Lesona 78: Mataupu Faavae ma Feagaiga 64–66

Mataupu Faavae ma Feagaiga 64:20–43

“E Manaomia e le Alii le Loto ma le Mafaufau Malie”

A o saili le Au Paia anamua e faatu Siona, sa talosagaina i latou e Iesu Keriso e ositaulaga ma fai so latou sao i auala eseese. I a tatou taumafaiga faifai pea e mulimuli ia Iesu Keriso, ua Ia fetalai mai ai ia tatou tuuina atu ia te Ia o tatou loto ma mafaufau malie. O lenei lesona e mafai ona fesoasoani i tagata aoga ia lagonaina se naunautaiga faateleina e avatu i le Alii o latou loto ma mafaufau malie.

Gaoioiga E Ono Mafai Ona Aoao Ai

Meatotino patino

E mafai ona e amataina le vasega i le fai atu i tagata aoga e mafaufau i meatotino patino latou te manatu e taua. Mafaufau e tuuina atu ni fesili e mafai ona faafaigofie ai le faasoa atu i le vasega po o ni vaega toalaiti. Mo se faataitaiga:

• O le a se mea o ia te oe sa e galue malosi ia maua?

• O le a se mea e te umia o le a faigata mo oe ona foai atu i se isi tagata? Aisea o le a faigata ai?

O le faatoaga a Isaako Morley

E mafai ona e faaali atu le ata i le amataga o lenei lesona ma valaaulia se tagata aoga e faitau leotele le faamatalaga lenei.

Sa galulue malosi Isaako ma Lusi Morley e fausia se faatoaga ola manuia e 80 eka e lata i Katelani, Ohaio. O se vaega i le laua talitonuga faalelotu, sa laua valaaulia ai tagata e nonofo i a laua meatotino, fefaasoaai a latou meatotino, ma tuu tutusa mea uma i le tasi ma le isi. Ina ua afe faifeautalai o le Au Paia o Aso e Gata Ai i Katelani, sa latou talai atu le savali o le Toefuataiga ia i latou sa nonofo i le faatoaga a Morley. Sa iai faatasi ia Isaako ma Lusi Morley ia i latou na liliu mai. E lei leva ona uma lo la papatisoga, ae taliaina fiafia e le au Morley ia Iosefa ma Ema Samita e nonofo i le la faatoaga. (Tagai Susan Easton Black, Who’s Who in the Doctrine and Covenants [1997], 198.)

Faitau le Mataupu Faavae ma Feagaiga 64:20, ma vaavaai mo faatonuga a le Alii ia Isaako Morley.

• Mata o le a sou manatu e faapefea ona e tali atu pe ana e i ai i le tulaga o Isaako? Aisea?

• E mafai faapefea e le iloaina o le talosaga na sau mai le Faaola ona fesoasoani ia te oe e usitai ai?

Faamalamalama atu sa talosagaina muamua Isaako e faatau atu lana faatoaga ma sa musu o ia. Ae ina ua maua mai lenei faaaliga, sa faatau atu ma le usiusitai e Isaako lana faatoaga, tuuina atu le tupe i le Ekalesia, ma siitia atu lona aiga i Misuri e fesoasoani e fausia Siona. E mafai foi ona e faailoa atu o isi alii ia e iai i lenei faaaliga na ta’u atu iai e aua nei faatauina atu a latou meatotino (tagai Mataupu Faavae ma Feagaiga 64:21, 26). Sa faapaiaina e nei alii a latou meatotino i le Alii i le faaaogaina lea e lagolago ai le Ekalesia ma le Au Paia i Katelani. E mafai ona avea lenei mea o se nofoaga lelei e faamanatu ai i tagata aoga ia upumoni sa latou aoaoina e uiga i le Faaola ma le tulafono o le faapaiaga i le Mataupu Faavae ma Feagaiga 42:29–39.

E manaomia e le Alii o tatou loto ma mafaufau malie

Faamalamalama atu e ui atonu e le manaomia e le Alii i tatou e faatau atu a tatou meatotino, ae e i ai mea e finagalo mai ai o Ia ia i tatou a o tatou taumafai e mulimuli ia te Ia.

