“Lesona 83—Faataitaiga o le Atamai i Aoaoga Faavae 5: Taulotoina ma le Mauaina o le Malamalama Faaleagaga,” Tusi Lesona a le Faiaoga Seminare o le Mataupu Faavae ma Feagaiga (2025)
“Faataitaiga o le Atamai i Aoaoga Faavae 5,” Tusi Lesona a le Faiaoga Seminare o le Mataupu Faavae ma Feagaiga
Lesona 83: Mataupu Faavae ma Feagaiga 71–75
Faataitaiga o le Atamai i Aoaoga Faavae 5
Taulotoina ma le Mauaina o le Malamalama Faaleagaga
O le atamai i aoaoga faavae e mafai ona fesoasoani i tagata aoga e fausia lo latou faavae i luga o Iesu Keriso ma Lana talalelei. O lenei lesona o le a tuuina atu ai i tagata aoga ni avanoa e tauloto ai fuaitau faasino o le atamai i aoaoga faavae ma o latou fasifuaitau autu o le mau faapea foi ma le aoaoina ma le faaaogaina o mataupu faavae paia mo le mauaina o le malamalama faaleagaga.
Gaoioiga E Ono Mafai Ona Aoao Ai
Toefaamanatu le atamai i aoaoga faavae: tauloto
Mafaufau i taimi i lou olaga na fesoasoani ai le taulotoina o faamatalaga i le faataunuuina o se galuega.
-
Na faapefea e le taulotoina o faamatalaga ona faamanuia ai lou olaga?
-
O a ni tulaga e mafai ona e manuia ai mai le taulotoina o nisi o mau?
O le gaoioiga lenei o se tasi lea o auala e fesoasoani ai i tagata aoga e tauloto mau o le atamai i aoaoga faavae ma fasifuaitau autu o mau. O manatu faaopoopo o le taulotoina o loo maua i le itulau o le faaopoopoga i lalo o le “Gaoioiga Toefaamanatu o le Atamai i Aoaoga Faavae.” O le gaoioiga o le taulotoga e te filifilia e le tatau ona faaalu ai le silia ma le 10–15 minute ina ia e maua ai le taimi mo le faataitaiga o le faaaogaina o le atamai i aoaoga faavae.
Vaevae tagata aoga i ni vaega toalaiti ma lolomi se kopi o le siata lenei mo vaega taitasi. Valaaulia vaega e ‘oti ese mau taitasi ma fuaitau autu eseese. Tuu atu i tagata aoga e faafefiloi mau faasino ma fasifuaitau autu ona galulue lea o se vaega e toe faatulaga faatasi i le vave latou te mafaia ai. E mafai e vaega ona fai faafia lenei gaoioiga e vaai ai pe mafai ona latou vave faafetauia i taumafaiga taitasi.
|
Mau faasino o le atamai i aoaoga faavae |
Fasifuaitau autu o le mau |
|---|---|
Mau faasino o le atamai i aoaoga faavae | Fasifuaitau autu o le mau O Iosefa Samita na “vaai i ni Tagata se toalua, o lo laua pupula ma le mamalu e le mafaamatalaina.” |
Mau faasino o le atamai i aoaoga faavae | Fasifuaitau autu o le mau “O le ekalesia moni ma ola e tasi.” |
Mau faasino o le atamai i aoaoga faavae | Fasifuaitau autu o le mau “Pe i lo’u leo po o i le leo o a’u auauna, ua tutusa lava.” |
Mau faasino o le atamai i aoaoga faavae | Fasifuaitau autu o le mau “Vaai mai ia te aʼu i mafaufauga uma; aua le masalosalo, aua le fefefe.” |
Mau faasino o le atamai i aoaoga faavae | Fasifuaitau autu o le mau “O le a Ou taʼu atu ia te oe i lou mafaufau ma lou loto, e ala i le Agaga Paia.” |
Mau faasino o le atamai i aoaoga faavae | Fasifuaitau autu o le mau O le Perisitua Arona e umia ki o auaunaga a agelu, ma o le talalelei o le salamo, ma o le papatisoga.” |
Mau faasino o le atamai i aoaoga faavae | Fasifuaitau autu o le mau “Ua tele lava le taua o agaga i le silafaga a le Atua.” |
Mau faasino o le atamai i aoaoga faavae | Fasifuaitau autu o le mau “E matua tele lo oulua olioli pe afai lua te ʼaumai ni agaga e toatele ia te aʼu!” |
