Lesona 79: Mataupu Faavae ma Feagaiga 64–66

Mataupu Faavae ma Feagaiga 65

“Ia Outou Teuteu le Ala o le Alii … Ina Ia Oo Mai le Malo o le Lagi”

O se tasi o tiutetauave taua O Le Ekalesia a Iesu Keriso o le Au Paia o Aso e Gata Ai ma ona tagata o le fesoasoani lea e saunia le lalolagi mo le toe foi mai o le Faaola. I le Mataupu Faavae ma Feagaiga 65, na faaali mai ai e le Alii lenei matafaioi taua i Lana Perofeta o Iosefa Samita ma le Au Paia. O lenei lesona e mafai ona fesoasoani i tagata aoga ia malamalama i le matafaioi a le Ekalesia i le sauniaina o le lalolagi mo le Afio Mai Faalua o Iesu Keriso.

Gaoioiga E Ono Mafai Ona Aoao Ai

Sauniuniga mo gaoioiga

O se tasi o auala e amata ai lenei lesona o le fesoasoani lea i tagata aoga e mafaufau e uiga i tulaga e taua ai sauniuniga. Atonu o le a fesoasoani fesili nei.

• O le a se gaoioiga e te fiafia i ai e manaomia ai sauniuniga se tele?

• Afai sa e fesoasoani i se tasi e saunia mo lenei gaoioiga, o le a se mea e te manao ia latou iloa? O le a se fesoasoani po o punaoa o le a e tuuina atu ia i latou?

Tuu atu i tagata aoga se avanoa e faasoa mai ai a latou tali i isi tagata aoga.

Fesoasoani i tagata aoga ia suia i le mafaufau e uiga i mea ua fesoasoani Le Ekalesia a Iesu Keriso o le Au Paia o Aso e Gata Ai ia i tatou e saunia ai.

E pei lava ona manaomia e lau gaoioiga le tele o sauniuniga, e i ai foi mea o le a oo mai e manaomia ona tatou saunia i ai. Ua faatuina e le Alii Lana Ekalesia ina ia fesoasoani ia i tatou e saunia ai.

• O le a le mea e saunia ai i tatou e Lana Ekalesia?

Faamalamalama atu i tagata aoga ua saunia i tatou e Lana Ekalesia mo le tele o mea, ma fautuaina i latou e faasoa mai le tele e mafai ona latou mafaufau i ai. Fai atu ia i latou e vaai mo se tasi o mea nei i le Mataupu Faavae ma Feagaiga 65.

“Ina Teuteu ia Outou le Ala o le Alii”

I le aso 12 Setema, 1831, na siitia atu ai Iosefa Samita ma lona aiga i le 30 maila i saute i sasae o Katelani, Ohaio, i le fale o Ioane ma Alice Johnson i Hairama, Ohaio. Sa faia se sauniga Lotu i le fale o le au Johnson i le Aso Sa, 30 Oketopa, 1831. I le aso lava lea, na maua ai e le Perofeta le faaaliga ua tusia i le Mataupu Faavae ma Feagaiga 65.

E mafai e tagata aoga ona faataitai le tomai o le suesueina o tusitusiga paia o le vaavaai mo upu ma fasifuaitau fai soo a o latou faitauina fuaiupu nei. E mafai ona e uunaia i latou e faailoga taimi taitasi o le upu “saunia” i nei fuaiupu. E mafai foi ona latou tusia le fasifuaitau “a saunia” i le fuaiupu 3.

Faitau le Mataupu Faavae ma Feagaiga 65:1, 3 ma vaavaai mo le valaaulia a le Faaola.

• O le a se mea sa e mauaina?

Faitau le Mataupu Faavae ma Feagaiga 65:2, ma vaavaai mo se mea na aumai e le Alii e fesoasoani ai ia i tatou e sauniuni ai mo Lona Afio Mai Faalua.

• O a upu po o fasifuaitau o loo iai ni au fesili?

  Ina ia fesoasoani i tagata aoga e faavasega ma malamalama i fasifuaitau i fuaiupu 2–3, fesili i ai pe o le a so latou manatu i le uiga o fasifuaitau. E mafai ona e faasoa atu pe faaali atu nisi o anotusi nei pe a manaomia:

  1. “O ki o le malo,” po o ki o le perisitua,” o “aia tatau o le au peresitene, po o le mana ua tuuina mai i le tagata e le Atua e taitai ai, faafoe ai, ma pulea ai le perisitua a le Atua i luga o le fogaeleele” (Taiala i Tusitusiga Paia, “Ki o le Perisitua,” scriptures.ChurchofJesusChrist.org). Tagai foi i le Mataio 16:18–19.

