Lesson 81: Doktrina at mga Tipan 67–70

Doktrina at mga Tipan 68:25–31

Pagtuturo at Pag-aaral ng Ebanghelyo sa Tahanan

Ang pag-aaral ng ebanghelyo ni Jesucristo ay tumutulong sa paghahanda sa mga bata na harapin ang mga hamon at tukso sa buhay nang may pananampalataya sa Tagapagligtas. Ang mga magulang ay may natatanging potensyal na tulungan ang kanilang mga anak na matutuhan ang ebanghelyo. Ang lesson na ito ay makatutulong sa mga estudyante na mas maunawaan ang utos ng Panginoon sa mga magulang na ituro sa kanilang mga anak ang ebanghelyo sa tahanan.

Mga Posibleng Aktibidad sa Pag-aaral

Tulong sa ating mortal na paglalakbay

Maaari mong ipaalala sa mga estudyante na noong naparito tayo sa lupa, nawala sa atin ang ating alaala tungkol sa ating premortal na buhay sa piling ng ating Ama sa Langit. Bukod pa rito, naparito tayo sa mundong puno ng kasamaan na kinabibilangan ng mapanlinlang at mapanirang impluwensya ni Satanas. Ang mga katotohanang ito ay lumilikha ng mga hamon sa pamumuhay nang tapat sa plano ng Ama sa Langit.

• Ano ang ilang bagay na ibinigay ng Ama sa Langit para tulungan tayong malaman ang tungkol sa Kanya at makayanan ang mga hamon sa buhay?

  Maaari mong ilista ang mga sagot ng mga estudyante sa pisara. Kung hindi mababanggit ng mga estudyante, idagdag ang “mga magulang o tagapag-alaga” sa listahan.

• Paano ka napagpala ng alinman sa mga impluwensyang ito?

• Sa iyong palagay, bakit maaaring makaimpluwensya ang mga magulang o tagapag-alaga sa pagtulong sa mga anak na harapin ang mga hamon ng mortalidad?

Maaari mong ibahagi sa mga estudyante na pag-aaralan nila ngayong araw na ito ang isang scripture passage na naglalarawan sa mga responsibilidad ng mga magulang sa pagtulong sa mga anak na matutuhan ang ebanghelyo. Maging sensitibo sa katotohanan na ang bawat estudyante ay nagmula sa magkakaibang sitwasyon ng pamilya at na maaaring hindi kanais-nais ang sitwasyon sa tahanan ng ilang estudyante.

Alamin ang kalagayan ng bawat mag-aaral: Para sa karagdagang training para matutuhan kung paano maging sensitibo sa sitwasyon ng bawat estudyante, tingnan ang training na pinamagatang “Makita ang mga mag-aaral sa paraang nakikita sila ng Diyos” sa Mga Kasanayan para sa Pag-unlad ng Guro: Mahalin ang mga Tinuturuan Mo. Maaari mong praktisin ang kasanayang “Tumigil sandali, magnilay, at sagutin ang mga tanong natin sa ating sarili.”

Maaari mong ipaliwanag ang sumusunod:

Maraming iba’t ibang sitwasyon sa pamilya. Ang ilang tao, tulad ni Nephi, ay isinilang sa mga magulang na nagsisikap na turuan sila na sundin ang Tagapagligtas (tingnan sa 1 Nephi 1:1). Ang ilan, tulad ni Pangulong Russell M. Nelson o nina Elder David A. Bednar at Quentin L. Cook ng Korum ng Labindalawang Apostol, ay lumaki sa isa o dalawang magulang na hindi miyembro ng Simbahan o hindi aktibong nagsisimba. Ang iba, tulad ni Pangulong Dallin H. Oaks ng Unang Panguluhan, ay maagang nawalan ng magulang sa kanilang buhay. Ang ilang kabataan ay lumaki nang malayo sa kanilang mga magulang, tulad ni Moises (tingnan sa Exodo 2:10) at Samuel (tingnan sa 1 Samuel 1:24–28). At ang iba pa, tulad nina Abraham at Limhi, ay may magulang na walang tigil sa paghahangad na gumawa ng masama (tingnan sa Abraham 1:1–17, 27; Mosias 7:9; 11:1–5).

Sa iyong scripture journal, ilarawan ang sitwasyon ng iyong pamilya. Pagnilayan ang natututuhan mo mula sa iyong mga karanasan sa pamilya. Maaari mong isama ang nadarama mo tungkol sa pagiging magulang sa hinaharap at kung paano mo gugustuhing maging magulang.

Kung komportable ang mga estudyante, maaari nilang ibahagi ang ilan sa kanilang mga naisip.

