Lesona 82: Mataupu Faavae ma Feagaiga 71–75

Mataupu Faavae ma Feagaiga 71

Tali Atu ia i Latou o E Faitioina le Ekalesia a le Faaola

I le taumalulu o le 1831, o tusi o loo i ai faamatalaga sese e uiga i a Iosefa Samita ma le Ekalesia sa tufatufaina atu i le eria o Katelani. I le Mataupu Faavae ma Feagaiga 71, na faatonuina ai e le Faaola ia Iosefa Samita ma Sini Rikitone e malaga i le itulagi atoa, ma faasa’o mea sese (tagai fuaiupu 1–2). O lenei lesona e mafai ona fesoasoani i tagata aoga ia malamalama i le ala e finagalo le Faaola tatou te tali atu ai pe a faitioina e tagata o tatou talitonuga.

Gaoioiga E Ono Mafai Ona Aoao Ai

Taliina o le au faitio i le Ekalesia a le Faaola

Ina ia fesoasoani i tagata aoga ia malamalama i le talaaga faasolopito o le Mataupu Faavae ma Feagaiga 71, faasoa atu le parakalafa lenei pe otooto i ni au lava upu.

Na matua faateleina sauaga mo Iosefa Samita ma le Au Paia i Katelani i le taumalulu o le 1831. Sa amata ona tuua e nisi o le Au Paia le Ekalesia, e aofia ai Ezra Booth ma Symonds Ryder. Na amata e Booth ona lolomiina tusi na osofaia ai Iosefa ma taumafai e faatoilalo le galuega a le Alii (tagai Talafaasolopito, 1838–1856 [Manuscript History of the Church], volume A-1, 153–54, josephsmithpapers.org). Sa talosagaina e Iosefa le Alii mo se fautuaga, ma sa maua mai ai le Mataupu Faavae ma Feagaiga 71 .

• Mata na faapefea ona e manao e tali atu i osofaiga i le Ekalesia a le Faaola ma Iosefa Samita?

  Valaaulia tagata aoga e faasoa mai ni faataitaiga o se taimi na latou molimauina ai faitioga i le Ekalesia po o le talalelei. Fai i tagata aoga e mafaufau pe o le a so latou manatu i le finagalo o le Faaola latou te tali atu pe a agaleaga tagata e uiga i o latou talitonuga. Valaaulia se talanoaga puupuu a o tali mai tagata aoga i fesili nei.

• E mafai faapefea ona tatou iloa le auala sili e taulima ai tulaga pe a faitioina e isi o tatou talitonuga pe faasoa atu faamatalaga sese e uiga i le Ekalesia a le Faaola?

• O le a sou manatu o afea e sili ai le lē amanaiaina o faitioga?

Mafaufau loloto pe o le a sou lagona mautinoa i le iloaina o le ala e finagalo Iesu e te tali atu ai. A o e suesue, vaavaai mo auala eseese ua aoao mai e le Faaola ia i tatou e tali atu ai.

Ua aoao mai e le Faaola i tatou e tautatala atu ma faasoa atu Lana talalelei

Faitau le Mataupu Faavae ma Feagaiga 71:1–3, ma vaavaai pe na faapefea ona finagalo le Faaola ia Iosefa ma Sini e tali atu i mea sese o loo salalau atu e uiga i le Ekalesia i lena taimi.

• O le a se mea na taua ia te oe?

• E tusa ai ma le fuaiupu 1, o le a le mea na saunia e le Faaola e fesoasoani ai ia Iosefa ma Sini ia iloa pe faapefea ona tali atu?

• E faapefea ona fesoasoani fautuaga a le Faaola i o tatou aso?

  Fesoasoani i tagata aoga e faailoa mai le upumoni faapea o le a aoao i tatou e le Faaola e ala i tusitusiga paia ma le Agaga pe faapefea ona tali atu ia i latou o e faitioina Lana Ekalesia.

• Aisea e te manatu ai o le faaaogaina o tusitusiga paia ma le mulimuli i uunaiga a le Agaga o auala sili ia e tali atu ai i faitioga?

• O a ni auala e mafai ai e le aafiaga o le Agaga ona aafia ai le ala tatou te tali atu ai i faitioga?

