82-р хичээл: Сургаал ба Гэрээ 71–75

Сургаал ба Гэрээ 71

Аврагчийн Сүмийг шүүмжилдэг хүмүүст хариулах

1831 оны өвөл Иосеф Смитийн тухай болон Сүмийн тухай худал мэдээлэл агуулсан захидлууд Көртланд даяар тархав. Сургаал ба Гэрээ 71-д Аврагч Иосеф Смит, Сидней Ригдон хоёрт уг нутаг даяар явж, худал хуурмаг мэдээллийг залруулахыг захижээ (1–2-р шүлгийг үзнэ үү). Энэ хичээл нь хүмүүсийг бидний итгэл үнэмшлийг шүүмжлэх үед Аврагч биднээс хэрхэн хариулахыг хүсдэгийг ойлгоход суралцагчдад тусалж чадна.

Боломжит суралцах үйл ажиллагаа

Аврагчийн Сүмийн талаарх шүүмжлэлд хариулах

Сургаал ба Гэрээ 71-ийн түүхэн нөхцөл байдлыг ойлгоход нь суралцагчдад туслахын тулд дараах догол мөрийг хуваалц эсвэл үүнийг өөрийн үгээр тоймлон ярь.

1831 оны өвөл Көртландын гэгээнтнүүд болон Иосеф Смитийн эсрэг хавчлага эрс нэмэгджээ. Хэд хэдэн гэгээнтэн Сүмийг орхисны дотор Эзра Бут, Саймондс Райдер нар байв. Бут Иосеф руу дайрч, Их Эзэний ажлыг нураахыг оролдсон захидлуудыг нийтэлж эхлэв (History, 1838–1856 [Manuscript History of the Church], volume A-1, 153–54, josephsmithpapers.org-ыг үзнэ үү). Иосеф Их Эзэнээс зөвлөгөө хүсэн, Сургаал ба Гэрээ 71-ийг хүлээн авчээ.

• Та нар Аврагчийн Сүм рүү болон Иосеф Смит рүү хандсан дайралтад хэрхэн хариулахыг хүсэх байсан бэ?

  Сүмийг эсвэл сайн мэдээг шүүмжлэхийг харсан жишээг хуваалцахад суралцагчдыг урь. Хүмүүсийг итгэл үнэмшилд нь таагүй хандах үед Аврагч тэднээс хэрхэн хариулахыг хүсдэг талаар тунгаан бодохыг тэднээс хүс. Суралцагчдыг дараах асуултуудад хариулах зуураа товч ярилцлага өрнүүлэхэд урь.

• Бусад хүнийг бидний итгэл үнэмшлийг шүүмжилж, Аврагчийн Сүмийн талаар худал мэдээлэл хуваалцах үед нөхцөл байдлыг шийдвэрлэх хамгийн сайн арга замыг бид хэрхэн мэдэх вэ?

• Ямар үед шүүмжлэлийг үл тоох нь дээр гэж бодож байна вэ?

Есүсийн та нарт өгөх хариултыг мэднэ гэдэгтээ хэр итгэлтэй байгаагаа тунгаан бод. Судалж байхдаа та Аврагч бидэнд хэрхэн хариулахыг заадаг янз бүрийн арга замуудыг олж мэд.

Аврагч бидэнд Түүний сайн мэдээг зоригтой ярьж, хуваалцахыг заадаг

Сургаал ба Гэрээ 71:1–3-ыг уншаад, Аврагч Иосеф, Сидней хоёроос тухайн үед Сүмийн талаар тараагдсан худал хуурмаг зүйлд хэрхэн хариулахыг хүссэнийг олж мэд.

• Та нарт юу нь онцгой санагдсан бэ?

• 1-р шүлэгт цэдэглэснээр Их Эзэн Иосеф, Сидней хоёрт хэрхэн хариулахад туслахын тулд ямар зүйлийг өгсөн бэ?

• Өнөө үед Аврагчийн зөвлөгөө бидэнд хэрхэн тусалж чадах вэ?

  Аврагч судрууд болон Сүнсээр дамжуулан бидэнд Өөрийнх нь Сүмийг шүүмжилдэг хүмүүст хэрхэн хариулахыг заана гэсэн үнэнийг олж тогтооход суралцагчдад тусал.

• Судруудыг ашиглах болон Сүнсний өдөөлтүүдийг дагах нь яагаад шүүмжлэлд хариулах хамгийн шилдэг арга гэж та нар бодож байна вэ?

• Шүүмжлэлд хэрхэн хариулахад маань Сүнсний нөлөө ямар байдлаар нөлөөлж болох вэ?