Mau faasino o le atamai i aoaoga faavae | Fasifuaitau autu o le mau “O Au, [Iesu Keriso], na mafatia i nei mea mo tagata uma.” |
Mau faasino o le atamai i aoaoga faavae | Fasifuaitau autu o le mau O “upu a perofeta ia outou talia, e pei lava ua mai i loʼu lava gutu.” |
Mau faasino o le atamai i aoaoga faavae | Fasifuaitau autu o le mau “O le a ou faaali atu au lava mai le lagi i le mana ma le mamalu … ma mau faatasi ma tagata i le amiotonu i luga o le lalolagi i le afe o tausaga.” |
Mau faasino o le atamai i aoaoga faavae | Fasifuaitau autu o le mau “O le faaipoipoga ua faauuina e le Atua.” |
Mau faasino o le atamai i aoaoga faavae | Fasifuaitau autu o le mau “O ia o le ua salamo i ana agasala, o ia lava lea ua faamagaloina.” |
Mau faasino o le atamai i aoaoga faavae | Fasifuaitau autu o le mau “Ae o outou ua poloaiina ia faamagalo atu i tagata uma” |
Faaaogaina o mataupu faavae o le mauaina o le malamalama faaleagaga
O le vaega o totoe o le lesona e vaai agai i le fesoasoani ai i tagata aoga e faaaoga le mataupu faavae o le mauaina o le malamalama faaleagaga i se tulaga moni o le olaga. A o lei faitauina le tulaga o i lalo, mafaufau e valaaulia muamua tagata aoga e toe faamanatu ia mataupu faavae o le mauaina o le malamalama faaleagaga. O gaoioiga toefaamanatu fautuaina o loo aofia atu i le itulau o le faaopoopoga i lalo o le “Gaoioiga Toefaamanatu o le Atamai i Aoaoga Faavae.” E mafai ona e maua faamatalaga o mataupu faavae i le parakalafa 5–12 o le vaega o le “Mauaina o le Malamalama Faaleagaga” i le Pepa Autu o le Atamai i Aoaoga Faavae (2023).
O lenei ata faataitai o le faaaogaina faataitai e faavae i se aafiaga na faasoa mai e Sister Kristin M. Yee, Fesoasoani Lua i le Au Peresitene Aoao o le Aualofa, i le konafesi aoao. Afai e aoga, e mafai ona e faaaogaina se isi ata faataitai e uiga i le faamagalo atu ina ia fetaui lelei ma manaoga o au tamaiti aoga.
Na faasoa mai e Sister Kristin M. Yee, Fesoasoani Lua i le Au Peresitene Aoao o le Aualofa, le aafiaga patino lenei.
Ua ou molimauina patino le vavega o le faamalologa a Keriso o lo’u loto tiga. Faatasi ai ma le faatagaga a lo’u tamā, ou te faasoa atu ai faapea na ou ola a’e i se aiga ou te le’i lagona ai i taimi uma le saogalemu ona o sauaga faalelagona ma tala. I tausaga o lo’u talavou ma lo’u talavou matua, sa ou inoino ai i lo’u tamā ma sa i ai le ita i lo’u loto mai lena tiga. (Kristin M. Yee, “Matagofie e Sui A’i Le Lefulefu: O Le Ala Faamalolo o le Faamagaloga,” Liahona, Nov. 2022, 37)
Faaalu sina taimi e mafaufau ai pe mata o a ni lagona i le tulaga o Sister Yee. Mafaufau i se mea semanu e te faia pe a e feagai ma se tulaga faapena.
A o tatou suesue i le mea na faia e Sister Yee, mafaufau po o a lesona e mafai ona e aoaoina mai i lona aafiaga. Vaai toto’a i le auala na ia faaaogaina ai mataupu faavae o le mauaina o le malamalama faaleagaga ma le ala na fesoasoani ai le Faaola ia te ia.
Tufa atu pepa o tufaaga i tagata aoga. Mafaufau e faaali atu fesili nei i luga o le laupapa mo tamaiti aoga e faatatau i ai a o latou suesueina le tautalaga a Sister Yee. Uunaia tagata aoga e mafaufau i ni auala faaopoopo e mafai ai e se tagata i se tulaga talitutusa ona faaaoga mataupu faavae o le mauaina o le malamalama faaleagaga.