Mafaufau e valaaulia se tagata aoga e tusi le “Tali atu i le ala a le Faaola” i le pito i luga o le laupapa. E mafai foi ona e tuu atu i le vasega e tusi lenei ulutala i luga o se itulau o a latou api talaaga mo suesuega. E mafai e tagata aoga ona amata se lisi e ala i le tusia “faaaogaina o tusitusiga paia” ma le “mulimuli i le Agaga” i lalo o lenei ulutala. I le faaaogaina o le lisi na latou faia, o le a maua ai e tagata aoga se avanoa e faataitai ai ona tali atu i tulaga i le ala a le Faaola.

Sa faaaoga e Elder Neil L. Andersen o le Korama a Aposetolo e Toasefululua le faatusa faatusi paia o ufanafana mu e faamatala ai faitioga o o tatou talitonuga e isi. A o e suesue i lenei saunoaga, mafaufau i mea e mafai ona e faaopoopo i le lisi o le “Tali Atu i le ala a le Faaola”.

E ala i le talita o lo tatou faatuatua ia Iesu Keriso, ua avea ai i tatou ma e faatupuina le filemu, ma faamalieina … o ufanafana uma a le fili [tagai Efeso 6:16; Mataupu Faavae ma Feagaiga 3:8]. …

E faapefea e se e faatupuina le filemu ona faatoafilemu ma faato’ato’a u fanafana mu? O le mea moni e le faia i le solomuli mai ē taufaatauvaaina i tatou. Ae, ia tumau lo tatou talitonu mautinoa i lo tatou faatuatua, faasoa atu ma le maumaututu o tatou talitonuga, ae aua lava ma le ita po o le faufauleaga. …

O e faatupuina le filemu e le faalolololo; latou te faatauanau i le ala a le Faaola.

O le a se mea e aumaia ia i tatou le malosiaga i totonu e faatoafilemu ai, faato’ato’a, ma faatoilalo ia u fanafana mu o loo ta’i faasaga i upumoni tatou te faamemelo i ai? O le malosiaga e sau mai lo tatou faatuatua ia Iesu Keriso ma lo tatou faatuatua i Ana afioga. (Neil L. Andersen, “Mulimuli ia Iesu: Avea ma Se e Faatupuina Le Filemu,” Liahona, Me 2022, 17–18)

Valaaulia tagata aoga e talanoaina mea o le a latou faaopoopoina i le lisi pe a uma ona iloiloina le saunoaga a Elder Andersen. E mafai ona e fai atu se fesili faapenei:

• E mafai faapefea ona avea oe ma se e faatupuina le filemu pe a tali atu i isi?

Faitau le Mataupu Faavae ma Feagaiga 71:4–7, ma vaavaai mo mea na aoao mai e le Alii ia Iosefa Samita ma Sini Rikitone i lenei tulaga patino e talanoaina ai faamatalaga sese o loo lolomiina.

• O le a se mea na e mauaina?

• O le a le sootaga o e vaaia ma le fautuaga a le Faaola i nei fuaiupu ma aoaoga a Elder Andersen?

Faamamafa atu le faataitaiga a Iesu Keriso: O le gaoioiga lenei o se avanoa e faamamafa atu ai le faataitaiga a Iesu Keriso. Mo nisi faataitaiga i lenei mea, tagai i le aoaoga ua faaulutalaina “Faamamafa le Faataitaiga a Iesu Keriso” i le Tomai o le Atinaega o Faiaoga: Taulai atu ia Iesu Keriso. Mafaufau e faataitai le tomai “Fesoasoani i tagata aoga e faafesootai mea ua latou aoaoina i le auala o loo faataitaia ai e Keriso le mataupu faavae.”

Ina ia fesoasoani i tagata aoga e faailoa mai ni tali faaKeriso se tele e mafai ona fesoasoani ia i latou e puipuia ai o latou talitonuga, mafaufau e faatulaga le vasega i ni vaega mo le gaoioiga lenei.