  2. “O le maa na tofi mai le mauga e aunoa ma lima” o le “Ekalesia a le Alii ua matua [faateleina] seia faatumuina ai le lalolagi atoa, ‘e [le] faaumatiaina lava … [ae ia] tutu e faavavau’ [Tanielu 2:44]” (Ronald A. Rasband, “Faataunuuga o Valoaga,” Liahona, Me 2020, 75). Tagai foi i le Tanielu 2:31–35, 44–45.

  3. “Sauni mo le Faatoafaiava” e faasino i le ala “ua faatusa ai Iesu Keriso i tusitusiga paia o le Faatoafaiava. O le Ekalesia o Lana tamaitai faaipoipo faafaatusa” (Taiala i Tusitusiga Paia, “Faatoafaiava,” scriptures.ChurchofJesusChrist.org). Tagai foi i le Faaaliga 19:7–9.

  Mo nisi manatu i le auala e fesoasoani ai i tagata aoga e suesue le tuputupu ae o le Ekalesia, tagai i le vaega o “Gaoioiga Faaopoopo e Aoao Ai” o lenei lesona.

• E faapefea ona e aoteleina ia mea ua mafai ona tatou aoaoina mai nei fuaiupu e avea ma se faamatalaga moni?

Atonu e faasoa mai e tagata aoga se mea e pei o le Na toefuatai mai e Iesu Keriso Lana Ekalesia e fesoasoani ia i tatou e saunia ai i tatou lava ma isi mo Lona Afio Mai Faalua. Mafaufau e tuu atu i ai latou e tusi le upumoni lenei i talane o fuaiupu 1–3.

Na tautino mai Elder D. Todd Christoffferson o le Korama a Aposetolo e Toasefululua:

O Le Ekalesia a Iesu Keriso o le Au Paia o Aso e Gata Ai e tulaga ese le faamamanaina ma ua poloaiina e faataunuu sauniuniga talafeagai mo le Afio Mai Faalua o le Alii; e moni lava, sa toefuataiina mai mo lena faamoemoega. … Ua poloaiina le Ekalesia a Iesu Keriso ia saunia—ma o loo saunia—le lalolagi mo lena aso. (D. Todd Christofferson, “Saunia mo le Toe Afio Mai o le Alii,” Liahona, Me 2019, 82, 84)

• O le a sou manatu po o lagona e uiga i lenei faamatalaga?

• E faapefea ona tulagaese le mafai e le Ekalesia ona saunia le lalolagi mo le toe afio mai o le Faaola?

• O a sauniuniga e te lagona e manaomia mo lena aso?

Atonu e te manao e lisi i luga o le laupapa auala e fesoasoani ai le Ekalesia e saunia tagata mo le Afio Mai Faalua. Afai e faigata i tagata aoga ona maua ni manatu, e mafai ona e faasoa atu ia i latou ia tiutetauave paia e fa ua tofia mai le lagi o le Ekalesia. E aofia ai le fesoasoani i le galuega a le Atua e ala i le (1) ola i le talalelei a Iesu Keriso, (2) tausia o i latou e le tagolima, (3) valaauliaina o tagata uma ia talia le talalelei, ma le (4) tuufaatasia o aiga mo le faavavau (tagai i le Tusitaulima Aoao: Auauna Atu i O Le Ekalesia a Iesu Keriso o le Au Paia o Aso e Gata Ai, 1.2, ChurchofJesusChrist.org). E mafai ona e lisiina nei mea i luga o le laupapa ma fai atu i tagata aoga e faasoa mai ni auala patino e pa’ū i lalo o nei ulutala taitasi e fesoasoani e saunia ai tagata mo le Afio Mai Faalua o le Alii.

“Valaau atu i le Alii, ina ia agai i luma Lona malo”

Faitau le Mataupu Faavae ma Feagaiga 65:4–6, vaavaai mo se mea na aoaoina e le Faaola e mafai ona tatou faia taitoatasi e fesoasoani e saunia ai le lalolagi mo Lona Afio Mai Faalua.

• O le a se mea na e mauaina?

• O a nisi o “galuega ofoofogia” a le Faaola ua faataunuuina e ala i Lana Ekalesia? (Tagai i le Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 1.2, 1.3, ChurchofJesusChrist.org.)

• E faapefea ona fesoasoani nei galuega e saunia ai i tatou ma isi mo le Afio Mai Faalua o le Faaola?

