Lesson 80: Doktrina at mga Tipan 67–70

Doktrina at mga Tipan 67

Isang Patotoo sa Katotohanan

Maraming lider ng Simbahan ang sumuporta sa paglalathala ng mga paghahayag na natanggap at naunawaan ni Propetang Joseph Smith na nagmula ang mga ito sa Diyos. Ang iba naman ay nagtuon sa mga kakulangan na nakita nila sa mga paghahayag at, dahil dito, pinag-alinlanganan nila na nagmula ang mga ito sa Panginoon. Ang lesson na ito ay makatutulong sa mga estudyante na madagdagan ang tiwala nila na nangungusap sa atin ang Panginoon sa pamamagitan ng mga propeta at na ang Doktrina at mga Tipan ay Kanyang salita.

Mga Posibleng Aktibidad sa Pag-aaral

Isang patotoo

Humanap ng paraan para matulungan ang mga estudyante na pag-isipan ang kanilang patotoo sa mga katotohanan ng ebanghelyo na may kaugnayan sa plano ng Ama sa Langit. Maaari nilang gawin ang sumusunod na aktibidad sa pisara o sa kanilang study journal.

Gumuhit ng stick figure sa isang bahagi ng pisara. Sa kabilang bahagi, ilista ang iba’t ibang aspeto ng plano ng Ama sa Langit na maaaring kailanganin ng isang tao para magkaroon ng patotoo tungkol dito. Maaari ka ring magpakita ng mga larawan na kumakatawan sa mga aspeto ng plano ng Ama sa Langit, tulad ng larawan ni Jesucristo, ng kasalukuyang propeta, o ng mga banal na kasulatan. Pumili ng ilan sa mga aspetong ito at sabihin sa mga estudyante na talakayin ang sumusunod.

• Bakit makatutulong na magkaroon ng patotoo tungkol sa mga aspetong ito ng plano ng Ama sa Langit?

• Ano ang ilang balakid na maaaring makahadlang sa pagpapalakas ng patotoong ito?

Habang nagbabahagi ang mga estudyante, maaari mong ilista ang mga balakid sa pagitan ng stick figure at ng listahan ng mga bagay na dapat ay may patotoo tayo sa ating buhay.

Pagkatapos ng talakayan, maaari mong sabihin sa mga estudyante na isipin ang sarili nilang patotoo tungkol sa iba’t ibang bahagi ng plano ng Ama sa Langit. Sabihin sa kanila na alamin ang mga katotohanan sa lesson na makatutulong sa kanila na matamo o mapalakas ang kanilang patotoo.

Paano magtamo at magpalakas ng patotoo

Upang matulungan ang mga estudyante na maunawaan ang konteksto ng bahagi 67, maaari mong ibahagi ang ilang detalye mula sa sumusunod na talata.

Sa pagtatapos ng 1831, si Joseph Smith ay nagkaroon ng koleksiyon ng mga paghahayag mula sa Panginoon, ngunit kakaunting tao lamang ang may kopya ng mga ito. Inihayag ng Panginoon na kailangan nilang ilathala ang mga ito sa isang aklat. Tulad ng Aklat ni Mormon, ang Book of Commandments (na inilathala kalaunan bilang Doktrina at mga Tipan) ay dapat kabilangan ng mga patotoo mula sa mga saksi. Gayunman, may ilang lider ng Simbahan na nag-atubiling magpatotoo; may mga alalahanin sila sa ilan sa wika at nais nilang ayusin pa ito.

Maaari mong idagdag ang “wika” sa listahan ng mga balakid. Itanong kung may anumang paraan na maiuugnay ang mga ito sa mga kabataan ngayon.

Basahin ang Doktrina at mga Tipan 67:1–5, at alamin kung ano ang sinabi ng Panginoon sa mga taong ito.

• Sa iyong palagay, bakit kailangan nilang marinig ito?

• Anong katotohanan ng ebanghelyo ang matutukoy mo sa mga talatang ito?

  Habang nagbabahagi ang mga estudyante, tulungan silang matukoy ang katotohanang tulad nito: Dinidinig ng Panginoon ang ating mga panalangin, nalalaman Niya ang nilalaman ng ating puso, at makapagbibigay Siya sa atin ng patotoo tungkol sa katotohanang hinahanap natin.

• Sa iyong palagay, paano ito makatutulong sa atin kapag naghahangad o nahihirapan tayong magkaroon ng patotoo?

