“Lesona 80—Fotopampianarana sy Fanekempihavanana 67: Tenivavolombelon’ny fahamarinana,” Boky torolalana ho an’ny mpampianatra seminera: Fotopampianarana sy Fanekempihavanana(2025)
“Fotopampianarana sy Fanekempihavanana 67,” Boky torolalana ho an’ny mpampianatra seminera: Fotopampianarana sy Fanekempihavanana
Lesona 80: Fotopampianarana sy Fanekempihavanana 67–70
Fotopampianarana sy Fanekempihavanana 67
Tenivavolombelon’ny fahamarinana
Maro ireo mpitarika ny Fiangonana izay nanohana ny famoahana ireo fanambarana izay noraisin’ny Mpaminany Joseph Smith ary nahatakatra fa avy amin’ Andriamanitra izy ireny. Ny hafa dia nifantoka tamin’ireo tsy fahalavorariana izay tsikaritr’izy ireo tao amin’ireo fanambarana ary vokatr’izany dia tsy nanana antoka izy ireo fa avy amin’ny Tompo izany. Ity lesona ity dia afaka manampy amin’ny fampitomboana ny fahatokian’ny mpianatra fa ny Tompo dia miteny amintsika amin’ny alalan’ny mpaminany ary ny Fotopampianarana sy Fanekempihavanana dia teniny.
Sahanasa fianarana azo atao
Tenivavolombelona iray
Mamarita fomba iray hanampiana ny mpianatra hieritreritra momba ny tenivavolombelon’izy ireo momba ny fahamarinan’ny filazantsara mifandray amin’ny drafitry ny Ray any An-danitra. Afaka manao ity sahanasa manaraka ity izy ireo eny amin’ny solaitrabe na ao anatin’ny diary fandalinan’izy ireo.
Manaova sarin’olona tsotsotra iray eny amin’ny ilany irain’ny solaitrabe. Ataovy lisitra eo amin’ny ilany iray hafa kosa ireo lafin-javatra samihafa ao amin’ny drafitry ny Ray any An-danitra izay tokony hahazoan’ny olona iray tenivavolombelona. Azonao atao koa ny mampiseho sary izay maneho ireo lafin-javatra ao amin’ny drafitry ny Ray any An-danitra tahaka ny sarin’i Jesoa Kristy iray, na ny mpaminany ankehitriny, na ny soratra masina. Misafidiana lafin-javatra vitsivitsy ary asao ny mpianatra mba hifanakalo hevitra momba izao manaraka izao.
-
Nahoana no manampy ny fananana tenivavolombelona momba ireo lafin-javatra ao amin’ny drafitry ny Ray any An-danitra ireo?
-
Inona ireo sakantsakana sasany izay mety hanakana ny fanatanjahana io tenivavolombelona?
Rehefa mizara izany ireo mpianatra dia azonao tanisaina eo anelanelan’ilay sarin’olona sy ny listr’ireo zavatra izay tokony hahazoantsika tenivavolombelona eo amin’ny fiainantsika ireo sakantsakana misy.
Aorian’ilay fifanakalozan-kevitra dia afaka manasa ny mpianatra hieritreritra momba ny tenivavolombelona ananan’izy ireo momba ireo ampahany samihafa ao amin’ny drafitry ny Ray any An-danitra ianao. Asao izy ireo hitady fahamarinana izay afaka manampy azy ireo hahazo tenivavolombelona izay azy ireo manokana na hanatanjaka ny tenivavolombelona ananan’izy ireo mandritra ity lesona ity.
Ahoana no fomba hahazoana sy hanatanjahana tenivavolombelona iray
Mba hanampiana ny mpianatra hahatakatra ny sahan-kevitry ny fizarana 67, dia afaka mizara antsipiriany sasantsasany avy ao amin’ity andiam-pehezan-teny manaraka ity ianao.
