʻi ʻa e kau akó ke fakamatalaʻi ʻa e ngaahi fili ʻe lava ke fai ʻe ha tokotaha ako kimuʻa ʻi he kalasí, lolotonga ʻa e kalasí, pea hili ʻa e kalasí ʻa ia te ne lava ʻo fakalahi pe holoki ʻa e meʻa ʻoku nau ako mo ongoʻi ʻi he seminelí.

Kapau ʻe tokoni, ʻe lava ke aleaʻi ʻe he kau akó ʻa e founga ʻe lava ke fakatupulaki ai ʻe he ngaahi tefitoʻi moʻoni ʻi he vahe 58 mo e fakamatala ʻa ʻEletā Petinaá ʻa ʻenau aʻusia ʻi he ngaahi ʻātakai fakaakó.