80-р хичээл: Сургаал ба Гэрээ 67–70

Сургаал ба Гэрээ 67

Үнэний гэрчлэл

Сүмийн олон удирдагч бошиглогч Иосеф Смитийн хүлээн авсан илчлэлтүүдийг нийтлэхийг дэмжиж, тэдгээрийг Бурханаас ирсэн гэдгийг ойлгосон. Бусад нь илчлэлтүүдээс олж харсан төгс бус байдалд анхаарч, улмаар тэдгээр нь Их Эзэнээс ирсэн гэдэгт эргэлзсэн. Энэ хичээл нь суралцагчдад Их Эзэн бошиглогчдоор дамжуулан бидэнтэй ярьдаг бөгөөд Сургаал ба Гэрээ бол Түүний үг гэдэгт итгэх итгэлээ нэмэгдүүлэхэд тусалж чадна.

Боломжит суралцах үйл ажиллагаа

Гэрчлэл

Суралцагчдад Тэнгэрлэг Эцэгийн төлөвлөгөөтэй холбоотой сайн мэдээний үнэний талаарх гэрчлэлээ бодоход туслах арга замыг тодорхойл. Тэд самбар дээр эсвэл судлах тэмдэглэл дээрээ дараах үйл ажиллагааг гүйцэтгэж болно.

Самбарын нэг талд хүний дүрс зур. Нөгөө талд гэрчлэл хүлээн авах шаардлагатай байж болох Тэнгэрлэг Эцэгийн төлөвлөгөөний өөр өөр хэсгийг жагсаан бич. Та бас Есүс Христ, одоогийн бошиглогч эсвэл судрууд гэх мэт Тэнгэрлэг Эцэгийн төлөвлөгөөний хэсгүүдийг төлөөлдөг зургийг үзүүлж болно. Эдгээрээс цөөн хэдийг сонгоод, суралцагчдыг дараах зүйлсийг ярилцахад урь.

• Тэнгэрлэг Эцэгийн төлөвлөгөөн дэх эдгээр хэсгийн талаар гэрчлэлтэй байх нь яагаад тустай вэ?

• Энэ гэрчлэлийг хүчирхэгжүүлэхэд ямар саад тулгарч болох вэ?

Суралцагчдыг хуваалцах үед та хүний дүрс болон бидний амьдралдаа гэрчлэл эрэлхийлэх ёстой зүйлсийн жагсаалт хоёрын хоорондох саад тотгорыг бичиж болно.

Ярилцлагын дараа та суралцагчдыг Тэнгэрлэг Эцэгийн төлөвлөгөөний өөр өөр хэсгүүдийн талаарх гэрчлэлээ бодоход урьж болох юм. Тэднийг хичээлийн үеэр гэрчлэл олж авахад эсвэл хүчирхэгжүүлэхэд туслах үнэнийг олж мэдэхэд урь.

Гэрчлэлийг хэрхэн хүлээн авч, хүчирхэгжүүлэх вэ?

Суралцагчдад 67-р хэсгийн агуулгыг ойлгоход нь туслахын тулд та дараах догол мөрөөс зарим мэдээллийг хуваалцаж болох юм.

1831 оны сүүлч гэхэд Иосеф Смит Их Эзэнээс нэлээд олон илчлэлт хүлээн аваад байсан ч тун цөөхөн хүн тэдгээрийг унших боломжтой байв. Их Эзэн тэдгээрийг ном болгон хэвлүүлэх хэрэгтэйг илчилсэн. Мормоны Номын нэгэн адил Зарлигуудын Ном (дараа нь Сургаал ба Гэрээ нэрээр хэвлэгдсэн) гэрчүүдийн гэрчлэлийг багтаах ёстой байв. Гэвч Сүмийн зарим удирдагч гэрчлэхдээ хойрго байсны зэрэгцээ зарим нь хэлний талаар санаа зовж, сайжруулахыг хүссэн.