Нэг суралцагчийг самбарын дээд талд “Аврагчийн арга замаар хариулах” гэж бичихэд урих талаар бодож үз. Та мөн ангийнхнаар судлах тэмдэглэлийнх нь нэг хуудсан дээр энэ гарчгийг бичүүлж болно. Суралцагчид энэ гарчгийн доор “судруудыг ашиглах” болон “Сүнсийг дагах” гэж бичээд, жагсаалтыг эхлүүлж болно. Суралцагчид өөрсдийн үүсгэсэн жагсаалтыг ашигласнаар аливаа нөхцөл байдалд Аврагчийн арга барилаар хариулах дадлага хийх боломжтой болно.

Арван хоёр төлөөлөгчийн чуулгын ахлагч Нийл Л.Андэрсэн бусад хүн бидний итгэл үнэмшлийг шүүмжилж байгааг дүрслэхдээ галт сумны судрын бэлгэдлийг ашигласан. Та нар энэ мэдэгдлийг судлах явцдаа “Аврагчийн арга замаар хариулах” жагсаалтад юу нэмж болохыг бодож үз.

Есүс Христэд итгэх итгэлийн бамбайгаар бид дайсны бүх галт сумны галыг унтрааж, … амар тайвныг тогтоогчид болдог [Ефес 6:16; Сургаал ба Гэрээ 3:8-ыг үзнэ үү]. …

Амар тайвныг тогтоогч галт сумны галыг хэрхэн намжааж, унтраадаг вэ? Ямар ч л байсан биднийг дорд үзэх нэгний өмнө айн мэгдэж л лав биш. Харин бид итгэлдээ бат зогсож, итгэдэг зүйлсээ үнэмшилтэйгээр хуваалцахдаа ямагт уур уцааргүй, хорсолгүй байх юм. …

Амар тайвныг тогтоогчид бол үлбэгэр хүмүүс биш, тэд Аврагчийн арга замаар бусдыг ятгагчид.

Бидний хайрладаг үнэн рүү чиглэсэн галт сумны галыг бөхөөж, тайвшруулж, унтраах дотоод хүч чадлыг юу бидэнд өгдөг вэ? Энэ хүч Есүс Христэд болон Түүний үгэнд итгэх итгэлээр ирдэг. (Нийл Л.Андэрсэн, “Есүс Христийг дагах: Амар тайвныг тогтоогч байх нь,” Лиахона, 2022 оны 5-р сар, 18–19)

Суралцагчдыг ахлагч Андэрсэны мэдэгдлийг уншсаны дараа жагсаалтад юу нэмэх талаар ярилцахад урь. Та дараах асуултыг тавьж болно.

• Та нар бусдад хариулахдаа хэрхэн амар тайвныг тогтоогч байж чадах вэ?

Сургаал ба Гэрээ 71:4–7-г уншаад, Их Эзэн нийтлэгдсэн худал мэдээллийг арилгах энэхүү тодорхой нөхцөл байдалд Иосеф Смит, Сидней Ригдон хоёрт юу заасныг олж мэд.

• Та нар юу олж мэдсэн бэ?

• Эдгээр шүлэг дэх Аврагчийн зөвлөгөөг ахлагч Андэрсэны сургаалтай ямар холбоотой гэж та нар үзэж байна вэ?

Есүс Христийн жишээг онцол. Дараах үйл ажиллагаа нь Есүс Христийн жишээг онцлон харуулах боломж юм. Үүнд туслах илүү их дадлагыг Багшийн хөгжүүлбэл зохих ур чадвар: Есүс Христэд анхаарлаа төвлөрүүл гарын авлагын “Есүс Христийн үлгэр жишээг онцлох нь” сэдэвт сургалтаас үзнэ үү. “Суралцагчдад сурч байгаа зүйлээ Христ уг зарчмыг хэрхэн үлгэрлэн харуулсантай холбоход туслах” ур чадвараар дадлага хийх талаар бодож үз.

Суралцагчдад өөрсдийн итгэл үнэмшлийг хамгаалахад туслах Христийнхтэй адил олон хариултыг олж тогтооход туслахын тулд ангийг бүлэг болгон зохион байгуулаад дараах үйл ажиллагааг явуулахыг бодож үз.

Аврагч ба Түүний шавь нар шүүмжлэлд хэрхэн хариулсныг харуулсан жишээ эсвэл сургаалыг судраас олоход суралцагчдыг урамшуул. Суралцагчдад нэмэлт удирдамж хэрэгтэй бол та Аврагчийн туршлагыг дүрсэлсэн дараах судрын хэсгүүд болон судлах сургаалуудыг үзүүлж болно.

