Lesona 88: Mataupu Faavae ma Feagaiga 76

Mataupu Faavae ma Feagaiga 76:71–112

“Lototoa i le Molimau ia Iesu”

Ina ua uma ona vaai i le tele o faaaliga vaaia, e aofia ai faaaliga vaaia o le mamalu o le Tama ma le Alo, le pa’u o Lusifelo, ma le malo selesitila, sa vaai Iosefa Samita ma Sini Rikitone ia i latou o e o le a mautofi i malo terasitila ma telesitila. O se uiga iloga o i latou i le malo terasitila e faapea, latou te le’i totoa i a latou molimau ia Iesu. O lenei lesona e mafai ona fesoasoani i tagata aoga ia atili totoa ai i a latou molimau ia Iesu Keriso.

Gaoioiga E Ono Mafai Ona Aoao Ai

O se molimau ia Iesu Keriso

Mafaufau e tusi upu Molimau ia Iesu Keriso i luga o le laupapa. Fesili i tagata aoga po o le a so latou manatu i le uiga o le i ai o se molimau i le Faaola. A manaomia, faamatala atu o se molimau o le mea ua tatou iloa e moni i o tatou loto ma mafaufau na tuuina mai ia i tatou e ala i le molimau a le Agaga Paia (tagai i le Mataupu Faavae ma Feagaiga 8:2). Ona talanoaina lea o le fesili lenei:

Fai fesili e valaaulia ai le mafaufau loloto: Mo nisi aoaoga i auala e fai ai lenei mea, tagai i le aoaoga ua faaautuina “Fai faatulagaga ma avanoa mo tagata aoao ina ia aoaoina e le Agaga Paia,” o loo maua i le Tomai Atina’e o Faiaoga: Aoao atu e ala i le Agaga. Mafaufau e faataitai le tomai e ala i le faia o ni iloiloga faaletagata lava ia e uiga i se aoaoga faavae, upumoni, po o se mataupu faavae.

• E mafai faapefea e se molimau i le Faaola ona aafia ai oe i lenei olaga ma le faavavau atoa?

Valaaulia tagata aoga e mafaufau e uiga i a latou lava molimau ia Iesu Keriso, e aofia ai pe na faapefea ona aafia a latou faatinoga i a latou molimau. E mafai foi ona e valaaulia i latou e mafaufau e uiga i o latou manaoga mo a latou molimau.

Fautuaina tagata aooga a o latou suesue e vaavaai mo aoaoga e mafai ona fesoasoani ia i latou e iloa ai le taua o le i ai o se molimau ia Iesu Keriso ma ola e tusa ai ma mea ua latou iloa.

Faaaliga vaai i malo o mamalu

Mafaufau e valaaulia tagata aoga e aotele mai mea sa latou suesueina e uiga i le faaaliga o loo tusia i le Mataupu Faavae ma Feagaiga 76. Ona faamatala lea o mea nei.

Atonu e te manatua o le Mataupu Faavae ma Feagaiga 76 o loo i ai se faamatalaga o se faaaliga vaaia maoae na tuuina mai e le Alii ia Iosefa Samita ma Sini Rikitone. I le avea ai ma se vaega o le la faaaliga vaaia, sa aoaoina ai e Iosefa ma Sini ia uiga o tagata o e o le a nofoia malo o mamalu eseese pe a mavae le Toetutu.

Atonu e fesoasoani le faamalamalama atu o le a le suesueina e tagata aoga ia fuaiupu uma o loo faamatala mai ai malo o mamalu i lenei lesona. O le mamalu selesitila o loo faamatala mai i fuaiupu 50–70, 92–96; o le mamalu terasitila i fuaiupu 71–80; ma le mamalu telesitila i fuaiupu 81–90, 98–112. Mafaufau e valaaulia tagata aoga e maka pe faaigoa nei fuaiupu ia latou tusitusiga paia ina ia mafai ai ona latou suesueina auiliili atili e i latou lava.

Faitau tusitusiga paia nei, ma vaavaai mo eseesega i molimau a e nonofo i malo o mamalu taitasi:

• Mataupu Faavae ma Feagaiga 76:51–52 (selesitila)

• Mataupu Faavae ma Feagaiga 76:75, 79 (terasitila)

• Mataupu Faavae ma Feagaiga 76:82–101–103 (telesitila)

A mae’a suesuega a tamaiti aoga, valaaulia i latou e talanoa i fesili nei o se vasega po o i ni vaega laiti:

• O a ni eseesega na e matauina i le va o molimau a nei vaega?

• O le a se mea e mafai ona aoao atu e lenei mea ia te oe e uiga i le ituaiga o molimau e manaomia e mautofi ai i le malo selesitila?

Fesoasoani i tagata aoga e faailoa se upumoni e pei o lenei: Afai tatou te totoa i le molimau ia Iesu Keriso, e mafai ona tatou maua le malo selesitila o le Atua.

Lototoa i la tatou molimau ia Iesu Keriso

• O le a sou manatu i le uiga o le lototoa i la tatou molimau ia Iesu Keriso”?

I le avea ai ma se vaega o la outou talanoaga o le fesili talu ai, mafaufau e valaaulia tagata aoga e suesue le 2 Nifae 31:20–21 ma vaavaai mo aoaoga e mafai ona faaopoopo i lo latou malamalama. E mafai foi ona fesoasoani faamatalaga nei.

Ua fesoasoani mai Elder Quentin L. Cook o le Korama a Aposetolo e Toasefululua ia i tatou ia malamalama i le uiga o le totoa i le molimau ia Iesu:

O le vaega 76 o le Mataupu Faavae ma Feagaiga ua faamanino mai ai e faapea o le “totoa i le molimau ia Iesu” [Mataupu Faavae ma Feagaiga 76:79] o le suega faigofie ma taua lea i le va o i latou o e o le a mauaina faamanuiaga o le malo selesitila ma i latou e o i le malo terasitila e maualalo ifo. Ina ia totoa, e manaomia ona tatou tepa taulai atu i le mana o Iesu Keriso ma Lana taulaga togiola e faatoilalo ai le oti ma, e ala i le salamo, e faamama ai i tatou mai agasala, ma e manaomia ona tatou mulimuli i le mataupu faavae a Keriso [tagai 2 Nifae 31:17–21]. Tatou te manaomia foi le malamalama ma le poto e uiga i le soifuaga ma aoaoga a le Faaola e taiala ai i tatou i luga o le ala o osiga feagaiga, e aofia ai sauniga paia o le malumalu. E tatau ona tatou mausali ia Keriso, taumamafa i Ana afioga, ma tumau e oo i le iuga [2 Nifae 31:20–21]. (Quentin L. Cook, “Totoa i le Molimau ia Iesu,” Liahona, Nov. 2016, 43)

• O le a se mea e mafai ona faigata ai ia te oe po o isi ona tumau i le lototoa i lau molimau ia Iesu Keriso?

• O le a se mea e fesoasoani ia te oe e taumafai ai ia lototoa i lau molimau i le Faaola?

I le avea ai ma se vaega o le talanoaga o le fesili na muamua atu, mafaufau e valaaulia tagata aoga e sue ma faasoa mai tusitusiga paia e faaosofia ai i latou ia lototoa i a latou molimau ia Iesu Keriso. E mafai ona e fautuaina i latou e amata i le Helamana 5:12.

Fai se fuafuaga

Faaalu sina taimi e mafaufau loloto ai i mea e mafai ona e faia ina ia e lototoa atili ai i lau molimau ia Iesu Keriso. Faauma faamatalaga e tolu nei i lau api faamaumau mo suesuega.

1. E mafai ona ou lototoa i la’u molimau ia Iesu i le asō e ala i le …

2. E mafai ona ou lototoa i la’u molimau ia Iesu i nai masina o sosoo ai e ala i le …

3. E mafai ona ou fesoasoani i isi ia tumau le totoa i a latou molimau ia Iesu e ala i le …

Mafaufau e valaaulia ni nai tagata aoga e toafimalie e faasoa mai se tasi pe sili atu o a latou faamatalaga ua maea ona faatumu. Ina ia faaiu, valaaulia se tasi e faasoa mai a latou molimau ia Iesu Keriso pe faasoa atu lau oe lava molimau e uiga ia te Ia.

Punaoa Faaopoopo

O le a le aafiaga o aoaoga o le Mataupu Faavae ma Feagaiga 76 i uluai tagata o le Ekalesia?

Na saunoa Peresitene Uilifoti Uitilafi (1807–1898) e uiga i ona lagona i lenei faaaliga:

Sa aoaoina au mai lo’u tamaitiiti e na o le tasi le Lagi ma e tasi le Seoli, ma sa ta’u mai o e uma e amioleaga e tasi lo latou faasalaga ae o e amiotonu e tasi lo latou mamalu. …

… Ina ua ou faitauina le faaaliga …, na faamalamalamaina lo’u mafaufau ma aumaia ai ia te au le olioli tele, na foliga mai ia te au o le Atua o lē sa faailoa maia lena mataupu faavae i le tagata, sa poto, amiotonu ma faamaoni, o i ai uiga silisili faaleatua ma se lagona lelei ma le malamalama, sa ou lagonaina e ogatusa o Ia ma le alofa, alofa mutimutivale, fai mea tonu ma le faautauta, ma sa ou lagonaina e tatau ona ou alofa atili i le Alii nai lo se isi lava taimi muamua i lo’u olaga. (Wilford Woodruff, “Remarks,” Deseret News, Me 27, 1857, 91)

Mataupu Faavae ma Feagaiga 76:72–74. O le a le uiga e faapea o i latou o e “maliliu e aunoa ma le tulafono” e mautofi i le malo terasitila?

Mai le Mataupu Faavae ma Feagaiga 76:72–74, ua tatou aoao ai e faapea o nisi tagata i le malo terasitila o i latou ia “o e na maliliu e aunoa ma le tulafono” ma o e “lei mauaina le molimau ia Iesu i la le tino” ae sa latou faia i le lalolagi o agaga. Peitai, e taua le malamalama o nisi o tagata o e aoaoina i le talalelei i le lalolagi o agaga o le a mautofi i le malo selesitila. E ala i le Perofeta o Iosefa Samita, sa faaali mai ai e le Alii “o i latou uma o e na maliliu e aunoa ma se malamalama e uiga i lenei talalelei, o e semanu latou te mauaina pe ana faatagaina i latou e ola, o le a avea ma suli o le malo selesitila o le Atua” (Mataupu Faavae ma Feagaiga 137:7).

Mataupu Faavae ma Feagaiga 76:79. E mafai faapefea ona ou lototoa i la’u molimau ia Iesu?

Na faamalamalama mai e Peresitene Ezra Taft Benson (1899–1994):

O i latou o e [lototoa i le molimau ia Iesu] e lototetele i le puipuia o le upumoni ma le amiotonu. O tagata ia o le Ekalesia o e ua faalauteleina o latou valaauga i le Ekalesia (tagai i le Mataupu Faavae ma Feagaiga 84:33), e totogi a latou sefuluai ma taulaga, e ola i ni olaga mama, e lagolagoina o latou taitai o le Ekalesia i upu ma faatinoga, e tausia le aso Sapati ia paia, ma usiusitai i poloaiga uma a le Atua. (Ezra Taft Benson, “Lototoa i le Molimau ia Iesu,” Liahona, Me. 1982, 63)

E mafai faapefea e la’u molimau ia Iesu Keriso ona aafia ai lo’u olaga?

Na aoao mai Elder Dieter F. Uchtdorf o le Korama a Aposetolo e Toasefululua:

O se molimau e tuuina mai ai se vaaiga talafeagai, uunaiga, ma se faavae mautu lea e fausia ai se olaga o le faamoemoega ma le tuputupu ae patino. O se punavai faifai pea o le mautinoa, o se soa moni ma faamaoni i taimi lelei ma le leaga. O se molimau tatou te maua ai se mafuaaga mo le faamoemoe ma le fiafia. E fesoasoani tatou te atiina ae ai se agaga o le talitonu o le a lelei mea uma ma le fiafia ma mafai ai ona tatou olioli i le matagofie o le natura. O se molimau e faaosofia ai tatou e filifili i le mea e tonu i taimi uma ma i tulaga uma. E faaosofia ai tatou e faalatalata atili i le Atua, ma faataga Ia e latalata atili mai ia te i tatou (tagai i le Iakopo 4:8).

O la tatou molimau patino o se talita e puipuia ai, ma e pei o se ai uamea o loo taialaina ai i tatou ma le saogalemu e ala i le pogisa ma le le mautonu. (Dieter F. Uchtdorf, “O Le Mana o se Molimau Patino,” Liahona, Nov. 2006, 39)

Gaoioiga Faaopoopo e Aoao Ai

Mataupu Faavae ma Feagaiga 76:40–43. Tala fiafia mo tagata uma

E mafai ona saunia tagata aoga e suesue fuaiupu 40–43 e ala i le talanoaina o fesili e pei o nei:

• O le a se tala fiafia na e mauaina talu ai nei?

• O a nisi o faataitaiga o le talafou aupito maoae ua tuuina mai i le lalolagi?

Valaaulia tagata aoga e suesue le Mataupu Faavae ma Feagaiga 76:40–43, ma vaavaai mo le tala fiafia mai le lagi. Ta’u i ai o le upu talalelei i le fuaiupu 40 o lona uiga o le “tala lelei.”

• O a tala lelei na e vaaia i nei fuaiupu?

Ina ia fesoasoani i tagata aoga ia malamalama i le uiga o Iesu Keriso “e faaolaina galuega uma a ona aao” (Mataupu Faavae ma Feagaiga 76:43), faamalamalama atu o i latou o e mautofi i le malo selesitila o le a maua faamanuiaga o le faaeaga, po o le ola e faavavau, faatasi ma le Tama Faalelagi. Ae e ala i Lona alofa mutimutivale, ua ofoina mai ai foi e le Faaola faamanuiaga eseese o le faaolataga i isi malo o mamalu ia i latou o e e le agavaa mo le malo selesitila.

Mafaufau e faaali le vitio “Salvation and Exaltation” mai le faailotaimi 2:55 i le 6:05 e fesoasoani ai i tagata aoga ia malamalama atili i le faaolataga ua tuuina mai e le Faaola i fanau a le Tama Faalelagi.

Mataupu Faavae ma Feagaiga 76:75. “Faatauasoina i le faitogafiti o tagata”

Ina ia fesoasoani i tagata aoga ia malamalama atili i faatusa i le fuaiupu 75, mafaufau e valaaulia se tagata aoga naunautai e ufiufi ona mata i se fusi mata. Ona valaaulia lea o se isi tagata aoga e tuu atu i le tagata aoga muamua ni faatonuga mo ni galuega faigofie, e pei o le tusia o se ata faigofie po o le tuuina o se mea faitino i se mea i totonu o le potu. A uma ua lava se taimi, aveese le fusi o mata ma fai atu i le tagata aoga na fusi mata muamua e faamatala mai pe na faape’i lea aafiaga.

Ona mafai lea e tamaiti aoga ona suesue le Mataupu Faavae ma Feagaiga 76:75, ma vaavaai mo le faamatalaga o i latou o le a mautofi i le malo terasitila. Mafaufau e fai atu i tagata aoga e talanoaina po o le a so latou manatu i le uiga o le tauaso faaleagaga ma pe o a auala o le a faatapulaaina ai i latou e le tauaso faaleagaga. Ona fai lea i tagata aoga e faailoa mai nisi o mea e mafai ona mafua ai le tauaso faaleagaga i talavou i aso nei.

Mataupu Faavae ma Feagaiga 76:111. “I maota ua saunia”

A uma ona suesueina e tagata aooga ia tikeri e tolu o le mamalu, mafaufau e fesoasoani ia i latou e faafesootai mea sa latou aoaoina i aoaoga a le Faaola i le Feagaiga Fou. Valaaulia se tagata aoga e faitau leotele le Ioane 14:2 ma fai i tagata o le vasega e faasoa mai mea ua latou malamalama i ai mai upu a le Faaola. Valaaulia i latou e fefaasinoa’i mau fesootai Ioane 14:2 ma le Mataupu Faavae ma Feagaiga 76:111 ma vaavaai mo mea e tutusa ai fuaitau e lua.