Tany amin’ny faramparan’ny taona 1831, dia nanana amboarana fanambarana avy amin’ny Tompo i Joseph Smith saingy vitsy ireo olona izay afaka nampiasa ny tahadikan’ireo. Nanambara ny Tompo fa ilaina ny hamoahan’izy ireo ireo fanambarana ireo ao anatina boky. Tahaka ny Bokin’i Môrmôna, dia tokony ho nahitana tenivavolombelona avy amina vavolombelona ny Bokin’ireo Didy (izay navoaka ho lasa hoe Fotopampianarana sy Fanekempihavanana taty aoriana). Kanefa nisalasala hijoro ho vavolombelona ny sasany tamin’ireo mpitarika tao amin’ny Fiangonana. Nanana olana tamin’ny sasany tamin’ireo fiteny nampiasaina tao izy ireo ary naniry ny hanatsara izany.
Hevero ny hampiditra ao anatin’ilay lisitra misy ireo sakantsakana ny hoe “fiteny.” Anontanio raha misy fomba ahafahana mampiantefa ireo amin’ny zatovo ankehitriny.
Vakio ny Fotopampianarana sy Fanekempihavanana 67:1–5 mba hitadiavana ny zavatra nozarain’ny Tompo tamin’ireo lehilahy ireo.
-
Inona araka ny eritreritrao no antonynilan’izy ireo nandre izany?
-
Inona avy ireo fahamarinana ao amin’ny filazantsara hitanao avy amin’ireo andininy ireo?
Rehefa mizara ny mpianatra dia ampio izy ireo hamantatra fahamarinana mitovy amin’ity: Ny Tompo dia mahare ireo vavaka ataontsika, mahafantatra ny fontsika, ary afaka manome tenivavolombelona antsika momba ny fahamarinana izay tadiavintsika.
-
Ahoana araka ny eritreritrao ny fomba hanampian’izany antsika rehefa mikatsaka tenivavolombelona isika na manana fahasahiranana mikasika izany?
-
Nahoana no mety hanakana antsika tsy handray fitahiana ny “tahotra [ao am-pontsika]” (Fotopampianarana sy Fanekempihavanana 61:3) araka ny eritreritrao?
-
Inona no zavatra neken’ny Tompo momba an’i Joseph Smith tao amin’ny andininy 5? Nahoana no tsy fahendrena ny “maneho mihoatra noho ny fiteniny” na dia tsy tonga lafatra na nahay nandaha-teny aza ny Mpaminany? (Fotopampianarana sy Fanekempihavanana 61:5).
Mandresy ireo sakantsakana miaraka amin’ny fanampian’ny Tompo
Fantatry ny Tompo ny ao am-pontsika ary afaka manampy antsika Izy handresy ireo sakantsakana amin’ny tenivavolombelona ananantsika. Eto dia nampanao fanamby ireo loholon’ny Fiangonany ny Tompo mba hanampiana azy ireo hahazo “tenivavolombelon’ny fahamarinana” (andininy 4) tamin’ireo fanambarana noraisin’i Joseph Smith.
Raha tian’ny mpianatra ny hanao fanamby dia azo aroso amin’ny endrika fitsapam-pahaizana ity sahanasa manaraka ity. Asao izy ireo hamaky ireo andininy amim-pitandremana ary avy eo hanakatona ny soratra masina ka hamaly ireto fanontaniana manaraka ireto.
Vakio ny Fotopampianarana sy Fanekempihavanana 67:6–9 mba hitadiavana ny antsipirian’ny fanamby nampanaovin’ny Tompo.
-
Inona no karazana fanambarana tokony ho nofidin’izy ireo? (Jereo ny andininy 6.)
-
Karazan’olona toy ny ahoana no tokony ho nofidin’izy ireo? (Jereo ny andininy 6.)
-
Inona no zavatra nasaina nosoratan’io olona io? (Jereo ny andininy 7.)
-
Inona no hitranga raha mahavita izany izy ireo? (Jereo ny andininy 7.)
-
Inona no hitranga raha tsy mahavita izany izy ireo? (Jereo ny andininy 8–9.)
