Lesson 71: Doktrina at mga Tipan 58–59

Doktrina at mga Tipan 58:26–29

“Sabik sa Paggawa ng Mabuting Bagay”

Maraming Banal, kabilang na ang isang grupo mula sa Colesville, New York, ang kamakailan lamang dumating sa Jackson County, Missouri. Nais nilang tulungan ang Tagapagligtas na itayo ang Sion, ngunit hindi sila sigurado kung ano ang gagawin. Ipinaliwanag ng Panginoon na inaasahan sila na gamitin ang kanilang kalayaang pumili upang humanap ng mga paraan para makatulong at makapaglingkod. Ang lesson na ito ay makatutulong sa mga estudyante na maunawaan kung paano tutularan ang halimbawa ng Tagapagligtas sa paggawa ng mabuti.

Mga Posibleng Aktibidad sa Pag-aaral

Isang araw sa buhay ni Cristo

Bago magklase, maaari mong isulat sa pisara ang Gumagawa sila ng mabuti. Sabihin sa bawat estudyante na ibahagi ang pangalan ng isang taong kilala nila na ang buhay ay akma sa paglalarawang iyon. Maaaring ibahagi ng ilang boluntaryo kung bakit ipinapaalala sa kanila ng pariralang iyon ang taong napili nila.

Sabihin sa mga estudyante na ang Mga Gawa 10 ay tala ng mga turo ni Pedro sa Cesarea. Sabihin sa kanila na buklatin ang Mga Gawa 10:38 para makita kung kaninong pangalan ang maaaring isinulat ni Pedro sa pisara.

Isipin kung ano kaya ang pakiramdam kung si Jesus ay isinilang sa ating panahon, nakatira sa inyong komunidad, o nag-aaral sa inyong paaralan.

• Ano sa palagay mo ang gagawin Niya na mailalarawan bilang “[naglilibot] na gumagawa ng mabuti”?

Upang matulungan ang mga estudyante na hangaring tularan ang halimbawa ng Tagapagligtas, maaari mo silang bigyan ng oras na isulat ang kanilang mga saloobin tungkol sa sumusunod na prompt sa kanilang study journal.

Subukang isipin kung ano kaya ang mararamdaman mo kung maglalaan ka ng Sabado kasama si Jesus na “[naglilibot] na gumagawa ng mabuti” sa buong maghapon. Paano maaaring makaimpluwensya ang karanasang ito sa kung paano mo pipiliing gugulin ang iyong oras kahit sa mga araw na hindi mo Siya kasama?

Pagpiling gumawa ng kabutihan

Nang matanggap ang Doktrina at mga Tipan 58, si Joseph Smith at ang ilan sa mga elder ng Simbahan ay kamakailan lamang dumating sa Missouri. Humingi sila ng mga tagubilin kung paano itatatag ang Simbahan at ang Sion sa lugar. Itinuro sa kanila ng Tagapagligtas kung paano nila magagamit ang kanilang kalayaang pumili para magawa ang Kanyang gawain.

Basahin ang Doktrina at mga Tipan 58:26–29 para malaman ang itinuro ng Tagapagligtas sa mga Banal tungkol sa kanilang kalayaang pumili. Isulat ang mga salita at parirala na makikita mo sa mga angkop na bahagi ng sumusunod na chart. (Paalala: Ang ibig sabihin ng “hindi nararapat” ay hindi kailangan o kanais-nais.)

Maaari mong i-display ang sumusunod na chart sa pisara o bigyan ang mga estudyante ng sarili nilang kopya. Maaaring makatulong ito sa ilang estudyante na mas makibahagi sa aktibidad na ito kung aanyayahan silang gawin ito nang may kapartner.

Paggamit ng ating kalayaang pumili upang maging …

Higit na katulad ni Jesus	Hindi masyadong katulad ni Jesus

Kapag tapos na ang mga estudyante, maaari kang magtanong ng mga bagay na makatutulong sa kanila na pag-isipan at maunawaan ang kahulugan ng mga pariralang nahanap nila. Halimbawa:

• Ano sa palagay mo ang ibig sabihin ng maging “sabik sa paggawa,” o aktibong magsikap, na gumawa ng mabuti?

• Sa iyong palagay, bakit dapat nating iwasang “pinipilit,” o pinupuwersa tayo, na gumawa ng mabuti?

• Sa iyong palagay, bakit mahalaga ang ating mga motibo o layunin sa paggawa ng mabuti?

Sa iyong study journal o sa iyong mga banal na kasulatan, gamit ang sarili mong mga salita, isulat ang isa o dalawang katotohanan na masasabi mong mahalaga sa Tagapagligtas mula sa mga talatang ito.

