Lesona 76: Mataupu Faavae ma Feagaiga 60–63

Mataupu Faavae ma Feagaiga 63:57–64

Amio Migao mo le Suafa Paia o Iesu Keriso

I le faaaliga o loo tusia i le Mataupu Faavae ma Feagaiga 63, sa faaalia ai e le Faaola Lona finagalo mo Ona soo e “faaeteete i le ala latou te ave ai [Lona] suafa i o latou laugutu” (Mataupu Faavae ma Feagaiga 63:61). O lenei lesona e mafai ona fesoasoani i tagata aoga ia lagonaina le taua o le faaaogaina o le suafa o le Faaola ma le migao.

Gaoioiga E Ono Mafai Ona Aoao Ai

Faaeteete nai lo le faasamasamanoa

Tusi le fasifuaitau Faaeteete nai lo le faasamasamanoa i luga o le laupapa. Ona valaaulia lea o tagata aoga e talanoaina fesili nei:

• O a nisi o tulaga e taua ai mo se tasi ona faaeteete nai lo le faasamasamanoa? Aisea?

  Afai e manaomia e tagata aoga se fesoasoani e mafaufau ai i ni manatu, e mafai ona e ta’ua ni nai faataitaiga, e pei o le aveina o se taavale, sailia o le initoneti, otiina o lauulu, po o le faatinoina o se faiga faafomai.

• O a nisi o mea e te manatu e finagalo le Faaola tatou te faaeteete ai i o tatou olaga?

Na tuuina mai e Sister Rebecca L. Craven o le Au Peresitene Aoao o Tamaitai Talavou le fesili lenei:

O tatou faaeteete ea i a tatou upu ma gagana? Pe o tatou taliaina faasamasamanoa gagana masoā ma mataga? (Rebecca L. Craven, “Faaeteete faasaga i le Faasamasamanoa,” Liahona, Me 2019, 10)

O a nisi o tulaga e te ono fetaiai ai ma le gagana e le ogatusa ma le Atua po o isi mea paia?

Valaaulia tagata aoga e mafaufau e uiga i o latou lagona pe a latou fetaiai ma lena gagana. Fautuaina i latou a o latou suesue e vaavaai mo aoaoga e mafai ona fesoasoani ia i latou e lagona ai le taua o le faaeteete i le auala latou te talanoa ai e uiga i mea paia, aemaise lava auala latou te faaaogaina ai le suafa o le Tama Faalelagi ma Iesu Keriso.

Amio Migao mo le suafa o Iesu Keriso

O le faamatalaga lenei e mafai ona fesoasoani i tagata aoga ia malamalama i le talaaga mo fuaiupu o le a latou suesueina i le Mataupu Faavae ma Feagaiga 63.

I le taimi o le faaaliga o loo tusia i le Mataupu Faavae ma Feagaiga 63, sa faaaoga ai e nisi o le Au Paia i Katelani, Ohaio, le suafa o le Alii e aunoa ma le pule tatau o le perisitua (tagai i le Mataupu Faavae ma Feagaiga 63:62). Sa tausalaina e le Alii nei faatinoga ma aoao atu i le Au Paia upumoni taua e uiga i le ala e tatau ona faaaoga ai Lona suafa.

Faitau le Mataupu Faavae ma Feagaiga 63:58–64, ma vaavaai mo mea na finagalo ai le Alii ia malamalama ai le Au Paia e uiga ia te Ia.

• O a ni mea o fesoasoani nei fuaiupu ia oe e malamalama ai e uiga ia Iesu Keriso?

• O le a se mea ua e aoao mai fuaiupu 61–64 e uiga i le auala tatou te faaaogaina ai le suafa o le Faaola?

  O se tasi o upumoni e ono ta’ua e tagata aoga mai nei fuaiupu e faapea, o le suafa o Iesu Keriso e paia ma e tatau ona faaaoga ma le faaeteete.

• O le a sou manatu o le a le uiga o le faaaoga ma le faaeteete o le suafa o le Faaola?

• O a ni au fesili o i ai e uiga i mea o loo e aoaoina i nei fuaiupu?

Afai e i ai ni fesili a tagata aoga e uiga i le faaaogaina “o le suafa o le Alii … e aunoa ma le pule” (fuaiupu 62), faamalamalama atu e mafai ona aofia ai le tautala le migao i le Tama Faalelagi ma Iesu Keriso (tagai Dallin H. Oaks, “Amio Migao ma le Mama,” Liahona, Me 1986, 49–50). E mafai foi ona aofia ai le faaaogaina ma le faaletatau o le pule o le perisitua a le Faaola (tagai Neil L. Andersen, “Mana o le Perisitua,” Liahona, Nov. 2013, 93). Ia mautinoa ua malamalama tagata aoga e talafeagai le talanoa e uiga i le Faaola i le talalelei po o talanoaga i aso uma pe a tatou talanoa e uiga ia te Ia ma le alofa ma le faaaloalo.

A o lei faia le fesili lenei, atonu e fesoasoani le tuu atu i tagata aoga e mafaufau faapea latou te iloa se tasi e le malamalama i le taua o le faaaogaina o le suafa o le Faaola ma le migao. E mafai ona latou manatua lenei tagata a o latou talanoaina.

• O le a sou manatu o le a se mea e mafai ona fesoasoani ia i tatou e lagona ai se manao sili atu e faaaoga le suafa o Iesu Keriso ma le migao?

Lagonaina o le alofa sili atu ma le migao mo Iesu Keriso

Faamalamalama atu o le malamalama atili po o ai Iesu Keriso ma mea ua Ia faia mo i tatou e mafai ona fesoasoani ia sili atu lo tatou alofa ma le migao mo Ia.

A o lei faailoaina atu le gaoioiga suesue lenei, mafaufau e valaaulia tagata aoga e faasoa mai ni aafiaga na latou maua po o ni upumoni latou te iloa mai tusitusiga paia e faaosofia ai i latou e mafaufau ma talanoa ma le migao e uiga ia Iesu Keriso. E mafai foi ona e faasoa atu se faataitaiga mai i lou lava olaga.

Faaalu sina taimi e suesue ai punaoa mamana ua filifilia ia e mafai ona fesoasoani ia te oe e lagona ai le alofa sili atu mo Iesu Keriso ma le manao e talanoa e uiga ia te Ia ma le migao. E mafai ona e saili mo tusitusiga paia, faamatalaga mai taitai o le Ekalesia, viiga, po o isi punaoa aoga e faamatala ai po o ai Ia po o le a foi le mea ua Ia faia. Tusi ou manatu ma lagona i lau api talaaga mo suesuega.

E mafai e tagata aoga ona vaavaai mo punaoa e i latou lava pe faatasi foi ma se paga. Afai e manaomia, e mafai ona e tuuina atu ia i latou ni nai faataitaiga o punaoa e mafai ona latou faasino i ai, e pei o viiga o loo aoao mai ai le natura paia o Iesu Keriso po o nisi o mau nei: Mataio 8:23–27; 2 Nifae 25:13; Mataupu Faavae ma Feagaiga 18:23–25; 35:1–2; 110:1–5.

A uma ua lava se taimi, valaaulia tagata aoga e faasoa mea ua latou aoaoina ma lagona mai latou suesuega. Afai e maua e tagata aoga ni viiga anoa, e mafai e le vasega ona usuina faatasi se viiga se tasi pe sili atu. E mafai foi ona e valaaulia tagata aoga e faitau se mau na latou maua ma faasoa mai pe aisea na taua ai ia i latou.

O fesili nei e mafai ona fesoasoani i tagata aoga e faasoa mai ai o latou malamalamaaga:

• O le a se mea na e suesueina na musuia ai le lotofaafetai po o le faaaloalo mo le Faaola?

• E mafai faapefea e le manatuaina o mea sa e suesueina ona aafia ai au filifiliga?

E mafai ona e faalauteleina le talanoaga o le fesili lona lua e ala i le vavaeina o tagata aoga i ni vaega toalaiti ma valaaulia i latou e talanoaina pe mafai faapefea ona aafia vaega patino o o latou olaga pe a tatou lagonaina le migao sili atu mo le Tama Faalelagi ma Iesu Keriso. O faataitaiga o vaega o o latou olaga e mafai ona latou talanoa i ai e aofia ai:

• O filifiliga latou te faia e faatatau i le faaaogaina o ala o faasalalauga.

• A latou fegalegaleaiga ma isi.

• O lo latou naunautaiga e faasoa atu le talalelei.

• O le ala latou te tatalo ai i le Tama Faalelagi.

Faatatau i lou olaga

Ina ia fesoasoani i tagata aoga e toe manatunatu i lo latou aoaoina, valaaulia i latou e tali mai i se tasi o fesili nei i a latou api talaaga mo suesuega:

• E faavae i mea ua e aoaoina mai le Agaga pe mai i lau tupulaga i le asō, o a suiga ua e matauina i ou lagona mo po o le vaaiga i le Faaola?

• O le a se mea ua e lagona se manaoga e faia ia lelei atu pe i se tulaga ese e fai ma se taunuuga o mea na e a’oa’oina i le asō?

Valaaulia ni nai tagata aoga naunau e faasoa mai mea na latou tusia. Ona faauma lea o le lesona i le faasoa mai o lau molimau e uiga i le Tama Faalelagi ma Iesu Keriso, ma faamalamalama atu le mafuaaga e paia ai ia te oe o Laua suafa.

Punaoa Faaopoopo

Aisea e tatau ai ona ou faaaogaina suafa o le Tama Faalelagi ma Iesu Keriso ma le migao?

Sa aoao mai Peresitene Dallin H. Oaks o le Au Peresitene Sili:

E leai nisi upu e sili ona paia pe taua ia tatou gagana atoa, nai lo o suafa o le Atua le Tama ma lona Alo, o Iesu Keriso. …

Pe a faaaoga suafa o le Atua le Tama ma lona Alo, o Iesu Keriso, ma le migao ma le pule, e talosagaina ai se mana i luga atu o le mea e mafai e le tagata soifua ona malamalama i ai.

E tatau ona iloagofie e tagata talitonu uma o nei suafa silisiliesele—a e tutupu ai vavega, lea na faia ai le lalolagi, lea na foafoa ai le tagata, ma lea e mafai ona faaolaina ai i tatou—e paia ma e tatau lava ona taulimaina ma le migao aupito maualuga. E pei ona tatou faitau i faaaliga i ona po nei, “Manatua o le mea e sau mai luga ua paia, ma e ao ona tautalagia ma le faaeteete, ma i le taofiofiga a le Agaga.”(Mataupu Faavae ma Feagaiga 63:64.) (Dallin H. Oaks, “Amio Migao ma le Mama,” Liahona, Me 1986, 50, 51).

O le a se mea e mafai ona fesoasoani ia te au ia lagona ai le sili atu o le alofa ma le migao mo Iesu Keriso?

Na aoao mai Sister Jean B. Bingham, sa avea ma Peresitene Aoao o le Aualofa:

E maua le olioli tumau i le taulai atu i lo tatou Faola, o Iesu Keriso, ma le ola ai i le talalelei e pei ona faaa’oa’o ma aoao mai e Ia. O le tele o lo tatou aoao e uiga, i ai le faatuatua, ma faata’ita’i ia Iesu Keriso, o le tele foi lea tatou te malamalama ai o Ia o le pogai o le faamalologa uma, filemu, ma le agai atu i le faavavau. (Jean B. Bingham, “Ina Ia Atoa Lo Outou Olioli,” Liahona, Nov. 2017, 85)

E mafai faapefea e le lagonaina o le migao mo Iesu Keriso ona aafia ai lo’u olaga?

Na aoao mai Elder Ulisses Soares o le Korama a Aposetolo e Toasefululua:

A oo ina tatou maofa moni ia Iesu Keriso ma Lana talalelei, e sili atu lo tatou fiafia, e tele atu lo tatou naunautaiga mo le galuega a le Atua, ma e tatou te iloaina le aao o le Alii i mea uma. E le gata i lea, ua atili anoa a tatou suesuega o afioga a le Atua; ua atili faia ai ma le loto a tatou tatalo; ua atili migao ai a tatou tapuaiga; ma atili filiga ai la tatou auaunaga i le malo o le Atua. O nei mea uma o ni mea moni e saofaga i le atili tasoo ai o auaunaga a le Agaga Paia i o tatou olaga. O le mea lea, o le a faamalosia ai la tatou molimau i le Faaola ma Lana talalelei. (Ulisses Soares, “Ia Maofa ia Keriso ma Lana Talalelei,” Liahona, Me 2022, 115)

Mataupu Faavae ma Feagaiga 63:62. E mafai faapefea e se tasi ona “faaaoga fua … le suafa o le Alii, ua le i ai ea se pule”?

Ua aoao mai Elder Neil L. Andersen o le Korama a Aposetolo e Toasefululua:

O le faatautaia po o le tufaina atu ma le faaletatau o le faamanatuga, faamanuiaina o e mama’i, po o le auai i isi sauniga o le perisitua o le, e pei ona saunoa ai Elder David A. Bednar, ma le ta’u fua o le suafa o le Atua [tagai David A. Bednar, Act in Doctrine (2012), 53]. Afai e le agavaa se tasi, e tatau ona alu ese o ia mai le taitaiina i sauniga o le perisitua ma faalatalata atu ma le agaga tatalo i lona epikopo o se laasaga muamua lea i le salamo ma le toe foi atu i poloaiga. (Neil L. Andersen, “Mana o le Perisitua,” Liahona, Nov. 2013, 93)

Gaoioiga Faaopoopo e Aoao Ai

Faataitaiga mai le soifuaga o Peresitene Spencer W. Kimball

A o outou talanoaina le taua o le faaaogaina o le suafa o Iesu Keriso ma le migao ma le faaaloalo, e mafai ona e faaaogaina le tala lenei mai le soifuaga o Peresitene Spencer W. Kimball (1895–1985):

“I St. I le Falemai o St. Mark i le Aai o Sate Leki sa faagaseina atoa ai [Peresitene Spencer W. Kimball] ma faia sona taotoga, ona toe toso atu ai lea i se moega i lona potu. A’o i ai pea i aafiaga o le vai gase, na lagona e Spencer ua tu lona moega i talane o se lifi ma faalogoina le tagata toso moega, ua i ai se mea ua ita ai, ua palauvale e faaaoga ai le suafa o le Alii. O lona mafaufau sa le’i manino atoatoa, sa ia augani atu ai i se leo tiga: ‘Faamolemole aua e te faia le tala lena. E sili atu lo’u alofa ia te Ia nai lo o se isi lava mea o lenei lalolagi. Faamolemole.’ Sa sāō le mea. Ona tali lemu mai lea o le tagata toso moega: ‘sa le tatau ona ou faia lena tala. Ou te faamalie atu.’” (Edward L. Kimball and Andrew E. Kimball Jr., Spencer W. Kimball: Peresitene lona Sefululua o le Ekalesia a Iesu Keriso o le Au Paia o Aso e Gata ai [1977], 264)

A uma ona faasoa atu le tala, valaaulia tagata aoga e faasoa atu mea sa latou matauina.

Mataupu Faavae ma Feagaiga 63:47. “Manumalo ai i le lalolagi”

Atonu e aoga i tagata aoga se talanoaga e uiga i aoaoga a le Faaola e uiga i le faatoilaloina o le lalolagi o loo maua i le Mataupu Faavae ma Feagaiga 63:47. A uma ona faitau faatasi lenei fuaiupu, e mafai ona e valaaulia tagata aoga e mafaufau e faailoga le fasifuaitau “manumalo i le lalolagi” i a latou tusitusiga paia. Ona valaaulia lea o tagata aoga e tusi fesili nei ia latou api talaaga mo suesuega, ma avanoa i lalo ifo o fesili taitasi e tusi ai a latou tali.

• O le a le uiga o le manumalo i le lalolagi?

• O faapefea ona tatou faia?

• E faapefea e le manumalo i le lalolagi ona manuia ai o tatou olaga?

E mafai e tagata aoga ona suesue i le saunoaga a Peresitene Russell M. Nelson o le konafesi aoao ia Oketopa 2022 ua faaautuina “Manumalo i le Lalolagi ma Maua le Malologa” (Liahona, Nov. 2022, 95–98) e sue ai tali i nei fesili. Valaaulia tagata aoga e tusi a latou tali ia latou api talaaga mo suesuega ma faasoa mai o latou malamalamaaga pe a uma ona latou suesue.

Mataupu Faavae ma Feagaiga 63:64. Taulimaina ma le migao ia mea paia

E faaopoopo atu i le talanoa e uiga i le faaaogaina o le suafa o le Faaola ma le migao, e mafai ona aoga i tagata aoga le talanoaina o isi auala e mafai ona latou faaaogaina ai le fautuaga a le Alii i le Mataupu Faavae ma Feagaiga 63:64. E ono fesoasoani atu ia fesili nei:

• O a nisi upu po o mataupu e “[sau] mai luga” ma e paia? E mafai faapefea ona tatou mautinoa tatou te talanoa e uiga i ai “ma le faaeteete”?

Mafaufau e valaaulia tagata aoga e mafaufau e uiga i tulaga atonu latou te feagai lea latou te vaai pe faalogo ai i mea paia o taulimaina ma le manatu mama pe tautala iai ma le lē faaaloalo. Mo se faataitaiga, atonu latou te fetaiai i nisi taimi ma ni talanoaga le talafeagai i a latou paaga, pe atonu foi o le a faaalia i vitio le talafeagai, musika, po o faasalalauga faaagafesootai.

Valaaulia tagata aoga e mafaufau i mea e mafai ona latou faia e aloese ai pe taulimaina ai nei ituaiga o tulaga. Mo se faataitaiga, e mafai ona latou filifili e savavali ese mai talanoaga e le talafeagai, le toe mulimuli i tala faasalalau faaagafesootai e le talafeagai, pe faaeteete foi i ituaiga vitio po o musika latou te filifili e matamata pe faalogologo i ai.