Sabihin sa mga estudyante na isipin kung paano makatutulong sa kanila ang natutuhan nila ngayon na suportahan ang mga yaong nagsisikap na magturo sa kanila ng ebanghelyo ni Jesucristo, kabilang na ang mga magulang o tagapag-alaga. Maaari din nilang isipin kung paano nila maipamumuhay sa hinaharap ang mga natutuhan nila.

Ang iniutos ng Panginoon sa mga magulang na ituro sa kanilang mga anak

Habang nagtitipon para sa isang kumperensya sa Ohio, apat na lalaki ang humingi ng payo sa Panginoon sa pamamagitan ni Propetang Joseph Smith. Matapos magbigay ng ilang payo sa kalalakihang ito tungkol sa kanilang mga tungkulin, nagbigay ang Panginoon ng karagdagang pangkalahatang payo sa lahat ng pamilya na bahagi ng Sion.

Maaari mong isulat sa pisara ang hindi kumpletong pangungusap na Iniutos ng Panginoon na turuan ng mga magulang ang kanilang mga anak …. Pagkatapos ay maaaring magdagdag ang mga estudyante ng mga salita o parirala sa pahayag sa pisara kapag nakita nila ang mga ito sa mga sumusunod na talata. Bilang alternatibo, maaari mo ring sabihin sa mga estudyante na isulat ang pangungusap sa kanilang journal at ilagay ang kanilang mga sagot doon.

Basahin ang Doktrina at mga Tipan 68:25–31, at alamin ang iniutos ng Panginoon sa mga magulang na ituro sa kanilang mga anak.

Kapag nakumpleto na ng mga estudyante ang pangungusap gamit ang iba’t ibang alituntunin na nais ng Panginoon na ituro ng mga magulang, sabihin sa kanila na sagutin ang mga sumusunod na tanong:

• Kung ang mga tao ay walang ebanghelyo sa kanilang tahanan, ano ang iba pang paraan na inilaan ng Panginoon para matutuhan nila ang mga alituntuning ito?

• Sino ang nagturo sa iyo ng isa sa mga alituntunin sa mga talatang ito habang ikaw ay lumalaki? Naaalala mo pa ba noong tinuturuan ka nila nito? Kung oo, ano ang mga naaalala mo?

• Paano naapektuhan ng mga alituntunin sa mga talatang ito ang iyong buhay, o paano makakaapekto ang mga ito?

Maaaring pag-isipan ng mga estudyante kung paano nakatulong o makatutulong sa kanila ang mga turo mula sa tao o mga talatang iyon na madama ang pagmamahal ng Panginoon at ang Kanyang hangarin na matutuhan nila ang mga alituntuning ito.

Pagpapamuhay ng Doktrina at mga Tipan 68:25–31

Para mapag-isipan kung paano maaaring makatulong ang Doktrina at mga Tipan 68:25–31 sa mga teenager sa iba’t ibang sitwasyon, bigyan ang mga estudyante ng ilang sitwasyon na tatalakayin. Maaari kang gumamit ng mga sitwasyon at tanong na nasa ibaba o gumawa ng sarili mong mga tanong na makatutulong sa mga estudyante. Maaaring pag-isipan ng mga estudyante ang mga sitwasyong ito bilang isang klase, sa mga grupo, o nang mag-isa.

Aktibidad A

Isang binatilyo ang may mga magulang na nagsisikap na maging halimbawa ng pagsunod sa Tagapagligtas, ngunit madalas siyang magreklamo kapag inaanyayahan siya ng kanyang mga magulang na mag-aral ng mga banal na kasulatan o manalangin bilang pamilya. Kadalasan ay binabalewala niya ang mga ito o naglalaro siya sa kanyang telepono kapag sinusubukan nilang payuhan siya.

• Paano makatutulong sa kanya ang mga turo ng Panginoon sa Doktrina at mga Tipan 68:25–31 na maunawaan ang nadarama ng Panginoon sa pinagsisikapang gawin ng kanyang mga magulang?

• Anong mga banal na kasulatan ang maaaring gumabay sa kanya na tumugon nang mas mabuti sa sitwasyon? (Ang ilang halimbawa ay Efeso 6:1–3; Mosias 4:14–15; at ang halimbawa ng Tagapagligtas sa edad na 12 sa Lucas 2:51–52.)

• Ano ang ilang paraan na masusuportahan niya ang kanyang mga magulang? Paano magdudulot ng kaibhan sa kanyang pamilya ang mga kilos na ito?

Aktibidad B

Nagdiborsyo ang mga magulang ng isang dalagita. Hinahati niya ang kanyang oras sa kanilang dalawa. Pinagtatawanan ng kanyang ina ang Simbahan at hindi nito inaasahan na susundin ng kanyang anak ang mga turo ng ebanghelyo kapag nasa tahanan niya ito. Hinihikayat siya ng kanyang ama na ipamuhay ang ebanghelyo at aktibong dumalo sa mga aktibidad ng seminary, simbahan, at mga kabataan. Kung ikukumpara kapag kasama niya ang kanyang ina, pakiramdam niya ay mas mahigpit at mahirap ang buhay sa piling ng kanyang ama.

