Lēsoni 73: Tokāteline mo e Ngaahi Fuakava 58–59

Tokāteline mo e Ngaahi Fuakava 59

Ko e ʻAho ʻo e ʻEikí

ʻI he 1831, naʻe ui ʻe he ʻEikí ha niʻihi ʻo e Kāingalotú ke nau hiki ki he Vahefonua Siakisoni, Mīsulí, ke fokotuʻu ʻa Saione. Lolotonga e nofo ʻa e Palōfita ko Siosefa Sāmitá mo e Kāingalotu ko ʻení, naʻá ne maʻu ha ngaahi fakahinohino mei he ʻEikí fekauʻaki mo hono tauhi ʻo e ʻaho Sāpaté ke māʻoniʻoní. ʻE lava ke tokoni ʻa e lēsoni ko ʻení ki he kau akó ke nau fakaʻapaʻapaʻi ʻa e ʻEikí ʻaki ʻenau fili ke tauhi ʻa e ʻaho Sāpaté ke māʻoniʻoni.

Ngaahi ʻEkitivitī Ako ʻOku Ala Fakahokó

Ngaahi fili fekauʻaki mo e ʻaho Sāpaté

Tokoni ki he kau akó ke nau fakakaukau ki ha niʻihi ʻo e ngaahi tāpuaki mo e ngaahi pole ʻo e talangofua ki he fekau ke tauhi ʻa e ʻaho Sāpaté ke māʻoniʻoní. Te ke lava ʻo fakaʻaongaʻi ʻa e aʻusia ko ʻeni naʻe vahevahe ʻi he konifelenisi lahí. ʻE lava ke tokoni ʻa e fakakaukau ki he tūkunga ʻo ha taha kehé ke teuteuʻi ʻa e kau akó ke nau fakakaukau ki heʻenau ngaahi fakakaukaú, ongó, mo ʻenau ngaahi tōʻongá.

Naʻe vahevahe ʻe ʻEletā Leli Y. Uilisoni ʻo e Kau Fitungofulú ʻa e aʻusia ko ʻení:

Ko homa ʻofefine ko Melé ko ha tokotaha vaʻinga soka tuʻukimuʻa ia ʻi heʻene tupu haké. Naʻe ʻi ai ha taʻu ʻe taha naʻe hau ai ʻenau timí, pea pau ke fai e vaʻinga ko ʻení ʻi he ʻaho Sāpaté. ʻI he aʻu ʻa Mele ko ʻeni ki he tuʻunga finemuí, kuo taʻu lahi hono akoʻi kiate ia ko e Sāpaté ko ha ʻaho ʻo e mālōlō mo e fakafoʻou fakalaumālie, kae ʻikai ko ha fakafiefia. Ka naʻá ne kei ongoʻi ʻa e teke mālohi mei heʻene kau faiakó mo e kaungā vaʻingá ke vaʻingá, peá ne loto foki ke ʻoua naʻa tō lalo ʻene timí. (Larry Y. Wilson, “ʻI he Ngaahi Tefitoʻi Moʻoni Pē ʻo e Anga-māʻoniʻoní,” Liahona, Mē 2012, 104–5)

• Ko e hā ʻe lau ai ʻeni ʻe ha kakai ʻe niʻihi ko ha fili mahuʻinga ʻi he moʻui ʻa Melé kae ʻikai pehē ʻa e niʻihi kehé?

• Kapau ko Mele koe, ʻokú ke pehē ko e hā ʻe mahuʻinga ke ke fakakaukau ki ai kimuʻa peá ke fakahoko ʻa e fili ko ʻení?

Kiʻi fakakaukau angé ki he ngaahi fili ʻokú ke fakahoko fekauʻaki mo e ʻaho Sāpaté. Ko e hā ʻokú ke faʻa fai ke tataki ʻaki hoʻo ngaahi filí? ʻI hoʻo ako ʻi he ʻaho ní, fekumi ki ha ueʻi mei he Laumālie Māʻoniʻoní ke tokoni ke ke ʻiloʻi ʻa e ʻuhinga ke tauhi ai ʻa e Sāpaté ke māʻoniʻoní pea mo e founga te ke lava ʻo fai ai iá.

Ko e ngaahi fekau mo e ngaahi tāpuaki ʻa e ʻEikí

ʻE lava ke ʻoatu ʻe he palakalafi ko ʻení ha puipuituʻa ki he Tokāteline mo e Ngaahi Fuakava 59.

