Դաս 74. Վարդապետություն և Ուխտեր 60–62

Վարդապետություն և Ուխտեր 60–62

«Լսեք Նրա ձայնը, Ով ունի ողջ զորությունը»

1831 թ. օգոստոսին Փրկիչը սիրով ցուցումներ տվեց մի խումբ երեցների՝ Միսսուրից Օհայո նրանց դժվարին ճամփորդության ժամանակ: Երբ երեցները տուն էին ուղևորվում, Նրա խորհուրդն օգնեց նրանց հասկանալ Նրա ակնկալիքներն ու ցանկությունները իրենց վերաբերյալ: Այս դասը նախատեսված է օգնելու ուսանողներին ավելին հասկանալ իրենց վերաբերյալ Փրկչի ակնկալիքների և ցանկությունների մասին։

Հնարավոր ուսումնական վարժություններ

Որոշումներ

Դասը սկսելու համար դիտարկեք հետևյալ իրավիճակները.

Պատկերացրեք, որ ձեր մտերիմ ընկերներից երկուսը տարբեր կերպ են հաղթահարում դժվարությունները որոշումներ կայացնելիս։ Ընկերներից մեկը հազվադեպ է Աստծուց օգնություն կամ ուղղորդում փնտրում և փորձում է որոշումների մեծ մասը ինքնուրույն կայացնել: Մյուս ընկերն աղոթում է ուղղորդման համար և վարանում է կայացնել ցանկացած որոշում՝ մինչև համոզված չլինի, որ Տերը պատասխանել է իրեն:

• Որո՞նք կարող են լինել պատճառները, թե ընկերներից յուրաքանչյուրն ինչու է այդ կերպ վարվում։

• Ի՞նչ թյուրըմբռնումներ եք տեսնում այս երկու իրավիճակներում:

Առաջարկեք ուսանողներին մտածել այն որոշումների մասին, որ պետք է կայացնեն իրենց կյանքում և արդյոք այս իրավիճակներից որևէ մեկը կարող է վերաբերել իրենց: Խրախուսեք նրանց այսօրվա դասում փնտրել ճշմարտություններ, որոնք կարող են օգնել նրանց որոշումներ կայացնելիս։

«Ես կխոսեմ ձեզ հետ ձեր ճամփորդության մասին» (Վարդապետություն և Ուխտեր 60.5)

Որպեսզի օգնեք ուսանողներին հասկանալ այն ուսմունքների համատեքստը, որոնք նրանք կուսումնասիրեն այսօր, կարդացեք կամ ամփոփ ներկայացրեք ստորև բերված պարբերության տեղեկությունները:

1831 թվականի օգոստոսին Ջոզեֆ Սմիթը և մի քանի երեցներ սկսեցին ավելի քան 800 մղոն (1287 կմ) ուղևորությունը դեպի իրենց տները Օհայո նահանգի Կիրթլենդ քաղաքում: Նախորդ մի քանի շաբաթը նրանք անցկացրել էին Միսսուրիում, որտեղ Տերը հրահանգել էր նրանց աշխատել Սիոն քաղաքը կառուցելու ուղղությամբ: Դեպի տուն ուղևորվելիս խումբը հարցեր ուներ իրենց ճամփորդության եղանակի և ուղղության վերաբերյալ: Մի քանի որոշումներ կայացնելու համար Տերը խրախուսեց նրանց օգտագործել իրենց դատողությունը և ինքնուրույն ընտրություն կատարել: Այլ որոշումների համար Նա տվեց հատուկ հրահանգներ և պատվիրաններ՝ նրանց ուղղորդելու համար:

Ուսանողները կարող են օգտագործել հետևյալ աղյուսակը՝ նշված հատվածները ուսումնասիրելու համար: Առաջարկեք ուսանողներին արտագրել հետևյալ աղյուսակը իրենց ուսումնասիրության օրագրերում։ Կարող եք նաև արտագրել այն գրատախտակին և առաջարկել մի քանի ուսանողի աղյուսակում գրել պատասխանները՝ հատվածները ուսումնասիրելուց հետո: Կարող եք ուսանողներին բաժանել խմբերի և հանձնարարել նրանց միասին ուսումնասիրել հատվածներից մեկը կամ բոլորը:

	Ինչն էր կարևոր Տիրոջ համար	Ինչը կարևոր չէր Տիրոջ համար
Վարդապետություն և Ուխտեր 60․5–8
Վարդապետություն և Ուխտեր 61․21–22
Վարդապետություն և Ուխտեր 62․5–7

• Ի՞նչ տարբերություններ նկատեցիք այս հատվածներում Տիրոջ համար կարևորի և ոչ կարևորի միջև:

• Ի՞նչ եղանակներով կարող եք կիրառել այս հատվածների Տիրոջ ուսմունքներն այն իրավիճակներում, որոնց բախվում եք ձեր կյանքում:

Կարդացեք Վարդապետություն և Ուխտեր 62․8 հատվածը՝ փնտրելով Տիրոջ խորհուրդը, որը կարող է օգնել մեզ, երբ մենք պետք է որոշումներ կայացնենք առանց որոշակի ուղղորդման:

Առաջարկեք ուսանողներին կիսվել այն ճշմարտությամբ, որը սովորել են այս հատվածում տրված Տիրոջ խորհրդից: Նրանք կարող են կիսվել նմանատիպ սկզբունքով․ Տերն ակնկալում է, որ մենք շատ որոշումներ կայացնենք՝ հիմնվելով Հոգու ցուցումների և մեր սեփական դատողության վրա:

Կարող եք առաջարկել ուսանողներին կարդալ Վարդապետություն և Ուխտեր 58․26–29 հատվածները՝ փնտրելով ուսմունքներ, որոնք կարող են օգնել իրենց ավելի լավ հասկանալ, թե ըստ Տիրոջ ակնկալիքի՝ մենք ինչպես պետք է որոշումներ կայացնենք: Կարող եք առաջարկել ուսանողներին խաչաձև հղում կատարել կամ կապել այս հատվածները Վարդապետություն և Ուխտեր 62․8 հատվածի հետ։

Կենտրոնացեք դարձի բերող սկզբունքների վրա․ լրացուցիչ ուսուցման համար, թե ինչպես դա անել, տես «Կենտրոնացեք այն ճշմարտությունների վրա, որոնք դարձի են բերում և ամրացնում են հավատքն առ Հիսուս Քրիստոս» դասընթացը՝ Ուսուցչի կատարելագործման հմտություններ․ Ուսուցանեք վարդապետությունը ուսուցողական նյութում։ Կարող եք կիրառել հմտությունը և հարցեր տալ, որոնք կօգնեն ուսանողներին բացահայտել և ձևակերպել դարձի բերող սկզբունքները։

• Ինչո՞ւ է կարևոր ապավինել մեր դատողությանը և Հոգու առաջնորդությանը, երբ որոշում ենք ընդունում:

• Ինչպե՞ս կարող է այս ճշմարտությունը օգնել մեզ մեր չափանիշների կամ արժեքների հետ կապված որոշումներ կայացնելիս:

Կարող եք առաջարկել ուսանողներին կիսվել իրենց փորձառություններով, երբ որոշումներ են կայացրել՝ հիմնվելով սեփական դատողության և Հոգու ցուցումների վրա: Առաջարկեք նրանց կիսվել, թե ինչպես է Տերն օրհնել իրենց այդ իրավիճակներում: Կարող եք նաև կիսվել ձեր սեփական փորձառություններով։

Փրկիչն ուսուցանում է Իր մասին

Դեպի Օհայո ուղևորության ընթացքում երեցները անորոշություն, հոգնածություն էին զգում և գտնվում էին վախեցնող իրավիճակներում։ Նրանք նաև տարաձայնություններ ու վեճեր էին ունենում։ Նրանց օգնելու համար Փրկիչը կիսվեց Իր մասին շատ կարևոր ուսմունքներով: Այդ ուսմունքները կարող են օգնել մեզ ավելի լավ հասկանալ, թե ով է Նա և ինչ կարող է անել մեզ համար:

Որպեսզի օգնեք ուսանողներին նախապատրաստվել ուսումնասիրելու հետևյալ հատվածները, առաջարկեք նրանց գրել Հիսուս Քրիստոս անունը իրենց ուսումնասիրության օրագրի էջի մեջտեղում: Կարող եք նաև գրել այն գրատախտակին: Երբ ուսանողներն ուսումնասիրեն սուրբ գրությունների ստորև բերված հատվածները, կարող են Փրկչի անվան շուրջը գրել բառեր կամ արտահայտություններ, որոնք նկարագրում են Նրան:

Կարդացեք Վարդապետություն և Ուխտեր 60․1–4, 61․1–2, 36–39, 62․1–3, 9 հատվածները: Ուշադրություն դարձրեք, թե ինչ եք սովորում Հիսուս Քրիստոսի մասին այս հատվածներից: Ձեր գտածը գրեք սուրբ գրությունների ուսումնասիրության օրագրում:

Ուսանողներին հնարավորություն տվեք կիսվելու, թե ինչ սովորեցին կամ ինչ իմացան Հիսուս Քրիստոսի մասին այս ուսումնական վարժությունից: Նրանք կարող են քննարկել հետևյալ հարցերը ամբողջ դասարանով, զույգերով կամ փոքր խմբերով:

• Ի՞նչ գտաք, որը կարող էր օգտակար լինել այս երեցներին իրենց ուղևորության ընթացքում:

• Ի՞նչ սովորեցիք Փրկչի մասին, որը կարող է օգնել կյանքում ձեզ կամ ուրիշներին:

Ավարտեք դասը՝ առաջարկելով ուսանողներին մտածել այն հուշումների մասին, որ իրենք կարող են ստանալ Սուրբ Հոգուց՝ հիմնվելով այսօր ուսումնասիրածի և քննարկածի վրա: Նրանց խրախուսեք, որ օրագրերում գրանցեն իրենց մտքերն ու տպավորությունները:

Օժանդակ նյութեր

Ինչպե՞ս կարող եմ իմանալ՝ արդյոք ես ճիշտ որոշում եմ կայացնում։

Տասներկու Առաքյալների Քվորումից երեց Ռիչարդ Գ. Սքոթը (1928–2015) ուսուցանել է.

Երբ [Աստված] հետաձգում է պատասխանը, դա նրա համար է, որ մենք աճենք Նրա հանդեպ հավատքով, Նրա պատվիրանների հանդեպ հնազանդություն ունենանք և ճշմարտության համաձայն գործելու պատրաստակամություն ունենանք։ Մեզանից ակնկալվում է պատասխանատվություն ստանձնել առանց նախնական հաստատման` գործելով այն որոշման համաձայն, որը համապատասխան է Նրա ուսմունքներին: Մենք չպետք է պասիվ կերպով նստենք կամ տրտնջանք, որովհետև Տերը չի խոսում մեզ հետ: Մենք պետք է գործենք:

Շատ հաճախ այն, ինչ մենք անում ենք, ճշմարիտ է: Նա մեր որոշումների ճշտությունը կհաստատի իր ձևով: Այդ հաստատումը հիմնականում գալիս է ճանապարհի ընթացքում՝ օգնությունների փաթեթների տեսքով: Մենք դրանք հայտնաբերում ենք հոգևորապես զգայուն լինելու դեպքում: Դրանք նման են սիրող Հոր կողմից կատարված գրառումների՝ որպես Նրա հաստատման ապացույց: Եթե վստահությամբ սկսենք մի բան, որը ճիշտ չէ, Նա մեզ կհայտնի այդ մասին, քանի դեռ շատ հեռուն չենք գնացել: Մենք զգում ենք այդ օգնությունը՝ ճանաչելով անհանգստության կամ անհարմարության զգացումները։ (Ռիչարդ Գ. Սքոթ «Կամքի ազատություն և պատասխաններ․ ճանաչենք հայտնությունը», Ensign, հունիս 2014, 50)

Վարդապետություն և Ուխտեր 60․2–3 Ինչպե՞ս կարող եմ ուրիշների հետ կիսվել իմ հավատքով և վկայությամբ:

Տասներկու Առաքյալների Քվորումից երեց Գարի Ի. Սթիվենսոնն ուսուցանել է.

Որպես Եկեղեցու անդամ՝ ձեզ հնարավորություն է տրվում խոսքով բերելու ձեր վկայությունը Եկեղեցու պաշտոնական ժողովների ժամանակ կամ քիչ պաշտոնական ձևով՝ ձեր ընտանիքի, ընկերների և ուրիշների հետ անհատապես զրուցելիս։

Ձեր վկայությամբ կիսվելու մեկ այլ եղանակ է ձեր արդար վարքագիծը։ Հիսուս Քրիստոսի վերաբերյալ ձեր վկայությունը պարզապես ձեր ասած խոսքերը չեն․ դրանում արտացոլվում է ձեր բուն էությունը։

Ամեն անգամ, երբ դուք բարձրաձայնում եք ձեր վկայությունը կամ ձեր գործողությունների միջոցով ցուցադրում եք Հիսուս Քրիստոսին հետևելու ձեր պատրաստակամությունը, դուք հրավիրում եք ուրիշներին գալ «դեպի Քրիստոսը» [Մորոնի 10․32]։ (Գարի Ի. Սթիվենսոն, «Սնուցեք ձեր վկայությունը և կիսվեք դրանով», Լիահոնա, նոյեմբեր 2022, 112)

Վարդապետություն և Ուխտեր 61․5–19։ Արդյո՞ք բոլոր մարդիկ պետք է խուսափեն ջրով ճանապարհորդելուց:

Տիրոջ խոսքերը Վարդապետություն և Ուխտեր 61․5–19 հատվածներում չեն արգելում Վերջին Օրերի Սրբերին ճանապարհորդել ջրով կամ լողալ ջրում։ Նկարագրելով ջրերի վրա եղած անեծքը վերջին օրերում՝ Տերը, հավանաբար, նկատի ուներ Հայտնություն գրքի այն հատվածները, որոնցում Հովհաննես Առաքյալը նկարագրում է այն կործանումը, որը տեղի կունենա ջրերում Հիսուս Քրիստոսի Երկրորդ Գալուստից առաջ (տես Հայտնություն 8․8–11, 16․1–6)։ Վարդապետություն և Ուխտեր 61 բաժնում Տերը հատուկ անդրադառնում է «այս ջրերի» վտանգին, նկատի ունենալով Միսսուրի գետը (տես Վարդապետություն և Ուխտեր 61.5, 18)։

Վարդապետություն և Ուխտեր 62․1: Փրկիչն ինչպե՞ս է սատարում մեզ՝ մեր թուլությունները հաղթահարելու գործում։

Առաջին Նախագահությունից Նախագահ Դալլին Հ. Օուքսը հայտարարել է.

Մեր Փրկիչը տոկաց և տառապեց բոլոր մահկանացու ցավերից «մարմնավորապես», և այսպիսով Նա «ըստ մարմնի» գիտեր, թե ինչպես «սատարել [որը նշանակում է սփոփել և օգնել] իր ժողովրդին՝ ըստ նրանց թուլությունների» [Ալմա 7․12]։ Ուստի Նա գիտի մեր դժվարությունները, մեր վշտերը, մեր գայթակղությունները և մեր տառապանքները, քանի որ Նա հոժարակամ տարավ այդ բոլորը՝ որպես Իր Քավության կարևոր մաս: Եվ սրա շնորհիվ Փրկչի Քավությունը արտոնում է Նրան սատարել մեզ՝ ուժ տալով տանելու այդ ամենը: (Դալլին Հ. Օուքս «Ամրանալով Հիսուս Քրիստոսի Քավության միջոցով», Լիահոնա, նոյ. 2015, 61–62)

Օժանդակ ուսումնական վարժություններ

Վարդապետություն և Ուխտեր 60․1–3 Բացեք ձեր բերանը՝ ավետարանով կիսվելու համար

Բացատրեք, որ երբ Եկեղեցու երեցներին առաջին անգամ պատվիրվեց թողնել իրենց տները Օհայոյում և մեկնել Միսսուրի, նրանց պատվիրվեց ճանապարհին քարոզել ավետարանը (տես Վարդապետություն և Ուխտեր 52.9–10, 21–23, 25–27)։

Առաջարկեք ուսանողներին կարդալ Վարդապետություն և Ուխտեր 60․1–3 հատվածները՝ փնտրելով Տիրոջ խոսքերը՝ ուղղված այդ մարդկանցից մի քանիսին:

Որպեսզի օգնեք ուսանողներին տեսնել, թե ինչպես կարող են այս ուսմունքները առնչվել իրենց կյանքին, կարող եք տալ նմանատիպ հարցեր.

• Ի՞նչը կարող է խանգարել մեզ, որ մենք բացենք մեր բերանները Փրկչի ավետարանով կիսվելու համար:

• Փրկիչն ինչպե՞ս կարող է օգնել մեզ հաղթահարել այն խոչընդոտները, որոնց մենք բախվում ենք։

• Ի՞նչ եղանակներով կարող ենք բացել մեր բերանը՝ այսօր ավետարանով կիսվելու համար:

Վարդապետություն և Ուխտեր 60․13 Խուսափեք ծուլությունից

Ուսանողների համար օգտակար կլինի քննարկում ծավալել Տիրոջ հետևյալ պատվիրանի վերաբերյալ․ «ձեր ժամանակը պարապ մի վատնեք» (Վարդապետություն և Ուխտեր 60.13):

Բացատրեք, որ Վարդապետություն և Ուխտեր 60 բաժնում արձանագրված Տիրոջ խորհրդի մի մասը վերաբերում էր նրանց, ովքեր գալու էին Միսսուրի՝ օգնելու կառուցել Սիոն քաղաքը:

Առաջարկեք ուսանողներին կարդալ Վարդապետություն և Ուխտեր 60․13 հատվածը՝ փնտրելով, թե Նա ինչ է պատվիրել այդ սրբերից մի քանիսին: Օգտակար կլինի բացատրել, որ ծուլություն բառը նշանակում է խուսափել աշխատանքից կամ մասնակցել անարժեք գործերին:

• Ձեր կարծիքով, ինչո՞ւ Տերը չէր ցանկանում, որ Իր Սրբերը ծուլանան իրենց ճամփորդության ժամանակ:

• Ինչպե՞ս կարող է այս խորհուրդը մեզ համար կիրառելի լինել մեր մահկանացու ճամփորդության ժամանակ:

Կարող եք առաջարկել ուսանողներին ուսումնասիրել այլ սուրբ գրություններ, որոնք կարող են օգնել իրենց ավելի լավ հասկանալ, թե ինչպես է Տերն ուզում, որ մենք օգտագործենք մեր ժամանակը: Այդ հատվածների օրինակներից են․ Ալմա 34․32–33, Վարդապետություն և Ուխտեր 58․27, 75․3–4, 88․124։

• Ծուլությունն ինչպե՞ս կարող է ազդել Երկնային Հոր և Հիսուս Քրիստոսի հետ ձեր հարաբերությունների վրա:

Առաջարկեք ուսանողներին մտածել որոշ եղանակների մասին, որոնցով իրենք կարող են ծուլությամբ վատնել ժամանակը և նպատակ սահմանել կատարելագործման համար։

Վարդապետություն և Ուխտեր 62․1: Ստացեք օգնություն Հիսուս Քրիստոսից

Ուսանողների համար օգտակար կլինի քննել, թե ինչ է ուսուցանել Փրկիչը Վարդապետություն և Ուխտեր 62.1 հատվածում՝ Իր մասին և մեզ օգնելու Իր կարողության մասին: Կարող եք առաջարկել ուսանողներին կարդալ այդ հատվածը և խաչաձև հղումով այն կապել Ալմա 7․11–13 հատվածների հետ։ Կարող եք նրանց մի քանի րոպե տրամադրել՝ հանգիստ խորհելու համար, թե ինչպես է Փրկիչը սատարել իրենց կամ իրենց մտերիմներին: Խրախուսեք նրանց գրանցել իրենց փորձառություններն ու զգացողություններն իրենց օրագրերում և կիսվեք նրանց հետ նախագահ Դալլին Հ. Օուքսի խոսքերով, որոնք զետեղված են «Օժանդակ նյութերում»: Մի քանի պատրաստակամ ուսանողի առաջարկեք կիսվել, թե ինչպես է Փրկիչը զորացնում և աջակցում իրենց՝ թուլությունները և փորձությունները հաղթահարելու համար: