Lesson 73: Doktrina at mga Tipan 58–59

Doktrina at mga Tipan 59

Ang Araw ng Panginoon

Noong 1831, inatasan ng Panginoon ang ilang Banal na lumipat sa Jackson County, Missouri, upang itatag ang Sion. Habang kasama ni Propetang Joseph Smith ang mga Banal na ito, nakatanggap siya ng mga tagubilin mula sa Panginoon tungkol sa pagpapanatiling banal ng araw ng Sabbath. Ang lesson na ito ay makatutulong sa mga estudyante na igalang ang Panginoon sa pamamagitan ng pagpiling panatilihing banal ang araw ng Sabbath.

Mga Posibleng Aktibidad sa Pag-aaral

Mga desisyon tungkol sa araw ng Sabbath

Tulungan ang mga estudyante na pag-isipan ang ilan sa mga pagpapala at hamon ng pagsunod sa utos na panatilihing banal ang araw ng Sabbath. Maaari mong gamitin ang sumusunod na karanasang ibinahagi sa pangkalahatang kumperensya. Ang pag-iisip tungkol sa sitwasyon ng ibang tao ay makatutulong na maihanda ang mga estudyante na pag-isipan ang sarili nilang saloobin, damdamin, at kilos.

Ibinahagi ni Elder Larry Y. Wilson ng Pitumpu ang sumusunod na karanasan:

Ang anak naming si Mary ay napakahusay na soccer player noong kabataan niya. May isang taon na nakapasok sa championship ang kanyang team, at, sa kasamaang-palad, ito ay gaganapin sa araw ng Linggo. Bilang tinedyer, maraming taon nang napag-aralan ni Mary na ang Linggo ay araw ng pahinga at pagpapalakas sa espirituwal, hindi paglilibang. Ngunit dama pa rin niya ang pamimilit ng kanyang mga coach at kapwa manlalaro, at ang kanyang hangarin na huwag biguin ang kanilang team. (Larry Y. Wilson, “Tanging Alinsunod Lamang sa mga Alituntunin ng Kabutihan,” Liahona, Mayo 2012, 104–5)

• Bakit maaaring isipin ng ilang tao na mahalagang desisyon ito sa buhay ni Mary samantalang para sa ibang tao ay maaaring hindi?

• Kung ikaw si Mary, ano sa palagay mo ang mahalagang isaalang-alang bago gawin ang desisyong ito?

Isipin sandali ang mga desisyong ginagawa mo tungkol sa araw ng Sabbath. Ano ang karaniwang ginagawa mo para magabayan ka sa iyong mga pagpili? Sa pag-aaral mo ngayon, maghangad ng inspirasyon mula sa Espiritu Santo para matulungan kang malaman kung bakit dapat panatilihing banal ang araw ng Sabbath at kung paano mo magagawa iyon.

Ang mga kautusan at pagpapala ng Panginoon

Ang sumusunod na talata ay makapagbibigay ng konteksto para sa Doktrina at mga Tipan 59.

Bagama’t humihina ang kanyang kalusugan sa edad na 55, nilisan ni Polly Knight ang kanyang tahanan sa Colesville, New York, na determinadong sundin ang Panginoon at magtungo sa Sion. Nakarating si Polly sa Sion (Jackson County, Missouri) at pumanaw siya makalipas ang ilang araw. Sa huling araw ng kanyang libing, sa araw ng Linggo, natanggap ni Propetang Joseph Smith ang paghahayag na nakatala sa Doktrina at mga Tipan 59. Sa paghahayag na ito, nagturo ang Panginoon ng mga katotohanan na makapagpapanatag sa pamilya ni Polly (tingnan sa talata 1–2). Binanggit din Niya ang Kanyang mga kautusan, na binigyang-diin ang araw ng Sabbath. Nangako ang Panginoon ng malalaking pagpapala sa mga taong pinananatiling banal ang araw ng Sabbath.

Maaari kang gumawa ng dalawang column sa pisara na may mga pamagat na Mga Tagubilin at Mga Pagpapala. Sabihin sa mga estudyante na pag-aralan ang mga sumusunod na talata sa maliliit na grupo at ilista sa mga column sa pisara ang malalaman nila. Maaari din silang gumawa ng mga katulad na listahan sa kanilang study journal.

Basahin ang Doktrina at mga Tipan 59:9–20, at gumawa ng dalawang listahan, isang listahan para sa mga tagubilin na ibinigay ng Panginoon para sa ating mga kilos at pag-uugali sa araw ng Sabbath at isa pang listahan para sa mga pagpapalang ibinibigay Niya sa atin.

