“Lesson 72—Doktrina at mga Tipan 58:38–60: ‘Siya na Nagsisi … Ay Siya Ring Patatawarin,’” Manwal ng Titser ng Seminary para sa Doktrina at mga Tipan (2025)
“Doktrina at mga Tipan 58:38–60,” Manwal ng Titser ng Seminary para sa Doktrina at mga Tipan
Lesson 72: Doktrina at mga Tipan 58–59
Doktrina at mga Tipan 58:38–60
“Siya na Nagsisi … Ay Siya Ring Patatawarin”
Maging ang pinakamatatapat na disipulo ni Jesucristo ay nangangailangan ng pagsisisi at kapatawaran. Sa Doktrina at mga Tipan 58, inanyayahan ni Jesucristo ang ilang lider ng Kanyang Simbahan na magsisi at nangako Siyang patatawarin ang kanilang mga kasalanan kung susunod sila. Ang layunin ng lesson na ito ay tulungan ang mga estudyante na makadama ng pag-asa na pinatatawad ng Tagapagligtas ang mga nagsisisi ng kanilang mga kasalanan.
Mga Posibleng Aktibidad sa Pag-aaral
Sugatan
Maaari mong simulan ang klase sa pamamagitan ng talakayan tungkol sa pangangailangan nating mapatawad ni Jesucristo sa ating mga kasalanan.
Ang isang paraan para magawa ito ay i-display ang sumusunod na larawan o magdrowing ng stick figure ng isang tinedyer sa pisara. Para maging interesado ang mga estudyante, maaari mong anyayahan ang klase na pangalanan siya at gumawa ng ilang detalye tungkol sa kanyang buhay bago ibahagi ang sumusunod na sitwasyon.
Ipagpalagay na sinabi sa iyo ng kaibigan mo na nahulog siya mula sa isang ungos noong nakaraang gabi. Nakadarama siya ng matinding sakit kapag humihinga siya at sa tingin niya ay nabali ang kanyang braso. Nagpasiya siyang huwag magpatingin sa doktor dahil nag-aalala siya na madidismaya ang doktor at ang iba pa kung malalaman nila na pinili niyang lumapit sa mapanganib na ungos na iyon. Kaya plano niyang panatilihing lihim ang sakit na nararamdaman niya, at umaasang gagaling siya nang lubos balang-araw.
-
Ano ang nadarama mo tungkol sa plano ng iyong kaibigan? Bakit?
Ngayon, mag-isip ng katulad na sitwasyon, ngunit sa pagkakataong ito, sinabi sa iyo ng kaibigan mo na nakagawa siya ng mabigat na kasalanan. Sa halip na sundin ang mga turo ng Tagapagligtas tungkol sa pagsisisi, nagpasiya siyang itago ang kanyang kasalanan at umasa na magiging mas mabuti ang mga bagay-bagay sa paglipas ng panahon.
Sabihin sa mga estudyante na magbahagi ng ilang iba’t ibang tanong o alalahanin na maaaring makaimpluwensya sa isang tinedyer na huwag magsisi.
-
Ano ang ipapayo mo sa iyong kaibigan?
Nagturo ang Tagapagligtas tungkol sa pagsisisi
Ipaliwanag na noong 1831, naglakbay si Joseph Smith at ang iba pang mga elder patungong Missouri, kung saan iniutos ng Panginoon sa ilan na manatili at itayo ang lunsod ng Sion. Bilang bahagi ng tagubilin ng Panginoon, pinayuhan Niya ang ilan sa kanila na pagsisihan ang kanilang mga kasalanan (tingnan sa Doktrina at mga Tipan 58:14–15, 38–41, 60).
Basahin ang Doktrina at mga Tipan 58:60 para makita ang payo ng Panginoon sa isang lalaking nagngangalang Ziba Peterson.
-
Ano sa palagay mo ang mga maling pagkaunawa ni Ziba tungkol sa Diyos o tungkol sa pagsisisi na magiging dahilan para itago niya ang kanyang mga kasalanan? (Maaari mong basahin ang payo ni Alma sa kanyang anak tungkol sa mga resulta ng pagtatago ng ating mga kasalanan. Tingnan sa Alma 39:7–9.)
-
Sa palagay mo, alin sa mga maling pagkaunawang ito nahihirapan pa rin ang mga tao ngayon?