Саад бэрхшээлүүдийн жагсаалтад “хэл”-ийг нэмэх талаар бодож үз. Өнөөгийн өсвөр үеийнхэнд ийм байдал тулгардаг эсэхийг асуу.

Сургаал ба Гэрээ 67:1–5-ыг уншаад, Их Эзэн эдгээр ахад юу гэж хэлснийг олж мэд.

• Тэдэнд яагаад үүнийг хэлсэн гэж та нар бодож байна вэ?

• Эдгээр шүлгээс та нар сайн мэдээний ямар үнэнийг тодорхойлох вэ?

  Суралцагчдад Их Эзэн бидний залбирлыг сонсдог, бидний зүрх сэтгэлийг мэддэг, бидний эрэлхийлдэг үнэний талаарх гэрчлэлийг бидэнд өгч чадна гэсэн үнэнийг олж тогтооход тусал.

• Энэ үнэн нь гэрчлэл эрэлхийлж байгаа эсвэл гэрчлэлтэй болж чадахгүй байгаа хүнд хэрхэн тусалж чадна гэж та нар бодож байна вэ?

• Яагаад “[бидний] зүрх сэтгэлд байгаа айдас” (Сургаал ба Гэрээ 67:3) биднийг адислал хүлээн авахад саад болж магадгүй гэж та нар бодож байна вэ?

• 5-р шүлэгт Их Эзэн Иосеф Смитийн талаар юу гэж хэлсэн бэ? Хэдийгээр бошиглогч төгс, уран яригч байгаагүй ч “түүний хэлнээс илүү дээр илэрхийлэхийг” оролдох нь яагаад мэргэн бус хэрэг вэ? (Сургаал ба Гэрээ 61:5)

Их Эзэний тусламжтай саад бэрхшээлийг даван туулах

Их Эзэн бидний зүрх сэтгэлийг мэддэг бөгөөд гэрчлэлд маань саад учруулдаг бэрхшээлийг даван туулахад бидэнд тусалж чадна. Энэ тохиолдолд Их Эзэн Сүмийнхээ ахлагчдад Иосеф Смитийн хүлээн авсан илчлэлтүүдийн талаарх “үнэний гэрчлэлийг” (4-р шүлэг) хүлээн авахад туслах сорилгыг өгчээ.

Хэрэв таны суралцагчид сорилгод дуртай бол дараах үйл ажиллагааг таавар таах хэлбэрээр явуулж болно. Тэднийг шүлгийг анхааралтай уншаад, судраа хааж, дараах асуултуудад хариулахыг оролдоход урь.

Сургаал ба Гэрээ 67:6–9-ийг уншаад, Их Эзэний өгсөн сорилгыг олж мэд.

• Тэд ямар төрлийн илчлэлтийг сонгох ёстой байсан бэ? (6-р шүлгийг үзнэ үү.)

• Тэд ямар хүнийг сонгох ёстой байсан бэ? (6-р шүлгийг үзнэ үү.)

• Энэ хүнийг юу бичихэд урьсан бэ? (7-р шүлгийг үзнэ үү.)

• Тэд амжилттай хийж чадсан бол юу болох вэ? (7-р шүлгийг үзнэ үү.)

• Тэд чадахгүй бол юу болох вэ? (8–9-р шүлгийг үзнэ үү.)

  Дараа нь юу болсныг олж мэдэхийн тулд та 2021 оны 6-р сарын “Өсвөр үеийнхний бат бөх байдлын төлөө” сэтгүүлээс “The Prophet’s Words Are True” гэсэн зурагт дүрслэлийг хэвлэж эсвэл үзүүлээд, тэднийг уншихад урьж болно. Эсвэл саяхан Сүмд хөрвөсөн 25 настай сургуулийн багш Виллям Маклеллин бүлгийнхээ “хамгийн мэргэн” (6-р шүлэг) хүнээр нэрлэгдэж, Их Эзэний сорилгыг явуулах болсон гэдгийг тайлбарла. Түүнийг бичиж дуусахад бичсэн зүйл нь Их Эзэнээс ирээгүй гэдгийг бүгд ойлгов.