Sabihin sa mga estudyante na ibahagi ang mga katotohanang itinala nila o isulat ang mga ito sa pisara. Ang isang katotohanan na maaari nilang ipahayag ay ginagantimpalaan ng Diyos ang mga taong masigasig na naghahangad na maisakatuparan ang kabutihan.

Maaari mong sabihin sa mga estudyante na pag-isipan o isulat kung gaano sila kadalas masigasig na naghahanap ng mga paraan para mapaglingkuran ang Diyos at ang iba nang hindi naghihintay na sabihan pa ng kung ano ang gagawin. Sabihin sa kanila na bigyang-pansin ang mga paraan na mapagsisikapan nila na maging mas sabik sa paggawa ng mabuti habang patuloy silang nag-aaral.

• Anong mga halimbawa ang maiisip mo mula sa mga banal na kasulatan kung saan ipinamuhay ng isang tao ang mga turo ng Tagapagligtas sa mga talatang ito?

• Ano ang mga halimbawa ng pagpansin ng Tagapagligtas sa mga pagkakataong gumawa ng mabuti at paggamit ng Kanyang kalayaang pumili para kumilos?

Maaari mong ipanood sa mga estudyante ang video na “Nahabag si Jesucristo at Pinagaling ang mga Tao” (6:32), matatagpuan sa ChurchofJesusChrist.org. Inilalarawan nito ang nabuhay na mag-uling Tagapagligtas na piniling maglaan ng dagdag na oras sa mga Nephita upang paglingkuran at pagalingin sila.

O maaari mong ipanood ang video na “Widow of Nain” (2:22), matatagpuan sa ChurchofJesusChrist.org. Inilalarawan nito ang pagpansin ng Tagapagligtas sa isang nagdadalamhating ina at pagpili Niyang tumigil sandali, panatagin ang ina, at pagalingin ang anak nito.

Ang mga turo ng Tagapagligtas sa ating buhay

Maaari mong tulungan ang mga estudyante na matuklasan kung ano ang maaaring mangyari kapag ipinamuhay ang mga turo ng Tagapagligtas sa mga talata 26–29 sa mga sitwasyon sa tunay na buhay. Maaari mong gamitin ang ilan sa mga sumusunod na sitwasyon o iba pa na mas may kaugnayan sa iyong mga estudyante.

Hatiin ang klase sa maliliit na grupo para talakayin kung aling mga talata o parirala ang pinakanaaangkop sa bawat sitwasyon. Hikayatin ang mga grupo na mag-isip ng maraming paraan na magagamit ng bawat tao ang kanilang kalayaang pumili para makibahagi sa isang magandang adhikain.

Pagkatapos ay anyayahan ang bawat grupo na ulitin ang aktibidad sa pamamagitan ng paggawa ng sarili nilang sitwasyon kung saan maipamumuhay ng isang tinedyer ang mga turo ng Tagapagligtas sa bahagi 58.

1. Kamakailan lamang ay inatasan si Juliet na maglingkod sa isang pamilyang hindi pa niya nakikilala. Hindi siya sigurado kung paano magsisimula.

2. Ang titser ni Ann sa Sunday School ay isang mabuting tao ngunit hindi pa bihasa. Marami sa kanyang mga kaklase ang tila nawalan na ng interes at hindi na sinusubukang makibahagi sa mga lesson.

3. Napansin ni Jasmine na tila mas pagod ang kanyang ina nitong mga nakaraang araw kaysa noon.

4. Nakakita si Xavier ng ilang hindi magagandnag post tungkol sa isa pang estudyante sa social media.

5. Si Jared ay may libreng oras sa hapon at wala siyang gagawin at pupuntahan sa oras na iyon.

Tapusin ang lesson sa pamamagitan ng pag-anyaya sa mga estudyante na kantahin o pakinggan ang isang himno na nagpapatibay sa mga alituntuning natutuhan sa lesson na ito. Ang isang opsiyon ay “Ako Ba’y May Kabutihang Nagawa?” (Mga Himno, blg. 135). Sabihin sa kanila na isipin kung paano naaangkop ang mga titik ng himno sa mga alituntuning itinuro ng Tagapagligtas sa bahagi 58. Anyayahan ang isa o dalawang estudyante na ibahagi sa klase kung ano sa palagay nila ang nais ng Tagapagligtas na matandaan nila mula sa kanilang pag-aaral ngayon. Makatutulong na hayaang isulat ng mga estudyante ang kanilang mga saloobin bago anyayahan ang ilan na magbahagi nang malakas.

