Lēsoni 76: Tokāteline mo e Ngaahi Fuakava 60–63

Tokāteline mo e Ngaahi Fuakava 63:57–64

Fakaʻapaʻapa ki he Huafa Toputapu ʻo Sīsū Kalaisí

ʻI he fakahā ʻoku lekooti ʻi he Tokāteline mo e Ngaahi Fuakava 63, naʻe fakahaaʻi ai ʻe he Fakamoʻuí Hono finangaló ki Hono kau muimuí ke “tokanga … pe ʻe anga-fēfē ʻenau taku ʻa [Hono] [huafá] ʻi honau loungutú” (Tokāteline mo e Ngaahi Fuakava 63:61). ʻE lava ke tokoni ʻa e lēsoni ko ʻení ke ongoʻi ʻe he kau akó ʻa e mahuʻinga hono fakaʻaongaʻi ʻa e huafa ʻo e Fakamoʻuí ʻi he loto-ʻapasiá.

Ngaahi ʻEkitivitī Ako ʻOku Ala Fakahokó

Tokanga kae ʻoua ʻe fakavaʻivaʻinga

Hiki ʻa e kupuʻi lea Tokanga kae ʻoua ʻe fakavaʻivaʻinga ʻi he palakipoé. Fakaafeʻi leva ʻa e kau akó ke aleaʻi ʻa e ngaahi fehuʻi ko ʻení:

• Ko e hā ha ngaahi tūkunga ʻe mahuʻinga ai ki ha taha ke tokanga kae ʻikai fakavaʻivaʻingá? Ko e hā hono ʻuhingá?

  Kapau ʻoku fiemaʻu tokoni ʻa e kau akó ʻi hono maʻu ha ngaahi fakakaukaú, te ke lava ʻo fakamatala ki ha ngaahi sīpinga ʻe niʻihi, hangē ko e fakaʻuli ʻi ha kā, fekumi ʻi he ʻinitanetí, kosi ʻulu, pe fakahoko ha founga ngāue fakafaitoʻo.

• Ko e hā ha ngaahi meʻa ʻokú ke pehē ʻoku finangalo ʻa e Fakamoʻuí ke tau tokanga ki ai ʻi heʻetau moʻuí?

Naʻe fai ʻe Sisitā Lepeka L. Kuleiveni ʻo e Kau Palesitenisī Lahi ʻo e Kau Finemuí ʻa e fehuʻi ko ʻení:

ʻOku tau tokanga nai ʻi heʻetau leá? Pe ʻoku tau taʻe-tokanga ʻo tali e kapekapé mo e lea koví? (Rebecca L. Craven, “Tokangá mo e Fakavaʻivaʻingá,” Liahona, Mē 2019, 10)

Ko e hā ha ngaahi tūkunga te ke ala fehangahangai ai mo ha lea taʻe-ʻapasia ki he ʻOtuá pe ngaahi meʻa toputapu kehé?

Fakaafeʻi ʻa e kau akó ke fakakaukau ki he ongo ʻoku nau maʻu ʻi heʻenau fehangahangai mo e faʻahinga lea peheé. Poupouʻi kinautolu ʻi heʻenau akó ke kumi ha ngaahi akonaki ʻe lava ʻo tokoni ke nau ongoʻi ʻa e mahuʻinga ʻo e tokanga ki he anga ʻo ʻenau lea kau ki he ngaahi meʻa toputapú, tautautefito ki he founga ʻoku nau fakaʻaongaʻi ai ʻa e huafa ʻo e Tamai Hēvaní mo Sīsū Kalaisí.

Fakaʻapaʻapa ki he huafa ʻo Sīsū Kalaisí

ʻE lava ke tokoni ʻa e fakamatala ko ʻení ke mahino ki he kau akó ʻa e puipuituʻa ki he ngaahi veesi te nau ako mei he Tokāteline mo e Ngaahi Fuakava 63.

