Դաս 73. Վարդապետություն և Ուխտեր 58–59

Վարդապետություն և Ուխտեր 59

Տիրոջ օրը

1831 թվականին Տերը մի քանի Սրբերի կոչ արեց տեղափոխվել Միսսուրի նահանգի Ջեքսոն շրջան՝ հիմնելու Սիոնը: Երբ մարգարե Ջոզեֆ Սմիթը Սրբերի հետ էր, նա Տիրոջից ցուցումներ ստացավ Հանգստության օրը սուրբ պահելու վերաբերյալ: Այս դասը կօգնի ուսանողներին պատվել Տիրոջը՝ Հանգստության օրը սուրբ պահելով:

Հնարավոր ուսումնական վարժություններ

Որոշումներ Հանգստության օրվա վերաբերյալ

Ուսանողներին օգնեք մտածել այն օրհնությունների և դժվարությունների մասին, որոնք կապված են Հանգստության օրը սուրբ պահելու պատվիրանին հնազանդվելու հետ: Օգտակար կլինի հետևյալ փորձառությունը, որով կիսվել են գերագույն համաժողովի ժամանակ: Ուրիշի իրավիճակի շուրջ խորհելը ուսանողներին կօգնի ամփոփել իրենց մտքերը, զգացմունքները և գործողությունները:

Յոթանասունից երեց Լարի Յ. Վիլսոնը կիսվել է հետևյալ փորձառությամբ.

Մեր դուստրը՝ Մերին, դպրոցում լավագույն ֆուտբոլ խաղացողն էր: Մի տարի նրա թիմը դուրս եկավ առաջնություն, և ցավոք սրտի այդ խաղը պետք է անցկացվեր կիրակի օրը: Դեռահաս տարիքում Մերիին տարիներ շարունակ ուսուցանվել էր, որ Հանգստության օրը ոչ թե զվարճանքի, այլ հանգստի և հոգևոր զորացման օր է: Սակայն նա խաղին մասնակցելու ճնշում էր զգում իր մարզիչների ու թիմակիցների կողմից, և ինքն էլ չէր ցանկանում թողնել իր թիմին: (Լարի Յ. Վիլսոն, «Միայն արդարակեցության սկզբունքներով», Լիահոնա, մայիս 2012, 104–5)

• Ինչո՞ւ մարդկանց մի մասը կարող է դա համարել կարևոր որոշում Մերիի կյանքում, իսկ մյուս մասը՝ ոչ:

• Ըստ ձեզ, Մերիի փոխարեն ինչի՞ն կարևորություն կտայիք այս որոշումը կայացնելուց առաջ:

Մի պահ մտածեք Հանգստության օրվա վերաբերյալ ձեր կայացրած որոշումների մասին: Ի՞նչ եք սովորաբար անում՝ ձեր ընտրությամբ առաջնորդվելու համար: Այսօրվա ուսումնասիրության ժամանակ ոգեշնչում փնտրեք Սուրբ Հոգուց, որը կօգնի ձեզ իմանալ, թե ինչու պետք է սուրբ պահել Հանգստության օրը և ինչպես կարող եք դա անել:

Տիրոջ պատվիրաններն ու օրհնությունները

Հետևյալ պարբերությունը կարող է համատեքստ տրամադրել Վարդապետություն և Ուխտեր 59 բաժնի համար:

Թեև 55 տարեկանում Փոլի Նայթի առողջական վիճակը վատանում էր, նա լքեց իր տունը Քոլսվիլում (Նյու Յորք)՝ վճռական որոշում կայացնելով հնազանդվել Տիրոջը և գալ Սիոն: Փոլին հասավ Սիոն (Միսսուրի նահանգի Ջեքսոն շրջան) և մի քանի օր անց մահացավ: Կիրակի՝ նրա հուղարկավորության օրը, մարգարե Ջոզեֆ Սմիթը ստացավ հայտնություն, որը գրված է Վարդապետություն և Ուխտեր 59 բաժնում: Այս հայտնության մեջ Տերն ուսուցանել է ճշմարտություններ, որոնք կարող էին մխիթարել Փոլիի ընտանիքին (տես հատվածներ 1–2): Նա խոսել է նաև Իր պատվիրանների մասին՝ շեշտը դնելով Հանգստության օրվա վրա: Տերը մեծ օրհնություններ է խոստացել նրանց, ովքեր Հանգստության օրը սուրբ են պահում:

