Lesona 87: Mataupu Faavae ma Feagaiga 76

Mataupu Faavae ma Feagaiga 76:50–70

“Faaatoatoaina e ala ia Iesu”

I le faaaliga o malo o le mamalu na vaaia e Iosefa Samita ma Sini Rikitone, tatou te maua ai le malamalama e uiga i le matafaioi taua o loo faia e Iesu Keriso i olaga o i latou uma o e o le a mautofi i le malo selesitila. O lenei lesona ua faamoemoe e fesoasoani i tagata aoga ia lagona le faamoemoe e mafai ona latou maua le faaeaga e ala ia Iesu Keriso.

Gaoioiga E Ono Mafai Ona Aoao Ai

Pe e maua ea le malo selesitila?

Mafaufau e faasoa atu lenei ata faataitai ma talanoaina fesili o loo mulimuli mai. O le a tuu atu i tagata aoga se avanoa e tali aloaia atu ai i le ata faataitai i se taimi mulimuli ane o le lesona.

O Luka o se alii talavou e faatuatua i le Atua ma faia le mea sili na te mafaia e ola amiotonu ai. E finagalo o ia ia agavaa e mau faatasi ma le Atua pe a mavae lenei olaga. Peitai, ua iloa e Luka na te le tausia i taimi uma poloaiga ma e mamao lava o ia mai le atoatoa. O nisi taimi e lotovaivai ai o ia ona o ona vaivaiga ma manatu e le mafai ona agavaa mo le malo selesitila.

• E mafai faapefea e isi talavou ona fesootai i lagona o Luka?

• O le a se vaega o ona mafaufauga e lagona le sa’o po o le lē sa’o? Aisea?

Valaaulia tagata aoga e mafaufau e uiga i o latou lava lagona po o fesili e uiga i le mafai ona toe foi atu i le afioaga o le Atua ma maua faamanuiaga o le faaeaga. Atonu e te manao e faamalamalama atu o le faaeaga o lona uiga o le mau e faavavau faatasi ma le Tama Faalelagi i le malo selesitila. E faasino foi tusitusiga paia i lenei faamanuiaga o le ola e faavavau.

Uunaia tagata aoga a o latou suesue e vaavaai mo upumoni e mafai ona fesoasoani ia i latou e lagona ai le faamoemoe sili atu e mafai e i latou ma isi ona maua lenei faamanuiaga e ala ia Iesu Keriso.

Faaaliga o le malo selesitila

Atonu e te manatuaina na vaai Iosefa Samita ma Sini Rikitone i se faaaliga maoae a o la galulue i le la faaliliuga musuia o le Tusi Paia. I le avea ai ma se vaega o lenei faaaliga vaaia, sa laʼua aoaoina ai e i ai tikeri eseese o le lagi po o malo o le mamalu . I lenei lesona, o le a tatou taulai atu i mea na aoaoina e Iosefa ma Sini e uiga i le malo selesitila ma i latou o le a mauaina.

Ina ia fesoasoani i tagata aoga e sauniuni e suesue lenei vaega o le faaaliga vaaia, valaaulia i latou e fai se siata e lua koluma faatasi ma ulutala nei i luga o se itulau o a latou api faamaumau mo suesuega.

E faapefea ona oo atu tagata i le malo selesitila	O faamanuiaga e maua e tagata i le malo selesitila

Faitau le Mataupu Faavae ma Feagaiga 76:50–70: ma faatumu le siata e fua i mea ua e iloa.

E mafai ona e valaaulia tagata aoga e galulue ma se paga e faitau ia fuaiupu ma faauma le siata. E mafai ona e valaaulia tagata aoga e fai mai ni a latou fesili e uiga i mea sa latou faitauina.

O nisi o faamatalaga i le “Punaoa Faaopoopo” e mafai ona fesoasoani e tali atu ai i fesili a tagata aoga.

• O a ni mea na e mauaina i nei fuaiupu na anoa ia te oe? Aisea?

• E faapefea ona e faamatalaina le faatosinaga a Iesu Keriso i olaga o i latou o e mautofi i le malo selesitila?

  I le avea ai ma se vaega o le talanoaga o le fesili na muamua atu, ia mautinoa ua malamalama tagata aoga i le upumoni lenei: E ala ia Iesu Keriso e mafai ai ona faaatoatoaina i tatou ma maua faamanuiaga o le faaeaga.

• O le a sou manatu i le uiga o le faaatoatoaina e ala ia Iesu Keriso?

• E mafai faapefea e lenei upumoni ona fesoasoani tatou te lagona ai le faamoemoe sili atu e mafai e i tatou ma isi ona mautofi i se aso i le malo selesitila?

Faamoemoe e ala ia Iesu Keriso

Ina ia fesoasoani i tagata aoga ia malamalama atili i le faamoemoe o loo ia i tatou uma e ala ia Iesu Keriso, mafaufau e valaaulia i latou e suesue i faamatalaga o loo maua i le tufaaga o loo avatu faatasi ai. Valaaulia i latou e maka fuaitau e taua ia i latou. Nai lo le faitauina e tagata aoga o le saunoaga a Elder J. Devn Cornish, e mafai foi ona e mafaufau e faaali atu ia i latou le vitio “Am I Good Enough?” (3:28), o loo maua i le ChurchofJesusChrist.org.

Faamoemoe e ala ia Iesu Keriso

Aisea ou te manaomia ai le fesoasoani a Iesu Keriso ina ia faaatoatoaina ai?

Na faasoa mai Elder J Devn Cornish o le Fitugafulu:

E tele ina tatou faalogo i o tatou tagata o fesili, “O lava ea lo’u lelei o se tagata?” po o le “Pe o le a ou ausia moni ea le malo selesitila?” Ioe, e leai se mea faapea o le “lava o le tulaga lelei.” E leai ma se tasi o i tatou e mafai ona “galueaina” pe “agavaa” mo lo tatou faaolataga, ae o se mea masani lava le tomanatu pe faamata e taliaina i tatou i luma o le Alii, ona o le auala lea ou te malamalama ai i nei fesili. …

Se’i ou tuu sa’o ma manino. O tali i fesili “O lava ea lo’u lelei?” ma le “Pe o le a ou ausiaina ea?” o le “Ioe! O le a oo ina lava lo outou lelei” ma “Ioe, o le a outou ausiaina pe afai tou te salamo pea ma aua le fai ‘alofaga ma fouvale.” O le Atua o le lagi e le o se laufalī le alofa e saili i soo se ‘alofaga e lafoai ai i tatou mai le taaloga. O Ia o lo tatou Tama e alofa atoatoa, ua naunau atili mai i lo se isi lava mea ia toe foi uma atu Lana fanau i le aiga ma mau faatasi ma Ia o ni aiga e faavavau. Na Ia foai moni mai lava Lona Alo e Toatasi na Fanaua ina ia le fano i tatou ae maua le ola e faavavau! Faamolemole ia talitonu, ma faamolemole ia faamoemoe ma faamafanafanaina, mai lenei upumoni e faavavau. Ua faamoemoe lo tatou Tama Faalelagi ia tatou ausia! O Lana galuega ma Lona mamalu lena. (J. Devn Cornish, “O Lava Ea Lo’u Lelei? Pe O Le A Ou Ausia Ea?,” Liahona, Nov. 2016, 32–33)

O le a se mea e mafai ona ou faia ina ia “faaatoatoaina ai e ala ia Iesu”?

Na aoao mai Sister Carol F. McConkie, sa i le Au Peresitene Aoao o Tamaitai Talavou:

O lo tatou faamoemoe mo le paia ua faatotonugalemu ia Keriso, i Lona alofa mutimutivale ma Lona alofa tunoa. O le faatuatua ia Iesu Keriso ma Lana Togiola, e mafai ai ona tatou mamā, aunoa ma se ila, pe a tatou faafiti i tatou lava mai mea e le faaleatua [tagai Moronae 10:32–33] ma salamo faamaoni. E papatisoina i tatou i le vai mo le faamagaloga o agasala. E faapaiaina o tatou agaga pe a tatou maua le Agaga Paia ma loto matala. O vaiaso taitasi, tatou te aai ma feinu ai i le sauniga o le faamanatuga. I le agaga o le salamo, ma manaoga faamaoni mo le amiotonu, tatou te osifeagaiga ai ua tatou malilie e tauave i o tatou luga le suafa o Keriso, manatua pea o Ia, ma tausi Ana poloaiga ina ia tatou maua pea Lona Agaga e faatasi ma i tatou. Mulimuli ane, ao tatou taumafai e le aunoa ina ia tasi ma le Tama, le Alo, ma le Agaga Paia, o le a tofusia i tatou ma se vaega o lo latou natura paia [tagai i le 2 Peteru 1:4]. (Carol F. McConkie, “O Le Malumalu e Matagofie,” Liahona, Me 2017, 10)

Na aoao mai Elder Dale G. Renlund o le Korama a Aposetolo e Toasefululua:

“E popole tele le Atua po o ai i tatou ma po o a ituaiga tagata e avea ai i tatou, nai lo tagata sa tatou i ai i le tuanai. E popole o Ia ina ia tatou taumafai pea. (Dale G. Renlund, “Le Au Paia o Aso e Gata Ai, Taumafai Pea,” Liahona, Me 2015, 56)

A lava loa le taimi e suesue ai tagata aoga, valaaulia i latou e talanoa mea sa latou aoaoina ma lagonaina. O se tasi o auala e faia ai lenei mea o le faamanatu atu lea ia i latou le ata faataitai mai le amataga o le lesona. E mafai ona e valaaulia i latou e tusi se tali ia Luka e mafai ona fesoasoani ia te ia e lagona ai le faamoemoe e mafai ona ia oo atu i le malo selesitila. Valaaulia i latou e faaaofia ai aoaoga mai le Mataupu Faavae ma Feagaiga 76, faapea foi se mea mai se tasi pe sili atu o faamatalaga sa latou suesueina, i la latou tali. Ona mafai lea e tagata aoga ona faasoa mai pe aotele a latou tali i se paga, pe faasoa mai e tamaiti aoga naunau i le vasega.

Tomanatu i mea na e aoaoina

Faauma le lesona i le tuu atu i tagata aoga se taimi e tomanatu ai i mea sa latou aoaoina ma lagonaina i le asō. E mafai ona e faaali atu fesili nei ma tuu atu se taimi i tagata aoga e tusifaamaumau ai a latou tali i a latou api faamaumau mo suesuega:

• O le a se mea na e aoaoina pe lagonaina i le asō na ofoina atu ia te oe le faamoemoe e ala ia Iesu Keriso?

• E mafai faapefea e mea na e aoaoina pe lagonaina ona aafia ai le auala e te manao e ola ai i lou olaga i aso taitasi?

Punaoa Faaopoopo

Aisea ou te manaomia ai le fesoasoani a Iesu Keriso ina ia faaatoatoaina ai?

Na saunoa Elder Paul V. Johnson o le Au-Fitugafulu:

Atonu e i ai so tatou naunautaiga e mafaufau e tatau ona tatou faaatoatoaina i tatou lava, ae e le mafai lena mea. O le mulimuli i fautuaga uma i tusi uma o fesoasoaniga faaletagata lava ia i le lalolagi o le a le faataunuuina ai. E na o le tasi lava le auala ma le igoa e tasi e oo mai ai le atoatoaga. “E faaatoatoaina i tatou e ala ia Iesu le puluvaga o le feagaiga fou, o lē na faia lenei togiola ua atoatoa e ala i le faamaligiina o lona lava toto.” [Doctrine and Covenants 76:69]. O lo tatou atoatoa e na o le alofa tunoa lava o le Atua e mafai ai. (Paul V. Johnson, “Ia Faaatoatoaina Ia te Ia,” Liahona, Nov. 2022, 40)

O i ai ea se faamoemoe mo a’u ia maua le faaeaga?

Na aoao mai Elder Jeffrey R. Holland o le Korama a Aposetolo e Toasefululua:

Pe o le a lava le tuai ua e mafaufau i ai, pe o le a foi le tele o avanoa e te manatu ua e misia, pe o le a foi le tele o mea sese e te lagona sa e faia, po o ni taleni e te manatu e te le o mauaina, po o le a foi le mamao ese mai le fale ma le aiga ma le Atua e te lagona ua oo i ai lau malaga, ou te molimau atu e te lei malaga lava i se mamao e le mafai ona aapa atu i ai le alofa faalelagi. E le mafai ona e magoto ia maualalo ifo nai lo le malamalama le gata o le Togiola a Keriso.

Pe lei avea oe ma se tasi o lo matou faatuatuaga pe sa e i ai muamua ma i matou ae lei tumau, e leai ma se mea na e faia pe o le a lava le tulaga sa i ai, e le mafai ona le toe faaleleia. E leai se faafitauli e le mafai ona faatoilaloina. E leai se miti i le gasologa o le olaga nei ma le faavavau e le mafai ona mauaina. (Jeffrey R. Holland, “O Le Au Faigaluega i le Tovine,” Liahona, Me 2012, 33)

Mataupu Faavae ma Feagaiga 76:53. O le a le uiga o le ia “faamauina e le Agaga Paia o le folafolaga”?

Na aoao mai Elder David A. Bednar o le Korama o Aposetolo e Toasefululua:

O le Agaga Paia o le Folafolaga o mana faamaonia lea o le Agaga Paia. Pe a faamaufaailogaina e le Agaga Paia o Folafolaga, ua fusifusia se sauniga, se tautoga, po o se feagaiga i le lalolagi ma i le lagi. (Tagai MF&F 132:7.) O le mauaina o lenei “faailoga o le faamaoniga” mai le Agaga Paia o le taunuuga lea o le faamaoni, amiosao, ma le tumau mausali i le faamamaluina o feagaiga o le talalelei “i [le] aluga o taimi” (Mose 7:21). Peitai, o lenei faamauga e mafai ona faaleaogaina e ala i le amioletonu ma le solitulafono. (David A. Bednar, “E Ao ina Toe Fanau Mai Outou,” Liahona, Me 2007, 22)

Mataupu Faavae ma Feagaiga 76:54. “O le a le uiga o le avea ma aiga o le “Ekalesia o le Ulumatua”?

O le Ekalesia a le Ulumatua “o se faaupuga e faamatala ai i latou o e maua le atoatoaga ma le mamalu o le Atua le Tama i le olaga a sau” (Glossary, ”Ekalesia o le Ulumatua,” The Joseph Smith Papers, josephsmithpapers.org).

Mataupu Faavae ma Feagaiga 76:64–65. O le a le uiga o le “toetutu mai o e amiotonu” po o le “uluai toetutu”?

O le Toetutu o e amiotonu ua iloa foi o le “uluai toetutu” (Mataupu Faavae ma Feagaiga 76:64) ma e aofia ai i latou uma o le a mautofi i malo selesitila ma le terasitila (tagai Mataupu Faavae ma Feagaiga 88:96–99). O Le Toetutu Muamua na amata ina ua matala tuugamau o e amiotonu i le maea ai o le Toetu o Iesu Keriso (tagai Mataio 27:52–53; Mosaea 15:21–24; 3 Nifae 23:9–10). O loo faasino le Mataupu Faavae ma Feagaiga i le Uluai Toetutu o le taimi o le a tulai mai ai e amiotonu mai o latou tuugamau i le Afio Mai Faalua o Iesu Keriso (tagai Mataupu Faavae ma Feagaiga 29:13; 45:54; 88:96–99). O le Toetutu o e amioletonu, po o le “toetutu mulimuli” (Mataupu Faavae ma Feagaiga 76:85), o le a aofia ai i latou o e o le a mautofi i le malo telesitila ma i latou o atalii o le malaia, ma o le a tupu i le faaiuga o le Meleniuma (tagai Mataupu Faavae ma Feagaiga 76:85; 88:32, 100–102). (Mataupu Faavae ma Feagaiga Tusi Lesona a le Tagata Aoga, [2018], 400)

Gaoioiga Faaopoopo e Aoao Ai

O se isi auala e suesue ai fuaiupu 51–53

E faaopoopo atu i le faaali mai ia i tatou o le fesoasoani ua faaavanoa mai e le Atua e avea ai e faapei o Ia, o le Mataupu Faavae ma Feagaiga 76:51–53 e mafai ona fesoasoani tatou te malamalama ai i filifiliga a i latou i le malo selesitila. E mafai ona e valaaulia tagata aoga e faitau ia fuaiupu, ma vaavaai mo filifiliga na faia e i latou o loo faamatalaina i nei fuaiupu. Ona mafaufau lea e valaaulia tagata aoga e galulue ma se paga ma maua se faamatalaga lautele atu o le auala latou te vaai ai ia i latou o loo faamatalaina i le malo selesitila o loo ola i o latou olaga i le olaga nei. O latou vaai mamao ea i nei tagata o faia ni mea sese? Pe o latou vaai faalemafaufau i vaivaiga e fesootai ma le auala na latou faia ai o latou olaga i aso taitasi?

Mataupu Faavae ma Feagaiga 76:53. “Manumalo e ala i le faatuatua.”

Ina ia fesoasoani i tagata aoga ia malamalama atili pe mafai faapefea ona latou “manumalo e ala i le faatuatua,” mafaufau e fesili atu ia i latou po o le a se mea e ono manaomia ona faatoilalo e se tasi. E mafai ona e faasino atu i latou i le Mosaea 3:19 e vaai ai i mea na aoao mai e le Tupu o Peniamina e uiga i lo tatou manaomia ona faatoilalo le tagata natura. Ma le isi, faasoa atu ia i latou le auala na saunoa ai Peresitene Russell M. Nelson e uiga i le taua o le manumalo ai i le lalolagi. Mafaufau e faasoa atu le faamatalaga lenei po o se isi o au filifiliga mai lana lauga:

E faapefea la ona tatou manumalo i le lalolagi? Sa aoao mai e le Tupu o Peniamina ia i tatou le auala. Na ia aoao mai e faapea “o le tagata natura o se fili i le Atua” ma e tumau pea faapea e faavavau “vagana ai ua gauai atu o ia i uunaiga a le Agaga Paia, ma tuu ese le tagata natura ma avea ma tagata paia e ala i le togiola a Keriso le Alii” [Mosaea 3:19]. O taimi taitasi e te saili ai ma mulimuli i uunaiga a le Agaga, o taimi taitasi e te faia ai soo se mea lelei—mea e lē faia e “le tagata natura”, ua e manumalo i le lalolagi. (Russell M. Nelson, “Manumalo i le Lalolagi ma Maua le Malologa,” Liahona, Nov. 2022, 97)

Mafaufau e valaaulia tagata aoga e faasoa mai soo se faataitaiga o mea lelei sa latou faia talu ai nei e le faia e le alii po o le tamaitai natura.