• Sa iyong palagay, bakit maaaring makahadlang sa atin ang “takot sa [ating] mga puso” (Doktrina at mga Tipan 67:3) sa pagtanggap natin ng mga pagpapala?

• Sa talata 5, ano ang kinilala ng Panginoon tungkol kay Joseph Smith? Bagama’t hindi perpekto o matatas ang Propeta, bakit maaaring hindi makabubuting “makapagpahayag nang mas higit kaysa sa kanyang wika”? (Doktrina at mga Tipan 67:5).

Pagdaig sa mga balakid sa tulong ng Panginoon

Alam ng Panginoon ang ating puso at matutulungan Niya tayong madaig ang mga balakid sa ating patotoo. Sa pagkakataong ito, nagbigay ang Panginoon ng hamon sa mga elder ng Kanyang Simbahan upang matulungan silang tumanggap ng “patotoo sa katotohanan” (talata 4) ng mga paghahayag na natanggap ni Joseph Smith.

Kung nais ng mga estudyante mo ng isang hamon sa kanilang kakayahan, maaaring ibigay ang sumusunod na aktibidad bilang isang quiz. Anyayahan sila na basahing mabuti ang mga talata at pagkatapos ay isara ang kanilang mga banal na kasulatan at subukang sagutin ang mga sumusunod na tanong.

Basahin ang Doktrina at mga Tipan 67:6–9, at hanapin ang mga detalye ng hamon ng Panginoon.

• Anong uri ng paghahayag ang dapat nilang piliin? (Tingnan sa talata 6.)

• Anong klaseng tao ang dapat nilang piliin? (Tingnan sa talata 6.)

• Ano ang ipinasulat sa taong ito? (Tingnan sa talata 7.)

• Ano ang mangyayari kung magtatagumpay sila? (Tingnan sa talata 7.)

• Ano ang mangyayari kung mabibigo sila? (Tingnan sa talata 8–9.)

  Para matuklasan ang sumunod na nangyari, maaari mong i-print o ipakita ang iginuhit na paglalarawan ng “Ang mga Salita ng Propeta ay Totoo” mula sa magasing Para sa Lakas ng mga Kabataan, Hunyo 2021 at ipabasa ito sa mga estudyante. O kaya, maaari mong ipaliwanag na si William McLellin, isang 25 taong gulang na guro sa paaralan at bagong binyag sa Simbahan, ang itinalaga ng grupo bilang “pinakamarunong” (talata 6) at tinanggap niya ang hamon ng Panginoon. Nang matapos siya, natukoy ng lahat na ang isinulat niya ay hindi mula sa Panginoon.

• Ano sa palagay mo ang ilan sa mga aral na natutuhan ng mga lalaking ito mula sa karanasang ito?

  Sa pagsagot ng mga estudyante, maaari mo silang anyayahang rebyuhin ang talata 9. Maaari mo ring ipaliwanag na marami sa mga elder ang lumagda sa isang dokumento na nagbibigay ng kanilang pormal na patotoo tungkol sa katotohanan ng mga paghahayag sa Book of Commandments.

• Paano ipinapakita ng karanasang ito na kilala sila ng Panginoon at makatutulong Siya sa kanilang mga patotoo?

Patuloy na nangako ang Panginoon ng mga mas dakilang espirituwal na karanasan sa mga lalaking ito kung “[aalisan nila ang kanilang] sarili ng mga inggit at takot, at [magpapakumbaba ng kanilang] sarili sa harapan ko” (Doktrina at mga Tipan 67:10).

Paano naaangkop ang katotohanang ito ngayon

Isipin kunwari na may kakilala ka na nahihirapang maniwala na nangungusap sa atin ang Panginoon sa pamamagitan ng mga propeta at na ang Doktrina at mga Tipan ay salita ng Panginoon.

Kung gusto ng mga estudyante, maaari silang magdagdag ng mga detalye sa sitwasyon sa pamamagitan ng pagpili ng isa sa mga balakid na nakalista sa pisara at pagmumungkahi na kailangan itong madaig ng tao para makatanggap ng patotoo. Pagkatapos ay maaari mong ibahagi o ipakita ang mga sumusunod na tagubilin.

Isipin kung paano mo matutulungan ang taong ito sa pamamagitan ng paggawa ng mga sumusunod:

1. Isulat ang sasabihin mo para matulungan siyang malaman na dinidinig ng Panginoon ang ating mga panalangin, nalalaman Niya ang ating puso, at makapagbibigay Siya sa atin ng patotoo tungkol sa mga propeta at sa Doktrina at mga Tipan. Kung posible, maaari mong isama ang anumang personal na karanasan, o karanasan ng mga taong malapit sa iyo, na nagpapatotoo sa mga katotohanang ito.

