Lesona 75: Mataupu Faavae ma Feagaiga 60–63

Mataupu Faavae ma Feagaiga 63:1–23

O le Tulafono a le Alii o le Legavia

I le taumafanafana o le 1831, sa toe foi mai ai le Perofeta o Iosefa Samita mai Misuri ma iloa ai o nisi o le Au Paia i Katelani na faia ni agasala matuia, e aofia ai le solia o le tulafono o le legavia. I le faaaliga o loo tusia i le Mataupu Faavae ma Feagaiga 63, na lapataia ai e le Alii le Au Paia i le matuia o a latou agasala. O lenei lesona e mafai ona fesoasoani i tagata aoga ia lagonaina le taua o le usiusitai patino i le tulafono a le Alii o le legavia.

Gaoioiga E Ono Mafai Ona Aoao Ai

O le taua o le amio mama

Ina ia amata le vasega, mafaufau e faaali atu se ata e faaalia ai le Faaola. Valaaulia le vasega e tusi i le laupapa le tali i le fesili muamua o fesili nei. E mafai ona e valaaulia ni nai tagata aoga e faamatala mai mea na latou tusia ma faasoa mai pe faapefea ona latou taliina le fesili lona lua.

• O a nisi o upu po o fasifuaitau o loo faamatala ai uiga auaumama e finagalo le Faaola tatou te maua?

  Faaopoopo le upu amio mama i le laupapa pe afai e le o i ai iina. Faamalamalama atu o le amiomama e aofia ai le i ai o le amiosa’o, mama a’ia’i i feusuaiga, ma le mauaina o le mana ma le malosi faaleagaga (tagai Taiala i Tusitusiga Paia, “Amio Mama,” scriptures.ChurchofJesusChrist.org).

• Aisea e te manatu ai o le amiomama o se uiga taua lea mo i tatou ia maua?

• O faapefea ona osofaia le poloaiga a le Faaola ia amiomama i o tatou aso?

Valaaulia tagata aoga e mafaufau i le taua o le mama a’ia’i i feusuaiga. E mafai foi ona latou mafaufau e uiga i a latou fesili o i ai po o faafitauli latou te feagai patino e faatatau i lenei poloaiga. Fautuaina le vasega e gauai atu i uunaiga faaleagaga ia e mafai ona fesoasoani ia i latou e lagona ai se manao sili atu ia ola i ni olaga mama ma lelei.

Ua ta’usalaina e le Faaola le agasala tau feusuaiga

O le mataupu faaletalaaga lenei e mafai ona fesoasoani i tagata aoga e saunia ai e suesue le Mataupu Faavae ma Feagaiga 63.

I le faaaliga o loo tusia i le Mataupu Faavae ma Feagaiga 63, sa talanoaina ai e le Faaola amioga agasala a nisi o le Au Paia i Katelani, Ohaio. Sa ia lapatai mai e uiga i le matuia o nei agasala (tagai Mataupu Faavae ma Feagaiga 63:1–6) ma faasoa mai upumoni e uiga i le taua o le mama i feusuaiga.

Suesue i le Mataupu Faavae ma Feagaiga 63:13–16, ma vaavaai mo valaaulia ma lapataiga a le Alii.

Afai e manaomia, fesoasoani i tagata aoga ia malamalama i le uiga o upu autu po o fasifuaitau i nei fuaiupu. Mo se faataitaiga, atonu e fesoasoani le faamalamalama atu faapea o le “mulilua” e faasino i sootaga feusuai i le va o se tagata ua faaipoipo ma se tasi e ese mai i lona toalua. O le “tuinanau” o se tasi o lona uiga o le vaai atu i se tagata i se auala e faaosofia ai lagona feusuai. O lenei mea e aofia ai le matamata i ata mataga. “O loo ta’u mai i le tulafono o le legavia e faapea e faamaonia e le Atua le gaoioiga faalefeusuaiga i le na o le va o se alii ma se tamaitai ua faaipoipoina” (Mo Le Malosi o le Autalavou: O Se Taiala mo le Faia o Filifiliga [2022],23).

• O a ni mea o aoao mai e nei fuaiupu ia te oe e uiga i le aafiaga o agasala tau feusuaga e iai mo i tatou?

• O a ni mea ua mafai ona e a’oa’oina e uiga i le Faaola mai Ana afioga i nei fuaiupu?

O le upumoni e tasi o le a talafeagai ona faamamafa i le taimi o lenei talanoaga o le, e tausalaina e le Faaola le tuinanau ma isi ituaiga uma o agasala faalefeusuaiga.

Malamalamaaga loloto e uiga i le tulafono o le legavia

Fesoasoani i tagata aoga ia malamalama o le poloaiga a le Faaola ia mama i feusuaiga e tele ina faasino i ai o le tulafono o le legavia. O le gaoioiga lenei e mafai ona fesoasoani i tagata aoga e faalolotoina ai lo latou malamalama e uiga i le taua o le usiusitai i lenei tulafono.

Valaaulia le vasega e mafaufau i ni nai fesili e ono i ai i tupulaga talavou e uiga i le tulafono a le Alii o le legavia. Atonu e sili atu le toafimalie o tagata aoga i le faia o fesili e aunoa ma le faailoaina e ala i le tusia i lalo o a latou fesili. Filifili ni nai fesili talafeagai ma lisi i luga o le laupapa.

Ina ia fesoasoani ia te oe e saunia e tali fesili o loo ia te oe po o isi e uiga i le tulafono a le Alii o le legavia, suesue vaega nei i le Mo Le Malosi o le Autalavou: O Se Taiala mo le Faia o Filifiliga (2022): “Savavali i le malamalama o le Atua” (itulau 16–21) ma le “E paia lou tino” (itulau 22–29).

E mafai e tagata aoga ona galulue faatasi ma se paga po o ni vaega toalaiti e sue tali i fesili latou te filifili e taulai i ai. E faaopoopo atu i le suesueina o vaega mai le Mo Le Malosi o le Autalavou: O Se Taiala mo le Faia o Filifiliga (2022), e mafai foi ona valaaulia tagata aoga e saili mo isi punaoa o le talalelei.

O nisi punaoa faaopoopo e mafai ona e faasoa atu i tagata aoga e mafai ona maua i “Gaoioiga Faaopoopo e Aoao Ai” i le faaiuga o le lesona.

A uma se taimi talafeagai, valaaulia tagata aoga e talanoaina mea na latou maua a o latou suesue. Valaaulia ni tagata aoga e faasoa mai o latou malamalamaaga. O se fesili e pei o le fesili lenei e mafai ona fesoasoani e taiala ai lenei talanoaga.

• O le a se mea na e maua na faalolotoina ai lou malamalama e uiga i le mafuaaga ua poloaiina ai i tatou e ola i le tulafono o le legavia?

O faamanuiaga mo le usiusitai i le tulafono o le legavia

Ina ua uma ona lapataia le Au Paia e uiga i le natura ogaoga o le solia o le tulafono o le legavia, sa fautuaina i latou e le Faaola e tausi Ana poloaiga, ma sa Ia folafola atu faamanuiaga mo le usiusitai.

Faitau le Mataupu Faavae ma Feagaiga 63:19–20, 23, ma vaavaai mo le mea na aoao mai e le Faaola.

• O a faamanuiaga ua folafola mai e le Alii ia i latou o e tausia Ana poloaiga?

• E mafai faapefea e le manatuaina o nei faamanuiaga ona faaosofia i tatou e ola i ni olaga mama?

Atonu e i ai nisi o tagata aoga na faia ni agasala e fesootai i le tulafono o le legavia. Faamanatu i le vasega a tatou taumafai ma le faamaoni e salamo i a tatou agasala, e faia e le Faaola le faamagaloga atoa ma le faamalologa e mafai ai. Ina ia fesoasoani i soo se tasi o loo popole ua uma ona latou faia ni mea sese, e mafai ona e faamamafaina le Mataupu Faavae ma Feagaiga 58:42–43.

Manatua mea ua e aoaoina

Tuu atu i tagata aoga se taimi e mafaufau loloto ai i mea sa latou aoaoina ma lagonaina i le taimi o latou suesuega i le asō. O le tasi auala e faia ai lenei mea o le valaaulia o i latou e tusi a latou tali i se tasi po o fesili uma nei i a latou api talaaga mo suesuega.

• O a ni malamalamaga po o ni lagona na e maua a o faia au suesuega i le asō?

• O le a se mea ua e aoaoina e uiga i le taua o le ola mama ma le aafiaga e mafai ona i ai i lena filifiliga i lou olaga?

• O le a se mea ua e lagona e fai pe suia?

Faaiu le lesona i le faamanatu atu i tagata aoga o le folafolaga a le Faaola e faamanuia tagata uma o e taumafai ma le faamaoni e usitai i le tulafono a le Alii o le legavia.

Punaoa Faaopoopo

O le a le tulafono a le Faaola o le legavia?

O le ola mama o le mamā a’ia’i mai feusua’iga. O i latou o e nofomama e ola mama i o latou mafaufauga, upu, ma gaoioiga. O le ola mama o lona uiga o le le faia o soo se sootaga feusuai a’o le’i faaipoipo. O lona uiga foi o le faamaoni atoatoa i le tane po o le avā i le aluga o le faaipoipoga. (Autu ma Fesili, “Legavia,” topics.ChurchofJesusChrist.org)

E faapefea pe afai ua ou solia le tulafono o le legavia?

Na aoao mai Elder Dieter F. Uchtdorf o le Korama a Aposetolo e Toasefululua:

O le Togiola e le i’u a le Faaola ua suia atoa ai le ala e mafai ona tatou vaavaai atu ai i a tatou solitulafono ma ni lē atoatoa. Nai lo le nofoa’i i na mea ma lagonaina le lē matogiolaina, e mafai ona tatou a’oa’o mai ai ma lagonaina le faamoemoe [tagai i le Alema 36:17–20]. O le meaalofa faamamā o le salamo e mafai ai ona tatou tuua i tua a tatou agasala ma tutula’i a’e o ni tagata fou [tagai i le 2 Korinito 5:17].

Ona o Iesu Keriso, e le tau faamatalaina ai i tatou i o tatou to’ilalo. E mafai ona latou faaleleia i tatou. (Dieter F. Uchtdorf, “O Loo ia i Tatou le Atua,” Liahona, Me 2021, 8–9)

O le a la’u mea e fai pe ou vaai i se ponokalafi?

Sa aoao mai Peresitene Dallin H. Oaks o le Au Peresitene Sili:

Ou te talitonu o tagata uma na faafuasei le vaaia o ponokalafi. E leai se agasala i lenei mea pe a tatou liliu ese ma aua le tulimatai atu i ai. E pei lava o se mea sese, lea e manaomia ai le faasa‘oga nai lo le salamo. …

O le matautia i soo se faamoemoeina o le faaaogaina o ponokalafi, e tusa lava pe faasamasamanoa po o le faatele, o taimi uma na te faaosoina ai le toe faia soo lava pea, lea o le a faateleina ai le taimi e alu i lagona feusuai ma amioga. Ua iloa e saienitisi o ata feusuai e maua ai vailaau i le faiai lea e tauia ai lagona feusuai, lea e uunaia atili ai le gauai atu i amioga feusuai. O amioga feusuai le mama o soo se ituaiga po o se tikeri e maua ai lagona o le maasiasi, lea, i le aluga o taimi, e mafai ona mauaa i totonu o se tagata. …

… E pei lava o soo se amioga agasala, o le faaaogaina o ponokalafi e tulieseina ai le Agaga Paia. O nisi o e ua oo i lenei mea o le a lagona le uunaiga e salamo. O isi, e ui i lea, atonu e lagona le mā ma taumafai e nanā lo latou nofosala e ala i le faafoliga. E mafai foi ona amata ona latou lagonaina le maasiasi, lea e mafai ona taitai atu ai i le feita ia i latou-lava. Afai e tupu lenei mea, e mafai ona amata e tagata ona talitonu i se tasi o pepelo sili a Satani: o le mea na latou faia pe faaauau pea ona faia ua avea ai i latou ma se tagata leaga, e le agavaa mo le alofa tunoa o le Faaola ma e le mafai ona salamo. E matuai le moni lava lena. Tatou te le o mamao ese mai le Faaola ma Lana Togiola. (Dallin H. Oaks, “Faamaloloina Mai le Mailei o Ponokarafi,” Ensign, Oke. 2015, 34–35)

Gaoioiga Faaopoopo e Aoao Ai

Punaoa faaopoopo mo suesuega o le tulafono o le legavia

Ina ia fesoasoani i tagata aoga e tali fesili e uiga i le tulafono o le legavia, e mafai ona e tuuina atu punaoa nei:

• Autu ma Fesili, “Legavia,” topics.ChurchofJesusChrist.org

• Autu ma Fesili, “Salamo,” topics.ChurchofJesusChrist.org

• Autu ma Fesili, “Tosina Atu i le Itupa Tutusa,” topics.ChurchofJesusChrist.org

• Ponokalafi,” Fesoasoani mo le Olaga, ChurchofJesusChrist.org

• “Savavali i le malamalama o le Atua,” (Mo Le Malosi o le Autalavou: O Se Taiala mo le Faia o Filifiliga [2022], 16–21)

• Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 38.6.5, ChurchofJesusChrist.org

• Mau faasino e pei o nei: Mataio 5:27–28; 1 Korinito 6:18–20; 10:13; Iakopo 2:28, 31–35; Alema 7:21; 13:28; 39:8–9; Mataupu Faavae ma Feagaiga 59:6; 121:45

Vitio e uiga i le tulafono o le legavia

Ina ia fesoasoani i tagata aoga ia lagonaina le taua o le usiusitai i le tulafono o le legavia, e mafai ona e faaali atu se tasi pe sili atu o vitio nei:

• “O Le a se Mea e Tatau Ona Ou Faia Pe a Ou Vaai i se Ponokalafi?” (5:45)

• “Tumau i totonu o Laina” (5:10)

• “Togiola—E le o se Mea e Tasi le Taimi” (3:00)

• “Ua Ou Filifili Ia Mama” (4:19)

Mataupu Faavae ma Feagaiga 63:6–12. E tausalaina e le Alii le sailia o faailoga

Afai e te filifili e taulai atu le vaega o le lesona i le Mataupu Faavae ma Feagaiga 63:6–12, atonu o le a manuia tagata aoga mai se talanoaga e uiga ia Ezra Booth. Sa liua o ia i le talalelei a Iesu Keriso ina ua uma ona molimauina le faamalologa faavavega o le lima o Elsa Johnson. Ae e lei leva ona auai i le Ekalesia a Iesu Keriso, ae amata ona le fiafia Ezra i le leai o ni faaaliga faaleagaga ma sa ia faitioina le Ekalesia ma le Perofeta o Iosefa Samita (tagai i le Au Paia: O Le Tala o le Ekalesia a Iesu Keriso o le Au Paia i Aso e Gata Ai, vol. 1, O Le Tagavai o le Upumoni, 1815–1846 [2018],146). Na tuua e Ezra le Ekalesia ma avea ma se tasi o le aufaitio sili ona le taofiofi i le Perofeta o Iosefa Samita.

Valaaulia tagata aoga e faitau le Mataupu Faavae ma Feagaiga 63:6–12, ma vaavaai mo se upumoni faaopoopo na aoao mai e le Alii e uiga i faailoga ma le faatuatua. O se tasi o upumoni e ono faailoa mai e tagata aoga o le faatuatua ia Iesu Keriso e le oo mai e ala i faailoga, ae o faailoga e mulimuli ia i latou o e faatuatua ia te Ia.

Ina ia fesoasoani i tagata aoga ia lagonaina le taua o lenei upumoni, mafaufau e matamata le vitio “Inspiring Short: The Miracle of the Ordinary” (3:00). A maea le vitio, o fesili o talanoaga e mafai ona aofia ai:

• O a ni mea masani i lou olaga o loo molimau mai i le alofa o le Tama Faalelagi mo oe?

• E mafai faapefea i le sailiga mo vavega i aso uma ona faateleina lou faatuatua ia Iesu Keriso?