ʻI he taimi ʻo e fakahā ʻoku lekooti ʻi he Tokāteline mo e Ngaahi Fuakava 63, naʻe fakaʻaongaʻi ʻe ha niʻihi ʻo e Kāingalotu ʻi Ketilani, ʻOhaioó, ʻa e huafa ʻo e ʻEikí taʻe-maʻu ʻa e mafai totonu ʻo e lakanga fakataulaʻeikí (vakai, Tokāteline mo e Ngaahi Fuakava 63:62). Naʻe fakamalaʻiaʻi ʻe he ʻEikí ʻa e ngaahi ngāue ko ʻení mo akoʻi ki he Kāingalotú ha ngaahi moʻoni mahuʻinga fekauʻaki mo e founga ʻoku totonu ke fakaʻaongaʻi ai Hono huafá.

Lau ʻa e Tokāteline mo e Ngaahi Fuakava 63:58–64, ʻo kumi ʻa e meʻa naʻe finangalo ʻa e ʻEikí ke mahino ki he Kāingalotú fekauʻaki mo Iá.

• Ko e hā ʻa e meʻa ʻoku tokoni ʻa e ngaahi veesi ko ʻení ke mahino kiate koe ʻo kau kia Sīsū Kalaisí?

• Ko e hā naʻá ke ako mei he veesi 61–64 fekauʻaki mo e founga ʻoku totonu ke tau fakaʻaongaʻi ai ʻa e huafa ʻo e Fakamoʻuí?

  Ko e moʻoni ʻe taha ʻe lava ke lea ʻaki ʻe he kau akó mei he ngaahi veesi ko ʻení ʻoku toputapu ʻa e huafa ʻo Sīsū Kalaisí pea kuo pau ke fakaʻaongaʻi ia ʻi he tokanga.

• ʻOkú ke pehē ʻoku ʻuhinga ki he hā ke tokanga ʻi hono fakaʻaongaʻi ʻa e huafa ʻo e Fakamoʻuí?

• Ko e hā ha ngaahi fehuʻi ʻokú ke maʻu fekauʻaki mo e meʻa ʻokú ke ako ʻi he ngaahi veesi ko ʻení?

Kapau ʻoku maʻu ʻe he kau akó ha ngaahi fehuʻi fekauʻaki mo e ʻuhinga ʻo hono “[takuanoa ʻa e] huafa ʻo e ʻEikí” (veesi 62), fakamatalaʻi ange ʻe lava ke kau ai ha lea taʻe-fakaʻapaʻapa ki he Tamai Hēvaní mo Sīsū Kalaisi (vakai, Dallin H. Oaks, “Reverent and Clean,” Ensign, May 1986, 49–50). ʻE lava foki ke kau ai hano fakaʻaongaʻi taʻe-taau ʻa e mafai ʻo e lakanga fakataulaʻeiki ʻo e Fakamoʻuí (vakai, Neil L. Andersen, “Mālohi ʻi he Lakanga Fakataulaʻeikí,” Liahona, Nōvema 2013, 93). Fakapapauʻi ʻoku mahino ki he kau akó ʻoku feʻunga ke lea kau ki he Fakamoʻuí ʻi he ongoongoleleí pe ngaahi fepōtalanoaʻaki fakaʻaho ʻi he taimi ʻoku tau talanoa ai kiate Iá ʻi he ʻofa mo e fakaʻapaʻapa.

Kimuʻa pea ʻeke ʻa e fehuʻi ko ʻení, mahalo ʻe tokoni ke fakakaukauloto ʻa e kau akó ʻoku nau ʻilo ha taha ʻoku ʻikai mahino ki ai ʻa e mahuʻinga ʻo hono fakaʻaongaʻi ʻa e huafa ʻo e Fakamoʻuí ʻi he loto-ʻapasiá. ʻE lava ke nau fakakaukau ki he tokotahá ni lolotonga ʻenau alēleá.