2. Gamitin ang mga banal na kasulatan, mga kuwento sa banal na kasulatan, o ang sarili mong mga karanasan para magbahagi ng ilang bagay na magagawa natin para madagdagan ang ating patotoo tungkol sa mga propeta at sa Doktrina at mga Tipan (kabilang sa ilang halimbawa ang Doktrina at mga Tipan 1:37–38; 21:4–6; Moroni 10:4–5). Ibahagi kung paano tayo mapagpapala ng Panginoon sa paggawa ng mga ito.

Anyayahan ang iba’t ibang estudyante na ibahagi ang isinulat nila. Pasalamatan ang mga estudyante para sa kanilang mga ideya at karanasan.

Tapusin ang klase sa pag-anyaya sa mga estudyante na pagnilayan ang sarili nilang patotoo na nangungusap ang Panginoon sa pamamagitan ng mga propeta at na ang Doktrina at mga Tipan ay totoo. Magpatotoo na dinidinig ng Panginoon ang kanilang mga panalangin, nalalaman Niya ang kanilang mga puso, at matutulungan Niya sila na magkaroon ng patotoo. Sabihin sa kanila na isulat ang anumang inspirasyong natanggap nila sa buong lesson na ito.

Karagdagang Resources

Ano ang isinulat ni Joseph Smith tungkol sa pangyayaring ito?

Isinulat ng Propeta:

Si William E. McLellin, na pinakamarunong na tao, ayon sa sarili niyang palagay, maraming alam ngunit kulang sa pang-unawa, ay sumubok na sumulat ng kautusang katulad ng isa sa pinakamadali ng Panginoon, ngunit siya ay nabigo; napakalaking responsibilidad ang magsulat sa pangalan ng Panginoon. Ang mga Elder at lahat ng naroon na nakasaksi sa walang kabuluhang pagtatangkang ito ng isang tao na gayahin ang wika ni Jesucristo, ay nagpanibago ng kanilang pananampalataya sa kabuuan ng Ebanghelyo, at sa katotohanan ng mga kautusan at paghahayag na ibinigay ng Panginoon sa simbahan sa pamamagitan ko; at ang mga Elder ay nagpakita ng kahandaang patotohanan ang katotohanan nito sa buong mundo. (Joseph Smith, sa History of the Church, 1:226)

Doktrina at mga Tipan 67:3. Paano nakakaapekto sa atin ang ating takot?

Itinuro ni Elder Dieter F. Uchtdorf ng Korum ng Labindalawang Apostol:

Bahagi ng hamon sa atin, palagay ko, ay iniisip natin na lahat ng biyaya ng Diyos ay nakalagak sa isang malaking ulap sa langit, at hindi ito ibibigay sa atin maliban sa mahigpit na pagsunod sa mga itinakda Niyang gawin natin. … Sa katunayan, ang Ama sa Langit ay palaging nagbubuhos sa atin ng mga pagpapala. Ang ating takot, pagdududa, at kasalanan, ay parang isang payong na sinasangga ang pagbagsak ng mga pagpapalang ito sa atin. (Dieter F. Uchtdorf, “Masayang Ipinamumuhay ang Ebanghelyo,” Liahona, Nob. 2014, 121–22)

Itinuro ni Elder David A. Bednar ng Korum ng Labindalawang Apostol kung paano natin madadaig ang ating mga takot:

Mapagpapala tayong magapi ang ating takot at mapatatag ang ating pananampalataya kapag sinunod natin ang tagubilin ng Tagapagligtas: “Isaalang-alang ako sa bawat pag-iisip; huwag mag-alinlangan, huwag matakot” (D&T 6:36). (David A. Bednar, “Anupa’t Nabawasan ang Kanilang Pagkatakot,” Liahona, Mayo 2015, 48)

Ano ang dapat kong gawin kapag napansin ko ang mga kakulangan ng iba?

Sinabi ni Elder Jeffrey R. Holland ng Korum ng Labindalawang Apostol:

Kayo Nga’y Mangagpakasakdal—Sa Wakas

Itinuro ni Elder Holland na bilang pagsunod sa utos na magpakasakdal, hindi tayo dapat panghinaan ng loob bagkus ay magsumigasig na makamit ang mithiin sa kawalang-hanggan.

Mga kapatid, maliban kay Jesus, walang hindi nagkasala sa paglalakbay sa buhay na ito, kaya habang tayo ay nasa mortalidad, pagsikapan nating patuloy na magpakabuti pa at iwasan ang sinasabi ng mga behavioral scientist na “toxic perfectionism” o obsesyon na maging perpekto. Huwag nating asahan ang bagay na iyan sa ating sarili, sa iba, at idaragdag ko, sa mga yaong tinawag na maglingkod sa Simbahan—na para sa mga Banal sa mga Huling Araw ay nangangahulugang lahat ng tao, sapagkat tinawag tayong lahat na maglingkod saanman. (Jeffrey R. Holland, “Kayo Nga’y Mangagpakasakdal—Sa Wakas,” Liahona, Nob. 2017, 42)

Mga Karagdagang Aktibidad sa Pag-aaral

Mga pananaw ng mga propeta ng Diyos

Kung makatutulong na talakayin pa ang mga alalahanin ng mga elder sa wika ng mga paghahayag, maaari mong gamitin ang sumusunod na object lesson: Magpakita ng isang bagay na maganda, tulad ng isang painting, ngunit sabihin sa mga estudyante na tukuyin ang anumang ayaw nila dito.

• Ano ang mangyayari kapag nakatuon tayo sa mga kakulangan ng isang bagay?

Hikayatin ang mga estudyante na talakayin ang mga posibleng panganib ng paghatol sa propeta batay sa kanyang wika at mga kakulangan. Ano ang mapanganib sa pag-iisip na maaari tayong “makapagpahayag nang mas higit kaysa sa kanyang wika”? (Doktrina at mga Tipan 67:5).

Maaaring makabubuti sa mga estudyante na tahimik na i-assess ang kanilang nadarama tungkol sa propeta.

Ang kahalagahan ng pagpapakumbaba

Matapos pag-aralan ng mga estudyante ang tungkol sa pagtatangka ni William McLellin na sumulat ng paghahayag, makatutulong na itanong sa mga estudyante kung paano naging mapagpakumbaba ang mga elder dahil sa karanasang ito.

Sabihin sa mga estudyante na basahin ang Doktrina at mga Tipan 67:10, 14 para makita kung anong mga pagpapala ang ipinangako ng Panginoon kung daragdagan nila ang kanilang pagpapakumbaba.

Maaaring pag-aralan ng mga estudyante ang pagpapakumbaba sa Gabay sa mga Banal na Kasulatan at ibahagi kung bakit sa palagay nila ay mahalaga ang pagiging mapagpakumbaba kapag naghahangad ng patotoo.

Doktrina at mga Tipan 68:1–5

Sabihin sa mga estudyante na ibahagi kung paano natin malalaman ang kalooban ng Panginoon para sa atin.

Ipaliwanag na sa isang kumperensya na ginanap noong Nobyembre 1, 1831, apat na elder, na magiging mga missionary kalaunan, ang lumapit kay Joseph Smith at humiling na malaman nila ang kalooban ng Panginoon hinggil sa kanila. Bilang tugon, inihayag ng Panginoon ang isang huwaran para sa pangangaral ng ebanghelyo. Sabihin sa mga estudyante na basahin ang Doktrina at mga Tipan 68:1–5, at hanapin ang mga elemento ng huwarang iyon. Maaaring makatulong na malaman na ang salitang halimbawa ay isang huwaran o modelo.

• Sa talata 3–5, ano ang ipinangako ng Tagapagligtas sa Kanyang mga tagapaglingkod?

• Ano ang magagawa ng mga inspiradong salita ng mga missionary para sa mga taong tatanggap sa mga ito?

Maaaring iba-ibang salita ang gamitin ng mga estudyante, ngunit dapat nilang matukoy ang sumusunod na alituntunin: Kapag ang mga tagapaglingkod ng Panginoon ay pinakikilos ng Espiritu Santo, ang kanilang mga salita ay aakay sa mga tao tungo sa kaligtasan.

Ipaliwanag na bagama’t ang mga inordenan na mangaral ng ebanghelyo ay makatutulong sa mga tao na magkaroon ng patotoo sa katotohanan, tanging ang Pangulo ng Simbahan ang may karapatang tumanggap at magpahayag ng kalooban ng Panginoon para sa buong Simbahan. Sa kanyang pamamahala, ang iba pang mga miyembro sa Unang Panguluhan at ang mga miyembro ng Korum ng Labindalawang Apostol ay may awtoridad din na ipahayag ang kalooban ng Diyos para sa atin.

Talakayin kung paano maiaangkop ang alituntuning ito sa atin ngayon.