Կարող եք գրատախտակի վրա երկու սյունակ գծել՝ ցուցումներ և օրհնություններ վերնագրերով։ Ուսանողներին առաջարկեք փոքր խմբերով ուսումնասիրել հետևյալ հատվածները և գրատախտակին գծված սյունակներում թվարկել իրենց գտածը: Ուսանողները կարող են նաև նմանատիպ սյունակներ գծել իրենց օրագրերում:

Կարդացեք Վարդապետություն և Ուխտեր 59.9–20 հատվածները և կազմեք երկու ցուցակ՝ մեկում գրելով Հանգստության օրվա հետ կապված մեր գործողությունների և մոտեցումների վերաբերյալ Տիրոջ տված ցուցումները, իսկ մյուսում՝ օրհնությունները, որոնք Նա առաջարկում է մեզ:

Առաջարկեք ուսանողներին կիսվել իրենց սովորածով: Նրանց նաև հնարավորություն տվեք ուղղել իրենց հարցերը և միասին քննարկել դրանք: Անհրաժեշտության դեպքում ուսանողների համար օգտակար կլինի փնտրել դժվար բառերի սահմանումները: Ուսանողները կարող են քննարկել և բացահայտել, թե ինչ են նշանակում «քո տուրքը մատուցես Բարձրյալին» (հատված 10) և «Բարձրյալին մատուցես քո պատարագներն ու քո հաղորդությունները» (հատված 12) արտահայտությունները: Կարող եք օգնել ուսանողներին քննարկումների ժամանակ առաջնորդվել հետևյալ հարցերով.

• Ի՞նչ ճշմարտություններ կարող ենք բացահայտել այս հատվածներից՝ Հանգստության օրվա նպատակի մասին։

  Առաջարկեք ուսանողներին կիսվել իրենց բացահայտած ցանկացած ճշմարտությունով։ Կարող եք խնդրել ուսանողներին քննարկել, թե ինչու են իրենք կարծում, որ իրենց նշած ճշմարտությունները կարևոր են: Այլ ճշմարտությունների հետ միասին, որոնցով կիսվում են ուսանողները, օգնեք դասարանի անդամներին բացահայտել և քննարկել, որ Հանգստության օրը մեզ համար Աստծո հանդեպ մեր նվիրվածությունը ցույց տալու օր է (տես հատված 10):

• Ինչպե՞ս կարող է Աստծո հանդեպ ձեր սիրո և նվիրվածության վրա կենտրոնանալու օրն օգնել ձեզ ձեր կյանքում:

Հանգստության օրը պատվեք Տիրոջը

Հետևյալ վարժությունը կօգնի ուսանողներին հասկանալ, թե ինչպես կարող են պատվել Տիրոջը՝ կատարելով իրենց ընտրությունները Հանգստության օրը: Կարող եք գրատախտակին գրել ստորև ներկայացված՝ տաճարային երաշխավորագրերին վերաբերող հարցը:

Տաճարային երաշխավորագրեր ստանալու հարցազրույցների ժամանակ ձեզ կհարցնեն.

«Դուք ձգտո՞ւմ եք սուրբ պահել Հանգստության օրը՝ տանը և եկեղեցում, հաճախել ձեր ժողովներին, պատրաստվել և արժանիորեն ընդունել հաղորդությունը, և ապրել ավետարանի օրենքներին ու պատվիրաններին ներդաշնակ կյանքով»:

Որպեսզի մտածեք, թե ինչպես կարող եք հնազանդվել Հանգստության օրը սուրբ պահելու պատվիրանին, ձեր օրագրում գրեք գաղափարներ, թե ինչպես կարող եք պատվել Տիրոջը՝ սուրբ պահելով Հանգստության օրը:

Հետևյալ նյութերը կօգնեն ուսանողներին բացահայտել Հանգստության օրը տանը և եկեղեցում սուրբ պահելու ավելի շատ եղանակներ: Կարող եք ցուցադրել դրանք և ուսանողներին ժամանակ տալ՝ ուսումնասիրելու և լրացուցիչ գաղափարներ գտնելու համար։

Կարդացեք հետևյալ սուրբ գրությունները՝ բացահայտելու, թե ինչ է արել Հիսուս Քրիստոսը Հանգստության օրը.