Atonu e te manao e tuu atu i tagata aoga se avanoa i totonu ma fafo o le vasega e “faailoa mai ai ana galuega ofoofogia” (Mataupu Faavae ma Feagaiga 65:4). E mafai ona latou talanoaina auala e faasoa atu ai i o latou aiga ma uo po o isi.

Na aoao mai Peresitene Russell M. Nelson e faapea o se tasi o mea e mafai ona tatou faia o le “valaau atu i le Alii, ina ia agai i luma lona malo i le lalolagi” (Mataupu Faavae ma Feagaiga 65:5).

O lau … valaaulia e mo oe ina ia tatalo i aso faipea ina ia maua e fanau uma a le Atua faamanuiaga o le talalelei a Iesu Keriso. O oe ma a’u o loo ola e vaai, ma o le a faaauau pea ona vaai, ua faapotopoto Isaraelu ma le mana tele. Ma o le a avea oe o se vaega o le mana i tua atu o lena faapotopotoga! (Russell M. Nelson ma Wendy W. Nelson, “Faamoemoe o Isaraelu” [faigalotu a le autalavou i le lalolagi atoa, 3 Iuni, 2018], ChurchofJesusChrist.org)

Tuu atu i tamaiti aoga e mafaufau loloto i le valaaulia a Peresitene Nelson. A uma ona latou maua se avanoa e mafaufau loloto ai, valaaulia i latou e faasoa mai ni aafiaga na latou maua e ala i le mulimuli i lana valaaulia.

Atonu e te manao e faaiu i se molimau o le Ekalesia, po o le “malo o le Atua,” o le saunia lea o le ala mo “le malo o le lagi” e oo mai pe a toe afio mai le Faaola (tagai i le Mataupu Faavae ma Feagaiga 65:6).

Punaoa Faaopoopo

E mafai faapefea ona ou fesoasoani i le tapenaina o le lalolagi mo le Afio Mai Faalua o le Alii?

Na aoao mai le Au Peresitene Sili:

Ua tatou iloa o loo soifua le Atua. O la matou tatalo ia outou tumau mausali i luga o le ala o feagaiga lea e toe taitai atu ai i lou Tama oi le Lagi. A outou faia lenei mea, o le a avea outou ma se uunaiga mo le lelei, faasoaina atu ma le fiafia le talalelei ma le sauniaina o le lalolagi mo le Afio Mai Faalua o le Faaola. (Mo Le Malosi o le Autalavou: O Se Taiala mo le Faia o Filifiliga [2022],2)

O le a le mea na aoao mai e Iosefa Samita e uiga i le talalelei ua faatumulia ai le lalolagi atoa?

Na toe faamatalaina e Uilifoti Uitilafi mea na aoao atu e Iosefa Samita i se faatasiga o e umia le perisitua i Katelani, Ohaio, ia Aperila 1834:

Sa valaauina e le Perofeta i latou uma sa umiaina le Perisitua ina ia faapotopoto atu i se tamai faleaoga ogalaau sa i ai iina. O se fale e laitiiti naua, pe tusa ma le 14 futu faatafafa. Ae sa ofi uma ai le Au Perisitua O Le Ekalesia a Iesu Keriso o le Au Paia o Aso e Gata Ai o e sa i ai i le nuu o Katelani. … Ina ua matou potopoto faatasi uma sa valaauina e le Perofeta ia Toeaina o Isaraelu faatasi ma ia ina ia latou molimau i lenei galuega. … Ina ua maea uma i latou sa faapea mai le Perofeta, “Uso e ua matua faagaeetia au ma ua aoaoina e ala i a outou molimau iinei i le po nei, ae ou te fia fai atu ia te outou i luma o le Alii, e tou te leiloaina nisi mea faaopoopo e uiga i taunuuga o lenei Ekalesia ma le malo nai lo se pepe i luga o vae o lona tina. Tou te le malamalama i ai.” Sa fai si o’u te’i. Na ia fai mai, “Ua na o ni nai Perisitua o loo outou vaai atu i ai iinei i lenei po, ae o lenei Ekalesia o le a faatumulia ai Amerika i Matu ma Saute—o le a faatumulia ai le lalolagi.” (Aoaoga a Peresitene o le Ekalesia: Iosefa Samita [2007],137)

Mataupu Faavae ma Feagaiga 65:6. O le a le eseesega i le va o le “malo o le Atua” ma le “malo o le lagi”?