Neongo naʻe ʻikai moʻui lelei ʻa Poli Naiti ʻi hono taʻu 55, ka naʻá ne mavahe mei hono ʻapi ʻi Kolesivili, Niu ʻIoké, ʻo fakapapau ke talangofua ki he ʻEikí pea haʻu ki Saione. Naʻe aʻu ʻa Poli ki Saione (Vahefonua Siakisoni, Mīsulí) pea pekia hili ha ngaahi ʻaho siʻi mei ai. ʻI he ʻaho ʻo hono meʻafakaʻeikí, ko ha Sāpate, naʻe maʻu ai ʻe he Palōfita ko Siosefa Sāmitá ʻa e fakahā ʻoku lekooti ʻi he Tokāteline mo e Ngaahi Fuakava 59. Naʻe akoʻi ʻe he ʻEikí ʻi he fakahā ko ʻení ha ngaahi moʻoni te nau lava ʻo fakafiemālieʻi ʻa e fāmili ʻo Polí (vakai, veesi 1–2). Naʻá Ne folofola foki fekauʻaki mo ʻEne ngaahi fekaú, ʻo fakamamafaʻi ʻa e Sāpaté. ʻOku talaʻofa ʻe he ʻEikí ha ngaahi tāpuaki maʻongoʻonga maʻanautolu ʻoku nau tauhi ʻa e ʻaho Sāpaté ke māʻoniʻoní.

Fakakaukau ke fokotuʻu ha kōlomu ʻe ua ʻi he palakipoé mo e ʻuluʻi hingoa Ngaahi Fakahinohinó mo e Ngaahi Tāpuakí. Fakaafeʻi ʻa e kau akó ke nau ako ʻa e ngaahi veesi ko ʻení ʻi ha fanga kiʻi kulupu iiki pea hiki ʻi he ongo kōlomu ʻi he palakipoé ʻa e meʻa ʻoku nau maʻú. Te nau lava foki ʻo faʻu ha ngaahi lisi tatau ʻi heʻenau tohinoa akó.

Lau ʻa e Tokāteline mo e Ngaahi Fuakava 59:9–20, pea hiki ha lisi ʻe ua, ko e taha ʻo e ngaahi fakahinohino ʻoku ʻomi ʻe he ʻEikí ki heʻetau ngaahi ngāue mo e tōʻonga fakakaukau ʻi he Sāpaté mo ha lisi ʻe taha ki he ngaahi tāpuaki kehe ʻokú Ne foaki mai maʻatautolú.

Fakaafeʻi ʻa e kau akó ke vahevahe ʻa e meʻa naʻa nau akó. ʻOange foki ha faingamālie ke nau fai ai ha ngaahi fehuʻi, pea aleaʻi fakataha e ngaahi fehuʻi ʻa e kau akó. ʻE ala tokoni ke kumi ʻe he kau akó ʻa e ngaahi fakaʻuhinga ʻo e ngaahi lea faingataʻá ʻo ka fiemaʻu. ʻE lava ke aleaʻi mo ʻiloʻi ʻe he kau akó ʻa e ʻuhinga ʻo e “fai hoʻo ngaahi huú ki he Fungani Māʻolungá” (veesi 10) mo e “fai hoʻo ngaahi foakí pea mo hoʻo ngaahi ouau toputapú ki he Fungani Māʻolungá” (veesi 12). ʻE lava ke ke tokoni ke tataki e fealēleaʻaki ʻa e tokotaha akó ʻaki ha ngaahi fehuʻi hangē ko ʻení:

• Ko e hā ha moʻoni te tau lava ʻo ʻilo mei he ngaahi veesi ko ʻení fekauʻaki mo e taumuʻa ʻo e ʻaho Sāpaté?

  Fakaafeʻi ʻa e kau akó ke vahevahe ha ngaahi moʻoni pē naʻa nau maʻu. Te ke lava ʻo kole ki he kau akó ke aleaʻi ʻa e ʻuhinga ʻoku nau pehē ai ʻoku mahuʻinga ʻa e ngaahi moʻoni ne nau ʻiló. Fakataha mo ha ngaahi moʻoni kehe ʻoku vahevahe ʻe he kau akó, tokoni ki he kau mēmipa ʻo e kalasí ke nau ʻiloʻi mo aleaʻi ko e Sāpaté ko ha ʻaho ia ke tau fakahaaʻi ai ʻetau līʻoa ki he ʻOtuá (vakai, veesi 10).

