Դաս 72. Վարդապետություն և Ուխտեր 58–59

Վարդապետություն և Ուխտեր 58․38–60

«Ով որ ապաշխարել է … նա ներվում է»

Նույնիսկ Հիսուս Քրիստոսի ամենահավատարիմ աշակերտները ապաշխարության և ներման կարիք ունեն: Վարդապետություն և Ուխտեր 58 բաժնում Հիսուս Քրիստոսը հրավիրում Իր Եկեղեցու մի քանի ղեկավարների ապաշխարել և խոստանում է ներել նրանց մեղքերը, եթե նրանք հնազանդվեն: Այս դասի նպատակն է օգնել ուսանողներին հույս գտնել, որ Փրկիչը ներում է նրանց, ովքեր ապաշխարում են իրենց մեղքերից:

Հնարավոր ուսումնական վարժություններ

Խոցվածը

Կարող եք սկսել դասը՝ քննարկում ծավալելով այն մասին, որ մենք կարիք ունենք, որ Հիսուս Քրիստոսը ների մեր մեղքերը։

Դա կարող եք դա անել՝ հետևյալ նկարը ցուցադրելով կամ գրատախտակին դեռահասի գծապատկեր նկարելով: Նախքան ստորև ներկայացված իրավիճակով կիսվելը՝ հետաքրքրություն ստեղծելու համար կարող եք առաջարկել դասարանին անուն տալ նրան և մանրամասներ հորինել նրա կյանքի մասին։

Պատկերացրեք, որ ձեր ընկերը ձեզ ասում է, որ անցյալ գիշեր ընկել է սանդղավանդից: Նա ուժեղ ցավ է զգում շնչելիս և կարծում է, որ ձեռքը կոտրված է։ Նա որոշել է բժշկի չդիմել, քանի որ անհանգստանում է, որ բժիշկը և ուրիշ մարդիկ կհիասթափվեն իրենից, եթե իմանան, որ ինքը որոշել է մոտենալ այդ վտանգավոր եզրին։ Ուստի նա մտադիր է իր ցավը գաղտնի պահել՝ հուսալով, որ ժամանակի ընթացքում ամեն ինչ կլավանա և կանցնի:

• Ինչպե՞ս եք վերաբերվում ձեր ընկերոջ մտադրությանը: Ինչո՞ւ։

Հիմա պատկերացրեք նմանատիպ իրավիճակ, բայց այս անգամ ձեր ընկերն ասում է, որ լուրջ մեղք է գործել։ Ապաշխարության մասին Փրկչի ուսմունքներին հետևելու փոխարեն նա որոշել է թաքցնել իր մեղքը և հուսալ, որ ժամանակի ընթացքում ամեն ինչ կկարգավորվի:

Առաջարկեք ուսանողներին կիսվել մի քանի հարցերով կամ մտահոգություններով, որոնք կարող են պատճառ հանդիսանալ, որպեսզի դեռահասը չապաշխարի:

• Ի՞նչ խորհուրդ կտայիք ձեր ընկերոջը:

Փրկիչը ուսուցանում է ապաշխարության մասին

Բացատրեք, որ 1831 թվականին Ջոզեֆ Սմիթը և այլ երեցներ մեկնեցին Միսսուրի, որտեղ Տերը հրահանգեց ոմանց մնալ և կառուցել Սիոն քաղաքը: Հրահանգելիս Տերը նրանցից մի քանիսին խորհուրդ տվեց ապաշխարել իրենց մեղքերից (տես Վարդապետություն և Ուխտեր 58.14–15, 38–41, 60)։

Կարդացեք Վարդապետություն և Ուխտեր 58:60 հատվածը՝ տեսնելու Տիրոջ խորհուրդը Զիբա Պետերսոն անունով մի մարդու:

• Ձեր կարծիքով, ի՞նչ թյուրըմբռնումներ կարող էր ունենալ Զիբան Աստծո կամ ապաշխարության վերաբերյալ, որոնք կարող էին դրդել նրան թաքցնել իր մեղքերը: (Կարող եք կարդալ Ալմայի խորհուրդը իր որդուն՝ մեր մեղքերը թաքցնելու արդյունքների վերաբերյալ: Տես Ալմա 39․7–9:)

