Դաս 79. Վարդապետություն և Ուխտեր 64–66

Վարդապետություն և Ուխտեր 65

«Պատրաստեք Տիրոջ ճանապարհը … Որպեսզի գա Երկնքի Արքայությունը»

Հիսուս Քրիստոսի Վերջին Օրերի Սրբերի Եկեղեցու և նրա անդամների կարևոր պարտականություններից մեկն է օգնել նախապատրաստել աշխարհը Փրկչի վերադարձին: Վարդապետություն և Ուխտեր 65 բաժնում Տերը հայտնեց այս կարևոր դերի մասին Իր Մարգարե Ջոզեֆ Սմիթին և Սրբերին: Այս դասը կօգնի ուսանողներին հասկանալ Եկեղեցու դերը աշխարհը Հիսուս Քրիստոսի Երկրորդ Գալուստին նախապատրաստելու գործում:

Հնարավոր ուսումնական վարժություններ

Նախապատրաստություն գործին

Այս դասը սկսելու եղանակներից մեկն է՝ օգնել ուսանողներին պատկերացնել այնպիսի հանգամանքներ, որոնցում նախապատրաստությունը կենսական նշանակություն ունի: Հետևյալ հարցերը կարող են օգտակար լինել։

• Ո՞րն է այն գործը, որը ձեզ դուր է գալիս և որը պահանջում է լուրջ նախապատրաստություն:

• Եթե որևէ մեկին օգնեիք նախապատրաստվել այդ գործին, ի՞նչ կցանկանայիք, որ նա իմանար: Ի՞նչ օգնություն կամ միջոցներ կտրամադրեիք նրան:

Ուսանողներին հնարավորություն տվեք իրենց պատասխաններով կիսվել այլ ուսանողների հետ:

Օգնեք ուսանողներին խորհել այն մասին, թե ինչին է օգնում մեզ պատրաստվել Հիսուս Քրիստոսի Վերջին Օրերի Սրբերի Եկեղեցին:

Ճիշտ այնպես, ինչպես ձեր գործը պահանջում է լուրջ նախապատրաստություն, առաջիկայում սպասվում են իրադարձություններ, որոնց մենք պետք է պատրաստվենք: Տերը հիմնել է Իր Եկեղեցին, որպեսզի օգնի մեզ նախապատրաստվել:

• Ինչի՞ն է մեզ պատրաստում Նրա Եկեղեցին:

Բացատրեք ուսանողներին, որ Նրա Եկեղեցին պատրաստում է մեզ շատ բաների և խրախուսեք նրանց կիսվել այն բաներով, որոնք իրենք կարող են պատկերացնել: Խնդրեք նրանց փնտրել դրանցից մեկը Վարդապետություն և Ուխտեր 65 բաժնում։

«Պատրաստ արեք Տիրոջ ճանապարհը»

1831 թ. սեպտեմբերի 12-ին Ջոզեֆ Սմիթը և նրա ընտանիքը Կիրթլենդից (Օհայո) տեղափոխվեցին 30 մղոն հարավ-արևելք գտնվող Հիրամ քաղաքը (Օհայո)՝ Ջոն և Էլիս Ջոնսոնների տուն: 1831 թվականի հոկտեմբերի 30-ին՝ կիրակի օրը, Ջոնսոնների տանը անցկացվեց եկեղեցական ծառայություն: Նույն օրը Մարգարեն հայտնություն ստացավ, որը արձանագրված է Վարդապետություն և Ուխտեր 65 բաժնում։

Հետևյալ հատվածները կարդալիս ուսանողները կարող են կիրառել սուրբ գրությունների ուսումնասիրության հմտությունը՝ փնտրելով կրկնվող բառեր և արտահայտություններ: Կարող եք խրախուսել նրանց այս հատվածներում նշել «նախապատրաստել» բառի յուրաքանչյուր կրկնություն: Նրանք կարող են նաև նշել «պատրաստ արեք» արտահայտությունը հատված 3-ում:

Կարդացեք Վարդապետություն և Ուխտեր 65․1, 3 հատվածները և փնտրեք Տիրոջ հրավերը։

• Ի՞նչ գտաք:

Կարդացեք Վարդապետություն և Ուխտեր 65․2 հատվածը՝ փնտրելով, թե ինչ է մեզ տվել Տերը, որպեսզի օգնի նախապատրաստվել Իր Երկրորդ Գալուստին։

• Ո՞ր բառերի կամ արտահայտությունների վերաբերյալ հարցեր ունեք:

  Որպեսզի օգնեք ուսանողներին վերլուծել և հասկանալ հատվածներ 2–3-ի արտահայտությունները, հարցրեք նրանց, թե իրենց կարծիքով, ինչ են նշանակում այդ արտահայտությունները: Անհրաժեշտության դեպքում կարող եք ցուցադրել կամ կիսվել հետևյալ նյութերից մի քանիսով.