• ʻE tokoniʻi fēfē nai koe ʻi hoʻo moʻuí ʻi hoʻo maʻu ha ʻaho ke tokanga taha ai ki hoʻo ʻofa mo e līʻoa ki he ʻOtuá?

Ko hono fakaʻapaʻapaʻi ʻo e ʻEikí ʻi he Sāpaté

ʻE lava ke tokoni ʻa e ʻekitivitī ko ʻení ke mahino ki he kau akó ʻa e founga te nau lava ai ʻo fakaʻapaʻapaʻi ʻa e ʻEikí ʻo fakafou ʻi heʻenau ngaahi fili ʻi he ʻaho Sāpaté. Mahalo te ke fie hiki ʻa e fehuʻi lekomeni temipalé ʻi lalo ʻi he palakipoé.

Lolotonga ʻa e ngaahi ʻinitaviu lekomeni temipalé, ʻe fehuʻi atu kiate koe:

“ʻOkú ke feinga nai ke tauhi e ʻaho Sāpaté ke māʻoniʻoni, ʻi ʻapi pea ʻi he lotú; kau ki hoʻo ngaahi fakatahá; teuteu mo moʻui taau ke maʻu ʻa e sākalamēnití; pea moʻui ʻo fakatatau pea mo e ngaahi fono mo e ngaahi fekau ʻo e ongoongoleleí?”

Ke tokoni ke ke fakakaukau ki he founga te ke lava ai ʻo talangofua ki he fekau ke tauhi ʻa e ʻaho Sāpaté ke māʻoniʻoní, hiki ha ngaahi fakakaukau ʻi hoʻo tohinoa akó fekauʻaki mo e founga te ke lava ai ʻo fakaʻapaʻapaʻi ʻa e ʻEikí ʻaki hono tauhi ʻa e ʻaho Sāpaté ke māʻoniʻoní.

ʻE lava ke tokoni ʻa e ngaahi maʻuʻanga tokoni ko ʻení ke ʻiloʻi ʻe he kau akó ha ngaahi founga lahi ange ke tauhi ʻa e Sāpaté ke māʻoniʻoni ʻi ʻapi pea ʻi he lotú. Fakakaukau ke fakaʻaliʻali kinautolu mo ʻoange ha taimi ki he kau akó ke nau ako mo tānaki atu ki heʻenau lisi ʻo e ngaahi fakakaukaú.

Lau ʻa e ngaahi potufolofola ko ʻení ke ʻiloʻi ʻa e meʻa naʻe fai ʻe Sīsū Kalaisi ʻi he Sāpaté:

• Mātiu 12:9–13

• Luke 4:16

Ako ha niʻihi ʻo e ngaahi maʻuʻanga tokoni ko ʻení ki ha ngaahi fakakaukau lahi ange ki hono tauhi ʻo e ʻaho Sāpaté ke māʻoniʻoní:

• “ʻOfa ki he ʻOtuá, ʻofa ki ho kaungāʻapí” ʻi he Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí ([2022], 10–14)

• Ngaahi Tefito ʻo e Ongoongoleleí, “ʻAho Sāpaté” mo e “Sākalamēnití,” topics.ChurchofJesusChrist.org

  ʻE lava foki ke ke huluʻi ʻa e “Upon My Holy Day—Honoring the Sabbath” (1:30) ke maʻu ha faleʻi lahi ange meia ʻEletā Sefilī R. Hōlani.

  ʻE lava foki ke hoko ʻa e ongo fakamatala ko ʻeni mei he ChurchofJesusChrist.org ko ha maʻuʻanga tokoni ʻaonga ke vahevahe: “Goal: Honor and Enjoy the Sabbath Day” mo e “Prepare for the Sacrament All Week Long.”

  Hili hono maʻu ʻe he kau akó ha taimi feʻunga ke nau ako aí, fakakaukau ke fakaafeʻi kinautolu ke vahevahe ʻa e meʻa naʻa nau akó. ʻE lava ke ke fakaafeʻi kinautolu ke hiki ha konga ʻo e ngaahi meʻa naʻa nau ʻiló ʻi he palakipoé. Fakakaukau foki ke fai ʻa e ngaahi fehuʻi ko ʻení ke tokoni ki he kau akó ke vahevahe ʻenau ngaahi aʻusiá.