• Ձեր կարծիքով, այս թյուրըմբռնումներից որո՞նց պատճառով մարդիկ այսօր էլ դժվարություններ ունեն։

Կարող եք ցուցադրել հետևյալ հուշումը և ուսանողներին ժամանակ տալ՝ անհատապես խորհելու կամ գրելու իրենց մտքերը:

Այնուհետև առաջարկել նրանց դասի ընթացքում փնտրել ուսմունքներ, որոնք կարող են օգնել իրենց ապաշխարելու ջանքերում՝ ողջ կյանքի ընթացքում:

Խորհեք, արդյոք կա՞ն մեղքեր, որոնց համար դուք խուսափում եք ապաշխարել: Եթե այո, մտածեք, թե ինչ պատճառներ են ձեզ հետ պահում։

Հարցեր և պատասխաններ

Երբ ուսանողներն ուսումնասիրեն հետևյալ հատվածը, կարող եք հիշեցնել նրանց ապաշխարության վերաբերյալ այն հարցերի կամ մտահոգությունների մասին, որոնցով իրենք կիսվել էին դասի սկզբում:

Կարդացեք Վարդապետություն և Ուխտեր 58.42–43 հատվածները՝ փնտրելով Փրկչի ուսմունքները, որոնք օգնում են պատասխանել այն հարցերին և մտահոգություններին, որ մարդիկ կարող են ունենալ ապաշխարության վերաբերյալ:

Վարդապետություն և Ուխտեր 58․42–43 հատվածները սուրբ գրությունների սերտման հատվածներ են։ Առաջարկեք ուսանողներին նշել սուրբ գրությունների սերտման հատվածները տարբերակիչ ձևով, որպեսզի կարողանան հեշտությամբ գտնել:

Ուսանողներին բաժանեք փոքր խմբերի: Առաջարկեք նրանց կիսվել հատվածներ 42–43 այն արտահայտություններով, որոնք օգնում են իրենց պատասխանել որոշակի հարցերի կամ մտահոգությունների, կամ որոնք կարևոր են իրենց համար: Ապա առաջարկեք ուսանողներին դասարանի հետ կիսվել իրենց սովորածով: Երբ ուսանողները կիսվեն, համոզվեք, որ նրանք հասկանում են, որ եթե մենք ապաշխարենք մեր մեղքերից, Տերը կների մեզ, և որ ապաշխարելու համար Տերը պահանջում է, որ մենք խոստովանենք և թողնենք մեր մեղքերը։

• Ինչպե՞ս կարող են այս ճշմարտություններն օգնել մարդկանց հաղթահարել այն մտահոգությունները, որ նրանք կարող են ունենալ ապաշխարության վերաբերյալ:

Եթե ուսանողները ապաշխարության վերաբերյալ հարցեր ունենան, որոնց պատասխաններն այս հատվածները չեն տալիս, որոշեք՝ արդյոք ավելի արդյունավետ կլինի օգնել նրանց գտնել պատասխաններն այս դասի կամ առաջիկա դասի ժամանակ, թե առաջարկել նրանց օգտվել աստվածայնորեն սահմանված աղբյուրներից, որտեղ նրանք կարող են ինքնուրույն փնտրել պատասխանները:

(Նշում․ «Օժանդակ նյութեր» բաժնում տեղադրված են նյութեր, որոնք կարող են օգտակար լինել, եթե ուսանողները հարցեր ունենան վարդապետության սերտման այս հատվածի որոշակի հասկացությունների, օրինակ՝ խոստովանության կամ մեղքերը թողնելու վերաբերյալ)։

Տերը ներում է

Այս բաժինը կոչված է օգնելու ուսանողներին հույս գտնել, որ Փրկիչը ներում է նրանց, ովքեր ապաշխարում են: Աղոթքով որոշեք, թե աղբյուրներից և առաջարկներից որն ավելի արդյունավետ կերպով կօգնի ձեր ուսանողներին հաջողությամբ պատրաստել իրենց պատասխանները հետևյալ վարժության համար:

Ձեր ուսումնասիրության օրագրում պատրաստեք մի պատասխան, որով կարող եք կիսվել մեկի հետ, ով անհանգստանում է, որ ինքը չի կարող ներվել: Փրկչի էության և խոստումների մասին ինչով կարող եք կիսվել, որը կարող է օգնել այդ մարդուն հաղթահարել ցանկացած մտահոգություն: Ընտրեք հետևյալ տարբերակներից մի քանիսը, որոնք կօգնեն ձեզ պատրաստել ձեր պատասխանը։

1. Սուրբ գրություններ․ սուրբ գրություններում փնտրեք հատվածներ, որոնք պարունակում են Տիրոջ խոստումները նրանց, ովքեր ապաշխարում են, կամ պատմություններ, որոնք ցույց են տալիս ներելու Նրա պատրաստակամությունը: Կարող է օգտակար լինել Վարդապետության սերտման հիմնարար փաստաթղթի (2023) Վարդապետության սերտման հատվածների ցանկը։ Այս սուրբ գրություններից մի քանիսից կարող եք խաչաձև հղում կատարել կամ կապել Վարդապետություն և Ուխտեր 58.42–43 հատվածների հետ։

2. Անձնական վկայություն․ հիշեք օրինակներ, երբ դուք ականատես եք եղել Փրկչի պատրաստակամությանը՝ ներելու և օգնելու մարդուն փոխվել: (Մի կիսվեք մեղքերի անվանումներով կամ մանրամասներով:)

3. «Հիսուս Քրիստոսը կօգնի ձեզ» բաժինը Երիտասարդներին զորացնելու համար. Ընտրություններ կատարելու ուղեցույցում ([2022], 6–9)․ Փնտրեք Երկնային Հոր և Հիսուս Քրիստոսի մասին ճշմարտություններ, որոնք մեզ հույս են տալիս:

4. Ժամանակակից մարգարեներ․ փնտրեք Եկեղեցու ժամանակակից ղեկավարների հայտարարությունները, որոնք օգնում են մեզ հասկանալ Հիսուս Քրիստոսի ներողամիտ էությունը:

Ստորև ներկայացված է Տասներկու Առաքյալների Քվորումից երեց Դիթեր Ֆ. Ուխդորֆի խոսքերից մի օրինակ, որով կարող եք կիսվել ձեր ուսանողների հետ.

Հիսուս Քրիստոսը երիտասարդների ուժն է

Երեց Ուխդորֆն ուսուցանում է, որ Հիսուս Քրիստոսը լավագույն ուղեցույցն է ընտրություն կատարելու համար: Նա նաև ներկայացնում է Երիտասարդներին զորացնելու համար նոր ուղեցույցը։

Իմ սիրելի երիտասարդ ընկերներ, եթե Փրկիչը հենց հիմա այստեղ լիներ, ի՞նչ կասեր Նա ձեզ: …

Գուցե դուք հիշեք ձեր թույլ տված սխալները, գայթակղության պահերը, բաներ, որոնք կցանկանայիք, որ արած չլինեիք, կամ կցանկանայիք, որ ավելի լավ անեիք։

Փրկիչը կզգար դա, և ես գիտեմ, որ Նա կհավաստիացներ ձեզ այն խոսքերով, որոնք Նա ասել է սուրբ գրություններում.