  1. «Արքայության բանալիները» կամ «քահանայության բանալիները» «նախագահելու իրավունքներն են կամ Աստծո կողմից մարդուն տրված զորությունը՝ առաջնորդելու, վերահսկելու և կառավարելու Աստծո քահանայությունը երկրի վրա» (Սուրբ գրքերի ուղեցույց, «Քահանայության բանալիները», scriptures.ChurchofJesusChrist.org)։ Տես նաև Մատթեոս 16․18–19

  2. «Սարից մի քար պոկվեց՝ առանց ձեռք դիպչելու». դա «Տիրոջ Եկեղեցին է, որն [աճում է] իր չափերով, որ ամբողջ երկիրը լցնի, «[որ] երբեք չկործանվի … [այլ] կանգուն մնա հավիտյան» [Դանիել 2․45]» (Ռոնալդ Ա. Ռասբենդ, «Մարգարեության իրականացում», Լիահոնա, մայիս 2020, 75)։ Տես նաև Դանիել 2․31–35, 44–45

  3. «Պատրաստվիր Փեսայի գալուն» արտահայտությունը վերաբերում է այն եղանակին, որով «Հիսուս Քրիստոսը սուրբ գրություններում խորհրդանշվում է որպես Փեսա: Եկեղեցին Նրա խորհրդանշական հարսն է» (Սուրբ գրքերի ուղեցույց, «Փեսա», scriptures.ChurchofJesusChrist.org)։ Տես նաև Հայտնություն 19․7–9։

  Լրացուցիչ գաղափարների համար, թե ինչպես օգնել ուսանողներին ուսումնասիրել Եկեղեցու աճը, տես այս դասի «Օժանդակ ուսումնական վարժություններ» բաժինը:

• Ինչպե՞ս կամփոփեիք այն, ինչ մենք կարող ենք սովորել այս հատվածներից՝ որպես ճշմարտության դրույթ:

Ուսանողները կարող են կիսվել այն ճշմարտությամբ, որ Հիսուս Քրիստոսը վերականգնեց Իր Եկեղեցին, որպեսզի օգնի մեզ պատրաստվել և ուրիշներին պատրաստել Իր Երկրորդ Գալուստին։ Առաջարկեք ուսանողներին գրել այս ճշմարտությունը հատվածներ 1–3-ի կողքին։

Տասներկու Առաքյալների Քվորումից երեց Դ. Թոդ Քրիստոֆերսոնը հայտարարել է.

Հիսուս Քրիստոսի Վերջին Օրերի Սրբերի Եկեղեցին արտոնված է հատուկ զորությամբ և լիազորված է իրականացնել անհրաժեշտ նախապատրաստությունները Տիրոջ Երկրորդ Գալուստի համար: Եվ անշուշտ այն վերականգնվել է այդ նպատակի համար: … Հիսուս Քրիստոսի Եկեղեցին պատվիրակված է պատրաստել և պատրաստում է աշխարհը այդ օրվան: (Դ. Թոդ Քրիստոֆերսոն «Պատրաստվենք Տիրոջ վերադարձին», Լիահոնա, մայիս 2019, 82, 84)

• Ի՞նչ մտքեր կամ կարծիք ունեք այս հայտարարության մասին:

• Ինչպե՞ս է Եկեղեցին եզակիորեն կարողանում պատրաստել աշխարհը Փրկչի վերադարձին:

• Ի՞նչ նախապատրաստական աշխատանքներ են անհրաժեշտ այդ օրվա համար:

Կարող եք գրատախտակին թվարկել, թե ինչպես է Եկեղեցին օգնում նսախապատրաստել մարդկանց Երկրորդ Գալուստին: Եթե ուսանողները դժվարանան գաղափարներ գտնել, կարող եք նրանց հետ կիսվել Եկեղեցու չորս՝ աստվածայնորեն սահմանված պարտականություններով: Դրանց միջոցով մենք սատարում ենք Աստծո գործին՝ (1) ապրելով Հիսուս Քրիստոսի ավետարանով, (2) հոգալով կարիքավորների մասին, (3) հրավիրելով բոլորին ընդունել ավետարանը և (4) միավորելով ընտանիքները հավերժության համար (տես Ընդհանուր ձեռնարկ. Ծառայել Հիսուս Քրիստոսի Վերջին Օրերի Սրբերի Եկեղեցում, 1.2, ChurchofJesusChrist.org)։ Դուք կարող եք գրել այս կետերը գրատախտակին և խնդրել ուսանողներին կիսվել ավելի որոշակի եղանակներով, որոնք համապատասխանում են այս վերնագրերից յուրաքանչյուրին և օգնում են պատրաստել մարդկանց Տիրոջ Երկրորդ Գալուստին:

«Կանչեք առ Տերը, որ նրա արքայությունն առաջ գնա երկրի վրա»

Կարդացեք Վարդապետություն և Ուխտեր 65․4–6 հատվածները՝ փնտրելով, թե ինչ է Տերը ուսուցանել, որ մենք կարող ենք անել՝ օգնելու նախապատրաստել աշխարհը Իր Երկրորդ Գալուստին։

• Ի՞նչ բացահայտեցիք:

• Որո՞նք են Փրկչի «հրաշալի գործերից» մի քանիսը, որոնք կատարվում են Նրա Եկեղեցու միջոցով: (Տես Ընդհանուր ձեռնարկ. ծառայել Հիսուս Քրիստոսի Վերջին Օրերի Սրբերի Եկեղեցում, 1.2, 1.3, ChurchofJesusChrist.org:)

• Ինչպե՞ս են այս գործերն օգնում մեզ պատրաստվել և պատրաստել ուրիշներին Փրկչի Երկրորդ Գալուստին:

Կարող եք ուսանողներին հնարավորություն տալ դասարանում և դասարանից դուրս՝ «հայտարարել նրա հրաշալի գործերի մասին» (Վարդապետություն և Ուխտեր 65.4): Նրանք կարող են քննարկել իրենց ընտանիքների և ընկերների կամ այլ մարդկանց հետ կիսվելու եղանակները:

Նախագահ Ռասսել Մ. Նելսոնն ուսուցանել է, որ մենք կարող ենք «կանչե[լ] առ Տերը, որպեսզի նրա թագավորությունը տարածվի երկրի վրա» (Վարդապետություն և Ուխտեր 65.5):

2018թ․ Երիտասարդների համաշխարհային հոգևոր հավաք

Նախագահ Ռասսել Մ. Նելսոնը և Քույր Վենդի Նելսոնը խոսում են երիտասարդների համաշխարհային հոգևոր հավաքին 2018թ․ հունիսի 3-ին։

Ես … հրավիրում եմ, որ դուք ամեն օր աղոթեք, որ Աստծո բոլոր զավակները կարողանան ստանալ Հիսուս Քրիստոսի ավետարանի օրհնությունները: Ես և դուք ապրում ենք, որպեսզի տեսնենք և շարունակենք տեսնել, թե ինչպես է Իսրայելը մեծ ուժով հավաքվում: Եվ դուք կարող եք այդ հավաքի հետևում կանգնած ուժի մի մասը լինել։ (Ռասսել Մ. Նելսոն և Վենդի Վ. Նելսոն, «Իսրայելի հույսը» [երիտասարդների համաշխարհային հոգևոր հավաք, 3 հունիսի, 2018 թ.], ChurchofJesusChrist.org)

Խնդրեք ուսանողներին խորհել Նախագահ Նելսոնի հրավերի մասին: Երբ ուսանողները խորհեն այդ մասին, առաջարկեք նրանց կիսվել այն փորձառություններով, որ իրենք ունեցել են՝ հետևելով այդ հրավերին:

Կարող եք եզրափակել վկայությամբ, որ Եկեղեցին կամ «Աստծո արքայությունը» նախապատրաստում է ճանապարհ, որպեսզի «երկնքի արքայությունը» գա, երբ Փրկիչը վերադառնա (տես Վարդապետություն և Ուխտեր 65.6):

Օժանդակ նյութեր

Ինչպես ես կարող եմ օգնել նախապատրաստել աշխարհը Տիրոջ Երկրորդ Գալուստի համար:

Առաջին Նախագահությունը ուսուցանել է.

