Mataupu Faavae ma Feagaiga 64–66

Mataupu Faavae ma Feagaiga 64–66

Vaaiga Aoao

O Iosefa Samita ma isi toeaina na toe foi i Ohaio mai Misuri. I le taimi o le malaga, sa i ai ni feeseeseaiga a nisi o toeaina ae o le toatele na faalelei o latou lagona fefinauai. A o sauni e siitia atu i Hairama, Ohaio, ma fesoasoani i isi ia saunia e malaga atu i Misuri, na maua e Iosefa Samita le faaaliga o loo i le Mataupu Faavae ma Feagaiga 64. Na poloaiina e le Alii i le faaaliga ia tagata o le Ekalesia e faamagalo e le tasi le isi ma aoao i latou i osigataulaga Na te manaomia. I le Mataupu Faavae ma Feagaiga 65, na Ia faaalia, o le a alu atu le talalelei i atunuu uma i le sauniuniga mo le Afio Mai Faalua o le Faaola, ma e tatau i le Au Paia ona tatalo mo le tuputupu ae o le malo o le Atua.

Uunaia sauniuniga mo aafiaga e aoao ai: E tele auala e mafai ai e tagata aoga ona saunia o latou mafaufau ma loto e aoao le talalelei. O nisi o nei auala e aofia ai le tatalo mo faaaliga, atiina ae o se manao e aoao, salamo, suesue, tali atu i fesili, naunau e fai se sao, ma le sauni e aoao atu isi. Mo nisi faamatalaga i le ala na faia ai e le Faaola lenei mea, tagai i le vaega “Na Valaaulia e le Faaola Isi e Sauni e Aoaoina” i totonu o le Aoao Atu i le Ala a le Faaola. E mafai foi ona e vaai i se faataitaiga o le auala e faia ai lenei mea i lalo ifo o le lesona ua ulutalaina “Mataupu Faavae ma Feagaiga 64:20–43”.

Ia saunia e aoao atu

O lenei faamatalaga e tuuina atu ai ia te oe ni manatu o mea atonu e manaomia ona muai saunia mo lesona taitasi.

Mataupu Faavae ma Feagaiga 64:1–17

Faamoemoega o le lesona: Ina ia fesoasoani i tagata aoga e mulimuli i le faataitaiga a Iesu Keriso ma ia loto faamagalo atili.

• Sauniuniga a le tagata aoga: Valaaulia tagata aoga e toe manatunatu i se tagata i o latou olaga atonu e manaomia la latou faamagaloga.

• Vitio: “Faamagaloga: Sa Faamamaina La’u Avega” (8:24); “Fiafia ma Faavavau” (13:09; matamata mai le faailotaimi 9:47 i le 10:39); “O Le Galuega o le Faaleleiga” (16:12; matamata mai le faailotaimi 10:11 i le 11:23)

• Ata e faaali atu: O Le Faaola

Mataupu Faavae ma Feagaiga 64:20–43

Faamoemoega o le lesona: Ina ia fesoasoani i tagata aoga ia lagonaina se manao faateleina e avatu i le Alii o latou loto ma mafaufau naunau.

• Sauniuniga a le tagata aoga: A o lei faia lenei lesona, tuu atu i tagata aoga le fasifuaitau “E manaomia e le Alii le loto ma le mafaufau malie ”(Mataupu Faavae ma Feagaiga 64:34). Valaaulia i latou e mafaufau i le uiga o lenei fasifuaitau po o le auala e mafai ona tatou tuuina atu ai i le Alii o tatou loto ma mafaufau malie.

• Uunaia sauniuniga mo aafiaga tau i le aoaoina: O le manatu mo sauniuniga a tagata aoga talu ai o se tasi lea o faataitaiga o le auala e uunaia ai sauniuniga mo aafiaga tau i le aoaoina. Mo nisi faataitaiga i lenei mea, tagai i le aoaoga ua faaulutalaina “Fai ni valaaulia e fesoasoani i tagata aoao e saunia ai mo le isi aoaoga” o loo maua i le Tomai o le Atinaega o Faiaoga: Valaaulia le Aoaoina ma le Filiga.

• Ata e faaali atu: O le faatoaga a Isaako Morley; o se loto ma se mafaufau e faigofie ona tosina atu i ai

Mataupu Faavae ma Feagaiga 65

Faamoemoega o le lesona: Ina ia fesoasoani i tagata aoga ia malamalama i le matafaioi a le Ekalesia i le sauniaina o le lalolagi mo le Afio Mai Faalua o Iesu Keriso.

• Sauniuniga a le tagata aoga: Valaaulia tagata aoga e vaavaai mo faamaoniga o le tuputupu ae o le Ekalesia. E mafai ona latou talanoa ma se matua po o se tagata o le latou uarota pe na faapefea ona latou vaaia le faalauteleina o le Ekalesia i le lalolagi atoa. E mafai foi e tagata aoga ona vaavaai mo faamaoniga e faaaoga ai “Mea Moni ma Fuainumera” le newsroom.ChurchofJesusChrist.org.

• Vitio: “Faamoemoe o Isaraelu” (1:01:34; matamata mai le faailotaimi 51:42 seia oo i le 52:04)