-
O a mea na fai e Sister Yee e faatino ai i le faatuatua? Na faapefea ona fesoasoani le Faaola ia te ia?
-
O le a le mea na fai e Sister Yee e vaai ai i lona tulaga i le talaaga o le ata o le faaolataga ma aoaoga a le Faaola?
-
O a ni punavai faalelagi ua filifilia na faalagolago i ai Sister Yee? Na faapefea ona fesoasoani nei punavai o faamatalaga ia te ia e maua ai le malamalama po o le vaaiga e uiga i lona tulaga?
Mafaufau e faaaoga se tasi o manatu nei e fesoasoani ai i tagata aoga e faailoa mai pe na faapefea ona faaaoga e Sister Yee ia mataupu faavae o le mauaina o le malamalama faaleagaga:
-
Fuafua o se vasega ni auala iloga e faailoga ai pe na faapefea ona faaaoga e Sister Yee mataupu faavae taitasi o le mauaina o le malamalama faaleagaga. Mo se faataitaiga, e mafai ona e vaseina se mataupu faavae se tasi, faaatigipusa le isi, ma li’o le isi. E mafai foi ona e faaaogaina lanu eseese e faailoga ai mataupu faavae taitasi. Valaaulia tagata aoga e suesue le vaega o totoe o le pepa e tufaatu, ma vaavaai ma makaina faataitaiga o mataupu faavae taitasi.
-
Tofi atu i tagata aoga po o ni vaega o tagata aoga se mataupu faavae ese o le mauaina o le malamalama faaleagaga. A o latou suesueina le lauga a Sister Yee, valaaulia i latou e tusi i lalo mea sa ia faia e faaaoga ai lena mataupu faavae.
-
Nai lo le faaaogaina o le pepa tufaatu, e mafai ona e faaali atu le vitio o le lauga a Sister Yee. Valaaulia tagata aoga e faalogologo mo auala na ia faaaogaina ai mataupu faavae o le mauaina o le malamalama faaleagaga. E mafai e tagata aoga ona sii o latou lima pe a latou faalogo i faataitaiga, ma e mafai ona e taofi le vitio ma tuu atu ia i latou e faasoa mai mea na latou mauaina.
Beauty for Ashes: The Healing Path of Forgiveness
Matagofie e Sui A’i Le Lefulefu: O Le Ala Faamalolo o le Faamagaloga
I le aluga o tausaga ma i a’u taumafaiga e saili le filemu ma le faamalologa i luga o lena ala o le faamagalo atu, sa oo ina ou iloa i se ala maoae o le Alo lava lea o le Atua na togiola mo a’u agasala, o le Togiola foi lea o le a laveaiina i latou o e na matuai faatiga ia te a’u. Sa le mafai ona ou talitonu moni i le uluai upumoni e aunoa ma le talitonu i le lona lua.
A o tuputupu a’e lo’u alofa mo le Faaola, sa faapena foi lo’u manao e suia le tiga ma le ita i Lana pulupasama faamalolo. Sa avea o se faagasologa mo le tele o tausaga, na manaomia ai le lototele, fetāla’i, tuuto, ma le aoao e faalagolago i le mana paia o le Faaola e laveai ma faamaloloina ai. O loo i ai lava sa’u galuega e fai, ae ua le toe tiga lo’u loto. Ua ou maua “se loto fou” [Esekielu 36:26]—o se loto ua lagonaina le alofa loloto ma le faamaoni o se Faaola patino, o lē sa i o’u autafa, o lē sa taita’ia fimalie a’u ma le onosai, sa ta’ita’i a’u i se nofoaga e sili atu, o lē sa ma fetagisi faatasi, o lē sa silafia lo’u faanoanoa. …
Na saunoa Elder Richard G. Scott: “E le mafai ona e soloiesea mea ua uma ona faia, a e mafai ona e faamagalo atu. O le faamagalo atu e faamalolo ai manu’a tuga ma matautia, aua na te faatagaina le alofa o le Atua ina ia faamamaina lou loto ma le mafaufau mai le oona o le ita. E faamamaina ai lou loto mai le manao e taui ma sui. E maua ai avanoa mo le faamamaina, faamaloloina, ma le toe fuataiina mai o le alofa o le Alii” [“Faamaloloina o Mailaila Matuia o le Saunoa,” Liahona,, Me 1992, 33].