• Ko e hā kuó ne tokoniʻi koe ke ke fakahaaʻi ha līʻoa ki he ʻOtuá ʻi he ʻaho Sāpaté? Ko e hā ha meʻa makehe kuo hoko kiate koe tupu mei he ngaahi ʻulungaanga ko ʻení?

Mahalo ʻe fie ako lahi ange ʻa e kau akó mei he aʻusia ʻa Mele naʻe fakafeʻiloaki ʻi he kamataʻanga ʻo e lēsoní. Te ke lava ʻo ʻoange ki he kau akó ʻa e toenga ʻo e talanoá ʻaki hono huluʻi ʻo e vitiō “ʻI he Ngaahi Tefitoʻi Moʻoni Pē ʻo e Anga-māʻoniʻoní” mei he taimi 5:24 ki he 6:26, ʻoku maʻu ʻi he ChurchofJesusChrist.org.

Faʻu ha palani

Fakakaukau ke fakaʻaliʻali ʻa e fakaafe ko ʻení. Te ke lava ʻo fakaafeʻi ha kau ako toko siʻi ʻe fie vahevahe ʻenau palaní hili hono faʻu kinautolú.

Faʻu ha palani ʻi hoʻo tohinoa akó fekauʻaki mo e founga te ke feinga ai ke fakaʻapaʻapaʻi ʻa e Fakamoʻuí ʻi he ʻaho Sāpaté. ʻE lava ke ke fakakaukau ki he ngaahi meʻa te ke kamata fakahokó, hokohoko atu hono fakahokó, pe taʻofi hono fakahokó, ʻi ʻapi pe ʻi he lotú.

Ngaahi Maʻuʻanga Tokoni Kehé

Ko e hā ʻoku tauhi ai ʻe he kau Kalisitiané ʻa e ʻaho Sāpaté?

“ʻI he kuonga ʻo e Fuakava Motuʻá, naʻe tauhi ai ʻe he kakai fuakava ʻa e ʻOtuá ʻa e Sāpaté ʻi hono fitu ʻo e ʻaho ʻo e uiké koeʻuhí he naʻe mālōlō ʻa e ʻOtuá ʻi he ʻaho hono fitú ʻi Heʻene fakatupu ʻa e māmaní (vakai, Sēnesi 2:2). Hili ʻa e Toetuʻu ʻa Sīsū Kalaisí, ʻa ia naʻe hoko ʻi he ʻuluaki ʻaho ʻo e uiké (vakai, Maʻake 16:2), naʻe kamata leva hono tauhi ʻe he kau ākonga ʻa e ʻEikí ʻa e Sāpaté ʻi he ʻuluaki ʻaho ʻo e uiké, ʻa ia ko e Sāpaté (vakai, Ngāue 20:7)” (Ngaahi Tefito ʻo e Ongoongoleleí, “ʻAho Sāpaté,” topics.ChurchofJesusChrist.org).

ʻE tokoniʻi fēfē nai au ʻe hono fakaʻapaʻapaʻi ʻo e Sāpaté ke fakahaaʻi ai ʻeku līʻoa ki he ʻOtuá?

Naʻe akonaki ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻOku tau hū ki he Tamaí ʻi he ʻaho Sāpaté ʻi he huafa ʻo e ʻAló, ʻi heʻetau kau ki he ngaahi ouaú mo ako ʻo kau ki hono maʻu, manatua, mo fakafoʻou ʻa e ngaahi fuakavá. Ko ʻetau fakakaukaú, ngāué, mo e ʻulungāngá ko ha ngaahi fakaʻilonga ia ʻoku tau ʻave ki he ʻOtuá mo fakahaaʻi ai ʻetau ʻofa kiate Iá ʻi Hono ʻaho tapú. (David A. Bednar, “Ngaahi Talaʻofa Lahi ʻAupito mo Mahuʻinga,” Liahona, Nōvema 2017, 92)

Ko e hā ʻoku finangalo ʻa e Fakamoʻuí ke mahino kiate kitautolu fekauʻaki mo e Sāpaté?

