“Leksiyon 89—Doktrina ug mga Pakigsaad 78: Ang Balay Tipiganan sa Ginoo,” Manwal sa Magtutudlo sa Seminary sa Doktrina ug mga Pakigsaad (2025)
“Doktrina ug mga Pakigsaad 78,” Manwal sa Magtutudlo sa Seminary sa Doktrina ug mga Pakigsaad
Leksiyon 89: Doktrina ug mga Pakigsaad 77–80
Doktrina ug mga Pakigsaad 78
Ang Balay Tipiganan sa Ginoo
Ang Ginoo nagsugo nila ni Joseph Smith, Sidney Rigdon, Newel K. Whitney, ug uban pang halangdon nga mga pari sa pag-organisar sa ilang mga kaugalingon ngadto sa usa ka grupo nga gitawag og Nagkahiusang Kapunongan. Ang kapunongan nagdumala sa kabtangan sa Simbahan, mga tipiganan, ug mga paningkamot sa pagmantala ug mihatag og mga kapanguhaan aron makatabang nga matubag ang temporal nga mga panginahanglan sa mga Santos. Kini nga leksiyon makatabang sa mga estudyante nga madugangan ang ilang tinguha nga mahimong sama sa Manluluwas pinaagi sa pag-atiman niadtong nanginahanglan.
Mga Posibleng Kalihokan sa Pagkat-on
Ang Nagkahiusang Kapunongan
Usa ka paagi sa pagsugod sa leksiyon mao ang pagtabang sa mga estudyante sa paghimo og senaryo sa usa ka pamilya nga adunay temporal nga mga panginahanglan. Isip kabahin sa senaryo, paglakip og pinansyal nga mga kalisdanan nga giatubang sa pamilya ug ilang piho nga mga panginahanglan. Kini nga senaryo hisgotan unya diha sa leksiyon.
Ipasabot nga ang mga estudyante makakat-on og dugang mahitungod sa mga paagi nga ang Ginoo nagtabang kanato sa pag-atiman niadtong nanginahanglan samtang sila magtuon sa Doktrina ug mga Pakigsaad 78. Dapita ang mga estudyante sa pagtinguha og pagpadayag aron masayod kon kinsa ang buot sa Ginoo nga ilang tabangan ug kon unsay ilang mahimo.
Niadtong Marso 1, 1832, si Propeta Joseph Smith nakigtagbo sa usa ka grupo sa halangdon nga mga pari sa Kirtland, Ohio. Atol sa miting, ang Propeta midikta sa pagpadayag nga narekord diha sa Doktrina ug mga Pakigsaad 78. Human niana, ang Nagkahiusang Kapunongan natukod. Base sa balaod sa pagpahinungod, ang Nagkahiusang Kapunongan nagdumala sa kabtangan sa Simbahan, pinansyal nga mga paningkamot, ug mga paningkamot sa pag-imprinta diha sa Ohio ug Missouri. Pinaagi sa kapunongan, ang Ginoo mitukod og usa ka tipiganan aron sa pag-atiman niadtong nanginahanglan, ug sila si Joseph Smith, Sidney Rigdon, ug Newel K. Whitney gisugo sa pagbiyahe ngadto sa Missouri (Zion) sa pag-organisar niini.
Basaha ang Doktrina ug mga Pakigsaad 78:1–6, mangita kon nganong ang Ginoo mitinguha sa Iyang mga sulugoon sa pag-organisar sa ilang mga kaugalingon niini nga paagi.
-
Unsa ang gitudlo niini nga mga bersikulo mahitungod sa mga tinguha sa Ginoo alang sa Iyang mga katawhan?
-
Ngano kaha nga ang pag-atiman sa mga kabos gikinahanglan aron “sa pagpadayon sa kahimoan,” sa Zion? Sa unsang paagi kini makahatag og himaya ngadto sa Langitnong Amahan?
Ang balay tipiganan sa Ginoo
Ikonsiderar ang pagdala og usa ka kahon ngadto sa klase ug sa pagbutang niini og timailhan nga “Ang Balay Tipiganan sa Ginoo.” Pangutan-a ang mga estudyante kon unsa sa ilang hunahuna ang balay tipiganan sa Ginoo. Mahimo kang magdapit og usa ka bishop o presidente sa branch aron sa paghisgot kon sa unsang paagi ang tipiganan sa Ginoo nagalihok sa inyong dapit.
Basaha ang mosunod nga kahulogan sa balay tipiganan sa Ginoo, mangita kon sa unsang paagi ang Manluluwas nagtabang niadtong nanginahanglan.
Ang tanang mga kapanguhaan nga anaa sa Simbahan aron sa pagtabang niadtong adunay temporal nga mga panginahanglan gitawag og ang balay tipiganan sa Ginoo (tan-awa sa Doktrina ug mga Pakigsaad 82:18–19). Kini naglakip sa mga halad sa panahon, mga talento, kaluoy, mga materyal, ug pinansyal nga mga kapanguhaan sa mga miyembro aron sa pagtabang niadtong nanginahanglan.