Суралцагчдыг олж мэдсэн зүйлээ бүлэгтэйгээ ярилцаад, дараа нь ангийнхантай мэдээлэл хуваалцах ахлагчийг сонгоход урь.

• Матай 4:3–11 (Есүс Сатаныг уруу татахад судраар хариулав.)

• Лук 23:8–10 (Есүс Херодын өмнө зогсоод, дуугүй байв.)

• Иохан 8:2–11 (Есүс иудейчүүдийн удирдагчидтай нүүр тулж, нэгэн эмэгтэйн амийг аврав.)

• Сургаал ба Гэрээ 100:5–7 (Их Эзэн бидэнд Өөрийнх нь нэрээр ярих юм бол хэлэх үгсийг маань өгнө гэж амласан.)

• Сургаал ба Гэрээ 121:41–45 (Их Эзэн хэрхэн засаж залруулах талаар зөвлөгөө өгсөн.)

Бүлгийн удирдагчдыг ярилцсан зүйлээ ангийнхантайгаа хуваалцаж, самбар дээрх тохирох хариултуудын жагсаалтад нэмэхэд урих талаар бодож үз. Хэлсэн зүйлийг илэн далангүй залруулахын оронд Сүнс биднийг чимээгүй байхад өдөөж болох үе байдгийг суралцагчдад сануул.

Аврагчийн арга барилаар хариулах дадлага хийх

Өнөөдрийн судалсан зарчмын талаар ойлгосон зүйлээ харуулахад нь суралцагчдад туслахын тулд та дараах жишээг өгч эсвэл үзүүлж болно. Бидний хариулж магадгүй янз бүрийн арга замыг ярилцах үед тэднийг өмнө нь үүсгэсэн жагсаалтаас санаа хайж олоход урамшуул. Нөхцөл байдал бүрд хариулах олон зөв арга зам байж болохыг тэдэнд ойлгуул. Аливаа нөхцөл байдал үүссэн үед Тэнгэрлэг Эцэгийн биднээс юу хийх, юу хэлэхийг хүсэж буйг мэдэхэд Сүнс бидэнд тусалж чадна.

Та ангийнхныхаа хэрэгцээнд илүү сайн тохирох өөр нөхцөл байдлыг зохиож эсвэл суралцагчдын сонирхлыг нэмэгдүүлэхийн тулд доорх жишээнд мэдээлэл нэмж оруулж болно. Та мөн ангийнхнаас хувийн туршлага дээрээ үндэслэн жишээ зохиохыг хүсэж болно. Суралцагчдыг урьд нь тохиолдсон туршлагаа хуваалцахад урих нь тохиромжтой байж магадгүй.

Дараах нөхцөл байдал бүрд Христийн адилаар хариулах хэд хэдэн арга замыг хуваалц.

• Чи олон нийтийн сүлжээнд ариун сүмийн зургийг нийтэлсэн ба хэн нэгэн ариун сүмд ороход өндөр шалгуур тавьдаг гэж Сүмийг шүүмжилжээ.

• Нэгэн гэр бүлийн цуглаан дээр авга ах нь бошиглогч Иосеф Смитийн талаар таагүй үг хэлэв.

• Найз чинь Бурхан байдаг гэдгийг баталж чадахгүй байж итгэх нь тэнэг хэрэг гэж хэлжээ.

• Ажлын газрын чинь нэг хүн хожмын үеийн гэгээнтнүүд бол Христэд итгэгчид биш гэж бусад ажилтанд ярьсан.

Аврагчийн тогтоосон цагт

Иосеф Смит, Сидней Ригдон хоёр хүлээн авсан илчлэлтдээ дуулгавартай байсан. Тэд уг нутгаар явж, Аврагчийн сайн мэдээг номлож, тархсан худал хуурмагийг залруулжээ.

Сургаал ба Гэрээ 71:8–11-ийг уншаад, Аврагчийн Сүмээ болон сайн мэдээг нь хамгаалдаг бүх хүнд өгсөн баталгааг олж мэд.

• Эдгээр шүлэгт Есүс Христ болон Түүний ажлын талаар та нарт юу зааж байна вэ?

• Бидний эсрэг ямар ч дуу хоолой, ямар ч зэвсэг амжилтад хүрэхгүй (9–10-р шүлгийг үзнэ үү) гэдэг нь юу гэсэн утгатай гэж та нар бодож байна вэ?