Naʻe fakamatalaʻi ʻe Palesiteni Lāsolo M. Nalesoni ʻo pehē:

ʻOku ou tui [ʻoku finangalo ʻa Sīsū Kalaisi] ke mahino kiate kitautolu ko e Sāpaté ko ʻEne meʻaʻofa ia kiate kitautolu, ʻokú ne ʻomi ha mālōlō moʻoni mei he haʻahaʻa ʻo e moʻui fakaʻahó pea mo ha faingamālie ke fakafoʻou fakalaumālie mo fakatuʻasino ai. Naʻe foaki mai ʻe he ʻOtuá ʻa e ʻaho makehé ni, ʻo ʻikai ki he fakafiefiá pe ngāue fakaʻahó ka ke mālōlō ai mei he ngāué, ko ha tokoni fakatuʻasino mo fakalaumālie. (Russell M. Nelson, “ʻOku Fakafiefia ʻa e ʻAho Sāpaté,” Liahona, Mē 2015, 129)

ʻOku hoko fēfē nai ʻa e Sāpaté ko ha ʻaho ʻo e mālōlō?

Naʻe vahevahe ʻe Palesiteni Lāsolo M. Nalesoni ha aʻusia peá ne akonaki ʻo pehē:

Naʻá ku ʻuluaki maʻu ʻa e fiefiá ʻi he Sāpaté ʻi he ngaahi taʻu lahi kuo hilí ʻi heʻeku kei hoko ko ha taha faitafa femoʻuekiná, naʻá ku ʻilo ai naʻe hoko ʻa e Sāpaté ko ha ʻaho ʻo e fakaakeake fakafoʻituitui. ʻI he fakaʻosinga ʻo e uiké, naʻe mamahi hoku ongo nimá ʻi hono toutou olo ʻaki ʻa e koá, vaí, mo ha polosi fefeka. Naʻá ku toe fiemaʻu foki ha kiʻi mālōlō mei he mafasia ʻo e ngāue faingataʻá ni. Naʻe ʻomi ʻe he Sāpaté ʻa e fakafiemālie naʻe fiemaʻu lahí. …

ʻOku ʻuhinga ʻa e foʻi lea Sāpaté ʻi he lea faka-Hepeluú ko e “mālōlō.” ʻOku foki ʻa e taumuʻa ʻo e Sāpaté ki he Fakatupu ʻo e māmaní, ʻa ia naʻe ʻosi e ʻaho ʻe ono ʻo e ngāué, naʻe mālōlō leva ʻa e ʻEikí mei he ngāue ʻo e fakatupú. (Russell M. Nelson, “ʻOku Fakafiefia ʻa e ʻAho Sāpaté,” Liahona, Mē 2015, 129)

ʻOku ʻuhinga ki he hā ke tauhi ʻi he loto-fiefia ʻa e Sāpaté kae “ʻikai ʻi he kata lahi”? (Tokāteline mo e Ngaahi Fuakava 59:15)

Naʻe akonaki ʻa ʻEletā Lisiate G. Sikoti (1928–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Tokangaʻi ʻa e tūkuhuá pe fakakatá. ʻOku hanga ʻe he kata leʻolahí ʻo fakaʻitaʻi ʻa e Laumālié. ʻOku tokoni ʻa e poto ʻi he tūkuhua leleí ki hono maʻu ʻo e fakahaá; kae ʻikai ko e kata leʻolahí. ʻOku hanga ʻe he poto ʻi he tūkuhuá ʻo toʻo atu e ngaahi mafasia ʻo e moʻuí. (Richard G. Scott, “Founga Hono Maʻu ʻo e Fakahā mo e Tataki Fakalaumālie ki Hoʻo Moʻui Fakatāutahá,” Liahona, Mē 2012, 46)

Ngaahi ʻEkitivitī Fakalahi ki he Akó

Ko e ako ke tauhi ʻa e ʻaho Sāpaté ke māʻoniʻoní

Kapau naʻá ke fakafeʻiloaki ʻa Mele mo ʻene fili ke vaʻinga soka pe ʻikai ʻi he Sāpaté, fakakaukau ʻi he fakaʻosinga ʻo e lēsoní, ke kole ki he kau akó ke nau fakakaukauloto ʻoku nau fai ha faleʻi kia Mele. ʻE lava ke vahevahe ʻe he kau akó ʻa e meʻa kuo nau ako fekauʻaki mo e ʻaho Sāpaté mo e founga ʻe ala tākiekina ai ʻenau ngaahi filí. Te nau lava ʻo tulamaʻi pe aleaʻi ʻa e meʻa naʻa nau akó ʻi ha fanga kiʻi kulupu iiki.

“Mo e mata ʻoku hanga taha pē ki hoku fakalāngilangiʻí” (Tokāteline mo e Ngaahi Fuakava 59:1)

ʻE lava ke tokoni ʻa e ʻekitivitī ko ʻení ki he kau akó ke nau fakalaulauloto ki he ʻuhinga ʻo e maʻu ha mata ʻoku hanga taha pē ki hono fakalāngilangiʻi ʻo e ʻOtuá.

Fakaʻaliʻali ha tā ʻo e Fakamoʻuí. Fakaafeʻi ʻa e kau akó ke nau kuku fakangahomohomo honau nima ʻe taha, kuikui ʻa e mata ʻe taha, pea sio ki he fakatātaá ʻi he kiʻi ava honau nimá. Kole ki he kau akó ke nau fakamatalaʻi ʻa e meʻa ʻoku nau sio ki aí. Fakaafeʻi leva ʻa e kau akó ke ʻāʻā honau mata ʻe tahá pea talaatu ʻa e ngaahi meʻa kotoa kuo nau lava ʻeni ʻo sio ki aí te ne tohoakiʻi kinautolu mei heʻenau tokanga taha ki he Fakamoʻuí.

Fakaafeʻi ʻa e kau akó ke fakamatalaʻi ʻa e founga ʻe lava ke fekauʻaki ai ʻa e ʻekitivitī ko ʻení mo hono maʻu fakalaumālie ha mata ʻoku hanga taha pē ki hono fakalāngilangiʻi ʻo e ʻOtuá. Fakaafeʻi ʻa e kau akó ke vahevahe ha ngaahi founga te nau lava ai ʻo taʻofi ʻa e ngaahi meʻa te nau tohoakiʻi ʻenau tokangá mei he Fakamoʻuí, tautautefito ki Hono ʻaho tapú.

“ʻOua naʻá ke … fai ha faʻahinga meʻa pehē” (Tokāteline mo e Ngaahi Fuakava 59:6)

Hili hono fekauʻi ʻa e Kāingalotú ke ʻoua ʻe kaihaʻa, tono, pe fakapoó, naʻe tānaki atu ʻe he ʻEikí “pe fai ha faʻahinga meʻa pehē” (Tokāteline mo e Ngaahi Fuakava 59:6). Tokoni ki he kau akó ke nau fakakaukau ki he ʻuhinga ʻo e kupuʻi lea ko ʻení pea mo hono ʻaonga ʻi heʻetau ngaahi filí. Te ke lava ʻo kole ki he kau akó ke nau aleaʻi ʻa e ʻuhinga ʻo e kaihaʻá. Hili iá pea kole ange ke nau fakakaukau ki ha ngaahi tōʻonga ʻoku ʻikai ko e kaihaʻa ka ʻoku “[tatau mo ia].” Te ke lava ʻo fai ʻa e meʻa tatau pē ki he tonó mo e tāmaté. Tokoni ki he kau akó ke nau ʻiloʻi ʻa e maluʻi ʻoku ʻomi ʻe he ʻOtuá ʻaki hono ʻomi kiate kitautolu ʻa e ngaahi fekau ko ʻení.

Fakafetaʻi ki he ʻOtuá mo fakamoʻoniʻi Hono toʻukupú “ʻi he ngaahi meʻa kotoa pē” (Tokāteline mo e Ngaahi Fuakava 59:7, 21)

Fakakaukau ke lau fakakalasi ʻa e Tokāteline mo e Ngaahi Fuakava 59:7, 21, ʻo fekumi ki he ngaahi fekau ʻa e ʻEikí. Fakaafeʻi ʻa e kau akó ke fakakaukau ki he founga ʻe lava ke liliu ai kitautolu ʻi heʻetau fakamālōʻia maʻu pē ʻa e fakahinohino mo e ngaahi tāpuaki ʻa e ʻOtuá ʻi heʻetau moʻuí. ʻOange ha taimi ki he kau akó ke nau fakalaulauloto ai ki he ngaahi tāpuaki ʻa e ʻOtuá ʻi heʻenau moʻuí, pea poupouʻi kinautolu ke fili ha ngaahi founga pau te nau lava ai ʻo fakahaaʻi ʻenau houngaʻiá ki he ʻOtuá.