• Эдгээр ах энэ туршлагаас ямар сургамж авсан гэж та нар бодож байна вэ?

  Суралцагчдыг хариулах үед та 9-р шүлгийг харахад урьж болно. Мөн ахлагчдаас олон нь Зарлигуудын Ном дахь илчлэлтүүдийн үнэн зөвийг албан ёсоор гэрчилж, баримт бичигт гарын үсэг зурсан гэдгийг тайлбарлаж болно.

• Их Эзэн тэднийг мэддэг бөгөөд гэрчлэлд нь тусалж чадна гэдгийг энэ туршлага хэрхэн харуулж байна вэ?

Тэд өөрсдийгөө “атаа жөтөө хийгээд, айдсаас ангид байлгаж, мөн миний өмнө [өөрсдийгөө] даруусгахын хэрээр” (Сургаал ба Гэрээ 67:10) Их Эзэн тэдэнд илүү агуу сүнслэг туршлагуудыг амласан.

Энэ үнэн өнөөдөр хэрхэн хэрэгжиж байна вэ?

Их Эзэн бошиглогчдоор дамжуулан бидэнд ярьдаг, Сургаал ба Гэрээ нь Их Эзэний үг гэдэгт та нарын таньдаг хэн нэгэн итгэж чадахгүй байгаа гэж төсөөл.

Суралцагчид хүсвэл самбар дээр жагсаасан саад бэрхшээлүүдээс нэгийг нь сонгоод, тухайн хүн гэрчлэл хүлээн авахын тулд энэ саадыг даван туулах хэрэгтэй гэсэн дэлгэрэнгүй мэдээллийг жишээндээ нэмж болно. Дараа нь та дараах зааврыг хуваалцаж эсвэл харуулж болно.

Дараах зүйлсийг хийснээр энэ хүнд хэрхэн тусалж болох талаар бод.

1. Их Эзэн бидний залбирлыг сонсдог, бидний зүрх сэтгэлийг мэддэг, Тэр бошиглогчид болон Сургаал ба Гэрээний тухай гэрчлэлийг бидэнд өгч чадна гэдгийг ойлгуулахын тулд юу гэж хэлэхээ бич. Боломжтой бол эдгээр үнэнийг гэрчлэх хувийн эсвэл ойр дотнын хүмүүсийнхээ туршлагыг оруулж болно.

2. Бошиглогчид болон Сургаал ба Гэрээний талаарх гэрчлэлээ нэмэгдүүлэхийн тулд бид юу хийж болохыг хуваалцахдаа судар, судрын түүхүүд эсвэл өөрийн туршлагыг ашигла (зарим жишээнд Сургаал ба Гэрээ 1:37–38; 21:4–6; Моронай 10: 4-5 орно). Эдгээр үйлдлийн маань төлөө Их Эзэн биднийг хэрхэн адисалж болохыг хуваалц.

Хэдэн суралцагчийг бэлтгэсэн зүйлээ хуваалцахад урь. Тэдний ойлголт, туршлагад таларх.

Их Эзэн бошиглогчдоор дамжуулан ярьдаг, Сургаал ба Гэрээ нь үнэн гэсэн гэрчлэлээ тунгаан бодоход урьснаар хичээлээ дуусга. Их Эзэн тэдний залбирлыг сонсож, зүрх сэтгэлийг нь мэддэг ба гэрчлэлтэй болоход нь тусалж чадна гэдгийг гэрчил. Энэ хичээлийн туршид хүлээн авсан сүнслэг нөлөөгөө бичихэд тэднийг урь.

Нэмэлт эх сурвалж

Иосеф Смит энэ явдлын талаар юу бичиж үлдээсэн бэ?

Бошиглогч ийнхүү тэмдэглэжээ.

Өндөр боловсрол эзэмшсэндээ өөрийгөө хамгийн ухаантай хүн гэж бодож явсан Виллям Э.Маклеллин Их Эзэний хамгийн бага зарлигийг бичих гэж чармайсан боловч бүтэлгүйтэв. Их Эзэний нэрээр бичнэ гэдэг бол туйлын хүнд үүрэг хариуцлага. Ахлагчид болон тэдэнтэй хамт байсан бүх хүн Есүс Христийн хэлийг дуурайх гэж дэмий оролдлого хийж буй хүнийг хараад, сайн мэдээний бүрэн байдалд төдийгүй Сүмд Их Эзэний надаар дамжуулан өгсөн зарлигууд болон илчлэлтүүдийн үнэнд итгэх итгэлээ шинэчилсэн бөгөөд ахлагчид тэдгээрийн үнэнийг бүх дэлхийд гэрчлэх хүсэлтэй байгаагаа хэлсэн юм. (Joseph Smith, in History of the Church, 1:226)

Сургаал ба Гэрээ 67:3. Бидний айдас бидэнд хэрхэн нөлөөлж болох вэ?

Арван хоёр төлөөлөгчийн чуулгын ахлагч Дийтр Ф.Угдорф ийн заасан.

Бид хатуу чанга бөгөөд заавал дагах зарим шаардлагыг эс дагавал Бурхан бидэнд бүх адислалаа өгөхөөс татгалзаж, үүнийгээ тэнгэрт нэгэн том үүлэн дотор хадгалж, цоожилсон байдаг гэж төсөөлдөгт л бидний асуудал байна гэж би боддог. Үнэн хэрэгтээ, Тэнгэрлэг Эцэг адислалуудыг бидэн дээр үргэлж хальтал асгадаг ч тэдгээрийг ирэхээс өмнө айдас, эргэлзээ, нүглүүд маань яг л шүхэр шиг хааж байдаг. (Дийтр Ф.Угдорф, “Сайн мэдээний дагуу аз жаргалтай амьдрах нь,” 2014 оны 10-р сарын Ерөнхий чуулган, 143)

Арван хоёр төлөөлөгчийн чуулгын ахлагч Дэвид А.Бэднар бид айдсаа хэрхэн даван туулах талаар ийн заасан.

Бид Их Эзэний “Санаа бодол болгондоо над уруу харагтун; бүү эргэлз, бүү ай” (С ба Г 6:36) гэсэн зааврыг дагаснаар айдсаа ялж, итгэлээ хүчирхэгжүүлэх адислалаар адислагдаж чадна. (Дэвид А.Бэднар, “Тиймийн тул тэд айдсаа дарав,” 2015 оны 4-р сарын Ерөнхий чуулган)

Бусдын төгс бус байдлыг анзаарвал би яах ёстой вэ?

Арван хоёр төлөөлөгчийн чуулгын ахлагч Жэффри Р.Холланд ийн хэлсэн.

Ах, эгч нар аа, Есүсийг эс тооцвол бидний аялж буй энэ газар дэлхийн аянд алдаа мадаг, өө сэвгүй гүйцэтгэл байхгүй учраас бид энэ мөнх бус байдалд зан авир судлаачдын “төгс байх хор уршигтай үзэл” гэж нэрлэдэг зүйлийн араас хөөцөлдөх биш харин мөнх бус дэлхий дээр тасралтгүй сайжрахыг хичээцгээе. Бид өөрсдийгөө төдийгүй бусад хүнийг, дээрээс нь Сүмд үйлчлэхээр дуудагдсан хүн бүрийг төгс байх ёстой гэсэн хэтрүүлсэн бодол тээхээс зайлсхийх ёстой. Бид бүгд хаа нэгтээ үйлчлэхээр дуудагддаг учраас дуудлагатай хүмүүс гэдэг нь хожмын үеийн гэгээнтнүүдийн хувьд бүх хүн гэсэн үг юм. (Жэффри Р.Холланд, “Тиймээс та нар эцэст нь төгс бай,” 2017 оны 10-р сарын Ерөнхий чуулган, 28)

Нэмэлт суралцах үйл ажиллагаа

Бурханы бошиглогчдын талаарх ойлголт

Ахлагчид илчлэлтийн хэлний талаар санаа зовж байсан гэдгийг дэлгэрэнгүй ярилцах нь тустай байвал дараах дүрслэл бүхий хичээлийг ашиглах талаар бодож үз. Уран зураг гэх мэт гоё сайхан зүйлийг үзүүлээд, таалагдахгүй байгаа зүйлээ хэлэхийг суралцагчдааc хүс.

• Аливаа зүйлийн дутагдалд анхаарлаа төвлөрүүлэхэд юу тохиолддог вэ?

Бошиглогчийг хэл яриа, төгс бус байдлаар нь шүүх нь ямар аюултай талаар ярилцахад суралцагчдыг урамшуул. Бид “түүний хэлээс илүү дээр илэрхийлж” чадна гэж бодох нь ямар аюултай вэ? (Сургаал ба Гэрээ 67:5).

Суралцагчдад бошиглогчийн талаар мэдэрч буй мэдрэмжээ дотроо дүгнэх нь тустай байж магадгүй.

Даруу байхын ач холбогдол

Виллям Маклеллин илчлэлт бичих гэж оролдсон талаар судалсны дараа тэднээс энэ туршлага нь ахлагчдыг хэрхэн даруусгасныг асуух нь тустай байж болох юм.

Суралцагчдаар Сургаал ба Гэрээ 67:10, 14-ийг уншуулж, хэрэв тэд даруу байдлаа өсгөвөл Их Эзэн ямар адислалуудыг амласан болохыг олж мэдэхэд урь.

Суралцагчид Судруудын удирдамж эсвэл Topical Guide-аас даруу байдлын талаар судалж, гэрчлэл эрэлхийлэхдээ даруу байх нь яагаад чухал гэж бодож байгаагаа хуваалцаж болно.

Сургаал ба Гэрээ 68:1–5

Аврагч бидний төлөө юу хүсдэгийг хэрхэн мэдэх тухай хуваалцахад урь.

1831 оны 11-р сарын 1-нд болсон чуулганы үеэр номлогчоор удахгүй дуудагдах дөрвөн ахлагч Иосеф Смиттэй уулзаж, өөрсдийн талаарх Их Эзэний хүслийг мэдэхийг хүсжээ. Хариуд нь Их Эзэн сайн мэдээг номлох загварыг илчилсэн юм. Суралцагчдыг Сургаал ба Гэрээ 68:1–5-ыг уншаад, уг загварын бүрдлийг олж мэдэхэд урь. Үлгэр жишээ гэдэг нь загвар, хэв маяг гэсэн утгатай болохыг мэдэх нь тустай байж болно.

• 3-5-р шүлэгт Их Эзэн үйлчлэгчдэдээ ямар амлалт өгсөн бэ?

• Номлогчдыг хүлээн авдаг хүмүүст номлогчдын сүнслэгээр өдөөгдсөн үгс яаж нөлөөлөх вэ?

Суралцагчид өөр үгс хэрэглэж болох ч тэд дараах зарчмыг тодорхойлох ёстой. Ариун Сүнсээр Их Эзэний үйлчлэгчдийг хөдлөх үед тэдний үгс хүмүүсийг аврал руу удирдан чиглүүлэх болно.

Сайн мэдээг номлохоор томилогдсон хүмүүс үнэний талаар гэрчлэлтэй болоход нь хүмүүст тусалж чадах боловч зөвхөн Сүмийн ерөнхийлөгч Сүмийн өмнөөс Их Эзэний хүслийг хүлээн авч мөн тунхаглах эрх мэдэлтэй гэдгийг тайлбарла. Түүний удирдлаган доор Тэргүүн зөвлөлийн гишүүд болон Арван хоёр төлөөлөгчийн чуулгын гишүүд бидний талаарх Бурханы хүслийг тунхаглах эрх мэдэлтэй юм.

Энэ зарчим өнөөдөр бидэнд хэрхэн хэрэгжиж болох тухай ярилц.