«Մի վախեցեք» [Ղուկաս 5․10]։

«Մի կասկածեք» [Վարդապետություն և Ուխտեր 6.36]։

«Ուրախ եղեք» [Մատթեոս 14.27]։

«Ձեր սրտերը թող չխռովվեն» [Հովհաննես 14.1, 27]։

Չեմ կարծում, որ Նա արդարացումներ կփնտրեր ձեր սխալների համար: Նա չէր նվազեցնի դրանք: Ոչ, Նա կխնդրեր ձեզ ապաշխարել՝ թողնել ձեր մեղքերը, փոխվել, որպեսզի Ինքը կարողանա ներել ձեզ: Նա կհիշեցներ ձեզ, որ 2000 տարի առաջ Ինքը այդ մեղքերը վերցրեց Իր վրա, որպեսզի դուք կարողանաք ապաշխարել: Դա մեր սիրառատ Երկնային Հոր կողմից մեզ տրված երջանկության ծրագրի մի մասն է: (Դիտեր Ֆ. Ուխդորֆ, «Հիսուս Քրիստոսը երիտասարդների ուժն է», Լիահոնա, նոյ. 2022, 9)։

Պատասխանները պատրաստելու համար բավարար ժամանակ տրամադրելուց հետո ուսանողներին առաջարկեք փոքր խմբերում կիսվել իրենց սովորածով, որպեսզի բոլոր նրանք, ովքեր ցանկանում են կիսվել, հնարավորություն ունենան դա անելու:

Կարող եք նաև ցուցադրել «Փրկիչն ուզում է ներել» (5:50) տեսանյութը, որը հասանելի է ChurchofJesusChrist.org կայքում՝ որպես Փրկչի՝ ներելու մշտական ցանկության օրինակ:

Կարող եք ավարտել դասը Փրկչի ներողամիտ էության մասին ձեր վկայությամբ և խրախուսել ուսանողներին ապաշխարել՝ Նրա խոստումների հանդեպ հավատքով:

The Savior Wants to Forgive

A former addict and repeat convict shares his experiences with the Savior’s ability and willingness to forgive him again and again, even when he felt undeserving.

Անգիր սովորեք

Կարող եք օգնել ուսանողներին այս դասի ընթացքում անգիր սովորել վարդապետության սերտման հղումը և հիմնական արտահայտությունը, ապա կրկնել դրանք հետագա դասերի ժամանակ: Սուրբգրային հիմնական արտահայտությունը հետևյալն է․ «Ով որ ապաշխարել է իր մեղքերից, նա ներվում է»: Անգիր սովորելու համար նախատեսված վարժությունների վերաբերյալ գաղափարները ներկայացված են հավելվածում՝ «Վարդապետության սերտման կրկնության վարժություններ» բաժնում:

Օժանդակ նյութեր

Ինչու եմ ես դեռ հիշում իմ մեղքերը: Արդյո՞ք դա նշանակում է, որ ես չեմ ներվել:

Տասներկու Առաքյալների Քվորումից երեց Դիտեր Ֆ. Ուխդորֆն ասել է․

Point of Safe Return

The gift of the Atonement of Jesus Christ provides us at all times and at all places with the blessings of repentance and forgiveness.

Սատանան կփորձի ստիպել մեզ հավատալ, որ մեր մեղքերը չեն ներվել, քանի դեռ մենք կարող ենք հիշել դրանք։ Սատանան ստախոս է, նա փորձում է աղավաղել մեր տեսադաշտը և հեռացնում է մեզ ապաշխարության և ներման ուղուց: Աստված չի խոստացել, որ մենք չենք հիշի մեր մեղքերը: Հիշելը կօգնի մեզ չկատարել նորից նույն սխալները: Բայց եթե մենք մնանք ճշմարիտ և հավատարիմ, մեր մեղքերի հիշողությունները ժամանակի ընթացքում կմեղմանան: Դա կլինի ապաքինման և սրբագործման անհրաժեշտ ընթացքի մասը։ (Դիտեր Ֆ. Ուխդորֆ «Ապահով վերադարձի կետ», Լիահոնա, մայիս 2007, 101)

Արդյո՞ք ապաշխարելուց հետո Տերն իրականում մոռանում է, որ մենք մեղք ենք գործել:

Տասներկու Առաքյալների Քվորումից երեց Ջերիթ Վ. Գոնգը բացատրել է.