Суралцагчдад бусдад өгөх төгс хариулт байхгүй байлаа ч Аврагч Сүмийн эсрэг дайсагнагчдыг үүрд дэвжихийг зөвшөөрөхгүй гэдгийг ойлгуул. Аврагч шүүмжлэгчид “[Түүний] тогтоосон цагт мадлуулна” (10-р шүлэг) гэж амласан.

• Таньдаг хэн нэгэн чинь Сүмийг эсвэл Аврагчийн сургаалыг шүүмжилдэг нөхцөл байдлыг шийдвэрлэхэд туслах юуг та өнөөдөр сурсан бэ?

Сүмийг болон сайн мэдээг шүүмжилсэн нөхцөл байдалтай тулгарсан үедээ Аврагчийн зөвлөгөөг дагахад суралцагчдыг урамшуулснаар та хичээлээ дуусгаж болно. Та Аврагчийн адил итгэл үнэмшлээ хамгаалдаг хүмүүст өгөгддөг хүч чадлын талаарх гэрчлэлээ хуваалцаж болох юм.

Нэмэлт эх сурвалж

Бидэнтэй санал нийлдэггүй хүмүүстэй бид хэрхэн харьцах ёстой вэ?

Тэргүүн зөвлөлийн ерөнхийлөгч Даллин Х.Өүкс ийн заасан.

Олон нийтэд хандаж үг хэлэх сэдвийн тухайд, бид хөршөө хайрлах болон зөрчилдөөнөөс зайлсхийх зэрэг сайн мэдээний сургаалуудыг дагах хэрэгтэй. Христийг дагалдагчид бол зөв боловсон байдлын үлгэр жишээ байх ёстой. Бид бүх хүнийг хайрлан, сайн сонсогч байж, чин сэтгэлээсээ шүтэж байгаа сүсэг бишрэлийг нь үнэн сэтгэлээсээ сонирхож байгаагаа харуулах ёстой. Бид санал нийлэхгүй байж болох ч адайр зөрүүд байж болохгүй юм. Маргаантай сэдвийн талаарх бидний байр суурь, үг хэл хэрүүл маргаан үүсгэхээр байж болохгүй. Бид өөрсдийн байр суурийг ойлгуулж, тайлбарлахдаа мөн хүмүүсийн үзэл бодолд нөлөөлөхдөө ухаалаг хандах ёстой. (Даллин Х.Өүкс, “Бусдыг хайрлаж, өөр үзэл бодол бүхий хүмүүстэй зэрэгцэн амьдрах нь,” 2014 оны 10-р сарын Ерөнхий чуулган, 29)

Бид Аврагчийн Сүм болон сургаалыг үргэлж үг хэлээрээ хамгаалах ёстой юу?

Арван хоёр төлөөлөгчийн чуулгын ахлагч Жэффри Р.Холланд ийн хэлсэн.

Би бүх хүнд, тэр тусмаа Сүмийн өсвөр үеийнхэнд хандан, өмнө нь та нарт тохиолдож байгаагүй байж болох ч гагцхүү Есүс Христийн Хожмын Үеийн Гэгээнтнүүдийн Сүмийн гишүүн учраас та нарт өөрсдийн итгэлийг хамгаалахаар дуудагдах, магадгүй бүр хувь хүний хувьд гутаан доромжлуулах өдөр ирэх болно гэдгийг хэлье. Энэ үед та зоригтой бас найрсаг байх хэрэгтэй. (Жэффри Р.Холланд, “Шавь байхын адислал ба төлөөс,” 2014 оны 4-р сарын Ерөнхий чуулган, 19)

Арван хоёр төлөөлөгчийн чуулгын ахлагч Нийл Л.Андэрсэн бидэнд ийн сануулсан.

Аврагч руу чиглэсэн зарим дайралт маш хорон ёжтой байсан тул Тэр юу ч хэлээгүй. “Ахлах тахилч нар, хуулийн багш нар Түүнийг хатуу ширүүнээр буруутгаж … дооглон тохуурха[в].” Гэвч Есүс “[тэдэнд] юу ч хариулсангүй” [Лук 23:9–11-ийг үзнэ үү]. Амар тайвныг тогтоогчийн хувьд хариу барихаа тэвчиж, хүндэтгэлтэйгээр чимээгүй байх үе байдаг.

Нэгэн цагт бидэнтэй хамт зогсож, ариун ёслолоос хамт хүртэн, Есүс Христийн тэнгэрлэг зорилгын талаар гэрчилж байсан хүмүүс Аврагч, Түүний дагалдагчдыг болон Сүмийг муулж, гадуурхан ярьж, бичихийг харах нь бид бүхний зүрх сэтгэлийг шархлуулдаг.