• ʻOkú ke pehē ko e hā ʻe lava ʻo tokoni ke tau ongoʻi ha holi lahi ange ke fakaʻaongaʻi ʻa e huafa ʻo Sīsū Kalaisí ʻi he loto-ʻapasiá?

Ko hono ongoʻi ha ʻofa mo ha loto-ʻapasia lahi ange kia Sīsū Kalaisí

Fakamatalaʻi ange ʻe lava ke tokoniʻi kitautolu ʻe he mahino lahi ange fekauʻaki mo Sīsū Kalaisí pea mo e meʻa kuó Ne fai maʻatautolú ke tau ongoʻi ha ʻofa mo ha ʻapasia lahi ange kiate Ia.

Kimuʻa pea fakafeʻiloaki ʻa e ʻekitivitī ako ko ʻení, fakakaukau ke fakaafeʻi ʻa e kau akó ke vahevahe ha ngaahi aʻusia naʻa nau maʻu pe ngaahi moʻoni ʻoku nau ʻilo mei he folofolá ʻokú ne fakaʻaiʻai kinautolu ke nau fakakaukau mo lea loto-ʻapasia fekauʻaki mo Sīsū Kalaisi. Te ke lava foki ʻo vahevahe ha sīpinga mei hoʻo moʻuí.

Tuku ha taimi ke ke fekumi ai ki he ngaahi maʻuʻanga tokoni kuo fokotuʻu fakalangí ʻa ia ʻe lava ʻo tokoni ke ke ongoʻi ai ha ʻofa lahi ange kia Sīsū Kalaisi mo holi ke lea loto-ʻapasia kau kiate Iá. Te ke lava ʻo fekumi ʻi he folofolá, ngaahi fakamatala mei he kau taki ʻo e Siasí, ngaahi himí, pe ngaahi maʻuʻanga tokoni kehe ʻoku nau fakamatalaʻi ko hai Ia pe ko e hā kuó Ne faí. Lekooti hoʻo ngaahi fakakaukaú mo e ngaahi ongó ʻi hoʻo tohinoa akó.

ʻE lava ke kumi ʻe he kau akó ha ngaahi maʻuʻanga tokoni ʻiate kinautolu pē pe mo hanau hoa. Kapau ʻe fiemaʻu, te ke lava ʻo ʻoange kiate kinautolu ha ngaahi sīpinga ʻe niʻihi ʻo e ngaahi maʻuʻanga tokoni te nau lava ʻo vakai ki aí, hangē ko ha ngaahi himi ʻoku nau akoʻi ʻa e natula toputapu ʻo Sīsū Kalaisí pe ko ha niʻihi ʻo e ngaahi potufolofola ko ʻení: Mātiu 8:23–27; 2 Nīfai 25:13; Tokāteline mo e Ngaahi Fuakava 18:23–25; 35:1–2; 110:1–5.

Hili ha taimi feʻunga, fakaafeʻi ʻa e kau akó ke vahevahe ʻa e meʻa naʻa nau ilo mei heʻenau ngaahi akó. Kapau naʻe maʻu ʻe he kau akó ha ngaahi himi mahuʻingamālie, ʻe lava ke hivaʻi fakataha ʻe he kalasí ha himi ʻe taha pe lahi ange. Te ke lava foki ʻo fakaafeʻi ʻa e kau akó ke nau lau ha potufolofola naʻa nau maʻu pea vahevahe ʻa e ʻuhinga naʻe mahuʻingamālie ai kiate kinautolú.

ʻE lava ke tokoni ʻa e ngaahi fehuʻi ko ʻení ki he kau akó ke vahevahe ʻenau ngaahi fakakaukaú:

• Ko e hā ʻa e meʻa naʻá ke ako ʻa ia naʻá ne ueʻi hoʻo loto-houngaʻiá pe fakaʻapaʻapa ki he Fakamoʻuí?

• ʻE tokoni fēfē nai hoʻo manatuʻi ʻa e meʻa naʻá ke akó ki hoʻo ngaahi filí?

Te ke lava ʻo fakalahi hono aleaʻi ʻo e fehuʻi hono uá ʻaki hano vahevahe ʻa e kau akó ki ha fanga kiʻi kulupu iiki pea fakaafeʻi kinautolu ke aleaʻi ʻa e founga ʻe lava ke ola lelei ai ha ngaahi tafaʻaki pau ʻo ʻenau moʻuí ʻi he taimi ʻoku [nau] ongoʻi ʻapasia lahi ange ai ki he Tamai Hēvaní mo Sīsū Kalaisí. ʻOku kau ʻi he ngaahi sīpinga ʻo e ngaahi tafaʻaki ʻo ʻenau moʻuí ʻa e:

• Ngaahi fili ʻoku nau fakahoko fekauʻaki mo hono fakaʻaongaʻi ʻo e mītiá.

• Ngaahi fengāueʻaki mo e niʻihi kehé.

• Ko ʻenau loto-vēkeveke ke vahevahe ʻa e ongoongoleleí.

• Ko e founga ʻoku nau lotu ai ki he Tamai Hēvaní.

Ko hono fakafelāveʻi ia ki hoʻo moʻuí

Ke tokoni ke fakakaukau ʻa e kau akó ki heʻenau akó, fakaafeʻi kinautolu ke nau tali ha taha ʻo e ngaahi fehuʻi ko ʻení ʻi heʻenau tohinoa akó:

• Makatuʻunga ʻi he meʻa naʻá ke ako mei he Laumālié pe mei ho toʻú ʻi he ʻaho ní, ko e hā ha ngaahi liliu ʻokú ke fakatokangaʻi ʻi hoʻo ngaahi ongo pe fakakaukau ki he Fakamoʻuí?

• Ko e hā ha me‘a ʻokú ke ongo‘i ha loto-holi ke ke fakahoko lelei ange pe kehe hoʻo fakahokó, ko ha ola ʻo e meʻa naʻá ke ako ʻi he ʻaho ní?

Fakaafeʻi ha kau ako ʻe loto-fiemālie ke vahevahe ʻa e meʻa naʻa nau tohí. Fakaʻosi leva ʻa e lēsoní ʻaki hono vahevahe hoʻo fakamoʻoni ki he Tamai Hēvaní mo Sīsū Kalaisí, pea fakamatalaʻi ange ʻa e ʻuhinga ʻoku toputapu ai Hona huafá kiate koé.

Ngaahi Maʻuʻanga Tokoni Kehé

Ko e hā ʻoku totonu ai ke u fakaʻaongaʻi ʻi he loto-ʻapasia ʻa e huafa ʻo e Tamai Hēvaní mo Sīsū Kalaisí?

Naʻe akonaki ʻa Palesiteni Tāleni H. ʻOakesi ʻo e Kau Palesitenisī ʻUluakí ʻo pehē:

ʻOku ʻikai mo ha toe lea ʻi he ngaahi lea kotoa ʻoku tau maʻú ʻe toputapu ange ʻi he huafa ʻo e ʻOtua ko e Tamaí pea mo Hono ʻAlo ko Sīsū Kalaisí. …

ʻI he taimi ʻoku fakaʻaongaʻi ai ʻa e huafa ʻo e ʻOtua ko e Tamaí mo Hono ʻAlo ko Sīsū Kalaisí ʻi he loto-ʻapasia mo e mafaí, ʻoku ʻohifo ʻe Hona ongo huafá ha mālohi ʻoku mahulu atu ʻi he meʻa ʻoku lava ke mahino ki he tangata fakamatelié.

ʻOku totonu ke mahino ki he kakai tui kotoa pē ko e ongo huafa māfimafí ni—ʻa ia ʻoku tupu ai ʻa e ngaahi maná, ʻa ia naʻe fakatupu ai ʻa e māmaní, ʻa ia naʻe fakatupu ai ʻa e tangatá, pea ʻe lava ke fakahaofi ai kitautolú—ʻoku māʻoniʻoni ia pea kuo pau ke fakaʻaongaʻi ia ʻi he ʻaʻapa taupotu tahá. Hangē ko ia ʻoku tau lau ʻi he fakahā ʻi onopōní, “Manatu, ko e meʻa ʻoku haʻu mei ʻolungá ʻoku toputapu, pea kuo pau ke tokanga ʻi hono lea ʻakí, pea ke lea ʻi he ueʻi ʻa e Laumālié.”(Tokāteline mo e Ngaahi Fuakava 63:64.) (Dallin H. Oaks, “Reverent and Clean,” Ensign, May 1986, 50, 51).

Ko e hā ʻe lava ʻo tokoni kiate au ke u ongoʻi ha ʻofa mo ha fakaʻapaʻapa lahi ange kia Sīsū Kalaisí?

Naʻe akoʻi ʻe Sisitā Sini B. Pingihami, ko e Palesiteni Lahi mālōlō ʻo e Fineʻofá, ʻo pehē:

Ke Kakato Ai Hoʻomou Fiefiá

ʻOku maʻu e fiefia ʻoku tuʻuloá ʻi hono tukutaha ʻo e tokangá ʻi hotau Fakamoʻui ko Sīsū Kalaisí, mo hono moʻui ʻaki ʻo e ongoongoleleí ʻo hangē ko ia kuó Ne fakahā mo akoʻi maí. Ko e lahi ange ʻo ʻetau ako fekauʻaki mo e tuí, mo muimui kia Sīsū Kalaisí, ko e mahino ange ia kiate kitautolu ko Ia ʻa e tupuʻanga ʻo e fakamoʻuí, melinó, mo e fakalakalaka taʻengata kotoa pē. (Jean B. Bingham, “Ke Kakato Ai Hoʻomou Fiefiá,” Liahona, Nōvema 2017, 85)

ʻE lava fēfē nai ʻe he loto-ʻapasia kia Sīsū Kalaisí ʻo liliu ʻeku moʻuí?

Naʻe akonaki ʻa ʻEletā ʻUlise Soālesi ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Ofo ʻia Kalaisi mo ʻEne Ongoongoleleí

ʻI he taimi ʻoku tau ofo moʻoni ai ʻia Sīsū Kalaisi mo ʻEne ongoongoleleí, ʻoku tau fiefia ange, loto-vēkeveke ange ki he ngāue ʻa e ʻOtuá, pea tau fakatokangaʻi ʻa e toʻukupu ʻo e ʻEikí ʻi he meʻa kotoa pē. ʻIkai ngata aí, ka ʻoku ʻuhingamālie ange ʻetau ako e ngaahi folofola ʻa e ʻOtuá, moʻoni ange ʻetau lotú; ʻaʻapa ange ʻetau moihuú; pea faimateaki ange ʻetau ngāue ʻi he puleʻanga ʻo e ʻOtuá. Ko e ngaahi meʻá ni kotoa ʻoku tokoni ia ke hāsino lahi ange ʻa e Laumālie Māʻoniʻoní ʻi heʻetau moʻuí. Ko ia, ʻe fakamālohia ai ʻetau fakamoʻoni ki he Fakamoʻuí mo ʻEne ongoongoleleí. (Ulisses Soares, “Ofo ʻia Kalaisi mo ʻEne Ongoongoleleí,” Liahona, Mē 2022, 115–16)

Tokāteline mo e Ngaahi Fuakava 63:62. ʻE hanga fēfē nai ʻe ha taha ʻo “[takuanoa] ʻa e huafa ʻo e ʻEikí …ʻoku ʻikai te nau maʻu ha mafaí”?

Naʻe akoʻi ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Mālohi ʻi he Lakanga Fakataulaʻeikí

Hangē ko e lea ʻa ʻEletā Tēvita A. Petinaá, ko hono tāpuakiʻi pe tufa ʻa e sākalamēnití, tāpuakiʻi e mahakí, pe kau ʻi he ngaahi ouau lakanga fakataulaʻeiki kehe ʻoku ʻikai ke moʻui tāú, ko hono takuanoa ia ʻa e huafa ʻo e ʻOtuá [vakai, David A. Bednar, Act in Doctrine (2012), 53]. Kapau ʻoku ʻikai ke moʻui taau ha taha, ʻoku totonu ke ʻoua naʻa kau ia ʻi hono fakahoko ʻa e ngaahi ouau ʻo e lakanga fakataulaʻeikí pea faʻa lotu mo sio ki heʻene pīsopé he ko e ʻuluaki sitepu ia ki he fakatomalá pea toe moʻui ʻo fakatatau mo e ngaahi fekaú. (Neil L. Andersen, “Mālohi ʻi he Lakanga Fakataulaʻeikí,” Liahona, Nōvema 2013, 93)

Ngaahi ʻEkitivitī Fakalahi ki he Akó

Sīpinga mei he moʻui ʻa Palesiteni Sipenisā W. Kimipoló

ʻI hoʻomou aleaʻi ʻa e mahuʻinga ʻo hono fakaʻaongaʻi ʻo e huafa ʻo Sīsū Kalaisí ʻi he ʻapasia mo e fakaʻapaʻapá, te ke lava ʻo fakaʻaongaʻi ʻa e fakamatala ko ʻeni mei he moʻui ʻa Palesiteni Sipenisā W. Kimipoló (1895–1985):

“ʻI he Falemahaki Seni Maʻake ʻi Sōleki Sití, naʻe huhu fakamohe ai ʻa [Palesiteni Sipenisā W. Kimipolo] pea fakahoko ha tafa kiate ia, hili iá naʻe teke fakafoki leva ʻi ha tēpile ki hono lokí. ʻI he kei fakaakeake ʻa Sipenisaá, naʻá ne ongoʻi ʻoku tuʻu ʻene tēpilé ʻi ha veʻe ʻeleveita pea fanongo ki ha taha ngāue falemahaki, ʻoku ʻita ki ha meʻa, ʻo lea taʻe-taau ʻaki ʻa e huafa ʻo e ʻEikí. Naʻe teʻeki ke ne fuʻu ʻilo ha meʻa, naʻá ne feinga mālohi ʻo kole ange: ‘Kātaki ʻoua te ke lea pehē. ʻOku ou ʻofa ʻiate Ia ʻo lahi ange ʻi ha toe meʻa pē ʻi he māmani ko ʻení. Kātaki.’ Naʻe lōngonoa ʻaupito. Pea naʻe tali leʻo vaivai ange leva ʻa e taha ngāué: ‘Naʻe ʻikai totonu ke u lea pehē. Fakamolemole atu.’” (Edward L. Kimball and Andrew E. Kimball Jr., Spencer W. Kimball: Twelfth President of The Church of Jesus Christ of Latter-day Saints [1977], 264)

Hili hono vahevahe ʻo e talanoá, fakaafeʻi ha kau ako ke aleaʻi ʻa e meʻa naʻe makehe kiate kinautolú.

Tokāteline mo e Ngaahi Fuakava 63:47. “Ikunaʻi ʻa e māmaní”

ʻE ala ʻaonga ki he kau akó ha fealēleaʻaki fekauʻaki mo e ngaahi akonaki ʻa e Fakamoʻuí kau ki hono ikunaʻi ʻo e māmaní ʻoku hā ʻi he Tokāteline mo e Ngaahi Fuakava 63:47. Hili hoʻomou lau fakataha ʻa e veesi ko ʻení, te ke lava ʻo fakaafeʻi ʻa e kau akó ke nau fakakaukau ke fakaʻilongaʻi ʻa e kupuʻi lea “ikunaʻi ʻa e māmaní” ʻi heʻenau folofolá. Fakaafeʻi leva ʻa e kau akó ke hiki ʻa e ngaahi fehuʻi ko ʻení ʻi heʻenau tohinoa akó, pea fakaʻatā ha konga ʻi lalo ʻi he fehuʻi takitaha ke hiki ai ʻenau ngaahi talí.

• ʻOku ʻuhinga nai ki he hā ke ikuʻi ʻa e māmaní?

• Te tau fakahoko fēfē nai iá?

• ʻOku tāpuekina fēfē nai ʻetau moʻuí ʻi hono ikuʻi ʻo māmaní?

ʻE lava ke ako ʻe he kau akó ʻa e lea ʻa Palesiteni Lāsolo M. Nalesoni ʻi he konifelenisi lahi ʻo ʻOkatopa 2022, ko e “Ikuʻi ʻa Māmani mo Maʻu ha Fiemālie” (Liahona, Nōvema 2022, 95–98) ke maʻu ha tali ki he ngaahi fehuʻi ko ʻení. Fakaafeʻi ʻa e kau akó ke lekooti ʻenau ngaahi talí ʻi heʻenau tohinoa akó pea vahevahe ʻenau ngaahi fakakaukaú ʻi he ʻosi ʻenau akó.

Tokāteline mo e Ngaahi Fuakava 63:64. Ko hono fakaʻapaʻapaʻi ʻo e ngaahi meʻa toputapú

ʻIkai ngata ʻi he talanoa kau ki hono fakaʻaongaʻi ʻa e huafa ʻo e Fakamoʻuí ʻi he loto-ʻapasiá, ka ʻe ala ʻaonga ki he kau akó hano aleaʻi ha ngaahi founga kehe te nau lava ai ʻo fakaʻaongaʻi e faleʻi ʻo e ʻEikí ʻi he Tokāteline mo e Ngaahi Fuakava 63:64. ʻE ala tokoni ʻa e ongo fehuʻi ko ʻení:

• Ko e hā ha ngaahi lea pe kaveinga ʻoku “haʻu mei ʻolunga” pea ʻoku toputapu? Te tau lava fēfē nai ʻo fakapapauʻi ʻoku tau lea ʻaki kinautolu ʻi he “tokangá”?

ʻE lava ke ke fakaafeʻi ʻa e kau akó ke nau fakakaukau ki ha ngaahi tūkunga te nau ala fehangahangai mo ia ʻa ia te nau mamata pe fanongo ai ki ha ngaahi meʻa toputapu ʻoku fakavaʻivaʻinga ʻaki pe lea ʻaki ʻi he taʻefakaʻapaʻapa. Hangē ko ʻení, ʻe ʻi ai e taimi ʻe niʻihi te nau fanongo ai ki ha ngaahi fepōtalanoaʻaki taʻe-feʻunga ʻi honau toʻú, pe te nau mamata ʻi ha ngaahi vitiō, hiva, pe ngaahi tohi taʻe-feʻunga ʻi he mītia fakasōsialé.

Fakaafeʻi ʻa e kau akó ke nau fakakaukau ki he meʻa te nau ala fai ke fakaʻehiʻehi pe fehangahangai ai mo e faʻahinga tūkunga pehení. Hangē ko ʻení, te nau lava ʻo fili ke mavahe mei he ngaahi fepōtalanoaʻaki taʻe-feʻungá, ʻikai toe muimui ʻi he ngaahi ʻakauni mītia fakasōsiale ʻoku taʻe-feʻungá, pe tokanga telia ʻa e faʻahinga vitiō pe hiva ʻoku nau fili ke mamata pe fanongo ki aí.