Երբ ապաշխարում ենք, երբ խոստովանում և թողնում ենք մեր մեղքերը, Տերն ասում է, որ Նա այլևս չի հիշում դրանք: Այնպես չի, որ Նա մոռանում է, այլ ուշագրավ կերպով Նա նախընտրում է չհիշել դրանք, ոչ էլ մեզ է պետք հիշել դրանք։ (Ջերիթ Վ. Գոնգ, «Վստահեք նորից», Լիահոնա, նոյեմբեր 2021, 98)

Ինչպե՞ս կարող եմ իմանալ, որ ներվել եմ անկեղծորեն ապաշխարելուց հետո:

Դիտեք «Ինչպե՞ս ենք իմանում, որ Տերը ներել է մեզ» տեսանյութը (3:18)։

How Do We Know the Lord Has Forgiven Us

(The Divine Gift of Forgiveness, Chapter 23) Elder Neil L. Andersen shares a story of a man who felt guilty for a tragic airplane accident involving his wife and two friends. The Savior has power to lift our burden of guilt.

Ես ե՞րբ ունեմ եպիսկոպոսի օգնության կարիքը՝ ապաշխարելու համար:

Տասներկու Առաքյալների Քվորումից Երեց Նիլ Լ․ Անդերսենն ասել է.

Եպիսկոպոսները և ցցի նախագահները ձեռնադրվել և կարգվել են՝ Իսրայելում որպես դատավորներ ծառայելու համար: Անշուշտ, միայն Տերը կարող է մեղքեր ներել, սակայն քահանայության ղեկավարները կարևոր դեր են խաղում ծանր մեղքերից ապաշխարելու գործընթացում: (Նիլ Լ. Անդերսեն, Ներման աստվածային պարգևը [2019], 205)

Երիտասարդներին զորացնելու համար. Ընտրություններ կատարելու ուղեցույցում (2022) մենք կարդում ենք․

Ձեր եպիսկոպոսը կրում է քահանայության բանալիներ և հոգևոր պարգևներ, որոնցով օգնում է ձեզ ապաշխարել: Դուք կարող եք ցանկացած պահի դիմել նրա օգնությանն ու խորհրդին: Եթե լուրջ սխալներ եք թույլ տվել, օրինակ՝ մաքրաբարոյության օրենքի խախտում, հանդիպեք ձեր եպիսկոպոսի հետ: Նա ձեզ չի դատապարտի: Նա Հիսուս Քրիստոսի ներկայացուցիչն է և կօգնի ձեզ իմանալ, թե ինչպես լիովին ապաշխարել և ստանալ Փրկչի բժշկող ու ամրացնող զորությունը: (Երիտասարդներին զորացնելու համար. Ընտրություններ կատարելու ուղեցույց, 8)

Իսկ եթե ես պայքարո՞ւմ եմ մեղքը թողնելու համար:

Տասներկու Առաքյալների Քվորումից երեց Նիլ Լ․ Անդերսենը բացատրել է.

Երբեմն մեր ապաշխարության ընթացքում, ավելի Քրիստոսանման դառնալու մեր ամենօրյա ջանքերում, մենք անընդհատ մաքառումների մեջ ենք հայտնվում միևնույն դժվարությունների հետ։ Կարծես մենք մագլցում ենք ծառապատ մի լեռ, երբեմն չենք տեսնում մեր առաջընթացը, մինչև մոտենում ենք գագաթին և հետ ենք նայում բարձր կատարներից: Մի հուսահատվեք: Եթե ձգտում և աշխատում եք ապաշխարել, դուք ապաշխարելու գործընթացում եք: …

Մեղքերի թողությունը ժամանակ է պահանջում: Մեզ օգնելու համար Տերը երբեմն թույլ է տալիս, որ մեր սխալների մնացորդը մնա մեր հիշողության մեջ: Դա մեր մահկանացու կյանքի կենսական մասն է:

Երբ մենք ազնվորեն խոստովանում ենք մեր մեղքերը, ուղղում ենք այն, ինչ կարող ենք, և թողնում ենք մեր մեղքերը՝ պահելով պատվիրանները, ներում ստանալու գործընթացի մեջ ենք մտնում։ (Նիլ Լ․ Անդերսեն, «Ապաշխարեք … որպեսզի ես կարողանամ բժշկել ձեզ», Լիահոնա, նոյեմբեր 2009 թ․, 42)