Uunaia tagata aoga e faaaoga tusitusiga paia e sue ai faataitaiga po o aoaoga e faaalia ai auala eseese na tali atu ai le Faaola ma Ona soo i faitioga. Afai e manaomia e tagata aoga se taitaiga faaopoopo, e mafai ona e faaali atu nisi o fuaitau nei o loo faamatala ai aafiaga ma aoaoga a le Faaola mo i latou e suesue i ai.

Valaaulia tagata aoga e talanoaina mea latou te mauaina ma a latou vaega ona filifili lea o se taitai o le talanoaga e faasoa atu le faamatalaga i le vasega.

• Mataio 4:3–11 (Ua tali atu Iesu i faaosoosoga a Satani i tusitusiga paia.)

• Luka 23:8–10 (Ua tu Iesu i luma o Herota, ma le nofo filemu.)

• Ioane 8:2–11 (O Iesu, sa fetaiai ma taitai Iutaia, ua faasaoina ai le ola o se mafine.)

• Mataupu Faavae ma Feagaiga 100:5–7 (Ua folafola mai e le Alii o le a Ia tuuina mai ia i tatou upu e fai atu pe afai tatou te tautatala i Lona suafa.)

• Mataupu Faavae ma Feagaiga 121:41–45 (Ua ofoina mai e le Alii le fautuaga i le auala e tuuina atu ai faasa’oga.)

Mafaufau e valaaulia taitai o vaega e faasoa mai i le vasega mea na latou talanoaina ma faaopoopo i le lisi o tali talafeagai i luga o le laupapa. Faamanatu i tagata aoga e i ai taimi e ono uunaia ai i tatou e le Agaga ia tumau le filemu nai lo le faasa’oina faaaliali o mea o loo tautalagia.

Faataitai le tali atu i le Ala a le Faaola

Ina ia fesoasoani i tagata aoga e faaalia lo latou malamalama i le mataupu faavae na suesueina i le aso, e mafai ona e tuuina atu pe faaali atu tulaga nei. A o talanoaina e tagata aoga ni auala eseese e mafai ona tatou tali atu ai, fautuaina i latou e suesue le lisi na latou faia muamua mo ni manatu. Fesoasoani ia latou malamalama atonu e tele ni auala sa’o e tali atu ai i tulaga taitasi. E mafai ona fesoasoani le Agaga ia i tatou ia iloa le mea e finagalo le Tama Faalelagi tatou te faia pe tautatala atu ai pe a tulai mai ni mea e tutupu.

E mafai ona e faia ni tulaga eseese e sili atu ona faailoa ai manaoga o lau vasega pe faaopoopo ni faamatalaga i tulaga o i lalo e faateleina ai le fiafia o tagata aoga. E mafai foi ona fai i le vasega e fai a latou lava ata faataitai mai o latou aafiaga patino. Atonu e talafeagai le valaaulia o tagata aoga e faasoa mai ni aafiaga na latou maua i le taimi ua tuanai.

Faasoa atu ni nai auala eseese e mafai ona e tali atu ai i tulaga taitasi nei i se ala faaKeriso:

• Ua e tuuina i luga se ata o le malumalu i luga o ala o faasalalauga faaagafesootai, ma e tali mai se tasi e ala i le faitioina o le Ekalesia mo le i ai o ni tulaga faatonuina maualuluga mo le ulufale atu i le malumalu.

• I se faatasiga faaleaiga, na fai atu ai e se tamaloa o lou aiga ni tala le lelei e uiga i le Perofeta o Iosefa Samita.

• Ua fai mai se uo e valea le talitonu i se Atua e le mafai ona e faamaonia o loo i ai.

• Ua fai atu se tasi mai le galuega i isi o tou faigaluega faatasi faapea o le Au Paia o Aso e Gata Ai e le o ni Kerisiano.

I le taimi e tatau ai a le Faaola lava ia

O Iosefa Samita ma Sini Rikitone sa usiusitai i le faaaliga na la mauaina. Sa la malaga i le eria atoa, ma talai atu le talalelei a le Faaola ma faasa’o mea sese sa salalau atu.

Faitau le Mataupu Faavae ma Feagaiga 71:8–11, ma vaavaai mo le faamautinoaga ua tuuina mai e le Faaola ia i latou uma o e puipuia Lana Ekalesia ma Lana talalelei.