• Paano maaaring makatulong ang Doktrina at mga Tipan 68:25–31 sa paggabay sa dalagitang ito?

Basahin ang Exodo 20:12.

• Ano ang ilang paraan na maigagalang ng dalagitang ito ang kanyang mga magulang habang sumusunod pa rin sa Panginoon?

• Anong iba pang mga ideya, turo mula sa mga lider ng Simbahan, o mga karanasan ang maaaring makatulong sa kanya?

Aktibidad C

Isang binatilyo ang nakaranas ng matinding pagsubok sa kanyang kabataan at hindi na niya kasama ang kanyang mga magulang. Masakit para sa kanya na isipin ang mga ito.

• Paano maaaring makatulong sa binatilyong ito na pag-isipan kung sinong ibang tao ang ipinadala ng Panginoon para magturo sa kanya ng mga alituntuning nakalista sa Doktrina at mga Tipan 68:25–31?

• Paano matutulungan ng Doktrina at mga Tipan 68:25–31 ang binatilyong ito na maghanda para sa kanyang hinaharap?

Para matapos ang aktibidad na ito, pumili ng isang alituntunin sa Doktrina at mga Tipan 68:25–31 na iniutos ng Panginoon na ituro ng mga magulang, at pagkatapos ay maghanap ng isang talata sa mga banal na kasulatan na magagamit mo para maituro ang alituntuning iyon. Ibahagi kung paano makatutulong ang alituntuning ito sa mga kabataan ngayon.

Sabihin sa mga estudyante na ibahagi ang natutuhan nila. Maaaring makatulong na bigyan ang mga estudyante ng pagkakataong ibahagi ang kanilang sariling mga karanasan, tanong, o alalahanin na may kaugnayan sa pag-aaral ng ebanghelyo sa tahanan. Maaari mong pasagutan sa mga estudyante ang mga tanong o alalahanin ng kanilang mga kaklase gamit ang sources na itinalaga ng Diyos at ang sarili nilang mga karanasan.

Tulungan ang mga estudyante na maunawaan na anuman ang sitwasyon ng kanilang pamilya, nais ng Panginoon na magkaroon sila ng malalim at patuloy na pagbabalik-loob sa Kanya at sa Kanyang ebanghelyo sa pinakamainam na paraan na magagawa nila. Maaari mong anyayahan ang mga estudyante na maghangad ng personal na paghahayag tungkol sa kung paano nila maipamumuhay ang natutuhan nila. Maaaring ito ay sa pamamagitan ng pagsuporta sa kanilang mga magulang sa pagsisikap ng mga ito na gampanan ang responsibilidad na tulungan silang lumapit kay Jesucristo, pagpapahalaga sa ibang tao na inihanda ng Panginoon na magturo sa kanila ng mga alituntuning pinag-aralan ngayon, o paghahandang turuan ang sarili nilang mga anak sa hinaharap.

Karagdagang Resources

Paano nagsusumikap ang Simbahan na tulungan ang mga magulang sa responsibilidad nila na ituro ang ebanghelyo ni Jesucristo sa tahanan?

Itinuro ni Pangulong Russell M. Nelson:

Ang bagong integrated kurikulum na nakasentro sa tahanan at suportado ng Simbahan ay may potensyal na makalagan ang kapangyarihan ng pamilya, habang ang bawat pamilya ay tapat at maingat na ginagawang santuwaryo ng pananampalataya ang kanilang tahanan. Ipinapangako ko na habang masigasig ninyong ginagawang sentro ng pag-aaral ng ebanghelyo ang inyong tahanan, paglipas ng ilang panahon ang inyong mga araw ng Sabbath ay tunay na magiging kaluguran. Ang inyong mga anak ay magiging sabik na matutuhan at ipamuhay ang mga turo ng Tagapagligtas, at ang impluwensya ng kaaway sa inyong buhay at sa inyong tahanan ay mababawasan. Magkakaroon ng malaki at patuloy na mga pagbabago sa inyong pamilya. (Russell M. Nelson, “Pagiging Kapuri-puring mga Banal sa mga Huling Araw,” Liahona, Nob. 2018, 113)

Ano ang bumabalanse sa pagitan ng responsibilidad ng mga magulang na magturo at ng responsibilidad ng anak na matutuhan ang ebanghelyo?

