Lesona 84: Mataupu Faavae ma Feagaiga 71–75

Iloilo Lou Aoaoina 5

Mataupu Faavae ma Feagaiga 51–75

O le manatunatu ma iloiloina le aoaoina faaleagaga e mafai ona fesoasoani ia tatou faalatalata atili atu ai i le Faaola. O lenei lesona e mafai ona fesoasoani i tagata aoga e manatua ma iloilo ai pe na faapefea i o latou aafiaga i le suesueina o le Mataupu Faavae ma Feagaiga ona fesoasoani i lo latou tuputupu a’e ai faaleagaga.

Gaoioiga E Ono Mafai Ona Aoao Ai

Manatua: Atonu e le lava sou taimi i le vasega e fai ai avanoa uma o suesuega ua tuuina atu i lenei lesona. Filifili vaega e te lagona o le a sili ona aoga i au tagata aoga i le iloiloina o lo latou aoaoina.

Iloilo lou tuputupu ae

Mafaufau e tuuina atu se avanoa mo tagata aoga e faasoa mai ai tali i fesili nei faatasi ma le toatele o tagata o le vasega. E mafai ona faia lenei mea i le tuuina atu ia i latou o se minute se tasi e sue ai se tasi o le vasega ma faasoa mai a latou tali. E mafai ona fai faafia lenei mea i le tele o taimi.

(Atonu e te manao e tuuina atu se faataitaiga e ala i le faasoa atu o se gaoioiga e te fiafia i ai. Mafaufau e faaali atu se ata o se meafaigaluega e faaaoga e fua ai le alualu i luma i lau gaoioiga. Mo se faataitaiga, afai e te fiafia e tamoe, e mafai ona e faaali atu se uati taimi ma faamatala pe mafai faapefea ona faaaoga e fua ai lou tuputupu ae.)

• O le a se gaoioiga e te fiafia e auai ai?

• E faapefea ona e iloa pe o e alualu i luma? Pe o i ai ni meafaigaluega patino e te faaaogaina e fua ai lou alualu i luma?

E pei lava o le fuaina o lo tatou alualu i luma faaletino e fesoasoani tatou te iloa ai lo tatou tuputupu ae, e manaomia ona tatou faaaluina se taimi e iloilo ai lo tatou tuputupu ae faaleagaga. O le Agaga Paia e saofaga i le fesoasoani ia i tatou e fua lo tatou alualu i luma faaleagaga. O se tasi o auala e mafai ona tatou valaaulia ai le Agaga Paia e fesoasoani ia i tatou ia iloa lo tatou alualu i luma o le tomanatu lea ma le agaga tatalo i lesona faaleagaga ua tatou aoaoina ma mafaufau pe na faapefea ona tatou tuputupu ae faaleagaga a o tatou faaaogaina na lesona i o tatou olaga.

Valaaulia tagata aoga e faitau a latou faamatalaga ma mau mai nai vaiaso ua tuanai o le seminare (Mataupu Faavae ma Feagaiga 51–75), ma vaavaai i lesona na latou aoaoina ma sini na latou faatulagaina. Faaali atu fesili nei e fesoasoani ai i tagata aoga e tomanatu i lo latou tuputupu ae faaleagaga. E mafai e tagata aoga ona filifili e tusi a latou tali i se api talaaga mo suesuega pe mafaufau loloto i a latou tali.

• O a nisi o mea na e faia e faaaoga ai upumoni faaleagaga ua e aoaoina i le seminare? E faapefea e le faaaogaina o nei upumoni ona fesoasoani ia te oe e tuputupu ae ai faaleagaga?

• Na faapefea ona e matauina le fesoasoani a le Tama Faalelagi ma le Faaola ia te oe a o e faaaogaina mea ua e aoaoina i au taumafaiga ia avea atili e faapei o i Laua?

Tuu atu se avanoa mo tagata aoga e faasoa mai ai tali e le patino tele. Uunaia tagata aoga ia nofouta i le Agaga a o latou vaavaai mo auala e faaaoga atili ai nei lesona i o latou olaga.

Faamatala le faamoemoega o poloaiga

Mafaufau e faaali atu le fuaiupu muamua o le saunoaga lenei a Peresitene Russell M. Nelson, sui ai le upu “tulafono” i se avanoa. E mafai ona fautua mai e tagata aoga ni filifiliga talafeagai mo le upu o loo misi. A uma ona taumafai tagata aoga e faailoa mai le upu o loo misi, faaali atu le faamatalaga atoa.

Ona e alolofa le Tama ma le Alo ia i tatou i se alofa lē faatuaoia, atoatoa, ma ona ua La’ua silafia e lē mafai ona tatou vaai i mea uma La te silasila i ai, ua La tuuina mai ai tulafono o le a taitaiina ma puipuia ai i tatou. O loo i ai se sootaga malosi i le va o le alofa o le Atua ma Ana tulafono. (Russell M. Nelson, “O le Alofa ma Tulafono a le Atua” [faigalotu a le Iunivesite o Polika Iaga Sete. 17, 2019], 2, speeches.byu.edu)

• O le a se poloaiga na fesoasoani ia te oe e lagona ai le puipuia ma le alofagia e le Atua?

  Valaaulia tagata aoga o le vasega e faaaoga latou mau ma faamatalaga tusitusia e saili ai tali i le fesili lenei.

• O a nisi o tulafono a le Atua na tatou suesueina talu ai nei i le Mataupu Faavae ma Feagaiga?

E mafai ona e tuu atu i se tagata aoga e tusi tali o lenei fesili i luga o le laupapa. Atonu latou te ta’ua nisi o mea nei: salamo (58:42–43), tausia o le aso Sapati ia paia (59:9–13), legavia (63:13–16), ma le faamagalo atu o isi (64:9–11).

Faaali atu se ata faataitai talitutusa ma lenei. Valaaulia tagata aoga e faataitai pe faapefea ona latou faamatalaina le faamoemoega o poloaiga i la latou uo. O fesili e mulimuli i le ata faataitai e mafai ona fesoasoani e taiala ai a latou tali.

Manatu faapea ua faasoa atu e se tasi o au uo lona le fiafia ia te oe e uiga i se poloaiga. Ua ia taumanatunatu pe aisea o le a faalavelave mai ai le Atua ia i tatou e tuuina mai ia i tatou poloaiga.

Filifili se poloaiga ua e suesueina i le Mataupu Faavae ma Feagaiga i lenei tausaga ma faasoa atu:

• O le ala e avea ai lena poloaiga o se puipuiga ma se taiala mai lo tatou Tama oi le Lagi.

• Auala e avea ai lena poloaiga ma faamaoniga o le alofa o le Atua.

Tuuina atu o lou loto ma le mafaufau naunautai i le Alii

E avea o se vaega o le suesueina o le Mataupu Faavae ma Feagaiga 64:20–43, atonu na valaaulia tagata aoga e tusi ni ata e pei o nei i a latou api talaaga mo suesuega. Mafaufau e faaali atu le ata lenei ma fai atu i tagata aoga e faasoa mai mea latou te manatua e uiga i lena lesona. Sa valaaulia i latou e valivali le aofaiga o o latou mafaufau ma loto sa latou lagonaina sa latou foai atu i le Alii.

Valaaulia tagata aoga e sue a latou ata po o le taumafai e manatua pe na faape’ī ona foliga. Fesoasoani i tagata aoga ia manatua o le auala na latou valivali ai o latou loto ma mafaufau ua na o se ata o sina taimi. E suia, e le tumau. E mafai ona latou sailia le fesoasoani a le Faaola ia naunau e tuuina atu atili o latou mafaufau ma loto ia te Ia. Faamalosi tagata aoga e tomanatu i o latou aafiaga e ala i le tali i nisi o fesili nei i a latou api faamaumau mo suesuega.

• O le a se mea na faia pe mafai foi ona e faia e faateleina ai lou manao e avatu i le Faaola lou loto ma le mafaufau?

• O a ni suiga ua e matauina i lou manao e tuu atu lou loto ma lou mafaufau i le Faaola?

• Na faapefea ona uunaia e ou mafaufauga ma amioga lou sootaga ma isi ma Iesu Keriso?

Tuu atu i ni nai tagata aoga le avanoa e faasoa mai ai mea sa taua ia i latou e uiga i lenei aafiaga ma pe na faapefea ona aoga ia i latou.

Ona mafai lea e tagata aoga ona tusi se ata lona lua o le loto ma le mafaufau i a latou api faamaumau mo suesuega i autafa o le latou uluai ata. Valaaulia i latou e valivali le aofai o o latou loto ma mafaufau o loo latou tuuina atu nei i le Faaola o se taunuuga o a latou taumafaiga e faaleleia atili. E mafai e tagata aoga ona faatusatusa ia ata e lua ma fuafua pe ua faaleleia atili lo latou naunau e avatu i le Faaola o latou loto ma mafaufau.

Tausia o le aso Sapati ia paia

Mafaufau e faaali atu le vaega lenei o se fesili o se pepa faataga o le malumalu ma valaaulia tagata aoga e faasoa mai mea ua latou aoaoina e uiga i le tausia o le aso Sapati ia paia i lenei tausaga. (Afai e manaomia, e mafai ona e tuu atu i tagata aoga se taimi e faamanatu puupuu ai le Mataupu Faavae ma Feagaiga 59 po o a latou tusiga i api talaaga mai le lesona o le vaega lena.)

Pe e te taumafai e tausia le paia o le aso Sapati, i le aiga ma i le lotu…

E avea o se vaega o le lesona i le Mataupu Faavae ma Feagaiga 59, atonu na valaaulia tagata aoga e fai se fuafuaga e faamamalu ai le Faaola i le aso Sapati. Afai o lea, valaaulia i latou e tomanatu i mea na latou faia o se taunuuga. Atonu e aoga mo volenitia ona faasoa atu se vaega o a latou fuafuaga i le vasega.

Mafaufau e faaali atu fesili nei e fesoasoani ai i tagata aoga e iloilo a latou taumafaiga i le tausia le aso Sapati ia paia. Valaaulia tagata aoga e filifili ni fesili se lua pe tolu mai le lisi e tali i totonu o a latou api faamaumau mo suesuega.

• Mafaufau i se mea na e faia e tausia ai le paia o le aso Sapati. Ua faapefea ona faaleleia lou aso Sapati ona o lenei mea?

• O faapefea e au taumafaiga e tausia le paia o le aso Sapati ona e latalata atili atu ai i le Tama Faalelagi ma le Faaola?

• O a nisi o luitau o feagai ma oe i le tausia o le paia o le aso Sapati?

• O le a se mea e te manao e amata ona fai e tausia ai le paia o le aso Sapati?

• Aisea e taua ai le faapaiaina o le aso Sapati?

• O le a se mea i lau lisi e te lei faia lava e mafai ona e amata galue ai i lenei Aso Sa e tausia le paia o le aso Sapati?

• Na mafai faapefea ona e ava atili i le Tama oi le Lagi ma Iesu Keriso a o e amata pe taofia le faia o ni mea patino i le aso Sapati?

E ui o nei fesili ua faamoemoe mo tagata aoga e iloilo taitoatasi a latou taumafaiga i le tausia o le paia o le aso Sapati, pe a talafeagai ai, e mafai ona e valaaulia tagata aoga naunau e faasoa mai nisi o a latou tali ma aafiaga.

Fautuaina tagata aoga i a latou taumafaiga ia maua faamanuiaga o le faamamaluina o le aso Sapati, aemaise i latou atonu e lei faia lava se galuega. E mafai ona e valaaulia i latou e seti se faamanatu i la latou telefoni e fai ai se mea e tausia atili ai le aso Sapati e sosoo ai ia paia. Molimau atu i le finagalo o le Faaola mo i latou e o mai ia te Ia ma o le tausia o le aso Sapati o se tasi lea o auala e mafai ona tatou faalatalata atu ai ia te Ia.