Sabihin sa mga estudyante na ibahagi ang natutuhan nila. Bigyan din sila ng pagkakataong magtanong, at sama-samang talakayin ang mga tanong ng mga estudyante. Maaaring makatulong sa mga estudyante na hanapin ang mga kahulugan ng mahihirap na salita kung kinakailangan. Maaaring talakayin at tuklasin ng mga estudyante ang ibig sabihin ng “iukol ang inyong mga pananalangin sa Kataas-taasan” (talata 10) at “iaalay ang inyong mga handog at ang inyong mga sakramento sa Kataas-taasan” (talata 12). Maaari kang tumulong na gabayan ang talakayan ng estudyante gamit ang mga tanong na tulad ng sumusunod:

• Anong mga katotohanan ang matutukoy natin mula sa mga talatang ito tungkol sa layunin ng Sabbath?

  Sabihin sa mga estudyante na ibahagi ang anumang katotohanang natuklasan nila. Maaari mong sabihin sa mga estudyante na talakayin kung bakit sa palagay nila ay mahalaga ang mga katotohanang natukoy nila. Kasama ng iba pang mga katotohanan na ibinabahagi ng mga estudyante, tulungan ang mga miyembro ng klase na matukoy at talakayin na ang Sabbath ay araw para ipakita natin ang ating katapatan sa Diyos (tingnan sa talata 10).

• Paano makatutulong sa buhay mo ang pagkakaroon ng araw para pagtuunan ang iyong pagmamahal at katapatan sa Diyos?

Paggalang sa Panginoon sa Sabbath

Ang sumusunod na aktibidad ay makatutulong sa mga estudyante na maunawaan kung paano nila maigagalang ang Panginoon sa pamamagitan ng kanilang mga pagpili sa araw ng Sabbath. Maaari mong isulat sa pisara ang tanong para sa temple recommend sa ibaba.

Sa mga interbyu para sa temple recommend, itatanong sa iyo:

“Sinisikap mo bang panatilihing banal ang araw ng Sabbath, kapwa sa tahanan at sa simbahan; dumadalo sa iyong mga miting; naghahanda para sa [sakramento] at marapat na tumatanggap ng sakramento; at namumuhay nang naaayon sa mga batas at kautusan ng ebanghelyo?”

Para matulungan kang pag-isipan kung paano mo masusunod ang utos na panatilihing banal ang araw ng Sabbath, magsulat ng mga ideya sa iyong study journal kung paano mo maigagalang ang Panginoon sa pamamagitan ng pagpapanatiling banal ng araw ng Sabbath.

Ang sumusunod na resources ay makatutulong sa mga estudyante na matukoy ang iba pang mga paraan para mapanatiling banal ang Sabbath sa tahanan at sa simbahan. Maaari mong i-display ang mga ito at bigyan ng oras ang mga estudyante na pag-aralan ang mga ito at magdagdag sa kanilang listahan ng mga ideya.

Basahin ang mga sumusunod na banal na kasulatan para matuklasan ang ginawa ni Jesucristo sa Sabbath:

• Mateo 12:9–13

• Lucas 4:16

Pag-aralan ang ilan sa sumusunod na resources para sa karagdagang mga ideya tungkol sa pagpapanatiling banal ng araw ng Sabbath:

• “Mahalin ang Diyos, mahalin ang inyong kapwa” sa Para sa Lakas ng mga Kabataan: Isang Gabay sa Paggawa ng mga Pagpili ([2022], 10–14)

• Mga Paksa ng Ebanghelyo, “Araw ng Sabbath” at “Sacrament,” topics.ChurchofJesusChrist.org

  Maaari mo ring ipanood ang “Upon My Holy Day—Honoring the Sabbath” (1:30) para maghanap ng karagdagang payo mula kay Elder Jeffrey R. Holland.

  Ang mga sumusunod na artikulo mula sa ChurchofJesusChrist.org ay maaari ding maging kapaki-pakinabang na resources para ibahagi: “Goal: Honor and Enjoy the Sabbath Day” at “Prepare for the Sacrament All Week Long.”

  Matapos ang sapat na oras na makapag-aral ang mga estudyante, maaari mo silang anyayahang ibahagi ang natutuhan nila. Maaari mong ipasulat sa kanila sa pisara ang ilan sa kanilang mga natuklasan. Maaari mo ring itanong ang mga sumusunod para matulungan ang mga estudyante na magbahagi ng sarili nilang mga karanasan.

• Ano ang nakatulong sa iyo para magpakita ng katapatan sa Diyos sa Sabbath? Ano ang nagawang kaibhan ng mga pag-uugaling ito para sa iyo?

Maaaring interesado ang mga estudyante na matuto pa mula sa karanasan ni Mary na ipinabatid sa simula ng lesson. Maaari mong ipabatid sa mga estudyante ang natitirang bahagi ng kuwento sa pamamagitan ng pagpapalabas ng video na “Only upon the Principles of Righteousness” mula sa time code na 5:24 hanggang 6:26, matatagpuan sa ChurchofJesusChrist.org.

Gumawa ng plano

Maaari mong i-display ang sumusunod na paanyaya. Maaari mong anyayahan ang ilang handang estudyante na ibahagi ang kanilang mga plano matapos nilang gawin ang mga ito.

Gumawa ng plano sa iyong study journal kung paano mo sisikaping igalang ang Tagapagligtas sa araw ng Sabbath. Maaari kang tumukoy ng mga ideya kung ano ang sisimulan mong gawin, patuloy na gagawin, o ititigil gawin, sa tahanan man o sa simbahan.

Karagdagang Resources

Bakit iginagalang ng mga Kristiyano ang Sabbath sa araw ng Linggo?

“Sa panahon ng Lumang Tipan, pinananatiling banal ng mga pinagtipanang tao ng Diyos ang Sabbath tuwing ikapitong araw ng linggo dahil nagpahinga ang Diyos sa ikapitong araw nang likhain Niya ang mundo (tingnan sa Genesis 2:2). Matapos ang Pagkabuhay na Mag-uli ni Jesucristo, na naganap sa unang araw ng linggo (tingnan sa Marcos 16:2), sinimulan ng mga disipulo ng Panginoon na panatilihing banal ang araw ng Sabbath sa unang araw ng linggo, ang araw ng Linggo (tingnan sa Mga Gawa 20:7)” (Mga Paksa ng Ebanghelyo, “Araw ng Sabbath,” topics.ChurchofJesusChrist.org).

Paano ako matutulungan ng paggalang sa araw ng Sabbath na maipahayag ang aking katapatan sa Diyos?

Itinuro ni Elder David A. Bednar ng Korum ng Labindalawang Apostol:

Sa araw ng Sabbath sinasamba natin ang Ama sa pangalan ng Anak sa pamamagitan ng pakikibahagi sa mga ordenansa at pag-alam, pagtanggap, pag-alaala, at pagpapanibago ng mga tipan. Sa Kanyang banal na araw, ang ating mga iniisip, kilos, at ugali ay tanda na ibinibigay natin sa Diyos para maipakita ang ating pagmamahal sa Kanya. (David A. Bednar, “Napakadakila at Mahahalagang Pangako,” Liahona, Nob. 2017, 92)

Ano ang nais ng Tagapagligtas na maunawaan natin tungkol sa Sabbath?

Ipinaliwanag ni Pangulong Russell M. Nelson:

Naniniwala ako na [nais ni Jesucristo na] maunawaan natin na ang Sabbath ay handog Niya sa atin, na nagbibigay ng tunay na pahinga mula sa hirap ng pang-araw-araw na buhay at pagkakataon para sa panibagong lakas na espirituwal at pisikal. Ibinigay ng Diyos sa atin ang natatanging araw na ito, hindi para sa paglilibang o pagtatrabaho kundi para magpahinga mula sa tungkulin, at magkaroon ng kapahingahan ang katawan at espiritu. (Russell M. Nelson, “Ang Sabbath ay Kaluguran,” Liahona, Mayo 2015, 129)

Paano maaaring maging araw ng pagpapahinga ang araw ng Sabbath?

Nagbahagi si Pangulong Russell M. Nelson ng isang karanasan at itinuro niya:

Una akong nakahanap ng kaluguran sa Sabbath maraming taon na ang nakalipas nang, bilang isang abalang siruhano, nalaman ko na ang Sabbath ay naging araw para sa personal na paggaling. Sa katapusan ng bawat linggo, humahapdi ang aking mga kamay dahil sa paulit-ulit na pagkuskos dito gamit ang sabon, tubig, at matigas na brush. Kailangan ko ring mapahinga mula sa napakaraming gawaing dulot ng mahirap na propesyon. Lubos na pahinga ang bigay ng araw ng Linggo. …

Sa Hebreo, ang ibig sabihin ng salitang Sabbath ay “pahinga.” Ang layunin ng Sabbath ay sinimulan noong Paglikha ng daigdig, nang pagkatapos ng anim na araw ng paggawa, ang Panginoon ay nagpahinga mula sa paglikha. (Russell M. Nelson, “Ang Sabbath ay Kaluguran,” Liahona, Mayo 2015, 129)