Ibinahagi ni Elder David A. Bednar ng Korum ng Labindalawang Apostol ang sumusunod na ideya:

Ang ating determinasyong matuto at mamuhay ayon sa katotohanan ay lalong nagiging mahalaga sa mundo na “[n]agkakagulo” [Doktrina at mga Tipan 45:26] at lalo pang nagiging mas maligalig at masama. Hindi tayo maaaring umasa na sa simpleng pagdalo sa mga miting ng Simbahan at pakikilahok sa mga programa ay matatanggap natin ang lahat ng espirituwal na pag-unlad at proteksyon na magbibigay sa atin ng kakayahan na “mangakatagal sa araw na masama” [Efeso 6:13].

“Ang mga magulang ay may banal na tungkuling palakihin ang kanilang mga anak sa pagmamahal at kabutihan” [“Ang Mag-anak: Isang Pagpapahayag sa Mundo,” ChurchofJesusChrist.org]. Ang mga inspiradong lider, guro, at aktibidad ng Simbahan ay tumutulong sa mga indibiduwal at pamilya na nagsisikap umunlad sa espirituwal. At bagaman kailangan nating lahat ng tulong sa patuloy na paglalakad sa landas ng tipan, ang pangunahing responsibilidad para sa pagpapaunlad ng espirituwal na lakas at tibay ay nakasalalay sa bawat isa sa atin. …

Kung ang lahat ng nalalaman natin tungkol kay Jesucristo at sa Kanyang ipinanumbalik na ebanghelyo ay mula sa itinuturo o sinasabi sa atin ng ibang tao, ang saligan ng ating patotoo tungkol sa Kanya at sa Kanyang dakilang gawain sa mga huling araw ay nakatayo sa buhangin. Hindi tayo maaaring umasa o humiram lamang ng liwanag at kaalaman sa ebanghelyo mula sa ibang tao—maging sa mga taong minamahal at pinagkakatiwalaan natin. (David A. Bednar, “Handa na Matamo ang Bawat Kinakailangang Bagay,” Liahona, Mayo 2019, 102)

Mga Karagdagang Aktibidad sa Pag-aaral

Doktrina at mga Tipan 68:27. “Bibinyagan … pagsapit ng walong taong gulang.”

Kung nais ng mga estudyante na maunawaan kung bakit binibinyagan ang mga bata sa edad na walo, maaari mong ipabasa sa kanila ang Doktrina at mga Tipan 20:71 at 29:47. Maaari mong sabihin sa mga estudyante na ibahagi ang mga nalaman nila. Maaari mong sabihin sa mga estudyante na tukuyin ang parirala sa Doktrina at mga Tipan 29:47 na nagpapahiwatig na ang pananagutan ay isang proseso na higit pa sa isang pangyayari. Maaari mong itanong kung paano ipinapakita ng utos ng Ama sa Langit, na ihanda ng mga magulang ang kanilang mga anak para sa binyag pagsapit ng walong taong gulang, ang Kanyang pagmamahal sa mga bata.

Doktrina at mga Tipan 68:30–31. “May mga tamad sa kanila.”

Kung magiging mahalaga sa iyong mga estudyante na mas maunawaan ang konsepto ng pag-iwas sa katamaran, maaari mo silang anyayahang ibahagi ang mga pagpapalang nakita nila na nagmula sa kasipagan. Maaaring basahin ng mga estudyante ang Doktrina at mga Tipan 68:30–31 at tukuyin ang posibleng maging mga negatibong bunga ng katamaran. Maaari mong itanong sa mga estudyante kung ano ang maaaring makatulong sa isang tao para madaig ang ugaling maging tamad.

Paghahandang magturo sa magiging mga anak

Bagama’t ang mga talatang pinag-aralan sa lesson na ito ay isinulat para sa mga magulang, maaari ding iangkop ang mga ito sa mga estudyante na magiging mga magulang din balang-araw. Upang matulungan ang mga estudyante na pag-isipan ang ideyang ito, maaari mo silang anyayahang pumili ng isa sa mga alituntunin na dapat ituro ng mga magulang sa kanilang mga anak. Pagkatapos ay anyayahan silang gumawa ng maikling lesson tungkol sa alituntuning iyon na magagamit nila para turuan ang kanilang sariling anak.

Payo para sa mga anak

Ang isang paraan para matulungan ang mga estudyante na maunawaan ang utos ng Panginoon na turuan ng mga magulang ang mga anak ay sabihin sa mga estudyante na pag-isipan ang responsibilidad ng mga anak sa proseso ng pagkatuto. Para magawa ito, maaari mong sabihin sa mga estudyante na sumulat ng isang talata para masundan ang Doktrina at mga Tipan 68:28 na isinulat para sa mga anak. Sabihin sa mga estudyante na isama sa kanilang talata ang payo sa mga anak tungkol sa pagiging mga mag-aaral ng ebanghelyo sa tahanan.