Ang balay tipiganan sa Ginoo anaa sa matag ward ug stake. Ang mga lider kasagaran makatabang sa mga indibidwal ug mga pamilya nga makakita og mga kasulbaran sa ilang mga panginahanglan pinaagi sa pagggamit sa kahibalo, mga kahanas, ug serbisyo nga gitanyag sa mga miyembro sa ward ug stake. (Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 22.2.1, ChurchofJesusChrist.org)
Hisgoti ang piho nga mga paagi nga ang kabatan-onan makatampo sa balay tipiganan sa Ginoo (nga mao ang, panahon, mga talento, kaluoy, mga materyal, pinansyal nga mga kapanguhaan). Hatagi og gagmayng piraso sa papel ang mga estudyante. Hangyoa ang mga estudyante sa pagsulat og labing menos usa ka piho nga butang nga mahimo nilang personal nga matampo ngadto sa balay tipiganan sa Ginoo ug dayon ibutang ang ilang papel diha sa kahon.
Pagdapit og estudyante sa pagkuha og mga butang gikan sa balay tipiganan ug sa paggiya og usa ka panaghisgot kon sa unsang paagi ang piho nga mga kontribusyon makatabang sa pamilya sa senaryo nga nahimo sa klase. Balika kini nga kalihokan sa pipila ka higayon.
Ang mosunod nga pamahayag gituyo aron hunahunaon sa mga estudyantesa ilang kaugalingon.
Hunahunaa kon unsa ka kaandam sa pagtampo sa imong panahon, mga talento, ug mga kapanguhaan aron sa pagtabang niadtong nanginahanglan (andam kaayo, medyo andam, o dili gayod andam).
Dasiga ang mga estudyante nga magtinguha og inspirasyon pinaagi sa Espiritu Santo aron matabangan sila nga mobati nga mas andam sa pagtabang niadtong nanginahanglan ingon man sa pagkahibalo sa mga paagi nga sila makatampo sa balay tipiganan sa Ginoo.
Basaha ang Doktrina ug mga Pakigsaad 78:7–8, 14–15, mangita sa mga panalangin nga gipangsaad sa Ginoo.
-
Sa unsang paagi kini nga mga panalangin makaimpluwensiya kanimo ug sa mga tawo nga imong kaila?
-
Unsa ang gisaad sa Ginoo niadtong kinsa nag-atiman niadtong nanginahanglan?
Tabangi ang mga estudyante sa pag-ila og usa ka kamatuoran sama sa mosunod: Ang pag-atiman sa mga kabos ug timawa nagtabang kanato sa pagpangandam alang sa usa ka dapit sa celestial nga gingharian.
Ang Mateo 25:31–40 mahimong gamiton sa pagtabang sa mga estudyante nga makasabot sa baroganan.
-
Sa unsang paagi sa imong hunahuna nga ang pag-atiman niadtong nanginahanglan makatabang kanato sa pag-andam sa pagpanunod sa celestial nga gingharian?
-
Sa unsang paagi nga ang Manluluwas usa ka ehemplo sa pag-atiman niadto nga nanginahanglan?
-
Sa unsang paagi nga ang usa ka tawo makadugang sa ilang tinguha sa paghigugma ug pag-atiman niadto nga nanginahanglan sama sa gibuhat sa Manluluwas?
Unsay atong mahimong buhaton
Basaha ang Doktrina ug mga Pakigsaad 78:17–22, mangita og mahinungdanon nga mga pulong o mga hugpong sa mga pulong nga makatabang kanato sa pagsunod sa Manluluwas.
Aron matabangan ang mga estudyante nga maapil sa panaghisgot, mahimo nimong ipakita ang mosunod nga mga pangutana ug motugot sa mga estudyante sa paghunahuna mahitungod kon unsaon nila sa pagtubag. Mahimo nimong isulagma nga pilion ang mga estudyante sa pagtubag pinaagi sa paghangyo og usa ka tawo sa pagpili og usa ka bulan sa tuig. Ang andam nga mga estudyante nga natawo nianang bulana mahimong mopili og usa ka pangutana nga tubagon apan dili angay nga mobati nga napugos sa pag-apil.
Tabangi ang matag estudyante nga makatampo sa kasinatian sa pagkat-on: Alang sa dugang nga pagpraktis niini, tan-awa ang pagbansay nga giulohan nga “Paghimo og palibot diin ang tanan gitahod ug nahibalo nga ang ilang mga tampo gihatagan og bili” nga makita sa Pagpalambo sa mga Kahanas sa Magtutudlo: Higugmaa Kadtong Imong Gitudloan. Ikonsiderar ang pagpraktis sa kahanas pinaagi sa pagpakigsulti nga imong gipabilihan ang mga estudyante sa dili pa sila mokomento o samtang sila mopataas sa ilang kamot sa pagkomento.
-
Unsa nga mga pulong o mga hugpong sa mga pulong ang labing makahuloganon nganha kanimo? Ngano man?
-
Unsay imong nakit-an nga makatabang kanato sa pagsunod sa sugo sa Manluluwas sa pag-atiman niadtong mga nanginahanglan?
-
Unsa ang imong nakaplagan nga nagpakita sa tinguha sa Manluluwas nga kita mahisama Kaniya?
Hatagi og laing gagmayng piraso sa papel ang mga estudyante. Hatagi sila og panahon sa pag-ila sa mga pag-aghat nga mahimong ilang nadawat mahitungod sa pagtabang sa usa ka tawo nga nanginahanglan o sa piho nga mga paagi nga ilang gibati nga sila makatampo sa balay tipiganan sa Ginoo. Dapita sila sa pagsulat sa ilang mga impresyon. Mahimo dayon nga ibutang sa mga estudyante ang ilang papel diha sa kahon nga nagrepresentar sa balay tipiganan sa Ginoo isip usa ka paagi sa pagpakita sa ilang kaandam sa pagtabang, o mahimo nilang dad-on ang papel sa balay isip pahinumdom.