• O a mea o aoao ai oe mai nei fuaiupu e uiga ia Iesu Keriso ma Lana galuega?

• O le a sou manatu o le a le uiga faapea e leai ni leo po o ni auupega o le a manumalo ia i tatou (tagai fuaiupu 9–10)?

Fesoasoani i tagata aoga ia malamalama e tusa lava pe le o ia i latou le tali atoatoa atu i se tasi, o le a le faatagaina e le Faaola ia fili o Lana Ekalesia ia manuia e faavavau. Ua folafola mai e le Faaola o le a “faafememeaiina le au faitio i [Lona] lava taimi e tatau ai” (fuaiupu 10).

• O le a se mea na e aoaoina i le asō e mafai ona fesoasoani ia te oe e taulima ai tulaga pe a faitioina e se tasi e te iloa le Ekalesia po o aoaoga a le Faaola?

E mafai ona e faaiuina le vasega i le uunaia o tagata aoga e mulimuli i le fautuaga a le Faaola pe a latou feagai ma tulaga e faitio ai isi i le Ekalesia ma le talalelei. E mafai ona e faasoa atu lau molimau i le mana ua tuuina atu ia i latou o e o le a puipuia o latou talitonuga e pei ona faia e le Faaola.

Punaoa Faaopoopo

E faapefea ona tatou taulimaina i latou o e le malilie faatasi ma i tatou?

Sa aoao mai Peresitene Dallin H. Oaks o le Au Peresitene Sili:

I le mataupu o lauga faalauaitele, e tatau ona tatou mulimuli uma i aoaoga o le talalelei ia alolofa i tuaoi ma aloese mai finauga. O soo o Keriso e tatau ona avea ma faataitaiga o le amio lelei. E tatau ona tatou alolofa atu i tagata uma, avea ma tagata e faalogo lelei, ma faaalia le popole mo o latou talitonuga faamaoni. E ui lava atonu tatou te le ioe i nisi manatu, ae e le tatau ona tatou le fiafia. O o tatou tulaga ma talanoaga e uiga i ni autu feteenai e le tatau ona tupu ai ni finauga. E tatau ona tatou atamamai i le faamalamalamaina ma le tuliloaina o o tatou tulaga ma le faatosinaina mai o isi tagata. (Dallin H. Oaks, “Ola Faatasi ma Alolofa atu i Isi e Eseese o Tatou Talitonuga,” Liahona, Nov. 2014, 27)

Pe manaomia ea i taimi uma ona tatou puipuia ma le iai o le leo le Ekalesia ma aoaoga faavae a le Faaola?

Sa saunoa mai Elder Jeffrey R. Holland o le Korama a Aposetolo e Toasefululua:

Ou te fai atu i tagata uma aemaise lava i le autalavou o le Ekalesia pe afai tou te lei faia, o le a oo lava i se tulaga o le a manaomia ai ona e puipuia lou faatuatua pe atonu foi o le onosaia o nisi o sauaga faaletagata ona o oe o se tasi o le Ekalesia a Iesu Keriso o le Au Paia o Aso e Gata Ai. O taimi faapea o le a manaomia uma ai le lototele ma le faaaloalo mai ia te outou. (Jeffrey R. Holland, “O le Tau--ma Faamanuiaga--o le Avea ma Soo,” Liahona, Me 2014, 6)

Na faamanatu mai ia i tatou e Elder Neil L. Andersen o le Korama a Aposetolo e Toasefululua:

O nisi o osofaiga i le Faaola sa matuai taufaaleaga ma sa leai Sana tala. “O le au faitaulaga sili foi ma le au tusi upu … ua naunau e molitu o ia … ma tauemu ia te ia,” peitai “e le’i tali atu [Iesu] i se mea e tasi” [tagai i le Luka 23:9–11]. E i ai taimi pe a avea o se e faatupuina le filemu, o lona uiga tatou te teena le uunaiga e tali atu, ma nai lo le faia o lena, tatou te fifilemu ma le mamalu.