Azonao atao ny manazava fa i William McLellin izay 25 taona ary mpampianatra tany an-tsekoly sy mpikambana vao niova fo vao haingana tao amin’ny Fiangonana dia notendrena ho ilay “hendry indrindra” (andininy 6) teo anivon’ilay vondrona ary nandray ilay fanamby avy amin’ny Tompo. Rehefa vitany izany dia tsikaritry ny rehetra fa ny zavatra nosoratany dia tsy avy amin’ny Tompo.
-
Inona araka ny eritreritrao no lesona sasantsasany nianaran’ireo lehilahy ireo avy amin’ity zavatra niainana ity?
Rehefa mamaly ny mpianatra dia azonao asaina izy ireo hamerina hamaky ny andininy 9. Azonao atao koa ny manazava fa maro tamin’ireo loholona no nanao sonia antontan-taratasy iray izay ahitana ny tenivavolombelon’izy ireo ôfisialy momba ny fahamarinan’ireo fanambarana hita ao amin’ny Bokin’ireo Didy.
-
Ahoana no anehoan’ity zavatra niainana ity fa ny Tompo dia nahafantatra azy ireo ary afaka nanampy tamin’ny tenivavolombelona nananan’izy ireo?
Notohizan’ny Tompo izany tamin’ny fampanantenana traikefa ara-panahy goavana kokoa tamin’ireo lehilahy ireo raha “[esorin’izy ireo] [amin’ny] tenan’[izy ireo] ny fialonana sy ny tahotra ary [manetry] tena eo anoloako [izy ireo]” (Fotopampianarana sy Fanekempihavanana 67:10).
Ahoana no ampiharana io fahamarinana io ankehitriny
Eritrereto hoe misy olona fantatrao izay sahirana amin’ny finoana fa ny Tompo dia miteny amintsika amin’ny alalan’ny mpaminany ary ny Fotopampianarana sy Fanekempihavanana dia tenin’ny Tompo.
Raha tian’ny mpianatra izany dia afaka manampy pitsipitsin-javatra amin’ilay rafi-tantara izy ireo amin’ny fisafidianana iray amin’ireo sakantsakana notanisaina teny amin’ny solaitrabe sy amin’ny fandrosoana hevitra fa mila mandresy izany ilay olona mba handraisany tenivavolombelona. Azonao zaraina na aseho avy eo ireto torolalana manaraka ireto.
Eritrereto ny fomba hanampianao io olona io amin’ny alalan’ny fanaovana ireto manaraka ireto:
-
Soraty ny mety holazainao mba hanampiana azy hahafantatra fa ny Tompo dia mahare ireo vavaka ataontsika ary afaka manome tenivavolombelona antsika momba ny mpaminany sy ny Fotopampianarana sy Fanekempihavanana. Raha azo atao dia afaka mizara zavatra niainanao manokana na niainan’ny olona iray akaiky anao izay mijoro ho vavolombelona momba ireo fahamarinana ireo ianao.
-
Mampiasà soratra masina, na tantara ao anaty soratra masina, na zavatra niainanao manokana mba hizarana zavatra izay azontsika atao hampitomboana ny tenivavolombelona ananantsika momba ny mpaminany sy ny Fotopampianarana sy Fanekempihavanana (ohatra sasany amin’izany ny Fotopampianarana sy Fanekempihavanana 1:37–38; 21:4–6; Môrônia 10:4–5). Zarao ny fomba izay ahafahan’ny Tompo mitahy antsika noho ireo asa atao ireo.
Manasà mpianatra samihafa mba hizara ny zavatra nomanin’izy ireo. Ankasitraho ny mpianatra amin’ny hevi-baovao sy ny zavatra niainan’izy ireo.
Farano ny lesona amin’ny fanasana ny mpianatra hisaintsaina ny tenivavolombelona ananan’izy ireo vavolombelona fa miteny amintsika amin’ny alalan’ny mpaminany ny Tompo ary marina ny Fotopampianarana sy Fanekempihavanana. Mijoroa ho vavolombelona fa ny Tompo dia mahare ny vavaka ataon’izy ireo, mahafantatra ny ao am-pon’izy ireo ary afaka manampy azy ireo hahazo tenivavolombelona. Asao izy ireo hanoratra izay fitaoman’ny fanahy noraisin’izy ireo nandritra ity leson ity.