Энэ нь Аврагчийн тохинууллын үед ч бас тохиож байсан. (Нийл Л.Андэрсэн, “Есүс Христийг дагах: Амар тайвныг тогтоогч байх нь,” Лиахона, 2022 оны 5-р сар, 19)

Бид шүүмжлэлд хариулахдаа зөрчилдөөнөөс яагаад зайлсхийх ёстой вэ?

Арван хоёр төлөөлөгчийн чуулгын ахлагч Дэйл Г.Рэнланд ийн тайлбарласан.

Биднийг бие биетэйгээ уурлаж маргалдах үед Сатан инээж, харин тэнгэрийн Бурхан мэгшин уйлдаг.

Хамгийн багаар бодоход, хоёр шалтгаанаар Сатан инээж, Бурхан мэгшин уйлдаг. Нэгдүгээрт, зөрчилдөөн нь Есүс Христийн болон Түүний “сайн үйл … нигүүлсэл, мөн ач ивээлээр” [2 Нифай 2:8] хүлээн авдаг авралын талаарх дэлхийнхэнд хүргэх ёстой нэгдмэл гэрчлэлийг маань сулруулдаг. … Шавь нарынх нь дунд зөрчилдөөн, дайсагнал байх аваас хожмын өдрүүдэд хийгдэх Түүний ажлыг эрсдэлд оруулдаг. [Иохан 17:21, 23-ыг үзнэ үү]. Хоёрдугаарт, сүнслэг байдлын хувьд зөрчилдөөн нь хувь хүн талаасаа бидэнд хортой. Бид амар амгалан, баяр баясгалан, амар тайван байдал, Сүнсийг мэдрэх чадвараа алддаг.

Есүс Христ “Хүмүүний зүрх сэтгэлийг нэг нь нөгөөгийнхөө эсрэг уураар өдөөн хатгах нь … бус; харин иймэрхүү зүйлүүд зайлуулагдах ёстой нь миний сургаал бөлгөө” [3 Нифай 11:30] хэмээн тайлбарласан. … Хэрэв би амархан гомдож эсвэл өөр үзэл бодолд уурлаж, шүүж хариу үйлдэл үзүүлбэл сүнслэг байдлын зүрхний сорилд “унана.” Энэ сорилд унасан тул намайг засаршгүй гэж байгаа юм биш. Харин ч энэ нь өөрчлөгдөх хэрэгтэй гэдгийг маань онцолдог бөгөөд үүнийг мэдэх нь сайн хэрэг. (Дэйл Г.Рэнланд, “Христийн амар амгалан дайсагналыг хөнөөдөг,” Лиахона, 2021 оны 10-р сар, 83–84)

Нэмэлт суралцах үйл ажиллагаа

Иаков Шеримд хариулж буй нь

Шүүмжлэлд хэрхэн хариулах талаар ойлгоход тусалж болох өөр нэг жишээ бол Мормоны Ном дахь Иаков, Шерим хоёрын түүх юм. Суралцагчдыг жижиг бүлэгт хуваагдан Иаков 7:1–3, 8–12-ыг уншаад, Шеримд хариулахын тулд Иаков хэрхэн Сүнс хийгээд судруудыг ашигласан талаар мэдэхэд урь.

• Иаков харилцааг хэрхэн зохицуулсан талаар та нар юу анзаарсан бэ?

• Өнөө цагт хэн нэгэн үүнтэй төстэй байдлаар хэрхэн хариулж болох вэ?

Ярилцлагын дараа та суралцагчдыг Иаков 7:13–23-ыг уншаад, түүх хэрхэн төгсөхийг мэдэхэд урьж болно.

Хэрэв хэн нэгэн та нарын итгэл үнэмшлийг соривол яах вэ?

Есүс Христийн Сүмийн гишүүн итгэл үнэмшлийнхээ хувьд соригдож байгаа талаарх зохиомол түүхийг “Everyday Example: When Beliefs Are Questioned” (12:48) видеоноос үзэх нь суралцагчдад тустай байж болно. Та видеог түр зогсоогоод, суралцагчдаас тохирох хариулт юу байх талаар бодоход урьж болох юм. Дараах ярилцлагын асуултууд байж болно.

• Итгэл үнэмшлийг тань сорих хүнд Христийнхтэй адил хайрыг та нар хэрхэн зохих ёсоор харуулж чадах вэ?

• Хэрэв итгэл үнэмшил тань үүнтэй төстэй байдлаар шүүмжлэлд өртвөл та нар хэрхэн хариулах вэ?

• Үүнтэй төстэй нөхцөл байдалд Сүнс та нарыг юу хийхэд өдөөж болох вэ?