Օժանդակ ուսումնական վարժություններ

Դասը սկսելու այլընտրանքային տարբերակ

Ուսանողների ուշադրությունը հրավիրեք այնպիսի առարկայի վրա, ինչպիսին, օրինակ, սեղանն է, որը չափազանց մեծ է սենյակում թաքցնելու համար: Խնդրեք ուսանողներին փակել աչքերը 30 վայրկյանով, մինչ դուք կթաքցնեք մեծ առարկա՝ դրա դիմաց կամ դրա վերևում դնելով որևէ փոքր բան, օրինակ՝ գիրք կամ բաճկոն: Առաջարկեք ուսանողներին բացել իրենց աչքերը և տեսնել, թե որքան արագ կարող են գտնել մեծ առարկան:

Խնդրեք ուսանողներին կիսվել, թե դա ինչպես կարող է առնչվել այն բանին, ինչը Զիբա Պետերսոնը փորձում էր թաքցնել Աստծուց Վարդապետություն և Ուխտեր 58.60 հատվածում։

Ինչո՞ւ են մարդիկ այսօր դեռևս փորձում թաքցնել իրենց մեղքերը: Ի՞նչ եղանակներով են նրանք փորձում թաքցնել իրենց մեղքերը: Ի վերջո, ի՞նչ արդյունքի կբերի մեղքերը թաքցնելը՝ դրանցից ապաշխարելու փոխարեն:

Մենք բոլորս ապաշխարության կարիք ունենք

Հետևյալ հատվածները կօգնեն ուսանողներին հասկանալ, որ իրենք եզակի կամ անհավատ չեն այն պատճառով, որ կարիք ունեն ապաշխարության: Օգնեք նրանց հասկանալ, որ «ապաշխարել նշանակում է փոխվել, … կատարելագործվել և ներում ստանալ» (Երիտասարդներին զորացնելու համար. Ընտրություն կատարելու ուղեցույց, 7)։ Նույնիսկ ամենահավատարիմները պետք է փոխվեն, եթե ցանկանում են ավելի նմանվել Հիսուս Քրիստոսին: Առաջարկեք ուսանողներին կարդալ Վարդապետություն և Ուխտեր գրքի հետևյալ հատվածները՝ փնտրելով այն ուղերձը, որ Փրկչն ուներ այս երեք հավատարիմ աշակերտների համար:

• 58․14–15․ Էդվարդ Պատրիջ, Եկեղեցու առաջին եպիսկոպոսը

• 58:38–39․ Մարտին Հարրիս, Մորմոնի Գրքի Երեք Վկաներից մեկը

• 58․40–41․ Ուիլյամ Վ. Ֆելփս, Եկեղեցու ղեկավար և տպագրիչ Միսսուրիում

• Ի՞նչ ընդհանուր հրավեր ուներ Տերը նրանց համար։

• Ձեր կարծիքով, ինչո՞ւ է Հիսուսը հրավիրում ապաշխարել նույնիսկ Իր Եկեղեցու հավատարիմ ղեկավարներին։

New Era Վարդապետության սերտման էջ

Գրատախտակին կամ թերթիկի վրա կազմեք New Era ամսագրի հետևյալ էջի հիմնական ամփոփագիրը: Ներառեք յուրաքանչյուր հիմնական արտահայտություն, բայց ոչ յուրաքանչյուր բաժնի բացատրական պարբերությունները։ Առաջարկեք ուսանողներին օգտագործել իրենց սուրբ գրությունները և Եկեղեցու ղեկավարների խոսքերը՝ յուրաքանչյուր արտահայտության համար բացատրություններ կազմելու նպատակով՝ պատկերացնելով, որ պատրաստում են մի էջ, որը կհրապարակվի Երիտասարդներին զորացնելու համար ամսագրի հաջորդ համարում։

• «Վարդապետության սերտում. ապաշխարություն և ներում», New Era, փետրվար 2019, 45