Seminare
Lesona 85—Mataupu Faavae ma Feagaiga 76:1–19: “Sa Tatalaina Mata o lo Matou Malamalama”

“Lesona 85—Mataupu Faavae ma Feagaiga 76:1–19: ‘Sa Tatalaina Mata o lo Matou Malamalama,’” Tusi Lesona a le Faiaoga Seminare o le Mataupu Faavae ma Feagaiga (2025)

“Mataupu Faavae ma Feagaiga 76:1–19,” Tusi Lesona a le Faiaoga Seminare o le Mataupu Faavae ma Feagaiga

Lesona 85: Mataupu Faavae ma Feagaiga 76

Mataupu Faavae ma Feagaiga 76:1–19

“Sa Tatalaina Mata o lo Matou Malamalama”

Iosefa ma Sini o loo sauniuni mo faaaliga

Ia Ianuari 1832, sa mafaufau loloto ai le Perofeta o Iosefa Samita ma Sini Rikitone i le uiga o le Ioane 5:29 a o galulue ai i le faaliliuga musuia o le Tusi Paia. A o laua mafaufau loloto, sa laua oo i se faasologa o faaaliga lea na faaali mai ai e le Alii upumoni taua e uiga i Lana fuafuaga. O lenei lesona e mafai ona fesoasoani i tagata aoga e aoao ai e ala i le mana o le Agaga Paia a o latou faaavanoaina se taimi e mafaufau loloto ai i afioga a le Faaola.

Gaoioiga E Ono Mafai Ona Aoao Ai

Sailiga o faaaliga patino

Mafaufau e faaali atu fesili nei i luga o le laupapa. E mafai e tagata aoga ona faamaumauina a latou tali i le fesili i a latou api faamaumau mo suesuega. Mafaufau e fai atu i ni nai tagata aoga naunautai e faasoa mai ni tali e le patino tele.

  • O a nisi o vaega po o tulaga o loo e feagai ai, pe ono feagai, lea e te manao e maua ai le taitaiga mai le Alii e ala i le Agaga Paia?

  • Aisea e te manao ai i le fesoasoani a le Alii i nei mea?

O le asō o le a e aoao ai e uiga i se auala se tasi e mafai ona e valaaulia ai le Alii e fetalai atu ia te oe e ala i le Agaga Paia. A o e suesue, ia vaai totoʼa i uunaiga mai le Agaga e mafai ona fesoasoani ia te oe i se tasi o tulaga po o fesili na e faailoaina.

O le faaaliga vaaia

O le aotelega lenei e mafai ona fesoasoani e saunia ai tagata aoga e suesue le Mataupu Faavae ma Feagaiga 76. Mafaufau pe sili atu le faitau pe aotele e oe lava pe valaaulia se tamaitiiti aoga e faia. I se isi itu, e mafai ona e valaaulia tagata aoga e faitau mai le Au Paia, 1:147 e aoao ai e uiga i tulaga e tau atu i lenei faaaliga.

Fale o Ioane Johnson

I le aso 16 Fepuari, 1832, sa i ai Iosefa Samita, Sini Rikitone, ma pe tusa ma le 12 isi alii i le potu i le falealuga o le fale o Ioane ma Elsa Johnson i Hairama, Ohaio. A o galulue Iosefa ma Sini i le faaliliuga musuia o le Tusi Paia, sa la suesueina le Ioane 5:29, o se mau sa faamatalaina ai le lagi, ma sa la mananao ia iloa atili. A o latou mafaufau loloto, sa laua vaai i se faaaliga vaaia, lea o loo tusia i Mataupu Faavae ma Feagaiga 76. Sa faaali atu e le Faaola ia Iosefa ma Sini se faasologa o faaaliga manino lea na aoaoina ai i laua i upumoni taua e uiga i le ata o le faaolataga a le Tama Faalelagi.

Faamalamalama atu a o suesueina e tagata aoga le Mataupu Faavae ma Feagaiga 76 i le aluga o le vaiaso, o le a latou maua avanoa e aoao ai e uiga i le tele o vaega eseese o lenei faaaliga. O le lesona o le asō o le a taulai atu i aoaoga a le Faaola ma aafiaga o loo tusia i le amataga o le vaega 76.

O leMataupu Faavae ma Feagaiga 76 e amata i le faasoa mai e le Alii o upumoni taua e uiga ia te Ia lava.

Faitau le Mataupu Faavae ma Feagaiga 76:1–10, ma vaavaai mo upu po o fasifuaitau e te lagona o faaalia ai mea e finagalo Iesu Keriso tatou te malamalama i ai e uiga ia te Ia. Matau o le mata’u i le Atua (fuaiupu 5) o lona uiga o le tapuai, alofa, ma taofimau ia te Ia ma le maofa.

A uma ua lava se taimi o le vasega e suesue ai nei fuaiupu, valaaulia i latou e faasoa mai o latou malamalamaaga. O fesili e pei o nei e mafai ona fesoasoani i tamaiti aoga e talanoaina ai le finagalo o le Faaola e faaali mai upumoni ia i latou e ala i le Agaga Paia.

  • O a mea ua fesoasoani nei fuaiupu ina ia e malamalama ai e uiga i le Faaola?

  • E mafai faapefea e le iloaina o nei mea e uiga i le Faaola ona aafia ai oe?

O le mafaufau loloto i tusitusiga paia e taitai atu ai i faaaliga

Faitau le Mataupu Faavae ma Feagaiga 76:11–19, ma vaavaai mo mea na faia e Iosefa ma Sini a o lei oo i le la faaaliga vaaia.

  • O a ni faatinoga e te manatu na taitai atu ai Iosefa ma Sini e lagonaina mea na la faia?

    Mafaufau e faamalamalama atu e ui atonu tatou te le maua le ituaiga o faaaliga na maua e Iosefa ma Sini, ae o lo la aafiaga e mafai ona aoao ai i tatou i se mataupu faavae e uiga i le sauniaina o i tatou lava e maua faaaliga mai le Alii e ala i le Agaga Paia.

  • O le a se upumoni ua e aoaoina mai nei fuaiupu e uiga i se auala se tasi e mafai ona tatou saunia ai i tatou lava e maua faaaliga e ala i le Agaga Paia?

E ono ta’ua e tagata aoga se upumoni e tutusa i le mea lenei: A o tatou suesue ma le agaga tatalo ma mafaufau loloto i tusitusiga paia, ua tatou saunia i tatou lava e maua le malamalama mai le Alii e ala i le Agaga Paia.

Sa faamatala e Elder D. Todd Christofferson o le Korama a Aposetolo e Toasefululua le ala e mafai ai ona tatou suesue ma mafaufau loloto i tusitusiga paia i se auala e taitai atu ai i faaaliga e ala i le Agaga Paia.

2:3
Elder D. Todd Christofferson

O lo’u fai atu e “suesue,” o lona uiga, e sili atu nai lo le na ona faitau. … Ou te iloa o nisi taimi tou te faitauina ai ni nai fuaiupu, ona mafaufau lea i ai, ma toe faitau ma le faaeteete na lava fuaiupu, ma a o outou mafaufau pe o le a le uiga, tou te tatalo mo se malamalama, tuufesilisili i lou mafaufau, ma faatalitali mo ni lagona faaleagaga, ma tusitusi i lalo lagona ma malamalamaaga e oo mai ina ia mafai ai ona outou manatua ma aoao atili ai. O le suesue ai faapea, atonu e le tele ni mataupu po o ni fuaiupu tou te faitauina i se afa itula, ae peitai o le a e tuua ai se avanoa i lou loto mo le upu a le Atua, ma o le a fetalai atu o Ia ia te oe. (D. Todd Christofferson, “Pe a Liua Mai Oe,” Liahona, Me 2004, 11)

  • O a nisi o mea faalavelave e ono taofia ai i tatou mai le mafaufau loloto i nisi taimi? O a mea e mafai ona fesoasoani ia i tatou e faatoilalo ai nei mea faalavelave?

Mafaufau e faasoa atu se aafiaga lea na e suesue ai ma mafaufau loloto ma le agaga tatalo i tusitusiga paia ma maua ai faaaliga. Valaaulia tagata aoga e faasoa mai soo se aafiaga na latou maua foi.

Faataitai le suesue ma le agaga tatalo ma mafaufau loloto

Mafaufau e tuu atu i tagata aoga se taimi i le vasega, atonu e 7–10 minute, e faataitai ai le suesue ma le agaga tatalo ma mafaufau loloto i tusitusiga paia. Faasoa faatonuga nei:

Faaalu sina taimi e faataitai ai ona suesue ma mafaufau loloto i tusitusiga paia. Mafaufau i le vaega po o le tulaga na e faailoaina muamua atu e te manaomia ai le fesoasoani a le Alii. Tatalo mo le taitaiga, mafaufau loloto i mea o loo e faitauina, ma gauai atu i uunaiga a le Agaga lea e mafai ona tuuina atu ia te oe le taitaiga po o le fesoasoani e te manaomia. Tusi faamaumau ou manatu ma uunaiga i lau api faamaumau mo suesuega.

Tuu atu i tagata aoga le filifiliga e filifili ai mau o le a latou suesueina i le taimi o lenei gaoioiga. Mo tagata aoga o e mananao i le taitaiga po o fea fuaitau e filifili, mafaufau e tuuina atu ni nai filifiliga, e pei o nei:

A ua lava se taimi, faaali atu fesili nei ma valaaulia tagata aoga e faamaumau a latou tali i a latou api faamaumau mo suesuega.

  • Na faapefea ona fesoasoani le suesue ma le mafaufau loloto i tusitusiga paia e saunia ai oe e maua faaaliga e ala i le Agaga Paia?

  • O le a se mea na aoao mai e lenei aafiaga ia te oe e uiga i le Tama Faalelagi, Iesu Keriso, ma le Agaga Paia?

  • O le a se mea e mafai ona e faia, pe faaauau pea ona fai, ina ia maua ai se fesoasoani faaopoopo ma faaaliga mai le Alii?

Molimau atu i le ala e mafai ai e le mafaufau loloto ma le suesue i tusitusiga paia ona sili atu ona faamoemoeina ma sili atu ona masani ai, ona aumaia faalatalata atili ai tagata aoga i le Tama Faalelagi ma Iesu Keriso. Fautuaina tagata aoga e faaauau pea ona saili ma le agaga tatalo i faaaliga e ala i le suesue e le aunoa ma mafaufau loloto i tusitusiga paia.