Faitau le Mataupu Faavae ma Feagaiga 64:22, 34. Vaavaai mo mea e manaomia e finagalo ai le Alii mai ia i tatou.

• O le a se mea sa e mauaina?

Fesosoani i tagata aoga e faailoa mai, e manaomia e le Alii ona tatou tuuina atu ia te Ia o tatou loto ma mafaufau malie.

Mafaufau i ni auala e fesoasoani ai i au tagata aoga ia malamalama atili i le uiga o le tuuina atu i le Alii o o tatou loto ma mafaufau malie. O se tasi o auala o le valaaulia lea o tagata aoga e vaai faalemafaufau faapea na talosagaina i latou e fesoasoani e tusi se lesona o le Sau, Mulimuli Mai ia te A’u mo le Mataupu Faavae ma Feagaiga 64. Ia i latou lava pe i ni vaega toalaiti, e mafai e tagata aoga ona suesue mau nei po o mau latou te mauaina e i latou lava, ona tusi lea o se faamalamalamaga o le uiga o le tuuina atu i le Alii o o tatou loto ma mafaufau malie. Tuu atu i latou e faasoa mai ma talanoaina ia mea na latou tusia.

Uunaia tagata aoga e saili faaaliga faaletagata lava ia, ia iloa ai pe mafai faapefea ona latou tuuina atu patino i le Alii o latou loto ma mafaufau malie.

Faitau fuaitau o mau nei ma vaavaai mo malamalamaaga e mafai ona fesoasoani ia te oe e malamalama ai i le uiga o le tuuina atu i le Alii o o tatou loto ma mafaufau malie. E mafai ona e tusia se faamalamalamaga i lau api talaaga mo suesuega.

Aoaoga i totonu o Tusitusiga Paia

• Faataoto 3:5–6

• Mataio 22:36–39

• Mosaea 3:19

• Mataupu Faavae ma Feagaiga 20:77, 79

Faataitaiga mai le Soifuaga o le Faaola

• Ioane 6:38

• Luka 22:42

• 3 Nifae 27:13–14

• Mataupu Faavae ma Feagaiga 19:24

• E faapefea ona avea Iesu Keriso o se faataitaiga lelei o le tuuina atu o Lona loto ma le mafaufau malie i le Tama Faalelagi?

• I au taumafaiga e mulimuli ia Iesu Keriso, na faapefea e le tuuina atu ia te Ia o lou loto ma le mafaufau malie ona faia se eseesega i lou olaga?

Atonu e te faaaluina se taimi e fesoasoani ai i tagata aoga ia malamalama e i ai se eseesega i le na o le faia o mea e finagalo ai le Alii i ai tatou ma le usiusitai ia te Ia i o tatou loto ma mafaufau malie.

Mafaufau e valaaulia tagata aoga e lisi i luga o le laupapa ni poloaiga se tele ua poloaiina i tatou e le Alii e tausia po o taulaga e ono Ia talosagaina tatou e fai. Fai atu i tagata aoga e talanoaina i ni paga po o ni vaega toalaiti pe faapefea ona tatou tuuina atu i le Alii o tatou loto ma mafaufau malie a o tatou faia nei mea. Mo se faataitaiga, atonu latou te talanoaina pe mafai faapefea ona tatou tuuina atu i le Alii o tatou loto ma mafaufau malie a o tatou taumafai e tausia le aso Sapati ia paia.

Mafaufauga patino

Afai ua e filifili e tusi poloaiga po o osigataulaga i luga o le laupapa, valaaulia tagata aoga e vaavaai i le lisi ma manatunatu i lo latou naunau e faia nei mea. Mafaufau e faatonu tagata aoga e tusi se ata o se loto ma se mafaufau i a latou api talaaga mo suesuega. E mafai ona e faaali atu le ata o loo i lalo o se ata faataitai. Valaaulia i latou e mafaufau pe o le a le tele o o latou loto ma mafaufau o loo latou tuuina atu i le Faaola ona valivali lea o le aofai latou te lagona o loo latou tuuina atu ia te Ia. Ona mafai lea ona e valaaulia i latou e mafaufau loloto ma tusi a latou tali i fesili nei.

• O le a se mea ua e aoaoina i le aso e mafai ona faateleina ai lou manao e avatu i le Alii lou loto ma se mafaufau malie?

• O le a sou manatu e mafai faapefea e le tuuina atu o lou loto ma le mafaufau i le Faaola ona fesoasoani ia te oe e avea atili ai e faapei o Ia?

Mafaufau e valaaulia tagata aoga e faasoa mai mea na latou lagonaina ma aoaoina. E mafai foi ona e tuuina atu lau molimau pe faasoa atu se aafiaga i se taimi na e matauina ai se tasi o tuuina atu i le Alii o latou loto ma se mafaufau malie.

Punaoa Faaopoopo

Mataupu Faavae ma Feagaiga 64:23–25. O le a le uiga o le “galulue manū o ta’ua o le asō”?

Sa faaaoga e le Alii le upu asō e faasino ai i le vaitau o taimi ina ua maua mai le Mataupu Faavae ma Feagaiga 64 i le Afio Mai Faalua (tagai Mataupu Faavae ma Feagaiga 64:23). Mai le silafaga a le Alii, o le asō e faasino i “lenei olaga,” o le taimi i le fanau a le Atua e “fai a latou galuega” ma saunia ai e feiloai ma le Atua” (Alema 34:32; tagai foi Alema 34:31, 33–35). I le Mataupu Faavae ma Feagaiga 64:24, o le upu taeao e faasino i le faatafunaga o e amioleaga ma le Afio Mai Faalua o Iesu Keriso.

Mataupu Faavae ma Feagaiga 64:23. O le a le sefuluai o loo faatatau i ai le Alii?

Nai lo se pasene o tupe maua, o le upu sefuluai i le Mataupu Faavae ma Feagaiga 64:23 e faasino i saofaga a Au Paia uma i le Ekalesia, aemaise i lalo o le tulafono o le faapaiaga. Sa folafola mai e le Alii e faapea o i latou o e usiusitai i tulafono o le taulaga ma le faapaiaga o le a le afaina i le susunuina lea o le a faaumatia ai i latou e le salamo i le aso gataaga. O lo tatou malamalama i le taimi nei i le tulafono o le sefuluai sa faamanino atili mai i le 1838, ina ua tuuina mai e le Alii le faaaliga o loo tusia i le Mataupu Faavae ma Feagaiga 119.

E mafai faapefea ona ou tuuina atu i le Alii lo’u loto ma le mafaufau malie?

Na aoao mai Elder Jörg Klebingat o le Fitugafulu:

Ia faia mea sa’o mo ni mafuaaga sa’o. Ua silafia e le Alii, o lē “manaomia … le loto ma le mafaufau malie” (MF&F 64:34) ma o “se ua ia silafia mafaufauga ma faamoemoega o le loto” (MF&F 33:1), le mafuaaga e te alu ai i le lotu—pe na o lou i ai iina i le tino po o e tapuai faamaoni. … Manatua o le faasamasamanoa i mea faaleagaga e lei avea lava ma fiafia. Ia avea le Ekalesia ma le talalelei toefuataiina ma ou olaga atoa, e le na o se vaega o lou olaga faaagafesootai po o fafo atu. (Jörg Klebingat, “Faalatalata Atu i le Nofoalii o le Atua ma le Lototele,” Liahona, Nov. 2014, 36)

Sa faasoa mai Elder Donald L. Hallstrom, ao i le Au Peresitene o Fitugafulu i lena taimi:

O le loto o se faatusa o le alofa ma le tuuto. Tatou te faia osigataulaga ma tauave avega mo i latou tatou te alolofa i ai e le mafai lava ona tatou onosaia mo soo se isi lava mafuaaga. Afai e leai se alofa, e le aoga lo tatou tuuto.

Afai tatou te alolofa i le Alii ma o tatou loto atoa, ua tatou malilie e avatu ia te Ia mea uma ua tatou maua. …

O le i ai “o se mafaufau malie” o lona uiga o le tuuina atu o la tatou taumafaiga sili ma mafaufauga aupito lelei ma le sailia o le poto o le Atua. E ta’u mai ai o la tatou suesuega aupito tuuto i le olaga e tatau o mea e faavavau le natura. O lona uiga e tatau ona i ai se faia e matuai mausali i le va o le faalogo i le afioga a le Atua ma le usitai iai. (Donald L. Hallstrom, “The Heart and a Willing Mind,” Ensign, Iun. 2011, 31–32)

Ina ia malamalama atili i le auala e mafai ona tatou tuuina atu ai o tatou loto ma mafaufau i le Alii, e mafai ona outou matamata i le “O Lo Tatou Loto Atoa” saunia e Elder Dieter F. Uchtdorf o le Korama a Aposetolo e Toasefululua mai le faailotaimi 12:25 i le 13:37.

Gaoioiga Faaopoopo e Aoao Ai

O faataitaiga mai le talafaasolopito o le Ekalesia

Mafaufau e tuu tagata aoga i ni paga. Tuu atu i tagata aoga taitasi i totonu o le paga se tala e ese mai le talafaasolopito o le Ekalesia, e pei o na o loo lisi atu i lalo. Valaaulia tagata aoga e faitau le tala ona faasoa atu lea i a latou paga faatasi ma se faamalamalamaga pe faapefea ona avea nei tagata ma faataitaiga lelei o le tuuina atu o o latou loto ma mafaufau i le Alii. Ona mafai lea e tagata aoga ona faasoa mai se faataitaiga patino mai o latou lava olaga pe mai se tasi latou te iloa.

Isaako ma Lusi Morley

Ina ua siitia atu i Misuri, sa feagai le aiga o Isaako ma Lusi Morley ma sauaga matuia faalelotu. Sa latou ola ai pea i le fefefe ina ne’i susunuina e le au faatupu faalavelave lo latou fale. Sa lafi Isaako i se togasana mo se masina e sola ese ai mai le au faatupu faalavelave. I le taimi atoa o sauaga, sa tumau pea le faamaoni o le au Morley i lo latou faatuatua. I se tasi taimi, sa i ai Isaako i ni alii se toaono o e sa ofoina atu o latou ola pe afai e faasaoina e le au faatupu faalavelave a latou uo. Sa tele ni taimi na siitia ai e Isaako ma Lusi lo la aiga, ma tausia le soifua manuia o isi o e sa taumafai foi e sosola ese mai sauaga. Na iu lava ina malaga atu Isaako ma Lusi i sisifo faatasi ma le Au Paia. I lalo o le taitaiga a Polika Iaga, sa la fesoasoani ai e faamautu Manti, Iuta. (Tagai Susan Easton Black, Who’s Who in the Doctrine and Covenants [1997], 199–200.)

Eteuati ma Litia Paterika

A o malaga faatasi ai ma le Perofeta o Iosefa, sa talosagaina ai Eteuati Paterika e nofo i Initipene, Misuri, ma fesoasoani e fausia Siona. Sa popole Eteuati sa na le gafatia le galuega. I se tusi i lona faletua, o Litia, sa ia tusia ai, “Ou te popole o lo’u tulaga o i ai e sili atu nai lo le mea e mafai ona ou faatinoina i le taliaina e lo’u Tama Faalelagi. Tatalo mo a’u ia aua ne’i ou pa’ū” (Au Paia: O Le Tala o le Ekalesia a Iesu Keriso o le Au Paia i Aso e Gata Ai, vol. 1, O Le Tagavai o le Upumoni, 1815–1846 [2018], 131). Sa maua e Litia le tusi ma saunia lona aiga e siitia atu i Initipene ma faatasi atu i lana tane. Sa faaalia e tuaoi le le talitonu i le lafoaiina e le au Paterika o le latou fale matagofie ma pisinisi ua ola manuia. Sa iloa e Litia o le lafoaiina o lona fale o se tofotofoga, ae sa talitonu o ia o se faamamaluga le faataatia o le faavae o le aai o le Atua. (Tagai i le Au Paia,, 1:130–31, 134–35.)

I se isi itu, e mafai ona outou matamata i le “O Le Loto ma le Mafaufau Malie” (7:57) po o le “O Lou Aso mo se Misiona” (3:31) o se vasega. Valaaulia tagata aoga e vaavaai mo faataitaiga o auala na avatu ai e tagata taitoatasi i le Alii o latou loto ma mafaufau malie.