Sa maua foi e lo’u tama i le olaga nei se suiga ofoofogia o le loto i tausaga talu ai nei ma sa liliu atu i le Alii—o se mea semanu ou te le vaaia i lenei olaga. O se isi molimau lea ia te a’u o le mana atoa ma le mafai ona suia ai o Iesu Keriso.
Ou te iloa e mafai e Ia ona faamalolo le tagata agasala ma i latou na agasala i ai. O Ia o le Faaola ma le Togiola o le lalolagi, o lē sa loto e ofo mai Lona soifua ina ia mafai ai ona tatou toe ola. Na Ia fetalai, “Ua i o’u luga le Agaga o le Alii, aua ua na faauu mai ia te a’u e folafola le tala lelei i e matitiva; ua auina mai a’u e ia e faamalolo i e loto momomoe tala’i le saolotoga i le tafeaga, ma ia pupula mata o e tauaso, e tuu saoloto i e ua faasauaina” [Luka 4:18; ua faaopoopo le faamamafa].
Ia i latou uma o e loto momomo, faapagotaina, faasauaina, ma atonu ua faatauasoina i le tiga po o le agasala, ua Ia ofoina mai le faamalologa, faafoisia le malosi, ma le saolotoga. Ou te molimau atu e moni le faamalologa ma le faafoisia o le malosi ua Ia ofoina mai. O le taimi o lena faamalologa e eseese mo tagata taitoatasi, ma e le mafai ona tatou faamasinoina le taimi o le isi. E taua lo tatou faatagaina mo i tatou lava o le taimi e tatau ai e faamalolo ai ma ia agalelei ia i tatou lava i le faagasologa. E alofa mutimutivale pea lava le Faaola ma e gauai mai, ma e avanoa pea o Ia e tuuina mai le fesoasoani tatou te moomia.
I luga o le ala o le faamagaloga ma le faamalologa o loo i ai se filifiliga ia le tosotosoa ni mamanu po o ni sootaga lē manuia i o tatou aiga po o isi mea. Ia i latou uma i totonu o la tatou tosinaga, e mafai ona tatou ofo atu le agalelei mo le agaleaga, alofa mo le inoino, agamalu mo le lē migao, saogalemu mo le mafatia, ma le filemu mo finauga.
O le avatu o le mea sa faafitia mai ia te oe, o se vaega mamana o le faamalologa paia e mafai ona maua e ala i le faatuatua ia Iesu Keriso. Ina ia ola i se ala e te tuuina atu, e pei ona fai mai o Isaia, o le matagofie e sui a’i le lefulefu o lou olaga [tagai i le Isaia 61:3] o se faatinoga o le faatuatua lea e mulimuli i le faataitaiga aoao a se Faaola o lē sa puapuagatia i mea uma ina ia mafai ai ona Ia fesoasoani i tagata uma. …
Ou te molimau atu o le faataitaiga silisili o le alofa ma le faamagalo atu o lo tatou Faaola, o Iesu Keriso, o lē na faapea atu i le tiga matuitui, “Lo’u Tama e, ia e faamagaloina atu ia te i latou, aua ua latou le iloa le mea ua latou faia” [Luka 23:34]. (Kristin M. Yee, “Matagofie e Sui A’i Le Lefulefu: O Le Ala Faamalolo o le Faamagaloga,” Liahona, Nov. 2022, 37–38)
A uma ona faasoa mai e tagata aoga mea na latou maua, valaaulia i latou e faailoa mai fuaitau talafeagai o le atamai i aoaoga faavae ma faamatala pe mafai faapefea ona fesoasoani nei fuaitau i se tasi i lenei ituaiga o tulaga. O nisi o faataitaiga e aofia ai le Mataupu Faavae ma Feagaiga 6:36 ma le Mataupu Faavae ma Feagaiga 64:9–11.
-
Na faapefea ona fesoasoani ia te oe le suesue o se faataitaiga o se tasi e faaaoga ai mataupu faavae o le mauaina o le malamalama faaleagaga i se aafiaga na latou feagai?
-
E mafai faapefea e le faaaogaina o nei mataupu faavae ona fesoasoani ia te oe i ni tulaga e te feagai ai?