Ano ang ibig sabihin ng masayang panatilihing banal ang Araw ng Sabbath ngunit “hindi nang may labis na tawanan”? (Doktrina at mga Tipan 59:15)

Itinuro ni Elder Richard G. Scott (1928–2015) ng Korum ng Labindalawang Apostol:

Mag-ingat sa pagpapatawa. Ang malakas at di-angkop na pagtawa ay [hindi kalugud-lugod] sa Espiritu. Ang mabuting pagpapatawa ay nakakatulong sa paghahayag; ang malakas na pagtawa ay hindi. Ang pagpapatawa ay isang paraan ng pagtakas sa mga problema sa buhay. (Richard G. Scott, “Paano Makatatanggap ng Paghahayag at Inspirasyon sa Inyong Personal na Buhay,” Liahona, Mayo 2012, 46)

Mga Karagdagang Aktibidad sa Pag-aaral

Pagkatutong panatilihing banal ang araw ng Sabbath

Kung ikinuwento mo ang tungkol kay Mary at ang kanyang desisyon kung maglalaro ng soccer sa araw ng Linggo, maaari mong sabihin sa mga estudyante sa katapusan ng lesson na ipagpalagay na pinapayuhan nila si Mary. Maaaring ibahagi ng mga estudyante ang natutuhan nila tungkol sa araw ng Sabbath at kung paano ito makakaimpluwensya sa kanilang mga pagpili. Maaari nilang isadula o talakayin ang natutuhan nila sa maliliit na grupo.

“Na ang mata ay nakatuon sa aking kaluwalhatian” (Doktrina at mga Tipan 59:1)

Ang aktibidad na ito ay makatutulong sa mga estudyante na pagnilayan kung ano ang ibig sabihin ng magkaroon ng matang nakatuon sa kaluwalhatian ng Diyos.

Mag-display ng larawan ng Tagapagligtas. Sabihin sa mga estudyante na ikuyom nang maluwag ang isa sa kanilang mga kamay, ipikit ang isang mata, at tingnan ang larawan sa pamamagitan ng maliit na butas sa kanilang nakakuyom na kamay. Sabihin sa mga estudyante na ilarawan ang nakikita nila. Pagkatapos ay sabihin sa mga estudyante na buksan ang isa pang mata at banggitin ang lahat ng bagay na nakikita nila ngayon na maaaring makagambala sa pagtutuon nila sa Tagapagligtas.

Sabihin sa mga estudyante na ipaliwanag kung paano maaaring nauugnay ang aktibidad na ito sa espirituwal na pagkakaroon ng matang nakatuon sa kaluwalhatian ng Diyos. Sabihin sa mga estudyante na magbahagi ng mga paraan na maaalis nila ang mga bagay na nakagagambala sa pagtutuon nila sa Tagapagligtas, lalo na sa Kanyang banal na araw.

“Huwag kayong … gumawa ng anumang bagay tulad nito” (Doktrina at mga Tipan 59:6)

Matapos iutos sa mga Banal na huwag magnakaw, mangalunya, o pumatay, idinagdag ng Panginoon “ni gumawa ng anumang bagay tulad nito” (Doktrina at mga Tipan 59:6). Tulungan ang mga estudyante na pag-isipan ang kahulugan ng pariralang ito at ang epekto nito sa ating mga pagpili. Maaari mong sabihin sa mga estudyante na talakayin kung ano ang ibig sabihin ng magnakaw. Pagkatapos ay sabihin sa kanila na mag-isip ng mga kilos na maaaring hindi pagnanakaw ngunit “tulad nito.” Maaari mo ring gawin iyon para sa pangangalunya at pagpatay. Tulungan ang mga estudyante na matuklasan ang proteksyong ibinibigay sa atin ng Diyos sa pamamagitan ng pagbibigay sa atin ng mga kautusang ito.

Pasalamatan ang Diyos at kilalanin ang Kanyang ginagawa “sa lahat ng bagay” (Doktrina at mga Tipan 59:7, 21)

Maaari ninyong basahin ang Doktrina at mga Tipan 59:7, 21 bilang klase, at hanapin ang kautusan ng Panginoon. Sabihin sa mga estudyante na isipin kung paano nakakaapekto sa atin ang kilalanin palagi ang patnubay at mga pagpapala ng Diyos sa ating buhay. Bigyan ng oras ang mga estudyante na isipin ang mga pagpapala ng Diyos sa kanilang buhay, at hikayatin silang pumili ng mga partikular na paraan na maipapakita nila ang kanilang pasasalamat sa Diyos.