Mataupu Faavae ma Feagaiga 64:34. O le loto, o se mafaufau malie, ma le mauaina o faaaliga

Afai e mananao au tagata aoga ia malamalama atili pe faapefea ona maua faaaliga mai le Tama Faalelagi, e mafai ona e fesoasoani ia i latou e tusi ni fesootaiga i le va o mea e manaomia e le Alii i le Mataupu Faavae ma Feagaiga 64:34 ma le ala e fesootai mai ai le Tama Faalelagi ia i tatou, e pei ona aoao mai i le Mataupu Faavae ma Feagaiga 8:2–3. A uma ona suesue e tagata aoga le uiga o le avatu i le Alii o latou loto ma mafaufau malie i le vaega 64, e mafai ona outou talanoaina pe mafai faapefea ona fesoasoani lenei mea ia i latou e maua ai faaaliga. I le avea ai ma se vaega o lenei talanoaga, e mafai ona e valaaulia tagata aoga e iloilo ia parakalafa 1–3 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae (2023), ma vaavaai mo le fuafuaga ua faatuina e le Alii mo i tatou e maua ai faaaliga mai ia te Ia.

• E faapefea e le tuuina atu i le Alii o lou loto ma lou mafaufau malie ona fesoasoani ia te oe e maua ai faaaliga mai ia te Ia i lou mafaufau ma i lou loto?

Mataupu Faavae ma Feagaiga 64:33. “O mea iti foi e tutupu mai ai mea tetele”

Mafaufau e faaali atu “Fasi Auro” (3:15). Valaaulia tagata aoga e vaavaai mo upumoni mai le Mataupu Faavae ma Feagaiga 64:33 o loo atagia mai i lenei vitio. Ona mafai lea ona latou faasoa mai ni faataitaiga o “mea iti” e mafai ona tatou faia e faia ai se eseesega tele i a tatou taumafaiga e mulimuli ia Iesu Keriso.

E mafai foi ona e valaaulia tagata aoga e faitau le Alema 37:6–7 pe faasoa mai ni tala mai o latou lava olaga po o tusitusiga paia o loo faapupula mai ai lenei upumoni.

O se valaaulia faifaipea

Mafaufau e valaaulia tagata aoga e maka le fasifuaitau talitutusa o loo ta’ua soo i le Mataupu Faavae ma Feagaiga 64:22 ma le Mataupu Faavae ma Feagaiga 64:34. Ona mafai lea ona e faamalamalama atu e faapea, e valaaulia soo i tatou e le Faaola e tuu atu ia te Ia o tatou loto ma mafaufau i tusitusiga paia atoa. Valaaulia tagata aoga e faafesootai le Mataupu Faavae ma Feagaiga 64:34 ma le Mataupu Faavae ma Feagaiga 4:2 ma le Mataio 22:36–39. Fai atu ia i latou e faasoa mai ni malamalamaaga faaopoopo mai nei fuaiupu po o isi fuaiupu e mafai ona fesoasoani pe musuia ai i tatou e tuu atu i le Alii o tatou loto ma mafaufau.

Mataupu Faavae ma Feagaiga 64:41–43. O se tagavai i tagata

Mafaufau e valaaulia tagata aoga e faitau le Mataupu Faavae ma Feagaiga 64:41–43 ma vaavaai mo auala na faamatalaina ai e le Alii Siona. Atonu e te faamatalaina faapea o le tagavai o “se fu‘a po o se anavatau e faapotopoto ai tagata i se lotogatasi i se faamoemoe po o se faasinomaga” (Taiala i Tusitusiga Paia, “Tagavai,” scriptures.ChurchofJesusChrist.org). E mafai ona e valaaulia tagata aoga e saili le “Talafaasolopito i le Lalolagi Atoa” i le vaega o le “Talafaasolopito o le Ekalesia” o le Gospel Library e sue ai tala o tagata mai le tele o atunuu ua faapotopoto i le Ekalesia a le Faaola. E mafai ona latou faitauina se tala ma faasoa atu i se paga po o ni vaega toalaiti.