• Մատթեոս 12․9–13

• Ղուկաս 4.16

Հանգստության օրը սուրբ պահելու վերաբերյալ լրացուցիչ գաղափարների համար ուսումնասիրեք հետևյալ նյութերից մի քանիսը.

• «Սիրեք Աստծուն, սիրեք ձեր մերձավորին»՝ Երիտասարդներին զորացնելու համար. Ընտրություն կատարելու ուղեցույց ([2022], 10–14)

• Թեմաներ և հարցեր բաժնի «Հանգստության օրը» և «Հաղորդություն» թեմաները, topics.ChurchofJesusChrist.org կայքում։

  Դուք կարող եք նաև ցուցադրել «Իմ սուրբ օրը. Պատվեք Հանգստության օրը» (1:30) տեսանյութը՝ երեց Ջեֆրի Ռ. Հոլանդի կողմից լրացուցիչ խորհուրդ ստանալու համար:

  ChurchofJesusChrist.org կայքում տեղադրված հետևյալ հոդվածները կարող են նաև օգտակար նյութեր լինել կիսվելու համար. «Նպատակ. Պատվեք և վայելեք Հանգստության օրը» և «Պատրաստվեք հաղորդությանն ամբողջ շաբաթ»:

  Ուսումնասիրության համար ուսանողներին բավարար ժամանակ տրամադրելուց հետո կարող եք առաջարկել նրանց կիսվել իրենց սովորածով: Կարող եք առաջարկել նրանց գրատախտակին գրել իրենց գտած մի քանի սահմանում: Հետևյալ հարցերը կարող եք օգտագործել, որպեսզի օգնեք ուսանողներին կիսվել իրենց փորձառություններով:

• Ի՞նչն է ձեզ օգնել Հանգստության օրը Աստծո հանդեպ նվիրվածություն ցույց տալ: Ի՞նչ փոփոխություն է բերել այս վարքագիծը ձեզ համար։

Ուսանողների համար հետաքրքիր կլինի ավելին իմանալ դասի սկզբում ներկայացված Մերիի փորձառության մասին: Կարող եք ուսանողներին տրամադրել պատմության մնացած մասը՝ ցուցադրելով «Միայն արդարակեցության սկզբունքներով» տեսանյութը 5:24-6:26, որը հասանելի է ChurchofJesusChrist.org կայքում։

Ծրագիր կազմեք

Կարող եք ցուցադրել հետևյալ առաջարկը։ Կարող եք մի քանի պատրաստակամ ուսանողի առաջարկել կիսվել իրենց ծրագրերով՝ դրանք կազմելուց հետո:

Ձեր օրագրում ծրագիր կազմեք, թե ինչպես եք ձգտելու պատվել Փրկչին Հանգստության օրը: Կարող եք նշել գաղափարներ, որոնք կօգնեն ձեզ սկսել, շարունակել կամ դադարել անել ինչ-որ բաներ տանը կամ եկեղեցում:

Օժանդակ նյութեր

Ինչո՞ւ են քրիստոնյաները Հանգստության օրը պահում կիրակի օրը:

«Հին Կտակարանի ժամանակներում Աստծո ուխտի ժողովուրդը Հանգստության օրը պահում էր շաբաթվա յոթերորդ օրը, քանի որ Աստված երկիրը ստեղծելուց հետո յոթերորդ օրը հանգստացավ (տես Ծննդոց 2.2): Հիսուս Քրիստոսի Հարությունից հետո, որը տեղի ունեցավ շաբաթվա առաջին օրը (տես Մարկոս 16.2), Տիրոջ աշակերտները սկսեցին Հանգստության օրը պահել շաբաթվա առաջին օրը՝ կիրակի (տես Գործք Առաքելոց 20.7)» (Թեմաներ և հարցեր բաժնի «Հանգստության օրը» թեման՝ topics.ChurchofJesusChrist.org կայքում):