Մենք գիտենք, որ Աստված ապրում է: Մենք աղոթում ենք, որ դուք ամուր մնաք ուխտի ճանապարհին, որը տանում է դեպի ձեր Երկնային Հայրը: Դրանով դուք մշտապես բարի ազդեցություն կունենաք՝ ուրախությամբ կիսվելով ավետարանով և պատրաստելով աշխարհը Փրկչի Երկրորդ Գալուստին: (Երիտասարդներին զորացնելու համար. Ընտրություն կատարելու ուղեցույց [2022], 2)

Ի՞նչ է ուսուցանել Ջոզեֆ Սմիթը ավետարանի մասին, որը լցնում է ամբողջ երկիրը:

Վիլֆորդ Վուդրուֆը պատմել է, թե ինչ է ուսուցանել Ջոզեֆ Սմիթը 1834 թվականի ապրիլին Կիրթլենդ քաղաքում (Օհայո)՝ քահանայություն կրողների հավաքի ժամանակ։

Մարգարեն բոլոր Քահանայություն կրողներին խնդրեց հավաքվել փոքրիկ փայտե դպրոցում։ Դա փոքրիկ տնակ էր, մոտ 14 ֆուտ քառակուսի։ Սակայն այն տեղավորեց Հիսուս Քրիստոսի Վերջին Օրերի Սրբերի Եկեղեցու ողջ քահանայությանը, որն այդ ժամանակ Կիրթլենդ քաղաքում էր։ … Երբ մենք հավաքվեցինք, Մարգարեն կոչ արեց Իսրայելի Երեցներին իր հետ միասին վկայություն բերել այս աշխատանքի մասին։ Երբ նրանք վերջացրին, մարգարեն ասաց. «Եղբայրներ, ես մեծապես կրթվեցի և սովորեցի այս երեկո ձեր վկայություններից, սակայն ցանկանում եմ ասել Տիրոջ առաջ, որ դուք գիտեք այս Եկեղեցու և արքայության ճակատագրի մասին ոչ ավել, քան մանուկը իր մոր գրկում: Դուք չեք ըմբռնում այն»: Ես զարմացած էի: Նա ասաց. «Միայն մի բուռ քահանայություն եք տեսնում այստեղ, բայց այս Եկեղեցին կլցնի Հյուսիսային և Հարավային Ամերիկան՝ այն կլցնի ողջ աշխարհը»։ (Եկեղեցու նախագահների ուսմունքները. Ջոզեֆ Սմիթ [2007], 137)

Վարդապետություն և Ուխտեր 65․6 Ո՞րն է տարբերությունը «Աստծո արքայության» և «երկնքի արքայության» միջև:

Աստծո արքայությունը Հիսուս Քրիստոսի Վերջին Օրերի Սրբերի Եկեղեցին է (Վ&Ու 65)։ Եկեղեցու նպատակն է պատրաստել իր անդամներին՝ հավերժ ապրելու սելեստիալ արքայությունում կամ երկնքի արքայությունում: (Տես նաև Սուրբ գրքերի ուղեցույց «Աստծո արքայությունը կամ Երկնքի արքայությունը», «scriptures.ChurchofJesusChrist.org»)

Օժանդակ ուսումնական վարժություններ

Հիսուս Քրիստոսի Եկեղեցու աճը

Կարող եք օգնել ուսանողներին ուսումնասիրել Եկեղեցու աճը տարիների ընթացքում՝ օգնելու նրանց տեսնել, թե ինչպես է կատարվում Դանիելի մարգարեությունը (տես Դանիել 2․44–45)։ Կարող եք ծանոթանալ Լիահոնա ամսագրի մայիսի համարում զետեղված վիճակագրական հաշվետվությանը։

Կարող եք նաև ուսանողներին առաջարկել ծանոթանալ «Փաստեր և վիճակագրություն» բաժնին newsroom.ChurchofJesusChrist.org կայքում, որտեղ շատերը կարող են գտնել Եկեղեցու վիճակագրությունն իրենց երկրի վերաբերյալ:

