Mataupu Faavae ma Feagaiga 76

Mataupu Faavae ma Feagaiga 76

Vaaiga Aoao

A o galue ai i le faaliliuga musuia o le Tusi Paia ma mafaufau loloto i tusitusiga paia, sa oo i le Perofeta o Iosefa Samita ma Sini Rikitone se faaaliga ofoofogia. Sa faaali atu e le Faaola ia i la’ua se faasologa o ni faaaliga laiti na fesoasoani e aoao atu ai e uiga i Lana matafaioi o le Faaola o tagata uma, o le pa’u o Satani, ma faamatalaga o malo taitasi o le mamalu.

Fai fesili e valaaulia ai le mafaufau loloto: O le mafaufau loloto ma le iloiloga faaletagata lava ia e mafai ona valaaulia ai le Agaga Paia e fesoasoani i tagata aoga taitoatasi ia vaai i mea “e pei ona i ai moni lava, ma … o le a i ai moni lava” (Iakopo 4:13). O iloiloga mataalia faaletagata lava ia e fesoasoani i tagata aoga e mafaufau ai i lo latou malamalamaaga i le taimi nei i upumoni o le talalelei, pe aisea e talafeagai ai upumoni, ma pe faapefea ona ola ai. Mo nisi faamatalaga i le ala na faia ai e le Faaola lenei mea, tagai i le vaega lea “Na Saunia e le Faaola Avanoa mo Tagata ina ia Aoaoina e le Agaga Paia” i le Aoao Atu i le Ala a le Faaola. E mafai foi ona e vaai i se faataitaiga o le auala e faia ai lenei mea i le lesona o lenei vaiaso ua faaulutalaina “Mataupu Faavae ma Feagaiga 76:71–112.”

Ia saunia e aoao atu

O lenei faamatalaga e tuuina atu ai ia te oe ni manatu o mea atonu e manaomia ona muai saunia mo lesona taitasi.

Mataupu Faavae ma Feagaiga 76:1–19

Faamoemoega o le lesona: Ina ia fesoasoani i tagata aoga e aoao ai e ala i le mana o le Agaga Paia a o latou faaavanoaina se taimi e mafaufau loloto ai i afioga a le Faaola.

• Sauniuniga a le tagata aoga: Valaaulia tagata aoga e mafaufau e uiga i mea po o tulaga o loo latou feagai ai i le taimi nei pe atonu o feagai ma i latou lea latou te manaomia ai pe mananao ai e maua le taitaiga mai le Alii e ala i le Agaga Paia.

• Vitiō: “Pe a Liua Mai Oe” (11:21; matamata mai le faailotaimi 3:16 seia oo i le 4:19)

Mataupu Faavae ma Feagaiga 76:19–24

Faamoemoega o le lesona: Ia fesoasoani i tagata aoga ia lagonaina le alofa faateleina mo Iesu Keriso ma Lana matafaioi i le fuafuaga a le Tama Faalelagi.

• Sauniuniga a le tagata aoga: Fautuaina tagata aoga e tusi se fuaiupu se tasi latou te mananao ia iloa e tagata uma e uiga ia Iesu Keriso ma ia saunia e faasoa mai mea na latou tusia.

• Anomea e aumai: Pepa lapopoa pe afai e te filifili e tuu atu i tagata aoga e faamaumau ma faaali mai o latou malamalamaaga; kopi ua lolomiina o le “Ua Ou Iloa o Loo Soifua Lo’u Faaola” (Viiga, nu. 73) pe afai e le o maua e tagata aoga ni tusipese

• Anotusi e faaali atu: Faatonuga mo gaoioiga A ma le E pe afai o le a galulue tagata aoga na o i latou lava pe faatasi foi ma se vaega

Mataupu Faavae ma Feagaiga 76:50–70

Faamoemoega o le lesona: Ia fesoasoani i tagata aoga ia lagona le faamoemoe e mafai ona latou maua le faaeaga e ala ia Iesu Keriso.

• Sauniuniga a le tagata aoga: Mafaufau e valaaulia tagata aoga e faitau le Mataupu Faavae ma Feagaiga 76:50–70, ma vaavaai mo mea na tusia e le Perofeta o Iosefa Samita ma Sini Rikitone e uiga i le malo selesitila ma i latou o le a mautofi ai.

• Anotusi e faaali atu: Siata e fesoasoani ai i tagata aoga e suesue le Mataupu Faavae ma Feagaiga 76:50–70

• Vitiō: “Pe Ua Lava Ea Lo’u Lelei?” (3:28)

• Pepa e tufa atu: “Faamoemoe e ala ia Iesu Keriso”

Mataupu Faavae ma Feagaiga 76:71–112

Faamoemoega o le lesona: Ina ia fesoasoani i tagata aoga ia lototoa atili i a latou molimau ia Iesu Keriso.

• Sauniuniga a le tagata aoga: Mafaufau e valaaulia tagata aoga e mafaufau i le uiga o le totoa ia latou molimau ia Iesu Keriso. E mafai ona latou iloiloina lo latou tulaga o le lototoa ma mafaufau i mea e faaleleia atonu latou te faia.

• Vitiō: “Lototoa i le Molimau ia Iesu” (15:28; matamata mai le faailotaimi 13:19 e oo i le 14:03)