O le malo o le Atua i le lalolagi o Le Ekalesia a Iesu Keriso o le Au Paia o Aso e Gata Ai (MF&F 65). O le faamoemoega o le Ekalesia o le saunia lea o ona tagata ia ola e faavavau i le malo selesitila po o le malo o le lagi. (Taiala i Tusitusiga Paia, “Malo o le Atua po o le Malo o le Lagi,” scriptures.ChurchofJesusChrist.org)

Gaoioiga Faaopoopo e Aoao Ai

Tuputupu a’e o le Ekalesia a Iesu Keriso

Atonu e te manao e fesoasoani i tagata aoga e suesue le tuputupu a’e o le Ekalesia i le aluga o tausaga e fesoasoani ai ia i latou ia iloa pe faapefea ona faataunuuina le valoaga a Tanielu (tagai i le Tanielu 2:44–45). E mafai ona e faasino i le lipoti faafuainumera i le lomiga o Me o le Liahona.

E mafai foi ona e faasino atu tagata aoga i le “Mea Moni ma Fuainumera” newsroom.ChurchofJesusChrist.org, lea e mafai ai e le toatele ona maua faitau faafuainumera o le Ekalesia mo lo latou atunuu.

O se tasi o auala e vaai ai i le faalauteleina o le Ekalesia o le vaavaai lea i le faateleina o le fausiaina o malumalu. Mafaufau e faatusatusa le aofaiga o malumalu i le tausaga na fanau ai lau tamaitiiti aoga matua ma le numera o malumalu o i ai nei. E mafai foi ona e faaaogaina:

• Le aofaiga o malumalu ua fofogaina mai ma o loo fausiaina (ChurchofJesusChrist.org/temples/list).

• “O Le Faia o Sauniga o le Malumalu ia Tele Avanoa” (Liahona, Iulai 2022, 13).

• “O Le a Taavale Atu le Talalelei” (2:47).

O le faapotopotoina o Isaraelu

Mafaufau e matamata i le “O se Molimau a le Atua” mai le faailotaimi 3:30 seia oo i le 5:14. E mafai ona vaavaai tagata aoga pe mafai faapefea e le faatusatusaga o le paso a Elder Neil L. Andersen ona fesoasoani tatou te malamalama ai i le ala e saunia ai e le faapotopotoina o Isaraelu le lalolagi mo le Afio Mai Faalua. E mafai ona latou faasoa mai ni auala e mafai ona latou fesoasoani ai e “faatulaga isi vaega taua” o le paso.

Ona mafai lea ona e matamata i le faailotaimi 13:24 i le 15:33, ma vaavaai mo le valaaulia faapitoa a Elder Andersen i le autalavou. E mafai e tagata aoga ona faasoa mai pe na faapefea ona latou vaai i tekinolosi o faaaoga e faapotopoto ai Isaraelu, ona mafaufau loloto lea pe talanoaina auala e mafai ona latou faaaoga ai tekinolosi e fesoasoani ai e faapotopoto Isaraelu.

Mataupu Faavae ma Feagaiga 66. Ua silafia e le Atua oe ma ou manaoga

E mafai ona e filifili e aoao atu le Mataupu Faavae ma Feagaiga 66 o se vaega o lenei lesona. Ina ia faia, tusi fesili nei i luga o le laupapa, ma valaaulia tagata aoga e faasoa mai pe faapefea ona latou taliina:

• Aisea e avea ai o se faamanuiaga le iloa o le finagalo o le Atua mo i tatou?

• E mafai faapefea ona ou aoaoina le finagalo o le Atua mo au?

Ina ia fesoasoani i tagata aoga ia malamalama i le talaaga faasolopito o lenei vaega, faamalamalama atu e lei leva ona uma ona papatisoina o ia, ae feiloai atu Viliamu E. McLellin i le Perofeta o Iosefa Samita ma fai atu ia te ia e fesili i le Alii mo ia. E mafai e tagata aoga ona faitau le faaulutala o le vaega, ma vaavaai mo mea na faia e Viliamu a o lei talosaga atu ia Iosefa.

E mafai e tagata aoga ona suesue le Mataupu Faavae ma Feagaiga 66:4–10, ma vaavaai mo mea na manao le Alii ia Viliamu e fai. Valaaulia tagata aoga e faasoa mai mea sa latou mauaina. Ona outou talanoaina lea o faamanuiaga e mafai ona tatou maua pe a tatou mulimuli i le finagalo o le Alii mo i tatou. Uunaia tagata aoga e saili le finagalo o le Alii mo o latou olaga e ala i le tatalo i aso taitasi.