O se mea faamomoiloto mo i tatou uma pe a soona fai ni lafoga matuia pe le migao e uiga i le Faaola, o Ona soo, ma Lana Ekalesia, pe faasalalauina foi e i latou o e sa tatou tutu faatasi, tatou taumamafa faatasi i le faamanatuga, ma tatou molimau faatasi atu i le misiona paia a Iesu Keriso.

Na tupu foi lenei mea i le taimi o le misiona a le Faaola. (Neil L. Andersen, “Mulimuli ia Iesu: Avea ma Se e Faatupuina Le filemu,” Liahona, Me 2022, 19)

Aisea e tatau ai ona tatou aloese mai finauga pe a tali atu i faitioga?

Na faamatala mai e Elder Dale G. Renlund o le Korama a Aposetolo e Toasefululua:

Pe a tatou fefinaua’i ma le tasi ma le isi i le ita, e ‘ata Satani ae tutulu le Atua o le lagi.

E ‘ata Satani ae tutulu le Atua ona o ni mafuaaga pe a ma le lua. Muamua, o finauga e faavaivaia ai la tatou molimau autasi i le lalolagi ia Iesu Keriso ma le togiola e maua mai i Lona “mana, … alofa mutimutivale, ma le alofa tunoa” [2 Nifae 2:8]. … O Lana galuega i aso e gata ai e faavaivaia pe a i ai finauga po o le feitaga’i i totonu o Ona soo [tagai i le Ioane 17:21, 23]. Lona lua, o finauga e lē maloloina mo i tatou taitoatasi. Ua faoa mai ia i tatou le filemu, olioli, ma le mapusaga, ma ua feto’i ai foi lo tatou gafatia e lagonaina ai le Agaga.

Sa faamalamalama mai e Iesu Keriso e faapea o Lana mataupu e “le o le faaoso o loto o tagata i le ita, o le tasi e faasaga i le isi; ae o [Lana] mataupu [o le] aveesea o mea faapena” [3 Nifae 11:30]. Afai e vave ona ou ita pe tali atu i manatu eseese e ala i le ita po o le faamasinosino, ua ou “le pasia” le suega o le malosi faaleagaga. O le lē pasi o lea su’ega, e le faapea ai ua leai so’u faamoemoe. Ae ua ta’u mai ai ua manaomia ona ou suia. Ma o se mea lelei le iloa o lena mea. (Dale G. Renlund, “O Le Filemu o Keriso e Faaumatia ai le Feitaga’i,” Liahona, Nov. 2021, 83–84)

Gaoioiga Faaopoopo e Aoao Ai

Ua tali atu Iakopo ia Serema

O se isi faataitaiga e mafai ona fesoasoani i tagata aoga ia malamalama i le ala e tali atu ai i faitioga o le tala ia Iakopo ma Serema i le Tusi a Mamona. Mafaufau e valaaulia tagata aoga e faitau le Iakopo 7:1–3, 8–12 i ni vaega toalaiti e vaai pe faapefea ona faaaoga e Iakopo le Agaga ma tusitusiga paia e tali atu ai ia Serema.

• O le a se mea na e matauina e uiga i le auala na faafoe ai e Iakopo le fegalegaleaiga?

• E mafai faapefea ona tali atu se tasi i se auala talitutusa i aso nei?

A maea le talanoaga, e mafai ona e valaaulia tagata aoga e faitau le Iakopo 7:13–23 e iloa ai pe na faapefea ona uma le tala.

O le a le mea e fai pe afai e luiina e se tasi ou talitonuga

E mafai ona aoga i tagata aoga le matamata i vaega o le vitio “Everyday Example: When Beliefs Are Questioned” (12:48) e vaai ai i se tulaga faatino lea o loo fesiligia ai talitonuga o se tagata o le Ekalesia a Iesu Keriso. E mafai ona e taofi le vitio ma valaaulia tagata aoga e mafaufau pe faapeī foliga o se tali talafeagai. O fesili o talanoaga e mafai ona aofia ai:

• E mafai faapefea ona e faaalia ma le talafeagai le alofa faaKeriso mo se tasi e fesiligia ou talitonuga?

• E mafai faapefea ona e tali atu pe afai e faitioina ou talitonuga i se auala e fesootai i ai?

• O le a se mea e mafai e le Agaga ona uunaia oe e fai i se tulaga faapena?