Պատվելով Հանգստության օրը՝ ինչպե՞ս կարող եմ արտահայտել իմ նվիրվածությունն Աստծուն:

Տասներկու Առաքյալների Քվորումից երեց Դեյվիդ Ա. Բեդնարն ուսուցանել է․

Հանգստության օրը մենք երկրպագում ենք Հորը Որդու անունով՝ մասնակցելով արարողություններին և սովորելով դրանց մասին, ստանալով, հիշելով և նորոգելով ուխտերը: Նրա սուրբ օրը մեր մտքերը, գործողությունները և վարքագիծը հանդիսանում են նշաններ, որոնք մենք տալիս ենք Աստծուն. դա Նրա հանդեպ մեր սիրո նշանն է: (Դեյվիդ Ա. Բեդնար «Ամենամեծ ու պատվական խոստումները», Լիահոնա, նոյեմբեր 2017, 92)

Փրկիչն ինչ է ցանկանում, որ մենք հասկանանք Հանգստության օրվա մասին:

Նախագահ Ռասսել Մ. Նելսոնը բացատրել է․

Ես հավատում եմ, որ [Հիսուս Քրիստոսն ուզում է], որ մենք հասկանանք, որ Հանգստության օրը Նրա պարգևն է մեզ, որը տրամադրում է՝ հանգիստ առօրյա կյանքի դժվարություններից և հնարավորություն՝ հոգևոր և ֆիզիկական նորոգման համար։ Աստված մեզ այդ հատուկ օրը շնորհել է ոչ թե զվարճանքի կամ առօրյա աշխատանքի համար, այլ ֆիզիկական և հոգևոր հանգստի միջոցով պարտականություններից հանգստանալու համար։ (Ռասսել Մ. Նելսոն, «Հանգստության օրը բերկրանք է», Լիահոնա, մայիս 2015, 129)։

Ինչպե՞ս կարող է Հանգստության օրը հանգստի օր լինել մեզ համար:

Նախագահ Ռասսել Մ. Նելսոնն կիսվել է փորձառությամբ և ուսուցանել է.

Առաջին անգամ Հանգստության օրվա մեջ բերկրանք գտա շատ տարիներ առաջ, երբ որպես զբաղված վիրաբույժ Հանգստության օրը դարձավ իմ անձնական առողջությամբ զբաղվելու օր։ Ամեն շաբաթվա վերջում իմ ձեռքերը ցավում էին օճառով, ջրով և կոշտ խոզանակով անընդհատ մաքրելուց։ Դժվար աշխատանքից հետո ես նույնպես հանգստի կարիք ունեի։ Կիրակին տալիս էր այդքան սպասված հանգիստը։ …

Եբրայերենից թարգմանած Սաբաթ բառը նշանակում է հանգիստ։ Սաբաթի (Հանգստության օրվա) նպատակը հետ է գնում մինչև աշխարհի ստեղծումը, երբ վեց օր աշխատելուց հետո Տերը հանգիստ առավ արարման աշխատանքից։ (Ռասսել Մ. Նելսոն, «Հանգստության օրը բերկրանք է», Լիահոնա, մայիս 2015, 129)։

Ի՞նչ կարող է նշանակել ուրախ պահել Հանգստության օրը, բայց «ոչ շատ ծիծաղով»: (Վարդապետություն և Ուխտեր 59․15)

Տասներկու Առաքյալների Քվորումից երեց Ռիչարդ Գ. Սքոթը (1928–2015) ուսուցանել է.