Maaari mong sabihin sa mga estudyante na maghanap ng pagkakataong kumilos ayon sa natutuhan nila bago ang susunod na lesson sa seminary. Maaari kang mag-follow up sa pamamagitan ng pag-anyaya sa mga estudyante na ibahagi ang kanilang karanasan sa klase.

Karagdagang Resources

Ano ang ilang halimbawa ng mga paraan na maipamumuhay natin ang Doktrina at mga Tipan 58:26–29?

Sinabi ni Elder Jeffrey R. Holland ng Korum ng Labindalawang Apostol ang sumusunod matapos ipabatid ng mga lider ng Simbahan ang ministering program. Maraming miyembro ang may mga tanong kung paano epektibong makapaglilingkod sa iba.

Iminumungkahi naming huwag na kayong maghintay para sa marami pang tagubilin. Basta tumulong lang kayo sa mga nangangailangan. Puntahan ninyo ang mga nangangailangan. Huwag kayong urong-sulong sa kaiisip kung anong klaseng paglilingkod ang dapat ninyong ibigay. Kung susunod tayo sa mga pangunahing alituntuning naituro na, mananatiling nakaayon sa mga susi ng priesthood, at hahangarin ang paggabay ng Espiritu Santo, hindi tayo mabibigo. (Jeffrey R. Holland, “Ang Ministeryo ng Pakikipagkasundo,” Liahona, Nob. 2018, 77)

Ipinaliwanag ni Pangulong Dallin H. Oaks ng Unang Panguluhan kung paano magagamit ang mga alituntuning ito sa paghingi natin ng paghahayag at patnubay mula sa Diyos:

Mahalaga sa anumang pagsisikap na tumanggap ng paghahayag ang pangako na gagawin natin sa abot ng ating makakaya ang lahat sa sarili nating sikap at pagpapasiya. Ibig sabihin kailangan nating maglingkod at gumawa.

Ang pagsulong sa ating paglilingkod at paggawa ay mahalagang paraan para maging karapat-dapat sa paghahayag. Sa aking pag-aaral ng mga banal na kasulatan napansin ko na karamihan sa paghahayag sa mga anak ng Diyos ay dumarating kapag sila ay gumagawa, hindi habang sila ay nagpapahinga sa kanilang tirahan at naghihintay na sabihin sa kanila ng Panginoon ang unang hakbang na gagawin. (Dallin H. Oaks, “In His Own Time, in His Own Way,” Ensign, Ago. 2013, 22)

Ibinahagi ni Sister Rebecca L. Craven ng Young Women General Presidency ang isang paraan na magagamit ang mga alituntuning ito sa pagtatamo ng patotoo:

Nagkaroon ako ng magandang karanasan sa isang magiliw na dalagita na tapat na nagtanong: “Sister Craven, paano mo po nalaman na anumang tungkol sa Simbahan ay totoo? Kasi po wala akong nararamdaman.”

Bago ko siya sinagot, tinanong ko muna siya ng ilang bagay. “Ikuwento mo sa akin ang personal na pag-aaral mo ng mga banal na kasulatan.”

Sagot niya, “Hindi po ako nagbabasa ng mga banal na kasulatan.”

Tanong ko, “Eh ang pamilya mo? “Nagbabasa ba kayo ng Pumarito Ka, Sumunod Ka sa Akin nang sama-sama?”

Sabi niya, “Hindi po.”

Nagtanong ako tungkol sa pagdarasal niya: “Ano ang nadarama mo kapag nagdarasal ka?”

Sagot niya: “Hindi po ako nagdarasal.”

Simple lang ang tugon ko sa kanya: “Kung may gusto kang malaman, mayroon kang kailangang gawin.”

Hindi ba totoo iyan sa anumang gusto nating matutuhan o malaman? Inanyayahan ko ang bago kong kaibigan na simulang gawin ang turo ng ebanghelyo ni Jesucristo: pagdarasal, pag-aaral, paglilingkod sa iba, at pagtitiwala sa Panginoon. Hindi darating ang pagbabalik-loob nang wala tayong ginagawa. Dumarating ito sa pamamagitan ng kapangyarihan ng Espiritu Santo habang sadya tayong nagsisikap na makaalam sa pamamagitan ng pagtatanong, paghahanap, at pagkatok. Dumarating ito sa pamamagitan ng paggawa. (Rebecca L. Craven, “Gawin ang Pinakamahalaga,” Liahona, Mayo 2022, 62)

Mga Karagdagang Aktibidad sa Pag-aaral

Alternatibong simula

Maaari mong simulan ang lesson gamit ang isang sitwasyon na tulad ng sumusunod kung saan maaaring gamitin ng isang tao ang kanyang kalayaang pumili para gumawa ng mabuti o piliing huwag kumilos maliban kung pipilitin siya.