Maaari mong i-display ang sumusunod na prompt at bigyan ang mga estudyante ng oras na personal na pagnilayan o isulat ang kanilang mga saloobin.
Pagkatapos ay sabihin sa kanila na maghanap ng mga turo sa oras ng lesson na makatutulong sa kanilang mga pagsisikap na magsisi sa buong buhay nila.
Pag-isipan kung mayroon kang anumang kasalanan na nag-atubili kang pagsisihan. Kung mayroon, isipin ang mga dahilan mo sa pag-aatubili.
Mga tanong at mga sagot
Habang pinag-aaralan ng mga estudyante ang sumusunod na passage, maaari mong ipaalala sa kanila ang mga partikular na tanong o alalahanin tungkol sa pagsisisi na ibinahagi nila kanina sa lesson.
Basahin ang Doktrina at mga Tipan 58:42–43, at alamin ang mga turo ng Tagapagligtas na tumutulong sa pagsagot sa mga tanong at alalahanin na maaaring mayroon ang ilang tao tungkol sa pagsisisi.
Ang Doktrina at mga Tipan 58:42–43 ay isang doctrinal mastery passage. Maaari mong sabihin sa mga estudyante na markahan ang mga doctrinal mastery passage sa natatanging paraan para madali nilang mahanap ang mga ito.
Hatiin ang mga estudyante sa maliliit na grupo. Anyayahan silang magbahagi ng mga parirala mula sa talata 42–43 na makatutulong sa kanila na sagutin ang mga partikular na tanong o alalahanin o yaong makabuluhan sa kanila. Pagkatapos ay sabihin sa mga grupo na ibahagi sa klase ang natutuhan nila. Habang nagbabahagi ang mga estudyante, tiyakin na nauunawaan nila na kung magsisisi tayo sa ating mga kasalanan, patatawarin tayo ng Panginoon at para magsisi, iniuutos sa atin ng Panginoon na ipagtapat at talikuran ang ating mga kasalanan.
-
Paano makatutulong ang mga katotohanang ito sa maaaring mga alalahanin ng mga tao tungkol sa pagsisisi?
Kung may mga tanong ang mga estudyante tungkol sa pagsisisi na hindi sinasagot ng mga talatang ito, alamin kung pinakamainam na tulungan silang mahanap ang mga sagot bilang bahagi ng lesson na ito, sa isang lesson sa hinaharap, o sa pamamagitan ng pagmumungkahi ng sources na itinalaga ng Diyos kung saan maaari nilang hanapin ang mga sagot nang mag-isa.
(Paalala: May mga pahayag sa bahaging “Karagdagang Resources” na makatutulong kung may mga tanong ang mga estudyante tungkol sa mga partikular na konsepto sa doctrinal mastery passage na ito, tulad ng pagtatapat o pagtalikod sa mga kasalanan.)
Nagpapatawad ang Panginoon
Ang bahaging ito ay naglalayong tulungan ang mga estudyante na makadama ng pag-asa na talagang pinatatawad ng Tagapagligtas ang mga nagsisisi. Mapanalanging alamin kung alin sa resources at mga mungkahi ang pinakamahusay na makatutulong sa iyong mga estudyante na matagumpay na maihanda ang kanilang mga sagot sa sumusunod na aktibidad.
Sa iyong study journal, maghanda ng sagot na maaari mong ibahagi sa isang taong nag-aalala na hindi siya mapapatawad. Ano ang maaari mong ibahagi tungkol sa katangian at mga pangako ng Tagapagligtas na makatutulong sa taong ito na makayanan ang anumang alalahanin? Piliin ang ilan sa mga sumusunod na opsiyon para matulungan kang ihanda ang sagot mo:
-
Mga banal na kasulatan: Saliksikin ang mga banal na kasulatan para sa mga talata na naglalaman ng mga pangako ng Panginoon sa mga magsisisi o para sa mga salaysay na nagpapakita ng Kanyang kahandaang magpatawad. Ang listahan ng mga doctrinal mastery passage sa Doctrinal Mastery Core Document (2023) ay maaaring makatulong. Maaari mong i-cross-reference o iugnay ang ilan sa mga banal na kasulatang ito sa Doktrina at mga Tipan 58:42–43.