Զգույշ եղեք հումորի հետ։ Բարձր, անպատշաճ ծիծաղը կվիրավորի Հոգուն: Հումորի լավ զգացումը օգնում է հայտնությանը, բարձր ծիծաղը՝ ոչ: Հումորի զգացումը կյանքում ճնշումներից խուսափելու միջոց է: (Ռիչարդ Գ. Սքոթ, «Ինչպես ստանալ հայտնություն և ոգեշնչում ձեր անձնական կյանքի համար», Լիահոնա, մայիս 2012, 46)

Օժանդակ ուսումնական վարժություններ

Սովորեք Հանգստության օրը սուրբ պահել:

Եթե դուք ներկայացրել եք Մերիին և կիրակի օրը նրա ֆուտբոլ խաղալու որոշումը, դասի վերջում կարող եք ուսանողներին խնդրել պատկերացնել, որ իրենք Մերիին խորհուրդ են տալիս: Ուսանողները կարող են կիսվել, թե ինչ սովորեցին Հանգստության օրվա մասին և ինչպես դա կարող է ազդել իրենց ընտրությունների վրա: Նրանք կարող են դերախաղով ներկայացնել կամ քննարկել այն, ինչ սովորել են փոքր խմբերով:

«Աչքով ուղղված իմ փառքին» (Վարդապետություն և Ուխտեր 59.1):

Այս վարժությունը կարող է օգնել ուսանողներին խորհել, թե ինչ է նշանակում պարզ աչքով ուղղված լինել Տիրոջ փառքին:

Ցուցադրեք Փրկչի նկարը: Առաջարկեք ուսանողներին մատներով օղակ կազմել, փակել մեկ աչքը և նայել նկարին այդ օղակի միջով։ Խնդրեք ուսանողներին նկարագրել այն, ինչ տեսան: Այնուհետև ուսանողներին առաջարկեք բացել մյուս աչքը և տալ այն բոլոր բաների անվանումները, որոնք նրանք կտեսնեն այդ պահին և որոնք կարող են շեղել նրանց ուշադրությունը Փրկչի վրա կենտրոնանալուց:

Ուսանողներին առաջարկեք բացատրել, թե ինչպես կարող է այս վարժությունը առնչվել հոգևոր առումով «աչքը միայն Աստծո փառքին ուղղած» լինելու հետ։ Ուսանողներին առաջարկեք կիսվել, թե ինչպես կարող են վերացնել այն շեղող հանգամանքները, որոնք կարող են իրենց ուշադրությունը շեղել Փրկչից, հատկապես Նրա սուրբ օրը:

«Մի … սպանիր, ոչ էլ նման որևէ բան գործիր» (Վարդապետություն և Ուխտեր 59.6)

Երբ Տերը պատվիրել է Սրբերին՝ մի գողացիր. շնություն մի արա, մի սպանիր, Նա ավելացրել է՝ «ոչ էլ նման որևէ բան գործիր» (Վարդապետություն և Ուխտեր 59.6): Ուսանողներին օգնեք խորհել այս արտահայտության իմաստի շուրջ և այն ազդեցության, որն այն ունենում է մեր ընտրությունների վրա: Կարող եք խնդրել ուսանողներին քննարկել, թե ինչ է նշանակում գողանալ: Այնուհետև խնդրեք նրանց մտածել այնպիսի գործողությունների մասին, որոնք կարող են գողություն չլինել, սակայն «նման որևէ բան» լինել: Դուք կարող եք նույնն անել շնություն գործելու և սպանելու վերաբերյալ գործողությունների դեպքում: Օգնեք ուսանողներին բացահայտել, թե ինչպիսի պաշտպանություն է առաջարկում մեզ Աստված՝ տալով մեզ այս պատվիրանները:

Գոհություն հայտնեք Աստծուն և խոստովանեք նրա ձեռքը «բոլոր բաներում» (Վարդապետություն և Ուխտեր 59.7, 21):

Կարող եք ամբողջ դասարանով կարդալ Վարդապետություն և Ուխտեր 59․7, 21 հատվածները՝ փնտրելով Տիրոջ պատվիրանը։ Ուսանողներին առաջարկեք մտածել, թե ինչպես կարող է մեզ վրա ազդել Աստծո առաջնորդությունն ու օրհնությունները մեր կյանքում մշտապես ընդունելը։ Ուսանողներին բավարար ժամանակ տրամադրեք՝ խորհելու Աստծո օրհնությունների մասին իրենց կյանքում և խրախուսեք նրանց ընտրել հատուկ եղանակներ, որոնցով կարող են ցույց տալ իրենց երախտագիտությունն Աստծուն: