Lesona 77: Mataupu Faavae ma Feagaiga 64–66

Mataupu Faavae ma Feagaiga 64:1–17

“Manaomia le Faamagalo Atu”

I le taimi o se malaga mai Misuri i Ohaio, na feagai ai Iosefa Samita ma isi i ni finauga ma lagona leaga i le tasi ma le isi. I le Mataupu Faavae ma Feagaiga 64, na faatonuina ai i latou e Iesu Keriso e uiga i lo latou manaomia ona faamagalo atu. O lenei lesona e mafai ona fesoasoani i tagata aoga e mulimuli ai i le faataitaiga a Iesu Keriso ma atili loto faamagalo ai.

Gaoioiga E Ono Mafai Ona Aoao Ai

Manatunatu i le faamagaloga

Valaaulia tagata aoga e faasoa mai se tala e uiga i le faamagalo atu. Pe e mafai foi ona e faasoa atu se tala o le faamagaloga e pei o le “Faamagaloga: Ua Māmāa ai La’u Avega” (8:24), o loo maua i le ChurchofJesusChrist.org. Valaaulia tagata a’oga e tali fesili nei i a latou api talaaga mo suesuega.

• Pe e te manatu o oe o se tagata loto faamagalo? Aisea pe aisea foi e leai ai?

• Aisea e te manatu ai e finagalo le Tama Faalelagi ma Iesu Keriso ia e faamagalo atu i isi?

• O ai se tasi e manaomia ona e faamagalo i ai?

Valaaulia tagata aoga e saili faaaliga faaletagata lava ia ia iloa ai po o ai atonu latou te manaomia ona faamagalo atu ma mea e mafai ona latou faia e tuuina atu ai le faamagaloga.

E loto faamagalo Iesu Keriso

Mafaufau e valaaulia se tagata aoga e faitau le mataupu lenei mo le Mataupu Faavae ma Feagaiga 64.

Ia Aokuso 1831, ina ua uma ona faapaiaina Siona i Misuri, sa toe foi Iosefa Samita, Oliva Kaotui, Isaako Morley, Ezra Booth, ma isi i Ohaio. O le vevela tele, tulaga matautia o femalagaaiga, ma feeseeseaiga i le taitaiga na taitai atu ai le vaega e faitio ma fefinauai le tasi ma le isi. Ina ua latou taunuu i le fale, sa tumau pea le vevesi i lo latou va (tagai i le Au Paia: O Le Tala o le Ekalesia a Iesu Keriso i Aso e Gata Ai, vol. 1, O Le Tagavai o le Upumoni, 1815–1846 [2018], 133–34, 136–37). I le tali atu i lo latou aafiaga, na tuuina mai ai e le Alii le faaaliga o loo tusia i le Mataupu Faavae ma Feagaiga 64.

Faitau le Mataupu Faavae ma Feagaiga 64:1–7, ma vaavaai pe na faapefea ona tali atu le Alii ia i latou o e ua agasala.

Mafaufau e faaali atu se ata o le Faaola. Fai atu i tagata aoga e mafaufau loloto i le fesili lenei. Mulimuli ane, ona valaaulia lea o ni nai tagata a’oga e faasoa mai o latou manatu i le vasega po o se paga.

• O a uiga o Iesu Keriso ua e mauaina i nei mataupu?

• O fea o nei uiga e sili ona e faafetai ai? Aisea?

E manaomia ona tatou faamagalo atu

Faitau le Mataupu Faavae ma Feagaiga 64:9–11, ma vaavaai pe faapefea ona valaaulia i tatou e Iesu Keriso e mulimuli i Lana faataitaiga.

O leMataupu Faavae ma Feagaiga 64:9–11 o se fuaitau o le atamai i aoaoga faavae. Mafaufau e valaaulia tagata aoga e faailoga ia fuaitau o le atamai faaleaoaoga faavae i se auala tulaga ese ina ia mafai ona latou mauaina gofie.

• O le a se mea e tulaga ese mai ia te oe e uiga i mea na aoao atu e le Faaola ia Iosefa ma isi?

  Fesoasoani i tagata o le vasega e faailoa mai le upumoni e manaomia e Iesu Keriso i tatou e faamagalo atu i tagata uma. Mafaufau e tusi le upumoni lenei i luga o le laupapa. E mafai foi ona e valaaulia tagata aoga e tusi i totonu o a latou tusitusiga paia.

  Faaalu se taimi ia lava e fesoasoani ai i tagata aoga ia malamalama i fuaiupu 9–11. E mafai ona fesoasoani ni isi o fesili nei.

• Aisea e te manatu ai e manaomia e Iesu Keriso i tatou e faamagalo atu i tagata uma?

• Aisea e te manatu ai ua ia i tatou “le agasala tele” (fuaiupu 9) pe a tatou filifili e le faamagalo atu i isi?

• O le a sou manatu e mafai faapefea e le fai atu i o tatou loto “ia faamasino le Atua i lo’u va ma oe” (fuaiupu 11) ona fesoasoani ia i tatou e faamagalo atu i isi?

• O a ni uiga FaaKeriso o le a fesoasoani ia te oe e atiina ae pe a e loto faamagalo i isi?

Aoao pe faapefea ona faamagalo atu i isi

Mafaufau e tuu atu i tagata aoga se taimi e fai ai fesili pe faasoa mai ni luitau e faatatau i le faamagalo atu. E mafai ona tali mai tagata aoga i fesili nei i luga o le laupapa, e ala i se matapule palota e le faalauiloaina, po o ni fasipepa e mafai ona faasoa atu i le vasega.

• O a ni fesili e ono i ai i tagata a o latou saili e faamagalo atu i isi?

• O a luitau e ono feagai ma tagata a o latou taumafai e mulimuli i le faataitaiga a le Faaola ia faamagalo atu?

Atonu e fai mai e le vasega ni fesili e pei o le “E mafai faapefea e le Faaola ona fesoasoani ia te au e faamagalo atu i isi?” po o le “Pe o le faamagalo atu o isi o lona uiga e tatau ona ou toe tiga?”

Valaaulia tagata aoga e filifili se fesili o se vasega pe taitoatasi. Ona fai atu lea ia i latou e saili ni punaoa paia ua filifilia mo ni tali.

E mafai e tagata aoga ona maua tali e ala i le suesueina o upu e pei o le “Iesu,” “faamagalo,” “Faaola,” ma le “alofa mutimutivale” i le polokalama o le Gospel Library po o le Taiala i Tusitusiga Paia. E mafai foi ona e saunia mau, e pei o le Mataio 5:7; 18:21–35; ma le Mosaea 26:30–31, ma faamatalaga faaperofeta o loo lisi atu i lalo.

Na aoao mai e Elder Gerrit W. Gong o le Korama a Aposetolo e Toasefululua le ala e mafai ai e Iesu Keriso ona fesoasoani ia i tatou e faamagalo atu i isi:

O nisi taimi o lo tatou loto e faamagalo atu i se isi tagata e mafai ai e i latou ma i tatou ona talitonu e mafai ona tatou salamo ma faamagaloina. O nisi taimi o se loto ia salamo ma se tomai e faamagalo atu ai e oo mai i taimi eseese. O lo tatou Faaola o lo tatou Puluvaga i le Atua, ae e fesoasoani foi o Ia e aumaia i tatou ia i tatou lava ma le tasi ma le isi a o tatou o mai ia te Ia. Aemaise lava pe a loloto le manu’a ma le tiga, o le faaleleia o a tatou sootaga ma le faamaloloina o o tatou loto e faigata, atonu e le mafai e i tatou lava ia. Ae e mafai e le lagi ona aumaia ia i tatou le malosi ma le poto e sili atu i lo tatou lava iloa o le taimi e pipiimau ai, ma le ala e faamamulu ai. (Gerrit W. Gong, “Fiafia ma le Faavavau,” Liahona, Nov. 2022, 85)

Na aoao mai Elder Jeffrey R. Holland o le Korama a Aposetolo e Toasefululua:

“Faamagalo atu, ona faamagaloina ai lea o outou” [Luka 6:37], sa aoao mai ai Keriso i taimi o le Feagaiga Fou. Ma i o tatou aso: “O A’u, o le Alii, Ou te faamagalo i le o le a Ou faamagaloina, ae o outou ua poloaiina ia faamagalo atu i tagata uma” [Mataupu Faavae ma Feagaiga 64:10]. Ae peitai, e taua mo nisi o outou o loo ola i le tiga moni e matau mea sa le’i fetalai ai o Ia. Sa le’i fetalai mai o Ia, “E le faatagaina outou e lagonaina le tiga moni po o faanoanoaga moni mai aafiaga matuitui na e oo i ai ona o le isi tagata.” Pe na Ia fetalai foi, “Ina ia mafai ona faamagalo atu atoatoa e ao ona e toe faia se sootaga faatiga pe toefoi atu i se tulaga faasaua ma faataumaoi.” Ae e ui i ni faatiga sili ona matuitui e ono oo mai ia i tatou, e mafai lava ona tatou tutulai ae i o tatou tiga pe afai tatou te savavali i luga o le ala i le faamalologa moni. O lena ala o le ala o le faamagaloga sa savalia e Iesu o Nasareta, lea o loo valaau mai ia i tatou taitoatasi, “Sau, mulimuli mai ia te a’u” [Luka 18:22]. (Jeffrey R. Holland, “O le Galuega o le Faaleleiga,” Liahona, Nov. 2018, 78–79)

Mafaufau e valaaulia tagata aoga e faasoa mai tali latou te maua po o manatu latou te lagona e uiga i le faamgalo atu. E mafai foi ona latou faasoa mai ni faataitaiga o auala ua faamanuiaina ai i latou e ala i le mulimuli i le faataitaiga a le Faaola e faamagalo atu i isi. Faamanatu i tagata aoga e aua nei faasoa mai ni aafiaga po o ni faamatalaga e patino naua.

• O a ni faatinoga patino e mafai ona tatou faia o le a fesoasoani ia i tatou e faamagalo atu ai i isi?

O ni tali e ono maua e tagata aoga e aofia ai mea nei:

• Suesue tala o le Faaola ma isi o loo tuuina atu le faamagaloga

• Mafaufau loloto pe o le a faapefea ona ese o tatou olaga pe afai tatou te tuuina atu le faamagaloga

• Ofo atu se tatalo faamaoni lea tatou te tuuina atu ai a tatou avega i le Atua ma ole atu mo Lana fesoasoani e faamagalo atu i isi

• Faailoa atu e ala ia Iesu Keriso, e mafai ai e o tatou loto ona suia i le aluga o taimi ina ia mafai ai ona tatou faamagalo atu i isi

Faaaogaina patino

I le amataga o le lesona, sa valaaulia ai tagata aoga e mafaufau i se tasi e manaomia ona latou faamagalo atu i ai. Valaaulia i latou e mafaufau i lena tulaga ma saili musumusuga a o latou taliina fesili nei.

Mafaufau loloto i fesili nei, ma mafaufau e tusi ou mafaufauga i lau api talaaga o suesuega.

• O le a se mea e mafai ona e faia e faalagolago ai i le Faaola e faamagalo atu?

• O a ni taumafaiga o le a e faia e mulimuli ai i le faataitaiga a Iesu Keriso ma avea atili ai ma loto faamagalo?

Tauloto

Atonu e te manao e fesoasoani i tagata aoga e tauloto le mau faasino o le atamai i aoaoga faavae ma le fuaitau autu o le mau i le taimi o lenei lesona ma iloilo i latou i lesona i le lumanai. O le fasifuaitau autu o le mau “Ae o outou ua poloaiina ia faamagalo atu i tagata uma.” O manatu mo gaoioiga o le taulotoina o loo i ai i le vaega faaopoopo i lalo o le “Gaoioiga o le Iloiloga o le Atamai i Aoaoga Faavae.

Punaoa Faaopoopo

Mataupu Faavae ma Feagaiga 64:9–11. E faapefea e le faamagalo atu o isi ona fesoasoani ia te au ia avea faapei o Iesu Keriso?

Na aoao mai Peresitene Russell M. Nelson:

E ono faigata matuitui le lafoaia o se ita lea e lagonaina le matua faamaoniaina. E foliga mai e ono le mafai ona faamagalo i latou o a latou amioga faataumaoi ua manunua ai e ta’umamaina. Ae peitai, sa apoapoai mai le Faaola ia i tatou ia “faamagalo atu i tagata uma” [Mataupu Faavae ma Feagaiga 64:10; tagai foi fuaiupu 9].

O i tatou o soo o le Aloalii o le Filemu. O le taimi nei, e sili atu nai lo se isi lava taimi, ua tatou manaomia ai le filemu ua na o Ia lava e mafai ona aumaia. E mafai faapefea ona tatou faamoemoe ia i ai le filemu i le lalolagi ae, tatou te le o sailia taitoatasi le filemu ma le fealofani? Uso e ma tuafafine, ou te iloa o le mea o loo ou fautuaina atu e le faigofie. Ae o soo o Iesu Keriso e tatau ona faia le faataitaiga mo tagata uma i le lalolagi e mulimuli ai. Ou te augani atu ia te outou ia faia mea uma tou te mafaia e faamuta ai fetauaiga patino o loo sasao i le taimi nei i o outou loto ma i o outou olaga. (Russell M. Nelson, “O Le Mana o le Malosiaga Faaleagaga,” Liahona, Me 2022, 97)

Mataupu Faavae ma Feagaiga 64:9. E mafai faapefea e le Faaola ona fesoasoani ia te a’u ia avea ma se tagata sili atu ona loto faamagalo?

Na faapea mai Elder Gerrit W. Gong o le Korama o Aposetolo e Toasefululua:

E tuuitiitia lo tatou tuulafoaiina, pe a tatou iloa e le o tuua na o i tatou. E malamalama pea lo tatou Faaola. Faatasi ai ma le fesoasoani a lo tatou Faaola, e mafai ona tatou faamatuu atu lo tatou faamaualuga, o tatou tiga, o a tatou agasala i le Atua. Po o le a lava lo tatou lagona a o tatou amata, e tatou te atoatoa atili pe a tatou faalagolago ia te Ia e faaatoatoa a tatou sootaga.

O le Alii, o lē na te silafia ma malamalama atoatoa, e faamagaloina lē o le a Ia finagalo i ai; o i tatou (e le atoatoa) e tatau ona faamagalo atu i tagata uma. A o tatou o mai i lo tatou Faaola, e faaitiitia lo tatou taulai ia i tatou lava. E itiiti lo tatou faamasinoina ae faamagalo atili atu. O le faalagolago i Lona mana, alofa mutimutivale, ma le alofa tunoa [tagai i le 2 Nifae 2:8] e mafai ona faasaolotoina ai i tatou mai finauga, ita, sauaga faatautala, tuulafoaiina, le talafeagai, ma luitau faaletino ma faalemafaufau ia e oo mai i nisi taimi ma se tino faaletino i se lalolagi faaletino. O le fiafia ma le faavavau e le faapea o sootaga uma o le a fiafia ma faavavau. Ae o le afe tausaga o le meleniuma pe a noanoatia Satani e mafai ona tatou maua ai le taimi manaomia ma auala e ofo ai ia alofa, malamalama, ma galueaiina mea uma, a o tatou sauniuni mo le faavavau. (Gerrit W. Gong, “Fiafia ma le Faavavau,” Liahona, Nov. 2022, 85)

Mataupu Faavae ma Feagaiga 64:9. O a nisi faamanuiaga o le faamagalo atu i isi?

Na saunoa mai Elder Kevin R. Duncan o le Fitugafulu:

E faafetai ai, i le Atua, i Lona alofa ma le alofa mutimutivale i Lana fanau, ua saunia ai se ala e fesoasoani e faatonutonu ai i tatou mai nei aafiaga faigata o le olaga. Ua Ia saunia se alofaga mo i latou uma o e ua avea ma tagata ua aafia i faaletonu a isi. Ua Ia aoao i tatou e mafai ona tatou faamagalo! E tusa lava pe na avea i tatou ma se tagata ua aafia i se taimi, e le tatau ona tatou avea faalua ma se tagata ua aafia i le amoina o le avega o le ita, le fiafia, tiga, inoino, po o le taui ma sui. E mafai ona tatou faamagalo, ma e mafai ona tatou saoloto! (Kevin R. Duncan, “O Le U’u Faamalolo o le Faamagaloga,” Liahona, Me 2016, 33)

Mataupu Faavae ma Feagaiga 64:10. O ai e manaomia ona ou faamagaloina?

Sa saunoa mai Peresitene Dieter F. Uchtdorf, a o avea ma uso o le Au Peresitene Sili:

Ua fetalai manino lo tatou Faaola i lenei mataupu o lea e faigata ai ona malamalama sese i Lana fetalaiga. “O A’u, o le Alii, Ou te faamagalo i le o le a Ou faamagaloina,” ae ua Ia faapea mai, “… ae o outou ua poloaiina ia faamagalo atu i tagata uma ” [Mataupu Faavae ma Feagaiga 64:10; faaopoopo le faamamafa].

Pe mafai ona ou faaopoopoa se vaefaamatalaga ii? Pe a poloaiina e le Alii ia tatou faamagalo atu i tagata uma—o lona uiga e aofia ai ma le faamagaloina o i tatou lava. O nisi taimi, mai tagata uma i le lalolagi, o le tagata e sili ona faigata ona faamagaloina—atonu e faapea foi ma le tagata e sili ona manaomia la tatou faamagaloga—o le tagata lena e vaai mai ia i tatou i le faaata. (Dieter F. Uchtdorf, “O Le e Alofa Atu e Alofaina Mai,” Liahona, Me 2012, 75)

Gaoioiga Faaopoopo e Aoao Ai

O tala i faamagaloga

Mafaufau e faasoa atu se tasi pe sili atu o nei tala i le aluga o le lesona. E mafai ona e faasoa atu se tasi i le amataga o le lesona ma valaaulia tagata aoga e mafaufau i o latou lava manaoga e faamagalo atu i isi. Pe faasoa atu se tasi o tala o se auala e taulima ai fesili po o atugaluga a tagata aoga. E mafai ona e fai i le vasega e faailoa mai luitau na feagai ma nei tagata a o latou faamagalo atu i isi ma pe na faapefea ona fesoasoani le Faaola ia i latou.

“Manaomia e Faamagalo Atu” (7:52) o le tala i le faamagaloina atu e Iosefa Samita o Viliamu W. Phelps.

“E Tatau Ona Tatou Faamagalo Atu” (2:43) o le tala ia Corrie ten Boom, o se tagata na sao mai le Fasiotiga Tele, o le sa feiloai ma se leoleo mai le tolauapiga a Nazi lea sa faafalepuipuiina ai o ia. O lenei tala sa faasoa mai e Epikopo Keith B. McMullin, lea sa avea muamua ma au Epikopo Pulefaamalumalu.

I lana saunoaga “O Le Mana Faamalolo o le Faamagaloga,” mai le faailotaimi 0:00 i le 6:03, na faasoa mai ai e Peresitene James E. Faust (1920–2007) o le Au Peresitene Sili le tali a tagata Amiso ina ua mavae se tafanaga a le aoga i lo latou nuu.

I lana saunoaga “Fiafia ma le Faavavau,” mai le faailotaimi 2:45 i le 4:22, na faasoa mai ai e Elder Gerrit W. Gong o le Korama a Aposetolo e Toasefululua le tala i se tamaitai na faamagaloina lona tama ma faamaeaina lana galuega o le malumalu.

Manatu sese ma fautuaga mo le faamagaloina o isi

O le tusiga “Faamagalo atu o Isi: Manatu Sese ma Fautuaga” e mafai ona fesoasoani i tagata aoga e sue ai tali i a latou fesili ma atugaluga (Elizabeth Lloyd Lund, Ensign, Apr. 2018, 18–21).

Aoao e uiga i le faamagalo atu mai uiga ma faataitaiga a le Faaola

Ina ia fesoasoani i tagata aoga ia iloa atili e uiga i le uiga faaKeriso o le faamagalo atu, valaaulia i latou e sailiili i tala nei e uiga i le faamagaloina e le Faaola o isi. E mafai e tagata aoga ona faasoa mai ni auala latou te ono mulimuli ai i le faataitaiga a le Faaola a o latou taumafai ia loto faamagalo atili.

• Luka 7:36–50

• Luka 23:33–34

• Ioane 8:1–11

E mafai foi e tagata aoga ona faitau fuaitau nei ma faailoa mai uiga o Iesu Keriso e mafai ona fesoasoani ia i latou ia loto faamagalo atili.

• Mika 7:18–20

• Mataupu Faavae ma Feagaiga 4:5–6