-
Personal na katibayan: Mag-isip ng mga halimbawa kung saan nasaksihan mo ang kahandaan ng Tagapagligtas na magpatawad at tulungan ang isang tao na magbago. (Huwag magbahagi ng mga pangalan o detalye ng mga kasalanan.)
-
Ang bahaging “Tutulungan kayo ni Jesucristo” ng Para sa Lakas ng mga Kabataan: Gabay sa Paggawa ng mga Pagpili ([2022], 6–9): Hanapin ang mga katotohanan tungkol sa Ama sa Langit at kay Jesucristo na nagbibigay sa atin ng pag-asa.
-
Mga makabagong propeta: Maghanap ng mga pahayag mula sa mga makabagong lider ng Simbahan na tumutulong sa atin na maunawaan ang mapagpatawad na katangian ni Jesucristo.
Ang sumusunod ay isang halimbawa mula kay Elder Dieter F. Uchtdorf ng Korum ng Labindalawang Apostol na maaari mong piliing ibahagi sa iyong mga estudyante:
Si Jesucristo ang Lakas ng mga Kabataan
Itinuro ni Elder Uchtdorf na si Jesucristo ang pinakamabuting gabay sa paggawa ng mga pagpili. Binanggit din niya ang bagong gabay na Para sa Lakas ng mga Kabataan.
Minamahal kong mga kaibigang kabataan, kung naririto mismo ang Panginoon ngayon, ano kaya ang sasabihin Niya sa inyo? …
… Maaaring maalala ninyo ang mga pagkakamaling nagawa ninyo, mga pagkakataong nagpatangay kayo sa tukso, mga bagay na hindi sana ninyo ginawa—o sana’y naisagawa ninyo nang mas maayos.
Mahihiwatigan iyan ng Tagapagligtas, at naniniwala ako na bibigyan Niya kayo ng katiyakan sa mga salitang sinabi Niya sa mga banal na kasulatan:
“Huwag matakot” [Lucas 5:10].
“Huwag mag-alinlangan” [Doktrina at mga Tipan 6:36].
“Lakasan ninyo ang inyong loob” [Mateo 14:27].
“Huwag mabagabag ang inyong puso” [Juan 14:1, 27].
Sa palagay ko, hindi Siya gagawa ng mga dahilan para sa inyong mga pagkakamali. Hindi Niya babalewalain ang mga iyon. Hindi, hihilingan Niya kayong magsisi—talikuran ang inyong mga kasalanan, magbago, upang mapatawad Niya kayo. Ipapaalala Niya sa inyo na inako Niya ang mga kasalanang iyon 2,000 taon na ang nakararaan upang kayo ay maaaring magsisi. Bahagi iyan ng plano ng kaligayahang ipinagkaloob sa atin ng ating mapagmahal na Ama sa Langit. (Dieter F. Uchtdorf, “Si Jesucristo ang Lakas ng mga Kabataan,” Liahona, Nob. 2022, 9)
Matapos ang sapat na oras na maihanda ang kanilang mga sagot, sabihin sa mga estudyante na ibahagi sa maliliit na grupo ang natutuhan nila upang magkakaroon ng pagkakataon ang lahat ng nagnanais na magbahagi.
Maaari mong ipanood ang video na “The Savior Wants to Forgive” (5:50), matatagpuan sa ChurchofJesusChrist.org, bilang halimbawa ng palagiang hangarin ng Tagapagligtas na magpatawad.
Maaari mong tapusin ang klase gamit ang iyong patotoo tungkol sa mapagpatawad na katangian ng Tagapagligtas, at hikayatin ang mga estudyante na magsisi nang may pananampalataya sa Kanyang mga pangako.
The Savior Wants to Forgive
A former addict and repeat convict shares his experiences with the Savior’s ability and willingness to forgive him again and again, even when he felt undeserving.
Isaulo
Maaari mong tulungan ang mga estudyante na isaulo ang doctrinal mastery reference at mahalagang parirala ng banal na kasulatan sa lesson na ito at rebyuhin ang mga ito sa mga susunod na lesson. Ang mahalagang parirala ng banal na kasulatan ay “Siya na nagsisi ng kanyang mga kasalanan, ay siya ring patatawarin.” Ang mga ideya para sa mga aktibidad sa pagsasaulo ay nasa appendix sa ilalim ng “Mga Aktibidad sa Pagrerebyu ng Doctrinal Mastery.”