Եկեղեցու տարածումը կարող ենք տեսնել նաև տաճարների շինարարության աճին նայելով։ Տարիքով ամենամեծ ուսանողի ծննդյան տարվա տաճարների թվի տվյալները համեմատեք տաճարների ներկայիս թվի հետ: Նաև կարող եք օգտագործել․

• Այն տաճարների թիվը, որոնց շինարարության մասին հայտարարվել է և որոնք գտնվում են կառուցման փուլում (ChurchofJesusChrist.org/temples/list)։

• «Ավելի հասանելի դարձնենք տաճարային արարողությունները» (Լիահոնա, հուլիս 2022 թ․, 13)։

• «Ավետարանը պետք է առաջ գնա» (2:47)։

  The Gospel Shall Roll Forth

  A visual depiction of Church growth by temples and stakes (D&C 65).

Իսրայելի հավաքումը

Կարող եք դիտել «Աստծո վկան» տեսանյութը 3:30-5:14։ Ուսանողները կարող են փնտրել, թե ինչպես երեց Նիլ Լ. Անդերսենի գլուխկոտրուկ-համեմատությունը կարող է օգնել մեզ հասկանալ, թե ինչպես է Իսրայելի հավաքումը նախապատրաստում աշխարհը Երկրորդ Գալուստին։ Նրանք կարող են կիսվել, թե ինչպես կարող են «տեղադրել գլուխկոտրուկի այլ կարևոր մասերը»:

Աստծո վկա

Երեց Անդերսենն ուսուցանում է, որ մենք պետք է կիսվենք ավետարանով մյուսների հետ՝ լինելով Աստծո վկաները բոլոր ժամանակներում և բոլոր տեղերում:

Այնուհետև կարող եք դիտել տեսանյութը 13:24-15:33՝ տեսնելու երեց Անդերսենի հատուկ հրավերը՝ ուղղված երիտասարդությանը։ Ուսանողները կարող են կիսվել, թե ինչպես է տեխնոլոգիան օգտագործվում Իսրայելը հավաքելու համար, ապա խորհել կամ քննարկել, թե իրենք ինչպես կարող են օգտագործել այդ տեխնոլոգիան Իսրայելը հավաքելու համար:

Աստծո վկա

Երեց Անդերսենն ուսուցանում է, որ մենք պետք է կիսվենք ավետարանով մյուսների հետ՝ լինելով Աստծո վկաները բոլոր ժամանակներում և բոլոր տեղերում:

Վարդապետություն և Ուխտեր 66 Աստված տեղյակ է ձեր և ձեր կարիքների մասին

Որպես այս դասի մաս կարող եք ուսուցանել Վարդապետություն և Ուխտեր 66 բաժինը։ Դա անելու համար հետևյալ հարցերը գրեք գրատախտակին և առաջարկեք ուսանողներին կիսվել, թե ինչպես կպատասխանեն դրանց.

• Ինչո՞ւ է օրհնություն հանդիսանում այն, որ մենք իմանանք Աստծո կամքը մեր վերաբերյալ:

• Ինչպե՞ս կարող եմ իմանալ Աստծո կամքը իմ վերաբերյալ։

Որպեսզի օգնեք ուսանողներին հասկանալ այս բաժնի պատմական ենթատեքստը, բացատրեք, որ իր մկրտվելուց կարճ ժամանակ անց Վիլյամ Ի․ Մակլելլինը հանդիպեց Մարգարե Ջոզեֆ Սմիթին և խնդրեց նրան հարցնել Տիրոջն իր անունից: Ուսանողները կարող են կարդալ բաժնի գլխագիրը՝ փնտրելով, թե ինչ էր արել Վիլյամը՝ նախքան իր խնդրանքով Ջոզեֆին դիմելը:

Ուսանողները կարող են ուսումնասիրել Վարդապետություն և Ուխտեր 66․4–10 հատվածները՝ փնտրելով, թե Տերը ինչ էր ուզում, որ Վիլյամն անի։ Խնդրեք ուսանողներին կիսվել իրենց գտածով։ Այնուհետև կարող եք քննարկել այն օրհնությունները, որոնք մենք կարող ենք ստանալ, եթե հետևենք Տիրոջ կամքին մեր վերաբերյալ: Խրախուսեք ուսանողներին ամենօրյա աղոթքի միջոցով փնտրել Տիրոջ կամքը իրենց կյանքի վերաբերյալ: