Lesona 86: Mataupu Faavae ma Feagaiga 76

Mataupu Faavae ma Feagaiga 76:19–24

“O le Molimau Lenei … Matou te Tuu Atu e Uiga Ia te Ia”

Faatasi ai ma faaaliga o loo tusia i le Mataupu Faavae ma Feagaiga 76, sa vaai Iosefa Samita ma Sini Rikitone ia Iesu Keriso lava Ia. Sa laua aoaoina le ala e totonugalemu ai le Faaola i lo tatou faaolataga ona tuuina mai lea o le molimau ia te Ia. O lenei lesona e mafai ona fesoasoani i tagata aoga ia lagonaina le alofa faateleina mo Iesu Keriso ma Lana matafaioi i le fuafuaga a le Tama Faalelagi.

Gaoioiga E Ono Mafai Ona Aoao Ai

E tāua ai Iesu Keriso ia te au

Tuu atu se avanoa mo tagata aoga e talanoaina ai pe aisea e taua ai Iesu Keriso ia i latou. E mafai ona e mafaufau e faaaoga le ata faataitai lenei, pe e mafai foi ona e valaaulia tagata aoga e fatu se isi ata.

E i ai faatasi ni vasega a Abbey ma Sarika i le aoga. I se tasi aso i le malologa, na tilotilo atu ai Sarika ia Abbey ma fai atu, “Ua ou faalogo i tagata o talanoa e uiga ia Iesu i lo’u olaga atoa. Ua ou faalogo foi ua e fai mai e te talitonu ia te Ia. Ou te lei aoao moni lava e uiga ia Iesu, ma ou te fia iloa. O le a se mea e mafai ona e ta’u mai ia te a’u e uiga ia te Ia, pe aisea foi e taua ai o Ia ia te oe?”

• Ana faapea o oe o Abbey, o le a sau tala e fai atu ia Sarika?

A o lei fai atu i ni nai tagata aoga e tali mai, mafaufau e tuu atu ia i latou se taimi e toe manatunatu ai i mea latou te ono fai atu ai. Atonu e aoga mo tagata aoga le faia o se lisi i a latou api faamaumau mo suesuega o mea latou te manatu e tatau ona iloa e tagata uma e uiga ia Iesu.

Mafaufau pe o a ni ou lagona e uiga ia Iesu Keriso ma lou lagona mafanafana e uiga i le talanoa atu i isi e uiga ia te Ia. A o e suesue i le asō, vaavaai mo aoaoga e fesoasoani e te lagona atili ai le alofa mo Iesu Keriso.

O se faaaliga vaaia o le Alo o le Atua

Atonu e aoga le valaaulia o tagata aoga e faasoa mai mea latou te manatua e uiga i tulaga na taitai atu ai Iosefa Samita ma Sini Rikitone i le vaai atu i le faaaliga o loo tusia i le Mataupu Faavae ma Feagaiga 76. Afai e manaomia, faamanatu atu ia i latou a o mafaufau loloto Iosefa Samita ma Sini Rikitone i tusitusiga paia, sa “pai atu le Alii i mata o lo [laʼua] malamalama” (Mataupu Faavae ma Feagaiga 76:19), ma sa la maua se faaaliga maoae.

O leMataupu Faavae ma Feagaiga 76:22–24 o se fuaitau o le atamai i aoaoga faavae. Mafaufau e valaaulia tagata aoga e faailoga ia fuaitau o le atamai i aoaoga faavae i se auala tulaga ese ina ia mafai ona latou mauaina gofie.

Faitau le Mataupu Faavae ma Feagaiga 76:1–6, 19–24, ma vaavaai mo mea na tautino mai e Iosefa ma Sini e uiga i le Tama Faalelagi ma Iesu Keriso.

Fautuaina le vasega e mataitu mea latou te maua i a latou tusitusiga paia. Mo se faataitaiga, e mafai ona latou faia se lisi o mea na latou maua i a latou api faamaumau mo suesuega.

I se isi itu, mafaufau e tuuina atu ni fasipepa lapopoa e mafai ai e tagata aoga ona tusifaamaumau mea ua latou aoaoina. A uma, e mafai ona e faaali atu pepa i luga o puipui o le potuaoga. E mafai e tagata aoga ona feoai solo i le potu e faitau mea na maua e isi ona tusi lea o se fatu i autafa o se mea latou te fiafia i ai pe fia iloa atili. Tuu atu i tagata aoga se taimi e talanoa ai i mea sa latou mauaina.

• O a upumoni mai nei fuaiupu ua sili ona taua ia te oe? Aisea?

Atonu na e mauaina le tele o upumoni i nei fuaiupu. I na mea, atonu na e matauina:

• E alofa mutimutivale Iesu Keriso ma e fiafia e faamanuia i tatou pe a tatou faamamalu ma auauna atu ia te Ia (fuaiupu 5).

• O Iesu Keriso o se tagata soifua, faamamaluina (fuaiupu 22).

• O Iesu Keriso o le Alo e Toatasi na Fanaua o le Tama (fuaiupu 23).

• I lalo o le taitaiga a le Tama Faalelagi, o Iesu Keriso o le Foafoa o mea uma (fuaiupu 24).

• O a ni mea ua fesoasoani nei upumoni ia te oe e malamalama ai e uiga i le ala e mafai ai e Iesu Keriso ona fesoasoani ia te oe ma isi?

O gaoioiga nei e mafai ona fesoasoani i tagata aoga e faaloloto ai lo latou malamalama ma lagona ai le taua o upumoni e lua o loo aoao mai e nei fuaiupu. E mafai ona e filifilia se tasi po o gaoioiga uma e lua e suesue faatasi o se vasega. Pe e mafai foi ona e faaali atu faatonuga o gaoioiga ma tofi ni vaega toalaiti po o ni paga e faamaea faatasi se tasi po o gaoioiga uma e lua.

Gaoioiga A: O loo soifua Iesu Keriso!

Afai e manaomia, saunia se kopi ua lolomiina o upu o le viiga “Ua Ou Iloa Lo’u Faaola” (Viiga, nu. 136) mo tamaiti aoga e faaaoga. Afai o loo outou faia faatasi lenei gaoioiga o se vasega, e mafai ona outou usuina le viiga i le taimi o lenei vaega o le lesona.

E faaopoopo atu i le suesueina e le vasega o le viiga i le laasaga 3, e mafai foi ona e valaaulia i latou e sue ni mau po o ni faamatalaga mai taitai o le Ekalesia o loo faamatala mai ai mea e mafai ona faia e le Faaola mo i tatou ona o loo soifua o Ia. O faataitaiga o mau e mafai ona e fautuaina atu e aofia ai le Ioane 6:40; Filipi 4:13; Mataupu Faavae ma Feagaiga 58:42; 84:88.

Mafaufau foi e faaaoga se tasi o vitio i lalo o le ulutala “Vitio Faaopoopo: O loo soifua o Ia!” i le “Gaoioiga Faaopoopo e Aoao Ai.”

1. Mafaufau e maka ia upu o “loo soifua o ia!” i le fuaiupu 22 i se auala e tulaga ese ai i latou i au tusitusiga paia.

2. Tusi le fasifuaitau Ona o loo soifua Iesu Keriso … i lau api faamaumau mo suesuega.

3. Faitau upu o le viiga “Ua Ou Iloa Lo’u Faaola” (Viiga, nu. 136), ma vaavaai mo faataitaiga o le ala e mafai ai e Iesu Keriso ona fesoasoani ia te oe ona o loo soifua o Ia.

4. Tusi i lalo ia le itiiti ifo ma le lima ni auala e mafai ona e faaumaina ai lena fasifuaitau e sili ona taua ia te oe.

Gaoioiga E: O Iesu Keriso o le Foafoa o mea uma

Ina ia fesoasoani i tagata aoga ia saunia lelei e tali atu i le laasaga 4, mafaufau e faasoa atu le saunoaga a Peresitene Boyd K. Packer i le “Punaoa Faaopoopo.”

1. Mafaufau e faailoga le fasifuaitau “e mai ia te ia, ma ala mai ia te ia, ma o ia, ua i ai lalolagi ma na foafoaina” (fuaiupu 24) i se auala e tulaga ese ai lenei fasifuaitau i au tusitusiga paia.

2. Sue mau po o faamatalaga mai taitai o le Ekalesia e faalolotoina ai lou malamalama i le matafaioi a Iesu Keriso o le Foafoa. O faataitaiga o mau e mafai ona e suesueina e aofia ai le Ioane 1:1–3; 3 Nifae 9:15; Mataupu Faavae ma Feagaiga 93:9–10; Mose 1:33; 7:30.

3. Talanoaina nisi o foafoaga a le Faaola e fesoasoani e te lagona ai le alofa o le Tama Faalelagi ma Iesu Keriso. Faamatala pe aisea.

4. Tusi i lalo ia le itiiti ifo ma le tolu ni auala e te lagona e mafai ona fesoasoani ai Iesu Keriso ia te oe ona o Ia o le Foafoa o mea uma.

A uma ona fai e tagata aoga le gaoioiga po o gaoioiga, tuu atu ia i latou e faasoa mai mea sa latou aoaoina ma lagonaina. Ia mautinoa e valaaulia i latou e faasoa mai mea na latou aoaoina e uiga i le ala e mafai ai e Iesu Keriso ona fesoasoani ia i latou ona o loo soifua o Ia ma ona o Ia o le Foafoa. E mafai e tagata aoga ona faasoa mai o latou manatu mai o latou nofoaga, pe e mafai foi ona e valaaulia tagata aoga naunautai e o mai i luma o le potu e faasoa mai a latou molimau ia Iesu Keriso.

Tauloto

Atonu e te manao e fesoasoani i tagata aoga e tauloto le mau faasino o le atamai i aoaoga faavae ma le fuaitau autu o le mau i le taimi o lenei lesona ma iloilo i latou i lesona i le lumanai. O le fasifuaitau autu o le mau o le “E ala mai ia [Iesu Keriso] ua i ai lalolagi ma na foafoaina.” O manatu mo gaoioiga o le taulotoina o loo i ai i le vaega faaopoopo i lalo o le “O Gaoioiga Toefaamanatu o le Atamai i Aoaoga Faavae.

Punaoa Faaopoopo

Mataupu Faavae ma Feagaiga 76:23. Aisea ua valaau ai Iesu “o le Alo e Toatasi na Fanaua e le Tama”?

O lo tatou Faaola, o Iesu Keriso, ua ta’ua o le Alo e Toatasi na Fanaua aua ua na o Ia lava le tagata i le lalolagi e fanau mai i se tina faaletino ma se Tama tino ola pea. Na Ia maua mai mana paia mai le Atua, Lona Tama (tagai i le Ioane 10:17–18). Mai Lona tina, o Maria, na Ia maua ai le tino faaletino ma oo ai ia te Ia le fia ai, fia inu, vaivai, tiga, ma le oti. (“O Le Misiona Paia a Iesu Keriso: O Le Atalii e Toatasi na Fanaua,” Ensign, Tes. 2013, 7)

Mataupu Faavae ma Feagaiga 76:24. O a mea ua tatou iloa e uiga ia Iesu Keriso ma le foafoaina o isi lalolagi?

Na aoao mai Elder Neal A. Maxwell (1926–2014) o le Korama a Aposetolo e Toasefululua:

I lalo o le taitaiga a le Tama, o Keriso o le Alii o le atulaulau, sa foafoaina lalolagi e le mafaitaulia—o lo tatou lalolagi e na o le tasi lea (tagai i le Efeso 3:9; Eperu 1:2).

E fia paneta o i ai i le atulaulau ma tagata o i ai? Tatou te le iloa, ae ua le na o i tatou i le atulaulau! O le Atua e le o se Atua o le na o le tasi se paneta! (Neal A. Maxwell, “O Molimau Faapitoa o Keriso”,” Ensign, Apr. 2001, 6)

E mafai faapefea e le malamalama o Iesu Keriso o le Foafoa ona fesoasoani ia te au?

O Peresitene Boyd K. Packer o le Korama a Aposetolo e Toasefululua (1924–2015) sa avea ma se tusiata faamanuiaina o lē sa fiafia e vaneina manulele laupapa. I se tasi aso sa avea ai o ia ma se pasese i se taavale na aveina e Elder A. Theodore Tuttle, ma sa tuu ai se laupapa vane matagofie i le nofoa pito i tua. Sa faamatala e Peresitene Packer le mea na sosoo ai:

I se magaala, sa taofi faafuasei ai e [Elder Tuttle] le taavale ma patatū ai i lalo le ata vane laupapa i luga o le fola ma nuti ai. Sa afe i tua le taavale ma tilotilo i ai. Sa matuā mafatia o ia. Sa ou le mafatia.

E aunoa ma le mafaufau i ai, sa ou fai atu, “Faagalo. O a’u na faia. E mafai ona ou toe faaleleia.” Ma sa ou faia. Na ou faia e sili atu le malosi nai lo le mea sa i ai. Sa ou faaleleia atili.

Ia, o ai na faia oe? O ai lou Foafoa? E leai se mea e uiga i lou olaga ua gausia pe malepelepe e le mafai ona Ia le toe faaleleia ma o le a toe faaleleia lava. (Boyd K. Packer, “The Instrument of Your Mind and the Foundation of Your Character” [Brigham Young University devotional, Fep. 2, 2003], 9, speeches.byu.edu)

Gaoioiga Faaopoopo e Aoao Ai

Faamatala ma malamalama i upu o tusitusiga paia

Atonu e i ai ni fesili a tagata o le vasega e uiga i upu o loo faaaoga i le Mataupu Faavae ma Feagaiga 76:24 e faatatau i faatinoga a le Faaola o le foafoaga. Mafaufau e valaaulia tagata aoga e faaaoga a latou masini feaveai e sue ai faauigaga mo upu nei (faauigaga fautuaina o loo merriam-webster.com):

• e ala i le (meafaigaluega patino o le foafoaga)

• e ala (ona o)

• o (faapogai po o le mafuaaga)

• fanauina (na aumaia i le olaga e)

• i le (fesootai po o le pipii atu i ai)

A uma ona faamatala mai e le vasega ia upu, fesoasoani ia latou malamalama pe mafai faapefea ona latou fesootai i le foafoaina e le Faaola.

Talisapaia o foafoaga a le Alii

A uma ona suesue e le vasega ia mau e uiga i le Faaola o le Foafoa, mafaufau e faasoa atu le faamatalaga lenei. Na molimau mai Elder Neil L. Andersen o le Korama a Aposetolo e Toasefululua:

Ou te fiafia e talanoa atu e uiga i le Faaola. O Ia, i lalo o le taitaiga a le Tama, o lē na foafoaina lenei lalolagi mo i tatou. Sa ia tuueseeseina le malamalama mai le pogisa, le vai mai le laueleele.

O Ia lea na aumaia le faatulagaga tatau ma le matagofie, o laau ma meaola.

O le Foafoa lea na tali mai i le valaau a lo tatou Tama i upu e tumu i le alofa ma le lotomaualalo: “O A’u lenei, auina atu a’u” [Aperaamo 3:27]. “Lou Tama e, ia faia lou finagalo, ma ia ia te oe pea le mamalu e faavavau” [Mose 4:2].

Oka se lotofaafetai atonu na tatou lagonaina i le iloaina o Ia, o le Toatasi na Fanaua e le Tama, o lē sa pele ma filifilia mai le amataga, sa naunau e faataunuu le fuafuaga e faavavau o le faaolataga a lo tatou Tama Faalelagi mo i tatou. (Neil L. Andersen, “Time for the Savior at Christmas” [Brigham Young University devotional, Dec. 7, 2021], 6, speeches.byu.edu)

Mafaufau e faaali se tasi o vitio nei:

• “Sa Tatou Ola Faatasi ma le Atua” (4:00)

  We Lived With God

• “O le Foafoaga Sili a le Atua” (2:51)

  God's Greatest Creation

Vitio faaopoopo: O loo soifua o Ia!

O vitio nei o loo faamamafa mai ai le ala ua faamanuiaina ai i tatou e se Faaola soifua, i lenei olaga ma le faavavau.

• “Ua Toe Soifua o Ia ma O Le a Faapea Foi Ona Faia Outou” (2:28)

  He Lives Again and So Will You

• “Mataupu Faavae o le Filemu: Faatuatua” (3:12)

  Principles of Peace: Faith #PrinceofPeace

• “Ua Faamalolo e le Faaola Manua Uma” (11:48)

  The Savior Heals All Wounds

E mafai ona ou molimau atu ia Iesu Keriso

Faasino atu le fuaitau “ina ua mavae le tele o molimau” i le fuaiupu 22. Valaaulia tagata aoga e mafaufau i le tele o molimau na tuuina mai e uiga ia Iesu Keriso i tusitusiga paia. E mafai ona e fautuaina i latou e saili ma suesue nisi o nei mea.

Valaaulia tagata aoga e manatunatu i a latou molimau ia Iesu Keriso. Mafaufau e tuu atu ia i latou se taimi e tusi ai a latou molimau ma uunaia i latou e faasoa atu i isi, e pei o o latou aiga, i le lotu, po o luga o ala o faasalalauga faaagafesootai. E mafai foi ona e tuu atu i tagata aoga se taimi e faasoa mai ai a latou molimau i le taimi o le vasega.