Ipagpalagay na habang naglalakad ka sa kalye ay may nakita kang matanda na natumba. Alin sa mga sumusunod ang gagawin mo?

1. Huminto para malaman kung ipapahiwatig sa iyo ng Ama sa Langit na tumulong ka.

2. Maghintay para malaman kung direktang hihingi sa iyo ng tulong ang matanda.

3. Umasa na may magsasabi sa iyo kung ano ang gagawin.

4. Alamin kaagad kung paano mo matutulungan ang taong natumba.

Matapos sumagot ang mga estudyante, sabihin sa kanila na magbahagi ng mga maaaring maging dahilan ng isang tao sa pagpili ng bawat isa sa iba’t ibang opsiyon. Pagkatapos ay anyayahan silang basahin ang Doktrina at mga Tipan 58:26–29 at isipin kung paano makaiimpluwensya ang ating mga pagpili sa magiging kung sino tayo sa huli.

“Matapat sa kapighatian”

Sabihin sa mga estudyante na mag-isip ng isang kompetisyon kung saan isinasaalang-alang ng mga hurado ang antas ng kahirapan kapag pinagpapasyahan ang puntos na nararapat sa isang tao. Maaaring kabilang sa mga halimbawa ang gymnastics, ice skating, o snowboarding. Tulungan ang mga estudyante na maiugnay ito sa ating perpektong Hukom na si Jesucristo, na lubos na nakauunawa sa mga paghihirap na dinaranas ng bawat tao sa mundo. Pagkatapos ay sabihin sa mga estudyante na basahin ang Doktrina at mga Tipan 58:1–4, at alamin ang natutuhan nila tungkol sa paghatol ng ating Tagapagligtas.

Makabagong pagsasabuhay ng mga talata 26–29

Ang isang paraan para matulungan ang mga estudyante na makita ang makabagong kaugnayan sa mga turo ng Tagapagligtas ay bigyan ang mga grupo ng mga kopya ng mga pahayag sa bahaging “Karagdagang Resources.” Maaaring basahin ng bawat grupo ang mga pahayag at magpasya kung aling mga parirala mula sa Doktrina at mga Tipan 58:26–29 ang pinakanaaangkop. Pagkatapos ay sabihin sa mga estudyante na magbahagi ng iba’t ibang sitwasyon kung saan maaaring gamitin ng isang tinedyer ang itinuturo ng mga parirala at pahayag na iyon.

Aktibidad para makita ang kaugnayan

Sa isang maliit na papel, maaaring isulat ng bawat estudyante ang isang lugar na pupuntahan nila sa susunod na linggo (tahanan, paaralan, simbahan, trabaho, soccer field, at iba pa) at ilagay ito sa isang lalagyan. Kumuha ng kahit anong papel mula sa lalagyan, at anyayahan ang klase na magbahagi ng malikhaing mga paraan na mapipili ng isang tao na aktibong gumawa ng mabuti sa sitwasyon o lugar na iyon.

Aktibong nakikibahagi sa pag-aaral

Upang matulungan ang mga estudyante na matalakay kung paano magagamit ang mga katotohanan sa bahagi 58 sa kanilang karanasan sa seminary, maaari mong i-display ang pahayag na ito ni Elder David A. Bednar ng Korum ng Labindalawang Apostol.

“Ang isang mag-aaral na ginagamit ang kalayaan sa pamamagitan ng pagkilos [nang] naaayon sa mga tamang alituntunin ay binubuksan ang kanyang puso para sa Espiritu Santo at inaanyayahan ang Kanyang kapangyarihan na magturo at magpatotoo, at nagpapatunay na pagsaksi. Ang pagkatuto sa pamamagitan ng pananampalataya ay nangangailangan ng pagsisikap sa espiritu, kaisipan, at katawan at hindi pagtanggap lamang na walang gagawin. …

“… Dapat magkaroon ng pananampalataya ang estudyante at kumilos para matamo ang kaalaman para sa kanyang sarili” (David A. Bednar, “Seek Learning by Faith,” Ensign, Set. 2007, 64).

Sabihin sa mga estudyante na ilarawan ang mga pagpiling magagawa ng isang estudyante bago magklase, sa oras ng klase, at pagkatapos ng klase na maaaring makadagdag o makabawas sa natututuhan at nadarama nila sa seminary.

Kung makatutulong, maaaring talakayin ng mga estudyante kung paano rin mapagbubuti ng mga alituntunin sa bahagi 58 at sa pahayag ni Elder Bednar ang kanilang karanasan sa pag-aaral sa paaralan.